shadow
Diocese de Dili > NOTÍCIAS > LETURA DIÁRIA > XV DOMINGO TEMPO COMUM (ANO A)

XV DOMINGO TEMPO COMUM (ANO A)

Primeira Leitura                     Is. 55, 10-11

Lia housi Livro Profeta Isías:

Na’i ko’alia nune’e: “Udan no maha-wén, uainhira monu housi Lalehan mai, la fila hikas molok seidauk habokon rai; molok seidauk hafunan rai hodi fó fulin; fó fulin ba rai-na’in, fó hahan ba ida nebé han. Nune’e, lia-fuan nebé sai housi Ha’u ibun la fila hikas molok seidauk halo di’ak, seidauk tuir Ha’u nia hakarak, molok seidauk halo tuir nia knar.” 

Maromak Futar Lia.

 

Salmo Responsorial                                                                                                                              Sal. 64(65), 10

Refrão : Fini monu ba rai di’ak fó fuan barak!!! Repete-se

Na’i, Ita haraik matan ba rai

habokon nia ho ué, hodi habokur nia.

Mota boot sira ué nakonu,

housi rai ai-han tubun. Refrão

 

Na’i, Ita habokur rai,

Ita habokur nia ué-dalan,

Ita habokur nia rai fila,

Ita haraik bensa ba fini. Refrão

 

Segunda Leitura                                                                                                                                       Rom 8, 18-23

Lia housi São Paulo nia surat ba sarani sira iha Roma:

Maun-alin sira: Ha’u hanoin katak terus iha ohin loron nian la hanesan ho di’ak nebé sei mósu iha ita leet. Tebes, criatura tomak hein ho laran loron nebé ema hotu sei mósu hanesan Maromak nia oan. Criatura sira ne’e terus hela iha mundo nia kbiit, laos tuir sira nia hakaran, maibé, tan Maromak tau sira hanesan ne’e. Maibé, sira hein katak criatura tomak sei sai housi fatin aat nia kbiit, atu simu fali kbiit di’ak ida hanesan Maromak oan. Ita hatene katak, to’o ohin, criatura tomak terus, terus hanesan feto atu tur-ahi. Laos criatura de’it: Ita hotu mós, nebé hahu simu ona Espírito Santo, ita terus iha ita an rasik hodi hein atu sai oan fudin; hodi hein atu soi ita nia isin.

Maromak Futar Lia.

 

Aclamação                                                                                          

Refrão : Aleluia, Aleluia!! Repete-se

Fini ne’e Maromak nia lia-fuan, Cristo mak kuda hela; 

ida nebé hetan Nia, hetan moris rohan laek. Refrão

 

Evangelho              (Forma Breve)                                                                                                             Mt 13, 1-23

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus sai housi uma, hodi ba tur iha tasi ibun. Ema wa’in mai hale’u Nia, tan ne’e, Jesus sa’e ba tur tiha iha ró ida; ema sira ne’e hamriik hela iha tasi ibun. Jesus hateten lia wa’in hodi dadolin, dehan:  “Ema ida ba kuda fini iha rai. wainhira nia kuda, fini balu monu iha dalan ibun; manu sira hare, han tiha. Fini seluk monu iha fatuk laran, iha nebé la dun iha rai; moris duni, tan rai la dun barak. Maibé loron manas halo mate tiha, tan sira abut la dun klean. Fini seluk monu iha ai-tarak laran; ai-tarak moris mai, halo mate tiha. Fini seluk fali, monu iha rai di’ak, hodi fó fulin: balu nafulin to’o atus, seluk to’o hitu-nulu. Seluk fali to’o tolu-nulu. Ema nebé iha tilun, rona mai!”.

Lia Maksoyn.

 

Evangelho              (Forma Longa)                                                                                                            Mt 13, 1-23

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus sai housi uma, hodi ba tur iha tasi ibun. Ema ua’in mai hale’u Nia, tan ne’e, Jesus sa’e ba tur tiha iha ró ida; ema sira ne’e hamriik hela iha tasi ibun. Jesus hateten lia ua’in hodi dadolin, dehan:  “Ema ida ba kuda fini iha rai. wainhira nia kuda, fini balu monu iha dalan ibun; manu sira hare, han tiha. Fini seluk monu iha fatuk laran, iha nebé la dun iha rai; moris duni, tan rai la dun barak. Maibé loron manas halo mate tiha, tan sira abut la dun klean. Fini seluk monu iha ai-tarak laran; ai-tarak moris mai, halo mate tiha. Fini seluk fali, monu iha rai di’ak, hodi fó fulin: balu nafulin to’o atus, seluk to’o hitu-nulu. Seluk fali to’o tolu-nulu. Ema nebé iha tilun, rona mai!”  Escolante sira hakbesik ba Jesus, hodi dehan:  “Na’i, tan sa Ita hateten hodi dadolin ba sira?” Jesus simu hodi dehan: “Tamba imi hetan kmanek atu hatene Reino Lalehan nia Mistério sira;  maibé, sira lae. Ema nebé iha, sei fó tan to’o resin maibé, ida nebé la iha, sasan nebé nia iha, sei hasai tiha. Ha’u hateten hodi dadolin ba sira, tan sira iha matan, maibé la hare; iha tilun, maibé la rona, la hare mós.  Profeta Isaías nia lia-fuan monu los ba sira:  ‘Imi se tilun, maibé la hatene. Imi sei loke matan, maibé la hare! Tebes, povo ida ne’e nia neon taka tiha ona: sira taka tiha tilun no matan hodi keta rona ho tilun, keta hare ho matan, atu sira neon la bele nakloke, nune’e, Ha’u bele sadia sira.’ Rahun-di’ak ba imi nia matan, tan hare, rahun-di’ak ba imi nia tilun, tan rona!  Ha’u dehan tebes ba imi: Profeta sira ua’in no ema santo sira, hakarak hare buat nebé imi hare, maibé la hare, sira hakarak rona, maibé la rona. Ne’e duni, imi rona, hodi hatene dadolin ne’e katak sa:  uainhira ema ida rona Lalehan nia lia-fuan, maibé la hatene, diabo mai kedas hodi buka halakon tiha lia nebé simu ona. Ne’e, ida nebé simu fini iha dalan ibun. Ida nebé simu fini iha fatuk laran, hanesan ema nebé rona lia-fuan, hodi simu ho ksolok. Maibé, abut la iha, nia laran la dun metin; to’o hetan susar eh terus tan lia-fuan ne’e, nia monu kedas. Ida nebé simu fini iha ai-tarak, hanesan ema nebé simu lia-fuan, maibé, nia laran metin resin ba mundo nia sasan no nia soin; soin ne’e halakon lia-fuan hodi la fó fuan. Ida nebé simu fini iha rai di’ak, hanesan ema nebé simu lia-fuan hodi hatene. Ida ne’e fó fuan hodi fó fulin to’o atus, hitu-nulu eh tolu-nulu.”

Lia Maksoyn.

Leave a Reply

Your email address will not be published. Required fields are marked *