shadow
Diocese de Dili > NOTÍCIAS > LETURA DIÁRIA > XVI DOMINGO TEMPO COMUM (ANO A)

XVI DOMINGO TEMPO COMUM (ANO A)

Primeira Leitura           Sab. 12, 13. 16-19

Lia housi Livro Sabedoria:

La iha Maromak seluk, maibé ida de’it, nebé tau matan ba hot-hotu, nune’e Ita halo ami haré katak Ita tesi lia la sala. Ita nia kbiit halo moris justiça, Ita ukun sasan tomak hodi tahan sira nafatin. Ita hatudu kbiit, wainhira ema la fiar Ita bele halo hotu; Ita hamoe ema sira nebé hatene Ita nia kbiit. Maske Ita iha kbiit atu ukun, Ita halo justiça ho laran maus, Ita ukun ami ho laran luak, tan wainhira Ita hakarak, Ita nia kbiit tahan. Lao tuir dalan ida ne’e, Ita hanorin povo sira katak ema di’ak sei belun ho ema tomak, hanorin Ita oan sira atu hein ho laran metin katak, liu tiha salan, Ita haraik laran moras.

Maromak Futar Lia.

 

Salmo Responsorial                                                                                                  Sal. 85(86), 5-6. 9-10. 15-16a

Refrão : Na’i, Ita laran di’ak, laran luak!!! Repete-se

Na’i, Ita laran di’ak no laran luak,

Hadomi perdua sira nebé harohan ba Ita.

Na’i, rona ha’u nia hamulak,

Simu ha’u nia lian. Refrão

 

Nação tomak nebé Ita halo,

Sei mai hana’i hahí Ita naran.

Tan Ita Boot duni halo kmanek oi-oin;

Ita de’it mak Maromak. Refrão

 

Ita, Maromak laran di’ak, laran luak,

La rai hirus, hanoin nafatin.

Hanoin Ita atan,

Na’i, haraik kbiit mai ha’u. Refrão

 

Segunda Leitura                                                                                                                                       Rom 8, 26-27

Lia housi São Paulo nia surat ba sarani sira iha Roma:

Maun alin sira: Espírito Santo mai tulun ita nia moris, tan Ita la hatene husu, atu hamulak lolós; Espírito ne’e duni harohan mai ita ho terus nebé, susar atu hakerek. Ida nebé  haré ita laran hatene Espírito nia hakaran. Tan Espírito harohan ba sarani sira tuir Maromak nia hakaran.

Maromak Futar Lia.

 

Aclamação                                                                                                                                                            Mt 13,24

Refrão : Aleluia, Aleluia!! Repete-se

Reino Lalehan hanesan ema nebé

Kuda fini di’ak iha nia toos. Refrão

 

Evangelho              (Forma Longa)                                                                                                         Mt 13, 24-43

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus hateten ba ema sira, dadolin ida ne’e: “Reino Lalehan nian hanesan ema ida nebé kuda fini di’ak iha nia toos. Wainhira nia tona, ema aat ida mai kuda du’ut aat iha trigo nia leet hafoin ba tiha. Wainhira trigo sa’e mai hodi fo fulin, mosu mós du’ut aat. Toos na’in nia atan sira dehan ba nia: ‘Na’i, ita la kuda de’it fini di’ak iha toos? Oinsa, moris mós du’ut aa?’ Na’i hatan: ‘ema aat ida mak halo’. Atan sira simu ba nia: ‘ita hakarak, ami ba fokit tiha du’ut aat?’. Toos na’in dehan: ‘keta, keta halo, imi fokit du’ut aat, fokit mós trigo. Husik sira moris hamutuk too loron atu sohi; iha loron ne’e, Ha’u sei dehan ba ema sira: hili uluk du’ut aat, kesi hamutuk tiha atu sunu; hafoin hili trigo hodi tau hamutuk iha uma”. Jesus hanorin dadolin seluk: “Reino Lalehan nian hanesan móstarda musan ida nebé ema ida kuda iha toos. Musan ne’e sei kiik liu musan seluk maibé, moris tiha mai, boot liu ai-horis seluk iha toos, boot hanesan ai ida; manu fuik sira mai tuur iha nia sanak”. Jesus dehan dadolin seluk: “Reino Lalehan hanesan fermento ida nebé feto ida tau ba farina atu halo farina ne’e sa’e”. Lia hirak ne’e, Jesus hateten ba povo sira hodi dadolin; Jesus la hanorin ho lia seluk maibé, hodi dadolin de’it hodi halo tuir lia nebé profeta haklaken ona, dehan: “Ha’u sei loke Ha’u ibun, hanorin hodi dadolin; Ha’u sei haklaken lialos nebé subar hela molok mundo foun mosu”. Jesus husik tiha ema sira ne’e, fila fali ba uma. Escolante sira hakbesik Jesus, hodi dehan: “Na’i, hanorin lolós mai mai dadolin du’ut aat nian ne’e”. Jesus hatan: “ema nebé tau fini di’ak iha rai ne’e; Mane Maksoyn; toos mak mundo ne’e. Fini di’ak katak Reino Lalehan nia oan sira; du’ut aat katak diabo nia oan sira; ema aat nebé kuda du’ut aat katak demónio. Loron atu ema ba sohi katak mundo atu hotu ona; ema nebé tama ba sohi ne’e katak anjo sira. Hanesan ema hili du’ut aat hodi tau ba ahi; nune’e mós sei mosu iha loron ikus; Mane Maksoyn sei haruka Ninia anjo sira mai, Anjo sira ne’e sei hasai husi Nia Reino, ema laran makerek no sira nebé moris aat; hafoin sei tau sira iha fatin ida nebé iha de’it ahi. Iha nebá, sira sei terus, sei tanis, Maibé, ema santo sira sei nabilan hanesan loron iha Aman Maromak nia Reino. Ema nebé iha tilun, rona mai!”

Lia Maksoyn.

 

Evangelho              (Forma Breve)                                                                                                         Mt 13, 24-30

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus hateten ba ema sira, dadolin ida ne’e: “Reino Lalehan nian hanesan ema ida nebé kuda fini di’ak iha nia toos. Wainhira nia toba, ema aat ida mai kuda du’ut aat iha trigo nia leet hafoin ba tiha. Wainhira trigo sa’e mai hodi fo fulin, mosu mós du’ut aat. Toos na’in nia atan sira dehan ba nia: ‘Na’i, ita la kuda de’it fini di’ak iha toos? Oinsa, moris mós du’ut aa?’ Na’i hatan: ‘ema aat ida mak halo’. Atan sira simu ba nia: ‘ita hakarak, ami ba fokit tiha du’ut aat?’. Toos na’in dehan: ‘keta, keta halo, imi fokit du’ut aat, fokit mós trigo. Husik sira moris hamutuk too loron atu sohi; iha loron ne’e, Ha’u sei dehan ba ema sira: hili uluk du’ut aat, kesi hamutuk tiha atu sunu; hafoin hili trigo hodi tau hamutuk iha uma”.

Lia Maksoyn.

Leave a Reply

Your email address will not be published. Required fields are marked *