shadow
Diocese de Dili > NOTÍCIAS > LETURA DIÁRIA > Segunda-Feira, XVIII Semana iha Tempo Comum (ANO A)

Segunda-Feira, XVIII Semana iha Tempo Comum (ANO A)

Primeira Leitura                       Jer. 28. 1-7

Lia housi Livro Jeremias nian:

Iha tinan nebá nia laran, iha tinan ba dala háat Sedecias nia ukun nu’udar liurai Judá nian, iha fulan lima, Ananias, Azur nia oan, profeta housi Gabaon, hateten nune’e ba Jeremias, iha Na’i nia Templo, iha sacerdote sira no povo hotu nia oin: “Na’i Lalehan no rai nian, Maromak Israel nian dehan nune’e: “Ha’u ba harahun liurai Babilónia nia ukun. Liu tiha tinan rua, Ha’u sei halo sasan hotu Templo nian lori fila hikas mai iha fatin ne’e, nebé Nabucodonosor, liurai Babilónia, hasai tiha housi ne’e hodi lori ba Babilónia. Ha’u sei halo mós Jeconias, Joaquim nia oan, liurai Judá nian, fila hikas mai fatin ne’e, no dadur sira hotu Judá nian nebé ema lori Babilónia – Na’i dehan – basá, Ha’u sei harahun liurai Babilónia nia ukun”.

Nune’e, Profeta Jeremias hatan ba Profeta Ananias, iha na’ilulik sira no povo tomak nia oin nebé halibur iha Na’i nia Templo. Profeta Jeremias dehan nune’e: “Nune’e duni! Na’i sei halo duni nune’e! To’ok Na’i bele halo tuir liafuan hirak nebé ó si’ik tiha ona hodi Na’i Nia naran, no bele lori fila hikas housi Babilónia ba fatin ne’e sasan Na’i nia Templo nian no dadur sira hotu. Maibé, rona didi’ak liafuan hirak nebé ha’u dehan ba ó nia tilun no povu tomak nia tilun: Profeta sira nebé uluk liu mai ita, Uluk liu mai ha’u no uluk liu ba ó, sira haklaken ba nação barak no ba reino kbiit wa’in sira, funu, hamlaha no moras. Maibé, profeta nebé haklaken rahun di’ak be sei mai, ema bele hatene lolós nia hanesan Na’i Nia manu-ain lós, wainhira buat sira nebé nia haklaken mosu tiha ona”.

Nune’e, profeta Ananias hasai tiha jugo housi profeta Jeremias nia kakorok, harahun tiha hodi dehan iha povo tomak nia oin: “Na’i dehan nune’e: hanesan ne’e duni, mak iha tinan rua nia laran, Ha’u sei harahun ukun Nabucodonosor, liurai Babilónia nian, hodi hasai tiha nia housi nação hot-hotu nia oin’” Nune’e, profeta Jeremias la’o tiha.

Wainhira profeta Ananias harahun tiha jugo nebé hasai housi profeta Jeremias nia kakorok, Na’i lia tun ba profeta ne’e nune’e: “Ó ba hateten ba Ananias nune’e: ‘Na’i dehan: Ó harahun tiha jugo ai nian ida, maibé, Ha’u sei halo iha nia fatin jugo besi asu nian ida, basá, Na’i Lalehan no rai nian, Israel nia Maromak ko’alia nune’e: Ha’u tau jugo besi asu nian ida iha nação sira ne’e nia kakorok, atu sira bele serbi Nabucodonosor, liurai Babilónia nian. sira sei hakru’uk ba nia. Ha’u sei saran ba nia balada fuik sira hotu”.

Profeta Jeremias dehan teni ba profeta Ananias: “Ananias rona ba! Na’i la haruka ó. Ó mak lori povo ne’e hodi fiar iha lia bosok. Tan ne’e, Na’i dehan: “Ha’u hasai ó housi rai ne’e; ó sei mate duni iha tinan ida ne’e nia laran, basá, ó haklaken funu hasouru Na’i. Profeta Ananias mate duni iha fulan hitu tinan nebá nia laran.

Maromak Futar Lia.

 

Salmo Responsorial                                                                                                                                      Sal. 118(119). 29, 43, 79-80, 95, 102 (R. 68)

Refrão : Na’i, hanourin Ita lei mai ha’u!!! Repete-se

Hadook ha’u housi dalan áat,

Haraik graça mai ha’u hodi tuir Ita hakaran.

Keta hadook ha’u ibun housi lialós,

Na’i, ha’u fiar iha Ita liafuan no Ita lei. Refrão

 

Mai to’o iha ha’u, sira be hamta’uk Itaboot,

Sira be moris  tuir Ita ukunfuan.

Ha’u sei la laran susar no mós la moe,

Tan ha’u fuan hatene Itaboot Nia lei. Refrão

 

Sala na’in sira hafuhu ha’u atu halakon ha’u,

Maibé, ha’u neon metin iha Ita orden.

Ha’u la hadook an housi Ita hakaran,

Housi dalan nebé Ita hanourin ona mai ha’u. Refrão

 

Aclamação                                                                                                                                                                                                                            Mt. 4. 4b

Refrão : Aleluia, Aleluia!! Repete-se

Ema la moris de’it ho aihan, maibé ho liafuan sira nebe

Sai housi Maromak futar ibun. Refrão

 

Evangelho                                                                                                                                                                                                                      Mt. 14. 13-21

Na’i Jesus Cristo nia Evangelho nu’udar São Mateus haktuir:

 Iha tempo nebá, rona tiha katak ema oho ona João Baptista, Jesus sa’e ba ró ida hodi ba mesak iha rai fuik maran; maibé hatene tiha ne’e, ema lubun boot husik cidade sira hodi la’o tuir buka Nia. Tun housi ró hodi haré ema barak ne’e, Nia hanoin teb-tebes sira hodi fó isin di’ak ba sira nebé moras.

Loraik daudaun ona, escolante sira hakbesik ba Nia hodi dehan: “Fatin ne’e rai fuik, no kalan besik ona; haruka ema sira ne’e ba ona, atu sira bele sosa aihan iha knua sira”. Nune’e Jesus dehan ba sira: “Sira lalika ba; imi rasik fó han ba sira”. Sira hatan ba Nia: “Ami iha de’it pão fuan lima no ikan rua”. “Lori sira mai”, Nia dehan. Hafoin Nia haruka ema lubun boot tur iha du’ut leten. Nia káer pão fuan lima no ikan rua ne’e, foti matan ba Lalehan hodi fó bensa. Tuir mai Nia silu pão sira ne’e hodi fó ba escolante sira; hafoin sira fahe ba ema lubun boot. Sira hotu han to’o bosu; baluk sira nebé resin, sira tau ba luhu sanulu resin rua nakonu! Ema sira nebé han hamutuk mane rihun lima, la sura feto no labarik sira.

Lia Maksoyn.

Leave a Reply

Your email address will not be published. Required fields are marked *