shadow
Diocese de Dili > NOTÍCIAS > HOMILIA DO BISPO > Privilégio Nebe Na’i Maromak Haraik Ba Maria Sai Mai Ita Povo Nu’udar Esperança Hodi Funu Hasoru Sala No Mate

Privilégio Nebe Na’i Maromak Haraik Ba Maria Sai Mai Ita Povo Nu’udar Esperança Hodi Funu Hasoru Sala No Mate

Solenidade Assunção Virgem Santa Maria

Same, 15/08/2020

 

Sarani doben sira!

Ohin ita halibur hamutuk atu agradece Maromak ne’ebe haraik ona mai ita Virgem Santa Maria nu’udar ita nia mahein. Wainhira ita contempla kona ba festa ida ne’e atu hola conciência inportância moris iha rai ida ne’e katak ita hotu ne’ebe iha rai ne’e mesak ema lao rai ‘peregrino’. Dala barak ita haluha tiha katak moris ne’e Na’i Maromak fó mai ita hanesan Bíblia dehan forte lia dalaruma to’o 80 ka 90. Ita haluha tiha katak moris nee Naí Maromak empresta de’it ba ita, ita dala barak hanoin fali katak ita mak nain ba rai ida ne’e, ita mak nain ba buat hotu. Nee duni opurtunidade mai ita atu fanun ita no hateke ba ita nia an hodi halo reflexão.

Comemora Festa Padroeiro nian sempre sai momento diak ida ba ita sarani Same atu pausa ituan husi ita nia actividade diário hodi hateke ba kotuk diak barak nebe ita simu husi Na’i Maromak liu husi intercessão ita nia Inan doben ninian. No hateke ba kotuk mos buat lubuk ne’ebe ita sees husi Inan doben nia hakarak. Tan ne’e, pausa ituan hodi hateke ba kotuk ho haraikan, ho corágem hakarak hadia ita nia an.

Maluk doben sira!

Ohin iha Solenidade Santa Maria ba Lalehan convida sarani fiar nain sira atu tau neon metin nafatin ba ita nia centro fiar ninian. Ida nee mak mistério boot Cristo nia Ressurreição. Tan nee Amo Papa Emérito Bento VI dehan; ó Virgem Santíssima ita hare ba oin dalan ne’ebe ita atu ba, koko atu liga ita nia moris ho Jesus ninian hanesan Maria. Festa nee koalia kona ba ita nia futuro basá ita mos sei lao duni tuir dalan ida nee, ho fiar metin loron ida ita mos sei hola parte iha ksolok hamutuk ho Maromak ita Nain Jesus Cristo. Tan nee, convida ita atu laran metin nafatin iha Jesus nebe moris hias.

Sarani doben Sira!

Maria halao tiha nia knaar iha rai ne’e, Maromak hasae Nia ba Lalehan, nune’e Nia sai ba dala uluk Na’i Maromak nia Criatura ne’ebe hetan salvação rohan laek. Privilégio nebe Na’i Maromak haraik ba Virgem Maria sai mai ita povo Maromak nian nu’udar esperança hodi funu hasoru sala no mate. Nune’e mos hanesan Nia ita mos sei koko glória rohan laek ne’ebe Nain Feto koo tiha ona.

Wainhira koalia kona ba Assunção Papa Pio XII (1950); Inan sala laek Maromak nia Inan Maria Feto Kmok wainhira nia termina nia moris iha rai ida nee, Nai Maromak hasae Nia Isin no Klamar ba Lalehan. Wainhira ita hanoin kona ba diak no kmook nebe Virgem Maria simu dala barak ita mos hanoin hodi hamosu mos iha ita nia fuan katak iha loron ida ita mos sei participa iha ksolok ida nee. Ksolok ida nebe Maria hetan iha nia Moris rohan, ita mos hein katak loron ida, ksolok no esperança ida nee sai mos ita ida-idak nian.

Furak oinsa mos moris iha Maromak nia kadunan Santo, diak Maromak nian mak continua wainhira ita celebra tinan-tinan festa padroeiro koko atu tama klean liu tan hanesna Nain Feto Koko. Hanesan Maria sente nia expressa ho nia liafuan nebe hanesan ohin ita rona iha Evangelho dehan ‘Nia nebe kbiit nain halo kmanek oi-oin mai hau, Nia naran Santo tebes’. Los Maria mos nia sente la soi ba buat ida nee, maibe too ikus mai nia sente katak nia la soi maibe Na’i Maromak tau marca ida nee; foti Nia a’as liu criatura hotu-hotu.

Ba foin sae sira nebe atu simu Sacramento Crisma kata, Simu Sacramento Crisma laos buat nebe formal deit maibe exige ita nia maturidade iha responsabilidade nu’udar sarani, Oan no nudar foinsae. No sacramento Crisma nee rasik ita simu atu completa ita nia sacramento inciação. Iha livro Apocalipse haktuir mai ita kona ba Creda nia susar oinsa atu haklaken Maromak nia mensagem. Ema sei trata ita, hatete at ita, maibe nee la saugate tanba susar no terus nee hotu sura iha Na’i Maromak nia matan. Tan ne’e ho roman assunção Virgem Maria nian nee hanesan arca ida nebe hatur iha Maromak nia Santuário iha Lalehan.

Ohin agradece ba Maromak husi Virgem Santíssima nia moris hanorin no hatudu dalan mai ita atu moris hanesan ema fiar nain. Moris iha rai nee hola nafatin conciência katak ita ema lao rai katak ita nia fatin iha lalehan. Maske terus no susar nunca halo ita desanima. Hanoin kona ba Nain feto ninia maternidade fo hanoin mai ita kona ba ita nia mama sira. Papel inan nian ne’e laos deit iha momento ida, maibe acompanha oan sira too rohan.

Maluk sarani doben sira!

Iha tempo Covid ninian ita hare katak buat barak mosu iha ita nia rain. Liu-liu ita hare no rona iha grupo barak sai halo caridade, halo diak no fo tulun. Sira nebe iha supermi rua fo netik ida ba ida nebe laiha, sira nebe iha mina barak fahe ba sira nebe laiha. Nee hatudu ona sinal sarani nia maturidade iha Timor. Katak ita nia fiar latoo deit maske tempo Covod ninian ita labele ba missa, maibe ita prática daudaun caridade domin katak ita fahe ba malu. La hanoin deit kona ba ida-idak nia an maibe ema barak sai husi nia fatin hodi fahe buat nebe sira iha ho ema nebe laiha. Então mai ita husu ba Maromak liu-liu iha loron ida nee hodi agradece ba Nia ba diak hotu nebe ita simu, maibe ita mos tem que hola conciência fial fali ba oin hafoun ita nia an nuudar sarani iha Paróquia ida nee, nuudar família ida-idak hateke ba Nain Feto hodi lao tuir exemplo Nain Feto ninian hodi lao iha oan sira nia sorin too ita nia moris termina iha rai ida ne’e. Nunee mos oan no foinsae sira hotu atu ita mos hare ba Maria nuudar oan, nudar jovem ida nia hatene husik Maromak atu hola parte iha nia mehi. E wainhira nia husik Maromak atu hola parte iha ninia mehi no nia plano. La obriga Maromak atu tuir deit nia plano, nia hakarak maibe nia aprende atu comprende Maromak nia plano. Dala barak ita reza itaobriga Maromak atu tuir ita nia hakarak. Ita nia oração tulun ita atu compreende Maromak nia plano iha ita nia moris.

Leave a Reply

Your email address will not be published. Required fields are marked *