shadow
Diocese de Dili > NOTÍCIAS > LETURA DIÁRIA > XXII DOMINGO TEMPO COMUM (ANO A)

XXII DOMINGO TEMPO COMUM (ANO A)

Primeira Leitura                        Jer. 20, 7-9

Lia housi Livro Profeta Jeremias:

Na’i, Ita halo ha’u laran monu ba Ita, hodi husik ha’u laran tuir Ita; Ita laran manan ha’u, manan los  duni. Iha fatin tomak ema hamoe ha’u, ema tomak dehan aat ha’u. wainhira ha’u hateten, sei hateten ho kbiit hodi haklaken: “Funu no aat!” Ba ha’u, Maromak nia lia-fuan mosu tiha hanesan lia hasara no lia aat. Nune’e ha’u dehan: “ha’u sei la hanoin tan Maromak, ha’u sei la temi tan Nia naran. Maibé áhi ida hamanas hela ha’u neon, metin los iha ha’u ruin. Ha’u buka halakon tiha, maibé, ha’u la tahan.

Maromak Futar Lia.

 

Salmo Responsorial                                                                                                                                      Sal. 62(63), 2. 3-4. 5-6. 8-9

Refrão  :  Ha’u nia Maromak, ha’u klamar buka Ita!!! Repete-se

Na’i, ha’u nia Maromak, ha’u buka Ita;

ha’u klamar buka Ita nafatin.

Ha’u isin buka Ita, nu’u rai maran buka wé. Refrão

 

Ha’u hakarak hahi Ita iha kadunan,

hare Ita nia kbiit no gloria.

Ita nia domin di’ak liu moris tomak,

ha’u ibun hana’i Maromak. Refrão

 

Ha’u sei hahi kalan loron,

sei foti ha’u liman ba Maromak.

Ha’u sei hetan tulun tomak;                                        

ha’u ibun la kole hahi Maromak. Refrão

 

Maromak tahan ha’u nafatin,

ha’u haksolok ho Maromak nia tulun.

Na’i, hamutuk ho Ita, ha’u hetan di’ak,

Na’i tahan ha’u ho Nia liman. Refrão  

 

Segunda Leitura                                                                                                                                                                          Rom. 12, 1-2

Lia housi São Paulo nia surat ba sarani sira iha Roma:

Maun-alin sira: Ha’u husu ba imi, tan Maromak nia laran luak, atu imi hasa’e imi nia an rasik ba Maromak; hasa’e hanesan buat karan moris, buat santo no kmanek ida. Imi sei hasa’e buat karan nune’e. Imi keta la’o tuir mundo; hadi’a imi-an ho neon foun, atu bele hatene Maromak nia hakaran:  buat nebé di’ak, buat nebé kmook, buat nebé di’ak liu hotu.

Maromak Futar Lia.

 

Aclamação                                                                                                                                                                                          Mt. 16, 24

Refrão : Aleluia, Aleluia!! Repete-se

Na’i ko’alia: Ema nebé hakarak tuir Ha’u,

sei haluhan nia an rasik; simu nia cruz hodi tuir Ha’u. Refrão

 

Evangelho                                                                                                                                                                                    Mt.  16, 21-27

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus hahu hanourin ba Escolante sira katak Nia sei ba Jerusalém hodi hetan terus ua’in housi ema katuas sira, na’i-ulun sacerdote sira no escriba sira; Nia sei mate, hafoin, liu loron tolu, moris hias. Pedro bolu ketak tiha Jesus hodi haksi’ak nune’e:  “Na’i, Maromak sei tulun Ita! Ita sei la hetan ida ne’e.”  Maibé, Jesus fila ba nia dehan:  “Sai housi Ha’u nia oin Satanás! Ó hakarak teri netik Ha’u dalan;  Ó la hanoin tuir Maromak, maibé, tuir ema nia hanoin.”  Hafoin, Jesus dehan ba Escolante sira:  “Ema nebé hakarak tuir Ha’u, sei haluhan nia an rasik; simu nia cruz hodi tuir Ha’u. Tan ema nebé hakarak soi nia moris sei lakon moris ne’e; maibé, ema nebé lakon nia moris tan Ha’u, sei hetan fali. Tebes, folin di’ak ba ema, manan mundo tomak, maibé, lakon nia moris rasik?  Mane Maksoin sei mai fali iha Nia Aman nia kbiit, hamutuk ho Anjo sira; iha ne’e, Nia sei haraik di’ak ba ema ida-idak tuir nia moris.

Lia Maksoyn.

Leave a Reply

Your email address will not be published. Required fields are marked *