shadow
Diocese de Dili > NOTÍCIAS > LETURA DIÁRIA > Quinta-Feira, XXIII Semana Tempo Comum (ANO A)

Quinta-Feira, XXIII Semana Tempo Comum (ANO A)

Primeira Leitura    1 Cor. 8. 1b-7, 11-13 

Lia housi São Paulo nia primeira Surat ba sarani sira iha Corinto:

 Maun alin sira: Matenek halo ita loko an, maibé domin hari. Ema hanoin karik katak nia hatene buat ruma, nia seidauk hatene nu’udar nia tenki hatene. Maibé hadomi Maromak karik, Maromak hatene nia.

Ne’e duni, kona ba ha naan nebé saran tiha ona ba lulik, ita hatene katak “la iha lulik iha mundo,” no katak “iha Maromak mesak ida de’it.” Tebes duni, maski iha buat nebé ema hanaran lulik iha lalehan no iha rai; iha duni “lulik” barak no “na’i” barak; maibé mai ita iha Maromak mesak ida de’it, Jesus Cristo, liu housi Nia buat hotu mosu no liu housi Nia ita hotu mosu.

Maibé la’os ema hotu iha matenek ida ne’e. Iha balun nebé toman ona atu adora lulik to ohin loron, nune’e uainhira sira han naan nebé saran tiha ona ba lulik sira, sira laran nebé biit laek sai fo’er tiha.

Nune’e, housi imi nia matenek, imi lori ema nebé biit laek atu la hetan maksoin, imi nia maun alin nebé tan nia Cristo mate. Uainhira imi halo sala nune’e hasouru imi nia maun alin nebé no hakanek sira nia laran, sira biit laek ona, imi halo sala hasouru Cristo. Ne’e duni, aihan halo ha’u nia maun alin sal karik, ha’u sei la han naan liu tan, atu ha’u la bele lori ha’u nia maun alin ba sala.

Maromak Futar Lia.

 

Salmo Responsorial                                                                                                 Sal. 138 (139). 1-2, 3b, 13-14ab, 23-24 (R. 24b)

Refrão : NA’i, lori ha’u housi dalan rohan laek!!! Repete-se

Na’i, Ita hatene ha’u laran tomak,

Ita hatene uainhira ha’u toba no hader;

Housi dook Ita hatene  ha’u hanoin,

Ita haré ha’u nia hakat hotu. Refrão

 

Na’i,  Ita mak halo ha’u moris,

Halo ha’u moris iha ha’u inan nia knotak.

Ha’u agradece Itaboot,

Tan Ita hahalok sira kmanek tebes. Refrão

 

Na’i, buka ba, hodi hatene ha’u fuan,

Haré borus ba, ha’u nia hanoin hotu;

Haré ba, atu ha’u la la’o sala dalan,

Lori ha’u housi dalan rohan laek. Refrão

 

Aclamação                                                                                                                                                                                           1Jo. 4. 12

Refrão : Aleluia, Aleluia!! Repete-se

Ita hadomi malu karik Maromak hôrik ho ita no

Nia domin sai tuir lolós iha ita. Refrão

 

Evangelho                                                                                                                                                                                       Lc. 6. 27-38

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba nia escolante sira nune’e: “Ha’u dehan ba imi sira nebé hirus imi; fó nia funu baluk sira, halo di’ak ba sira nebé hirus imi, harohan ba sira nebé ko’alia áat imi; ba ida nebé basá ó nia hasan ida, fó tan ó nia hasan seluk: ba ida nebé hadau ó nia unuk, fó tan ó nia hatais; ba ida anebé husu buat ruma, fó ba; ba ida nebé hola ó nia sasan sira, keta husu fali. Nu’udar imi hkarak ema halo ba imia, halo mós nune’e ba sira. Imi hadomi karik sira nebé hadomi imi, imi soi sáida? Ema maksalak sira mós hadomi sira nebé hadomi sira. Imi halo diak karik ba sira de’it nebé halo di’ak ba imi, imi soi di’ak sá? Ema maksalak sira mós halo nune’e. Imi impresta de’it karik ba ema nebé imi hein atu simu fali, imi soi sáida?ema maksalak sira mós impresta, hodi hein atu simu fali nia folin. Maibé hadomi imi nia funu baluk sira ba; halo di’ak no impresta hodi la hein atu simu fali buat ida. Nune’e imi nia kolen sei sai boot teb-tebes: imi sei sai Na’i aas liu hotu nia oan, basá Nia laran di’ak ba ema áat no ema laran áat sira.

Buka sai ema laran luak hanesan imi Aman laran luak. Keta hanoin áat ema, no ema sei la hanoin áat imi; keta duu matak ema, no ema sei la duu matak imi; Fó perdua ba, no imi sei hetan perdua. Fó ba, no imi sei simu; ema sei tau ba imi nia liman buat di’ak barak, hanesan tun, doko tan to naresin. Basá imi sura oin sá ba ema, nune’e mós ema sei sura ba imi.”

Lia Maksoyn.

Leave a Reply

Your email address will not be published. Required fields are marked *