shadow
Diocese de Dili > NOTÍCIAS > REFLEXÃO > HA’U MAUN EH ALIN SALA DALA WA’IN HASORU HA’U KARIK HA’U SEI PERDUA NIA DALA HIRA? JESUS HATAN PEDRO DEHAN: O SEI PERDUA NIA DALA 70 DALA HITU (MT 18, 21-35)

HA’U MAUN EH ALIN SALA DALA WA’IN HASORU HA’U KARIK HA’U SEI PERDUA NIA DALA HIRA? JESUS HATAN PEDRO DEHAN: O SEI PERDUA NIA DALA 70 DALA HITU (MT 18, 21-35)

Maun alin sira, haktuir katak iha moris hamutuk be sira halao iha comunidade ida sira moris hakmatek tebes nakonu ho ksolok no domin ninia laran. Maibé to’o loron ida, iha maluk ida nebé halo salan hasoru ninia maluk seluk, salan ida boot tebes nebé la facil atu hetan perdua housi ida nebé nia sala hasoru ba. To’o iha momento ida maun alin sira seluk nebé lakohi atu sira nain rua ninia relação continua nune’e hafoin de hakbesik tiha ba ida be halo sala ne’e no hatene katak nia arepende tebes ho neon no laran ninia salan no mós hakarak ho laran tebes husu perdão housi ninia maun alin be nia sala hasoru ba ne’e, maluk sira ne’e hakbesik-an ba koalia no hato’o mos ba maun alin seluk kona ba situação ne’e no sira ninia desejo atu maluk rua ne’e husu perdão, fó perdua no dame malu fila fali. Maibé sira la hetan buat nebé sira hakarak, kala tanba maluk ne’e ladauk iha condição atu fó perdão ba ida seluk nebé sala hasoru nia, nia hatan ba sira dehan, “lae, ha’u mak sei la fó perdão ba nia, ha’u laos Maromak. Housik ba ami ba mak hatan iha Maromak ninia futar oin iha loron ikus”.

 

Maun alin doben sira, història badak ida ne’e ilustra ita ninia realidade balun iha moris ita ema sarani ni’an be realmente ema sala na’in ida maibé mós Maromak bolu ba moris santo hamutuk iha Maromak liu housi perdão. Haré ba ilustração història badak ne’e ni’an hatudu katak iha moris ne’e dala balun nu’udar ema sarani housi sorin ida ita la hatudu ita-an nu’udar sarani tanba fuan laran tos atu fo perdão, la fó perdão tanba laran moras no pior liu tan justifica hahalok ida ne’e hodi compara fali ita-an ho Maromak be tau ona kbiit atu fó perdão ni’an iha ita nune’e husu ita atu fo perdão ba malu no housi sorin seluk hatudu ita-an hanesan sarani tanba reconhece ita ninia salan no fraquesa sira hodi hakribi no husu perdão housi Maromak no housi maun alin sira tan salan nebé ita halo. Maibé Maromak ninia futar liafuan nebé ita foin mak rona hamutuk dadaun la haruka ita atu moris iha ambiguidade ou moris iha oin rua hanesan ne’e ida. Na’i ninia futar liafuan husu ita atu moris lolós de’it nu’udar ema sarani ida iha dalan moris ema sarani nian, katak iha buat hotu iha moris ne’e ita buka rona hodi moris tuir lolós buat tomak nebé Jesus Cristo hanourin no haruka ita atu moris tuir.

 

Evangelho haktuir mai ita katak iha Pedro ho Jesus ninia conversa wainhira Pedro husu dehan katak ha’u nia maun e alin ka belun sira sala bebeik hasoru ha’u karik ha’u tem que perdua sira dala hira, perdua to’o dala 7? Jesus hatan ba nia katak laos dala hitu de’it, maibé fo perdua dala 70 dala 7. Ne’e katak laos perdua de’it dala ida ka dala rua ou màximo dala tolu maibé, tem que perdua bebeik, nafatin ba nafatin. Ema sarani iha ninia moris tomak tem que fo perdua nafatin ba nafatin, ida ne’e mak Jesus hakarak dehan mai ita. Hodi halo nune’e mak halo ita sai duni Maromak ninia oan, halo ita hola duni ilas Maromak ninian iha ita, basa ita fo perdão hanesan mós Maromak fo perdua mai ita.

 

Na’i Jesus ninia resposta lao nafatin iha linha ninia hanourin sira nebé iha fatin seluk nia hateten katak ó moris hodi halo oinsá ba ema, nune’e mós mak ema seluk nebé moris sei halo ba ó.

 

Maun ho alin sira, iha realidade fo perdão nafatin ka bebeik la facil mai ita, la facil mai ita laos tanba ita laiha kbiit atu fo perdão, ita iha kbiit atu fo perdua tan Maromak tau kbiit ne’e iha ita hotu ninia-an, maibé dala barak tebes la facil no ita la fó perdua ba maun alin eh ema seluk nebé sala hasouru ita tanba de’it buat sira nebé haktuir iha primeira leitura iha livro Ben Sira katak, tanba ita ninia rai hirus, tanba laran nakali no rai kunan. Haktuir momos mai ita iha livro ne’e katak hahalok tolu ne’e la di’ak, nune’e nu’udar ema sarani ita percisa housik tiha hahalok hirak ne’e hodi ita bele merece hetan mós perdão no laran luak housi Maromak no housi maun alin sira.

 

Hahalok rai hirus, laran nakali no rai kunan hasoru ema seluk ne’e sala no la di’ak tanba hadook ita housi Maromak ninia graça, tanba hahalok hirak ne’e hanesan de’it ho ita foti-an no hewai hasouru Maromak no hasoru Jesus Cristo rasik nebé hanourin ita atu fo perdão bebeik, pior liu tan fali mak foti-an no hewai wainhira ita hakarak sukat ita-an ho Maromak iha lalaok fo perdão ne’e. Hahalok hirak ne’e la di’ak tanba lori castigo, lori aat no lori mate mai ita hodi ikus mai halo ita lakon ita-an, lakon moris ksolok lolós iha moris rohan laek be hetan iha Maromak ninia reino. Housi primeira leitura Maromak laos husu de’it mai ita atu housik hahalok aat sira ne’e maibé husu mós mai ita atu iha moris buka pratica fali mak hahalok di’ak sira ema sarani sira nian be hatudu iha: fo perdua nafatin hodi bele mos hetan perdão Na’i nian; buka halo di’ak nafatin, keta hare ba at nebé ema halo hasoru ó nune’e ó bele hetan di’ak wa’in nafatin housi Na’i. Hodi moris halo nune’e mak ita moris tuir duni Maromak ninia ukun fuan tuir aliança ka promessa nebé ita halo an ba Na’i atu moris nu’udar ema mesak ninia oan doben sira de’it, Nia mak ita Na’i, Na’i ita nian no ita Na’i ni’an nafatin ba nafatin hanesan haktuir iha segunda leitura.

 

Mai maun alin doben sira, ita buka halao moris ne’e iha buat hotu rona no halo tuir nafatin Na’i Jesus Cristo ninia Evangelho no tuir nafatin aliança nebé ita iha ho Maromak. Ita husu Nain Feto Virgem Maria ninia tulun atu tulun ita bele hadook an housi rai hirus, laran nakali no rai odio nebé facil tebes ita halo iha moris ne’e hodi reconhece nafatin ita ninia salan no fraquesa sira, fo nafatin perdua ba malu no halo di’ak nafatin hodi fó sasin moris ida nu’udar Maromak oan lolos.

Amen.

 Becora, 13 de Setembro 2020, Pb.

Leave a Reply

Your email address will not be published. Required fields are marked *