shadow
Diocese de Dili > NOTÍCIAS > LETURA DIÁRIA > XXIV DOMINGO TEMPO COMUM (ANO A)

XXIV DOMINGO TEMPO COMUM (ANO A)

Primeira Leitura   Sir. 27, 33(30)-28, 9(7)

Lia housi Livro Ben-Sirá:

Rai hirus no laran nakali, buat rua ne’e, la di’ak; ema maksalak moris tuir dalan ne’e. Ema nebé tau kuna, sei hetan Na’i nia castigo: Na’i sei tesi nia salan ho oin môon. Perdua ó maluk nia salan, nune’e’e, wainhira ó hamulak, ó sei hetan perdua ba ó salan. Ema ida rai hirus hasouru nia maluk, sei hakarak simu di’ak housi Na’i? Nia la hanoin ema seluk, nebé ilas hanesan nia, sei hakarak husu perdua ba nia salan rasik? Nia, be iha isin ida hanesan, rai hirus, se lós mak sei hetan perdua ba nia salan? Hanoin ó nia loron ikus, hodi housik rai hirus, hanoin katak sei aat, sei mate, hodi moris tuir lós ukun-fuan. Hanoin ukun-fuan sira, hodi keta rai hirus ba ó maluk; hanoin Na’i nia moruk, keta haré ba aat nebé ema halo hasouru ó.

Maromak Futar Lia.

 

Salmo Responsorial                                                                                                                        Sal. 102(103), 1-2. 3-4. 9-10. 11-12

Refrão : Na’i laran luak, hadomi perdua ema tomak!!! Repete-se

Ha’u klamar hahí Maromak,

ha’u isin tomak haklaken Nia naran santo.

Ha’u klamar hahí Maromak,

ha’u la haluhan nia kmanek. Refrão

 

Na’i perdua ó nia salan hotu,

hanoin ó susar tomak;

Na’i tahan ó nia moris,

hafutar ó moris ho tulun no domin. Refrão

 

Nia la foti lia hasouru, la hatátan,

la rai hirus ba nafatin.

La hare ita tuir ita hahalok,

la selu ita tuir ita salan. Refrão

 

Hanesan lalehan hamrik rai fohon,

nune’e’e mos hatudu Nia laran luak ba ema di’ak.

Hanesan loron-sa’e dook housi loron-monu,

nune’e’e mos Nia hadook ita salan housi ita. Refrão

 

Segunda Leitura                                                                                                                                                                         Rom. 14, 7-9

Lia housi São Paulo nia surat ba sarani sira iha Roma:

Maun-alin sira: La iha ita ida moris ba nia an rasik, la iha ita ida mate ba nia an rasik. Ita moris karik, moris ba Na’i, ita mate karik, ita mate ba Na’i. Tan, ita moris eh ita mate, ita Na’i nian. Cristo mate, moris fila fali, atu sai mate-bian no moris sira Na’in.

Maromak Futar Lia.

 

Aclamação                                                                                                                                                                                      Rom. 13, 10

Refrão : Aleluia, Aleluia!! Repete-se

Caridade la halo aat ba malu;

ne’e duni, caridade halo tuir ukun-fuan. Refrão

 

Evangelho                                                                                                                                                                                     Mt. 18, 21-35

Na’i Jesus Cristo nia Evangelho nu’udar São Mateus haktuir:

Iha tempo nebá, Pedro hakbesik ba Jesus, hodi dehan: “Ha’u maun eh alin sala dala wa’in hasouru ha’u karik, ha’u sei perdua nia, dala hira? To’o dala hitu?” Jesus hatan ba nia: “ Ha’u la dehan to’o dala hitu, maibé, hitunulu dala hitu. Tan ne’e, Maromak nia Reino hanesan liurai ida nebé hakarak hatene nia tusan ho nia atan sira. Wainhira nia hahu sisi tusan, sira lori ema ida nebé iha tusan osan rihun sanulu. Tan nia la iha buat ida atu selu, nia na’in haruka fa’an tiha nia, hamutuk ho nia fen, oan sira ho nia sasan tomak, atu hodi bele selu. Atan ne’e hakneak monu ba nia ain, hodi dehan: ‘Na’i, haraik loron ruma mai ha’u, ha’u sei selu hotu!’ Na’i hanoin atan ne’e, fo fali perdua hodi perdua tusan tomak. Molok sai, atan ne’e hetan nia maluk ida, nebé iha tusan osan atus ida. Kaer tiha, hahu hatatan nia, dehan: ‘Selu ó nia tusan.’ Maluk ne’e hakneak hodi husu ba nia: ‘Haraik loron ruma mai ha’u, ha’u sei selu hotu!’ maibé, nia la hatan; lori ba hatama nia iha cadeia hodi sisi to’o selu tusan tomak. Tan buat hirak ne’e, ema ne’e nia maluk seluk laran susar teb-tebes, ba haktuir ba na’i buaat hotu nebé sira hare. Na’i ne’e haruka bolu nia, hodi dehan: ‘Atan aat, ha’u perdua ó nia tusan hotu, tan ó husu mai ha’u. Ó mos la bele hanoin ó nia maluk hanesan ha’u hanoin ó? Na’i ho laran hirus, saran nia ba dadur na’in sira, to’o nia selu tusan tomak. Nune’e’e mos Ha’u Aman iha lalehan sei halo ba imi, wainhira imi ida-idak la perdua nia maun eh alin ho laran hotu.”

Lia Maksoyn.

Leave a Reply

Your email address will not be published. Required fields are marked *