shadow
Diocese de Dili > NOTÍCIAS > LETURA DIÁRIA > Terça – Feira, XXIV Semana do Tempo Comum (ANO A)

Terça – Feira, XXIV Semana do Tempo Comum (ANO A)

Primeira Leitura        1 Cor. 12. 12-14, 27-31a

Lia housi São Paulo nia primeira Surat ba sarani sira iha Corinto:

Maun alin sira: hanesan isin lolon ida de’it, maibé liman ain barak, no liman ain ida-idak, maski barak halo isin halo isin lolon ida de’it, nune’e mós Cristo. Basá iha Espírito ida de’it ita hotu simu baptismo ba isin lolon ida de’it, biar ema judeu ka ema gregu, atan ka la atan, no ita hotu bele hemu housi Espírito ida de’it. Basá, isin lolon la’os liman ain ida de’it, maibé barak.

Imi Cristo nia isin lolon, no imi ida-idak Cristo nia liman ain. Maromak tau ema iha Kreda atu sai, uluk knanain apóstolo sira, hafoin profeta sira, tuir mai mestre sira; ikus mai, sira nebé iha kbiit atu halo hahalok kmanek sira; tuir fali mak sira nebé iha kbiit atu fó isin di’ak ba moras, sira nebé atu fó tulun, sira nebé atu fó tulun, sira nebé atu ukun, sira nebé atu ko’alia lia oi-oin. Sira ne’e hotu apóstolo? Sira ne’e hotu profeta? Sira hotu mestre? Sira hotu halo milagre? Sira hotu iha kbiit atu fó isin di’ak ba ema moras sira? Sira hotu ko’alia lia oi-oin? Sira hotu bele hatene lia oin-oin ne’e katak sá? Buka man-manas kmanek Espírito nian nebé boot liu.

Maromak Futar Lia.

 

Salmo Responsorial                                                                                                                           Sal. 99(100). 2, 3, 4. 5 (R. cf. 3c)

Refrão : Ita, povo Maromak nian, bibi sira Nia luhan nian!!! Repete-se

Rai tomak hahí Na’i ba,

Serbí Na’i ksolok,

Mai to’o Nia ho knananuk ksolok nian. Refrão

 

Hatene ba katak Na’i mak Maromak!

Nia hakiak ita, ita Ninian.

Ita, Nia povo, bibi sira Nia luhan nian. Refrão

 

Tama housi odamatan hodi agradece,

Tama ba Nia kadunan ho knananuk hahí nian.

Haliban Nia, hana’i Nia naran. Refrão

 

Tanba Na’i di’ak tebes!

Nia laran-luak rohan laek;

Nia fidelidade sei to’o bei-oan sira hotu. Refrão

 

Aclamação                                                                                                                                                                                             Lc. 7. 16

Refrão : Aleluia, Aleluia!! Repete-se

Profeta boot ida mosu tiha iha ita nia leet;

Maromak mai haré tiha Nia povo. Refrão

 

Evangelho                                                                                                                                                                                         Lc. 7. 11-17

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus ba cidade ida naran Na’im. Nia escolante sira no ema lubun boot tuir Nia. Wainhira Nia besik ona cidade nia odamatan, ema lori atu hakoi ema mate ida, feto faluk ida nia oan mane mesak. Ema barak housi cidade ba hamutuk ho feto ne’e. Haré tiha nia, Na’i hanoin nia ho laran hodi dehan ba nia: “Keta tanis!” Nia hakbesik, hodi kona caixão. Sira nebé lori nia hamriik tiha. Hafoin nia dehan: “Klosan, Ha’u dehan ba ó, hamriik ba!” Ema mate ne’e tur no hahu ko’alia. Jesus saran nia ba nia inan. Ema hotu hakfodak hodi hahí Na’i Maromak dehan: “Profeta ida mosu tiha iha ita nia leet; Maromak mai haré tiha Nia povo!” Lia kona ba Nia naklekar ba Judeia tomak no ba rai hot-hotu besik nebá.

Lia Maksoyn.

Leave a Reply

Your email address will not be published. Required fields are marked *