shadow
Diocese de Dili > NOTÍCIAS > LETURA DIÁRIA > Quarta – Feira, XXIV Semana do Tempo Comum (ANO A)

Quarta – Feira, XXIV Semana do Tempo Comum (ANO A)

Primeira Leitura        1 Cor. 12. 31-13. 13

Lia housi São Paulo nia primeira Surat ba sarani sira iha Corinto:

Maun alin sira: buka man’manas kmanek espírito nian nebé boot liu. Maibé ha’u sei hatudu ba imi dalan di’ak liu tan.

Ha’u ko’alia ho ema nia lia no anjo nia lia karik, maibé ha’u la iha domin, ha’u mak gon ida nebé tarutu ka sinu nebé lian. No ha’u bele halo profecia karik hodi hatene lolós mestério sira hotu no matenek tomak, ha’u iha fiar nebé book foho sira karik, maibé la iha domin, ha’u la folin buat ida. Ha’u fahe karik sasan hotu nebé ha’u iha, no sasan ha’u nia isin lolon atu ha’u bele gaba an, maibé la iha domin, ha’u la manan buat ida.

Domin paciência, domin laran di’ak. Domin la laran moras, domin la loko an; domin la buka oin; domin la book aat ema, domin la buka nia rasik nia di’ak, domin la hirus lalais, nia la hanoin resin buat áat nebé nia simu; nia la haksolok wainhira ema halo áat maibé haksolok iha lialós. Domin tahan terus hotu, fiar buat hotu, iha esperança iha buat hotu, lori todan hotu.

Domin hela nafatin. Kona ba profecia sira, sira hotu ne’e sei lakon; kona ba lia oi-oin, sira hotu sei lakon, kona ba matenek, ne’e mós sei mohu. Basá ita hatene maibé la lolós, no ita halo profecia maibé la tomak, maibé wainhira buat lolós sei mosu mai, buat nebé la lolós sei mohu lakon. Wainhira ha’u labarik, ha’u ko’alia hanesan labarik, hanoin hanesan labarik, book an hanesan labarik; wainhira ha’u sai ona ema boot, ha’u husik ona buat nebé labarik nian. Oras ne’e, ita haré la mós, hanesan de’it iha espelho ida, maibé iha tempo nebá, ita sei haré oin ba oin. Oras ne’e ha’u hatene balun de’it; iha tempo nebá ha’u sei hatene lolós tomak nu’udar mós Maromak hatene momós ha’u. Ne’e duni, fiar, esperança no domin sei hela, maibé ida nebé boot liu mak domin.

Maromak Futar Lia.

 

Salmo Responsorial                                                                                                                  Sal. 32(33). 2-3, 4-5, 12, 22 (R. cf. 3c)

Refrão : Ksolok ba povo nebé Na’i hili nu’udar Nia liman-rohan!!! Repete-se

Imi agradece ba Na’i,

Hananu hahí Nia naran.

Hananu knananuk foun ida,

Hana’i ba Nia ho ksolok. Refrão

 

Na’i Nia liafuan lós tebes,

Buat hotu mosu tuir Nia hakarak.

Na’i hadomi lialós,

Nia domin nakonu rai klaran. Refrão

 

Ksolok ba povo nebé hili Na’i ba nia Maromak,

Nação be Nia hili nu’udar Nia liman rohan.

Hatun Ita graça mai ami leten;

Tan ami hein Ita, Na’i. Refrão

 

Aclamação                                                                                                                                                                           cf. Jo. 6. 63c, 68c

Refrão : Aleluia, Aleluia!! Repete-se

Na’i, Ita futar liafuan sira mak espírito no moris.

Ita mak iha liafuan moris rohan laek nian. Refrão

 

Evangelho                                                                                                                                                                                        Lc. 7. 31-35

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan: “Ha’u sei tanesan ema sira otas ne’e nian ho se lós? Sira hanesan se lós? Sira hanesan labarik sira nebé tur hakilar ba malu iha basar dehan: ‘Ami hananu knananuk ksolok nian, maibé imi la dansa; ami hananu knananuk tanis nian, maibé imi la tanis’. Basá João mai, la han pão, la hemu tua, no imi dehan: ‘Nia iha diabo iha nia laran’. Oan Mane mai, han hemu, no imi dehan: ‘Ne’e ema kanteen no lanuteen, publicano no maksalak sira nia belun’. Maibé matenek nia oan sira hatudu katak matenek mak lós duni”.

Lia Maksoyn.

Leave a Reply

Your email address will not be published. Required fields are marked *