shadow
Diocese de Dili > NOTÍCIAS > REFLEXÃO > SASUKAT EMA NI’AN VS SASUKAT MAROMAK NI’AN

SASUKAT EMA NI’AN VS SASUKAT MAROMAK NI’AN

Reflexão & Leituras  DOMINGO 25º TEMPO COMUMANO A, 2020

 

Evangelho semana ne’e convida hikas ita nobun hodi descobre diferença boot entre lalaok mundo no lalaok lalehan. Semana tolu liu ba, ita reflecte hamutuk ona oinsa critério ou requesito sira atu cristão Católico ida bele merece iha Reino Lalehan. Nudar fiar nain, ema hotu nebé simu ona we baptismo iha Kreda Católica deseja tebes atu hetan fatin digno iha mundo seluk wainhira ita nia viagem iha rai ne’e too nia rohan.

Infelizmente iha rai ne’e, ema barak hakarak tama lalehan maibé, atu cumpri critério tama lalehan ne’e mak razão oi-oin los. Tanba ne’e mak Jesus dehan: Tan ema nebé hakarak soi nia moris, sei lakon moris ne’e, maibé, ema nebé lakon nia moris tan Ha’u, sei hetan fali.

 

Ita mos reflecte ona oinsa Maromak nudar criador ba universo, enquanto ita nudar parte ida housi criatura iha universo ne’e, Maromak cria ema hodi haraik kedas liberdade atu decide rasik andamento moris ne’e. Catecismo Igreja Católica número 1733 descreve: “Wainhira ita halo buat di’ak ruma, ita sei sai livre liu tan. La existe liberdade verdadeira, excepto verdadeiro liberdade ne’e expressa iha lalaok nebé di’ak no justo. Ema nia ecolha hodi la obedece (desobedecer) no halo aat, ne’e nudar abuso ba liberdade no lori individuo refere sai atan ba pecado (escravidão do pecado)”.

Semana kotuk,ita mos reflecte ona oinsa Jesus hanorin ita atu entende didi’ak lalaok fo perdão rohan laek ba ema seluk nebé halo aat hasoru ita. Maske iha relato Evangelho, matematicamente Jesus haruka ita fo perdão too hitu nulo dala hitu (70×7=490) maibé, concretamente Jesus hakarak refere liu ba caracter perdão sem limite. Ne’e significa katak moris nudar Católico afinal la fácil hanesan irmão separado sira nia princípio katak fiar de’it no Bíblia de’it, ema ida bele tama ona lalehan. Iha mundo Catolicismo, precisa tebes ita nia consistência hodi cumpri no moris tuir Jesus nia doutrina sira nebé Igreja Católica hatutan.

Perdão infinita (sem fim) nebé Jesus Cristo prefere ita aplica iha moris coincide kedas ho oportunidade graça nebé Maromak haraik mai ita hodi adere ba moris santidade. Maske oportunidade santidade ne’e loke luan maibé, ita ema rasik mak sempre desvia housi graça ne’e tan de’it orgulho pessoal, ambição ba poder, gosta halibur riku soin ba-an rasik no ba grupo partidário, uza dalan oi-oin hodi hetan osan; balu naok, balu falsifica documento hodi hetan osan facilmente, balu faan ai moruk falso, seluk buka aproveita situação hodi kaer ukun, fahe cargo político ba nia maluk……maske nune’e, na prática, ita balu dehan, nusa ema hanesan ne’e la mate lalais tiha?

 

Preferência Maromak ni’an la hanesan sasukat ita ema ni’an, Maromak la condena kedas ema ruma nebé ita considera mal educado eh comporta la di’ak maibé, Maromak fo nafatin oportunidade atu ema hotu nebé sente lao sees housi dalan Maromak atu livremente hakribi salan no fila ba Maromak. Tanba ne’e mak iha rai ne’e, maske ema barak comporta hahalok mal maibé, ema hirak hanesan ne’e sempre saudável no di’ak hela de’it, enquanto ema di’ak sira nebé, ita sei precisa sira nia contribuição iha rai ne’e, dalabarak liu mate lalais de’it. Dala ida tan, providência Maromak ni’an, la hanesan ho ema nia opção. Realidade lalehan, la hanesan ho realidade mundo.

 

Relato Evangelho semana ne’e (Domingo XXV, Ano A), se tuir sasukat mundo ni’an, Jesus comete injustiça tanba selu trabalhador sira la tuir sira nia horas serviço. Iha Timor karik, trabalhador sira sei kesar ona Jesus ba SEFOPE tanba toos na’in comete injustiça no selu ema nia salário la tuir horas serviço.

 

Na verdade, Maromak nia sasukat justiça ba ema, laos baseia ba ema ne’e moris iha mundo ne’e kleur ka lae? Laos refere ba nia halo di’ak dala hira, ema ne’e halo aat tenke mate lalais maibé, haré liu ba oinsa sa ita moris tuir Maromak nia dalan.

 

Iha Timor, políticamente, ema hotu hakarak hetan subsídio veteranos hodi hamosu veteranos falso rihun rahun, lobuk ida hakarak hetan consideração hodi inventa história luta ni’an maske na verdade nia la halo buat ida durante luta ba ukun rasik-an. Iha nível estado, cada governo nebé kaer ukun, prioridade uluk liu mak reestruturação cargo político housi nivel baixa too nível alto. Consequência mak, Tinan ruanulu ona, progresso desenvolvimento marca passo maske percentagem oitoan povo sente netik no barak liu, osan lakon ba bolso nebé la merece. Ema barak gosta buka dalan oioin atu hetan fama no hetan cargo maske capacidade precisa sukat hodi garante resultado.

 

Nune’e, semana ne’e, relato Evangelho fo mensagem mai ita nudar Católico katak Maromak nia lógica no ema nia lógica diferente. Mundo nia sasukat ba lalaok moris ho lalehan nia sasukat ba moris diferente tebes. Ema nia lógica aposta liu ba poder, domínio, triunfo no êxito nebe garante ba ita katak; moris sei hetan nia sentido se ita consegue sai vencedor, iha osan barak, sai conhecido iha ema barak nia leet, hetan fama no acesso fácil oi-oin iha sociedade, enquanto Maromak nia lógica hanorin katak saran moris ba Maromak liu housi servi ema seluk nebé precisa tulun

Too iha ponto ida ne’e, ita aposta ba parte ida nebé, ba Maromak ka ba mundo? Hanoin ba katak saida mak ita escolha agora, sei hetan implicação iha futuro? Jesus fo hanoin dala ida tan katak: ““ema nebé hakarak tuir Ha’u, sei haluhan nia-an rasik; simu nia cruz hodi tuir Ha’u”. Assim Seja e Bem Haja (ignas2020).

Leave a Reply

Your email address will not be published. Required fields are marked *