shadow
Diocese de Dili > NOTÍCIAS > LETURA DIÁRIA > Terça-Feira, XXV Semana Tempo Comum (ANO A)

Terça-Feira, XXV Semana Tempo Comum (ANO A)

Primeira Leitura            Pro. 21. 1-6, 10-13

Lia housi livro Provérbios nian:

Liurai nia fuan iha Na’i Nia futar liman: hanesan ué boot be suli, Nia haruka liurai ba fatin nebé Nia hakarak. Tuir ema nia haré, dalan sira hotu hanesan lós de’it; maibé, Na’i mak tetu ema sira nia fuan. Moris tuir justiça no lialós di’ak liu fali buat-karan iha Na’i futar oin. Matan áas, fuan foti-an, ne’e mak ema laran áat nia ahi oan nebé sala tebes. Ema badinas nia serbisu sei manan riku soi, maibé, baruk-teen hodi hakfodak ba buat hotu, sei monu lós ba susar laran. Buka riku-soi ho liafuan bosok ne’e hanesan anin be huu liu, hanesan hani ba mate.

Ema laran áat nia klamar hakarak buat áat; sei la hanoin netik nia belun. Ema haraik-an hetan matenek wainhira haré ema be hasara maluk hetan castigo. Ema matenek haklean buat nebé nia hatene wainhira nia rona ema seluk nia hanourin. Wainhira ema be hasara ema seluk hetan castigo, ema laran makerek sira sai ema laran mós. Ema laran mós rona ema seluk nia hanourin, nia habo’ot-an iha buat nebé nia hatene.

Maromak justiça Na’in, haré hela ema fiar laek nia uma no haderak sira be hadook an housi Nia. Sé mak taka tilun ba ema kiak nia hakilar, nia mós sei hakilar hodi husu tulun. Maibé, ema sei la sée tilun ba nia hakilar.

Maromak Futar Lia.

 

Salmo Responsorial                                                                                                          Sal.118(119). 1, 27, 30, 34, 35, 44 (R.35ª)

Refrão : Na’i, lori ha’u tuir dalan Ita ukunfuan nian!!! Repete-se

Rahun di’ak ba ema sira nebé tuir dalan lós,

Halo tuir Na’i Nia lei;

Ha’u hili nanis dalan lialós nian,

Hodi tau iha ha’u oin Ita ukunfuan! Refrão

 

Na’i, hatudu Ita dalan mai ha’u,

Atu ha’u bele la’o tuir!

Hanourin ha’u moris tuir ita hakaran,

Hodi rai didi’ak ho fuan tomak! Refrão

 

Na’i, lori ha’u tuir dalan Ita ukunfuan nian,

Basá Ita lei mak ha’u nia ksolok.

Ha’u sei halo tuir Ita lei ho neon lós,

Oras ne’e no ba nafatin! Refrão

 

Aclamação                                                                                                                                                                                           Lc. 11. 28

Refrão : Aleluia, Aleluia!! Repete-se

Rahun di’ak ba sira nebé rona Maromak Nia futar lia,

hodi moris tuir. Refrão

 

Evangelho                                                                                                                                                                                        Lc. 8. 19-21

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus nia inan ho Nia maun-alin sira mai buka Nia, maibé sira la bele hakbesik ba Nia tanba ema lubun boot. Ema nira fó hatene ba Nia: “Ita nia inan no maun-alin sira hamriik iha liur hodi hakarak haré Ita,” Nia hatan ba sira: “ Ha’u nia inan no maun alin sira mak sira nebé rona hodi halo tuir Maromak nia liafuan.”

Lia Maksoyn.

Leave a Reply

Your email address will not be published. Required fields are marked *