shadow
Diocese de Dili > NOTÍCIAS > LETURA DIÁRIA > Quinta-Feira, XXV Semana Tempo Comum (ANO A)

Quinta-Feira, XXV Semana Tempo Comum (ANO A)

Primeira Leitura                Ecl. (Co.) 1. 2-11

Lia housi livro Eclesiastes:

“Sasan kmo’ok no kmanek ema nian-Coélet hateten-sasan furak no kmanek ema nian, furak no kmanek leet de’it!” Sá mak ema ida sei hetan ho nia badinas nebé nia hala’o iha loro nia okos?

Ema otas ida nian liu, mai fali otas seluk ida. Rai hari metin nafatin. Loro mosu mai hafoin loro monu, nia fila lalais kedas ba fatin nebé nia mai, atu nune’e nia bele mosu fila fali. Anin huu ba tasi mane, hafoin fila ba tasi feto; nia la’o dulas ba mai hodi hetan fali nia dalan. Ué mota sira nian tama hotu iha tasi, maibé, tasi la nakonu; housi fatin nebé sira liu ba, sira sei liu hikas fali de’it housi fatin ne’e. Buat hotu hatudu kole, ema ida la bele explica;  matan la to’o haré mós, tilun mós la rona lolós. Buat nebé iha, sei iha fila fali de’it, Buat nebé mosu, sei mosu fila fali de’it: iha loro nia okos sei la mosu buat foun ida. Housi buat ruma ema dehan karik: “Imi haré ba, ne’e buat foun ida”. Tan nia iha tiha ona, iha tempo hirak uluk nian! Buat uluk nian sei la fó tada mai ita, no mós buat hirak nebé sei mosu tuir mai sei la fó tada ba sira nebé sei moris ikus liu mai ita.

Maromak Futar Lia.

 

Salmo Responsorial                                                                                                           Sal. 89(90). 3-4, 5-6, 12-13, 14 e 17 (R. 1)

Refrão : Na’i, Ita mak ami Mahein housi otas ba otas!!! Repete-se

Na’i, Ita halo ema sira fila ba rai rahun,

Hodi dehan: ‘Adão oan sira, imi fila!’

Na’i, iha Ita futar oin tinan rihun ida,

Hanesan loron houri sehik, be liu ona. Refrão

 

Na’i, Ita hasai sira hanesan mehi ida,

Hanesan aihoris be matak iha dader.

Nia moris no nafunan iha dader,

Namlaik hodi lakon iha loraik. Refrão

 

Na’i, hanourin ami sura ami loron,

Atu hetan fuan matenek.

Na’i, fila hi’as mai! To’o wainhira..

Na’i, sadi’a Ita atan sira. Refrão

 

Habosu ami housi dader ho Ita laran-luak,

Atu ami moris ho ksolok iha loron hotu.

Na’i, ami Maromak, haraik mai ami graça,

Hametin, Na’i, ami liman nia hahalok. Refrão

 

Aclamação                                                                                                                                                                                             Jo. 14. 6

Refrão : Aleluia, Aleluia!! Repete-se

Ha’u ne’e dalan, lialós no moris hun, Na’i lia tun;

ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                                            Lc. 9. 7-9

Na’i Jesus Cristo nia Evangelho nu’udar São Lucas haktuir:

Iha tempo nebá, rona tiha kona ba buat ne’e hotu nebé Jesus halo, liurai Herodes hakfodak, basá ema balun dehan katak João moris hi’as fali housi mate; maibé ema seluk dehan katak Elias mosu fali, no ema seluk tan dehan katak profeta uluk sira ida moris hi’as falin. Maibé Herodes dehan: “Ha’u tesi tiha ona João nia ulun. Ne’e duni, ema ne’e se lós, nebé kona ba nia ha’u rona buat hirak ne’e?” No nia buka namanas atu haré Nia.

Lia Maksoyn.

Leave a Reply

Your email address will not be published. Required fields are marked *