shadow
Diocese de Dili > NOTÍCIAS > LETURA DIÁRIA > XXVI DOMINGO TEMPO COMUM (ANO A)

XXVI DOMINGO TEMPO COMUM (ANO A)

Primeira Leitura                     Ez. 18, 25-29

Lia housi Livro Profeta Ezequiel:

Na’i lia tun nune’e: “Imi hateten: ‘Na’i nia hahalok la tuir dalan los!’  Ne’e duni, Israel nia oan, rona mai: Ha’u nia hahalok ne’e la tuir dalan los? Keta imi nian karik mak la los? Wainhira ema di’ak husik tiha nia hahalok di’ak ne’e, hodi halo aat, hafoin mate karik, nia sei mate tan buat aat nebé nia halo. Wainhira ema maksalak husik tiha nia moris aat hodi moris los, tuir dalan di’ak, nia sei soi nia moris. Nia loke karik matan hodi hakribi salan nebé nia halo, nia sei moris, sei la mate.”

Maromak Futar Lia.

 

Salmo Responsorial                                                                                                                                       Sal. 24(25), 4bc-5. 6-7. 8-9

Refrão : Na’i, hanoin Ita nia laran luak!!! Repete-se

Na’i, halo ha’u hatene Ita nia ukun-fuan,

hanourin Ita dalan mai ha’u.

Hatudu Ita nia lialos mai. Ita, ha’u nia Maromak,

ha’u nia Maksoin. Na’i, ha’u hein ita. Refrão

 

Na’i, hanoin Ita nia laran maus,

no Ita laran di’ak nebé la nahas.

Keta hanoin ha’u nia salan, hahalok aat molok sei klosan.

Hanoin ha’u ho laran luak, Na’i, tan di’ak tebes. Refrão

 

Na’i, di’ak laran maus,

lori ema maksalak ba dalan los;

halo ema kiik moris tuir justisa,

hanourin ba ema ki’ak atu tuir. Refrão

 

Segunda Leitura (Forma Longa)                                                                                                                                              Flp. 2, 1-11

Lia housi São Paulo nia surat ba sarani sira iha Filipo:

Maun-alin sira: Iha karik ksolok oan ruma iha Cristo, iha karik laran kmaan ruma iha caridade; bele simu netik tulun ruma housi Espirito Santo, iha karik hadomi no laran luak ruma, ne’e sa, imi buka hato’o ha’u nia ksolok hodi moris hamutuk ho neon no hanoin ida de’it: Buka tuir hadomi ida de’it, klamar ida de’it, hanoin ida de’it. Keta halo buat ruma hodi buka hasouru malu, eh hodi foti an de’it; maibé, ho haraik-an, buka hanoin ema seluk boot liu imi an rasik; keta hanoin ida-idak buka de’it sasan ba nia, maibé, hanoin buat nebé ema seluk hakarak.  Buka tuir de’it Cristo Jesus nia hanoin. Nia maski Maromak, la hakarak hatudu hanesan Maromak. Maibé, Nia haraik tiha Nia-an rasik, hodi hola isin ida hanesan atan, sai nu’udar ema. Iha tiha ilas nu’udar mane ida, Nia haraik An liu tan, hodi halo tuir to’o mate, hodi iha cruz. Tan ne’e, Maromak hahi Nia. Tan ne’e, Maromak fo ba Nia naran ida nebé boot liu naran hotu-hotu. Atu, ho Jesus nia naran, ain-tur hotu sei hakneak iha lalehan, iha rai, iha inferno; nanal tomak haklaken katak Jesus Cristo ne’e Na’i, atu hahi Aman Maromak.

Maromak Futar Lia.

 

Segunda Leitura (Forma Breve)                                                                                                                                                Flp. 2, 1-5

Lia housi São Paulo nia surat ba sarani sira iha Filipo:

Maun-alin sira: Iha karik ksolok oan ruma iha Cristo, iha karik laran kmaan ruma iha caridade; bele simu netik tulun ruma housi Espirito Santo, iha karik hadomi no laran luak ruma, ne’e sá, imi buka hato’o ha’u nia ksolok hodi moris hamutuk ho neon no hanoin ida de’it: Buka tuir hadomi ida de’it, klamar ida de’it, hanoin ida de’it. Keta halo buat ruma hodi buka hasouru malu, eh hodi foti an de’it; maibé, ho haraik-an, buka hanoin ema seluk boot liu imi an rasik; keta hanoin ida-idak buka de’it sasán ba nia, maibé, hanoin buat nebé ema seluk hakarak.  Buka tuir de’it Cristo Jesus nia hanoin.

Maromak Futar Lia.

 

Aclamação                                                                                                                                                                                           Jo. 14, 23

Refrão : Aleluia, Aleluia!! Repete-se

Ema nebé hanoin Ha’u, sei halo tuir Ha’u nia lia-fuan;

Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                                    Mt. 21, 28-32

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba boot sacerdote sira nian no ba ema katuas sira povo nian: “Imi hadomi oin sa? Ema ida iha oan mane rua. Nia ba hasouru ida boot, hodi dehan: ‘Oan, ohin ó ba serbisu iha toos uvas nian.’ Maibé nia hatan: Ha’u la kohi.’ Hafoin liu tiha, nia hanoin didi’ak fali, nia ba duni. Aman ne’e ba hasouru fali oan seluk hodi hateten hanesan uluk. Nia hatan: ‘Ha’u ba Na’i.’ Maibé, nia la ba. Sira na’in rua ne’e, ida nebé mak halo tuir sira nia aman nia hakarak?” Sira hatan: “Ida uluk ne’e,” Jesus simu hasouru sira: “Ha’u dehan tebes ba imi: Ema publicano no feto moris aat sira sei ba Maromak nia Reino uluk liu imi. João Baptista mai hasouru imi iha dalan nebé lori ba justisa, imi la fiar nia; maibé, ema publicano no feto moris aat sira fiar duni nia. Imi hare tebes nia, la hakribi imi salan, hodi fiar nia.”

Lia Maksoyn.

One comment on “XXVI DOMINGO TEMPO COMUM (ANO A)

  1. Avelino Guterres

    Ensagen ba loron ohin nian iha Domingo Santo Ida ne haktuir klean tebes Mai ita ema humanu nudar liman rohan Na’i nian husi leitura incio too mai iha Evangelho kolia sai Momos ktk ita idak2k preokupa ho ita Nia moris rasik hodi la tulun malu buka Hari ba aan rasik hodi haluha ema bkiit laek sira nebe mak sofre, terus injustisa nb presiza tebes it Nia tulun. Oinsa Jesus Nia domin fo Mai ita klean tebes maibe ita rasik ladauk deskovre, ladauk halo tuir lolon Nia hakrk. Maske susar maibe sforsu ba neneik maibe bebeik sei sai diak liu. Amen halleluija bom Domingo. Maromak haraik bensa ba ita hotu.

Leave a Reply

Your email address will not be published. Required fields are marked *