shadow
Diocese de Dili > NOTÍCIAS > OPINIÃO > IMACULADA CONCEIÇÃO : KOUS HO DOMIN

IMACULADA CONCEIÇÃO : KOUS HO DOMIN

(Perspetiva Jornalistica ba Existência 80 anos Arquidiocese Dili)

Housi : Marta do Rosário Afoan, Lcs.

 

Haktuir iha Biblia Sagrada iha livru Genésis (1:1-26) katak wainhira Maromak hahu halo lalehan ho rai, Maromak cria mos buat kmanek oi-oin iha mundo nia laran nune’e Maromak cria ema mane ida tuir Nia ilhas atu tau matan ba  buat hirak nebé cria uluk ona no Maromak hare katak cria de’it ema mane ida ne’e la naton nune’e mak  Maromak hasai ruin knosen ida housi mane nian hodi halo ema feto ida atu bele hamaluk nia. Mane no feto ne’e mak naran Adão ho Eva nebé sai ema primeiro, nu’udar criatura Maromak nian iha mundo nebé ikus mai geração tutan ba tutan sai barak liu tan iha mundo ida ne’e  to’o ohin loron.

Housi ne’e ita bele comprende katak hahu housi Adão ho Eva nia presença iha mundo mak tutan mai to’o ohin loron ita  bele moris hodi goja buat kmanek sira be Maromak tau uluk ona iha mundo ida ne’e tuir ita nia hakarak nebé masque dala ruma la tuir mos Na’i nia hakarak.  Dehan nune’e tanba dala wa’in ita ema criatura nebé moris housi íis Na’i Maromak nian rasik haluha Maromak no nunca cumpri kna’ar hanesan criatura ida be simu  kna’ar atu tau matan ba criatura seluk no criatura be lori ilhas Maromak nian, atu  banati tuir Maromak nia moris. Los duni katak ita ema sempre halo sala contra Na’i  Maromak  nia ukun fuan sira iha iha ita nia moris lor-loron, ida ne’e acontece tanba ita lao hakat tuir criatura primeiro nia ain fatin nebé halo sala contra Na’i Maromak nia mandamento hodi han fali aifuan bando nian. Nu’udar concequênçia housi sala ne’e mak ita ema la perfeito hanesan criatura dahuluk, só Maromak de’it mak perfeito.  Maibe masque ita halo sala contra bebeik  Maromak nia mandamento sira, Maromak sempre hadomi nafatin ita hodi ikus mai haruka Nia Oan mane mesak mai  mundo hodi soy ita housi nakukun laran.

Liu tiha séclo barak nia laran depois de ema moris ba  sala ne’e, Maromak hakarak hatudu nafatin ninia domin rohan laek ba povo be Nia hili, ba criatura hotu-hotu be mesak ninian de’it hodi continua ninia obra salvação, hodi soy ninia povo housi terus fatin Egipto mai to’o ohin loron. Atu ninia Oan Mane Jesus Cristo mai iha mundo Maromak hahu ho hamoris feto ida naran Maria, moris iha cidade Nazare housi família simples ida nebé hadomi Maromak. Moris housi aman St. Joaquim no inan St. Ana nebé ho fuan boot hala’o kna’ar ho domin hodi servi Maromak no maluk sira. Tan ne’e ita venera St. Joaquim no St. Ana basá sira na’in rua hanorin no cuidado sira nia Oan (Na’in Feto Maria) hodi hasa’e ba Maromak. Maria hafoin sai feto ida nebé hadomi lolos Maromak hodi halo tuir Maromak ninia hakaran tomak.  Halo tuir hodi mos sai Jesus Cristo maksoyn nia inan no ema hotu nia inan. Tanba kedas ne’e mak santa creda housi moris hahu mai fiar iha Maria nu’udar inan ida, inan ida be hadomi santa igreja nu’udar Maromak hadomi,  inan ida nebé tanba kous mundo nia maksoyn nia concerteza moris la ho sala original. Nune’e igreja hanaran Maria Inan Sala Laek ka Inan ba kous la ho salan, Imaculada Conceição.

Imaculada katak laiha sala, Sala Laek, moos ou Pura. Conceição katak kous, nune’e inan Imaculada Conceição katak inan kous la ho sala. Naran Imaculada ne’e oferece ba Na’in Feto hanesan sentido omenagem no consagração Maria Jesus nia inan, Imaculada Conceição iha sentido hanesan mos Concepção Jesus, nebé ho  lian Latina dehan Conceptus significa “Aifuan” ou “Concepção”. Na’in Feto mak kous Jesus Maromak oan iha ninia knotak, nune’e Imaculada Conceição katak ko’us Jesus Cristo ho sala laek. Tan ne’e iha século XIX liu, Amo Papa Pio IX  formula titulo ida ne’e nu’udar dogma ka doutrina formal igreja catolica  nian. Iha tinan 1854 iha Lourdes, França bainhira Virgem Maria mosu ba labarik ida naran Bernadette Soubirous ho idade 14 Na’in Feto Virgem Maria hatudu an nu’udar Imaculada Conceição. Quando Bernadette husu ba Nia (Na’in Feto) katak Ita se? Nia hatan dehan “Ha’u mak Imaculada Conceição”.

Matenek na’in Direito Canõnica no Teologia Edson  Luiz Sampel mos hateten dehan tudo ser humano nasce com o pecado original, mas Maria gozou do privilégio da concepção pura, porque Ela estava predestinada a ser a mãe de Deus, isto é a mãe de Jesus. Ne’e katak  nu’udar  humano ema hotu sempre moris ho sala original nian maibe Maria goza previlégio ida housi Concepção pura nian tanba hili Nia sai hanesan inan Maromak nian, ne’e mak Jesus nia Inan.

Loron comemoração Na’in Feto Imaculada Conceição nian sempre comemora iha dia 8 de Dezembro nebé hakerek iha calendário liturgia  housi Papa Sisto IV iha  dia 28 de Fevereiro 1477. Atualmente sai hanesan festa ba mahein igreja católica hot-hotu nian, nune’e mos hahu iha tinan 1940 wainhira Arquidiocese Dili moris ona nu’udar Diocese, nia fo an kedas ba Maria Imaculada Conceição mak sai ninia mahein. Nu’udar creda Arquidiocese Dili fiar katak Inan Santa be Maromak ninia Inan rasik nia harohan sai rohan laek nakonu ho graça oi-oin. Nune’e mak oras ne’e Arquidiocese Dili halo ona tinan 80 iha loron 4 fulan Setembro 2020 liu ba no ita sei celebra hamutuk ninia festa iha loron 8 fulan Dezembro ne’e, nebé mahein ninia loron rasik.

Imaculada Conceição: “Kous ho domin” sai hanesan tema especial ba Arquidiocese Dili nebé celebra ninia  existência 80 anos nu’udar mahein uma creda arquidiocese Dili nian nomos mahein nação Timor Leste nian.  Tan ne’e hateten Imaculada Conceição “kous ho domin” tanba Na’in Feto kous ho sala laek ou kous ho moos, liu housi Espírito santo nia kbiit nebé haraik ba Na’in Feto no Na’in Feto halo tuir duni Na’I nia hakarak hodi simu graça nebé haraik ba Nia. Masque Na’in Feto la moris hamutuk ho mane (São José) maibe Na’in Feto laiha hanoin ida, laiha intenção ida atu estraga bebe ou Kosok-Oan nebé iha ona ninia knotak hanesan ema wa’in estraga iha cidade Dili laran ne’e, Na’in Feto kous halo tuir nafatin de’it mak Maromak nia hakaran. Na’in Feto sempre cuidado nafatin Kosok-Oan Jesus masque iha desafio oi-oin nebé Nia hasoru iha comunidade nia leet, Na’in Feto ho pacencia ho domin boot ba Maromak  simu  ou  halo tuir buat nebé mak Anjo hateten ba Nia, ikus mai Na’in Feto tur ahi iha balada han fatin de’it no sente katak fatin ne’e mak seguru duni ba sira atu hamahan an ba.  

Hakerek na’in hakarak haklean uitoan kona ba liafuan “Kous ho domin”. Ne’e katak simu realidade moris nebé iha ita nia an ho laran haksolok hodi tau matan, cuidado hodi la hanoin a’at ba ita ran rasik, tanba nia mos ema hanesan ho ita, nia mos criatura Maromak nian nebé precisa domin housi inan aman hodi tau matan no cuida didi’ak nia nune’e nia mos bele presente iha mundo tuir Maromak hakarak. Ita labele contra Maromak nia hakarak. Só domin mak bele motiva ema atu protégé, atu hamoris, atu acompanha no atu tulun ema iha moris ne’e.

 Na’in Feto ninia obidiencia ba Maromak no ninia sasin moris halo ita  bele descobre katak Na’in Feto iha fuan no domin nebé boot ba Maromak hodi halo tuir Maromak nia hakarak tanba Nia sente katak Nia ne’e íis moris Maromak nian nune’e temque simu buat nebé mak Maromak fo. Dala barak iha situação sira hanesan soe bebe be aumenta barak ne’e fo hanoin teb-tebes mai ita ida-idak tanto feto ou mane atu reflete ita nia hahalok sira nebé dala barak laiha conçiencia, dala barak laiha sentimento hanesan ema humana, dala barak hakarak riku soin mundo nian de’it, dala barak hakarak iha buat hot-hotu nune’e ikus mai halo buat hot-hotu tuir ema ida-idak nia hakarak, tuir ema ida-idak nia interese, tuir ema ida-idak nia gosto de’it hodi soe bebe mos arbiru de’it  hanesan buat folin laek ida.

KOUS HO DOMIN, ne’e liafuan simples tebes maibe ninia significado klean ba ita atu hatene no reconhece ita nia an didi’ak katak ha’u ne’e humana ida nebé íis moris Maromak nian hanesan mos ho bebe ou kosok oan nebé soe iha fatin-fatin. Tan ne’e Na’in Feto sai modelo ba inan hot-hotu iha mundo tomak nebé sai hanesan inan igreja nian, Na’in Feto sai inspirador ba ema hot-hotu (feto mane)  atu banati tuir Nia ain fatin nebé hatene hadomi, hatene fo atenção no  hatene cuida ema no  buat hotu nebé mak Maromak haraik ba Nia.

Simplesmente ita  bele dehan obedece ba Maromak mak valoriza moris. São João Paulo II dehan “A questão sobre o valor da vida, sobre o significado da vida, faz parte do singular tesouro da juventude. Mais ainda, quando a juventude é testada pelo sofrimento pessoal, ou é profundamente consciente do sofrimento dos outros; quando se encontra face a face com o mistério do pecado e a iniquidade humana (mysterium iniquitatis). Ne’e katak  questão kona ba valor moris, kona ba significado moris ne’e hola parte unica ba rikusoyn moris juventude nian. Liu tan ida ne’e quando juventude ne’e  hamosu  nu’udar obstaclo sofrimento iha ninia moris pessoal ou profunda liu tan wainhira nia conçiencia mos ho ema seluk nia  sofrimento; bainhira nia hasoru direitamente ho mistério pecado nian no mistério ema nia hahalok a’at sira (mysterium iniquitatis). Jesus Cristo nia hanorin be dehan katak “ somente Maromak de’it mak di’ak, só Maromak de’it mak domin”. Halo ita consiente mos ho mistério moris ita ema nian sira iha leten. Halo ita descobre no comprende mos katak los duni masque dala barak ita sala bebeik hasoru Maromak ninia hakarak hodi la tuir maibe Maromak sempre di’ak nafatin ba ita, Maromak sempre iha domin nafatin ba ita liu housi nia Oan Mane mesak Jesus Cristo. Tan ne’e atu bele hadomi nafatin hanesan Maromak hodi hadomi Maromak no hadomi ema seluk hahu kedas housi concepção ema nian to’o mate ita precisa kesi ita-an  no tau fiar ho laran metin nafatin iha Maromak Aman, Oan no Espírito Santo, no lao hamutuk nafatin ho Na’in Feto nebé sai modelo hamtauk ba Maromak nian no mahein ba Maromak oan sira hotu de modo geral, no especificamente  ba creda Arquidiocese Dili be iha ona tinan 80 ne’e ba nafatin hodi nune’e ita htou bele moris nafatin iha domin lolos ida Inan nia, Aman nian no oan sira nian nu’udar família ida de’it, família Maromak nian.

REFERÊNCIA:

  1. BIBLIA SAGRADA ESCRITURA TESTAMENTO TUAN
  2. BIBLIA SAGRADA ESCRITURA TESTAMENTO FOUN
  3. https://www.mirifica.net/2019/07/25/santa-Ana-dan-santo-yoakim-orangtua-santa-perawan-maria-26-juli/ asesu iha loron 22 fulan Setembro tinan 2020
  4. http://g1.globo.com/jornada-mundial juventude/traduzindo/platb/2013/07/22/entenda-o-que-e-a-imaculada-conceicao-de-maria/ asesu iha loron 22 fulan Setembro tinan 2020
  5. https://www.dicionariodenomesproprios.com.br/imaculada/ asesu iha loron 22 fulan Setembro tinan 2020
  6. Union of Catholic Asian News 9 de Novembro de 1988
  7. São João Paulo II “Frases inspiradoras de São João Paulo II sobre o amor e o sacrifício” asesu iha loron 23 fulan Setembro 2020.

 

Leave a Reply

Your email address will not be published. Required fields are marked *