shadow
Diocese de Dili > NOTÍCIAS > REFLEXÃO > AS MÃOS DADAS SÃO MAIS VALIOSO DO QUE AS BOCAS QUE REZAM

AS MÃOS DADAS SÃO MAIS VALIOSO DO QUE AS BOCAS QUE REZAM

Reflexão & Leituras DOMINGOCOMUM XXXIV/Ano A/2020

(SOLENIDADE CRISTO REI DO UNIVERSO)

Ez 34,11-12.15-17  1Cor 15,20-26a.28  Mt 25,31-46

 

Santa Teresa de Cacutá hatete: “As mãos dadas são mais valioso do que as bocas que rezam”. Ita halo tradução literal tuir contexto Timor nian karik dehan: Liman nebé fo bebeik tulun, kmanek liu ibun nebé garganta paralon iha media no facebook kona ba luta ba funu, campo de serviço no kaer cargo estado.

Wainhira Pandemia Covid19 mosu, grupo apoio humantário oi-oin tanto housi grupo voluntário sira, grupo partidário, grupo Igreja Católica, governante, arte marciais, Esposa do presidente, mosu nab-naban iha cidade capital hodi fo tulun ba família sira nebé enfrenta hamlaha tan impacto housi surto refere.

Covid19 seiduak de’it hetan solução (incertesa), política rai laran mos lao la tuir corridor lei tan partido sira selok malu hodi forma coligação ho motivo atu kaer poder too periodo eleiçào tuir mai.

Wainhira KHUNTO, FRETILIN ho PLP hamutuk kaer ukun maske la tuir processo legal sira, CNRT nudar partido segundo mais votado automaticamente sai oposição iha orgão legislativa ho executivo.

Lider carismático Kay Rala Xanana Gusmão continua halao ação caritativa ba povo haleu município sira enquanto grupo hirak fo-foun mosu nab-naban hahu pausa sira nia ação. Infelizmente, ação ida ne’e hetan reação pro-contra iha sociedade li-liu iha media social (Facebook) tanba lider partido balu dun Xanana Gusmão halo caridade hodi buka votus, halo caridade hodi taka falta, halo caridade hodi buka popularidade.

Nudar lider nacional no contempla ba livro profeta Ezequel nian, talvés avo Nana conciente katak: “…“Ha’u rasik sei tau matan ba Ha’u nia bibi sira. Ha’u mak sei haré sira. Hanesan bibi-atan tau matan ba nia bibi sira, wainhira nia hela iha bibi sira nebé lakon nia klaran,nune’e mos,Ha’u sei tau  matan ba Ha’u nia bibi sira,hodi  hasai  sira  housi fatin nebe  sira la’o  lakon  iha  loron nakukun,iha loron abu-abu taka rai metin”.

Pior ainda mak housi parte governo mos lança programa cesta básica ho motivo recuperação economia? Após pandemia maske programa ne’e nia lalaok hamosu cofusão no mal interpretação iha sociedade. Partido balu dehan programa ne’e governo halo taka falta de’it, balu dehan programa Copy Paste de’it ação Xanana Gusmão nian, balu fali dehan cesta básica hanesan mos ho fo lucro ba companhia no loja sira no fahe perdiem ba staf técnico ho gorvernante sira, enquanto povo simu de’it bote mamuk ho custo 25 dóllares.

Nudar Timor oan, buat nebé ita precisa tau iha consideração mak qualquer ação nebé ita halo ba ema kbiit laek sira, ne’e significa ita halo ba Maromak. La precisa generaliza eh politiza qualquer lalaok nebé relaciona ho caridade basá, Jesus rasik tenik: “…‘Ha’u dehan tebes ba imi: wainhira imi halo ba Ha’u nia alin ruma, maski nia ki’ik liu, imi halo mai Ha’u.”

Iha contexto Timor Leste, povo sarani ne’e matenek ona hodi interpreta cada apoio nebé mak sira simu ne’e, motivação saida? Político no apoiante partido sira la precisa ofende malu iha facebook hodi halo propaganda. Housik Maromak iha leten aas ba hatene se mak halo di’ak se mak buka naran. Maromak nia omniciência ne’e mos saran hela ba povo Timor Leste nia kbaas hodi lee motivo housi qualquer grupo eh figura nebé halo ação caritativa ba ema kbiit laek sira.

Ita la sente katak Igreja Católica semana ne’e tama ona iha semana ikus ano litúrgico A. Semana ne’e liu tiha ita sei tama hikas ba tempo Advento durante semana hat tutuir malu, nudar preparação ba festa Natal.

Normalmente Igreja Católica termina cada ano litúrgico ho solenidade Cristo Rei do Universo. Evangelista Mateus (Mt 25,31-46) halo relato hodi fo imagem oitoan kona ba Julgamento ikus (último julgamento/Juízo final/penghakiman terakhir). Termo julgamento ikus ou juizo final, Jesus rasik mak pronuncia molok Jesus ba Jerusalém hodi hasoru justiça ba Ninia mate. Biblista sira reflecta katak juizo final mos refere ba Jesus atu fila hikas mai segunda vez(parousia) hodi decide ita ida-idak nia destino final.

Iha relato sobre justiça final, iha neba descreve tipo ema grupo boot rua nebé figurado hanesan bibi malae nudar grupo eh ema hirak nebé rona Maromak Futar Lia Fuan  hodi tau iha pratica no grupo ida seluk nudar bibi timur mak hirak nebé lakohi rona Maromak Futar Lia Fuan.

Bibi malae sira colocado iha Mane Maksoin nia kuanan (Liman los/braço Direito) enquanto bibi timur sira iha sorin karuk (Liman karuk/braço Esquerda).

Cristo nudar makaer ukun (poderoso) iha história moris ema nian ao mesmo tempo sai liurai ba universo nene, nia halo decisão tuir realidade moris ser humano nian significa durante moris ema ne’e simu nodi halo tuir Maromak nia Mandamento ou keta ema ne’e rejeita hodi foti liman/foti lia hasoru Maromak nia manu-ain (profeta) sira nebé haklaken Maromak nia Futar Lia?

Se ita ita se kotuk (rejeita) Maromak nia Manu-ain (profeta) hanesan mos ita rejeita simu Jesus nudar Maksoin eh Liurai. La simu Jesus  hanesan Maromak Oan hanesan de’it ho ita la simu Aman Maromak!

Jesus afirma katak se ita halo di’ak, halao caridade, perdão, laran luak ne’e significa ita halo ba Maromak.

Basá Jesus haraik-An hanesan ho ema kbiit laek sira, ema marginalizado sira, hamlaha-hamrook sira, ema lao rai sira ema moras sira no ema iha cadeia sira:”… Tan Ha’u hamlaha, imi fo han Ha’u, Ha’u hamrook, imi fo wé Ha’u, Ha’u mai housi dook, imi simu Ha’u, Ha’u la iha hena, imi fo hatais Ha’u, Ha’u moras, imi ba haré Ha’u, Ha’u iha cadeia, imi ba haré Ha’u. …. ‘Na’i, wainhira ami haré ita hamlaha, ami fo han, eh hamrook, ami fo wé? Wainhira ami haré ita mai housi dook, ami simu, eh ita la ho hena, ami fo hatais? Wainhira ami haré ita moras eh iha cadeia, ami ba haré?’ … ‘Ha’u dehan tebes ba imi: wainhira imi halo ba Ha’u nia alin ruma, maski nia ki’ik liu, imi halo mai Ha’u.

Jesus nia justificação ne’e hanorin ita katak ita nobun nudar povo Maromak nian ou seja ita hotu nudar cidadão Jesus nian nebé ninia maneira de viver diferente ho Reino seluk iha rai ne’e!

Grandeza Reino Jesus nian simplifica iha laran luak, domin, perdão. Lalaok hirak ne’e tenke justifica ho ação concreta ba maluk sira até sacrifício boot sira (mate, martírio) hanesan mos Jesus nebé brani mate atu ita nobun hetan salvo eh sai liman rohan (ahli waris) Lalehan.

Nune’e, afinal ita hatene ona katak, ema laran di’ak hirak nebé fo tulun ba ema kbiit laek sira ne’e significa ita servi Maromak rasik (Mt 25,37-38)

Ba ema amaldicionado/terkutuk sira (Mt 25,41) sei admira basá, sira ignora (indiferente/cuek/acuh tak acuh) ba ema hirak nebé iha susar laran, afinal nia ignora Maromak rasik;”…Tan Ha’u hamlaha, imi la fo han, Ha’u hamrook imi la fo wé, Ha’u mai housi dook, imi la simu Ha’u. Ha’u la iha hena, imi la fo hatais Ha’u, Ha’u moras, Ha’u iha cadeia, imi la ba haré Ha’u. … “Na’i, wainhira ami haré Ita hamlaha eh hamrook, mai housi dook eh mai la iha hena, moras eh iha cadeia, maibé, ami la tau matan ba ita?’ Nia sei hatan ba sira: ‘ Ha’u dehan tebes ba imi: wainhira imi la halo ba Ha’u nia alin ruma, maski imi ki’ik liu, imi mos la halo mai Ha’u.Nune’e, claro ona mai ita nobun katak di’ak eh aat nebé ita halo iha moris ne’e, Maromak sei sura hotu hodi tetu iha dasin justiça final nian.

Papa emérito Bento XVI afirma katak: “Reino nebé Cristo funda eh edifica ne’e Universal. Horizonte Reino nebé caritativo no laran luak laos reino territorial nação ida nian nebé delimita ho fronteira sira maibé, Reino celestial sem limite”.

Papa emérito ne’e mos acrescenta katak comunhão ida gera (hahoris) unidade. Iha nebé mak ita bele haré no sente comunhão no unidade refere? Iha Igreja nebé ninia povo tomak hamutuk celebra Eucaristia no lidera directamente housi Jesus Cristo rasik. Iha Cristo nia Reino, abuso poder, violência, vaidoso, laran tos, kaan ten, ódio-vingança la hetan fatin maibé, haraik-an, laran luak (misericordioso), boa vontade hodi fahe oitoan ba kiak-mukit sira sai hanesan característica fundamental Cristo nia Reino nian.

Contempla kona ba juizo final nebé São Mateus Evangelista relata, Santa Teresa  Cacutá dala barak foti liman hodi loke liman fuan lima ne’e hodi hatete:” o (1) halo (2) ona (3) ida ne’e (4) mai (5) hau”. Los duni katak Santa ida ne’e, durante ninia moris tomak hanoin ona hodi tulun hirak nebé precisa tebes apoio. Tanba ne’e mak santa ida ne’e conhecido nudar figura (o pobre dos pobres). Tanba ninia lalaok ne’e mak ita sempre rona analogia conhecido ida housi Santa Teresa de Calcutá katak: “As mãos dadas são mais valioso que as bocas que rezam”.

Atu ita bele celebra solenidade Cristo Liurai ho fuan tomak, então, nia abut fiar nian tenke kesi metin ba Jesus Cristo nudar we-matan fiar (sumber iman/ Source of Faith). Jesus ne’e duni mak sai hanesan Liurai, profeta, mestre, bibi-atan liliu sai hanesan juiz (hakim/judge) iha loron ikus.

Nia laos liurai nebé abuso poder hodi hadau ukun, halo violência, ditadura, oporunista, maibé, Jesus nia grandeza  nudar liurai mak hatudu domin ba ema kbiit laek sira hodi justifica Maromak nia poder ba universo ida ne’e. Dom Basílio do Nascimento (Bispo Diocese Baucau) iha Oratio Sapientiae primeira gradução ISFIT 2020 hatete: infelizmente, ita nia conceito verdade ohin loron basea de’it ba Maioria ho Minoria. Assim Seja e Bem Haja. (ignasoliveira2020)

Leave a Reply

Your email address will not be published. Required fields are marked *