shadow
Diocese de Dili > NOTÍCIAS > REFLEXÃO > HORI ULUK KEDAS LIAFUAN IHA NANIS, LIAFUAN MAROMAK NANIS, MAROMAK HALO SASAN HOTU HODI NIA, LA HODI NIA BUAT IDA LA MORIS. NIA MAK MORIS NAIN, MORIS NEE MAK EMA NIA NAROMAN, NAROMAN NABILAN HELA IHA NAKUKUN LARAN, NAKUKUN LA SIMU NIA (Cf. JO 1, 1-4).

HORI ULUK KEDAS LIAFUAN IHA NANIS, LIAFUAN MAROMAK NANIS, MAROMAK HALO SASAN HOTU HODI NIA, LA HODI NIA BUAT IDA LA MORIS. NIA MAK MORIS NAIN, MORIS NEE MAK EMA NIA NAROMAN, NAROMAN NABILAN HELA IHA NAKUKUN LARAN, NAKUKUN LA SIMU NIA (Cf. JO 1, 1-4).

Maun alin sarani doben sira nebé hau hadomi iha ita na’in Jesus Cristo, Naroman to’o ona mai, Ksolok be ita hein to’o ona mai, dame nain too ona mai, ukun nain lolos to’o ona mai. Nia mak Jesus Kosok oan be moris iha Belem, David ninia cidade, Nia, Na’i Maromak ninia oan, Maksoin ema nian, rai klaran nian no kriatura hotu-hotu nia maksoin. Rai hotu lakan nabilan tamba kosok oan ne’e mak Maromak-Maksoin be tun mai rai, mai moris hamutuk ho ema, atu soi ema sira no atu soi rai klaran tomak. Iha kosok oan ida ne’e Maromak hatudu ninia domin rohan laek ba ita ema sira hanesan uluk no fo hatene sai nanis ona ba ita ninia beiala sira housi geração ba geração, katak loron sei to’o mai, feto virgem ida sei kous no tur ahi oan Mane ida, oan ne’e sei sai boot no nia mak sei tur iha ninia aman David nia trono hodi ukun. Ida ne’e mak oras ne’e acontece, mosu no hahu dadaun ona iha ita le’et. Maromak halo tuir lolos kedas ninia promessa hodi hahu soi ona ita ema sira iha kosok oan ida ne’e nebé foin moris, hodi nearas hafalun no hatoba hela iha balada han fatin kiik ida.

Maun alin sarani doben sira,

Primeira leitura halo fo tada mai ita katak buat boot nebé oras ne’e acontece no mosu dadaun iha ita le’et halo ita haksolok tebtebes basa ita hare no hatene ona katak Kosok Oan ida be foin moris ne’e maksoin ida ita nian, criatura tomak nian. Nia mai atu ukun ita tuir dalan justiça nian, ukun ita iha paz, domin, perdão, ksolok no laran luak nian. Ne mak halo ita haksolok, mundo no rai klaran tomak haksolok, hamutuk ho anjo lubun boot iha lalehan ita hananu haksolok hahí hanai Maromak ba ninia domin no ba acontecemento boot liu hotu iha ita ema sira ninia história ne’e, Maromak tun mai rai hodi moris hamutuk ho ema no soi ema sira, lori dame, domin, ksolok no laran metin ba ema hotu.

Segunda leitura halo ita compreende lolos katak maksoin be foin moris ne’e laos ema baibain ida, laos ukun nain baibain ida, maibé nia MAROMAK rasik mak tun mai rai. Kosok oan ne’e Naí Maromak ninia oan mane mesak nebé haruka mai mundo, hola isin ida hodi moris hanesan ita ema atu soi ema no rai klaran tomak. Uluk liu ba Maromak koalia hoi ta beiala sira liu housi profeta sira, maibé ba ita ohin loron Maromak koalia mai ita hodi ninia oan mane rasik, Jesus Cristo. Nia mai moris iha rai klaran hodi koalia diretamente ho ita no realiza hahalok maksoin nian diretamente mai ita nudar ita ema sira testemunha no hatene iha tinan rihun rua resin nia laran ona; ema delek bele hare, ema diuk bele rona, ema monok bele koalia, ema ain kodeik bele lao, ema hamlaha Nia fo han, ema moras nia fo isin di’ak no ema mate nia halo moris hias fila fali. Ba ema hotu nebé fiar hodi lao tuir nafatin kosok oan ida be moris ona mai ita ne’e maksoin nee sei sai rohan laek ba sira, basa Maromak ita ninia maksoin horik ona iha ita leet.

Iha evangelho São João fo tada mai ita katak Jesus Maromak nebé mai halo-An ba ema hodi moris hamutuk ho ita ne’e, Nia rasik Maromak, Nia mak Maromak ninia Futar liafuan, hodi Nia mak Maromak halo buat hotu, Nia mak buat hotu hotu ninia nain no moris nia hun. Nia mosu mai nudar NAROMAN IDA be nabilan iha nakukun laran atu ema hotu nebé hare hodi fiar iha Nia sei hetan moris lolos, moris nudar roman ninia oan sira. Ema hotu nebé simu Nia no fiar iha Nia, Nia haraik kbiit atu sai Maromak oan.

Doben maun alin sira, evangelho tulun ita atu reflete iha Natal tinan ida nee nian katak liu tiha tinan 2000 ona mak Maromak halo-an ba mane hodi hola isin ida no mai moris hamutuk ho ema sira iha rai klaran, ita barak mak simu no fiar duni iha ita nain Maromak ne’e, maibé mos iha maun alin barak mos mak sei lao dook hela Naromak be mosu mai rai klaran ne’e, seidauk simu no fiar iha ita nain Jesus Cristo. Wainhira reflete ba ita ida idak ninia relação moris fiar nian ho ita nain Jesus Cristo karik ita buka hatene took, iha testemunho moris nian ita sai lolos ona naroman nia oan ka ao contrario ita sai fali nakukun ninia oan, katak ita moris tuir lolos Cristo ninia hanorin sira ka ita moris tuir fali de’it mak ita ninia hakarak rasik; iha buat hotu be ita hanoin, ita hakarak, ita koalia no ita halo moris lolos duni iha fiar no laran metin ba Jesus Maromak, ka ita sedauk tau fiar no laran metin lolos ba nia be buat hotu ninia nain, moris nia hun no Maksoin lolos ne’e; ita lao hamutuk ho Cristo be buat hotu hotu no moris ninia nain no hun nee ka iha halao ita ninia moris iha rai klaran nee ita hakas-an mesmesak hela no lao dook los hela housi Nia?

Ita ninia celebração Natal ne’e convida ita atu hamoris fila fali ita ninia moris sarani nian be; simu no fiar Maromak maksoin be mai moris iha mundo hodi soi ema no rai klaran tomak no halo ema hotu sai Naroman ninia oan, katak sai Maromak ninia oan sira nune’e ksolok, dame, no domin lolos nian sai nudar roman rohan laek nebé hakonu ita ninia moris no dura ba to’o rohan laek.  Nune’e maun alin doben sira, mai ita lori ba malu, dame, domin no ksolok nebé oras nee ita simu ona housi Jesus Kosok maksoin ba ita ninia familia, ba ita nia maun alin sira no ba ema ho criatura hotu hotu. Amen.

 

Mutudare-Dili, 25.12.20, Ano B, Por:Pb.

Leave a Reply

Your email address will not be published. Required fields are marked *