shadow
Diocese de Dili > NOTÍCIAS > Articles by: Departamento Comunicação Diocese Dili

Segunda-Feira, I Semana do Advento (ANO B)

Santo André, Apóstolo

Festa

 

Primeira Leitura                                  Rom. 10. 9-18

Lia housi São Paulo nia Surat ba sarani sira iha Roma:

Doben sira, imi haklaken ho imi nia ibun katak Jesus mak Na’i no fiar iha imi nia laran katak Maromak foti Nia housi mate sira leet, imi sei hetan maksoyn. Basá ema fiar ho fuan no nune’e ema hetan justiça, no ema haklaken ho ibun no nune’e mak hetan maksoyn. Basá Escritura dehan: la iha ema nebé fiar iha Nia sei moe lerek. Basá ema judeu no ema grego hanesan de’it; Na’i ida de’it mak Na’i ema hot-hotu nian, nebé haburas ema hotu nebé bolu nia naran. Basá ema hot-hotu nebé bolu Na’i nia naran sei hetan maksoyn.

Maibé oinsá sira bele bolu Nia nebé sira la fiar? No oinsá sira bele fiar iha Nia wainhira sira seidauk rona kona ba Nia? No oinsá ema bele haklaken wainhira ema la haruka sira? Nu’udar hakerek nani: Furak oinsá ain sira nebé lori liafuan-foun-di’ak mai! Maibé la’os ema hot-hotu mak simu Evangelho ne’e; basá Isaías dehan: “Na’i, ema sé mak fiar buat nebé sira rona housi ami?” Nune’e, fiar mai housi buat nebé rona tiha, no buat nebé mai housi Cristo nia liafuan. Maibé ha’u husu: sira la rona? Lós duni, sira rona; basá tuir liafuan Salmo: “Sira nia liafuan belar ba raiklaran tomak, no sira nia liafuan to’o mundo nia rohan”.

Maromak Futar Lia.

 

Salmo Responsorial                                                                                                                                      Sal. 18(19). 2-3, 4-5 (R. 5ª)

Refrão : Nia lia-hatan-teni habelar iha rai tomak!!! Repete-se

Lalehan haklaken Maromak Nia glória,

Firmamento halekar Nia futar liman nia hahalok.

Loron ida tatoli ba loron seluk lia meno ne’e,

Kalan ida fó hatene ba kalan seluk. Refrão

 

La iha liafuan, la iha lia,

La hatene nia katak sá.

Nia lia-hatan-teni habelar iha rai tomak,

Nia lia tatoli housi rai-ikun to’o rai-ulun. Refrão

 

Aclamação                                                                                                                                                                                            Mt. 4. 19

Refrão : Aleluia, Aleluia!! Repete-se

Na’i dehan: “Imi tuir Ha’u mai,

Ha’u sei halo imi hakail na’in ema nian. Refrão

 

Evangelho                                                                                                                                                                                       Mt. 4. 18-22

Na’i Jesus Cristo nia Evangelho nu’udar São Mateus haktuir:

Iha loron nebá, Jesus la’o daudaun tuir tasi Galileia nian, Nia haré maun alin na’in rua: Simão, nebé ema hanaran Pedro, ho nia alin André. Sira soe heladai ba tasi, basá sira ema hakail na’in ema nian”. Sira husik kedas  dai hodi la’o tuir Ha’u.

La’o uituan ba oin, Nia haré maun alin na’in rua seluk: Tiago, Zebedeu nia oan, ho nia alin João. Sira hadi’a hela dai iha ró laran hamutuk ho sira nia aman Zebedeu. Nia bolu sira, no sira husik kedas ró ho sira nia aman, tuir Nia.

Lia Maksoyn.

Segunda-Feira, I Semana Iha Tempo Advento (ANO B)

Primeira Leitura                            Is. 2. 1-5

Lia housi livru Isaías nian:

Isaías, Amós nia oan, haré buat hirak ne’e tomak kona ba Judá no Jerusalém. Loron ida sei to’o; iha loron ne’e foho nebe Na’i nia Uma Lulik hela ba, sei foti-an áas liu foho  sira, iha foho oan sira leten. Nação sira tomak sei halai hotu ba neba, povo ua’in be ua’in sei la’o hotu ba neba.  Sira sei hateten: “Imi mai, ita sa’e ba Na’i nia foho, ba Jacob nia Maromak Nia uma lulik. Nia sei hanourin ita, Nia hanourin dalan mai ita, atu ita la’o tuir Nia dalan terik. Ukun sei mai housi Sião, Na’i futar lia sei mai housi Jerusalém”. Nia nu’udar Juíz ida iha nação sira leet, sei tesi lia hodi fó ordem ba povo ua’in. Hodi surik, sira sei tuku besi fila rai; hodi diman, sira sei halo tudik ko’a háre. Nação sira sei la káer tan kro’at hasouru nação seluk; ema sei la buka halo tan funu. “Mai, uma kain Jacob nian, ita la’o iha Na’i Nia roman”.

Maromak Futar Lia.

 

Ou

Bele mós usa leitura ida ne’e, tan ba ida uluk, Is. 2. 1-5, lê hotu tiha ona iha I Domingo Advento

Primeira Leitura                                                                                                                                                                                Is. 4. 2-6

Lia housi livru Isaías nian:

Iha loron hirak nebá, Na’i Nia fini mak sei hafutar hodi fó glória ba sira be sei moris iha Israel; aifuan rai ninian mak sei foti sira oin hodi halo sira naran sai boot. Sira be sei hela iha Jerusalém no sira be sei moris iha Sião mak ema hanaran santo; sira ne’e hotu, nebé iha Jerusalém, tau sira naran atu moris. Na’i sei mai hamós Sião oan feto, sei hamós ran iha Jerusalém, hodi iis justiça nian no anin maka’as. Iha foho Sião nia fatin tomak, atu hamahan sira hotu be halibur iha nebá, Nia sei nahe kalohan ida ho ahi-suar maka’as iha loron; iha fali kalan, ahi-riin ida lakan naroman. Iha buat hotu nia leten, Na’i nia glória mak sei taka hanesan batane ida, atu hamahan iha loron manas hodi mós taka no tahan netik hasouru udan no anin boot

Maromak Futar Lia.

 

Salmo Responsorial                                                                                                Sal. 121(122). 1-2, 3-4ª, 4b-5, 6-7, 8-9 (R. cf. 1)

Refrão : Ami sei ba Na’i Nia uma ho ksolok!!! Repete-se

Ha’u haksolok tebes uainhira ema dehan:

“Ita sa’e ba Na’i Nia uma lulik”.

Ami ain sama ona ó rain;

Ami hamriik iha ó nia odamatan, Jerusalém. Refrão

 

Jerusalém, harí met-metin,

Cidade kmook, kmook ua’in basu.

Povo sira sa’e ba neba,

Povo tomak Israel nian. Refrão

 

Tuir lisan Israel nian,

Atu haliban Na’i Nia naran;

Iha neba mak iha tribunal justiça nian,

Tribunal uma David nian. Refrão

 

Sei husu dame  ba Jerusalém!

Moris hakmatek ba sira be hadomi ó

Dame mak ukun iha ó nia fatuk-hada,

Ó kadunan laran hakmatek haksolok! Refrão

 

Tan hadomi ha’u maun no alin sira,

Ha’u sei dehan: “Dame hela ho ó!”

Tan hadomi ita Na’i Maromak Nia Uma,

Ha’u sei husu kmanek tomak ba ó. Refrão

 

Aclamação                                                                                                                                                                                           Sal. 79. 4

Refrão : Aleluia, Aleluia!! Repete-se

Na’i, ami Maromak, hi’it-An mai soi ami;

hatudu Ita futar oin mai ami, ami hetan salvação. Refrão

 

Evangelho                                                                                                                                                                                          Mt. 8. 5-11

Na’i Jesus Cristo nia Evangelho nu’udar São Mateus haktuir:

Iha tempo neba, Jesus tama iha Cafarnaúm, comandante centurião ida hakbesik ba Nia hodi harohan nune’e: “Na’i, ha’u nia atan moras iha uma, ain no liman tós, terus teb-tebes”. Jesus lia tun ba nia: “Ha’u sei ba halo nia di’ak fali”. Maibe centurião hatan ba Nia: “Na’i, ha’u la so’i Itaboot hi’it-An mai ha’u uma laran; Ita liafuan ida de’it to’o ona atu ha’u nia atan hetan fali isin di’ak. Tan ha’u mós iha ema haruka; iha soldado halo tuir ha’u nia ordem. Ha’u dehan ba ida ‘ó ba’, nia ba; ba ida seluk ‘ó mai’, nia mai; no mós ba ha’u nia atan: ‘halo buat ne’e’, nia halo”. Rona tiha nia, Jesus hakfodak hodi hateten ba sira nebe la’o hamutuk ho Nia: “Tebes duni, Ha’u dehan ba imi, Ha’u seida’uk hetan iha Israel nia ema sira, fiar ida boot hanesan ne’e. Ne’e duni, Ha’u dehan ba imi, housi loro-sa’e to’o loro-monu, ema barak sei mai tur iha mesa hamutuk ho Abraão, Isaac no Jacob iha reino Lalehan”.

Lia Maksoyn.

VIGILÂNCIA

Reflexão & Leituras Domingo ADVENTO 1, Ano B, 2020

 

Facebooker ida iha início fulan Novembro ne’e, halo quote cómico dehan nune’e: “Hei…! agora foin Novembro, imi ne’e seidauk tama Dezembro (Natal), imi toca ona música Natal. Imi ne’e la jaga liu Novembro nia perasaan (sentimento)”. Quota ne’e hanesan piadas ida ba ita Católico nebé influenciado housi ema comerciante sira basá, foin mak Novembro klaran de’it, música natal toka lem-lemo iha loja sira, presépio Natal (christmass Tree/pohon Natal) hahu monta iha cidade nia canto sira.

Anónimo ida dehan: “Melihatlah ke atas untuk urusan akhiratmu dan melihatlah ke bawah untuk urusan duniamu maka hidup akan tenteram

Nu’udar sarani, ita precisa coloca tempo bai-bain ho tempo Advento-Natal tuir nia fatin ou círculo litúrgico atu valor Natal ne’e fo ksolok ba ita. Se lae, foin mak atu Advento de’it, ema hot-hotu rame-rame celebra ona Natal.

Igreja católica tinan- tinan fo tempo semana 4 tu-tuir malu ba sarani sira hodi halo preparação molok simu Jesus Maksoin  iha tempo Natal.

Durante tempo Advento hirak ne’e, nudar tempo oportuno atu sarani ida-idak prepara moris tuir dalan sarani nian.

Normalmente, durante tinan ida tomak, Igreja Católica hafahe ciclo litúrgico ba parte sira hanesan: Advento, Natal, Comum (bai-bain), Qauresma, Páscoa, fila ba Advento tuir rotação ano litúrgico A, B, C.

Nune’e, Tempo Advento nudar oportunidade di’ak atu sarani sira prepara moris tuir dalan los hodi hasoru kbiit demónio, kbiit nakukun, ema bosok ten sira, hadau malu poder sira, probelemas quinto-canto, iha ne’e inclui seita sira hanesan jeova ho adventista sabatikal ho tan denominação bar-barak nebé oras ne’e lao housi uma ba uma no halo promoção iha facebook. Tanba ne’e mak São Marcos Evangelista hatete:“Ne’e duni, imi Matan moris neon nain ba, basá, imi la hatene wainhira Nai  too mai” (Mc 13, 35).

História murak ida hakerek iha jornal diário STL edição quarta feira loron 22 fulan  setembro tinan 2010 hanesan tuir mai: Infermeira ida naran BETTY  residência iha Boston América.  Nia forma família durante tinan 30 ona, tek-tekil iha loron 3 fulan Maio tinan 2010, nia foin hakfodak katak ninia kadeli casamento nebé halo housi osan mean no hafutar tan ho diamante (berlian) monu lakon no pior liutan,  nia mos la hatene katak kadeli ne’e lakon  iha serviço fatin ka iha uma. Nia hakas-an hodi buka tiha ona ba mai iha fatin serviço, iha uma no iha fatin balu nebé nia deskonfia katak kadeli casamento ne’e lakon iha nebá maibé,  infelizmente la consegue hetan.

Iha hospItal, fatin nebé infermeira BETTY  serviço ba, nia fo hatene ba ninia kolega infermeiro sira seluk atu ajuda buka netik kadeli nebé lakon ne’e maibé la iha ema ida interece hodi ajuda nia buka hetan fila fali kadeli casamento ne’e. Nuudar ema neon nain, infermeira ne’e la desesperado no fiar-an hodi buka nafatin nia kadeli ne’e, basá nia fiar katak loron ida nia sei hetan fila fali duni kadeli ne’e, maske la hatene bainhira. Iha loron ida, ninia maluk ida naran Bonie Filicicha hakbesik-an ba nia hodi fo hatene katak se BETTY hakarak hetan fali kadeli ne’e, di’ak liu  nia tur hakmatek, hanoin didi’ak momento ikus nia hatene cadeli sei iha nia liman harohan hodi sura ho Maromak nia  tulun no nia hetan fila fali ninia kadeli casamento nebé lakon.

Loos duni, infermeira BETTY ne’e reza badinas no harohan ba Maromak atu nia bele hetan fali kadeli casamento ne’e. Nune’e, liu tiha fulan tolu, teki-tekil iha dadersan ida, iha loron 28 fulan agosto tinan 2010, infermeira ne’e hetan fali kadeli casamento ne’e iha nia karreta laran wainhira nia atu ba serviço. Afinal ho oração, buat nebé impossível no hamate Ita nia vontade bele sai possível wainhira Maromak hakarak.

História ilustrda hanesan ne’e laos inventa maibé, ne’e realidade ida nebé além de acontece ba infermeira hanesan BETTY, bele mos acontece ba Ita lobuk ida iha Ita nia vida hanesan Cristão Católica. Lição murak nebé Ita bele aprende housi história badak ne’e mak; neon nain no confiança iha Maromak liu housi Ita nia oração loro-loron nian. Basá, Maromak fo confiança no Domin mai Ita hodi halao moris iha mundo ne’e. Oração nudar meio ida hodi facilIta ema nia comunicação gratuita ho Maromak. Comunicação entre ema ho ema liu housi telemóvel talvés tende precisa osan hodi carrega pulsa maibé comunicação entre ema ho Maromak liu housi oração ne’e gratis só precisa de’it mak Fiar no laran kmaan hodi comunica ho Maromak.

Ema balun dehan: Doa memberikan kekuatan pada orang yang lemah, membuat orang tidak percaya menjadi percaya dan memberikan keberanian pada orang yang ketakutan.Liu housi oração mak bele expressa Ita nia-an hanesan sarani nebé matan moris neon nain iha esperança hodi hein Nai Maksoin nebé sei mai iha loron ikus. Tan ba ne’e mak iha Evangelho são Marcos nian, Nai Jesus dehan: “Ne’e duni, imi Matan moris neon nain ba, basá, imi la hatene wainhira Nai  too mai” (Mc 13, 35).

Nu’udar craitura nebé fraco no limItado, Jesus nia lia murak ne’e hafanun Ita hodi matan moris neon nain, reza no se tilun ba Nai Maromak Nia futar lia fuan de’it mak Ita bele hetan tulun housi  Maromak ba knaar nebé nia fó hela mai Ita ida-idak no Ita mos bele alcança buat nebéIta mehi iha moris ne’e por exemplo hanesan acontece ba infermeira BETTY nebé neon nain no la desesperado hodi ikus mai consegue hetan fila fali ninia cadeli casamentu nebé lakon durante fulan tolu.

Ita hahu hakat tama ona ba Domingo uluk tempo Advento nian. Uma Creda Católica iha mundo rai klaran tama ona iha Ano Litúrgico foun ida, iha ciclo nebé celebra evento principal liu hot-hotu hodi  hanoin no halo preparação espiritual-físico ou preparação isin no klamar sarani nian ba Nai Jesus Cristo nia hiit-an mai ba dala rua iha loron ikus.

Tema importante iha tempo Advento mak vigilância ka matan moris neon nain. Evangelho nebé Ita rona iha Domingo semana ne’e, São Marcos Evangelista hakarak convida Ita atu matan moris neon nain. Hodi matan moris neon nain, reza no se tilun ba Nai Maromak Nia futar Lia Fuan de’it mak Ita bele hetan graça la nahas housi Nai Maromak ba knaar nebé NIA fó hela mai Ita ida-idak.

Laos halo vigilância de’it maibé, hodi hamulak ou halo oração, basá nudar sarani, Ita hetan obrigação hodi cumpri eh halo tuir Maromak nia hakarak tomak. Obrigação ida mak halo oração (reza) husu Maromak nia bensãobasá, Ita la hatene wainhira tempo ne’e sei too mai atu Nai maksoin sei hiit-an hikas mai iha mundo (Cf. Mc 13, 33)  ou ita nia fim do mundo mosu mai wainhira ita mate iha qualquer tempo. Vigilância ka matan moris neon nain iha Ita nia contexto fiar sarani nian, exige Ita nia fé, esperança, no caridade. Ne’e mak virtude fundamental Ita sarani Católica nian.

Iha tempo Advento ida ne’e,  precisa haforte Ita nia esperança eh hein. Ita nia realidade hatudu momos katak dala barak Ita baruk lalais enquanto Ita hein demais buat ruma nebé atu mosu mai maibé seidauk mosu hela de’it mai. Ema indoneásia sira baibain dehan: pekerjaan yang paling membosankan adalah MENUNGGU. Mentalidade ida ne’e mak iha tempu ohin loron sai hanesan veneno ba moris sarani nian.

Wainhira Ita lakon ona esperança ba Maromak maka Ita hahu hases-an neneik neneik housi dalan salvação nian. Ba ida ne’e,  Profeta isaias iha primeira leitura hakilar ba Maromak dehan” Nai tansa Ita housik ami lao dook housi Ita dalan, no la hamtauk Ita boot? Tan Ita atan no tanba povo Ita liman rohan, Ita hiit An fila hikas mai” (Is 63, 17).

Tama ona iha  tempo Advento, iha loja sira, kios sira, iha Timor Plaza, iha radio-Televisão sira, no iha uma sira  no iha fatin barak, ema hahu loke múzika natal nian. Revista no jornal sira mos apresenta imagen ka iklan oioin de’it relaciona ho Natal. Roupa obralan alias cuci gudang mos nabnaban de’it iha trotoar sira no loja oin sira. Ida ne’e fo tada mai Ita katak Natal besik dadun ona. Tinan-tinan enquanto tama ona iha Advento, Ita hatene katak tuir mai Ita sei celebra festa boot Natal Nai nia katak Nai Maksoin Jesus Cristo moris mai iha mundu hodi hola isin ida hanesan Ita ema.

Maibé, festa Natal nebéIta celebra tina-tinan, nudar evento ida nebéIta celebra fila fila hodi hanoin hikas Nai Maksoin Jesus Cristo nebé mai moris iha mundo iha tinan rihun rua resin liu ba. Maibé Ita mos keta haluha katak Ita nia esperança principal liu hotu iha tempo Advento mak hadia didi’ak Ita nia-an isin-kalamar tomak hodi hein Nai Jesus nebé atu hiit-an ba dala rua mai mundo hodi tesi lia ba ema di’ak no ema aat sira nomos ba ema moris no ema mate sira. Ida ne’e mak Ita nia esperança lolos nudar Cristão Católico atu nune’e Ita horik nafatin iha situação eh keadaan matan moris neon nain ou vigilância. Keta halo ba be wainhira loron ho tempo ne’e too de repente mai, Ita sibuk fali mak roupa foun, sapato foun, telemóvel foun mtor foun, kareta prado foun hodi haluha tiha Ita nia klamar.

Evangelho são Marcos nian iha Domingo semana ne’e, Ita rona ona Jesus Cristo nia lian nebé dehan:”Ne’e duni imi matan moris neon nain ba, basá, imi la hatene wainhira Nai too mai: lorokraik, kalan fahe rua, manu kokorek, dadersan nakukun. Nia teki-tekil mai keta hetan imi toba hela karik. Tan ne’e, matan moris neon nain ba”

Jesus tau atenção ba lia fuan hirak ne’e, basá Nia rasik housik hela mundo ne’e molok sae ba lalehan, no Nia  entrega hela  serviço ne’e ba Nia Apóstolo sira no mos ba Ita hotu nebé simu ona we baptismo nudar sarani Católico. Serviço no missão nebé Cristo housik hela  ba Apóstolo sira no Ita hotu mak atu continua haklaken Nai Maromak Nia Reino. Reino nebé sei haklaken ne’e laós serviço kamán maibé  serviço todan ida.

Tan ne’e, precisa sarani hotu nia esforço-an, sacrifício makás hodi halao knaar ida ne’e. Molok entrega missão ida ne’e, Jesus hanorin apóstolo sira, forma sira, no halo sira sai matenek no iha capacidade atu sira bele hasoru problema, dificuldade no conflito sira nebé sei mosu. Nudar São Paulo haktuir iha segunda leitura, iha carta ba sarani sira iha Corinto hateten(1Cor 1, 5-8) “Iha Nia, imi sei riku iha buat  hotu, ho lia fuan no matenek, wainhira fó sasin ba Cristo sai metin iha imi. Nune’e imi la kuran graça espiritual ida wainhira imi hein daudaun Ita Nai Jesus Cristo mosu mai. Nia sei halo imi laran metin too rohan no sala laek iha Nai Jesus Cristo Nia loron”.

Tebes,  Apóstulo sira riku duni, laós riku motor ho kareta nem riku osan iha banco maibé  riku espiritualmente iha Maromak nia graça no matenek tebes iha Maromak Nia lia fuan sira tamba Maromak haraik Espírito Santo nia kmanek oioin atu sira fó sasin kona bá Nia. São Paulo iha nia surat ba sarani sira iha Korinto(1Cor 12, 8-10), hateten teni “ba ema balu Maromak haraik Dom da ciência atu sai matenek, balu Dom da profecia atu haklaken, balu Dom da cura atu bele bali moras sira, tan ne’e mak sira fahe matenek ida ne’e mai Ita, atu Ita matan moris neon nain ba sasán mundo nian”. Maromak hanesan ema lao rai nebé housik hela nia uma hodi haraik kbiit ba atan sira, Ita sei halao ho oração no sei matan moris no neon nain nafatin, hodi hein too loron ikus wainhira Jesus fila híkas mai, ba dala rua nian.

Nai Jesus tau ona confiança tomak iha Nia escolante sira hodi fó ba sira esperança eh laran metin. Ne’e la significa katak Apótolo sira hein de’it hodi kous liman ka moris patarata no goza vida hodi hein Nai Nia hiit an mai, maibé, sira moris tuir no halao missão nebé Jesus entrega hela ba sira ne’e, ho nune’e sira mós iha obrigação  atu concretiza missão nebé Jesus confia hela ba sira iha vida concreta no iha situação difícil. Iha estado esperado ne’e mós, laós atu hein passivamente, maibé, hein activamente. Activo iha hahalok di’ak sira hotu nebé garante ba moris loron ikus nian. Valor sira ne’e mak valor humano, Amizade, justiça, caridade no moris tuir klalaok  Evangelho nian, hodi halo vigilância nafatin. Knaar nebé Maromak tau iha sarani idaidak nia kbaas exige Ita nia responsabilidade no participação hanesan porteiro ka ema nebé hein odamatan.

Ema nebé hein odamatan, iha serviço ida nebé nia tem que halo mak “vigilância ka berjaga-jaga”. Tuir São Marcos “porteiro” ne’e representa ema nebé iha responsabilidade máxima ba comunidade cristã hodi halao nia knaar sira ho di’ak no tau matan, ajuda malu no tahan netik sira dook housi babeur mundo nian. Ba Ita sarani sira, knaar porteiro nebéIta hetan mak; tau matan eh bali Ita nia isin no klamar nudar sasan lulik iha Maromak nia fuar oin. Nudar São Pedro iha nia carta dehan: “matan moris neon nain, tan imi nia funu balun, katak  diabo lao haleu hela imi hanesan Leão ida hodi buka atu han ema ruma” (1 Pe 5, 8). Nune’e,  knaar nu’udar porteiro tem que matan moris neon nain nafatin ba buat hotu.

Iha celebração liturgia advento nian, Igreja hakarak hamoris fali espírito hein ka semangat penantian. Lia fuan hein iha sentido popular mak Ita hanaran ESPERANÇA (ESPERAR) ba Maksoin (Messias); Nune’e, ho Advento, sarani hotu hola parte iha processo preparação molok Maksoin ne’e hiit-an mai. Preparação nebé merece liu mak; laos roupa foun maibé mos klamar nebé foun. Atu fase hamoos klamar laos uza be maibé uza Sacramento Confessa. Tanba ne’e mak Jesus rasik koalia iha Evangelho dehan; Matan moris Neon nain. Keta halo Ita mate de repente ou maksoin ne’e mosu derepente mai mak Ita hakfodak no Maromak sei dehan: terlambat sudah kau datang padaku hanesan Meriam Belina bai-bain hananu.

Saida mak Ita foti nudar lição murak eh hahan hodi habosu Ita nia klamar liu housi reflexão nebé Ita rona iha Domingo Advento semana ne’e?

1). Jesus dehan matan-moris no neon-nain, ba necessidade isin no liliu ba klamar nian; tanba maski espírito forte maibé isin fraco. Ita barak housik Ita nia isin fraco atu Domina fali Ita nia klamar. Nune’e Ita nudar sarani liliu jovem dala barak housi lerek tempo ba haksolok-an de’it ho borboleta-kalan, Ita balun soe tempo ba festa, hodi dansa kalan tomak too dader hodi hewai Ita nia obrigação nudar sarani, hanesan la ba missa, tuur iha Estrada ibun, joga biliard, SDSB, kur-kuru, bingo, bola guling no futu-manu.  

2) Maromak nia Futar Liafuan Domingo semana ne’e mos, convida Ita atu tau teni iha Ita fuan  lição rua:

Primeira, vigilância; São Marcos refere liu ba vigilância isin lolon nian hodi expressa eh hatudo liu ba vigilâcia espiritual. Mai Ita Cristão sira, precisa tau vigilância ba klamarl nian katak Ita bersiap siaga atu Ita la bele hakfodak ba Nai Nia hiit an mai nebéIta la espera. Se ne’e acontece duni Ita sarani sira labele dukur maibé hakbesik-an ba Cristo, tan Nia mak Ita mahon no Ita nia salvador. Mundo ohin loron hasoru força boot rua.  Força boot rua ne’e mak isin no klamar. Isin exige nia direito maibé klamar mós exige nia direito. Sira nia direito principal mak moris. Moris iha presente no iha futuro.  Moris presente mak realidade nebé Ita hasoru iha mundo ohin loron.  Moris ba futuro nian mak agora daudaun Ita hotu-hotu prepara hela atu hasoru. Tamba ne’e hanesan ema Cristão Ita sei halo vigilância lor-loron hodi hein Nai Nia loron atu mai.

Segunda: atu concretiza vigilância espiritual eh klamar nian, Evangelho ohin nian hatuur mai Ita condição rua: 1) Conversão no 2) Oração.

Primeiro caso: Nudar sarani Ita precisa tau iha Ita neon hodi halo conversão. Conversão katak Ita hare ba Ita nia hahalok aat no salan sira iha tempo passado nian hodi hadia fali Ita moris liuhousi sacramento confissão no hametin liutan Ita nia fiar nudar Católico  iha sacramento Eucaristia ou Missa nian. Ita dalabarak la halo vigilância espitual nian hanesan wainhira Ita e Ita nia maluk protestante sira, geova sira kaer Bíblia iha liman hodi tama-uma sai uma iha Ita nia bairro, maibé Ita foti fatuk no duni sira. 

Segundo caso mak halo oração: atu hadia Ita nia moris iha tempo presente nian, nudar sarani liuliu iha tempo Advento nian além halo vigilância ao mesmo tempo haboot tan Ita fiar liuhousi oração(hamulak nafatin-comunica ho Maromak); Maibé, saida mak acontece? Dala wain mak Ita haree no koko katak sarani barak ba participa iha missa, confessa, procissão maibé hafoin remata tiha cerimónia ne’e, fila mai uma, tolok malu, corrupção selingkuh, uza força hodi baku-malu, tuda malu, tolok no sadik malu.

Nudar tempo vigilância: tempo Advento hodi haksolok Nai nia Festa Natal nian, mai Itaida-idak hakiak dadaun espírito forte iha vigilância no haabut Ita nia fé, haburas Ita nia esperança no haboot liutan Ita nia caridade iha Cristo nia liafuannebé hateten; “Matan moris neon nain iha oração atu imi keta monu ba tentação”.

Ita nia riku soin fo ksolok mai Ita loron baluk de’it maibé, Maromak nia Lia fuan sei lori Ita moris rohan laek. Salmo Domingo Advento semana ne’e mos hakerek dehan: Nai, ami Maromak, halo ami fila, hatudu Ita futar oin mai ami, ami hetan maksoin. Ema anónimo ida hakerek liu tan nune’e; Melihatlah ke atas untuk urusan akhiratmu dan melihatlah ke bawah untuk urusan duniamu maka hidup akan tenteram. Assim Seja e Bem Haja. Amen.

Note: Reflexão ne’e publica ona iha Radio Timor Kmanek (RTK) iha tinan 2014.

I Domingo Advento (ANO B)

Primeira Leitura                       Is. 63, 16b-17; 64, 1. 3b-8 (63, 16b-17.19b; 64, 2b-7)

Lia housi livro profeta Isaías:

Na’i, Ita Bo’ot ami Aman: Hori uluk kedas Ita naran “ami Maksoyn!” Na’i, tan sá Ita husik ami la’o dook housi Ita dalan, la hamta’uk ItaBoot? Tan Ita atan no tamba povo Ita liman rohan Ita hiit-an fila mai. Tebes Ita lés karik lalehan, hiit-an tun mai karik, foho sai tetuk hotu  iha Ita boot futar oin. Ita boot tun tebes duni, foho sira sai tetuk duni iha Ita futar oin! Tilun ida seidauk rona, matan mos la dauk haré katak Maromak seluk ida halo nune’e, hodi tulun sira nebé laran metin ba Nia.  Ita ba hasoru sira nebé ho ksolok moris tuir Justiça;  iha Ita dalan, sira hanoin Ita. Ita hirus tamba ami maksalak;  maibé, ami sei hetan maksoyn! Ami houtu nu’udar buat foer, ami nia hahalok di’ak, sai tiha nu’udar hena fo’er. Ami hotu monu hanesan ai tahan, ami salan lori ami hanesan anin. La iha ema ida temi Ita naran eh hader atu simu tulun husi Ita. Ne’e, tamba Ita subar Ita futar oin mai ami, hodi husik la’o lerek tuir ami salan. Maibé, Na’i  ami Aman, ami hotu sai housi Ita futar liman.

Maromak Futar Lia.

 

Salmo Responsorial                                                                                                                             Sal. 79(80) 2ac. 3b, 15-16, 18-19

Refrão : Na’i, ami Maromak halo ami fila, hatudu Ita futar oin mai ami, ami hetan maksoyn!!! Repete-se

Israel bibi-atan, rona hela mai;

tur nabilan iha Querubin sira fohon!

Hatudu Ita kbiit, mai sadia ami. Refrão

 

Maromak buat tomak nian, hiit-an mai hias,

Housi lalehan aas ba, haré mai!

Haré Ita toos, tahan nia,

Basá, Ita futar liman mak kuda nia! Refrão

 

Lolo liman ba ema be Ita hili,

Ba sira nebé Ita tau Ita kbiit,

Ami sei la husik tan Ita.

Haraik moris mai ami, atu ami temi Ita naran. Refrão

 

Segunda Leitura                                                                                                                                                                           1 Cor. 1, 3-9

Lia housi São Paulo nia surat ba sarani sira iha Corinto:

Maun-alin sira: Ita Aman Maromak no Na’i Jesus Cristo haraik dame no graça ba imi. Ha’u fo agradese nafatin ha’u nia Maromak tan graça nebé Nia haraik ba imi iha Jesus Cristo. Imi simu kbiit iha Nia ba imi lia fuan no ba imi neon, tuir imi testamunha lolós Cristo nian. Nune’e imi la kuran naran ona graça ida, imi sira be hein Ita Na’in Jesus Cristo ninia hatudu. Nia mak sei hametin nafatin  imi nia fiar, sei halo imi  mos nafatin to’o Na’i  Jesus Cristo nia loron. Maromak nebé bolu imi  atu hamutuk ho Nia oan, Ita Na’in Jesus Cristo, sei halo tuir duni nia liafuan.

Maromak Futar Lia.

 

Aclamação                                                                                                                                                                                    Sal. 84-85, 8

Refrão : Aleluia, Aleluia!! Repete-se

Na’i, hatudu Ita domin mai ami,

Haraik Ita Maksoyn mai ami. Refrão

 

Evangelho                                                                                                                                                                                    Mc. 13, 33-37

Na’i Jesus Cristo nia Evangelho Nu’udar São Marcos haktuir:

Iha tempo neba, Jesus lia tun ba escolante sira:”Matan moris neon nain, basá, imi la hatene sa loron”. Hanesan ema ida nebé lao ba rai dook; molok husik nia uma, nia fahe knaar ba atan idaidak, fo mos kbii tomak ba sira, hafoin haruka hela atan odamatan nian tau matan ba sira. Nee duni, imi matan moris neon nain basá, imi la hatene wainhira Nai too mai: Lorokraik, kalan fahe rua, manu kokorek, dadersan nakukun. Nia tekitekil  mai keta hetan imi toba hela…………buat nebé Hau dehan ba imi, Hau dehan ba hothotu: matan moris neon nain!

Lia Maksoyn.

Sábado, XXXIV Semana Tempo Comum (ANO A)

Primeira Leitura                        Ap. 22. 1-7

Lia housi Livro Apocalipse:

Na’i nia Anjo hatudu mai ha’u, João, mota be moris nian, nabilan hanesan vidru, sai housi Maromak  no Bibi Oan nia kadunan liu housi dalan cidade nian, nia klaran. Iha mota ne’e nia sorin rua iha ai-hun moris nian nebé fó fuan dala sanulu resin rua iha tinan ida nia laran, fuan oin ida ba fulan ida-idak, no nia tahan aimoruk di’ak ba nação sira. La iha tan buat ida nebé  iha malisan. Maromak no Bibi Oan nia kadunan sei hela iha nia fatin iha cidade; nia atan sira sei hana’i Nia. Sira sei haré Nia oin ba oin, no Nia naran sei hakerek iha sira nia reentos. Kalan la iha ona no sira sei la precisa tan ahi oan eh loro nia naroman, basá Na’i mak Maromak sei leno sira. Sira sei  ukun ba nafatin.

Anjo dehan mai ha’u, “Liafuan sira ne’e lós tebes duni no sira sei mosu. Na’i Maromak, nebé haraik espírito ba profeta sira, haruka tiha nia anjo atu fó hatene ba Nia atan buat nebé sei mosu mai. La kleur ha’u sei mai lalais.”

Rahun dia’k ba sira nebé rai hela ho laran lia menon profeta nian iha livro ne’e.

Maromak Futar Lia.

 

Salmo Responsorial                                                                                                  Sal. 94(95). 1-7 (R. 1Cor. 16. 22b;  Ap. 22. 20)

Refrão : Marana tha! Mai, Na’i Jesus!!! Repete-se

Mai hotu haksolok iha Na’i,

Ita hahí Maromak, ita Maksoi;

Ita ba Nia futar oin, fó agradece,

Ita hahí Na’i ho lian knananuk nian. Refrão

 

Rai kle’an sira iha Nia liman,

No foho tutun sira Ninian;

Tasi Ninian, basá Nia mak hakiak,

Hari metin rai hodi Nia futar liman. Refrão

 

Mai hotu, takrabat ba rai,

Adora Na’i be halo ita moris,

Na’i mak ita Nia Maromak,

Ita, Ninia povo, bibi sira housi Ninia luhan. Refrão

 

Aclamação                                                                                                                                                                                           Lc. 21. 36

Refrão : Aleluia, Aleluia!! Repete-se

Imi matan moris hodi hamulak nafatin atu imi bele

hamriik ho laran metin iha  Mane    Maksoi Nia futar oin. Refrão

 

Evangelho                                                                                                                                                                                     Lc. 21. 34-36

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira hodi dehan: “Imi matan moris neon na’in ba, keta laran todan tan hahalok áat sira, tan lanu, tan fó neon resin ba moris ne’e atu loron ne’e keta to’o teki-tekir de’it hanesan hani; basá nia  sei monu hanesan hani ida ba ema hotu nebé tur iha raiklaran tomak. Ne’e duni, matan moris hodi hamulak nafatin ba, atu imi bele hetan biit hodi hadook an housi buat nebé sei mosu no bele hamriik metin iha Oan Mane nia oin.”

Lia Maksoyn.

Sexta-Feira, XXXIV Semana Tempo Comum (ANO A)

Primeira Leitura          Ap. 20. 1-4, 11-21. 2

Lia housi Livro Apocalipse:

Ha’u João, haré Anjo ida tun housi lalehan mai, káer iha liman chave nakukun boot nian no corenti boot ida. Nia  káer tiha Dragão, Samea boot uluk nian, nebé mak Diabo no Satanás, hodi kesi tiha ho corenti ba tinan rihun ida nia laran. Tuir mai, soe tam nia ba nakukun boot nia lran, nebé taka metin tiha hodi tau selou housi leten, Atu la bele bosok tan nação sira, to’o tinan rihun ida nia laran. Liu tiha ne’e, sei fó liberdade ba nia iha tempo uitoan nia laran. Nune’e, ha’u haré mós trono sira no sira ne’e nebé simu biit atu tesi lia. Ha’u haré mós klamar sira nebé  ema oho, sira isin, tan fó sasin kona ba Jesus no tan liafuan Maromak nian. Nune’e mós hanesan sira nebé la tuku tur  iha Balada fuik nia oin eh iha nia ilas nia oin. No mós sira nebé la simu sinal iha sira nia reen-tós eh iha sira nia liman. Sira moris hi’as fali, hamutuk ho Cristo ukun tinan rihun ida.

Hafoin, ha’u João, haré tan trono mutin boot ida, no Ida nebé tur hela iha trono. Housi Nia futar oin, rai no lalehan halai lakon, la haré  tan sira nia ain fatin. Ha’u haré mós mate sira, ema boot no kiik, hamriik hela iha trono nia oin; livro sira hahu loke, livro ida seluk loke tan, nebé livro moris nian. Mate sira sirmu justiça, tuir buat nebé hakerek iha livro, tuir sira ida-idak nia hahalok.

Tasi hasai mate sira nebé hela iha nia. Mate no mate nia hôrik fatin lori hikas fali mate sira mai. Sira ida-idak simu justiça tuir sira nia hahalok. Soe tama Mate no mate nia hôrik fatin hotu iha lago ahi nian. Lago ahi nian ne’e mak mate ba dala rua. Ema nebé nia naran la hakerek iha livro moris nian, soe tama hotu iha lago ahi nian.

Tuir mai, ha’u haré lalehan  foun ida no rai foun ida, basá, lalehan uluk nian no rai uluk nian lakon tiha ona, Tasi mós lakon tiha ona. Hafoin, ha’u haré cidade santa, katak Jerusalém foun, tun housi lalehan mai, Tun mai housi Maromak futar oin, furak no kmanek, nu’udar fetora ida hafutar-an hodi simu nia la’en.

Maromak Futar Lia.

 

Salmo Responsorial                                                                                                            Sal. 83(84). 3, 4, 5-6ª, 8ª (R. Ap. 21. 3b)

Refrão : Iha ne’e, Maromak hôrik ho emar sira!!! Repete-se

Ha’u klamar neon sal,

Hodi hanoin Na’i Nia kadunan;

Ha’u fuan no ha’u isin,

Haksolok iha Maromak moris. Refrão

 

Manu lakateu sira buka hela fatin,

Koá-lelok (andorinha) halo knu’uk ba oan sira;

Besik Ita altar, Na’i mundro raiklaran nian,

Ha’u nia Liurai no ha’u nia Maromak. Refrão

 

Ksolok ba sira nebé hôrik iha Ita uma,

No sira nebé hahí Ita loron kalan.

Ksolok ba sira nebé buka biit iha Itaboot,

Sira la’o ba oin hodi biit hetok boot. Refrão

 

Aclamação                                                                                                                                                                                           Lc. 21. 28

Refrão : Aleluia, Aleluia!! Repete-se

Hamriik ba hodi foti imi ulun basá,

imi nia libertação besik ona. Refrão

 

Evangelho                                                                                                                                                                                     Lc. 21. 29-33

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus haktuir aiknanoik ida ne’e ba escolante sira: “Imi haré didi’ak ai figueira no ai sira seluk hotu. Wainhira sira hahu hatubun tahn nurak, imi hatene katak bailoron besik ona. Nune’e mós imi, wainhira imi haré buat hirak ne’e mosu, imi sei hatene katak Maromak nia reino besik ona. Tebes Ha’u dehan ba imi: otas ne’e sei la liu to’o buat ne’e hotu mosu. Lalehan no rai sei liu, maibé Ha’u nia liafuan sira sei la liu.”

Lia Maksoyn.

Quinta-Feira, XXXIV Semana Tempo Comum (ANO A)

Primeira Leitura       Ap. 18. 1-2, 21-23; 19. 1-3, 9ª

Lia housi Livro Apocalipse:

Ha’u João, haré anjo ida tan tun mai housi lalehan; nia simu tiha biit ua’in; nia glória leno raiklaran tomak. Nia hakilar ho lia maka’as, “Babilónia lakon ona; nia sai tiha diabo sira nia uma, espírito áat sira hotu nia fatin no manu fo’er no áat sira nia knuuk.”

Tuir mai, anjo biit na’in ida foti fatuk boot ida hanesan fatuk dular batar nian, soe nia ba tasi laran hodi dehan “Nune’e mak sei soe cidade boot Babilónia nian; ema sei la haré tan nia, ‘ema sei la rona tan iha o nia laran knananuk harpa no ema nian, no mó musica housi flauta no trombeta; ema sei la hetan tan badaen oi-oin sira; ema sei la rona tan tarutu dulas batar nian; ahi oan sei la lakan tan; ema sei la rona tan noivo no noiva sira nia lia iha ó; basá ó nia  contrato na’in sira mak ukun raiklaran tomak; no ó nia hahalok sira lohi nação sira hotu.’

Ne’e hotu tiha, ha’u rona lia ida hanesan housi ema lubun boot iha lalehan; sira hananu maka’as, “Aleluia, maksoin, glória no ukun ba ita nia Maromak! Nia lós no di’ak wainhira Nia tesi lia; Nia tesi lia hasouru feto áat boot nebé halo áat raiklaran ho nia sala fo’er; Nia halo oan vingansa kona ba atan sira nebé feto áat ne’e oho tiha.” Sira hananu maka’as dala ida tan, “Aleluia! Ahi suar housi feto ne’e sei sa’e nafatin ba nafatin.”

Anjo dehan, “Hakerek ida ne’e: Rahun di’ak ba sira nebé simu convite ba Bibi Oan nia festa casamento nian,” no nia dehan tan, “Sira ne’e mak lia menon lós housi Maromak.”

Maromak Futar Lia.

 

Salmo Responsorial                                                                                                                  Sal. 99(100). 2, 3, 4, 5 (R. Ap. 19. 9ª)

Refrão : Ksolok ba sira nebé simu convite ba festa casamento Bibi Oan nian!!! Repete-se

Rai tomak hahí Na’i!

Serbi Na’i ho ksolok!

Mai iha futar oin ho knananuk ksolok nian. Refrão

 

Hatene ba katak Na’i mak Maromak!

Nia mak halo ita, ita Na’i nian.

Ita hotu Nia povo, bibi sira iha Nia bibi luhan. Refrão

 

Imi tama ba housi odamatan hodi agradece,

Tama iha nia uma klabis hodi hananu knananuk hahí nian,

Haliban Nia no hauélok Nia naran. Refrão

 

Na’i di’ak tebes duni,

Nia domin ho laran sadi’a rohan laek,

Nia káer metin Ni alia menon housi otas ba otas. Refrão

 

Aclamação                                                                                                                                                                                           Lc. 21. 28

Refrão : Aleluia, Aleluia!! Repete-se

Hamriik ba hodi foti imi ulun basá,

imi nia libertação besik ona. Refrão

 

Evangelho                                                                                                                                                                                    Lc.  21. 20-28

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira, hodi dehan: “Wainhira imi haré soldado sira hale’u Jerusalém, imi sei hatene lolós katak nia besik ona atu mohu. Iha loron nebá sira nebé iha Judeia, halai ba foho sira; sira nebé iha cidade laran, sai tiha ba liur; sira nebé iha to’os, keta tama fali iha cidade. Basá ne’e mak loron castigo nian atu sai tuir lolós buat nebé hakerek ona. Susar ba feto sira nebé kô’us eh fó susu iha loron nebá, basá todan boot sei mosu iha rai no laran nakali sei mosu hasouru povo ne’e. Sira sei monu iha surik kroat nia okos, ema sei lori sira nu’udar ema dadur ba rai hotu, no gentio sira sei sama rahun Jerusalém to’o gentio sira nia otas sei hotu ona.”

“Sinal sira sei mosu iha loron, iha fulan no fitun sira. Iha raiklaran, nação sira sei laran susar no ta’uk teb-tebes tanba tarutu housi laloran no tasi nian. Ema sira sei mate tanba de’it ta’uk, hodi hanoin sáida mak sei mosu iha raiklaran, basá lalehan nia biit sei nakdoko. Iha oras ne’e, ema sei haré Oan Mane mai iha kalohan ho biit no glória ua’in tebes. Wainhira buat hirak ne’e sei mosu, aten barani ba hodi foti aas imi nia ulun, basá imi nia maksoin besik ona.”

Lia Maksoyn.

Quarta-Feira, XXXIV Semana Tempo Comum (ANO A)

Primeira Leitura                        Ap. 15. 1-4

Lia housi Livro Apocalipse:

Ha’u, João, iha lalehan, ha’u haré sinal bo’ot no kmanek: anjo nain hitu lori susar bo’ot hitu nebé ikus liu, basá sira ne’e hato’o ona Maromak nia laran nakali hotu. Ha’u haré tasi ki’ik hanesan vidro nakonu ho ahi, no besik tasi vidro ne’e mak sira hotu nebé halo funu hasoru monstro hodi manan, no hasoru nia estátua no número nebé hatudu nia naran. Sira hotu kaer harpa housi Maromak; sira hananu knananuk ida Moisés, Maromak nia atan, nian no Bibi oan nian dehan: “Na’i Maromak kbi’it wain, Ita bo’ot nia hahalok sira bo’ot no furak. Liurai nação sira nian, Ita bo’ot nia dalan sira lós teb-tebes. Oh Na’i, se mak la ta’uk no fó glória ba Ita bo’ot Nia naran? Basá, Ita bo’ot mesak mak santo, no nação sira hotu sei mai hodi hana’i Ita bo’ot tan hahalok justiça nian nebé Ita bo’ot hatudu.”

Maromak Futar Lia.

 

Salmo Responsorial                                                                                                                  Sal. 97(98).  1-3ab, 7-9 (R. Ap. 15. 3b)

Refrão : Ita liman fatin, bo’ot no kmanek tebes, Na’i Maromak kbi’it na’in!!! Repete-se

Hananu ba Na’i knananuk foun ida, basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Na’i fó hatene Nia maksoin;

Nia hatudu justiça ba nação sira hotu.

Nia hanoin Nia domin no laran lós,

Ba Israel uman. Refrão  

 

Tasi halian no buat tomak iha tasi;

Mundo tomak no buat hotu be horik iha nia.

Mota sira basa liman ba,

No foho sira hotu hamutuk hananu ho ksolok. Refrão

 

Iha Na’i futar oin,

Be mai atu tesi lia ba mundo

Nia sei ukun ho justiça

No ukun povo hotu hanesan. Refrão

 

Aclamação                                                                                                                                                                                          Ap. 2. 10c

Refrão : Aleluia, Aleluia!! Repete-se

Laran metin ba to’o mate no

Ha’u sei fó ba ó coroa moris nian. Refrão

 

Evangelho                                                                                                                                                                                     Lc.  21. 12-19

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba Nia escolante sira hodi dehan: “Maibé uluk liu buat ne’e hotu, ema sei kaer imi, sei haterus imi, sei lori imi ba sinagoga no hatama imi iha dadur laran. Ema sei saran imi ba Liurai no ema bo’ot sira tan Ha’u nia naran; no imi sei fó sasin. Ne’e duni, hametin imi laran hodi lalika hanoin uluk atu hatan oinsa; basá Ha’u sei fó ba imi lia no matenek, nebé imi nia funu baluk sira hotu sei labele hatan tahan eh ko’alia hasoru. Imi nia aman inan, maun alin, parente no belun sira sei saran imi. Ema sei oho imi balun. Ema hotu sei ódio imi tan Ha’u nia naran. Maibé imi nia fuuk lahan ida mós sei la monu lakon. Ho paciência, imi sei soi imi nia klamar.”

Lia Maksoyn.

Terça-Feira, XXXIV Semana Tempo Comum (ANO A)

Primeira Leitura                  Ap. 14. 14-20

Lia housi Livro Apocalipse:

 Ha’u, João, haré kalohan mutin ida, no iha nia, ema ida tur hela; hanesa Oan Mane ho coroa osan mean nian iha nia ulun no tudik ko’a háre nian iha nia liman, anjo ida tan sai housi santuário, no hakilar ho lian maka’as ba ida nebé tur hela iha kalohan: “kaer ó nia tudik ba hodi ko’a háre:tempo atu ko’a to’o ona, no háre rai klaran nian tasak ona.” Ne’e duni, ida nebé tur iha kalohan leten hahu ko’a háre iha rai, no rai nia fulin ko’a hotu ona.

Anjo seluk tan sai housi templo iha lalehan; nia mós kaer tudik kroat ida. Anjo ida tan sai housi altar; nia mak ukun ahi. Nia hakilar ba ida nebé kaer tudik kroat: “kaer ó nia tudik ba hodi ku’u uvas hotu iha rai klaran; basá uvas tasak ona.” Nune’e, anjo hahu serviço iha rai no ku’u iha to’os uvas hotu rai ne’e nian hodi hatama nia iha fatin bo’ot atu sama uvas.

Maromak futar lia

 

Salmo Responsorial                                                                                                                           Sal. 95 (96). 10, 11-12, 13 (R.13b)

Refrão : Na’i mai tesi lia ba mundo!!! Repete-se

Haklaken ba povo hotu-hotu:

“Na’i mak Liurai.”

Nia harí mundo metin, sei la nakdoko,

Na’i ukun povo hotu ho justiça. Refrão

 

Lalehan haksolok ba, rai hananu ho ksolok ba,

Tasi no buat hotu iha tasi laran,

Rai luan no buat moris tomak iha nia, haksolok,

Haksolok ai sira iha ailaran. Refrão 

 

Iha Na’i be sei hi’it aan mai Nia futar oin,

Nia mai tesi lia ba rai,

Nia sei tesi lia ba mundo ho justiça,

No ba povo hotu ho felicidade. Refrão

 

Aclamação                                                                                                                                                                                          Ap. 2. 10c

Refrão : Aleluia, Aleluia!! Repete-se

Laran metin ba to’o mate no

Ha’u sei fó ba ó coroa moris nian. Refrão

 

Evangelho                                                                                                                                                                                         Lc. 21. 5-11

Na’i Jesus Cristo nia Evangelho nu’udar São Lucas haktuir:

Iha tempo nebá, tan ema balun ko’alia konaba templo hodi hateten katak ema hafutar nia ho fatuk mesa furak no buat karan sira, Jesus dehan: “Loron sei to’o wainhira buat nebé imi haré daudaun ne’e sei sobu hotu; fatuk ida sei la hela iha fatuk seluk nia leten.” Sira husu ba Nia: “Mestre, wainhira mak buat hirak ne’e mosu? Sira sei hahu ho sinal ida nebé?”

Jesus hatan: “Haré ba, atu ema keta lohi imi; basá ema barak sei mosu mai hodi Ha’u nia naran dehan “Mak Ha’u!” no “tempo besik ona!” keta tuir sira. Wainhira imi rona ema ko’alia konaba funu no revolução sira, keta ta’uk, basá buat hirak ne’e hotu sei mosu uluk, maibé rohan seidauk to’o  mai kedas.” Hafoin Nia dehan ba sira: “povo ida sei hamriik halo funu hasoru povo seluk, reino ida sei hasoru reino seluk. Rai sei nakdoko maka’as; iha fatin oi-oin ema sei hamlaha, moras peste sei mosu; buat nebé halo ema ta’uk sei mosu mai, ho sinal bo’ot iha lalehan.

Lia Maksoyn

Segunda-Feira, XXXIV Semana Tempo Comum (ANO A)

Primeira Leitura              Ap. 14. 1-3, 4b-5

Lia housi Livro Apocalipse:

Ha’u João, ha’u haré bibi oan hamriik iha foho Sião nia leten hamutuk ho ema rihun atus ida ha’at nulu resin ha’at; hakerek tiha iha sira hotu nia ren tos Bibi oan no nia Aman nia naran. Ha’u rona tarutu nebé mai housi lalehan hanesan tasi bo’ot nia tarutu ka rai tarutu ida; hanesan knananuk housi ema sira nebé toka harpa. Iha trono nia oin, sira hananu knananuk foun ida iha balada ha’at no katuas sira nia oin, knananuk ida nebé ema rihun atu ida ha’at nulu resin ha’at nebé hetan ona maksoin housi rai klaran de’it mak bele hatene. Sira la’o tuir Bibi Oan ba fatin hotu nebé Nia ba. Sira ne’e hetan maksoin iha ema sira le’et atu sai aifuan uluk ba Maromak no ba Bibi Oan. Sira la husik lia bosok ruma liu housi sira nia ibun basá la bele hetan sala iha sira.

Maromak Futar Lia

 

Salmo Responsorial                                                                                                                                       Sal. 23(24). 1-2, 3-4ab, 5-6

Refrão : Ema otas ne’e mak buka Na’i!!! Repete-se

Rai no buat hotu iha rai, Na’i Nian;

Mundo no buat tomak horik iha Nia.

Maromak hatur rai iha tasi leten,

Hametin rai iha laloran leten. Refrão

 

Sé mak bele sa’e ba Maromak Nia foho

Eh horis iha Nia kadunan santo?

Ema nebé laran mós, liman la sala,

Ema nebé la jura falso, la bosok. Refrão

 

Ema ne’e sei simu Na’i Nia bensa,

Nia sei hetan kolen housi Maromak, nia maksoin.

Ema otas ne’e mak buka Na’i,

Be buka Jacob nia Maromak Nia futar oin. Refrão

 

Aclamação                                                                                                                                                                                Mt. 24. 42ª, 44

Refrão : Aleluia, Aleluia!!! Repete-se

Imi matan moris ne’on na’in ba, basá iha oras nebé

imi ladun hanoin hetan mak Mane maksoin sei mai. Refrão

 

Evangelho                                                                                                                                                                                           Lc. 21. 1-4

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus foti tiha matan, Nia haré ema riku sira tau esmola iha osan fatin templo nian. Nia haré mós feto faluk ki’ak ida nebé tau nia esmola osan ki’ik rua. Nia dehan: “Tebes, Ha’u dehan ba imi katak feto faluk kiak ne’e tau osan folin liu sira seluk hotu, basá housi buat nebé resin, sira fó buat karan, maibé ema kiak ne’e saran buat hotu nebé nia iha atu moris.”

Lia Maksoyn.