shadow
Diocese de Dili > NOTÍCIAS > Articles by: Departamento Comunicação Diocese Dili

NATAL – MISSA KALAN FAHE RUA

Primeira Leitura               Is. 9, 2-7 ou 1- 6

Lia housi Livro Profeta Isalas:

loron hirak nebá, povo be la’o iha nakukun laran, hare naroman ida boot. Ba ema sira be tur iha nakukun laran, naroman boot ida mosu ba sira. Na’i, Ita mak halo nia di’ak sai wa’in, Ita mak halo nia ksolok sai boot. Ema sira ne’e laran ksolok iha Ita futar oin, nu’udar sira haksolok tebes wainhira sira fahe ba malu riku-soin funu nian. Basá, Ita halakon sira nia dadur, Ita silu tohar ema aat sira nia óe be hakanek povo nia kabás, hanesan iha loron Madian nian. Ema sei sunu hotu botas funu nian, ema sei sunu hotu hena sira be ran nakonu: buat hirak ne’e, sei sai áhi-étun. Basá, kosok-oan ida moris ona mai ami, Oan-Mane ida to’o ona mai ami. Oan ne’e mak kaer óe. Ema hanaran Nia “Lia-na’in boot! Maromak kbiit wa’in! Aman, tinan ba tinan! Dame na’in!” Nia ukun sei boot, Nia dame sei la lakon iha David nia trono, iha David nia reino. Nia mak ho haholok lós nian, sei halo David nia reino metin nafatin. Houri ohin ba oin nafatin, Maromak kbiit wa’in mak sei halo ida ne’e.

Maromak Futar Lia.

 
Salmo Responsorial                                                                                                                                                         Sal. 95, 1-3; 11-13

Refrão : Ohin moris ona ita Maksoyn, Jesus Cristo ita Na’in!!! Repete-se

Hananu ba Na’i knananuk foun ida:

rai-klaran tomak hananu ba Na’i!

Hananu ba Na’i, hahí nia futar naran! Refrão

 

Kalan-loron hawelok Ita Maksoyn!

Iha povo leet hananu nia kbiit:

Tatoli ba nacão tomak buat di’ak Nia halo. Refrão

Lalehan ho rai haksolok ba!

Tasi namuruk ho buat hotu iha laran!

Rai klês no ai-horis sei bok-an:

Ailaran tomak haksolok hananu! Refrão

Haksolok iha Na’i futar oin,

Nia mai tesi lia ba mundo.

Nia sei tesi lia lós ba ema,

tesi lia hanesan ba povo sira. Refrão

 
Segunda Leitura                                                                                                                                                                            Tit. 2. 11-14

Lia housi São Paulo nia surat ba Tito:

Oan doben sira: Maromak ma rahun-di’ak mosu mai ona, lori Maksoyn ba ema hotu-hotu. Maromak nia rahun-di’ak hanourin ita atu hatene hamta’uk, atu husik dalan áat, atu hatene moris tuir justiça no fiar, ohin loron, wainhira ita sei hein tempo kmanek ikus nian, no wainhira ita sei hein hela Jesus Cristo, ita nia Maksoyn, ita nia Maromak boot nia loron. Jesus Cristo saran-An ba mate tan ita, atu hasai ita housi buat áat hotu, atu halibur ba Nia, povo ida ninian rasik, povo ida badinas teb-tebes kona ba hahalok di’ak.

Maromak Futar Lia.

 

Aclamacão                                                                                                                                                                                        Lc. 2, 10-11

Refrão : Aleluia, Aleluis!! Repete-se

Ha’u haklaken ba imi ksolok boot tebes ida:

Ohin moris ona ita Maksoyn, ita Na’in Jesus Cristo. Refrão

 

EvangeIho                                                                                                                                                                                          Lc. 2, 1-14

Na‘i Jesus Cristo nia Evangelho nu’udar São Lucas haktuir:

iha tempo nebá, ordem mai housi César Augusto, atu arola ema hotu-hotu. Arolamento ida ne’e mak uluk Iiu, wainhira Quirino mak emboot iha rai Siria. Ema hotu-hotu, ida-idak ba fó naran iha nia cidade rasik. Tan José kona ba uma-kain David, nia mós husik cidade Nazaré iha Galileia atu sa’e ba Judeia, ba David nia cidade naran Belém, atu tau naran ho nia kaben Maria. Maria besik atu tur ona áhi. Wainhira sira sei iha Belém, Maria nia loron atu tur áhi to’o daudaun. Nia tur-áhi duni, nia Oan mane. Maria haneras no hatoba Nia iha balada han-fatin, basá, la iha fatin oan ida ba sira, iha uma laran. Iha fatin nebá, iha bibi-atan balun; sira toman ona kalan-kalan toba iha rai luan, atu hein bibi. Maromak nia Anjo mosu ba sira; Maromak nia roman nabilan iha sira leet; sira hakfodak teb-tebes. Anjo dehan ba sira: “Keta ta’uk, basá ha’u lori lia foun ida mai imi; Lia ne’e sei haksolok imi hotu-hotu. Ohin, iha David cidade, moris ona ba imi, Maksoyn ida; nia mak Messias, katak: “NA’I”. Sinal atu hatene hetan Nia, mak ne’e: Imi sei hetan Kosok oan ida ho neras toba iha balada han-fatin”. Teki-tekil, libur hamutuk ho Anjo ne’e, Anjo rihun ba rihun, hananu hodi hana’i Na’i Maromak, hateten: “Hawelok Maromak iha lalehan tutun! Hakmatek rai-klaran ba ema sira be Maromak hadomi!”.

Lia Maksoyn.

24 Desembro, Missa Natal Kalan Na’i nian

Primeira Leitura                        Is. 62. 1-5

Lia housi Livro Profeta Isaías:

Tan Sião, Ha’u ibun sei la taka. Tan Jerusalém, Ha’u sei la hakmatek to’o oras nebé, nia justiça ladauk nabilan hanesan rai-hun mutin, eh nia Maksoyn ladauk naroman hanesan áhi-knulu. Iha oras ne’e de’it, mak rai-rai sei haré ó nia justiça, eh liurai hot-hotu sei hare ó nia kbiit. Sira sei tau ba ó, naran foun ida, mai housi Maromak. Iha Na’i futar liman, ó belak mean nabilan; Iha Maromak futar liman, ó kaibauk liurai. Ema sei la bolu tan ó “Ema feto-sóe nian”, ema sei la bolu tan ó rain “Rai fuik-maran”. Maibé, ema sei hanaran ó “Ha’u doben”; Ema sei hanaran ó rain “Rai ho folin”. Basá, ó rain sei hetan Na’in ida. Nu’udar mane klosan hola fetorán, nune’e mós ó nia Na’in sei simu ó. Nu’udar feto kabe-na’in fo ksolok ba nia la’en, nune’e mós ó nia Maromak sei haksolok ho ó.

Maromak Futar Lia.

 

Salmo Responsorial                                                                                                                                          Sal. 88, 4-5; 16-17; 27-29

Refrão : Ha’u hananu ba nafatin Na’i nia laran luak!!! Repete-se

Hananu ba nafatin Na’i nia laran luak.

Housi bei ba bei-oan tatoli Na’i nia laran mós.

Nia hateten: “Rahun-di’ak ba nafatin,

Iha lalehan okos, ema sei laran metin” Refrão

 

Rahun di’ak ba Povu nebé hatene hahí Ita Boot;

Nia sei la’o iha Ita Boot futar oin.

Kalan-loron sei haksolok ho Ita Boot naran,

Nia hahí-an ho Ita Boot nia Justiça. Refrão

 

Nia sei temi Ha’u naran:

‘Ita Boot ha’u Aman, ha’u nia Maromak, ha’u nia Maksoyn!’

Ha’u sei tulun nia nafatin,

Ha’u nia aliança sei rohan laek! Refrão

 

Segunda Leitura                                                                                                                                                           Act. 13, 16-17; 22-25

Lia housi livro Apóstolo sira nia hahalok:

Iha loron hirak nebá, Paulo ba to’o Antioquia, Pisídia nian. loron ida nia tama Sinagoga, nia hamríik, foti liman, dehan: “Israel oan sira, imi sira hotu nebé hamta’uk Maromak rona mai: Maromak povo Israel nian, fihir ita nia bei-ala sira, tulun povo ne’e sai boot tebes, wainhira sira hôrik iha rai Egipto. Hafoin, Maromak ho kbiit wa’in, hasai tiha sira housi nebá. Ikus mai, Maromak foti David ba Liurai. Kona ba David, mak Maromak sasin lia ida ne’e: ‘Ha’u hetan ona David, Jessé nia oan; nia, mane ida nebé monu lós ba Ha’u laran; nia mak sei halo tuir Ha’u hakaran tomak.” Housi David nia bei-oan sira, mak Maromak hili ba Israel, Maksoyn ida, mak Jesus, nebé nia hakotu nanis lia atu haraik. Jesus seidauk mai, João Batista fó hatene sai ona ba Povo Israle tomak atu hakribi salan. Molok atu hotu nia knar, João hateten: “Ha’u laós Ida nebé imi hanoin. Maibé, sei to’o mai ema seluk ida, nebé, ha’u sei la soyn atu koré Nia sapato talin”.

Maromak Futar Lia.

 

Aclamação

Refrão : Aleluia, Aleluia!! Repete-se

Iha loron ida ne’e, salan sei lakon iha mundo rai-klaran:

Ita Maksoyn mak sei ukun. Refrão

 

Evangelho    (Forma Longa)                                                                                                                                                       Mt. 1, 1-25

Na’i Jesus Cristo nia Evangelho nu’udar São Mateus haktuir:

Na’i Jesus Cristo nia bei-ala sira: Jesus mai housi David, uma-kain Abraão nian. abraão hahoris Isaac, Isaac hahaoris Jacob; Jacob hahoris Judá ho nia alin sira; Judá ho Tamar hahoris Farés ho Zara; Fares hahoris Esrom, Esrom hahoris Arão; Arão hahoris Aminadab, Aminadab hahoris Naásson; Naásson hahoris Sálmon; Salmon ho Raab hahoris Booz, Booz ho Rute hahoris Jobed; Jodeb hahoris Jessé; Jessé hahoris Liurai David; David ho Urias nia fén hahoris Salomão; Salomão hahoris Roboão, Roboão hahoris Abias; Abias hahoris Asa, Asa hahoris Josefat; Josefat hahoris Jorão, Jorão hahoris Ozias, Ozias hahoris Joatão, Joatão hahoris Acas; Acas hahoris Ezequias, Ezequias hahoris Manassés; Manassés hahoris Amos, Amos hahoris Josias; Josias hahoris Jeconias ho nia alin sira iha tempo dadur iha Babilónia. Tempo dadur iha Babilónia liu tiha, Jeconias hahoris Salatiel, Salatiel hahoris Zorobabel; Zorobabel hahoris Abiud, Abiud hahoris Eliacim; Eliacim hahoris Azor, Azor hahoris Sadoc; Sadoc hahoris Aquim, Aquim hahoris Eliud; Eliud hahoris Eleazar, Eleazar hahoris Matã, Matã hahoris Jacob, Jacob hahoris José, Maria nia la’en. Maria ida nebé hahoris Jesus, ema bolu CRISTO. Nune’e housi Abraão to’o David, otas sanulu resin haat housi David to’o tempo dadur iha Babilónia, otas sanulu resin haat, housi tempo dadur iha Babilónia to’o Cristo, otas sanulu resin haat. Jesus Cristo moris nune’e: José husu nanis ona ba noiva, Maria Jesus nia inan. Maibé, molok sira moris hamutuk, Maria ko’us tiha ona hodi Espírito Santo nia kbiit. Maibé, José Maria nia noivo, tan nia ema Santo, lakohi hamoe Maria; tan ne’e, nia hanoin sóe nonok de’it Maria. Sei hanoin hela nune’e, José mehi katak Maromak nia Anjo ida mosu ba nia hodi dehan: “José, David nia oan, keta ta’uk simu ó nia noiva Maria, basá, nia ko’us hodi Espírito Santo nia kbiit. Maria sei hahoris Oan ida: Ó sei hanaran Nia JESUS. Basá, Nia mak sei kasu povu nia sala”. Ne’e hotu sai tuir liafuan nebé Maromak dehan housi Profeta: “Feto virgem ida sei ko’us, sei hahoris Oan ida; Oan ne’e ema sei hanaran EMANUEL, katak, Maromak hamutuk ho ita”. Tuir Na’i nia Anjo haruka, hader ho hader, José ba hola kedas nia noiva ba uma. Maski José ladauk hamutuk ho nia, Maria hahoris oan ida. José hanaran Oan ne’e, JESUS.

Lia Maksoyn.

 

Evangelho                                 (Forma Breve)                                                                                                                        Mt. 1, 18-25

Na’i Jesus Cristo nia Evangelho nu’udar São Mateus haktuir:

Na’i Jesus Cristo nia bei-ala sira: Jesus mai housi David, uma-kain Abraão nian. abraão hahoris Isaac, Isaac hahaoris Jacob; Jacob hahoris Judá ho nia alin sira; Judá ho Tamar hahoris Farés ho Zara; Fares hahoris Esrom, Esrom hahoris Arão; Arão hahoris Aminadab, Aminadab hahoris Naásson; Naásson hahoris Sálmon; Salmon ho Raab hahoris Booz, Booz ho Rute hahoris Jobed; Jodeb hahoris Jessé; Jessé hahoris Liurai David; David ho Urias nia fén hahoris Salomão; Salomão hahoris Roboão, Roboão hahoris Abias; Abias hahoris Asa, Asa hahoris Josefat; Josefat hahoris Jorão, Jorão hahoris Ozias, Ozias hahoris Joatão, Joatão hahoris Acas; Acas hahoris Ezequias, Ezequias hahoris Manassés; Manassés hahoris Amos, Amos hahoris Josias; Josias hahoris Jeconias ho nia alin sira iha tempo dadur iha Babilónia. Tempo dadur iha Babilónia liu tiha, Jeconias hahoris Salatiel, Salatiel hahoris Zorobabel; Zorobabel hahoris Abiud, Abiud hahoris Eliacim; Eliacim hahoris Azor, Azor hahoris Sadoc; Sadoc hahoris Aquim, Aquim hahoris Eliud; Eliud hahoris Eleazar, Eleazar hahoris Matã, Matã hahoris Jacob, Jacob hahoris José, Maria nia la’en. Maria ida nebé hahoris Jesus, ema bolu CRISTO. Nune’e housi Abraão to’o David, otas sanulu resin haat housi David to’o tempo dadur iha Babilónia, otas sanulu resin haat, housi tempo dadur iha Babilónia to’o Cristo, otas sanulu resin haat.

Lia Maksoyn.

Quarta – Feira, IV Semana Tempo Advento (ANO B)

Primeira Leitura               Mal. 3. 1-4, 23-24

Lia housi Profecia Malaquias nian:

Na’i Maromak lia tun nune’e: “Ha’u sei haruka Ha’u nia manuain, atu hadi’a dalan iha Ha’u oin. Teki-tekir sei tama iha Nia templo Na’i nebé ami hein ho laran manas, anjo moruk nian nebé imi hanoin tebes. Nia mak mai nebá, Na’i hot-hotu nian lia tun. Maibé sé lós bele tahan loron nebé Nia hi’it-An mai? Bele hamriik metin wainhira Nia mosu mai? Nia hanesan ahi ema tuku besi nian, hanesan mós lixivia ema fase hena sira nian. 

Nia sei tur atu halo nauen hodi hamos. Nia sei hamos Levi nia oan sira, sei tisi sira didiak lós hanesan ema tisi osa mean no mutin. Nune’e sira bele hasa’e ba Na’i Maromak buat-karan ida di’ak liu tebes duni. Hafoin, Judá no Jerusalem nia buat-karan sei haksolok Na’i, hanesan houri uluk, hanesan iha tinan uluk liu nian. Ha’u sei haruka ba imi profeta Elias, molok Na’i nia loron to’o, loron ne’e boot no maka’as liu. Nia sei halo aman no oan sira fó laran ba malu atu Ha’u la bele hakanek rain ho malisan”.

Maromak Futar Lia.

 

Salmo Responsorial                                                                                                 Sal. 24(25). 4bc-5ab, 8, 9, 10, 14 (R. Lc. 2l. 28)

Refrão : Foti imi ulun ba, imi maksoyn besik daudaun!!! Repete-se

Na’i, halo ha’u hatene Ita dalan,

hanourin Ita dalan mai ha’u.

Dada ha’u tuir Ita nia lialós,

basá Ita, ha’u nia Maromak no Maksoyn. Refrão

 

Na’i di’ak no lós.

Lori ema maksalak sira fila ba dalan,

hatudu dalan ba ema haraik-an sira iha justiça,

ba ema kiak sira, Nia leno sira ain fatin. Refrão

Na’i Nia dalan mak graça no laran metin,

ba sira nebé halo tuir Nia ukunfuan,

Na’i bolu ba besik liu Nia graça,

sira be hamta’uk Nia hodi fó hatene

Nia moruk ba sira. Refrão

 

Aclamaçao

Refrão : Aleluia, Aleluia!! Repete-se

Liurai povo hotu nian, fatuk inan Kreda nian, hi’it-An

mai soi ema be Ita halo housi rai rahun. Refrão

Evangelho                                                                                                                                                                                        Lc. 1. 57-66

Na’i Jesus Cristo nia Evangelho nu’udar São Lucas haktuir:

Iha tempo nebá, loron to’o ona atu Isabel tur-ahi oan mane ida. Nia maluk no parente sira hatene katak Na’i hatudu laran-luak boot tebes ba nia. Sira mós haksolok ho lia ne’e.

Liu tiha loron ualu, sira mai halo circuncisão ba kiikoan no hakarak hanaran nia ho nia aman nia naran Zacarias. Maibé nia inan hatan dehan: “La bele! Sei hanaran nia João”. Sira dehan ba nia: “Maibé la iha 0 nia parente ida ho naran ne’e”.

Sira housi Sinal husu ba nia aman oinsá lós nia hakarak hanaran kiikoan. Aman husu aikabelak ida hodi hatan ho hakerek; “Nia naran mak João”. Ema hotu hakfodak. Nia ibun nakloke kedas, nia nanal mós mamar, hahu ko’alia hawélok Maromak. Nia maluk sira hotu hamta’uk wa’in. Hafoin iha Judeia foho leten sira tomak, ema haktuir buat hirak ne’e hotu. Sira be rona ema haktuir buat hirak ne’e, rai didiak iha sira laran hodi hateten; “Kiikoan ne’e sei sai sé lós?”. Tebes duni, Na’i futar liman hamahan nia.

Lia Maksoyn.

Mensagem Natal 2020

Arcebispo da arquidiocese de Dili

Dom Virgílio do Carmo da Silva

 

              Uluk knanain iha kalan kmanek no kalan murak ida ne’e, atan ha’u hakarak hato’o ha’u nia ksolok Natal man ba sarani hot-houto, klik eh boot, katuas eh ferik, sira nebé iha cidade ga sira nebé iha foho, ba hirak nebé moras iha hospital ga iha uma, hirak nebé iha kadeia ga ema la tau matan no liu-liu hirak nebé dook housi família. Sira nebé iha Australia, Coreia do Sal, Inglatera, Irlanda no Timor oan hotu namkari iha mundo tanba estudo nune’e mos tanba serviço; Covid-19 la bele sai fali obstaculo atu celebra Natal maibé hanesan Amo Papa dehan situasaun global ne’e lori ita atu experiencia fali primeira Natal wainhira São José ho Na’in Feto buka fatin ba kosok oan atu moris mós la iha maibé hetan deit animal han fatin ida. Natal la’os hanoin kona ba saida mak ita precisa maibé se mak ita hakarak atu hasoru. La’os saidá mak Santa Claus lori maibé ida nebé latan iha animal han fatin. Ida ne’e mak Natal duni wainhira ita tau Cristo iha centro.

Ita celebra dadaun Natal Na’i Nian. Ema hotu celebra Natal. Natal La’os festa babain ida basá Festa ida ne’e ita celebra loron Jesus nia moris. Ita hanoin fali mistério boot ida Maromak nebé tanba domin halo-an sai ema. Ne’e duni wainhira koalia kona ba Natal dala barak liga ho família, fratenidade, alegria, paz no sel-seluk tan. Valor hirak ne’e hotu hetan de’it iha Naroman Cristo Nian. Ne’e duni maluk doben sira mai ita sai ba hasouru Natal, mai ita ba celebra Natal Na’i nian la bele husik ita nia-an moris hanesan buat ida la kona, la manas la malirin; oin sá ó bele celebra Natal se ó la hola parte iha celebrasaun missa Natal nian? Kosok Oan nebé latan iha balada fihir hela ó ho laran susar tanba Nia mai ba ó maibé ó fila kotuk ba Nia? Nia hakarak tama iha
ó nia fuan maibé o taka hela o nia fuan ba Nia. Ó nia laran hein hela Nia maibé o halo fingi la rona tanba colega, tanba tua, tanba cigaru, tanba face book, WA… ida nebé latan iha balada han fatin sadik hela o dehan: too wainhira tan o sei halo nune’e mai Ha’u?

Maske ó nia fuan toos ba Nia maibé Nia mai ba hirak nebé hein hela Nia…Maromak nia Oan mai iha ita le’et; mai iha rai-klaran ne’e no hatoba iha balada han fatin. Du’ut maran sal sumasu dahuluk ba Ida nebé sei hatudu An nu’udar <<paun moris nian, nebé tun mai housi lalehan>> (Jo 6, 51). Santo Agostiñu dehan: <<Toba tiha iha balada han fatin ida, Nia sai ita-nia ai-han>> (Sermaun 189,4). Tebes duni, iha Prezépiu tama mistério oi-oin Jesus nia moris nian, hodi halo sira besik ba ita-nia moris loron-loron.

Pontu interrogasaun mak ne’e: tan sá mak Maromak hakarak halo-an ba ‘Ema’? Primeiro, tan wainhira Na’i Maromak kria mundo no buat horn, Nia fó mandato ba criatura hotu dignidade ida nebé as teb-tebes. Maromak fó ba ita ema moris ida nakonu ho esperansa. Nune’e, Maromak la husik hela ita ema atu la’o mesak iha ita nia peregrinação iha mundo ne’e. Maromak partecipa iha ita ema nia historia liu housi misterio inkarnacão.

Segundo, mistério inkarnacão fó hanoin ba ita atu mós respeito moris (pro vida): feitus ida, bebé ida, ema ida nia moris ne’e hot-hotu iha direito no ninia dignidade nu’udar pessoa umana. Na’i Maromak halo- an ha ema atu fó corajen ba ita hodi luta kontra aborsi, no sira-sira seluk tan. Ida ne’e atu ita reflete kona ba relativismo moral ou etico nebé hahu domina iha sociedade ohin loron.

Ho celebracão Natal nian, ita hetan mós valor foun ba ita nia moris comunidade nian: Paz iha lalehan no mós iha rai klaran tomak. Anjo sira hananu: “Gloria in excelsis Deo…  Paz ba ema sira iha rai- klaran..” Jesus Cristo nia moris mai iha rai/mundo atu lori dame, unidade no sai maun alin ba ema hotu nia comunidade, uma kain, no mós ida-idak nia an no laran. Nune’e ita hotu, mai han no simu kbiit housi Jesus iha balada sira nia han fatin atu hodi fó kbiit ba sira seluk. Nia lori ona dame no domin ba ita, nune’e ita mós Maromak konvida atu fahe paz, unidade, fraternidade, justiça no domin ne’e ba ema seluk no criatura tomak. Sei laiha tan grupo oi-oin nebé deklara superior liu ida seluk hodi hamosu violensia no seluk-seluk tan; sei laiha tan ona odio, laran moras ba malu. Tan ita mesak maun-alin iha Cristo.

Jesus Cristo nebé ita selebra nia loron moris. Nia moris iha Animal nia luhan no hatoba iha balada sira ninia hahán fatin. São Paulo iha innu Filipi hakerek nune’e: “Maske nu’udar Maromak, Cristo Jesus la foti an nu’udar Maromak, maibé Nia hamolika an, haraik-na nu’udar atan no moris hamutuk ho ita” (Flp 2, 6-11). Tan Nia haraik-an transforma ema atu mós aprende hodi haraik-an nu’udar Liurai sira mai tukutur hanai no hahí ho sira nia an no poder tomak. Liurai sira hotu mai aprende oinsá atu servi tuir espíritu haraik-an nian, ukun no justiça, lialós, paz no domin.

Maluk doben sira, hader no hamrik ba hanesan bibi atan sira wainhira rona tiha novidade ne’e laos laran to’os maibé laran mamar atu ba buka kosok oan ne’e.

MAI ITA BA ADORA!

Quarta – Feira, IV Semana Tempo Advento (ANO B)

Primeira Leitura              Mal. 3. 1-4, 23-24

Lia housi Profecia Malaquias nian:

Na’i Maromak lia tun nune’e: “Ha’u sei haruka Ha’u nia manuain, atu hadi’a dalan iha Ha’u oin. Teki-tekir sei tama iha Nia templo Na’i nebé ami hein ho laran manas, anjo moruk nian nebé imi hanoin tebes. Nia mak mai nebá, Na’i hot-hotu nian lia tun. Maibé sé lós bele tahan loron nebé Nia hi’it-An mai? Bele hamriik metin wainhira Nia mosu mai? Nia hanesan ahi ema tuku besi nian, hanesan mós lixivia ema fase hena sira nian. 

Nia sei tur atu halo nauen hodi hamos. Nia sei hamos Levi nia oan sira, sei tisi sira didiak lós hanesan ema tisi osa mean no mutin. Nune’e sira bele hasa’e ba Na’i Maromak buat-karan ida di’ak liu tebes duni. Hafoin, Judá no Jerusalem nia buat-karan sei haksolok Na’i, hanesan houri uluk, hanesan iha tinan uluk liu nian. Ha’u sei haruka ba imi profeta Elias, molok Na’i nia loron to’o, loron ne’e boot no maka’as liu. Nia sei halo aman no oan sira fó laran ba malu atu Ha’u la bele hakanek rain ho malisan”.

Maromak Futar Lia.

 

Salmo Responsorial                                                                                                 Sal. 24(25). 4bc-5ab, 8, 9, 10, 14 (R. Lc. 2l. 28)

Refrão : Foti imi ulun ba, imi maksoyn besik daudaun!!! Repete-se

Na’i, halo ha’u hatene Ita dalan,

hanourin Ita dalan mai ha’u.

Dada ha’u tuir Ita nia lialós,

basá Ita, ha’u nia Maromak no Maksoyn. Refrão

 

Na’i di’ak no lós.

Lori ema maksalak sira fila ba dalan,

hatudu dalan ba ema haraik-an sira iha justiça,

ba ema kiak sira, Nia leno sira ain fatin. Refrão

Na’i Nia dalan mak graça no laran metin,

ba sira nebé halo tuir Nia ukunfuan,

Na’i bolu ba besik liu Nia graça,

sira be hamta’uk Nia hodi fó hatene

Nia moruk ba sira. Refrão

 

Aclamaçao

Refrão : Aleluia, Aleluia!! Repete-se

Liurai povo hotu nian, fatuk inan Kreda nian, hi’it-An

mai soi ema be Ita halo housi rai rahun. Refrão

Evangelho                                                                                                                                                                                        Lc. 1. 57-66

  Na’i Jesus Cristo nia Evangelho nu’udar São Lucas haktuir:

Iha tempo nebá, loron to’o ona atu Isabel tur-ahi oan mane ida. Nia maluk no parente sira hatene katak Na’i hatudu laran-luak boot tebes ba nia. Sira mós haksolok ho lia ne’e.

Liu tiha loron ualu, sira mai halo circuncisão ba kiikoan no hakarak hanaran nia ho nia aman nia naran Zacarias. Maibé nia inan hatan dehan: “La bele! Sei hanaran nia João”. Sira dehan ba nia: “Maibé la iha 0 nia parente ida ho naran ne’e”.

Sira housi Sinal husu ba nia aman oinsá lós nia hakarak hanaran kiikoan. Aman husu aikabelak ida hodi hatan ho hakerek; “Nia naran mak João”. Ema hotu hakfodak. Nia ibun nakloke kedas, nia nanal mós mamar, hahu ko’alia hawélok Maromak. Nia maluk sira hotu hamta’uk wa’in. Hafoin iha Judeia foho leten sira tomak, ema haktuir buat hirak ne’e hotu. Sira be rona ema haktuir buat hirak ne’e, rai didiak iha sira laran hodi hateten; “Kiikoan ne’e sei sai sé lós?”. Tebes duni, Na’i futar liman hamahan nia.

Lia Maksoyn.

Terça-Feira, IV Semana Tempo Advento (ANO B)

Primeira Leitura                       Cânt. 2. 8-14

Lia housi Livro Cântico dos Cânticos:

Ne’e mak ha’u doben  nia lian! Nia mai daudaun, haksoit iha foho boot sira, iha foho oan sira leten. Ha’u nia doben hanesan gazelaida, eh hanesan (rusa inan ida) corça nia oan ida. Nia iha fatuk hada kotuk nebá, haré hela housi janela, hamoit housi grade sira leet. Ha’u nia doben foti lian dehan mai ha’u: Hader ba, ha’u domin, ha’u nia aifunan furak mai ne’e, rai malirin liu ona, udan hotu ona, ba ona. Aifunan mosu iha rai fohon, tempo knananuk nian to’o ona, iha ita nia to’os laran sira lakateu lian. Ai figuera fó fuan foun, to’os uvas nian funan morin ba morin. Hader ba, ha’u domin; ha’u nia aifunan furak mai ne’e. Ha’u nia manu falur, subar-an iha fatuk kuak sira, iha railolon naruk, hatudu ó nia oin mai ha’u;  husik  ha’u rona ó lian, ó nia lian midar, ó nia oin furak”.

Maromak Futar Lia.

 

Salmo Responsorial.                                                                                                             Sal. 32(33). 2-3, 11-12, 20-21 (R. 1ª, 3ª)

Refrão : Ema lós sei haksolok iha Na’i; hananu ba Nia knananuk foun ida!!! Repete-se

Fó agradece ba Na’i,

Baku baba  dere teu atu hahí ita nia Maromak!

Hananu knananuk foun ida,

Haklalak ba Nia ho ksolok. Refrão

 

Na’i nia hanoin lós metin ba nafatin,

Housi otas ba otas, Nia laran hanoin.

Ksolok ba povo be fiar iha Na’I, ba nia Maromak,

Povo be Nia hili ba Nia lima-rohan. Refrão

 

Ita nia klamar hein Na’I Maromak,

Nia tahan ita, Nia sadi’a ita.

Na’i, ita nia ksolok hun,

Ita fiar tomak iha Na’i futar naran. Refrão

 

Aclamação                                                                                                    

Refrão : Aleluia, Aleluia!! Repete-se

Emanuel, ami nia Liurai no ukun na’in, esperança povo hotu nian,

Maksoi mundo nian, hi’it-An mai soi ami, Na’i, ami Maromak. Refrão

 

Evangelho                                                                                                                                                                                        Lc. 1. 39-45

Na’i Jesus Cristo nia Evangelho nu’udar São Lucas haktuir:

Iha loron hirak nebá, Maria hi’ita-an lalais tebes ba foho, ba cidade ida iha Judá. To’o tiha Zacarias uman, nia cumprimenta Isabel. Rona Maria cumprimenta, kosok-oan book-an iha knotak ho ksolok. Isabel neon nakloke tomak ba Espírito Santo, hauélok haksolok foti lian, dehan: “Ita rahun-di’ak liu feto hot-hotu! Ita oan kmanek liu! Be ha’u sé lós, atu ha’u Na’i nia inan hi’it-an mai ha’u uman? Basá, ita cumprimenta tiha ha’u, kosok-oan book-an kedas ho ksolok iha ha’u knotak. Rahun-di’ak ba feto nebé fiar katak lia hotu sei sai tuir nu’udar Na’i hateten!”

Lia Maksoyn.

Segunda-Feira, IV Semana Tempo Advento (ANO B)

Primeira Leitura                        Cânt. 2. 8-14

Lia housi Livro Cântico dos Cânticos:

Ne’e mak ha’u doben  nia lian! Nia mai daudaun, haksoit iha foho boot sira, iha foho oan sira leten. Ha’u nia doben hanesan gazelaida, eh hanesan (rusa inan ida) corça nia oan ida. Nia iha fatuk hada kotuk nebá, haré hela housi janela, hamoit housi grade sira leet. Ha’u nia doben foti lian dehan mai ha’u: Hader ba, ha’u domin, ha’u nia aifunan furak mai ne’e, rai malirin liu ona, udan hotu ona, ba ona. Aifunan mosu iha rai fohon, tempo knananuk nian to’o ona, iha ita nia to’os laran sira lakateu lian. Ai figuera fó fuan foun, to’os uvas nian funan morin ba morin. Hader ba, ha’u domin; ha’u nia aifunan furak mai ne’e. Ha’u nia manu falur, subar-an iha fatuk kuak sira, iha railolon naruk, hatudu ó nia oin mai ha’u;  husik  ha’u rona ó lian, ó nia lian midar, ó nia oin furak”.

Maromak Futar Lia.

 

Salmo Responsorial.                                                                                                             Sal. 32(33). 2-3, 11-12, 20-21 (R. 1ª, 3ª)

Refrão : Ema lós sei haksolok iha Na’i; hananu ba Nia knananuk foun ida!!! Repete-se

Fó agradece ba Na’i,

Baku baba  dere teu atu hahí ita nia Maromak!

Hananu knananuk foun ida,

Haklalak ba Nia ho ksolok. Refrão

 

Na’i nia hanoin lós metin ba nafatin,

Housi otas ba otas, Nia laran hanoin.

Ksolok ba povo be fiar iha Na’I, ba nia Maromak,

Povo be Nia hili ba Nia lima-rohan. Refrão

 

Ita nia klamar hein Na’I Maromak,

Nia tahan ita, Nia sadi’a ita.

Na’i, ita nia ksolok hun,

Ita fiar tomak iha Na’i futar naran. Refrão

 

Aclamação                                                                                                    

Refrão : Aleluia, Aleluia!! Repete-se

Emanuel, ami nia Liurai no ukun na’in, esperança povo hotu nian,

Maksoi mundo nian, hi’it-An mai soi ami, Na’i, ami Maromak. Refrão

 

Evangelho                                                                                                                                                                                        Lc. 1. 39-45

Na’i Jesus Cristo nia Evangelho nu’udar São Lucas haktuir:

Iha loron hirak nebá, Maria hi’ita-an lalais tebes ba foho, ba cidade ida iha Judá. To’o tiha Zacarias uman, nia cumprimenta Isabel. Rona Maria cumprimenta, kosok-oan book-an iha knotak ho ksolok. Isabel neon nakloke tomak ba Espírito Santo, hauélok haksolok foti lian, dehan: “Ita rahun-di’ak liu feto hot-hotu! Ita oan kmanek liu! Be ha’u sé lós, atu ha’u Na’i nia inan hi’it-an mai ha’u uman? Basá, ita cumprimenta tiha ha’u, kosok-oan book-an kedas ho ksolok iha ha’u knotak. Rahun-di’ak ba feto nebé fiar katak lia hotu sei sai tuir nu’udar Na’i hateten!”

Lia Maksoyn.

LOKE FUAN BA MAROMAK

Reflexão & Leituras Domingo Advento IV, Ano b, 2020

 

Ita nobun mak KREDA (Católica), KREDA (Católica) mak ita; união be libur mutuk tan Maromak Futar Lia. “..“halo buat nebé ó fuan husu ba ó basá, Nai Maromak ho ó”…basá, ba Maromak buat ida la susar” (Lc 1,38).

Senhor ida naran Harianto ema indonésio, haktuir nia esperiência fiar nian nune’e: Nu’udar Cristão Católico, nia mós serviço iha ofício estado nian ida no nia hetan successo boot iha nia serviço fatin ne’e. Liu tiha tinan balu nia laran, nia casamento ho nia fen-kaben naran Lestari. Senhora Lestari ne’e ema protestante ida nebé serviço iha loja boot ida. Sira na’in rua ikus mai decide atu simu sacramento Matrimónio tuir ritual Igreja Católica nian. Simu tiha sacramento matrimónio, sira hahu moris foun nu’udar ema kaben na’in.

 Iha sira nia uma kain mós economicamente buat ida la kuran. Sira ba serviço loro-loron hanesan bai-bain no sira mós la haluha cumpri sira nia fiar hanesan ema Católico. Senhora Lestari mos começa aprende no hatoman-an ho cerimónia ritual Igreja Católica nian basá, uluk nia ema protestante ida nebé la toman ho cerimónia Igreja Católica nian. Nune’e, sira la kuran buat ida iha sira nia família laran. Tanto materialmente tanto espiritualmente.

Liu tiha tinan tolu sira hahu enfrenta problema ida. Problema ne’e nia hun mak maske sira casamento ona maibé, too momento ne’e mos sira seidauk hetan oan. Sira na’in rua ikus mai decide atu ba konsulta iha hospital. Rezultado ikus hatudu katak senhora Lestari nia saúde la dun favorável atu sira bele hetan oan. Precisa tempo naruk no senhora Lestari tenke tuir terapia hodi bele iha possibilidade hetan fali oan. Dignosa doutor nian ne’e halo sira sente desespero ka putus asa tan sira kal la  hetan duni oan ona.

Hasoru problema hanesan ne’e, sira entrega buat hotu ba Maromak. Sira continua moris hanesan família Católica ida no sira hahu halo novena ba na’in feto, além de ne’e, sira mos ba vizita santuário na’in feto nian iha fatin balu hodi comunica sira nia laran taridu ne’e.

Tan Maromak rona sira nia harohan hodi hatan sira nia orasaun; liu tiha tinan haat depois de diagnosa ne’e, senhora Lestari isin rua no ikus mai kous duni oan feto ida. Família senhor Hariyanto nian sente katak sira nia fiar no mos sira nia orasaun durante ne’e la saugate ida. Maske diagnose katak sira sei la bele hetan oan maibé liu husi orasaun no esforço oioin, sira bele hetan duni oan feto ida. Ida ne’e hanesan milagre ida nebé ita ema la espera no ita mos la bele esplica ho ita nia razaun maibé, ba Maromak buat hotu bele.***

Semana ikus tempo Advento, Uma Creda Católica besik dau-daun ona ba celebração Natal Nai nian.  Maromak nia futar Lia Fuan Domingo semana ne’e convida ita nobun nu’udar Cristão Católico, atu tau fiar metin liu tan ba Maromak tanba, iha Maromak nia futar oin, buat ida la susar.

Evangelista São Lucas bolu hikas ita nobun atu saran-an tomak ba Maromak nia liman hodi colabora mos ho Maromak iha realização mistério salvação ba ema mundo tomak. Leitura sira  Domingo semana ne’e mos sei ajuda ita loke ita neon, ita fuan ba Nai Jesus Cristo nia lia fuan ksolok Evangelho nian.

Istória ilustrada hanesan ne’e laos buat bosok ida maibé , ne’e istória kiik ida husi realidade bara-barak nebé acontece iha hela iha ita nia leet. Experiência ne’e, além de acontece ba família senhor Hariyanto ho senhora Lestari, bele mos acontece ba ita lobuk ida iha ita nia vida hanesan Crsitão Católico.

Los duni, família balu too horas ne’e la hahoris oan maibé, barak mos liu husi sira nia oração no esforço, sira hetan oan. Lição murak nebé ita bele aprende hosi istoria badak ne’e mak; entrega ita nia susar no terus tomak ba Maromak basá, ba Maromak buat ida la susar wainhira ita tau ita nia confiança iha de’it Maromak. Naran katak ita mos halo netik esforço ruma konta ho Maromak nia tulun. Tanba ne’e mak iha evangelho São Lucas Domingo Advento dla 4 nian, ita sei rona Anjo nia lian be dehan; ba Maromak buat ida la susar.

Nu’udar Cristão Católico, Anjo Gabriel nia lia murak ne’e hafanun  ita hodi neon na’in, reza no se tilun ba Nai Maromak Nia lian de’it mak ita bele hetan tulun hosi  Maromak ba plano salvação Maromak nian.

Semana ne’e, ita tama ona ba Domingo ikus  tempo Advento nian. Creda Católica iha mundo rai klaran tama  dadaun ona tempo forte iha semana ikus atu celebra festa boot Natal Nai nian. Nu’udar Cristão Católico seguidor Jesus, Maromak bolu tenik ita atu loke neon no fuan ba Maromak nia Espérito Santo basá, Maromak hili ita sai sarani no hamahan nafatin ita ho nia Espírito Santo. Ba ida ne’e, São Efrém iha nia comentário ida, hateten;  “Nai Maromak hakarak hamahan atu nune’e ita metin nafatin iha matan moris. nune’e, ita ida-idak bele hanoin katak acontecimento hotu hafunan ba ita nia moris durante ita nia vida tomak”.

Loron ida-rua4 tuir mai iha semana ne’e, ita ba celebra ona solenidade Natal; Nai maksoin Jesus Cristo mai moris iha mundo hodi sente mos ita nia situação ema nian iha ita ida-idak nia fatin li-liu ita ida-idak nia fuan.

Roupa obralan Natal nian ema fan reb-rebo los iha Timor Plaza, loja colmera nia oin sira. Colmera, Timor Plaza, OB Ai-Mutin, Ponte Comoro 2, ema vizita loron tomak hodi boron roupa Natal nian. Iha lorokraik  rai nakaras, se Ita bibi ain ba mai oitoan iha Dili laran, ita matan halai tan de’it iha cidade nia sikun too leet sira, presépio modelo oioin de’it.

Jovem sira liliu mane no feto balun rame-rame hafutar sira nia presépio ho lampu Natal, ai funan, letra, duut, coluna bo-boot hodi toca música Natal ho música bajakan too kalan boot, imagem menino Jesus ho Nossa Senhor ho São José, inclui mos bibi atan ho Liurai na’in tolu. Ornamento hirak ne’e halo ita fuan hakmatek basá, ambiente festa Natal nian forte tebe-tebes iha Rai Timor. Iha foho, sarani barak mos prepara-an ho presépio modelo oioin.

Maibé, infelizmente hanesan iha Dili no iha município sira, ema barak liu mak nadodon ba halo compras roupa do que nadodon ba confessa, nadodon ba hakonu netik Kreda hodi halo mos preparação ruma ba klamar nian.

Nune’e, iha biban kmanek ne’e, mai ita hanoin fali ba kotuk, ita nia istória moris nian tinan hirak nia laran nebé liu ona. Saida mak ita halo ona no buat saida mak ita seidauk halo iha Maromak nia futar oin hodi hatudu provas katak hau ne’e ema sarani ida. Hau mos ema criatura nebé hatene taka liman hodi reza no loke fuan ba Maromak nia Espírito Santo.

Iha hakmatek laran, mai ita reflecte fali oinsá Maromak envolve-an iha ita nia moris li-liu iha ita nia istória hanesan ema sarani. Presépio ne’e símbolo ida. Maromak mai hela iha ita nia fuan laos mai hela iha presépio nebé halo para hatudu ita nia creatividade external (liur) de’it.

 

Wainhira ita hanoin kona ba Natal, baibain ita nia imaginação halai liu ba iha presépio sira,  missa solene, ema barak hatais hena mesak foun, sarani sira nadodon rame-rame ba missa, ema visita malu husi uma ida ba uma seluk, música Natal sira lian iha fatin hotu,……………no buat seluk tan. Ba lalaok hirak ne’e, ita la bele dehan ne’e la di’ak maibé, ita bele dehan katak ne’e seidauk too atu ita compreende sentido lolos Natal nian. Dala ida tan Jesus Cristo Maksoin laos mai hoorik iha nebá. Nia hakarak mai horik iha ema nia fuan nebé moos.

Reflexão nebé los liu mak; ho Natal ita hanoin no reflecte momento salvação nebé Maromak haraik mai ita iha Nai Jesus Cristo nia-an tomak. Liu husi Jesus Cristo nia Natal, Jesus Menino nia encarnação (hola isin hanesan ema), Maromak hakarak hanorin ita atu hatene taka liman nodi loke neon ba Maromak basá, ba Maromak buat ida la susar (Lc 1,38).

Iha leitura sira Domingo semana ne’e nian, Maromak nia lia fuan hatutan mai ita tomak atu ita colabora hamutuk ho Maromak nia Espírito Santo atu bele realiza salvação ba mundo ida ne’e. Nune’e, enquanto ita fiar metin ba Maromak então Espírito Santo sei hamahan ita no hametin ita fiar tan ita mos hetan confiança iha Maromak nia futar oin.

Iha Evangelho São Lucas, ita sei rona figura feto na’in rua nebé sei sai hanesan exemplo ba ita nia moris tomak. Figura ida uluk mak Na’in Feto virgem Maria nebé atu hakous Jesus Cristo. Tuir fali, figura ida seluk mak santa Izabel, João Baptista nia inan.  Virgem Maria hetan kbiit husi Espírito Santo hodi hakous Jesus Cristo maske nia saran-an tomak ba Maromak hodi la moris hamutuk ho ninia laen São José.

Tuir fali, Santa Izabel, maske ferik ona maibé, tan de’it nia fiar, Maromak hatan nia oração hodi haraik kbiit Espírito Santo ba nia hodi hakous João Baptista nebé sei sai Maromak nia manu-ain,  be bolu ema hotu hakribita salan. Lia fuan murak hirak ne’e tomak sai hanesan referência atu ita colabora nafatin ho Maromak nomos hodi justifica ka hatudu provas katak ba Maromak buat ida la susar.( Lc 1,38).

São Paulo iha nebé nia carta ba sarani sira  iha Roma hakerek hodi hateten: Maun alin sira: Maromak mak fo kbiit, atu ita nia fiar metin nafatin.(Cf Rm 16,25).

Iha Bíblia Antigo Testamento nian, li-liu iha livro siracide nian descreve momos  viSão negativa ida katak “liu husi feto ida (EVA) mak pecado tama iha mundo no tanba nia duni mak ita hotu tenke mate”(Sir 25,24).

Ita mos keta haluha katak liu fali husi feto ran ida be Maromak fihir nanis mak Maromak oan encarna-an hodi  hola isin hanesan ita ema ao mesmo tempo hatudu Maromak nia mistério boot, mistério salvação nian. Maromak nia vontade ne’e hakarak justifica fila fali katak Maromak la husik ema mout klean iha sala laran no Maromak mos hakarak renova fali dignidade EVA nian liu husi ita NA’IN FETO nia hatan ba Maromak nia plano salvação.

Acontecimento milagroso hirak ne’e dala ida tan hakarak comprova duni katak ba Maromak buat ida la susar. Basta ita fiar de’it hodi colabora ho Maroamk nia plano tomak maka ita mos sei hola parte iha Reino Lalehan wainhira ita husik mundo ida ne’e.

Na’in feto nia vida exemplar hanorin mos ita atu keta tauk hodi rona Maromak lian. Nu’udar Anjo São Gabriel hateten ba Maria iha Evangelho katak; “keta tauk’.  Wainhira ita halakon ita nia tauk hodi colabora ho Maromak então, automaticamente ita mos sei saran-an tomak ba Maromak nia providência ka Maromak nia plano tomak ba mundo nia salvação. Exemplo concreto nu’udar virgem Maria hateten rasik ba Anjo São Gabriel dehan; “ne’e sa Nai..!  atan oan mak ne’e, halo tuir de’it ita hakarak ba”, ba Maromak buat ida la susar.

Acontecimentos milagroso sira nu’udar haktuir iha Antigo Testamento nomos Novo Testamento prepara hela ita nobun ba impossibilidade sira seluk nebé sei acontece. Natal nebé ita celebra hamutuk tinan ne’e, la seluk mos ho Natal nebé ita celebra ona iha tinan hirak liu ba kotuk.

Natal hanesan mos ita sei celebra iha tinan hirak oin mai. Se nune’e, Natal ne’e acontecimento bai-bain ida basá, husi ita nia parte ita seidauk fo valor ba Natal ne’e nia sentido rasik. Ita toman liu halo presépio hodi hafutar murak oi-oin maibé ita nia presépio fuan nia nian seidauk halo tuir Maromak nia hakarak hanesan Nian feto nia lian hatan Anjo.

Figura Bíblica sira tuir mai, sai hanesan exemplo kona lia fuan BA MAROMAK BUAT IDA LA SUSAR; Sara, Abrão nia fen-kaben ho kbiit Maromak nia Espírito Santo nian bele kous nia oan sira iha idade nebé ferik ona.

Manoah nebé taka liman harohan ba Maormak loron-kalan too ferik tiha ona mak Maromak foin hatan nia oração hodi haraik oan mane ida naran Samson (Cf Juizes 13, 2-3). Samson ne’e tuir mai sai defensor ba ema Israel sira nebé ema filisteu sira halo terus. Nune’e, ba Maromak buat ida la susar.

Santa Izabel São João Baptista nia inan iha Novo Testamento mos hakous João Baptista iha idade nebé ferik ona. Dala ida tan; ba Maromak buat ida la susar. Evento milagroso hirak ne’e tomak esclarece mos katak ita nia vida ida ne’e la lao nune’e de’it maibé Espirito Santo mak fo kbiit.

Lição kmanek nebé sai hanesan bukae ba ita nia preparação espiritual iha Domingo ikus Advento nian ne’e mak:

  • Ita hadia dadaun presépio iha ita ida-idak nia uma maibé ita mos precisa hadia ita nia presépio iha ita nia fuan (klamar).
  • Presépio sira sai hanesan sinal exterior/ sinal liur maibé presépio ne’e sei sa kmanek wainhira ita hafutar ita nia klamar liu husi sacramento confessa no halo morin ita klamar liu husi missa santa. Ba ida ne’e profeta Natã iha primeria leitura hateten ba liurai David dehan;”halo buat nebé o fuan husu ba o, basá Nai Maromak hamutuk ho o”.
  • Nu’udar sarani nebé kaer metin iha virtude Uma Kreda nian iha Fé, Esperança no Caridade. Lalaok NA’IN FETO nian nebé saran-an, tau confiança tomak iha Maromak no hatan ba Maromak nia convite hodi hateten lian ne’e; ne’e sa Nai atan oan mak ne’e, halo tuir de’it ita hakarak”. Basá, ba Maromak buat ida la susar. Ho lia fuan seluk dehan BAGI TUHAN SEGALANYA MUNGKIN.
  • Ikus liu, mai ita enfeita ita nia presépio klamar nian laos ho tua sabu, laos ho lia fuan tolok, baruk ten, odio malu, no kan ten ba poder maibé, mai ita hafutar ita klamar ho de’it Maromak nia Espírito Santo. Iha Maromak nia futar oin buat ida la susar. Nu’udar Cristão Católico, ita tau fiar iha de’it Jesus Cristo.

 

Loke laran ba Maromak iha tempo Advento ida ne’e hanesan música missa nebé bai-bain ita hananu dehan: MAI MAI NAI JESUS! LALAIS HIIT-AN MAI, RAI NE’E MATE MALIRIN, AMI KLAMAR LAKON NIA MANAS. Pergunta ida tan mk ne’e; se Jesus hiit-An lalais tiha mai, ita prepara ona ka lae. Keta halo ita seidauk prepara karik? Keta halo ita prepara presépio, sapato foun kalsa foun oioin maibé keta klamar seidauk foun karik? Ba ida ne’e, salmo hahísik aten brani mai ita nobun ho lia fuan murak ne’e: ”Nai, ami Maromak, halo ami fila, hatudu ita futar oin mai ami, ami hetan maksoyn”. Assim Seja e Bem Haja (ignasoliveira2020)

 

Note:

Reflexão ne’e publica ona iha Programa HAFUNAN FIAR

Radio Timor Kmanek (RTK) iha Dezembro 2014.

IV Domingo Advento (ANO B)

Primeira Leitura    2Sam, 7, 1-5, 8b-11, 16

Lia housi Livro Profeta Samuel:

David horik iha nia uma, Na’i haraik tulun, nia moris hakmatek iha funu-baluk sira hotu nia leet. Liurai dehan ba profeta Natã: “Ó haré, ha’u hela iha uma ida, halo ho ai-Cedro maibé, Maromak nia ai-balun (Arca) horik iha taka baluk ida nia okos”. Natã hatan ba liurai: “halo buat nebé ó fuan husu ba ó basá, Na’i hamutuk ho ó”. Maibé, iha kalan ne’e duni, Na’i lia tun a Natã dehan: “Ó ba dehan ba Ha’u atan David; Na’i koalia nune’e: ó mak sei halo kadunan ida mai Ha’u, atu Ha’u horik ba?…Ha’u hasai ó housi rai balada han fatin, housi balada atan, atu ó sai Ha’u povo Israel nia ulun. Ha’u hamutuk nafatin ho ó, iha fatin hotu nebé ó lao, hodi halakon housi ó oin, ó nia funu baluk sira hotu. Ha’u sei halo o naran sai naran boot ida hanesan rai nia boot sira naran. Ha’u sei fihir fatin ida, atu Ha’u nia povo horik ba. Nia sei la hetan tan susar, ema aat sira sei la hanehan tan nia hanesan uluk, wainhira Ha’u tau juiz sira iha Ha’u nia povo Israel nia oin; Ha’u sei halo ó moris hakmatek iha o funu baluk sira hotu oin; Na’i dehan katak, Nia sei halo uma ida ba ó. Ó uman no ó ukun, iha nafatin Ha’u oin, Ó nia trono metin nafatin tinan ba tinan”.

Na’i nia Futar Lia.

 

Salmo Responsorial                                                                                                                                      Sal 88 (89) 2-3, 4-5, 27, 29

Refrão : Na’i, ha’u sei hananu Ita laran luak tinan ba tinan!!! Repete-se

Ha’u sei hananu tinan ba tinan Na’i laran luak,

Oan ba bei-an, Ha’u sei haklaken Nia diak.

Nia dehan: “Graça harí tinan ba tinan,

Laran mos metin iha lalehan. Refrão

 

Ha’u halo moruk ida ho Ha’u povo,

Ha’u jura ba David Ha’u atan.

O nia geração sei nafatin,

O trono nafatin tinan ba tinan. Refrão

 

Nia sei hasae lia mai Ha’u,

“Ita ha’u Aman, ha’u Maromak, ha’u Maksoin

Ha’u sei tulun nafatin nia,

Ami rua nia moruk rohan laek”. Refrão

 

Segunda Leitura                                                                                                                                                                    Rom. 16, 25-27

Lia housi São Paulo nia surat ba sarani sira iha Roma:

Maun-alin sira: Maromak mak fo kbiit, atu ita nia fiar metin nafatin, tuir Ha’u nia Evangelho no Na’i Jesus Cristo nia hanourin, nu’udar hatudu mistério subar kleur ohin loron foin fó sai. Hodi Escritura mak Maromak rohan laek haruka dehan nanis; Mistério ida ne’e, fó hatene ba gentio sira hotu, atu sira moris tuir fiar, Ba Maromak mesak nebé matenek, hodi Na’i Jesus Cristo, ba Nia, glória tinan ba tinan! Amen.  

Na’i nia Futar Lia.

 

Aclamação                                                                                                                                                                                           Lc. 1, 38a

Refrão : Aleluia, Aleluia!! Repete-se

Na’i, atan feto mak ne’e,

halo tuir deit Ita Futar Lia ba. Refrão

 

Evangelho                                                                                                                                                                                         Lc 1, 26-38

Na’i Jesus Cristo nia Evangelho nu’udar São Lucas haktuir:

Iha tempo nebá, Na’i Maromak haruka Anjo Gabriel ba cidade iha Galileia, naran Nazaré, atu koalia ho feto virgem ida, mane ida naran José, housi uma kain David, nia noiva. Feto virgem ne’e naran Maria. Tama tiha iha feto virgem ne’e nia uma, Anjo hatete: “Ave, feto kmanek wain tebes, Na’i ho ita”. Rona tiha ida ne’e, ho laran taridu feto virgem ne’e hanoin iha nia laran, lia Anjo hateten, katak sa los ba nia. Nune’ee Anjo hatete: “Maria keta tauk! Basá, o rahun diak tebes iha Maromak futar oin.! Ó sei kous no tuur ahi oan mane ida; ó sei hanaran Nia JESUS.” Oan ne’e sei sai ema boot ida; ema sira sei hanaran Nia, Maromak boot nia Oan! Na’i Maromak sei haraik ba Oan ne’e, nia Aman David nia reino. Nia mak sei ukun iha uma kain Jacob! Nia ukun sei la hotu”. Maria hatan ba Anjo: “ne’e sei sai oinsa los? Ha’u la hola mane!” Anjo hatan ba: Espírito Santo sei hôrik ho ó! Maromak nia kbiit sei hamahan ó! Tan ne’e, Santo nebé atu moris, hanaran-An Maromak Oan! Ó nia parente Isabel mós ko’us oan mane ida, maske ferik. Nia ko’us fulan neen ona; nia, ida be ema hateten katak la ko’us, basá, ba Maroma buat ida la susar!” Nune’e, Maria dehan: “Ne’e sá, Na’i atan oan mak ne’e. Halo tuir Ita lia fuan ba”

Lia Maksoin.

Sábado, III Semana Iha Tempo Advento (ANO B)

Primeira Leitura                           Jer. 23. 5-8

Lia housi Livro Jeremias:

Na’i lia tun: “loron sei to’o, Ha’u sei halo moris ba David tubun lós nian ida. Nia mak sei sai liurai lolós, sei ukun ho matenek nia lalaok iha nia rain, tuir direito no justíça. Iha nia loron, reino Judá sei hetan maksoin, reino Israel sei moris ho laran metin. Ne’e naran nebé sira sei tau ba nia: ‘Moris na’in nebé halo Israel oan sira sai housi Egipto’, maibé hateten: ‘Moris Na’in nebé halo sai no fila fali bei-oan  sira kona ba uma kain Israel nian, housi rai Norte nian no mós housi rai tomak iha nebé sira la’o namkari atu sira bele hetan iha sira rain’ ”.

Maromak Futar Lia.

 

Salmo Responsorial                                                                                                                                        Sal. 71(72). 1, 12-13, 18-19

Refrão : Iha Na’i Nia loron, justíça no dame sei moris ba nafatin!!! Repete-se

 Maromak, haraik ba liurai kbi’it atu tesi lia,

Haraik Ita nia justíça ba liurai oan.

Nia sei ukun Ita nia povo ho justíça,

Ukun Ita nia ema ki’ak sira halo hanesan. Refrão

 

Nia rona ema ki’ak sira hakilar;

Tulun ema neon susar sira be la hetan tulun.

Sei sadia ema kbi’it la’ek no hatraik áan sira,

Sei soi ema ki’ak sira niam moris. Refrão

 

Na’i, Israel nia Maromak, di’ak tebes,

Nia mesak de’it halo buat foun.

Nia futar naran Santo bo’ot ba nafatin.

Nia glória nakonmu iha rai klaran tomak. Refrão

 

Aclamação                                                                                                    

Refrão : Aleluia, Aleluia!! Repete-se

Ulun uma kain Israel nian nebé haraik ukun fuan ba  Moises iha Sinai,

hi’it áan mai soi ami ho Ita liman nia kbi’it.  Refrão

 

Evangelho                                                                                                                                                                                       Mt. 1. 18-24

Na’i Jesus Cristo nia Evangelho nu’udar São Mateus haktuir:

Jesus Cristo moris nune’e: Ema hakotu ona Maria, Jesus Nia inan ba José. Molok sira moris hamutuk, Maria ko’us tiha ona hodi Espírito Santo nia kbi’it. Nia la’en José, nebé ema laran lós, lakohi hamoe Maria, hanoin atu husik de’it nia. Nia hanoin daudaun nune’e, wainhira Na’i nia Anjo mosu ba nia iha mehi dehan: “José, David nia oan, keta ta’uk simu Maria nu’udar ó nia kaben, basá nia ko’us hodi Espírito Santo nia kbi’it. Maria sei tur ahi oan mane ida, ó sei hanaran nia, Jesus, basá Nia mak sei soi povo housi sala”. Ne’e hotu mosu atu halo tuir lia nebé Na’i hato’o housi profeta dehan: “Feto ran ida sei ko’us no tur ahi oan mane ida nebé ema sei hanaran ‘Emanuel’, katak ‘Maromak ho ita’. Tuir Na’i nia Anjo haruka, hader mai, José ba hola kedas nia noiva ba uma.

Lia Maksoyn.