shadow
Diocese de Dili > NOTÍCIAS > Articles by: Departamento Comunicação Diocese Dili

DOMINGGO II QUARESMA

DOMINGGO II QUARESMA

ANO A

Primeira Leitura (Gén. 12, 1-4)

Lia husi Livro Génesis:

Iha loron hirak nebá, Na’i liatun ba Abraão: “Hsuik tiha ó nia rain, ó nia parente sira, ó nia aman sira nia uman, ba rai nebé Ha’u sei hatudu ba ó. Ha’u sei haloó sai nação boot ida. Ha’u sei fo bensa ba ó, Ha’u fo naran boot ida ba ó, ó rasik sei sai nu’udar bena ida. Ha’u sei fó bensa ba ema nebé fó bensa ba ó; Ha’u sei fo malisan ba ema nebé fó malisan ba ó. Tan ó nação sira hotu rai nian, sei simu bensa”. Abraão ba, tuir Na’i haruka.

Maromak Futar Lia.

 

Salmo Responsorial (Sal. 32 (33), 4-5. 18-19. 20. 22)

Refrão: Na’i, ami hein Ita Boot laran luak. Repete-se.

Na’i nia lian, lialós;

buat hotu mosu tuir Nia hakarak.

Na’i nia domin nakonu iha rai-klaran. Refrão

 

Na’i tau matan ba Nia atan sira,

ba sira nebé hein iha Nia domin,

atu hasai sira klamar housi mate,

atu fó moris iha susar laran. Refrão

 

Ita neon hein ita Na’in,

Na’i sadia ita, tahan ita.

haraik Ita Boot nia tulun,

Na’i, ami hein Ita. Refrão

 

Segunda Leitura (2 Tim, 1, 8b-10)

 Lia housi São Paulo nia suratba Timótio:

Doben: hodi Maromak nia kbiit, terus hamutuk ho ha’u, tan Evangelho. Maromak soi ita, bolu ita atu sai santo laós hodi ita nia hahalok di’ak, maibé, hodi Nia hakarak no Nia tulun. Graça ne’e ita simu housi Jesus Cristo houri nebé kedas; ohin loron, foin hatudu housi Jesus Cristo, ita nia Maksoyn. Nia halakon mate; hodi Evangelho, Nia halo nabilan moris no moris rohan laek.

Maromak Futar Lia.

 

Aclamação

Refrão: Na’i Jesus Cristo, ami hahí hana’i Ita. Repete-se.

Housi kalohan nabilan ida laran,

Aman Maromak lia tun mai: “Ne’e, Ha’u Oan doben liu. Imi rona Nia ba”.

 

Evangelho (Mt. 17, 1-9)

 Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lori Pedro, Tiago ho no nia alin João, mesa-mesak ba foho áas ida. Nia nakfilak-An iha sira oin: Nia oin nabilan hanesan loron, Niania hatáis mutin hanesan roman. Mosu Moisés ho Elias, ko’alia ho Nia. Pedro hahú dehan ba Jesus: “Na’i, di’ak liu ita hela ona iha ne’e. Ita hakarak karik, ha’u halo taka-baluk tolu: ida ba Ita, ida ba Moisés, ida ba Elias”. Ni’a sei ko’alia hela, kalohan nabilan ida taka tiha sira; housi kalohan laran, lian ida dehan: “Ida ne’e Ha’u nia Oan doben tebes, nebé Ha’u tau Ha’u domin. Imi rona Nia ba”. Rona tiha lia-fuan hirak ne’e, sira monu taka oin ba rai, hakfodak teb-tebes. Jesus besik ba sira, hodi dehan: “Imi hamriik tiha ba, keta tauk”. Sira foti matan, la haré tan ema ida; sira haré de’it Jesus. Tun housi foho, Jesus hanourin sira: “Imi keta haktuir ba ema ida, buat nebé imi haré, wainhira Mane Maksoyn la dauk moris housi mate”.

Lia Maksoyn.

DOMINGGO I QUARESMA

DOMINGGO I QUARESMA

ANO A

 

Primeira Leitura (Gén. 2, 7-9; 3, 1-7)

 Lia husi Livro Génesis:

Na’i Maromak halo ema ho rai-rahun. Nia huu íis ida, moris nian, housi ema ínus; nune’e, ema sai buat moris ida. Na’i Maromak kuda toos ida iha Edén, iha oron-sa’e; Nia tau, ema nebé Nia halo, iha nebá. Maromak halo moris ai-horis oin-oin, fuan mesak furak, di’ak atu han; Ai-horis moris nian iha toos klaran no mos ai-horis hatene di’ak no hatene aat nian. Balada sira hotu nebé Na’I Maromak halo, samean mak laran kman liu atu bobar. Samean dehan ba feto: “Tebes ka? Maromak dehan ba imi: imi labele han ai-fuan hirak iha toos laran ne’e”? Feto hátan ba samean: “Ami bele han ai-fuan hirak nebe iha toos laran. Maibé, kona ba ai-fuan nebé iha toos klaran Maromak dehan mai ami: imi keta han nia; kona de’it mos labele. Keta halo ii mate”. Samean hátan ba feto: “ Lae ida! Imi sei la mate. Maromak hatene katak, wainhira imi han ai-fuan ne’e, imi nia matan nakloke, imi sei hanesan Maromak, imi hatene diak no aat”. Feto haré ba ai ne’e nia fuan diak tebes atu han, matan kan, ai diak ida atu fo matenek. Nia ku’u ai-fuan ba han; hafoin nia fó ba nia laen nebé hamutuk ho nia; nia laen mos han; sira naín rua nia matan nakloke, sira hatene katak, siran nia isin tanan. Tan ne’e sira suku ai figueira tahan, hodi taka an.

Maromak Futar Lia.

 

Salmo Responsorial (Sal. 50 (50), 3-4. 5-6ª. 12-13. 14-17)

Refrão: Na’i ami sala! Hanoin ami! Repete-se

Na’i, sadia ami, tan Ita laran di’ak,

tan ita laran luak kasu ami salan;

hamós ha’u nia hahalok aat,

kasu ha’u nia salan hotu.     Refrão

 

Ha’u fihir ba ha’u salan,

ha’u salan hetan nafatin iha haú oin.

Na’i, ha’u salan hasoru Ita,

ha’u halo salan iha Ita oin. Refrão

 

Maromak, haraik neon foun mai ha’u,

halo ha’u klamar nabilan.

Keta soe ha’u housi Ita futar oin,

Keta hadook ha’u housi Ita neon. Refrão

 

 

Segunda Leitura (Forma longa) Roma. 5, 12-19

  Lia housi São Paulo nia surat

 ba sarani sira iha Roma    

 Maun- alin sira: salan tama iha mundo hodi ema ida de’it: housi salan tama mate. Nune’e mata tama iha ema hotu-hotu, basá, ema hotu sala. Houri uluk too Moises nia Lei, mundo iha salan. Maibé , mate iha kedas ona, husi Adão to’o Moises, ba mos sira nebé la sala hanesan Adão; Adão, Jesus Cristo nebé atu mai ne’e nia ilas. Maibé, tulun la simu leet hanesan salan. Tan ema ida de’it nia salan, ema barak hetan aat. Maibé, Maromak nia graça liu tan fali: ho ema ida de’it – Jesus Cristo, nia tulun ema wa’in tebes hetan di’ak. Tulun ne’e  la hanesan salan ema ida de’it nian: salan mesak ida ne’e, lori ema ba terus; maibé, tulun simu leet, nebé mai tuir salan barak, lori ba di’ak. Tan ema mesak ida nia salan, mate tama housi ema mesak ne’e; liu tan fali; ema sira nebé simu graça barak no tulun justiça nian, sei hetan moris housi ema ida mesak, Jesus Cristo. Tan ema mesak ida nia salan, susar mai to’o hotu; nune’e mos, hodi hahalok di’ak ema mesak ida nian, ema hotu hetan di’ak nebé fó moris. Tan ema ida mesak lakohi halo tuir, ema batrak sai maksalak; nune’e mos, tan ema mesak ida halo tuir, ema barak sai lós.

 

Segunda Leitura (Forma breve) Rom. 5, 12. 17-19

Lia housi São Paulo nia surat

ba sarani sira iha Roma:

Maun-Alin sira: Housi ema ida de’it, salan tama iha mundo; housi fali salan, tama mate. Nune’e, mate tama iha ema hotu, basá, sira hotu sala. Tan ema ida mesak nia salan,, mate mai housi ema mesak ida ne’e; lós liu tan fali, sei hetan moris ema sira nebé simu graça barak no tulun justiça nian, housi ema ida mesak, Jesus Cristo. Hanesan, housi ema mesak ida nia salan, susar mai to’o ema hotu, nune’e mos, housi ida mesak nia hahalok di’ak, ema barak nebé hetan di’ak nebé fó moris. Hanesan, tan ema ida de’it la halo tuir, ema barak sai maksalak, nune’e mos, tan ema ida de’it halo tuir, ema barak sai lós.

Maromak Futar Lia.

 

Aclamação (Mt. 4,4b)

 Refrão: Ami hahí Cristo, Maromak nia lia-fuan. Repete-se.

La moris de’it ho ai-han,

Maibé, ho liafuan nebé mai housi Maromak. Refrão

 

Evangelho (Mt. 4,1-11)

Na’i Jesus Cristo nia Evangehlo

nu’udar São Mateus haktuir:

iha tempo nebá, Espírito Santo lori Jesus ba rai-fuik maran atu Demónio babeur Nia. Jesus halo Jejum loron hatnulu, kalan hatnulu, liu tiha Nia hamlaha. Babeur-na’in hakbesik ba Nia, hodi dehan: “Ó Maromak Oan sá, dehan ba fatuk hirak ne’e, atu sira nakfilak ba pão”. Jesus dehan ba nia: “Hakerek nanis ona, ema la moris ho ai-han de’it, maibé, ho lia-fuan sira hotu, nebé sai housi Maromak Futar ibun”. Demónio lori Nia ba tau tiha iha templo tutun, dehan: “Ó Maromak Oan sá, soe-An to’ok ba kraik. Basá, hakerek nanis ona: Maromak sei hanorin Nia Anjo sira, kona ba Ó, sira sei simu Ó iha sira liman, keta halo Ó nia ain baku ba fatuk ruma”. Jesus hátan dehan: “Hakerek mos nanis ona: keta babeur ó nia Na’in, ó nia Maromak”. Demónio lori fali Nia ba foho aas teb-tebes ida; hatudu tiha reono hotu-hotu mundo nian, hamutuk ho nia riku-soin, nia dehan: “Ha’i fó buat sira ne’e hotu ba Ó, karik Ó hakneak, adora ha’u”. Jesus hátan: adora de’it ó nia Na’in, ó nia Maromak; ba Nia mesak de’it mak ó hasa’e ó nia hamulak”. Nune’e, Demónio husik tiha Nia. Anjo sira mai kedas serbí Jesus.

Lia Maksoyn.

QUARTA – FEIRA DE CINZAS

Primeira Leitura  ( Joel 2, 12-18)

 

Lia husi Livro Profeta Joel :

Oras ne’e Maromak hateten: ”Fila imi laran ho neon mai Ha’u, hodi hadera-an, hodi tanis no halerik. Hakanek imi nia laran; lalika lés imi nia unuk. Fila imi laran ho neon tomak ba imi Na’in, ba imi nia Maromak, tan Maromak, tan Maromak di’ak no laran luak tebes! Tan Maromak lahatene rai hirus, lahatene hanoin fó todan…Huu karau dikur iha fóho Sião tutun, hodi fó hatene loron hadera-an nian, hodi halibur povo tomak: katuas no ferik, boot no labarik sei susu! Sira nebe foin kaben, hadook malu lai! Housi oda-matan to’o Altar, sacerdote sira nebé servisu iha Uma Kreda, tanis daudaun hodi hateten: ”Na’i, sadia ita nia povo! Keta halo ita nia povo moe lerek iha ema seluk sira leet! Tan sá mak povo sira seluk hateten: ‘Sira nia Maromak iha nebé?’ Na’i Maromak hanoin, hodi hakarak tebes nia povo. tan nee, mak Nia sadia nia povo”…

Maromak Futar Lia.

 

 

Salmo Responsorial  (Sal. 50, 3-6a, 12-14, 17)

 

Refrão: Na’i ami sala: hanoin ami. Repete-se

 

Na’i, tan ita laran luak, sadia ha’u;

tan hanoin tebes ha’u, kasu hau salan;

hamós ha’u hahalok a’at,

fase ha’u salan tomak. Refrão

 

Ha’u hatene ha’u salan,

ha’u salan mosu nafatin iha ha’u oin;

Na’i, ha’u sala hasouru ita,

ita matan haré katak sala, ha’u ata halo. Refrão

 

Na’I, haraik laran mós mai ha’u,

fó fali kbiit ba ha’u klamar;

Keta soe hau dook housi ita futar oin,

ita boot Espírito keta dook housi ha’u. Refrão

 

Haraik fali ksolok Maksoyn mai ha’u,

hametin iha ha’u hakaran, di’ak;

Na’i loke ha’u ibun,

ha’u ibun sei hananu Ita nia kmanek. Refrão

 

Segunda Leitura  (2 Cor. 5, 20-6, 2)

 

Lia housi São Paulo nia surat ba sarani sira iha Corinto:

Maun-alin sira: Ami, Cristo nia saseluk; hodi ami, mak Maromak hanourin imi. Ne’e duni, ami husu ba imi, hodi domin Cristo nian; “Badame malu ho Maromak! Cristo, maski sala laek, Maromak halo Nia maksalak, tan hadomi ita, atu iha Cristo, ita bele hetan Maromak nia di’ak. Nu’udar Maromak nia saseluk, ami hanourin imi, atu la bele simu leet de’it Maromak nia graça. Tan Maromak hateten: “ Iha tempo di’ak, ha’u rona ó! Iha tempo Maksoyn, Ha’u mai tulun o!” Oras ne’e daudaun mak tempo di’ak, oras ne’e daudaun mak tempo Maksoyn.

Maromak Futar Lia.

 

 

Aclamação

Refrão: Na’i Jesus Cristo, ami hahí hawelok Ita. Repete-se

 

Oras ne’e daudaun mak, tempo di’ak, no loron Maksoyn!

Na’i nia lia-fuan:

“hakribit imi salan, Reino lalehan besik daudaun!”

 

 

Evangelho (Mat. 6, 1-6, 16-18)

 

Na’i Jesus Cristo nia Evangelho nu’udar São Mateus haktuir:

Iha tempo nebá, Na’i Jesus Cristo hateten sai ba escolante sira: “Imi sei la buka halo di’ak atu ema seluk hahí imi. Imi halo di’ak karik, atu ema seluk hahí imi, Aman Maromak sei la haraik prémio ba imi, iha lalehan. Nune’e, wainhira o fó esmola, lalika dere gon, hanesan ema laran makerek sira halo, iha Uma Creda ka iha luron, atu ema seluk hahí sira. Ha’u hateten lós ba imi: ema sira ne’e, simu ona sira kólen. Wainhira ó fó esmola, buka fó subar: O nia liman karuk lalika hatene ó nia liman los halo sá ida. Nune’e, ó nia Aman iha lalehan, tan Nia haré hotu, Nia mak fó ó nia kólen. Wainhira ó ba hamulak, labele halo hanesan ema laran makerek sira. Ema sira ne’e mak hamriik, hodi hamulak iha Uma Creda ka iha luron, atu hatudu katak, sira hamulak. Ha’u hateten lós ba imi: “sira ne’e simu ona sira nia kólen. Maibé ó, wainhira hamulak, buka tama iha uma laran, taka oda-matan, hafoin, hahú hamulak iha lia sumik ba ó nia Maromak. Tan ó nia Aman iha lalehan hare no hatene hotu, Nia mak sei fó ó nia kolen. Wainhira ó hadera-an, keta halo oin nakraik, hanesan ema laran makerek sira halo, atu hatudu katak, sira hadera-an. Ha’u hateten lós ba imi, katak, sira ne’e simu ona sira nia kólen. Maibé, wainhira ó hadera-an, ó sei fase oin, tau mina morin ba ulun, atu ema labele hatene katak, ó hadera-an; atu Aman Maromak de’it mak hatene o nia hahalok; nune’e, Aman Maromak mak sei selu ó nia kólen.

Lia Maksoyn.

DOM. BASILIO HALO LANÇAMENTO PRIMEIRA PEDRA BA ESCOLA MÚSICA IHA FATUMETA, DILI

 

DCDD, DILI – Dom Basilio do Nascimento hateten “Escola mak instrumento diak ba nação”. Lia hirak ne’e, hafoin de halo lançamento primeira pedra ba escola de música nebe sei sai hanesan laboratorio músico nian ba iha Timor Leste. Cerimónia ba lançamento primeira pedra ne’e halao, iha Fatumeta-Dili, Sábado 18/ 02/ 2017.

Reitor ISFIT, Pe. Domingos Alves da Costa, iha nia discurso hatete agradeçe tebes ba lançamento escola de música ne’e, basa mehi ne’e kleur tiha ona. “Plano atu hari escola música ne’e kleur ona, wainhira ita foin hamrik hanesan nação”, dehan Pe. Domingo. Nia hatutan tan hanoin ne’e mosu, wainhira ho apresentação música orquestra husi maestro Simião Barreto ho nia equipa iha Taci-Tolu. Nebe atraiente tebes. Husi ne’e,  Sr. Xanana Gusmão, Bispo Ricardo da Silva (matebian) no Sr. Simião Barreto (maestro), sira hahu koalia ba malu atu oinsa mak loke escola de música. Ho esforço boot nebe parte hotu halo, iha loron 18 de Fevereiro de 2017, escola de música ne’e hetan duni lançamento primeira pedra husi Presidente Comferência Episcola Timorense (CET), Dom Basilio do Nascimento. Padre Domingos Alves hatutan tan ho cooperação nebe ita hotu fo ba hari escola de música ne’e, bele educa diak liu tan ita nia joven sira iha arte no música nian. “Igreja fo ninia contribuição ida ne’e, fo nia rai, estado fo nia ajuda, ita hamutuk ba hodi halo obra ida ne’e sai realidade, em favor dos jovens no desemvolvimento talento musical iha rai Timor Leste”, afirma Pe. Domingos Alves. Iha sorin seluk, Presidente Comferência Episcopal Timorense (CET), Dom Basilio do Nascimento hateten, infraestrutura ida nebe diak liu ba nação mak Escola. “Quando loke escola, hau hanoin bebeik dehan infraestrutura ida nebe diak liu ba nação ida mak nia escola, tamba liu husi escola fo biban atu, ema ida-idak bele hetan instrumento ida hodi usa iha vida”, dehan Dom Basilio. Nia hatutan tan, escola loke matenek, atu depois ema ida-idak    usa nia matenek ne’e, hodi hetan possibilidade atu moris. Nia esclareçe tan, caridade dura durante tempo oan ida, NGO sira halo diak ba ema quando osan iha e quando iha disponibilidade. Maibe quando escola fo biban atu ida-idak hetan posibilidade hodi dulas nia kakutak ou hasai husi nia possibilidade buat nebe nia precisa hodi usa iha vida. Enquanto relaciona ho escola de música ne’e, Dom Basilio hateten timoroan sira, arte ne’e, capacidade inata, só que indisciplinado em ordem. Basa tuir Dom Basilio katak difinição música ne’e, é um conjunto de barrulhos agradáveis ao ouvidos, enquanto timoroan sira nain lima ou ne’en, tur hamutuk kanta, significa um conjunto de barulho, sim, mas desagradáveis ao ouvidos. “Quando ita nia joven sira kanta, barulhos, sim senhor, maibe baixo deit mak funciona. Nebe definição música nian nebe agradável ao ouvido ne’e, sai buat desagradável bot ida’’, Dehan Dom Basilio. Ho lançamento escola de música ne’e, presidente CET ne’e, iha esperança katak escola ne’e, atu pelo menos hanorin alunos sira, hirak nebe frequênta, atu disciplina ho capacidade inata nebe moris ho timoroan ida-idak. Fo biban atu disciplina capacidade nebe ida-idak iha katak buat ida arte ne’e, laos deit expressão qualidades inatas, maibe qualidade inatas ne’e, sai hanesan dom Maromak nian, nebe liu husi aperfeiçoamento hanorin hirak nebe hetan iha uma ida ne’e. Companhia nebe responsabiliza konaba obra ida ne’e, mak Tali Sahe, orçamento ba hari uma ne’e mai husi Governo ho montante um milhão e tal. Duração ba obra ne’e, fulan 18. Participa iha lançamento ne’e, Secretário Estado Coordenador ba Assuntos Sociais e Ministro da Educação, sociedade civil, Secretário Estado das Mulheres, Naillik sira no comvidados sira. (N)

PARÓQUIA ATU BURAS PERCISA COOPERAÇÃO

 

DCDD, ERMERA – Sábado 12 de Fevereiro 2017, Dom Virgilio do Carmo da Silva hamutuk ho Cúria Diocese Dili fó Tomada de Posse ba Pe. Deonildo de Andrade hanesan Pároco ba Paróquia Ermera.

Dom Virgilio hateten: Amululik sira quando Ordena, sira promete atu obedece. Nee duni Obidiência nebe halo iha loron Ordenação ninian, Nailulik continua fiel iha liafuan ida nee quando husu atu halao knar  foun, amo la registe, pronto atu assume cargo foun ida iha Paróquia ida. Nailulik ida halao knar iha Paróquia significa nia representa Diocese nebe mai hela iha nee, nia representa Bispo iha Paróquia ida, nia representa Amo Papa no nia representa Cristo iha Paroquia ida.

Dom Virgilio reforsa tan: Quando hili Pároco ida, laos Pároco nee tun husi Lalehan mai nebe hatene buat hotu-hotu, maibe Pároco nee ema ida, masque mai ho ninia matenek, mai ho ninia experiência sira, maibe laos dehan katak perfeito. Nia iha ninia limitações no Iha ninia fraqueza mos. Tan nee, precisa mos atu sarani sira atu colabora hamutuk hodi hari no hametin Paróquia ida.

Dom Virgilio declara katak: Nudar Bispo Diocese Dili besik ona tinan ida, dala barak hau simu nafatin mensagem anónimo dehan sarani balu sente contente ho ninia Pároco, maibe husi kotuk haruka mensagem ba liu Bispo. Se ita sente duni ida nee ita nia Paróquia, ita nia Pároco, ida nebe ita hakarak atu hadia, se buat ruma lao lalos, ita buka dalan atu rezolve hamutuk. Rezolve nee laos murmura husi kotuk, halo propaganda husi kotuk liu husi Facebook, mensagem sira tama iha Jornal ema hotu hatene, maibe ema nee rasik lahatene buat hirak nee.

Dom Virgilio recomenda tan katak: hau husu ba sarani sira buat ida nee deit katak “ita nia Cooperção”. Buat ruma lao lalos karik husi amo sira ita loke liman, loke matan, loke fuan ba malu, koalia ba malu ho haraik an ho ita nia simplicidade, tanba ita hotu hakarak diak ba sarani nian, Creda nian, rai doben ninian, liu-liu rai Ermera ninian.

Iha sorin seluk, Administrador Paroquial Pe Recardino Mendonça Castro haktuir katak: Hau iha hau nia missão, hau conciente katak Maromak bolu hau atu halo buat ruma no buat ida hau halo ne’e mak hau nia knaar oinsa atu hau hakasan atu moris tuir hau nia votos sira nudar Nailulik, obedece ba provisão nebé fo katak ida ne’e comfiança ida husi Diocese atu hau bele halo buat ruma liu-liu atu lori sarani sira atu ba conhece se mak Cristo.

Pe. Deonildo de Andrade nudar Pároco foun Paróquia Ermera nian mos salienta tan katak: Uluk hau mai hanesan Vigário Paroquial hau dehan ona katak ”Hau mak nee”. Ita precisa kaer ba Bispo nia liafuan nebé ohin sublinha ona katak: buat ida atu lao diak temque iha comunição, temque iha diálogo. Nebé ita hakarak Paróquia Ermera nee lao diak, labele iha Padre Pároco nia kabas deit, maibe iha ita hotu nia kabas. Ita mak temque rona malu, ita fo ideia ba malu, ita hare ida nebe mak diak ita hotu-hotu fo liman atu halo diak. Além nee’mos Pe. Deonildo de Andrade hasae mos nia lian agrdecimento ba Pe. Recardino nebe hanorin no fo exemplo barak too ikus mai hodi hamrik hanesan Pe. Pároco de Nossa Senhora de Lurdes Ermera. (CTDD+ITE)

DIOCESE DILI ESTABELECE ACORDO PROGRAMA RELIGIOSO HO RTTL,E.P

 

DCDD – Segunda feira, 04;00 Htl, Diocese Dili hamosu tan história foun ida atu estabele comversão ida entre Diocese Dili ho RTTL ep hodi serviço hamutuk iha programa Religiosos nian hodi transmite imformação ba Comunidade sarani kona ba Maromak Nia Futar Liafuan. Evento nee realiza iha Câmara Eclesiástica Dili nebe participa husi Bispo de Dili Dom Virgilio do Carmo da Silva, Sua Exelência Secretário de Estado da Comunicação Social Nélio Isaac Sarmento, Presidente RTTL,E.P Milena Abrantes.

Bispo hateten katak: Particularmente Diocese Dili sente orgulho tamba tinan ida nee ami hahu Pastoral Diocese nian ho Maromak Nia Liafuan. Ho serviço hamutuk ida nee maneira diak ida e hau concorda ho Sua Exelência nebe ohin dehan ida nee nudar passo ba dala uluk nebe ita halo no sei iha momento nebe karik ita bok ituan no fiel ba buat nebe ideal, maibe buat diak mak ohin ita hakarak estabelece acordo nebe ita hanoin hamutuk, masque monu mos ita sei lao ba oin no acordo nee sei kaer metin. Depois de Um ano mak ita hare hodi halo fali avaliação ida hodi hare fila fali buat nebe diak ita halo diak liu tan no buat hirak nebe ladun diak ita buka atu corige.

Bispo haforsa tan katak: ho acordo ida nee Ida nee bele fo retorno boot ba iha parte hotu, tamba hakarak comunica ba iha ita nia sociadade, ba ita nia sarani sobre Creda nia missão e liu-liu Cristo ninia missão. Liu husi meios Comunicação ida nee ita hakarak atu comunica buat nebe Creda nian tamba Jesus rasik comunicadora ida, Nia uja meios oi-oin hodi comunica, hodi conta história, aiknanoik, Ninia discurso, maneira ida nee iha tempo Jesus nian mak ita hare ohin loron ita iha atu atrai ita ninia ouvintes sira.

Iha biban hanesan, Secretário de Estado da Comunicação Social Nélio Isaac Sarmento iha nia discurso mos declara katak: Ami contente teb-tebes atu estabelece programa ida nee ho Diocese Dili tamba ita hatene agora dadaun ita tama ba tinan ida nebe tecnologia de imformção e ita nia população mos precisa imformação hodi hametin sira nia fiar liu husi programa sira Televisivo nian. Iha Concordata nebe mak Igreja ho Estado halo iha neba parte balu mos koalia kona ba Estado nia obrigação atu fo espaço Comferência Episcopal hodi divulga imformação sira nebe relaciona ho Religão Católica. Tamba nee espaço ida nebe ita foin hahu e hau espera katak ida nee hanesan iniciativa ba dala uluk maibe depois ita lao neneik ita sei hetan objectivo lolos nebe mak ita hakarak hato’o ba ita nia sarani tomak.

Nélio Isaac iha ocasião nee mos hateten: Agradece ba amo Bispo ba iniciativa diak ida nee, e ita espera katak ho programa hirak nebe mak Diocese sei produz, hau fo comfiança tomak ba equipa sira nebe serviço iha Diocese ninian tamba hanesan hau sempre dehan bebeik ami fo hela espaço hakarak produz programa sira nebe iha relação ho Católica, maibé ami laiha específico no la domina kona ba Maromak Nia Liafuan, maibe ami iha capacidade atu halo buat nebe mak simples hodi divulga imformação nebe mak ita hakarak hatoo ba iha sarani sira liu husi Canal Rádio no Televisão.

Presidente RTTL,E.P Milena Soares Abrantes mos hateten: Acordo entre RTTL, E.P no Diocese nee rasik foca liu ba iha programa hametin fiar no mos ba TalkSow nebe mak hatoo aspiração ruma nomos iha audiência ruma nebé mak sei participa iha Tolk Show nee.  Ami hakarak nee Talk and Show atu iha neba bele iha música ruma bele anima. Dala barak iha público hakarak mos atu rona liafuan murak sira husi Bispo sira atu bele refresca tamba tinan ida nee tinan todan tebes ba ita hotu katak Festa Democracia.

Relaciona ho programa sira Presidente RTTL,E.P hateten: Ida nee husi parte produtório sira nebe mak sei halao iha Dominggo e tempo mos iha nee sidauk decide claro tamba husi prte Diocese no mos produtorio sira sei hare fila fali atu termina ba loron saida mak sei hatun, maibe ida nee bajeia ona ba acordo nebe mak ohin halo hahu ona realiza programa hirak nee. Husi contiudo programa Diocese mak sei produz no sei cooprea hamutuk ho RTTL,E.P.(C/a)

 

 

 

 

CARTA PASTORAL CONFERÊNCIA EPISCOPAL TIMORENSE BA ELEIÇÕES 2017

DCDD – Iha tinan 2017, Timor-Leste celebra nia tinan 15 nu’udar Estado Independente iha comunidade internacional nia le’et. Estado nebé  hari’i nia-an  iha milénio foun ida História Universal nian. Proclama tiha independência iha tinan 1975, maibé wainhira Comunidade Internacional reconhece ita nia estatuto ida ne’e iha 20 de Maio de 2002, maka ita foin hari’i ita-an nu’udar Estado Independente no soberano, hanesan Nação hot-hotu iha mundo.

Tinan ida ne’e mós, Timor-Leste sei halao nia exercício democrático liu husi eleições ba dala tolu, kona ba eleições ba Presidente da República, no ba eleições parlamentares ka legislativas. Katak ita sei hili iha tinan ida ne’e, ema ida nebé povo Timor-Leste sei fo kbiit atu kaer kuda talin Estado nian; no mós ita sei hili força política ka força  política sira nebé povo Timor-Leste sei hili atu fo kbiit ba sira hodi ukun no halo lei sira nebé Estado Timor-Leste precisa atu halao nia moris nu’udar, estado, sociedade no cidadão.

Iha biban ida ne’e, Bispo sira Timor-Leste nian, nu’udar ulun Kreda Católica nian iha rai ida ne’e, hakarak mós hato’ó no fahe sira nia hanoin balu hodi convida povo tomak atu hanoin, haklean, reflecte, considera no mós participa iha tempo ne’e no iha  acontecimento sira nebé sei tuir mai ne’e, wainhira hakerek daudaun hela ita nia história rasik iha tempo moderno.

Bispo sira  nia hanoin no hakarak ne’e atu convida Estado Timor-Leste atu heteke ba nia-an rasik, nu’udar Estado. Laos deit hateke  ba Timor-Leste, liu husi perspectiva candidato presidencial ida nian; laos deit hanesan força politico-partidária ida nebé esforça-an atu apresenta nia programa partidário hodi buka manan votos; laos deit hanesan militante partidário nebé empenha nia-an maka’as  atu nia partido bele hetan cadeira barak liu; laos deit hanesan votante nebé iha loron votação nian ba tau nia voto, hafoin hein tan tinan lima mai oin atu ba vota hikas fali. Hafoin  durante tinan lima mai oin ne’e  nia laran, rai ne’é atu lao oinsa-oinsa deit, nia la interessa.

Bispo sira nia hanoin no hakarak ne’e, convida Timor oan ida-idak, atu, halao daudaun nia militância política-partidária, nia ideologia rasik, nia hakarak no mehi rasik atu hetan dalan nebé diak liu ba ita nia rai, maibé  fo hanoin ba cidadão ida-idak atu tau nia-an iha estado nia laran. Haré liu ba interesse estado nian, nebé bo’ot no a’as liu ida-idak ninian.

Iha ocasião ida nee Bispos sira Timor nian asentua kona ba Consciência Histórica hodi dehan : Baibain matenek nain sira considera ita nia rai no nação ida ne’e hanesan ponto ida nebe hatudu mundo rua fahe  malu eh fatin nebé halo mundo rua hasoru malu. Haré husi Continente, dehan katak  Timor-Leste  halo  continente rua fahe malu eh hasoru malu: Ásia no Oceania;  haré husi taci, dehan katak  Timor-Leste rai nebé halo Oceano Pacífico no Oceano Índico fahe malu eh hasoru malu; haré husi religião, Timor-Leste, rai nebé hakotu religião ida (Cristianismo, liliu Catolicismo) nia influência no hamosu religião bo’ot sira seluk Ásia nian iha rai sira nebé haleu ita nia rai kiik-oan ida ne’e. Ita bele haré tan ba ita nia rai ida ne’e husi  sikun seluk, ângulo seluk no perspectiva seluk tan.

Hanesan povo ida nebé, maioria sarani no católico, ita tenki haré ba pormenor oan ida nebé bolu mundo tomak nia atenção no interrogação: HALO NUSA MAKA RAI OAN IDA BELE SAI CENTRO IDA CRISTIANISMO NIAN, NO LILIU CATOLICISMO NIAN IHA ÁSIA BO’OT IDA NE’E  NIA LE’ET NO IHA RAI SIKUN OAN IDA NE’E, DO’OK HUSI CENTRO HOT-HOTU NEBÉ HALEKAR CRISTO NIA EVANGELHO BA MUNDO IHA TEMPO LIU BA? PROPORCIONALMENTE, TIMOR-LESTE RECONHECIDO NU’UDAR PAÍS CATÓLICO NEBÉ BO’OT LIU IHA MUNDO, BIAR NUMÉRICAMENTE ITA NIA POPULAÇÃO SEI UITOAN  HELA DEIT.

Baibain ita considera hodi dehan katak ne’e Maromak nia plano. Iha biban ida ne’e, ami Bispo sira hakarak convida Estado Timor-Leste atu hateke ba nia-an, no hateke ba contexto nebé haleu ita nia rai nu’udar nação católica ida. Para além de desenvolvimento nebé ita hotu hakarak no mehi, ita tenki considera katak nu’udar Estado, ita buka ocupa ita nia fatin iha mundo, maibé mós nu’udar sarani ita hola consciência katak  ita halao mós Maromak nia plano ida iha mundo sikun ida ne’e. Ita koko to’ok hanoin hamutuk  Nai Maromak nia plano ba Estado kiik-oan ida ne’e maka ida nebé? Desde Candidatos Presidenciais no Força partidária sira, ita hotu  koko hanoin kona ba ita nia particularidade ida ne’e. Haré tuir influência religião nian, ita hatene deit katak religião bo’ot sira Ásia nian la iha influência kona ba ita nia cultura, usos no costumes, comportamentos, etc… Biar, felizmente, ohin loron Timor-Leste hetan contacto barak ho rai liur nebé hetan influência husi religião sel-seluk, maibé base cristianismo nian sai nafatin referência hodi sukat Timor oan sira nia moris lor-loron nian. Ita nia património histórico no cultural hetan nia hun husi Cristianismo-Catolicismo. Biar ita nia prática sarani sei kahur hela buat barak ho  ita nia base animista. Maibé animismo ida ne’e duni maka sai fatin atu Cristianismo no Catolicismo haburas-an iha Timor-Leste.

Amo Papa Francisco, wainhira hasoru malu ho Bispo Timor oan sira dehan: “estes sinais ao mesmo tempo que exprimem a radicação da Igreja em Timor, convidam os seus filhos e filhas a um testemunho alto de vida cristã e a um redobrado esforço de evangelização para levarem a Boa Nova a todos os estratos da sociedade, transformando-os a partir de dentro”. (visita ad limina, 17/3/14)

Hakat liu tiha conscencia histórica Bibi Atan Nain tolu nee mos foca kona ba Consciência Nacional no Clima Pré-Eleitoral hodi hameno liafuan kmanek sira Atu halao dadaun ita nia eleição ba dala tolu iha rai Timor, hanoin no haré kona ba hahalok ida ne’e, nu’udar tomada de consciência nacional, ami regista ho laran haksolok tebes, evolução nebé acontece iha ita rai. Wainhira ita haré ba kotuk, iha tinan 15 ne’e nia laran, ita hotu sei hanoin tempo susar no tensão nebé ita koko no moris wainhira ita hahú ita nia vida democrática nudar Estado. Hahú kedan 2002 to’o 2008, ita nia experiência democrática hetan dificuldades oi-oin, no dala barak ameaça instabilidade quase tinan-tinan. Ita hotu sei hanoin clima de tensão nebé ita hetan iha eleição 2007. Clima eleitoral iha tempo nebá ita bele dehan clima manas. Eleição 2007 liu tiha, ita continua moris  iha situação política no social ida nebé la hakmatek, tan nato’on ne’e ita hotu ladauk hetan biban atu moris cultura política ho diversidade de ideologias e opiniões, ho maturidade emocional. Situação difícil liu maka 2008 wainhira Sr. Presidente da República ho Sr. Primeiro-Ministro hetan atentado. Maibé situação ida ne’e duni maka fanu povo Timor-Leste atu hola consciência kona ba perigo nebé bele kona ita: katak ita halimar resin ho ahi. Maka ahi lakan fila fali iha ita nia rai karik, la iha tan ema ida, liliu comunidade internacional, atu lalin be hodi mai hamete ahi nebé ita rasik maka sunu iha ita nia uma laran nu’udar maun-alin.

Parece contradição, maibé hahú tinan 2008 mai oin, sente hanesan povo Timor-Leste hola consciência kona ba responsabilidade nacional no moris ho maturidade política no emocional. Maturidade ida ne’e duni maka halo katak clima pré-eleitoral 2012 la dun lao ona ho tensão hanesan iha 2005 no 2007; no mós ami regista katak maturidade ida ne’e duni maka fo kbiit atu povo ohin loron bele hatene observa no analisa assunto sira nebé kona ba interesse nacional, no assumto sira nebé kona ba interesse partidário no assuntos ka desentendimentos pessoais. Maibé ohin loron sente hanesan povo hatene tau nia-an iha acontecimento sira nia le’et, biar acontecimento balu bele fo biban atu hamoris emoção maka’as hanesan uluk. Tan ne’e haré ba situação ohin loron, ami sente haksolok, tan ita bele moris iha clima pré-eleitoral ida nebé hakmatek. Contexto ida la moris mesak, maibé sai consequência situação sira uluk nian nebé halo ita aprende hodi halo’os atu hetan dalan nebé diak liu no proveitoso ba ita nia estado. (Matenek nain sira lian Latim nian dehan: “errando discitur”- katak ita aprende ho ita nia hahalok naksalak sira). Husu atu ita mantém nafatin maturidade emocional ida ne’e ho capacidade adulta (néon tasak) iha eleição nebé atu halao daudaun iha fulan Março  no fulan  Julho 2017. Se ita consegue aprende ho ita nia hahalok naksalak sira, Parabéns ba ita hotu nia aprendizagem democrática  no moris democrático. No iha ikus mai Bispo sira Timor nian hatur hanorin uma creda nian relaciona ho Actividade Política nu’udar Vocação ho ninia ba maka : “O nosso mundo começa o novo milénio carregado de contradições dum crescimento económico, cultural e tecnológico que oferece a poucos afortunados grandes possibilidades e deixa milhões e milhões de pessoas não só à margem do progresso, mas a braços com condições de vida muito inferiores ao mínimo que é devido à dignidade humana”. (“Novo Millenio IneunteNo Início do Novo Milénio”, no . 50).

  1. João Paulo II iha nia Carta Pastoral ne’e, hakarak bolu atenção ba situação rua. Dala barak desenvolvimento haré liu ba sistema político no financeiro, haré liu ba máquina administrativa no haluhan tiha criatura ema, pessoa humana. Desenvolvimento hotu nebé la considera pessoa humana hanesan objecto principal desenvolvimento nian, desenvolvimento ne’e sai hahalok mamuk ida, hanesan ai sira nebé matak no buras tinan bai-loron, maibé fuan la iha. Atu hatutan S. João Paulo II nia observação, maka ami hakarak halo reflexão balu kona ba actividade política administrativa hanesan vocação ida. Tuir Kreda nia perspectiva no hanorin, wainhira koalia kona ba “vocação”, katak Nai Maromak hato’o nia bolu ba ema ida atu hatán ba situação concreta ida, tan situação ida ne’e husu resposta ida. Wainhira Nai Maromak hatan directamente ba ita nia necessidade ita bolu ne’e milagre. Maibé baibain Nai Maromk hatán ba situação concreta sira liu husi ita ema nia colaboração.  Por exemplo, Jesus Cristo atu fo han ema rihun lima precisa labarik ida  disponibiliza nia “paun fuan  lima no ikan rua”. (Mt. 14, 13-21)

Profeta Isaías no S. Paulo nia liafuan sei mai fo naroman liu tan atu ita ema ida-idak compreende ita nia actividade no responsabilidade  sira hotu nu’udar vocação ida: “Israel, ó hau nia atan; husi ó, hau hatudu hau nia glória … então Nia dehan mai hau: laos deit atu sai hau nia atan, atu hafoun hikas fali Jacob nia tribu sira no hatudu dalan ba mate resto sira Israel nian: Hau sei halo ó sai naroman Nação hot-hotu nian, atu hau nia moris rohan laek bele to’o  ba rai sikun hot-hotu”. (Is. 49, 3, 6)

 Há diversidade de dons, mas o Espírito é o mesmo; há diversidade de ministérios mas o Senhor é o mesmo. Há diferentes actividades, mas é o mesmo Deus que realiza tudo em todos. A cada um é  dada a manifestção do Espírito, em vista do bem de todos”.(1a Cor. 12, 4-8)

Ba eleição tinan 2017, ami hakarak convida mós Candidatos Presidenciais sira no forças politico-partidárias sira hotu atu haré ba actividade no missão politica hanesan vocação ida. Katak ba sarani ida, nia actividade política bele sai hanesan resposta nebé actor político ida ne’e bele fo ba Maromak nia “chamamento” atu nia bele serbí nia maun-alin sira liu husi dalan política nian. S. João Paulo II iha nia Carta Apostólica “No Início do Novo Milénio” (no 50), convida ema hotu, liliu sarani sira atu hateke ba mundo nebé habo’ot-an ba daudaun ho virtudes, evolução, progresso no desenvolvimento sira hotu, maibé mundo ida nebé parece que haluha tiha pessoa humana.

Iha contexto de leitura de situação ne’e, maka ami sugere kaer profeta Isaías nia liafuan hodi compreende Maromak nia diálogo ho vocacionado ida-idak. Iha diálogo ne’e Nai Maromak interpela vocacionado ida-idak de modo directo: “ Ó HAU NIA ATAN; HUSI Ó HAU HATUDU HAU NIA GLÓRIA; HAU SEI HALO Ó SAI NAROMAN NAÇÃO ISRAEL NIAN”. (Is. 49)  Convida líderes responsáveis sira hotu atu, iha tempo eleições nebé mai daudaun, tau ida-idak nia an hanesan “Ó” ida ne’e iha Maromak nia oin, atu rona mos Nai Maromak nia interpelação ba líderes ida-idak no força política sira tomak. Completa  ho S. Paulo nia recomendação no exortação: “Buat hotu nebé ita simu, ita simu ba ema hotu nia diak”. (1a Cor. 12, 7).  Equipa Editor

ORAÇÃO IHA HORA SANTA HODI HUSU DAME NO UNIDADE TIMOR OAN SIRA NIAN

1. Cântico de Entrada (Bele hananu knananuk Advento nian)

2. Saudação inicial hanesan baibain :

     HODI PADRE, HODI FILHO, HODI ESPÍRITO SANTO …

3. Introdução

Maun alin sarani doben sira, iha lokraik kmanek ida ne’e, ita hotu halibur nudar maun-alin, bin-alin no feton-naan iha fatin Santo ida ne’e, hanesan membro familia boot Kreda Santa Na’i nian hodi tuku-tur hana’i, hahi no adora Aman Maromak bele buat hotu nebé halo Lalehan no Rai liu housi nia Oan Mane Mesak Jesus Cristo, ita na’in no Makasu-salan nebé Terus, Mate no Moris Hi’as  housi mate sira le’et hodi haraik moris foun mai ita, hamutuk iha Espírito Santo, Maromak Domin na’in, atu ho haraik-an husu dame no hakmatek ba ita rain atu ita hot-hotu bele koko moris hamutuk iha neon ida, laran ida hodi hari unidade no estabilidade social, política no económica iha ita nia rain doben Timor Leste.

Iha biban kmanek ida ne’e, ita houtu neon ida, laran ida iha fiar no domin, hamutuk ho ita nia mahein Dom Virgilio do Carmo da Silva no maluk sarani tomak Diocese Dili nian, hasa’e ita nia hamulak nudar karan loraik nian ba intenção murak nebé temi tiha ona iha leten. Nudar ema kiik no kbiit la’ek, ita nia tulun mai housi Na’i mesak de’it. Na’i mesak de’it mak bele soi ita, atu ita labele monu ba tentação. Ne’e duni, mai ita husu Na’i nia graça no benção liu housi Inan Santa, Sala La’ek, Jesus nia Inan no ita nia Padroeira nia harohan da’et atu Timor nia oan tomak bele hatene moris ho dignidade Maromak oan sira nian.

Ho intenção hirak ne’e, mai ita hahu ita nia adoração hodi reza no hananu.

4. Cântico :

Furak oin sa moris iha domin (HBN 175) ou knananuk seluk ida.

5. Oração :

Na’i Jesus Cristo, Maromak Aman, Maromak moris na’in nia Oan Mane Mesak. Nudar hori uluk Ita Boot lia tun ba Ita nia Apóstolo sira, “DAME HELA HO IMI, HA’U NIA DAME HA’U HARAIK BA IMI”. Keta hamatan ba ami salan, maibé hamatan de’it ba Kreda nia fiar. Haraik mai ami UNIDADE NO PAZ tuir Ita Boot hakarak. Hadook tiha ami husi babeur hot-hotu nebé dada ba sala no hasai ami housi buat aat tomak. Ita Boot be Maromak ho Aman hamutuk ho Espírito Santo.

6. Leitura :

  1. Nai Jesus Cristo nia Evagelho nudar S. João haktuir (Jo. 17, 9-23) – haré iha Liafuan Diak ba imi página 160-161 no página 166) ou
  2. Nai Jesus Cristo nia Evagelho nudar S. João haktuir (Jo. 20, 19-26) – haré iha Liafuan Diak ba imi página 160-161 no página 166) ou
  3. Lia housi Livro Profeta Isaias nian (Is. 9. 1-6) – haré 1a Leitura Missa Natal kalan nian iha missa dominical; ou
  4. Lia housi Livro Profeta Isaias nian (Is. 11, 1-10) – haré leccionário ferial, Terça-feira, 1ª semana Advento nian

 (Lee tiha Evangelho eh Leitura, fo tempo nonok witoan hodi husik Maromak futar Liafuan tama iha neon no laran. Hafoin, Amululik halo reflexão badak ida bolu assembleia nia atenção ba Maromak futar Liafuan nudar aihan nebé fo força no kbiit hodi resiste hasouru tentação atu evita violência iha ita nia situação actual)

7. PRECES : (Bele hananu hanesan halo mesak iha Oração dos fiéis)

  1. Ba Santa Kreda Maromak nia Povo, atu rona tiha Maromak futar liafuan hodi hanoin iha laran hanesan Maria, Jesus nia inan no Kreda nia inan, bele tau liafuan ne’e iha hahalok moris lor-loron nian hodi habelar Liafuan Kmanek ne’e ba maluk sira hotu. Ita harohan
  2. Ba Santo Padre Francisco I, ba ita nia Bispo Dom Virgilio, ba Na’ilulik no Diácono sira, ba religioso sira atu hamutuk iha fiar ida de’it, sira bele sai manu-ain diak nebé haklaken Dame no Domin hodi hari’i unidade no moris hamutuk nudar maun alin iha ita rain. Ita harohan
  3. Ba ita nia ukun na’in sira, atu ho Na’i nia tulun, sira bele hakaas an ho neon no laran hodi halakon tiha desentendimento iha sira leet, hodi hamosu laran metin ba futuro ida nebé promete estabilidade no desenvolvimento, atu nune’e povo Timor  tomak bele moris diak iha hakmatek no liberdade nia laran. Ita harohan
  4. Ba ita nia político sira, atu Maromak haraik roman Espírito Santo nian ba sira hodi fo neon diak no laran diak atu sira hotu hamutuk bele halo política ida nebé tane aas povo Timor tomak nia interesse. Ita harohan
  5. Ba ema laran diak sira hotu nebé buka hakaas-an nudar bele atu hari dame no hametin unidade iha ita rain, atu Maromak haraik ba sira aten brani no neon metin atu labele desanima iha sira nia esforço tomak, maske ladauk hetan resultado ida nebé fo ksolok ba povo tomak. Ita harohan
  6. Ba ita nia maluk sira nebé mate ona, liu-liu sira hotu nebé saran an tomak hodi buka lialós no justiça tan hakarak moris hakmatek nudar povo independente ida nebé iha ninia soberania rasik hodi decide ninia moris iha liberdade no dame laran. Ita harohan

8. Ami Aman ….. (diak liu hananu)

(Reza ka hananu hotu tiha Ami Aman sei taka ho oração tuir mai ne’e)

9. HAMULAK TUIR MAI NE’E HETAN ROMAN HUSI ORAÇÃO AMU PAPA FRANCISCO NIAN :

Na’i Maromak Dame na’in, see tilun mai ami nia harohan!

Dala wa’in tebes mak ami koko iha tinan barak nia laran atu resolve ami nia lian la hasouru malun sira ho ami nia kbiit nune’e mos ho ami nia kilat funu nian; Iha biban wa’in ona mak ami koko hatun malun no hamonu malun hodi la’o iha nakukun no tauk nia laran; ran barak tebes tiha ona mak naksulin iha rai ida ne’e nia leten; moris wa’in ba wa’in mak lakon tiha ona hodi sosa liberdade; esperança barak mak hakoi naleet de’it…. Maibé ami nia esforço sira saugati de’it. Oras ne’e, Na’i, Ita Boot mak hiit-An rasik mai tulun ami ba! Ita Boot rasik mak haraik mai Dame ida ne’e ba, no Ita Boot mak hanourin mai ami kona ba Dame ida ne’e ba! Ita Boot rasik mak sai mata dalan Dame nian mai ami ba. Loke ami nia matan no ami nia fuan no haraik mai ami aten brani atu dehan : “keta halo funu hasouru malun tan ona” basá ho funu buat hotu naksobu, buat hotu rahun no ema lakon kbiit atu moris nudar maun-alin. Hametin iha ami laran aten brani atu realize gesto concreto sira ba harii dame nian. Na’i, Abraão nia Maromak no profeta sira nia Maromak, Maromak Domin nebé halo ami no bolu ami atu moris hamutuk nudar maun-alin, haraik mai ami kbiit atu husi loron ba loron ami bele sai nafatin badaen Dame nian; Haraik mai ami capacidade atu haré ho laran kmaus maun-alin sira hotu nebé ami hasouru iha ami dalan. Halo ami laran nakloke atu rona lian halerik ami nia cidadão sira nian nebé husu ami atu transforma ami nia kilat sira ba instrument dame nian, ami nia tauk sira ba confiança no ami nia laran hirus sira ba perdão. Hamoris nafatin iha ami esperança nia klaak atu bele halo ho perseverança ida nakonu ho paciência dalan ba diálogo no reconciliação, hodi nune’e Dame mak sei manan iha ikus. No halakon tiha housi ema nia fuan liafuan hirak: haketak malu, kunan malu, funu. Na’i, hasai tiha housi ami nia nanal no ami nia liman no hafoun ami nia fuan no ami nia neon, atu liafuan nebé ami koalia ba bebeik mak “MAUN-ALIN” no ami nia lalaok moris nakfilak ba : SHALOM, PAZ, DAME! AMEN

(ikus liu, Amululik dehan jaculatória ida tuir mak ne’e no asembleia repete tuir 3x)

LIURAI FETO DAME NIAN, HAROHAN MAI AMI, HARAIK DAME MAI AMI

10. CÂNTICO FINAL :

Hadomi ho hahalok (HBN 177) ou knananuk seluk ida