shadow
Diocese de Dili > NOTÍCIAS > HOMILIA DO BISPO

SOLENIDADE ASSUNÇÃO SANTA MARIA BA LALEHAN

Ohin ho ksolok boot ita halibur hamutuk iha ne’e ho sentimento rua, primeiro; sentido Agradecimento ba Maromak ne’ebe fó mai ita Nain Feto atu hamahan ita iha ita nia moris. Tan ne’e loron ida ne’e ita mai ho ksolok boot atu agradece ba Maromak ba Inan Lalehan ida ne’e Nia tulun iha ita ida-idak nia moris nu’udar ema pessoal, família, comunidade no sarani ne’ebe pertence ba Paróquia ida ne’e. segundo; ita agradece ba presença Espírito Santo ninian ne’ebe ho Festa Padroeira ninian, iha momento ida mos ba sarani sira atu renova liu-liu ho sira ne’ebe atu simu daudaun Sacramento Crisma. Momento ida atu hateke ba kotuk atu hadia liu tan ita nia domin ho Na’i Maromak.

Ohin Uma Creda hanaran loron ida ne’e Solenidade Assunção Santa Maria ba Lalehan. Convida ita sarani fiar nain sira atu tau neon metin nafatin iha centro fiar sarani ninian. Ida ne’e mak mistério boot Cristo ninia mate, Cristo ninia Ressurreição. Wainhira Maria simu notícia ida ne’ebe dehan katak la previsto, Nia mos la hein atu sai Maromak nia Inan. Maternidade ida ne’ebe empenhativa, Maria buka ema ne’ebe bele rona, Maria buka ema ne’ebe bele comprende Nia moris, Maria buka ema ne’ebe bele comprende ninia situação. Maria sai housi ninia fatin ba buak ema ida bele rona Nia. Maluk ida ne’ebe nia idade bo’ot liu nia. Maria lori nia centimento ida ne’e obriga nia atu hakat lalais ba ninia prima Santa Isabel ninia uma. Isabel sente katak Kosokoan ne’ebe iha nia knotak hakarak los comunica ho nia maluk ida ne’ebe iha Maria nia Knotak. Sira hakarak partilha ksolok, fahe ba malu ksolok Maromak ninian iha sira hanesan Magnificat dehan; Maria wainhira rona nia fiar, nia halo tuir, nia ba no partilha ksolok ne’ebe nia simu, nia la rai de’it, maibe Nia ba fahe. Maria hahí no Maria agradece. Ida ne’e mak hun lolos componente fiar ida ne’ebe ita dehan katak; ‘fiar ida ne’ebe maduro’. Tan ne’e ita Nain Feto bele sai modelo mai ita laos de’it kona ba moris iha rai ne’e, maibe moris ne’ebe atu mai hanesan ita rona iha Segunda Leitura; Iha Cristo ema hotu-hotu hetan moris, maibe ida-idak tuir nia fatin. Uluk nanain Cristo hafoun sira ne’ebe hamutuk ho Nia wainhira Nia mosu mai.

Ita Nain Feto Maria mak Cristo nia Inan. Nia la’os tanba kous Cristo, ida ne’e relacionamento ida ne’ebe único discipular teb-tebes. Maibe uluk nanain tanba fiar nain nia Oan nian no discípulo Evangelho ninian. Ida ne’e mak buat ida ne’ebe ita admira housi ita Nain Feto. Nia mak primeira sai escolante Evangelho-primeira discípula Evangelho Jesus ninian.

Ita fila ba ita nia an; se hanesan ne’e maske Nia halo buat hotu tanba sa buat a’at lao haleu nafatin ita! Maske buat hirak ne’e hotu; hahalok a’at sira continua buras no tama iha mundo ho liu-liu iha ita ida-idak nia moris. Maske Cristo ho Nia vitória halakon buat hirak ne’e. ida ne’e mak ohin rona iha Livro Apocalipse nian mos dehan; Samea dragão bo’ot hanesan ahi ho ulun hitu dikur sanulu, ulsuku hitu iha nia ulun continua kari no kuda terus no mate. Buat ne’ebe laiha sentido ho violência ho sabraut sira ne’ebe ita nafatin lori iha ita nia vida.

Ita nian Feto Maria mak ida ne’ebe lao uluk simu, aceita, atu combate to’o rohan hasoru buat a’at hotu ninia abut. Maria buka atu lori to’o rohan Kosok Oan ne’ebe iha Nia Knotak. Kosok Oan ne’e de’it mak sei manan. Ida ne’e mak convite ida mai ita atu partilha ho Maria nia experiência ne’e ita mos bele disponibiliza tau ita nia an, atu ita mos bele combate hasoru ita nia an rasik, nune’e mos hasoru buat a’at ne’ebe moris haleu ita. Hanesan São Paulo dehan; “Ha’u halo tiha funu didiak to’o rohan wainhira ha’u combate duni buat a’at ne’ebe iha ha’u”. Ne’e duni ita haré ba Maria ninia SIM, ninia hakarak mak buat ida ne’ebe furak liu no kmanek liu hotu. Laiha ida ne’ebe diak liu ona mai ita, ida ne’ebe loke nia fuan ba Maromak, laiha ida ne’ebe di’ak liu ona Maria ne’ebe continua fó Nia an tomak ba realização Maromak nia plano Salvação ninian.

Maluk doben sira, ita hare, contempla, admira iha Nain Feto ninia moris, mai ita ida-idak fila fali ba ita nia an hodi husu; oinsa ita nia relação ho Nain Feto, Nain Feto ida ne’ebe ita mahein ba ita nia Padroeira ita sarani Manufahi ninian, oinsa ita hatán ita nia devoção ba Nain Feto ne’e to’o iha ne’ebe! Ita ida-idak koko haré fila fali ba ita nia an; ha’u nia devoção ne’e burak eh ha’u nia devoção ne’e maran hela. Se ha’u iha devoção ha’u reza duni terço? Ka terço ne’e ha’u rai de’it. Iha família sei iha kalan atu reza terço ka lae? Ita hotu hatene katak família ne’ebe reza hamutuk família ne’e hela hamutuk. Se família la reza hamutuk tan ona, família la la’o hamutuk tan ona ho Uma Creda ida ne’e mos sai momento ne’ebe ita bele dehan; ita nia unidade começa mihis daudaun. Tan ne’e ita hare fila fali ba kotuk katak uluk ema barak kalan-kalan sempre reza terço, maibe agora dau-daun ema dehan reza terço ne’e hanesan lakon tempo hodi halo ema gosta nonton filme, halimar telefone no buat seluk. Maibe wainhira ita hasai Maromak-hasai Nain Feto housi ita nia família, ita mos bele hare katak ita mos hahu hakiak buat seluk iha ita nia uma laran; unidade iha família mihis ba daudaun, domin iha família mihis ba daudaun, respeita malu iha família mihis ba daudaun tanba ita hahu troca Maromak ho buat seluk buat mundo ninian.

Tan ne’e maluk doben sira, paroquiano Paróquia Manufahi ninian, tinan ida ne’e marca tinan 30 resin aniversário Paróquia ninian, fila fali ba sarani ida-idak atu hare fila fali ba ida-idak nia an, ida-idak nia família, se ita hadomi ita nia família, ita hadomi ita nia an, hadomi ita nia família ita koko atu fila fali tem que aten brani fó fatin ba Maromak iha ita nia família. Ita iha 24 horas ba ita nia an, maibe atu fo de’it 15 minutos hodi reza terço ba Maromak ne’e susar teb-tebes. Tan ne’e loron ida ne’e ha’u convida atu sarani sira paroquiano atu fila fali, la dehan katak laiha ona ema ne’ebe la reza terço ona maibe tem que hamanas liu tan, momento ida atu haburas liu tan tanba ita hatene katak iha momento ida ne’e ita moris iha desafio barak hasoru ita nia fiar, hasoru ita nia família, hasoru mos ita nia moris nu’udar sarani tanba ita nia Amu Papa rasik dehan; “violência saida de’it mak ema halo contra fiar Uma Creda ninian ida ne’e mak violência ne’e contra humanidade”. Ne’e duni ita fila fali husu ba Na’i Maromak atu iha loron ida ne’e sai duni momento ida ba ita atu renova ita nia an. Iha festa la to’o de’it ita halibur hamutuk atu festa de’it, tuir missa hotu ona, maibe cadavez ita mai celebra ita nia aniversário mahein ninian opurtunidade ba ita hotu housi kiik to’o bo’ot atu momento ida ba ita atu ho haraikan loke ita nia fuan hanesan Nain Feto, husik Na’i Maromak realiza ninia plano iha ita ida-idak nia fuan no iha ita ida-idak nia família. Ida ne’e mak fó liu tan sentido ba ita nia celebração tinan ida ne’e ninian.

Hamutuk ho ita nia alin sira ne’ebe atu simu daudaun Sacramento Crisma, ohin ita mos haksolok ho sira iha loron importante ida ne’e. iha Sacramento Crisma sei marca ho sinal rua ne’ebe importante. Don Espírito Santo nian tama iha ita atu fó kbiit mai ita nune’e mos bele fahe ho sira seluk. Papa mos dehan; ‘wainhira ita simu diak sira housi Maromak ita labele karak ba ita nia an’. Wainhira ita simu Espírito Santo ita mos tem que brani atu lori no fahe buat diak sira ne’ebe simu ne’e ho ema seluk. Ita keta halo ita nia an hanesan armagem ne’ebe ita reza e simu graça, maibe graça ne’e ita rai de’it ba ita nia an. Maibe hanesan sarani no foinsae Manufahi ninian tem que sai sarani no Juventude ne’e generoso; simu e aprende atu fahe. Wainhira ita simu tem que fó ba sira seluk ida ne’e mak moris sarani ninian. Ita sai instrumento ida Maromak nian.

Sacramento ida ne’e atu completa graça Baptismo ninian. Sacramento Crisma hola parte iha Sacramento sira ne’ebe ita hanaran Sacramento Iniciação. Atu hahu sai sarani ita simu Baptismo, hafoin Sacramento Confessa, tuir fali Eucaristia no mai tan Sacramento Crisma. Ne’e duni, Sacramento Crisma ne’e hanesan percurçso ida hodi ita bele loke ita nia an ba Maromak nia graça Espírito santo ninian. Espírito Santo ne’e nia papel iha ha’u ni moris atu hametin liu tan ha’u nia fiar iha Maromak, haburas liu tan ha’u nia relação ho Maromak, ho Cristo, no hariku liu tan iha ha’u diak oi-oin.

Ita precisa Espírito matenek ninian. Ita nia Amu Papa wainhira iha nia visita ida nia ko’alia ba foinsae sira nia dehan; “ita precisa matenek ida ne’ebe liberta foinsae atu lamonu ba iha promessa falso sira ksolok ninian”. Ohin loron promessa falso barak, dala barak mos mosu profeta falso barak mos, lori promessa falso oi-oin atu dada sarani, dada foinsae no desvia sarani, desvia foinsae sira housi ita nia fiar, housi ita nia cultura nu’udar timoroan, nu’udar sarani. Mai ita sarani Espírito Santo mak mestre boot atu hakbiit ita atu ho matenek Lalehan ninian hatene halo distinção ho buat ne’ebe lós no buat ne’ebe falso.

Ohin loron mundo oferece buat barak ne’ebe monu ba ita nia fuan, monu ba ita nia matan, maibe ne’e laos buat hotu ne’ebe diak no furak iha Maromak nia Futar oin. Matenek ita atu labele monu ba tentação oi-oin ne’ebe dala barak halo ita lakon respeita no hadomi ita nia isin nu’udar templo Maromak nian. Respeita ba ema seluk nia isin mos nu’udar templo Maromak ninian. Se ita rasik la respeita ita nia isin oinsa ita bele respeita ema seluk ninian. Sacramento Crisma fanun ita atu hare fila fali buat hirak ne’e; Espírito Santo halo santo ita nia isin, hatene hadomi no respeita, la husik ha’u nia isin sai hanesan fatin ida atu halo experiência hodi koko buat oi-oin hanesan droga ka buat hotu ne’ebe ema halo campanha tau iha média ita hakarak koko hotu. Dala barak ita respeita tiha ita nia isin nu’udar fatin santo, maibe usa hanesan ha’u nia propriadade, maibe ita nia isin ne’e Na’i Maromak fó mai ita, atu liu housi isin ne’e ita bele hadomi, bele respeita no hahi Na’i Maromak.

Ohin loron tanba osan halo foinsae balu fácil monu ba droga, monu ba iha prostituição, ranso livre no seluk-seluk tan… ikus ne’e ita hare oinsa comissão housi HIV SIDA halo campanha makas kona ba moras ida ne’ebe ita rona bebeik, moras ida ne’ebe da’et makas iha ita nia sociedade, iha jovem 100 resin ne’ebe sai vítima ona, iha jovem balu mos hetan moras mental tanba consequência sira droga ninian. Espírito matenek ninian mak tem que tulun ita atu identifica no rezeita promessa sira falso ninian.

Ita moris iha cultura ida ne’ebe hakiak promessa falso barak no susar atu ses. Hakarak ka lakohi ita iha buat hirak ne’e nia le’et. Cultura ida ne’ebe nakonu iha ita nia fuan ho buat ne’ebe nakukun no moruk ninian tanba ita nia egoismo la importa kona ba ema seluk. Tanba ne’e Espírito matenek ida ne’e ita hotu precisa atu Nia bele hanourin ita hatene simu no moris hakmatek ho ema seluk.

Tinan 100 Fiar Sarani Kuda Iha Rai Tutuluro

Ohin ita halibur hamutuk iha ne’e ho sentimento ida atu fó obrigado ba Maromak, agradece ba Maromak tanba tinan 100 fiar sarani kuda iha rai Tutuluro. Certamente ita mai ho sentimento ida atu hare fila fali ba kotuk diak hotu ne’ebe ita hetan liu housi ita nia Missionário sira ne’ebe durante tinan 100 nia laran tau fini no fini ne’e la mate continua hatutan, cuida to’o fiar sarani ohin loron buras nafatin particularmente iha rai Tutuluro ninian. Hare fila fali ba kotuk, buat ne’ebe liu ona bele sai hanesan lição ida atu ita bele aprende hodi bele hadiak liu tan, hametin liu tan, haklean no haforça liu tan ita nia fiar sarani iha rai ida ne’e liu-liu iha rai Tutuluro ne’ebe ohin celebra tinan 100 existência fiar sarani ninian. Hare ba kotuk ita mos hanoin atu mehi ba oin, oinsa mak ita bele halo atu nune’e bele hadia liu tan ita nia rai no Uma Creda.

Tinan 100 liu ne’e, ema lubuk ida ne’ebe sai hanesan ponte housi geração ida ba geração ida seluk. Ita ne’ebe iha ne’e mos hola parte hodi construi ponte ida ne’e, tanba ita simu ona housi ita nia beiala sira lisan lubuk ida nu’udar sarani no timoroan nian. Ita mos tem que garante katak tinan 100 mai, buat ne’ebe ita simu ne’e tem que moris nafatin; cultura, tradição, fiar oinsa ita mos bele tatoli. Tan ne’e responsabilidade ida iha ita hotu nia kabás.

Ohin ita celebra tinan 100 ninian ita marca ho evento ida especial liu tan liu-liu ho presença Espírito Santo nian. Durante tinan 100 nian laran Amu ida mai no Amu ida ba, maibe Maromak nia liafuan ne’e hanesan, Maromak nia Liafuan ne’e la muda. Tanba Maromak ne’e eterno; Ida ne’ebe uluk, Agora no Nafatin. Ita mos koko atu adapta an tuir Maromak nia hakarak, tuir Maromak nia doutrina. Dala barak ema balun dehan; tanba sá mundo ne’e muda Maromak nia liafuan ne’e la muda? Jesus Cristo halo An ba Mane dala ida de’it. Tinan 2000 liu ba, Nia liafuan ne’ebe Nia haklaken to’o agora nafatin. No buat ne’ebe hafoun nafatin Maromak nia Liafuan mak Espírito Santo. Espírito Santo ne’e mak ohin ita rona iha Evangelho housi Primeira Leitura mai to’o Evangelho, Espírito Santo ne’e mak sai hanesan Mestre bo’ot ida, Espírito Santo ne’e mak acompanha, Espírito Santo ne’e mak hanourin, Espírito Santo ne’e mak loke ema nia fuan atu bele compreende maske tempo la hanesan, oinsa Maromak nia Liafuan ne’e ita bele adapta no aplica tuir ita nia situação, maibe Maromak nia Liafuan la muda tuir ita nia gosto no hakarak.

Espírito ida ne’e continua ko’alia ba ita, dala barak ita rona no dala barak mos ita la rona. Tan ne’e mak iha tinan 100 nia laran iha diak no iha susar. Maibe sarani sira nia fiar metin nafatin tanba serviço Espírito Santo ninian. Espírito Santo ida ne’e mak hanourin ita atu comfia nafatin Maromak no fiar metin iha momento hotu-hotu. Tan ne’e, loron ida ne’e ita halibur hamutuk hodi hanoin kona ba tinan 100 presença fiar sarani iha Tutuluro marca ho história ida tan Jovem 200 resin atu simu Sacramento Crisma. Ne’e hatudu katak Uma Creda hafoun an nafatin.

Sacramento ne’e dehan; lalaok ida Uma Creda ninian atu ita simu Na’i Maromak nia graça. Tanba ne’e odamatan ba graça Maromak nian mak Sacramento de’it. Wainhira ita celebra tinan 100 presença Na’i Maromak nian iha rai ida ne’e, convida atu sarani sira hanoin fila fali; nu’udar sarani ne’e ita tem que hakasan atu aproveita loke ita nia odamatan ba graça Na’i Maromak ninian. Sacramento Crisma hola parte iha Sacramento sira ne’ebe ita hanaran Sacramento Iniciação. Atu hahu sai sarani ita simu Baptismo, hafoin Sacramento Confessa, tuir fali Eucaristia no mai tan Sacramento Crisma. Ne’e duni Sacramento Crisma ne’e hanesan percurçso ida hodi ita bele loke ita nia an ba Maromak nia graça Espírito santo ninian. Espírito Santo ne’e nia papel iha ha’u ni moris atu hametin liu tan ha’u nia fiar iha Maromak, haburas liu tan ha’u nia relação ho Maromak, ho Cristo, no hariku liu tan iha ha’u diak oi-oin.

Atu simu Sacramento Crisma mos iha critéria ida; ema ne’ebe atu simu Sacramento Crisma katak ema ne’ebe iha ona maturidade. Boot laos de’it iha idade no isin mak boot, maibe ema ne’ebe iha capacidade hatene responsabiliza ba ninia hahalok, ba ninia liafuan, ba ninia decisão ne’ebe nia halo. Ho Crisma ne’e atu hatudu katak Espírito Santo nia papel iha imi nia moris ne’e atu conciênte ha’u iha capacidade atu bele responsabiliza ba ha’u nia an rasik nu’udar jovem ida. wainhira Espírito Santo ne’e hela iha ita hanourin ita atu hakbiit atu ko’alia iha lian oi-oin hanesan ita rona iha Primeira Leitura; wainhira Espírito Santo ne’e tun ba Apóstolo sira ema ne’ebe rona sira bele rona iha lian oi-oin. Maibe lian ida ne’ebe ohin Espírito Santo hakarak hanourin mai ita mak Lian Perdão ninian, lian hadomi malu ninian, lian lialos ninian.

Ohin ita hanoin 100 anos presença Espírito santo nian iha Uma Creda, convida ita atu hare fila fali ita nia moris nu’udar sarani. Loke ita nia fuan no laran ba Maromak. Missão Antigo hanesan Alas mai to’o iha Tutuluro ne’e desde uluk quando kalan ita lao ba iha família sira ita hare sira reza terço. Apa-ama no avo sira halibur oan sira reza terço. Maibe agora ne’e tanba iha ona buat barak, ohin loron ema troca terço ho; foinsae no katuas ferik sira troca terço ho facebook no Watsapp. Tanba ne’e uluk terço maibe agora troca ho GMN, ita troca ho TVTL no buat seluk tan. Uluk iha loronida nia laran ita fácil atu fo netik 10-15 minutos atu reza terço, família halibur hamutuk atu bele reza terço, maibe agora tempo ba terço nian laiha ona tanba hanoin fali katak terço ne’e halo ema matan dukur. Tanba ne’e sarani barak fó prioridade liu tiha ba nonton TV, conta história, hemu tua, Joga carta, kuru-kuru no buat seluk. Maibe quando ita ida-idak hare ba ita nia an wainira ita hasai terço housi ita nia família ita hare katak família mos crise ba daudaun, valor família hahu mihis ba daudaun. Ita hasai Maromak housi ita nia família ita hahu hakiak diabo iha ita nia família laran. Dala barak ita rona fidelidade kabenain nian ita hare começa mihis ba daudaun, respeita ba malu entre inan-aman ho oan sira começa mihis ba dau-daun tanba ita tau ses Maromak housi ita nia família. Uluk domingo ema ba missa, maibe agora ema dehan domingo ne’e tempo laiha ba missa diak liu ba fila liman. ita dala barak ita preucupa liu ba buat ne’ebe isin ninian, preucupa liu ba buat ne’ebe rai ne’e ninian, maibe haluha tiha katak ita nia moris ne’e temporário. Tan ne’e, Espírito Santo ne’ebe ohin ita husu iha missa ida ne’e sai momento ida atu renova ita. Renovação ne’e tem que hahu housi ita ida-idak hodi husu ba Na’i Maromak atu ita moris hanesan ema matenek, hodi hatene katak Maromak mak Na’i ba buat hotu-hotu. Ita nia moris ne’e temporário. hun ba buat hotu mak Maromak. tan ne’e ita precisa comfia iha Maromak. renovação ne’e mos tem que hahu housi ita nia família laran tanba família mak Uma Creda Domêstica. Tanba ne’e família forte Uma Creda no nação forte basá; iha família laran mak ema hadomi malu, respeita malu. Tan ne’e iha loron ida ne’e ita celebra tinan 100 ba sarani iha Tutuluro ha’u hakarak husik hela mensagem rua ne’e; primeiro nudar convite ida atu bele halo renovação. Ita hare ba kotuk ita nia beiala sira husik hela rikusoyn (tesouro) lubuk ida ona. Tanba ne’e ita hirak ne’ebe iha ne’e tem que hanoin ba oin hodi housi tutan ba geração sira ne’ebe tuir mai. Compara ita nia an hanesan ponte. Ita hakarak atu Manufahi ne’e sai makas no forte liu tan depende ba ita sira agora ne’e. Se ita agora mak lakohi fila fali hodi hanoin ita nia hun no abut mak ne’ebe, ita koko atu simu buat hotu housi liur halo ita nia cultura ne’e sai mistisso hotu ikus mai ita nia identidade sei lakon. Segundo nian ita husu Maromak nia graça tanba ita halo buat ne’ebe ita bele. Maibe ida ne’ebe bele garante continuidade ne’e mak Na’i Maromak. maibe precisa de’it buat ida housi ita ‘vontade’; aprende atu terus, aprende atu halo sacrifício, aprende atu lori ita nia cruz iha moris lor-loron nian.

RECONCILIAÇÃO MAK DALAN IDA ATU KURA KANEK

Ita halibur hamutuk iha ne’e liu-liu iha missa lorokraik ne’e ninian ho sentimento ida agradecimento nian. Uluk nanain agradece ba Maromak liu housi Nia Oan Jesus Cristo rasik ne’ebe iha Cruz hanourin ita atu perdua. Ohin mos liu housi Leitura sira hatudu oinsa Na’i Maromak continua preucupa ho ita, Na’i Maromak la baruk, la kole atu hanourin ita. Jesus lao hodi haklaken Maromak nia reino Perdão, reino lialos, reino paz nian.

Maromak hadomi tebes ita no saran Nia Oan Mane mesak mai ita. Jesus la resiste ba ema a’at ne’ebe halo hasouru Nia. Nia husik sira kaer Nia, baku Nia, permite mos sira tau iha Nia ulun Coroa ida no ikus mai hedi Nia iha Cruz. Santa Creda haklaken ba mundo tomak domin ida ne’ebe possível ba sarani sira, iha ne’e de’it mak Espírito Cristo ninian presente iha ita nia le’et.

Maluk doben sira realização encontro ida ne’e ema lubuk ida nian ne’ebe ita tem que reconhece duni, ita apressia, ita louva tanba sira ne’e mak Na’i Maromak usa sai hanesan instrumento ida paz no reconciliação nian. Acontecimento ida ne’e confirma dala ida tan povo Ermera, sarani Ermera ninia maturidade no ninia fiar.

Cristo nia terus, mate no morris hias mak sai razão fundamental mai ita iha sorumutu lorokraik ida ne’e. Iha Cruz Cristo nian mak ita hetan sentido ida ne’ebe boot, klean kona ba reconciliação. Se la iha Cruz ita sei la hetan no la conprende mistério boot perdão ninian. Depois de 2018 anos missão Jesus Cristo nian continua lori sabor ida ne’e ba mundo, ba humanidade tomak liu housi Nia saseluk sira, reconciliação, Perdão no paz.

Papa Francisco wainhira sai Papa fofoun iha tinan 2013 iha entrevista ida ho jornal ida naran Civita Católica, Amu Papa exclaresse ba sira kona ba nia visão ba Santa Creda. Tan ne’e Amu Papa dehan; “vejo com clareza que aquilo que Igreja mais precisa hoje é a capacidade de curar as feridas e de aquecer o coração os fieis”. Claro los katak Uma Creda ohin precisa los mak “capacidade atu cura kanek sira no hamanas sarani sira nia fuan”.

Iha loron 11 fulan Abril ninian molok tama ba Semana Santa, gesto ida ne’ebe admira Papa Sua Santidade maske ho idade aumenta ba bebeik, maibe nia hakru’uk ba rai hodi rei Presidente no vice Presidente Sudão do Sul ninia ain. Ne’e hotu tanba  Nação ida ne’ebe sai tiha hanesan campo de batalha ida iha ne’ebe husik hela kanek ida ne’ebe nakloke iha rai ida África nebá, Ran fakar demais ona ne’ebe precisa duni urgentemente atu kura. Apelo Amu Papa ninian ba naiulun sira Sudão do Sul ninian.

Maluk doben sira, rein ain karik laiha tan ona gesto ida ne’ebe mais humilde. Gesto Bíblicos ne’ebe lori mai ita mak fase ain. Salanain ida iha Bíblia ita hatene katak ho ninia mataben iha Jesus nia Ain atu hamos hodi haraikan. Profeta Isaias wainhira halerik nia dehan; “Que formosos são sobre os montes os pés de mensageiros que anúncia a paz”.

Maluk doben sira, ha’u hare iha ita boot sira nia programa dehan Cultura Kesi ain. Ha’u hanoin cerimónia ida ne’e mos marca ho gesto particular ida katak gesto haraik an ninian. Kesi ain hamutuk tanba dala barak interesse partido ita foti liman hasouru malu, foti kroat hasouru malu, sobu ita nia relação, ita nia amizade no seluk-seluk tan. Wainihra ita buka malu kesi ain hamutuk sinal humildade ninian, sinal haraikan, tau ita nia interesse ba kotuk, hanoin ne’ebe diak kona ba povo ida ne’e nian, rai ida ne’e nian.

Buat ne’ebe liu ona sai lição ida ba geração foun tanba circunstância ida mak hakiak tiha ona cultura violência ninian no ohin loron iha circunstância foun mai ita atu hanourin ita nia oan sira geração foun nian, cultura foun, cultura perdão, cultura reconciliação no cultura paz ninian. Ne’e duni iha ambiente no circunstância ida mak buat sira ne’e mosu.

Ohin ita tam iha circunstância foun, ita brani atu hare ba kotuk nune’e ita bele hadia hodi hakat ba oin. Reconciliação laos halo dala ida hotu ona no reconciliação ne’e processo ida mos. Ohin halo reconciliação laos certamente hotu ona, se wainhira ita sei moris, ita nia fuan sei tuku ran sei suli reconciliação tem que continua nafatin nunca se bele para tanba ida ne’e hola parte iha natureza ita ema ninian ne’ebe obriga duni ita, tanba reconciliação mak dalan ida atu kura kanek ne’ebe hahalok sira uluk nian.

Dalaruma ita husu tanba sa ita tem que halo reconciliação? No reconciliação ne’e vale apena ita halo reconciliação ida, vale apena ita hari fila fali buat ne’ebe rahun tiha ona? Ha’u hakarak kaer de’it passágem Bíblia nian housi Livro Génesis. Ita hotu hatene didiak história Adão ho Eva ninian sira iha oan nain rua; Kain ho Abel. Sira rua ema agricultor hotu. Maibe wainhira Kain mai hasae nia sacrifício ba Maromak nia lori mak buat hirak ne’ebe a’at nian atu hasae ba Maromak. então nia la fó ho laran. Maibe Abel fali atu hasae sacrifício ba Maromak nia buka animal ida ne’ebe diak no bokur atu nia bele oferece ba Maromak. Maromak hare ba nia laran diak ne’ebe nia hasae ba Maromak maka Maromak simu nia sacrifício. Kain hare katak Maromak laran monu ba Abel Kain laran moras, Kain la hakmatek, Kain ódio, Kain lakohi atu hare tan Abel, então Kain buka halakon tiha Abel nia vida. Nia halakon tiha Abel nia vida nia sente katak buat hotu hotu ona Maromak la hare, tan ne’e nia halai ses housi realidade, maibe wainhira nia halai nia conciência la hakmatek lian ida continua halai tuir Kain dehan; Kain ó iha ne’e? ó nia alin nia ran ne’ebe fakar iha rai continua hakilar tuir ó no ó sei la hakmatek. Hanoin kona ba ida ne’e los duni dala barak ita hanoin violência oi-oin, dala barak ita hanoin buat barak ne’ebe acontece iha ita nia rain, iha ita nia suco dala ruma halo ita mos bele reflecte klean.

Dalan atu hetan ita nia independéncia ema barak mak participa iha luta ba ita nia independéncia. Luta ba dalan ida ne’e ema barak mos mak nia ran fakar ba iha fatin ida ne’e. tan ida ne’e mak ha’u hanoin processo reconciliação ne’e hanesan dalan ida atu bolu no fo hanoin ba ema hotu ne’ebe dalaruma ita haluha tiha ona. Wainhira nia sidauk hetan fatin diak ida nia ran sei continua hakilar, nia ran sei continua halerik ba ita. Ran hirak ne’e mak dala barak halo ita la hakmatek, ran hirak ne’e mak dala barak preucupa nafatin ita ne’ebe moris, ita neon la hakmatek, atu nune’e ita bele hanoin ne’ebe diak hodi buka diak liu tan ba rai ida ne’e no povo ida ne’e. Tan ne’e ba ha’u pessoalmente reconciliação ne’e ita precisa nafatin. Passo ida ne’ebe hahu certamente sidauk bele fo satisfação ba ema hotu, maibe pelo menus ita hahu passo ida atu dehan katak ita reconhece buat ne’ebe ita halo, ita brania hakarak hakat ba oin. Ita lakohi atu husik todan ne’e ba iha geração foun sira, maibe ita hakarak atu husik hela cultura foun ida. ita nia Amu Papa repete bebeik nia liafuan ba iha naiulun sira nação ninian; “hakasan atu hanourin ba imi nia oan no imi nia beioan sira cultura paz, cultura domin, cultura reconciliação ninian”. Husu ba iha geração foun sira mai ita hare ita nia aman, tiun no avo sira nia exemplo; sira halo kanek sira brani mos atu hadia. Atu nune’e sira hakarak Ermera oan atu lao iha futuro ne’ebe nakloke ba ema hotu-hotu. Tan ida ne’e ita mai ho sentimento ida ne’e hodi agradece ba Maromak ba opurtunidade ida ne’e. ita ne’e Maromak nia Espírito mak serviço housi ema oi-oin, inspira ema oi-oin, fo hanoin ba malu, ita simu malu atu nue’e bele hakbesik ba malu tanba ita hotu iha mehi ida de’it hakarak atu desemvolve rai doben ida ne’e no povo doben ida ne’e. wainhira laiha paz, laiha perdão, wainriha dalan klo’ot ba foinsae sira hodi hafuhu malu nafatin ne’e katak buat balun lao sidauk los. Tan ne’e ita reza atu buat hotu ne’ebe ita boot sira hahu horseik iha mota no ohin iha monumento nia oin mai ita hametin liu tan ho Eucaristia atu ita nia esforço hotu ne’ebe hahu tiha ona la remata ohin, maibe continua no ohin sai início paz no reconciliação tem que continua hahu housi Município no tun to’o família ida-idak. Housi ne’e mak ita bele  dehan paz ne’e buras duni iha ita ida-idak nia fuan no buras iha ita nia rian.

“Maromak de’it Ha’u nia Maksoyn”

Uluk nanain ha’u nia parabens ba Irmã nain 3; Ir. Aida Belita Moises, FMA, Ir. Domingas Santos de Deus, FMA no Ermelinda Almeida, FMA loron ida iha ne’ebe sira decide tiha ona atu saran sira nia an tomak ba Maromak liu housi Profissão Perpétua. Buat ne’ebe motiva no lori sira nain 3 atu saran sira nia an sem reserva ba Maromak laos buat seluk maibe liafuan murak ne’ebe ita rona iha Salmo (61) nian ne’ebe dehan; “Ha’u Klamar Hetan Ksolok iha de’it Maromak, basá Nia ha’u Maksoyn, Nia ha’u kbi’it ha’u subar fatin, ha’u la tauk”. Housi ida ne’e mak sira nain 3 fihir mos sai hanesan sira nia motto “Maromak de’it Ha’u nia maksoyn”.

Iha Evangelho São João ninian dehan; “Nu’udar Aman hadomi Ha’u, nune’e mos Ha’u hadomi imi”. Ida ne’e ita dehan katak encontro domin ninian. Hanesan Jesus ne’ebe hela iha Aman nia domin, basá Jesus hela nafatin ho nia Aman sai ida de’it no Nia halo tuir nafatin nia Aman nia hakarak, nune’e mos sira ne’ebe hakarak tuir Nia tem que aprende housi Nia katak hela nafatin ho Nia halo tuir nia ukunfuan sira. Ida ne’ebe hadomi Ha’u tem que halo tuir Ha’u nia ukunfuan no Ha’u Aman iha Lalehan sei hadomi nia. Ida ne’e mak Ha’u nia ukunfuan; “Imi hadomi malu hanesan Ha’u hadomi imi”. Los katak iha Ukunfuan oi-oin, maibe hirak ne’e hotu mesak expressão ida de’it, ida ne’ebe Jesus rasik halo iha prática perfeitamente “O Amor ao Mundo”. Ida dalan oi-oin atu hatudu wainhira koalia kona ba ne’e laos liafuan mamuk ne’ebe dala barak fácil atu repete, ida ne’e tem que afecta buat hotu ne’ebe ita halo iha ita nia moris.

Buat hotu ne’ebe ita halo tem que hetan inspiração no motiva nafatin housi O Amor ao mundo. Basá São João mos dehan; “Aquele que não ama seu irmão a quem ve não pode amar a Deus quem não ve”.  Oinsa mak ó dehan ó hadomi Maromak ne’ebe concreto iha ó nia moris lor-loron, ó labele paciência ho ó nia maluk ne’ebe lor-loron moris ho ó, hela ho ó! São Paulo mos dehan; “Ida ne’ebe hadomi nia maluk cumpre lolos ona ukunfuan”. Nune’e mos lei hotu bele habadak iha liafuan ida de’it; Ama o teu próximo com a si mesmo. Jesus la hanourin de’it iha ambão, maibe Nia mos hatudu iha prática ho exemplo símples, exemplo ne’ebe tangível katak ida ne’ebe hare, rona de’it, maibe Nia hatudu ho gesto. Ida ne’e mak iha kalan ikus Nia fase hela nia escolante sira nia ain Nia dehan; “Ha’u fo ba imi Ukunfuan foun ida atu imi hadomi malu hanesan Ha’u hadomi imi”. Ne’e duni Maromak nia Ukunfuan ita labele trata fali hanesan Lei ida ne’ebe difícil, maibe ida ne’e orientação ida iha ne’ebe nia implicação concreta, ne’ebe ser determinado bem exige atenção ne’ebe constante ba ita nia maun-alin sira nia necessidade. São João la termina iha ne’e maibe nia dehan; “Ha’u la bolu tan imi atan, maibe belun”. Basá atan tanba emvolve iha projeto ida patrão ninian, nia executa ordem, tarrefa ida ne’ebe tau iha nia liman. Ao contrário Jesus ohin dehan; “Ha’u bolu imi belun” mak ida ne’ebe Ha’u comfia, mak ida ne’ebe cultiva comunhão da vida. Belun ida contente wainhira nia oferece nia tulun ba ida ne’ebe nia hadomi. Nia la subar buat ida, nia mos la husu kolen ba serviço ne’ebe nia halo. Jesus bolu nia escolante sira belun tanba Nia revela tiha ona ba sira Aman nia plano. No Nia bolu sira atu colabora ho Nia atu realiza Maromak nia projeto.

Maluk doben sira, liafuan furak hirak ne’e hotu ohin sai realidade ida mai ita, foinsae nain 3 ne’ebe rona no hatan ba Na’i Maromak nia plano. Tan ne’e mak ohin tempo ida ne’ebe especial ba sira atu saran sira nia an. Livremente sira rasik hakarak tama klean no descobre liu tan hanesan iha sira nia motto dehan; “Maromak de’it Ha’u nia Maksoyn”, atu nune’e sira bele tama liu tan ba sira nia proximidade, intimidade, comunhão ida ho ida ne’ebe bolu. Ida ne’e mak ohin ita sasin iha Irmã nain 3; Ir. Aida Belita Moises, Ir. Domingas Santos de Deus no Ermelinda Almeida sira nia testamunho ne’ebe sira halo iha ita hotu nia oin. Maske ohin loron ho mundo ne’ebe ita moris, buat ne’ebe haleu ita dalabarak hare liu ba buat ne’ebe bele kaer, bele koko, hare liu ba forma família, hare liu ba serviço ne’ebe diak, hare liu ba osan, hare liu ba lia mate no lia moris ninian, maske buat hotu ne’e liu, Irmã nain 3 ohin hakarak atu dehan mai ita laos de’it poder, laos de’it osan, laos de’it forma família, maibe iha mos buat ne’ebe as liu iha moris mak CRISTO. Ida ne’e mak sira descobre iha sira nia vida ohin marca ho Profissão Religiosa sai hanesan sinal de encontro domin ninian entre ida ne’ebe bolu no ida ne’ebe hatan.

Hanesan Profissão Religiosa sai sinal ida ita bele dehan katak Tangível e sinal ida mos Credível kona ba Maromak nia domin iha ita nia vida. Tangível katak ema hotu hare, maibe lato’o de’it iha sinal tangível ninian, sinal ne’ebe visível, maibe ohin loron mundo precisa sinal credível. Amo Papa quando ko’alia ba religioso no religiosa sira nia repete nafatin liafuan ida ne’e atu oinsa religiosa sira buka no sai sinal credível liu housi ita nia moris iha comunidade, iha sociedade, ita nia vida bele transmite, ita nia vida bele fo ba comunidade mensagem ida ne’e; mensagem domin ninian.

Tan ne’e vocação religiosa tem que sai missão religiosa Jesus Ressucitado. Dalabarak ita dehan tanba sa Madre barak ona maibe ema hakarak sai madre nafatin! Maibe sai religioso ho finalidade uluk laos atu halo buat barak, maibe ninia missão primeiro lugar atu fo sasin kona ba CRISTO ida ne’ebe kiak, CRISTO ida ne’ebe obidiente, CRISTO ida ne’ebe laran mós. Sarani hotu moris ho ida ne’e, maibe Religioso no religiosa sira tem que professional. Tan ne’e vida comunitária ne’e sira nia profissão duni. Han hemu religiosa ida nian mak reza, atu ko’alia, atu moris no horik iha Na’i Maromak presença. Ida ne’e mak mundo ida ohin loron precisa pois mak ita nia apostulado sira. Tan ne’e ita bolu profissão é o início da uma vida nova. Katak saran an tomak ba vida ida serviço no oração. Buat rua ne’e mak ita nia missão. Religiosa ida nia profissão mak atu promove união ida ho Maromak hodi ba servi.

Então Irmã doben nain 3 Ir. Aida Belita Moises, Ir. Domingas Santos de Deus no Ermelinda Almeida, encontro ida ne’e lori imi nain 3 atu descobre liu tan ksolok ida ne’ebe boot liu. ha’u hein katak ksolok ida ne’e imi hakasan an nafatin atu tama loron ba loron. Sira la hili moris ida kaben ninian, maibe hakarak moris de’it ba Maromak. Ne’e duni Irmã doben sira dalaruma karik bele kolen hodi provoca tristeza ida Amu dehan Pausa ituan buka Madre sira ne’ebe experiência no Padre sira ne’ebe imi sente tulun imi hodi sai hanesan diretora no diretor Espiritual hodi tulun ita hodi buka Na’i Maromak nia vontade. Ne’e duni ba imi nain 3 ne’ebe hakarak tuir Jesus besik liu tan buka halo imi nia moris ne’e, buka fundamenta imi nia domin nafatin ho Maromak atu nune’e imi nia gelo apostólico ne’e makas nafatin. Imi hakarak moris nu’udar religiosa ida ne’ebe diak noa fiel nafatin precisa fo atenção ba buat hirak ne’e; hakbesik ba Tabernáculo, ko’alia no loke ó nia fuan iha Tabernáculo oin ba ida ne’ebe bolu ó. Ha’u bele halo buat hotu basá ha’u hetan rahun diak iha Maromak futar oin. Wainhira ha’u hakbesik ba Jesus ha’u mos fácil atu hakbesik ba ema, hakbesik ba foinsae sira basá ohin loron foinsae barak precisa no buka ita nia tulun. Ser Salesiano no Salesiana ita nia vocação atu tulun foinsae sira no hakbesik ba foinsae sira. hein katak ho aumenta número religioso no religiosa sira bele mos continua sai sinal credível ida ne’e liu housi imi nia moris hodi hakbesik ba foinsae sira ne’ebe barak lao sal dalan. Ida ne’e mak atu hafutar liu tan Evangelho dehan; “ida ne’e mak ha’u nia ukunfuan imi hadomi malu hanesan Ha’u hadomi imi”. Ida ne’e mak ita bele dehan dalan ba santidade nian.

Santa Creda Convida Sarani Ida-Idak fo Inportância Ba Vocação Missionária

Ohin Diocese Dili fihir loron ida ne’e atu loke Jubileu Extraordinário Missão ninian. Hanesan ohin ita rona tiha ona Nota Pastoral Conferência Episcopal Timorense ninian, dala ida tan Santo Padre convida sarani atu aproveita momento especial ida ne’e atu mana graça especial ne’e liu housi Indulgência Plenária iha ne’ebe Diocese Dili foti ona fatin 3 hanesan; Catedral, Santuário Fatubessi no Santuário Ramelau hodi manan Indulgência plenária. Ne’e duni, momento diak ida mos convida sarani hotu-hotu hakasan atu descobre fila fali beleza kna’ar missionário ninian ne’ebe sarani ida-idak simu ona iha loron Baptismo ninian. No se ita nia moris la consegue consiente ho moris missionário ida ne’e, momento ida ne’e convida ita atu cuida vocação missionário ida ne’e. Santa Creda iha opurtunidade Jubileu Missionário nian ne’e convida ita ida-idak atu hola conciência, fo mos inportância ba vocação Missionária sarani ida-idak ninian. Ida ne’e laos opção maibe vocação ida ita sarani nian duni. Hanesan liafuan furak Santa Teresa nian dehan; “Maromak la exige ita atu sucesso kedas, maibe Nia hakarak ita atu koko, Nia hakarak ita atu hakasan nafatin nunca para”. Ita dalaruma sura tan ita la persevera iha buat ida ita desanima.  Maibe Santa boot ida ne’e dehan laos ó konta mak ó nia sucesso, maibe konta mak wainhira ó hakasan nafatin. Mai ita aproveita basá buat ne’ebe horseik ne’e liu tiha ona, buat ne’ebe aban ninian mos sidauk to’o. Ita iha de’it buat ne’ebe ohin ninian. Ne’e duni mai ita missão sarani ida nian mak ohin ita rona Baptizados e Enviados, katak sarani ida simu kna’ar atu ba no haklaken kona ba Jesus ne’ebe terus, mate no Moris Hias. Ida ne’e mak sasin fiar sarani ninian.

Domingo ida ne’e Na’i Maromak convida ita atu reflete klean liu tan kona ba fiar, kona ba esperança. Hanesan hatudu iha Leitura sira ohin ninian ho hanoin ida ne’ebe mosu nafatin katak fiar atitude ida mental nian ne’ebe hametin ho reflexão nune’e mos Oração ne’ebe klean. Ne’e los duni, maibe precisa tau iha neon katak fiar tama iha ita nia moris lor-loron no fiar sai buras iha ita nia moris liu housi experiência ksolok ninian ne’ebe ita hetan liu housi realização espectativa sira nune’e mos novidade sira lor-loron nian ne’ebe Na’i Maromak continua hatudu mai ita iha ita nia moris.

Fiar laos rikusoyn ida ne’ebe ita simu iha loron baptismo ninian hafoin ita hatam tiha iha armagem nune’e atu labele estraga, maibe fiar atu tau iha prática iha moris mak fiar ne’e bele buras, ne’e duni sarani sira tem que pronto atu servi. Hanesan São Tiago iha nia carta ne’ebe dehan; “Fiar Ne’ebe laiha prática, fiar ne’ebe lahatudu katak Fiar ne’e maten”.

Leitura sira ne’ebe foin ita rona ba ne’e fornece mai ita dimensão caminhada nian hanesan; dimensão fundamental moris ita ema ninian. Housi sentido ida ne’e, fiar hanesan atitude ida ne’ebe nakloke ba Maromak nia intervenção mak bele transforma ba ita nia Esperança. Fiar sarani laos hanesan ema ne’ebe matan delek, ita lahatene fiar iha saida! tanba sa mak ita fiar! Maibe lae, ita sarani ita hatene fiar iha saida nune’e mos ita hein los saida. ita hein libertação total ida ne’ebe mai houis ita Nain Jesus Cristo rasik.

Sai Missionário fiar ninian precisa hakiak atitude ruma ne’ebe liturgia ohin ninian haktuir mai ita. Atu sai missionário fiar ninian Evangelho ohin ninian haktuir mai ita comportamento ruma ne’ebe ita koko atu hakiak no hametin liu tan. Ohin hahu ho frase ida ne’ebe dehan; “Reino ki’ik keta tauk basá Na’i Maromak hakarak haraik reino ki’ik ba imi”. Jesus refere ba grupo oan ida ne’e tuir Nia atu sira la tauk wainhira hare ba missão bo’ot ne’e. hare kona ba sira nia missão ne’ebe boot tebes ba Judeu no mundo tomak, tan ne’e Jesus encoraja dehan ba grupo oan ne’e; “Keta Tauk” katak maske sira uituan, sira la influencia ema tomak iha mundo. Tan ne’e ba se de’it mak Maromak domin nian hakarak halo nia participa iha reino ida Maromak ninian ema ida sei la hasai housi nia liman. maske ituan maibe Na’i Maromak tau marca. Hanoin kona ba ida ne’e, ohin mos Jesus hakarak encoraja ita  atu keta ta’uk. Ita mos dalabarak laiha coragem atu fo testamunho kona ba buat ne’ebe ita nia fiar exige, maske dalabarak ita dehan katak Timor ne’e maioria ita sarani, maibe dalabarak ita la brani atu hatudu buat ne’ebe ita nia fiar exige. Oinsa mak ita bele hatudu ita nia fiar iha ita nia família rasik, iha ita nia serviço fatin, iha ita nia bairro laran ou ho ema ne’ebe ita hadomi. Dalaruma ita hanesan Pilatos ne’ebe facil liu atu fase liman duque preucupa ho buat ne’ebe acontece.

Hanoin kona ba fiar, hanoin kona ba kna’ar missionário nian ida ne’e lori mai ha’u pessoalmente hanoin ida; iha loron hirak ne’e nia laran novidade ne’ebe sai heboh iha cidade Dili nia laran mak SOE BEBÉ. Iha média, iha fatin barak ema hotu sempre ko’alia kona ba acto soe bebé. Ema barak fo comentário, ida-idak nia interpretação. Maibe fila fali ba ita karik ohin iha celebração ida ne’e convida mos ita ser missionário iha momento ida ne’e karik laos ita hotu hamrik atu ko’alia, maibe fila fali ba ita ida-idak atu husu ba ita nia an saida mak ha’u tem que halo; nu’udar bispo ida, nu’udar educador ida, nu’udar inan-aman ida, nu’udar foinsae uluk nanain hatene hadomi ha’u nia an, respeita ha’u nia an, tau ha’u nia valor sarani ninian, valor moral ninian, prudente ituan iha ita nia relação ho maluk sira. então iha momento ida ne’e wainhira ko’alia kona ba kna’ar missionário ninian ita la imagina saida mak Apóstolo sira halo uluk, maibe iha ita nia tempo ohin loron ninian atu sai missionário oinsa mak ita koko hare ba ralidade Timor ninian liu-liu iha cidade Dili ne’ebe convida ita sarani, karik laos atu condena malu, hatudu liman ba malu, maibe ita ida-idak fila ba ita nia an oinsa mak atu prevene buat ne’e la continua buras. Tan ne’e precisa ita ida-idak hodi defende valor fiar sarani ninian ho ita nia vida no testamunho no maneira rasik. Saida mak bele sai obstáculo ba ita atu iha duni confiança total iha Na’i Maromak maske buat hotu ko’ali no ita ronam maibe saida mak bele sai hanesan obstáculo ida ba ita atu moris ita nia vocação missionário nian ida ne’e.

Jesus ohin fanun ita ho frase furak oan ida ne’ebe dehan; “fan imi nia sasan hodi fo esmolam halo ba imi hahalok ne’ebe la bosan, halibur ba imi soin ne’ebe la mohu iha lalehan, iha lalehan naokten sei la besik, mirai sei la han, basá ia fatin ne’ebe ó halot ó nia soin, iha fatin ne’e mos ó sei tau ó nia fuan, ó sei tau ó nia laran”. Atu bele participa iha missão reino Maromak ninian Jesus ohin husu tan buat mai ita; “Destacamento” significa ita precisa hakasan atu la belit demais ba sasan ou susar atu haketan an housi buat sira mundo ninian, uluk nanain buat ne’ebe sai obstáculo ba ita ba ita nia confiança total iha Maromak facil Maromak atu domina ita nia moris. Selae ita dehan; ibun mak dehan fiar Maromak, maibe sei iha reservas. Iha buat barak ne’ebe la husik ita atu confia total iha Na’i. Reserva hirak ne’e dalaruma sai obstáculo ba ita. Tan ne’e Jesus dehan; “Hakasan atu haketak an housi buat ne’ebe hanesan sasan, osan eh rai. Ne’e laos katak ita tem que despresa buat ne’ebe Na’i Maromak tau ba ita, missionário ida hatene nia kna’ar atu partilha nia tempo, nia energia no buat ne’ebe nia iha ho sira ne’ebe laiha. Ho espírirto de partilha de’it mak hatudu ida ne’e; ita ne’e mesak Feton no nan. Ho espírito de partilha de’it ida ne’e mak ita bele dehan; conversão. Tan ne’e mak hanoin fali Santa Teresa nia liafuan Laos ha’u sucesso ona dala ha’u hakmatek, maibe conversão contínua luta hasoru inimigo ne’ebe mai housi ita nia laran rasik.

Maluk doben sira, wainhira hakarak halo buat diak ruma ba ema ida laos tanba hare ba nia ne’e se. Nune’e mos ita halo diak ba ema ida ita hein katak saida mak nia sei halo fila fali mai ha’u. Maibe ema dehan; “Se ha’u hakarak halo diak laos tanba nia, maibe tanba ha’u”. Atitude ida tan ne’ebe exige housi missionário fiar nian mak vigilância. Jesus rasik dehan; “Rahun diak ba sira ne’ebe hader hela wainhira Nai to’o mai”. Rahun diak ba sira ne’ebe hatene rai Jesus hanesan nia riku soin boot ida, nia buka duni ho fuan ho laran to’o hetan. Ita hotu precisa matan moris no neon nain nafatin. Ita mos dalaruma hanesan Pedro ne’ebe sei koko nafatin Jesus hodi husu; bua hotu ne’ebe ita boot dehan ne’e vale de’it ba sira ou vale mos mai ha’u! Ita mos dalaruma ne’e iha tendência hanesan ne’e. buat hirak ne’ebe ita rona bebeik dalaruma ita cómoda ona, hau hakmatek ona karik ida e’e ema seluk mak precisa, ha’u dalaruma bele fase ha’u nia liman, buat ne’e toca ha’u ida. maibe quando mensagem ida ne’e continua repete mai ita, fanun nafatin ita.

Catedral horseik ita boot sira simu iha ne’e São João Paulo II nia Ilas. Ita tama mai iha Uma Creda oin ne’e ita hare katak iha Placa wainhira Inaugura Uma Creda ida ne’e Papa João Paulo II rasik mak inaugura no nia sama iha fatin ida ne’e. ne’e duni ita sente orgulho duni tanba nia mak haraik benção no inaugura fatin santo ida ne’e. hanesan relíquia moris ninian ne’ebe husik hela mai ita iha diocese Dili liu-liu iha Catedral tanba nia mak inaugura no fo benção. Tan ne’e nia fila fali mai iha ne’e laos de’it ita atu hare ba nia estátua, maibe atu lori ita ba hanoin fila fali nia nu’udar missionário boot. Ita hotu hatene katak Papa João Paulo II nia visita ita Timor ne’e iha ne’ebe ita nia esperança kiik hanesan lilin ida karik atu mate sal-sala, maibe mosu saseluk Nain Jesus Cristo ninian, Ulun boot Uma Creda ninian iha ita nia rain hodi foti fila fali, fo fila fali esperança mai ita. wainhira Papa João Paulo II reza missa iha Tasi Tolu hodi lian tetum. Tempo nebá ema hanoin katak missa ho Latim, maibe Santo Padre to’o mai ema tau tiha texto Latim no Indonesia ninian, maibe Santo Padre foti texto lian Tetum atu hatu’ur. Ho ida ne’e timoroan sira sente katak ninia dignidade hahu boot. Karik hanesan rai ida ne’ebe ema haluha maibe, Papa João Paulo II mosu mai hodi fo fila fali esperança ba povo no rai ida ne’e.

Tan ne’e ninia presença iha Catedral nune’e mos Tinan ida ne’e ita sei termina Ano Jubileu Missionário ninian iha Tasi Tolu iha 30 de Outubro ne’ebe mai tem que fanun fila fali ita timoroan sira maske desafios no dificuldades hotu ne’ebe ita hasoru, maibe Papa João Paulo II mai atu fanun fila fali ita. Nia liafuan ne’ebe nia dehan; “Imi mak Masin no Naroman mundo ne’e nian”. Nune’e mos ohin nia convida ita atu sai missionário. Ita reza atu nia estadia durante semana ida iha Catedral ne’e atu fanun sarani sira, hamoris fila fali desejo missionário ida ne’e. ita reza mos atu iha fulan 3 ne’e nia laran (Agosto, Setembro no Outubro) ne’ebe Conferência Episcopal Timorense tau ona mai iha Igreja Timor atu prepara ba momento extraordinário Jubileu nian ne’e ita aporveita laos atu manan graça Espiritual ninian, maibe tem sai mos momento ida de renovação, momento de conversão iha ita nia fuan, iha ita nia hahalok no iha ita nia mentalidade.

COMEMORA 25 ANOS OPURTUNIDADE ATU AGRADECE HO HALO DISCERNIMENTO

Liu tiha tinan 25 halao kna’ar Maromak ninian iha rai Timor, ohin Congragação Franciscana OSF hare fali ba kotuk furak no diak oi-oin ne’ebe Na’i Maromak iha ninia providência haraik ba sira. Buat barak laos hodi liafuan mak atu descreve, maibe ita atu contempla Maromak ninia misericórdia. Tan ne’e, mak ohin ita mai hamutuk ho sira, ita atu dehan Obrigado Na’i ba diak hotu ne’ebe Na’i Maromak haraik ona mai ita liu-liu ba diocese Dili ho presença Congregação OSF ninian.

Ohin comemora XXV aniversário ne’e opurtunidade ida atu agradece Maromak, opurtunidade ida atu hare fila ba kotuk ho haraikan atu reconhece Na’i Maromak nia liman fatin tuir Espírito Congregação nian ne’ebe dehan; DEUS PROVIDEBIT, Maromak descreve buat barak liu housi sira nia liman, buat barak ne’ebe sira la espera, maibe liu housi Maromak nia intervenção, providência Maromak ninian, obra Na’i Maromak nian bele lao diak iha ita nia rain.

Momento sira hanesan ne’e, hakarak convida liu-liu ba ita sira hamutuk iha ne’e, hamutuk ho Irmã sira laos atu obrigado de’it, maibe atu halo discernimento katak ponto ida importante ba Congregação koko atu hare ho matan fiar nian ba buat ne’ebe liu ona no haraikan ho corágem hateke ba oin no hakasan oinsa atu halo missão OSF ninian iha rai Timor-Leste, buka duni atu hatudu sira nia Espírito, sira nia carisma, nune’e continua halo Uma Creda iha Timor, Uma Creda iha Diocese riku liu tan.

Iha kedas loron 30 fulan Junho tinan 1994, liu tiha tinan ida presença OSF nian iha Timor-Leste sira hari BALAI PENGOBATAN SANTA ELISABETH TAIBESI. Ne’e katak iha 25 anos liu ba mai ho kedas nia missão ida ne’e, hatudu katak durante iha tempo hirak ne’e nia laran Irmã sira dedica an makas iha serviço social ninian liu-liu hodi tau matan ba hirak ne’ebe moras isin ninian. Ne’e duni, laiha liafuan ida ne’ebe diak liu mos atu agradece Irmã sira iha pessoa Madre Provincial ho ninia conselho. Ida ne’e opurtunidade ida mos atu diocese agradece no obrigado ba Congregação liu-liu ba Madre Provincial iha imi nia prenseça iha ne’e ho imi nia tulun sira hotu. Sira nia dedica an iha rai ida ne’e haodi hatudu Maromak ida ne’ebe besik ba sira ne’ebe moras, sira ne’ebe terus, Uma Creda ida ne’ebe hamutuk nafatin ho nia povo iha tempo susar, iha tempo moras no to’o ohin loron mos lao nafatin. Ne’e duni laos de’it sira nia serviço ba de’it sarani sira, maibe mos liu housi Congregação OSF, Clero diocese 3 mos hetan acesso ba iha tratamento médico ninian liu housi Irmã sira bele ba iha Semaran atu nune’e bele hetan tratamento médico nian ne’ebe tinan barak ona oferece ida ne’e ba iha Amu sira. ne’e duni opurtunidade duni atu agradece ba diak hotu ne’ebe sira halo.

Iha tinan 25 liu ba, liu housi pedido Mgr. Carlos Filipe Ximenes Belo ninian atu book sira hatan ba convite ida ne’e hanesan bolu ida. wainhira Uma Creda Timor nia husu tuir Conferência Episcopal Indonesia nian, Madre sira OSF tinan 25 liu ba mos hare ba ida ne’e hanesan convite ida, bolu ida housi Na’i Maromak nian atu sira mos la karak, sira hatan atu bele hakat mai iha ita nia rain atu servi sarani Uma Creda Timor ninian.

Bolu ida ne’e ohin renova dala ida tan iha ocasião ida ne’e. ne’e duni bolu iha tinan 25 liu ba, depois de haknar an ida ne’e 25 anos, ohin sai momento ida tan atu renova bolu ida ne’e. iha ne’ebe ita boot sira celebra XXV aniversário iha rai Timor certamente iha bolu ida exige mos atu halo discernimento ida ne’ebe diak liu tan atu bele hatan nune’e bele halo ita boot sira nia missão iha rai Timor particularmente iha diocese Dili sai relevante liu tan tuir necessidade Uma Creda no sarani nian iha tempo ida ne’e.

Bolu ida hanesan convite ida ba conversão. Ne’e duni ita hotu nu’udar ema salanain ita precisa halo conversão ida laos de’it iha aspeto pessoal, maibe hahu housi comunitária. Sasukat ba convite ida ne’e mak ita hare iha Primeira Leitura; Maromak revela nia an sira ho sinal extraordinário, maibe liu housi ninia liafuan. Nia liafuan ne’ebe moris ne’ebe besik ba ema. Maromak ne’ebe revela nia Naran. Tuir cultura semítica, Naran laos separa housi pessoa, maibe narak identifica ema ida, descreve buat ida ne’ebe essencial. Tanba ne’e, wainhira Maromak intevem iha ema ida nia moris, muda ema ida nia naran.

Ohin ita rona Maromak revela nia An ba Moises katak, Nia mak ida ne’ebe laran luak, laran maus, la hirus, maibe laran Kmanek no neon los. Maromak ida ne’ebe buka atu hakbesik liu tan ba ema hanesan diálogo Maromak ho Moises ne’ebe ita rona. Comunidade religiosa sira ninia presença uluk nanain atu fo testamunho kona ba CRISTO nia terus, Nia Mate no Nia Moris Hias. Wainhira sarani sira bele hatudu furak oinsa bele moris hamutuk nu’udar bin ho alin iha Comunidade. Furak oinsa ema bele hare liu housi sira nia voto, maibe sira tuir CRISTO ida ne’ebe la Káben, tuir CRISTO ida ne’ebe kiak, tuir CRISTO ida ne’ebe obidiente. Ida ne’e mak ita bele dehan katak sira nia vida intimidade, sira nia comunhão ho Na’i Maromak.

Evangelho ne’ebe ohin ita rona koalia kona ba FINI ida ne’ebe monu iha dalan ninin hatudu katak fuan ne’ebe to’os. ita ema ne’e inpenetrável, fuan ne’ebe to’os ba Maromak nia Laifuan. FINI ida ne’ebe monu iha Fatuk laran, fuan ida ne’e hakarak rona, koko, maibe liu lalais de’it. FINI ida ne’ebe monu iha aitarak mak Fuan ida ne’ebe inconstante. No FINI ida ne’ebe monu iha rai bokur mak hirak ne’ebe rona no halo tuir iha moris tomak.

Santo Padre quando koalia ba Religiosa sira nia dehan; Irmãs, ba no haklaken Cristo ne’ebe moris hias mak hanesan We matan ne’ebe ema ida sei la hasai housi ninia vida. Ne’e duni, ba Irmãs sira buka hafoun nafatin imi nia encontro atu serviço ne’ebe imi halo ne’e bele reflete nafatin CRISTO ne’ebe moris hodi sai nafatin sasin ba ema hotu-hotu liu-liu basira ne’ebe moris, terus iha isin ninian.

São João Paulo II iha nia tempo halo afirmação ida dehan; iha vida consagrada nune’e mos hanesan realidade seluk Uma Creda ninian moris atravessa hela periodo ida dedicado e arte. Ne’e katak ohin loron buat hotu lao kapas, maibe iha Uma Creda, iha sarani sira nia moris nune’e mos iha religioso/ religiosa sira nia moris sente maran. Serviço maibe hanesan laiha vida, ita lao hela maibe laiha semanggat. Papa ne’e dehan semanggat ida ne’e laiha laos tanba ema ne’e lakohi halo, maibe tanba ita dook housi ninia sumber kehidupan mak CRISTO. Então iha situação saida de’it buat ida de’it atu ita keta tauk! Hanesan São Paulo nu’udar priosioneiro ida eh ema livre, nia kna’ar missionário ninian nia la troka. Los duni maske ita mos dalabarak sente la soi, maibe housi ita nia an atu sai hanesan ahi oan ida ne’ebe bele fo naroman ba kalan iha nakukun nia laran. Nune’e mos keta tauk atu sai masin atu lori sabor ba ema seluk ninia moris.

Tan ne’e oinsa mak ita bele sai testamunho da vida, ne’ebe bele sai nafatin novidade ida ba Uma Creda ohin loron ninian. Ha’u hanoin hahalok ne’ebe São Paulo adopta liu-liu ohin mos iha Segunda Leitura koalia kona ba liafuan ida ne’e; esperança, corágem atu lao ba oin nafatin. Tan ne’e ita ne’ebe ohin mai hamutuk iha fatin ida ne’e, ita tau hamutuk ita nia intenção sira, acompanha Madre sira ne’ebe ohin celebra sira nia presença iha Timor ba tinan 25, ita ne’ebe mai nu’udar diocese, nu’udar sarani ita hotu sente Madre sira nia presença ho serviço ne’ebe sira halo ita fo obrigado ba sira no liu-liu ita reza atu Maromak fo nafatin força ba sira atu continua nafatin kna’ar ida ne’ebe sira halo ona iha ita nia rain durante 25 anos sira laos serviço de’it maibe iha 25 anos nia laran mos timoroan barak tuir daudaun ain fatin Madre OSF ninian atu carisma ne’e laos de’it housi de’it Indonesia mak mai, maibe começa mos atu sai, atu nune’e sira bele buras liu tan.

Ita reza atu sira ho 25 anos ne’e sai mos momento ida ba sira atu fiel liu tan ba sira nia casirma, fidelidade ba sira nia Fundador no Fidelidade ba Uma Creda.

AMU-LULIK MAK CRISTO NIA SASELUK “ALTER CRISTO”

Hau hakarak imagina ksolok iha sarani Metinaro sira nian ne’ebe ohin liu housi graça Sacerdócio ninian, maibe mos consege convence Padre Superior iha Timor Padre Joaquim atu bele realiza Ordenação ida iha Paróquia Metinaro iha Diácono Roberto Madeira Encarnação, SJ nia rain rasik. Maske oinsa ba mos ita hatene ita ohin haksolok iha dader ida ne’e tanba opurtunidade ida sarani Metinaro liu-liu família, belun bele besik liutan tuir didiak hodi reflete kona ba mistério sacerdócio ninian iha Uma Creda.

Ita hotu hatene didiak katak ita Na’i Jesus Cristo mak Nailulik boot Testamento Foun ninian. No iha Nia Maromak nia povo santo sai povo, Nailulik, povo sacerdotal. Tan ne’e Nia simu nia kbiit balu maneira de modo especial exerce etivamenta iha Nia naran knar presbítero sira nian, knar atu hanourin, knar halo Santo, knar atu ukun ninian. Hanesan Aman ne’ebe haruka nia Oan nune’e mos Nia haruka uluk nanain Nia Escolante sira, Nia bali Escolante sira mos, Nia bolu atu servi Maromak nia povo iha Nia Naran.

Tan ne’e, ohin ita hotu iha ne’e tanba Maromak continua bolu, ohin realidade ida ne’e iha Paróquia Metinaro Diácono Roberto ita hare iha durante nia moris, iha tinan 19 nia laran Timor foin mak ukunan oportunidade barak atu escola basá ita hotu hatene katak bolso estudo oi-oin disponível atu estudo iha rai laran nune’e mos iha estrangeiro. Maibe ho buat hirak hotu ne’e jovem Metinaro oan ne’e estuda hela iha UNTL, karik nia rona lian bar-barak, maibe iha lian ida ne’ebe nia fo liu nia atenção. Lian ida ne’ebe bok liu nia fuan, ikus mai nia hatan, nia buka tuir hodi hatene lolos liu housi reflexão, discernamento ida ne’ebe naruk iha tinan naruk nia laran. Liu housi mos ema oi-oin, formador sira balu iha rai laran no balu mos housi fatin seluk hanesan ita hare iha nia biografia, hirak ne’e hotu ho objetivo ida de’it; hakbesik nafatin nia atu lao nafatin ba oin mai to’o momento ida ne’e; loron ordenação nian. No ida ne’e mak ita bele dehan prémio boot ne’ebe Compania de Jesus iha Timor-Leste ohin hasae ba Na’i Maromak iha loron ita celebra Festa Santo Inácio ninian. Tan ne’e, ita fo parabens ba Compania de Jesus. Ba ita nia diácono Roberto ne’ebe oras-oras tan sei foti ba grau Nailulik  nian e parabens ba família, ba papa-mama no maun-alin sira.

Amu-Lulik katak sai Cristo nia saseluk “ALTER CRISTO”. Ita hotu ohin tuir Evangelho ida ne’e ne’ebe dehan “Na’i mak nebá !” ne’ebe diácono foti nu’udar nia moto ordenação nian hatudu mai ita katak, nia hakarak halo nia an sai instrumento ida Maromak ninian atu hatudu Maromak ba ema seluk. Se ita nota didiak ita hare oinsa São João nia Evangelho koko atu descreve natureza no missão sacerdote ninian.

Jesus mosu ba escolante nain 7 iha tasi. Dehan katak Número 7 ne’e iha sentido ida; número perfeição nian. Karik ita bele dehan Amu-Lulik ida Maromak bolu ba atu halo perfeição nian, lao iha dalan santidade. Pedro ho escolante 6 seluk representa totalidade escolante sira nian ne’ebe hola parte iha comunidade. Jesus hanesan ita hotu hatene katak dalabarak Nia fo atenção ba comunidae escolante sira nian, basá comunidade mak base ba servi missão. Hanesan wainhira Jesus haruka nia escolante sira Nia la haruka ida-idak, maibe nia haruka nain rua-rua.

Amu-Lulik ida nia missão atu harí união iha sociedade liu housi nia moris. Dalabarak seminarista sira wainhira iha seminário moris hamutuk, reza hamutuk, estuda hamutuk, servisu hamutuk, maibe wainhira sai tiha Amu-Lulik sira dehan alergia boot ba serviço hamutuk. Karik formação hela hamutuk kleur ona, então serviço hamutuk ne’e alergia tiha fali. Ha’u hanoin sai Amu-Lulik ne’e laos atu buka sucesso ida-idak nian, maibe sai Amu-Lulik ne’e orgulho ida ba vida comunhão.

Wainhira ita koalia kona ba vocação uluk nanain ita dehan vocação ne’e laos iniciativa ita ema nian, maibe ida ne’e plano Na’i Maromak nian. Dalabarak ita rasik mos laiha resposta atu hatan ba Na’i nia bolu. Ita ema ohin loron nian hakarak buat hotu instan, buat nebe kleur ita lakohi. Ita hakarak hare liu buat nebe iha liur, ita la preucupa ho buat nebe iha laran. Maromak hare liu ba iha fuan. Ida nebe Maromak tau matan Tuir São João nia liafuan karik Predilecto.

Ema ida-idak especial iha Maromak nia futar oin, ida nebe Maromak hadomi, Nia fihir, Nia bolu no Nia mos sei la abandona. 

Parte ida tan Jesus nafatin iha tasi, Nia mosu ba escolante sira iha tasi. Iha lisan Judeu sira nian dehan katak tasi ne’e símbolo força a’at, karik ita bele dehan inimigos dos homens. Tan ne’e tama iha tasi atu festa significa laos atu buka ikan de’it. Maibe iha Bíblia Maromak dehan buka atu hasai husi condição força a’at sira nia liman, hatudu kor hotu escravidão nian nebe impede atu ema bele moris iha ksolok. Tan ne’e mak Amu-Lulik ida nia missão atu hadia iha fuan sensibilidade Jesus Cristo nian atu hatene Na’i Maromak no sente sarani sira nia halerik, sarani sira nia susar, sarani sira nia problema. halo netik transformação ba buat ne’ebe isin nune’e mos Espírito nian. Wainhira nia sensibilidade iha fuan bele sai sinal ida ne’ebe graça ba sira ne’ebe husu perdão, haroman sira ne’ebe iha nakukun, liberta sira ne’ebe iha nakukun laran.

Ohin loron iha ita nia rain, iha ita nia Uma Creda rasik ita hare ba quantidade Nailulik sira nian, sarani sira dehan Amululik sira aumenta ba bebeik. Maibe buat ne’ebe precisa liu mak hadia sensibilidade iha Uma Creda. Ida ne’e mak ita bele sente situação sarani nian, Uma Creda nian ne’ebe obriga ita atu hasoru.

Jesus Homino Salvador “IHS” razão Companhia de Jesus nian. Ida ne’e atu dehan katak atu Amu-Lulik Jesuita ida tem que coloca duni Cristo mak centro iha nia moris. Ohin iha Primeira Leitura Moises reflete insistência ba povo ne’ebe hadomi Na’i Maromak, ba povo ne’ebe lao tuir Maromak nia dalan basá Nia mak ita nia moris, Cristo mak ita nia moris.

Se ita husu ba ita nia an; oinsa mak ita bele dehan centralidade ida nee? Mai ita hare Evangelho São João ninian ne’ebe ohin ita rona, dalabarak ita mos bele haré iha Santo Inácio ninia moris. São João dehan iha Segunda Leitura, ema ne’ebe hadomi, ema ne’e Maromak oan. Domin mak halo ita rona. Basé comum ba São João ho Santo Inácio ninia moris mak domin. Domin mak razão ba buat hotu, domin mak conquista buat hotu no domin mos mak convence ohin ita nia diácono husik buat hotu  mai iha ita nia oin oras tan sei simu ordenação.

Ha’u hanoin loron ida ne’e mak ita nia diácono descobre nia moris, nia hetan tiha vocação osan mean ida nee, nia lakohi atu husik, ho ida ne’e mak nia hakarak tulun ho nia moris, tulun ho ema wain liu tan atu lao tuir dalan ida ne’e. Tan ne’e, fila ba ita nia an hodi dehan; sai religioso, sai amululik ida ohin, iha momento ida nee iha rai Timor katak sa?, kaer fila fali ba liafuan rua ne’ebe ohin ha’u dehan; sensibilidade;hatene hadia fuan; sensibilidade Nain Jesus Cristo ninian, iha capacidade atu hatudu Maromak ba Maromak nia povo. Laos deit iha sensibilidade maibe precisa mos capacidade atu hatudu hanesan moto ita nia diácono nian ne’ebe dehan “NA’I MAK NEBÁ!”. Housi ida ne’e, diacono sei sai an ba Maromak nia povo. Buat hirak ne’e hotu resultado housi ita nia intimidade, oração, ita nia comunhão ho Maromak.  

Tan nee ita nia amu papa wainhira koalia kona ba Amu-lulik sira, nia fo ordem ida; “Prestai atenção a celebração Eucarstia”. Ne’e duni, hatene saida mak ó halo daudaun, moris tuir buat ne’ebe ó celebra. No Amu Papa aumenta tan dehan; “buat ne’ebe ó simu de graça buka mos atu fo de graça”. Tan ne’e, ohin ita halibur hamutuk ho sentimento boot ida ne’e ita agradece ba Maromak housi intercessão ita nia Na’in Feto da Graça ninian harohan mos liu housi intercessão Santo Inácio ninia festa. Mai ita harohan atu Nia bele hatene ho tulun Nain Feto ho Santo Inácio ninian  ba diacono ne’ebe atu simu ordenação nia bele koalia ho Maromak hatan ho haraik an hanesan Na’in Feto hatan ba anjo nia liafuan dehan ha’u mak nee atu halo tuir Ita nia hakarak.

CELEBRA 25 ANOS PRECISA SENTIMENTO DE GRATIDÃO NO RENOVAÇÃO

Frase ida ne’e mak sarani Letefoho contempla, reflecte, koko atu moris tuir durante tinan tomak ida nia laran. Tinan tomak ida nia laran, Inan doben Liurai Feto Letefoho ninian liu housi Nia kadunan ba visita nia oan sira iha suco 8 Aldeia 67. Ohin loron 16 fulan Julho, loron ne’ebe sarani Letefoho la fácil atu haluha tanba hakerek ona iha sarani ida-idak nia fuan Inan Lalehan nia Naran. Loron 16 fulan Julho tinan 2019, loron ida ne’ebe especial liu tan ba sarani Letefoho tanba tinan ida ne’e completa tinan 25 Paróquia Nossa Senhora do Carmo Letefoho. Ho tinan ida ne’e mos mak primeiro Pároco Letefoho ninian completa nia tinan 41 nu’udar amululik.

Ohin ita halibur hamutuk iha ne’e ho sentimento ida de’it katak Sentimento de Gratidão. Obrigado Na’i ne’ebe fo ona mai ita Inan ida ne’ebe bele bali ita iha tinan naruk ne’e nia laran Nia sai ita nia Intercessora. Tan ne’e, buat ne’ebe ita bele husu ba ita an mak ida ne’e; Dalan saida mak diak liu mai ha’u atu agradece se laos atu hafoun ha’u nia fidelidade ba Na’i Maromak, basá Jesus rasik fo hanoin nafatin mai ita; laos ida ne’ebe bolu Na’i..Na’i mak sei tama ba reino Lalehan, maibe halo tuir Ha’u Aman iha Lalehan nia hakarak. Saida mak Maromak nia hakarak mai ita? Se laos ita nia santidade! Santidade laos deit vocação ema ida nian; Amululik ka Madre ninian, maibe vocação ida sarani ida-idak nian. Ita nia Amo Papa fanun nafatin ita katak; sarani hotu hakasan atu sai Santo. Laiha ema ida ne’ebe exclui housi dalan santidade ninian.

Ne’e duni loron ida ne’e, lato’o de’it ba buat ne’ebe sarani Letefoho halo durante tinan ida ne’e nia laran, pergunta ida ne’ebe paróquiano ida-idak tem que husu duni ba nia an, ha’u nia participação iha atividade hot-hotu ne’ebe Paróquia organiza durante tinan tomak ne’e nia laran lori ha’u besik duni hodi hasoru ho Jesus kalae? Ha’u haksolok tanba bele celebra didiak XXV aniversário Paróquia ida ne’e ninian, ha’u nia ksolok sai bo’ot liu tan wainhira ha’u nia celebração ne’e bele lori ha’u hakat tan passo ida besik liu ba Na’i Maromak.

Wainhira odamatan Cristo liurai nian loke, tuir dalan hakerek liafuan; “Na’okten, Barukten, Futumanu dor, Lanuten, Jogador no seluk tan… Ne’e katak hakat passo ida ita koko atu husik hela ita nia toman a’at sira ne’e. Dalan ne’ebe ita lao tuir samea nia ikun sae to’o ba leten ne’e katak dalan purificação ninian. Ha’u nia moris nu’udar sarani ne’e wainhira sae iha escada ne’e lori ha’u atu hanoin hodi koko atu husik duni toman a’at ruma iha ha’u nia moris. Ita tama ba tinan 25 hafoun ita nia an hodi bele lori buat diak ruma ba ita, atu tulun ita hadia liu tan ita nia dalan santidade nian.

Evangelho ne’ebe ohin ita rona Ita Nain Feto ho São João convida ita sarani ho liafuan: Ida ne’e mak ó nia Inan-ida ne’e mak ó nia oan. Nai Feto lahatan buat ida ba nia Oan wainhira Nia Oan husu Nia, maibe Nia simu Nia Oan nia testamento ikus ho silêncio. Ida ne’e mak ita bele dehan katak encontro ikus Inan ho Oan. Iha cruz hun Nain Feto hetan fali oan ida no Jesus nia Inan sai Inan foun ba família foun ida ne’e, Inan ba Creda tomak no Inan ba sarani Paróquia Letefoho.

Ohin Paróquia Letefoho celebra XXV aniversário então ita simu tiha oan convite ida ne’e. Ita tem que sente orgulho tanba sarani Letefoho predilecto, preferido, eligido. Ne’e katak sarani ida ne’e simu duni Inan ida ne’e iha sira nia moris durante tinan 25 nia laran. Tan ne’e ohin ita tem que sente duni katak Jesus comfia ita, hadomi ita.

Iha cruz hun Jesus la halo diálogo ho sira, maibe Nia fo ordem; Ida ne’e Ó nia oan – ida ne’e ó nia Inan. Ordem atu executa, ordem laos atu nego, ordem laos atu dehan ha’u hakarak ou lae! Housi ordem ne’e hakiak hela relação foun ida. Ida ne’e mak família foun ida, família Jesus nia Inan no Escolante simu Jesus nia Inan laos tanba nia hakarak, maibe ordem ida housi nia mestre, orden atu hahu missão foun dalan atu haburas no hametin confiança mak hatene rona no halo tuir. Maluk doben sira, dificuldade ne’ebe bain-bain halo ita nia relação ba malu no iha ita nia família iha crise mak wainhira ita la fo tan ona espaço atu rona Na’i Maromak. fatlta de capacidade atu rona mak causa desobidiência “Ulun fatuk tos”.

Atu contempla Jesus ha’u nia maksoyn ne’ebe hakarak ko’alia mai ha’u, hau precisa fo tempo atu rona. Dalabarak ita preucupa ho buat barak, buat ne’ebe mos la importante ba moris. Ita tama ba tinan 25 Paróquia ida ne’e nian Nain Feto hakarak husu de’it buat ida ba sarani Letefoho; to’o ona tempo atu hatene hili buat ne’ebe inportante ba moris. Laos buat hotu ne’ebe monu ba matan, laos buat hotu ne’ebe monu ba iha fuan ne’e diak no inportante hotu, maibe Nain Feto husu atu sarani sira durante ne’e halo preparação naruk pelo menus to’o iha tempo ida ne’e hatene husu ba Nain Feto atu bele mos tulun liu-liu ba foinsae sira, Estudante sira hatene hili buat ne’ebe saida mak inportante ba ha’u nia moris.

Maluk doben sira sarani Letefoho ninian XXV aniversário ne’e tem que sai duni Momento ida Renovação. Laos atu obrigado de’it, maibe tem que sai mos momento ida renovação nian. Liafuan renovação exige atitude rua; humildade no corâgem. Precisa humildade tanba wainhira ita haraikan mak ita bele reconhece ita nia falta, ita nia miséria, ita nia falhanço, ita nia defeitos no ita nia erros, maibe lato’o atu reconhece de’it, maibe precisa iha corâgem atu renova, precisa iha corâgem atu hamrik fali basá Jesus rasik dehan ksolok boot liu iha Lalehan wainhira sala nain ida ne’ebe bele hatene hamriik no fila fali ba Na’i Maromak. ita hotu mesak ema sala nain. Tan ne’e opurtunidade ida ne’e apelo ida ba renovação ne’e sai ita hotu nia preucupação se ita hakarak duni atu hadia ita nia an, ita nia amizade ho Na’i Maromak.

Ko’alia kona ba renova katak renova ita nia domin. Ita nia amizade, ita nia relação, renova ita nia promessa sira nebe ita halo. Então hau hanoin kona ba promessa ida ne’e lori mai ha’u nia hanoin buat ida ne’e karik ha’u la ofende ema ida maibe buat ida ne’e hanesan partilha de’it; iha tempo ruma liu ba, ha’u rona dehan katak wainhira Dom. Alberto Ricardo sei moris sarani Ermera convida nia mai iha ne’e hamutuk ho Presidente José Ramos Horta atu assiste tara bandu ida ne’ebe sarani tomak Ermera nian halo ho objetivo atu reduz gastos, oho animal sira wainhira Lia Mate no Lia Moris nian. E ida ne’e uluk husi kotuk ne’e Pe. Lorenço matebian no sira seluk. Maibe buat ne’e fofoun ne’e dehan animado los, ema hotu fiel los ba buat ne’e. depois hahu lao lakleur de’it sira ne’ebe vocal, energético los, ida ne’ebe promotor los promessa ida ne’e mak fial fali neneik-neneik harahun tiha fila fali, sobu tiha fila fali promessa sira ne’ebe ita halo. Viola tiha fila fali tara bandu sira, viola tiha fali promessa sira iha presença Uma Creda ninian, Presença Na’i Maromak nian, ita halo finge ida tanba interesse karik ikus mai ita la fiel to’o rohan. Então ida ne’e mos lori ita atu hanoin kona ba promessa oi-oin ne’ebe ita halo. Halo nu’udar ema pessoal, nu’udar família, nu’udar comunidade ka nu’udar Uma Creda. Dala barak ita halo promessa barak. importante mak ita husu ba ita nia an tanba sa mak ita labele persevera, ita la Querente ho ita nia liafuan ho ita nia hahalok ne’ebe ita halo. Saida mak bele kesi metin ita! Tan ne’e mak hanesan ohin ha’u dehan katak loron ida ne’ebe ita agradece ba Maromak hare ba kotuk buat barak ne’ebe liu tiha ona, maibe ita mos sempre iha corâgem hakarak hakat ba oin. Ita celebra tinan 25 ne’e ita hakarak atu hakak ba oin tan ne’e mak ita celebra hodi hahu história foun. Ne’e duni ita hakat ba tinan 26 nian ne’e sarani Letefoho tem que hahu mehi foun, hanoin foun atu nune’e ita bele hafoun nafatin ita nia Uma Creda. Papa Paulo VI wainhira ko’alia kona ba devoção ba Nain Feto nia dehan; ita nia devoção ba Nain Feto Inan doben Virgem Maria ne’e tem que marca ho característica 4; Buka atu hatene Nain Feto, hadomi Nain Feto, Halo tuir Nain Feto, habelar Nain Feto.

Ne’e duni, ita nia devoção, ita nia domin ba ita nia Inan Lalehan nian ne’e la to’o deit hodi hatene no hadomi de’it, maibe halo tuir nia virtude sira, Nini moris, Ninia hahalok, imita Ninia virtude sira iha ita nia moris. Ksolok boot no novidade mai ita buat ne’ebe ita descobre tiha ona durante preparação inportância Inan ida ne’e iha ita nia moris, mai ita ida-idak lori iha ita nia fuan, iha ita nia família, ba ita nia sociedade ksolok ida ne’e. Liu husi Nain Feto atu ita hasoru malu ho Nia Oan iha Eucaristia. Ida ne’e mak ksolok boot liu ita sarani tem que lori. Tanne’e mai ita harohan ita husu ba Nain Feto Carmelo atu hanourin ita apreende lao iha escada perfeição nian. Tanba ne’e atu to’o iha escada santidade nian ita precisa hamate an. Mai ita husu ba Nain Feto hanourin ita hotu liafuan ida de’it “Hau Mak Ne’e Atu Halo Tuir Ita nia Hakarak”

 

NA’I MAROMAK NIA HAKARAK IDA DE’IT MAK ITA NIA ‘SANTIDADE’

Liu tiha Festa Santíssima Trindade ne’ebe ita celebra iha domingo liu ba, ohin Santa Creda hanoin fali Festa Corpo de Deus,  convida ita atu habo’ot, atu haklean liu tan ita nia domin ba Santa Eucaristia. maske domingo-domingo ita ba missa, participa iha Eucaristia, ohin Santa Creda bolu ita mai hamutuk atu adora ita nain Jesus Cristo  ne’ebe presente iha hóstia Santa.

Jesus la husik hela Ninia estátua, Nia hakarak de’it atu presente iha fatin iha Nia Escolante sira le’et, iha Pão no nia aihan. Aihan la tau ba meja atu ema hare de’it  maibe atu consumo. Tan ne’e maluk sarani sira, sarani ida ne’ebe mak ba missa hafoin la simu cominhão precisa hola consciênçia katak ita la hola parte didiak iha Eucaristia. Cristo nia Futar Isin no Ran hatudu ita simu ita Nain Jesus Cristo nia convite atu indetifica ita nia an ho Nia, sai ida de’it ho Nia. Hatudu ba Maromak, nune’e mos ba ema hotu katak, ita hakarak sai isin ida ho ita Na’i Jesus Cristo. Ita mos hakarak koko Jesus nia domin no hakarak atu saran ita nia an mos ba ita nia maluk sira hanesan ita nain Jesus Cristo halo mai ita.

Eucaristia laos aihan ida ne’ebe ita halo mes mesak, Pão ne’ebe silu fahe ba maun-alin sira. Iha Eucaristia mak hamoris no hakiak iha ita ida-idak atitude hatene  fo atenção ba hamlaha oi-oin iha ita maun-alin sira nia le’et. Hamlaha ba aihan, hamlaha ba domin, hamlaha ba compreensão, hamlaha ba perdão no liu-liu hamlaha ba Na’i Maromak. Hanoin fali Papa Bento XVI nia celebração ida hanesan ne’e, nia dehan tansa ema barak hamlaha iha mundo! tanba sa mak labarik inocente barak tem que mate ba hamlaha, wainhira ema barak ne’ebe estraga de’it aihan! Tanba sa mak Lazaro kiak oan nee tem que hakdasa iha riku nia meja ain hodi hein atu hili etu musan ne’ebe monu iha meja okos! ne’e laos tanba rai la bokur tan ona, nune’e la fo tan aihan ne’ebe sufuciente ba ita ema.

Iha fatin balu iha mundo ema inventamente atu estaraga aihan, nune’e bele mantein nafatin preço iha mercado, maibe iha fatin seluk ema mate ba hamlaha. Ema usa matenek atu inventa meios atu estraga duque depende moris, nune’e mos iha fatin balu fácil liu atu fahe kilat hodi funu duque perucupa ho aihan ba sira ne’ebe hamlaha. Tanba sa mak buat hirak ne’e hotu mosu, tanba ita la fo aihan ne’ebe los ba ita nia Espírito. Tan ne’e ita nia fuan maran, ita nia fuan to’os, ita nia laran to’os. Mundo nune’e mos sociedade sai desordem tanba desordem uluk nanain iha ita ema nia fuan tanba kuran domin, labele hatudu dalan ne’ebe los no labele hatudu tan mos justiça ba ema seluk. Ida ne’e lori ita atu compreende uitoan Jesus Futar Fuan ba satanas ne’ebe convida atu nakfilak fatuk ba pão. Ema la moris de’it ho aihan, maibe ho liafuan ne’ebe sai housi Na’i Maromak nia Futar Ibun, basá sei iha aihan ba ema hotu wainhira fuan hetan aihan ne’ebe los. Nune’e mos sei iha justiça ba ema hotu wainhira justiça ida suli duni housi fuan ida ne’e mak mai. Maibe ida ne’e sei la acontece se laiha fatin ba Maromak iha ita nia moris. Nune’e mos wainhira ita la haka’as an atu fo netik espaço uitoan atu rona hodi habosu ba Maromak nia Futar Liafuan.

Liafuan ne’ebe halo An ba ema atu Nia bele sai ita nia aihan ne’e hotu tanba ita ema kiik tebes labele ba to’o Na’i Maromak. Maromak mak halo An kiik tanba ita, atu nune’e ita bele simu domin housi Nia domin mak mundo ne’e bele sai Ninian. Ida ne’e mak sentido festa nebe ohin ita celebra “Corpo de Deus” ne’ebe tinan-tinan ita halo processão ne’ebe iha ita nia rain sai hanesan loron feriado significa dader ita ba tuir missa no lorokraik ita sarani nia obrigação atu halibur hamutuk hodi adora laos atu nonton no laos atu fihir malu.

Ohin gesto ida ne’e, ida ne’ebe ita halo hodi adora Santíssimo “Corpo e Sangue do Senhor” nu’udar ema ida ou diocese ida, sarani ida ne’ebe fiar iha Santíssimo Corpo e Sangue Senhor nian Futar oin. Haleu Cristo nia Futar Isin Santo ita mesak ema ida de’it masque diferenças oi-oin, sinal união no comunhão iha fiar nian mak tem que sai nafatin base mai ita nia moris. Sarani hotu precisa desafia ita nia an, buka halo buat ruma ne’ebe foun liu-liu iha tinan ida ne’e ba ita nia maluk sira, se ita la foti desafio hirak ne’e sei hatudu ita nia falta reverência ba  Eucaristia. Wainhira ita la haka’as an atu moris tuir ordem ita Na’i Jesus Cristo nian ne’ebe dehan “Halo ida ne’e hodi hanoin Ha’u” .

Maluk doben sira, ida ne’e ordem ida ba ita hotu ne’ebe ohin iha ne’e, mai ita sarani hotu, masque sira nebe la hetan oportunidade atu halo processão no mai to’o iha Largo Lecidere, iha uma ita hotu iha ordem ida, ita nia obrigação. Iha padre Igreja sira koalia kona ba sai pão laos de’it atu fo han sira ne’ebe hamlaha ba aihan isin ninian nune’e mos klamar ninian, maibe precisa sai pão ba hirak ne’ebe hamlaha, pão ne’ebe fahe, pão ne’ebe simu, pão ne’ebe tesi harahun no pão ne’ebe ita mos nata wainhira ita simu Cristo nia Futar Isin ita harahun no pão ida ne’e ita nata transforma sai ida de’it ho ita. Oinsa pão ne’e bele transforma ha’u nia neon, oinsa pão ida ne’e bele transforma ha’u nia valor moris ninian, ha’u nia pricípio moris ninian, ha’u nia convicção iha momento ida ne’e ne’ebe desafio barak, tentações oi-oin ne’ebe loron ba loron continua provoca ha’u nia fiar, ha’u nia valor sarani ninian. Hafoin mak ha’u bele iha coragem atu fo han ema seluk, hahu housi ha’u nia família no ha’u nia maluk sira. Buat sira ne’e hotu los duni, wainhira ita atu husik pão ida ne’e atu transforma ita nia isin, ita nia neon, ita nia valor dala barak hakanek duni ita nia an, hakanek duni ita nia amizade, ita nia toman sira, neneik ho ida ne’e de’it mak ita nia força energia Maromak nian ne’ebe ita simu iha Eucaristia ne’e bele liberta lori moris ba ema barak.

Ohin ita rona iha Evangelho koalia kona ba “Pão  fuan lima no ikan fuan rua”, hahan ida ne’ebe ita bele dehan katak laos abundância iha refeição ida, maibe ema hotu han to’o bosu. Buat hotu ne’e mosu tanba fiar sira nian prontidão, sira nia disponibilidade atu partilha sira nia pobreza ho sira ne’ebe miséria liu. Ho meios ida ne’e mak manifesta nafatin Maromak nia presença ne’ebe ativa iha mundo ne’ebe ema hamlaha sei barak. Wainhira ita nia pobreza bele sai aihan ba hirak ne’ebe hamlaha mak ita mos bele sai escolante lolos  ita nain Jesus Cristo nian. Wainhira to’o ponto ida ne’e mak ita bele sukat duni katak ita nia participação iha Eucaristia sai duni fonte energia ninian ba ita nia crescimento humana no mos Espíritual nian.

Maluk doben sira, tinan-tinan ita celebra loron boot ida ne’e hodi adora ita Na’i Jesus Cristo nia Futar Isin no Ran. Mai ita mos lori ba uma novidade ruma iha tinan ida ne’e. Laos de’it ho buat boot mak ita bele halo buat ne’ebe boot hodi adora, maibe mos ho ita nia fiar ita Na’in Jesus Cristo ho oração housi buat ne’ebe kiik, ita bele halo acção diak ne’ebe boot. Jesus hanourin ita atu la desanima, maibe buka nafatin atu koko no fahe ita nia moris ho ema seluk basá wainhira ó fo, ó mos sei simu wain liu tan. Jesus la’os de’it habosu ema ho aihan ninian, maibe mos hanesan aihan domin, paz, unidade, comunhão, lialos no moris nian.

Ita hotu ohin tun housi Balide mai ita tuir didiak rona reflexão sira ne’ebe ohin lê durante iha ita medita kona ba terço, reflete teb-tebes ita nia realidade. Ho ida ne’e mak ohin ita hasa’e no consagra dala ida tan ba Na’i Maromak. Ho haraik an hakarak mos convida sarani sira hotu, atu ita hafoun ita nia domin ba Jesus ho gesto ida ne’ebe ita bele loke ita nia an, loke ita nia família ba Santíssima Corpo e Sangue do Senhor basá Nia mak aihan unidade, comunhão. Nia ne’ebe buka no hakarak atu horik iha ita nia fuan, maibe dala barak ita nia fuan taka metin. Hanesan dehan iha apocalipse hau mak ne’e iha hela odamatan oin, tuku hela o nia odamatan. Se ema ruma rona karaik ha’u nia lian no sei loke odamatan mai ha’u, no ha’u sei tama no han hamutuk ho nia to’o rohan .

Corpo de Deus hakarak ita atu compreende duni katak Na’i Maromak dere nafatin ita nia fuan, maske dala barak ita ema lakohi atu rona, Nia tuku ita nia odamatan fuan nian lor-loron, loke odamatan atu Ha’u bele tama, Hau moris ho ó. Ida ne’e laos atufo de’it ho minuto ida ka tempo ruma hanesan ita ba missa, maibe loron ida ne’e hakarak loke duni ita nia fuan atu ita nain Jesus cristo bele horik ho ita. Mai ita nia oração ohin nian ita fila ho liafuan ida ne’e; loke ó nia fuan mai Ha’u hanesan Ha’u loke Ha’u nian ba ó, nune’e Ha’u bele hamamar ó nia fuan ne’ebe to’os.

Hanoin ohin ita halo ita nia processão mai iha ne’e ho objetivo ida, finalidade ida hodi tuku tur hanai, adora Jesus nia Futar Isin, hodi harohan ba Nia atu bele tama iha ita nia fuan, atu bele hetan fatin iha ita nia fuan, iha ita nia família, iha ita nia comunidade, iha ita nia escola sira, iha instituições oi-oin nian iha rai ida ne’e atu Nia bele hamamar ita ema nia fuan, loke hodi moris tuir Na’i Maromak nia hakarak ida de’it mak ita nia Santidade.

IHA NE’EBE IHA LIA BOSOK NO TOLOK, IHA NE’EBA LAIHA DOMIN NO DAME

Missa solenidade festa Santo António, Motael, 13 de Junho de 2019

 

Uluk nanain hau nia boas Festas ba paroquiano Motael nune’e mos ba Instituição Polícia Nacional Timor-Leste ninian ba ita boot sira nia festa ne’e. Nune’e mos ha’u nia parabens ba alin sira hotu ne’ebe ho hakarak rasik ohin imi hakat mai iha ne’e hakarak completa imi nia percurso sacramento iniciação ninian liu housi Sacramento Crisma.

Tinan ida dala ida ita halibur hamutuk nu’udar comunidade sarani atu hasae ita nia agradecimento ba Na’i Maromak ne’ebe haraik ona ba ita mahein diak ida “Santo António”, ne’ebe bali ita iha tinan tomak nia laran, la’o hamutuk ho ita, horik iha ita nia paróquia, iha ita nia Instituição no iha ita nia família. Ohin lokraik ida ne’e ita mai atu dehan obrigado Na’i, maibe dalaruma ita balu susar atu halo buat ida ne’e; ita simu, maibe la agradece, nune’e mos ita usa, maibe la aprecia diak ne’ebe mai housi Na’i Maromak.

Ohin oportunidade atu agradece tanba Santo António hanourin, hatudu ona iha nia moris SER SAL no SER LUZ hanesan ohin ita rona iha Evangelho. Oinsa atu sai masin no naroman. Então oportunidade ida atu ita haklaken no haklean liu tan ita nia fiar iha Na’i Maromak. Wainhira ita Nain Jesus Cristo usa símbolo rua ne’e ‘masin no naroman’ atu dehan, katak iha possibilidade atu lakon sira nia função sira masque masin fo nia mer no naroman mos labele fo tan nia naroman. Nia bolu atenção ida especial ba Nia Escolante sira nia missão iha rai ida ne’e ser Sal.

Iha mundo ida ne’e buat ida único ita bele dehan mos indispensável, basá ita hotu hatene didiak katak masin indispensável atu fo sabor ba aihan. Nune’e mos buat ne’ebe ita nain Jesus Cristo hakarak atu sublinha mai ita sarani no ita tau atenção mak ida ne’e; ita ema nia moris sei laiha folin, sei laiha sentido se ita la fo sasin kona ba Evangelho.

Escolante ida ne’ebe la fo sasin serve tan saida atu hanaran Escolante? Nune’e mos sarani ida ne’ebe que laiha capacidade atu fo sasin kona ba nia fiar, kona ba nia Uma Creda iha ema seluk nia oin, nia sarani? Sasin ne’e indespensável labele haketak housi sarani ida nia moris. Ne’e laos buat foun, maibe kna’ar Profeta, Nailulik no Liurai ne’ebe que simu iha loron baptismo ninian no kna’ar ida ne’e hametin liu tan iha Sacramento Crisma. Ne’e duni, alin doben sira, atu simu Sacramento Crisma tau ida ne’e iha imi nia neon atu sai sasin. Sarani ida, jovem católico ida tem que lori ida ne’e. Hametin liu tan ho Sacramento ida ne’ebe imi sei simu ho presença Espírito Santo ninian. Hanesan ohin ita rona iha Livro Ben Sirá bolu ita nia atenção ida ne’ebe especial kona ba função Espírito Santo nian ida-idak atu hanourin, la’os de’it hanourin kona ba matenek ida rai ninian, maibe hanourin hatene hamtauk Na’i Maromak. Ida ne’e mak iha Santo António iha ninia moris nia hakarak ita atu lori oinsa hatene hamtauk Na’i Maromak iha ita nia moris.

Ita fila ituan ba Santo António acontecimento ida husik hela decisivo ida iha nia moris. Ida ne’e mak nia rona wainhira primeiros 5 missionários nia martírio provoca kedas jovem António desejo ida atu buka, atu la’o ba iha ne’ebe! Buka perfeição hakarak hakbesik liu tan ba Na’i Maromak, nia husu kedas atu sai Irmão ida, ikus mai sai duni missionário ida ba iha rai Maroco, maibe Maromak nia plano seluk ba nia. Maibe buat ne’ebe inportante mak ida ne’e; nu’udar jovem wainhira nia situação ida precisa nia tulun, precisa nia energia, nia matenek nia la adia. Maibe lalais, hatan kedas oferece ninia an, nia prontidão, nia disponibilidade, generosidade. Ida ne’e mak característica e ita bele dehan mos tem que ser sai duni atitude fundamental ida ba foinsae sira, liu-liu alin oan sira ne’ebe atu simu Sacramento Crisma lato’o de’it atu completa percurso ne’ebe ohin ha’u dehan, maibe Sacramento Crisma tem que lori novidade ida ne’e ba imi nia moris.

Gesto daruak nian, nia buka saida iha nia moris. Hanesan jovem bai-bain nia lori iha nia laran dejeso bo’ot ida, nem ida be bo’ok, hanoin fali jovem ida ne’ebe riku ida ne’ebe hasa’e lia ba Jesus; Na’i ha’u sei halo sa los atu bele hetan moris ne’ebe diak liu. Se mak iha nia moris la preucupa, la buka buat ne’ebe diak, la buka buat ne’ebe ksolok, la buka buat ne’ebe furak liu iha moris? Moris ida ne’ebe perfeito tuir Santo António nian, hakarak lao iha dalan perfeição nian.

Maluk doben sira, ohin ita mai iha ne’e atu festeza mahein ita nia aman Santo António nia Festa, ita lamai atu haksolok de’it, maibe ita mai ho hanoin ida, ita mai ho preucupação ida tanba ita hakarak hakat besik liu tan ba Na’i Maromak. Ita hotu preucupa ho ita nia perfeição moris iha Na’i Maromak nia presença. Ida ne’e mak ha’u hanoin nu’udar ema ita hotu buka ida ne’e. Masque wainhira ita hare iha televisão, wainhira ita le’e iha jornal, ita hare iha média social liafuan ne’ebe sadik malu nian mak saida! Tolok, hatun malu, provoca malu, lori lia ba malu, bosok, na’ok, interesse pessoal, interesse grupo mak dalabarak hamosu hahalok sira hanesan Sexo livre, soe bebe, moras AIDS, Arte marciais, rama ambon, droga, ta malu sai tiha fali vocavolário ida ka toman ida ka cultura ida timor nian karik.

Santo António ohin convida sarani sira liu-liu foinsae sira atu pausa ituan atu hateke ba Santo António, hare iha nia liman lírio. Lírio símbolo laran mos ‘pureza’. Iha nia liman nia kous hela Minino Jesus, hatudu Jesus mak centro iha ninia moris.

Saida mak precisa atu bele fo sabor ba rai ida ne’e, ba sociadade ida ne’e, ba Uma Creda ida ne’e. Ita nia amo Papa convida ita bebeik katak, mai ita hanourin ita nia oan sira linguagem domin, linguagem dame ninian. Mai ita tatoli, fo sasin ho ita nia vida, ho ita nia hahalok, ho ita nia moris linguagem domin linguagem dame ninian ba ita nia oan sira. Ba imi foinsae sira mai haburas linguagem dame ninian iha imi nia le’et.

Santo Padre mos dehan tan iha ne’ebe mak iha lia bosok, iha ne’ebe mak iha lia tolok iha ne’eba laiha domin no dame. Ohin mos opurtunidade diak ida hakarak fo apreciação boot tebes ba Exelência Comandante Geral PNTL nian ho nia equipa ba sira nia iniciativa hakerek mos história foun ida iha sira nia Instituição PNTL nia laran hodi reconhece fidelidade kabenain lubuk ida iha Instituição nia laran. Ita saran família sira laos de’it ita saran família sira ne’ebe atu simu reconhecimento, maibe ita saran família hotu-hotu ne’ebe pertence ba iha paróquia Santo António Motael nian. Ita reza ba Santo António atu tulun família sira atu bele metin liu tan atu termo ka vocavulário divórcio nian iha ita nia rain tem que mihis ida ne’e mak ita tem que preucupa.

Símbolo daruak nian mak sai naroman ‘ser Luz’. Wainhira ko’alia kona ba sai naroman tau escolante besik tebes em comunhão ho nia mestre, ita nai Jesus Cristo ida ne’ebe naroman mundo ninian. Missão Escolante sira nian atu continua laos halai mesa-mesak, maibe lao hamutuk ho nia mestre. Oinsa mak escolante sira bele fo sasin naroman ida ne’e se sira la lao hamutuk ho nia mestre! Escolante sira nia naroman consiste iha ita nia liafuan no hahalok sira. Tan ne’e mak compara karik ita nia moris lor-loron hakarak usa de’it comparação ida ne’ebe símples hanesan lâmpada oan ida atu lakan precisa ha pilha nune’e mos ita nia moris mos hanesan ne’e, se ita hakarak atu fo naroman ne’e ba ema seluk wainhira ita lori iha ita nia fuan Jesus. Maibe se ita lori ita nia an de’it laiha Cristo saida los mak atu sai novidade.

Atu escolante sira ha duni força atu sai naroman Santo António husik hela recomendação ruma; nia dehan Wainhira koalia kona ba oração hanesan relação ida domin ninian nebe lori ema ida atu converça ho Na’i Maromak, iha ne’ebe halo klamar ida hetan ksolok mai housi Na’i Maromak. Santo António fo hanoin mai ita oração precisa ambiente ida silêncio nian, precisa iha experiência ida, fo fatin ita nia fuan, hadook buat ne’ebe destroe ita, buat sira média nian, pelo menos fo duni minuto oan ruma hodi hanoin fo fatin ba Na’i Maromak iha ita nia moris. Santo António Doutor boot oração nian nia dehan, wainhira ita reza precisa atitude 4 nebe labele falta; wainhira harohan tem que loke ó nia fuan fo confiança ba Na’i Maromak, wainhira ó harohan ó conversa ho Na’i Maromak, wainhira ó harohan apresenta ba Maromak ó nia precisa, wainhira ó harohan ó precisa hahi, hanai.

Tuir Santo nia hanoin domin Maromak nian mak sai abut no hun ba moris Espiritual sarani ida nian. Ida ne’e mak Santo António convida ita se ita ne’ebe harohan mak lori duni progresso laos de’it progresso físico, maibe mos tem que preucupa ho progresso Espíritual. Tanba ita ema laos isin de’it ita mos iha Espírito ne’ebe ita tem que preucupa.

Maluk doben sira, Santo Antónia ida ne’ebe milagroso hanesan ita barak hatene, ita barak mos koko tiha ona iha experiência. Dalabarak ita mos hakarak sai hanesan Santo António, iha ne’ebe ema halo milagre ita mos ba iha neba. Então ita nia fiar mos dalabarak ne’e sukat de’it ho milagre. Quanfo laiha milagre ona fiar mos namlele tiha. Maibe Santo António nia dehan, segredo milagre ninian iha oração. Reza makas hanesan iha nia experiência ne’ebe nia foin haktuir mai ita nia repete ho liafuan símples ruma nia dehan, wainhira ó harohan ba Jesus Nia hamamar ó nia fuan ne’ebe to’os, wainhira ó husu nia hamidar tentação sira ne’ebe moruk, wainhira ó hanoin kona ba Nia, Nia loke ó nia fuan, wainhira ó le’e no reflete Nia Liafuan Nia loke ó nia neon.

Maluk doben sira, Santo Antónia convida ita atu labele baruk atu reza makas liu tan. Oração bele lori transformação husi laran to’o liur. Wainhira nia dejeso buka Maromak mihis, ita fo fatin ba buat seluk atu buras iha ita nia fuan. Santo António nia mensagem mak ne’e, se ita hakarak hare milagre lor-loron iha ita nia moris hakasan ba abut metin iha Na’i Maromak, hakasan an ba atu hatene duni reza. Oração mak bele lori solução mai iha ita nia família no ba ita nia sociadade. Ohin loron problema barak ne’ebe mosu iha família, problema barak ne’ebe mosu iha ita nia rain karik tanba ita nia desejo buka Maromak hahu mihis dadaun. Tan nee iha loron ida nee mai ita ho haraikan hateke ba Santo António hodi harohan atu ita bele habo’ot, haburas, hametin liu tan ita nia fiar nudar sarani.