shadow
Diocese de Dili > NOTÍCIAS > HOMILIA DO BISPO

ATU VOCAÇÃO MISSIONÁRIO NIAN BURAS NAFATIN TEM QUE REZA

Ohin ita celebra São Francisco Xavier nia Festa, Ita mai ho centimento ida de’it atu agradece hare fila fali tinan tomak ida ne’e nia laran ne’ebe São Francisco Xavier sai nu’udar mahein ba comunidade sarani nu’udar Paróquia Hatulian nian ba tinan 17 no nu’udar missão 98. Ita hare ba história ne’e hatudu katak tempo naruk ida ona mak sarani comunidade ida ne’e hamahan ana iha São Francisco nia okos. Iha ita nia ksolok, iha ita nia terus, iha diak no a’at nia laran ita halai nafatin ba buka nia husu nia harohan da’et liu housi nia intercessão atu fó nafatin kbi’it no matak malirin ba sarani sira hotu.

Ne’e duni, obrigado Na’i fó mai ami Santo ida, ami nia mahein ne’ebe loron kalan lao ho ami iha tempo naruk ne’e nia laran. Dala barak ita hatene de’it husu, maibe atu fó obrigado ne’e ita moe. Atu tane liman ita la moe, maibe atu fó obrigado ne’e ita moe. Ne’e duni ita hanoin fila fali loron boot ida ne’e sai mos opurtunidade ida mai ita atu hare ba iha ita nia Padroeiro São Francisco Xavier missionário boot. Iha Uma Kreda reconhece katak missionário ne’ebe boot liu ona mak São Paulo tanba nia mak lao ba fatin barak hodi haklaken. Tuir fali mai Uma Kreda mos reconhece São Francisco Xavier nu’udar missionário boot mos liu-liu Apóstolo ida ba ita Oriente. Amo Papa Pio XI haklaken ba mundo tomak katak São Francisco Xavier laos Santo bai-bain de’it, maibe Padroeiro Universal das Missões.

Santo ida ne’e se iha sinal ruma ne’ebe hatudu teb-tebes ninia Espírito Missionário mak ninia gelo ba salvação. Gelo katak nia iha nia paixão, nia preucupa, nia cuidado, nia iha dedicação boot ida atu lori Liafuan diak ita Nain Jesus Kristo ninia cruz ne’ebe nia kaer iha nia liman lori ba mundo rai klaran. Nia la hare ba nia kolen, la hare ba distância, maibe ninia domin ba Maromak no nia domin hodi lori Evangelho Nai Maromak ninin ba ema hirak ne’ebe sidauk hatene liu-liu ba ita hirak ne’ebe sidauk conhece Maromak. São Francisco Xavier iha nia gelo Pastoral ne’e inspira ita nia missionário lubuk ida atu lori Evangelho to’o mai ita nia rain ne’e. iha ita nia rain ita mos hatene katak iha missionário barak mos mate iha ita nia rain hanesan; iha Cailaco, Leimeia nian mos, ne’e hotu hatudu katak tanba domin boot ba Maromak nia Liafuan sira ba lakon sira nia vida tanba Evangelho. Ida ne’e mak ita koalia kona ba Missionário sira nia laran manas, lori Maromak nia liafuan la sente kole, la sente mos baruk atu ba haklaken Maromak  nia Liafuan.

Se ita boot sira sei hanoin hetan Segunda Leitura Carta São Paulo nian ne’ebe iha I Dominggo ADVENTO ne’e ita rona, koalia kona ba Nakukun no naroman; imi buka hatais imi nia an ho hatais naroman ninian. Husik tiha buat ne’ebe nakukun ninian. Dala barak ita rona tiha Maromak nia Liafuan, ita sarani tiha ona, Liafuan diak ne’e todan tiha ona mai ita, maibe dala barak ita sei prefere, ita sei gosta liu hili atu moris iha makukun nia laran duque moris iha naroman nia laran. Ita gosta liu moris tuir isin nia hakarak duque buka buat ne’ebe Espírito ninian. Tan ne’e mak São Paulo dehan; Tempo ADVENTO nian ne’e tempo opurtuno, favorável. Tan ne’e, atu liu housi Festa São Francisco nian ne’e convida ita atu husik hahalok nakukun ninian hodi buka hatais hahalok naroman ninian. Ida ne’e mak nu’udar missionário ida. Ita hare iha São Francisco Xavier ninia hahalok ida tan; Generosidade. Katak nia la serviço ba nia an maibe nia hakasan serviço ba ema hotu nia diak.

Kna’ar missionário nian ne’e la termina de’it ho Escolante sira e Missionário nian mos la termina ho São Fancisco Xavier. Kna’ar missionário nian ne’e continua hadaet ba ita, tatoli ba ita. Ohin se mak tem que ser sai missionário; uluk nanain Amo Papa, Amo Bispo sira, Nailulik sira, Madre sira, Catequista sira, Gela sira, Apostulado de Oração no grupo oi-oin laos de’it ona Padre ho Madre, maibe sarani hotu-hotu iha obrigação ida ne’e. Tinan ida ne’e ita taka ano Jubileu Extraordinário Missionário amo Papa nia convite ba sarani mundo tomak mak Sarani hotu-hotu ba no haklaken (Batizados e Enviados). Sarani hotu-hotu simu obrigação ida ne’e atu haklaken, fó sasin kona ba Liafuan diak.

Fó sasin oinsa? Hanesan ohin ita rona katak iha ita nia rai sei iha buat ne’ebe nakukun nian ne’ebe marca ho trata malu ninian, insulta malu ninian, violência, hana malu, soe Bebé, tuda malu, desconhecido, ne’e liafuan ne’ebe ita tama tun sae iha Timor ne’e ita rona bebeik. Karik uluk ita la rona, maibe liafuan ida agora dehan hana malu, soe bebé, tuda malu, sunu uma, tá malu, sadik malu, tolok malu, hirak ne’e hotu ita bele dehan katak sei buras los iha ita nia sociedade laran.

Ohin São Francisco hanorin ita sai missionário aprende atu hamnasa. Wainhira iha ita nia oin hatudu hamansa ne’e katak iha laran iha domin, maibe se iha ita oin mak la hatudu ita nia hamnasa iha fuan atu iha domin ne’e susar ituan, fuan atu iha perdão ne’e susar ituan, fuan atu iha generoso no haraikan ne’e susar ituan. Tan ne’e mak São Francisco nia liafuan mai ita ida de’it mai ita aprende atu lori ita nia cruz, mai ita aprende atu hadomi ita nia cruz.

Tan ne’e ita husu ba São Francisco Xavier liu-liu iha loron ida ne’e ne’ebe ita celebra ita nia Padroeiro, ita reza atu vocação missionário iha rai Hatulia ne’e bele buras nafatin. Ita hanoin kona ba missionário ita mos tem que reza nafatin ba vocação missionário ninian, vocação Amolulik ninian. Diocese Dili sidauk haruka Padre ida ba Missionário, maibe liu housi Congregação Religioso/a sira missionário barak ne’ebe housi Timor ba serviço iha rai seluk, maibe ita tem que nafatin reza ba iha vocação missionária ninian.

“LAO BA MUNDO TOMAK HAKLAKEN LIAFUAN DIAK BA CRIATURA HOTU”

Ohin comunidade Dare haksolok tanba ita halibur hamutuk atu festeza ita nia mahein São Francisco Xavier nia Festa ba tinan 51, decade 5 nia laran mak Paróquia ida ne’e hamahan an iha São Francisco Xavier ninia okos. Durante tempo naruk nia laran ita lao iha ita nia susar no ksolok, iha ita nia fiar no iha tempo a’at nia laran ita halai ba buka hodi husu Intercessão São Francisco Xavier ninian.

Tan ne’e tinan ida dala ida atu ita halibur hamutuk atu agradece. Obrigado ba Maromak tanba fó mai ita São Francisco Xavier atu sai Paróquia Dare nia mahein. Maibe dala barak tinan ida dala ida susar mos mai ita atu fó ita nia nia minuto ida ka oras ida atu halibur hamutuk nu’udar comunidade atu agradece ba Maromak ba presença São Francisco Xavier nian iha ita nia comunidade nia le’et.

Ne’e duni, loron ida ne’e ba Paróquia no Dare tem que ser sai loron ida ne’ebe importante. ita ida-idak tem que sente diak ruma ne’ebe ita simu housi ita nia mahein. Ne’e duni ita ida-idak koko atu haraikan hodi hare fila fali diak ne’ebe ita simu. Então ida ne’e mak halo ita sente orgulho wainhira ita halibur hamutuk atu agradece ba diak ne’ebe ita simu housi Na’i Maromak liu housi Intercessão ita nia mahein São Francisco Xavier nian. Ida ne’e mak razão ne’ebe iha dader ida ne’e convida ita hotu atu halibur hamutuk hodi reza, Canta, hodi hasae ita nia agradece.

Tan ne’e ha’u convida sarani sira ohin liu-liu iha tinan 51 aniversário Paróquia Dare nian ne’e atu lori ita renova ita nia an, hadia ita nia an, ita nia relação ho ita nia mahein, nia ne’ebe bali ita tempo naruk nia laran. Bispo sira iha tempo ruma troca malu, Pároco sira mos troca malu, maibe Mahein nia nafatin hamutuk ho ita, ida ne’ebe conhece, acompanha no ida ne’ebe hatene ita nia diak no a’at sira.

Se ita hare ituan Evangelho ohin loron ninian koalia mai ita kona ba; ‘Jesus nia mandato ba iha nia Escolante sira’: ‘Lao ba mundo tomak haklaken liafuan diak ba Criatura hotu-hotu’. Iha Uma Kreda reconhece katak missionário ne’ebe boot liu ona mak São Paulo tanba nia mak lao ba fatin barak hodi haklaken. Tuir fali mai Uma Kreda mos reconhece São Francisco Xavier nu’udar missionário boot mos liu-liu Apóstolo ida ba ita Oriente. Tanba nia nu’udar missionário iha rai Japão, rai Índia.

Amo Papa Pio XI haklaken ba mundo tomak katak São Francisco Xavier laos Santo bai-bain de’it, maibe Padroeiro Universal das Missões. Tan ne’e ita sente contente tanba ita nia paróquia bele foti nia nu’udar ita nia padroeiro. Santo ida ne’e se ita hare didiak katak, nia iha sinal ruma ne’ebe hatudu teb-tebes ninia Espírito Missionário mak ninia gelo ba salvação. Gelo katak nia iha nia paixão, nia preucupa, nia cuidado, nia iha dedicação boot ida atu lori Liafuan diak ita Nain Jesus Kristo ninia cruz ne’ebe nia kaer iha nia liman lori ba mundo rai klaran. Nia la hare ba nia kolen, la hare ba distância, maibe ninia domin ba Maromak no nia domin hodi lori Evangelho Nai Maromak ninin ba ema hirak ne’ebe sidauk hatene liu-liu ba ita hirak ne’ebe sidauk conhece Maromak. São Francisco Xavier iha nia gelo Pastoral hodi lori Maromak nia liafuan hafoin ita nia missionário lubuk ida hatutan. Então ida ne’e mak ita bele hare iha São Francisco nia vida (gelo Pastoral). Buka serviço ba klamar sira.

Ita nia Papa ida agora ne’e sempre usa liafuan ida dehan; Periferia katak sira ne’ebe iha dook liu Evangelho la to’o ba sira, sira ne’ebe sei moris iha nakukun laran, sira ne’ebe sidauk hatene atu sira mos bele hatene ida ne’e. ita foin hahu tempo ADVENTO. Se ita boot sira sei hanoin hetan Segunda Leitura Carta São Paulo nian ne’ebe iha dominggo ADVENTO ne’e ita rona, koalia kona ba Nakukun no naroman; imi buka hatais imi nia an ho hatais naroman ninian. Husik tiha buat ne’ebe nakukun ninian. Dala barak ita rona tiha Maromak nia Liafuan, ita sarani tiha ona, Liafuan diak ne’e todan tiha ona mai ita, maibe dala barak ita sei prefere, ita sei gosta liu hili atu moris iha makukun nia laran duque moris iha naroman nia laran. Ita gosta liu moris tuir isin nia hakarak duque buka buat ne’ebe Espírito ninian. Tan ne’e mak São Paulo dehan; Tempo ADVENTO nian ne’e tempo opurtuno, favorável. Tan ne’e, atu liu housi Festa São Francisco nian ne’e convida ita atu husik hahalok nakukun ninian hodi buka hatais hahalok naroman ninian. Ida ne’e mak nu’udar missionário ida. Ita hare iha São Francisco Xavier ninia hahalok ida tan; Generosidade. Katak nia la serviço ba nia an maibe nia hakasan serviço ba ema hotu nia diak.

Ohin se ita rona didiak Evangelho São Mateus ninian wainhira koalia kona ba liafuan nakukun São Mateus dehan: Nakukun ne’e hahalok Satanas ninian. Força Satanas ninian mak buat hotu ne’ebe buka obriga ema atu fila kotuk ba Na’i Maromak nia hanorin, fila kotuk ba Maromak nia hakarak. Satanas hakiak iha ita mak: hahalok foti an ninian, karakten ninian, kanten ninian, hanoin de’it ba nia an nunca se hanoin ema seluk nia precisa. Satanas nia hahalok mak buka ódio malu, hahalok sira egoistas ninian ne’ebe dala barak ita hotu hakiak iha ita nia an. Tan ne’e iha Evangelho dehan; dalan único atu ita bele hasoru/ conquista/ manan satanas nia hahalok ho dalan ida de’it katak wainhira ita fial fali ba Maromak.

Tan ne’e mak São Francisco ohin convida ita fila fali ba Maromak nia Liafuan, rona Maromak nia Liafuan, loke an ba Espírito Santo.

Ita nia moris lor-loron ne’e Satanas haleu nafatin ita. Santo sira dehan katak; ema ida ne’ebe santo liu ne’e loron ida nia monu iha sala dala 7. Ita sira ne’e fali la hatene dala 7 ou 70 dala 7 karik. Tan ne’e mak se ita monu karik ba sala precisa Confessa no Eucaristia. Comfessa no Eucaristia precisa bebeik laos hein de’it Natal ho Páscoa mak comfessa. Maibe precisa bebeik atu nune’e ita bele dehan katak ita nia fuan ne’e ba los Na’i Maromak. Sacramento Comfessão no Eucaristia convida ita lao ba. Ordem ne’ebe tina 2000 resin liu ba Jesus molok fial fali ba Nia Aman Nia haruka ona Nia Escolante sira ba atu Haklaken.

Se mak bele hatan ba mandato Jeusu Cristo nian ne’ebe dehan Ba no Haklaken ba mundo tomak; ida uluk Amo Papa nia serviço, daruak Bispo sira nia serviço, datolu nian; Padre sira nia serviço, dahat nian; Madre sira, dalima nian; Catequista sira, dalanen nian; Apostulado de Oração sira, no ikus mai sarani hotu-hotu. Sarani hotu-hotu ne’ebe simu ona batismo ita hotu iha kna’ar atu dehan Ba no Haklaken. Uluk nanain haklaken ho ita nia moris.

Festa São Francisco Xavier nian ne’e hakarak tatoli mai ita katak sarani liu-liu labarik no foinsae sira Dare ninian hakasan atu soe ba kotuk hahalok sira nakukun ninian, loke imi nia fuan ba hahalok naroman ninian. Ita foin celebra aniversário missionário nian ne’e Amo Papa usa liafuan ida dehan; ‘Batizados e Enviados’. Ida ne’e mak Amo Papa sadik ita hotu atu labele kole no baruk halao kna’ar ida ne’e. São João Paulo II dehan ; ida ne’e mak dever ida sarani ida tem que halo iha comunidade laran atu cria relação ne’ebe diak ho ema hotu. Wainhira sarani ida hola conciêncai katak nia sarani, servico missionário ne’e automático. Se ha’u sarani atu halo diak ne’e labele ema seluk obriga ha’u, se ha’u sarani atu hadomi malu ne’e ha’u nia obrigação.

Sarani ida tem que aprende lori nia cruz. São Francisco hanorin ita atu fiar iha Cristo basá ita nia norma moris nian ne’e mak cruz. tanab ne’e ba foinsae sira São Francisco Xavier sadik imi oinsa mak atu Jovem Apóstolo ba Jovem. São Frnacisco mos nia liafuan ba Inan-Aman sira atu sai Missionário. Missionário ne’e laos ho koalia de’it maibe missionário ho vida, ho hahalok. Tan ne’e ho São Francisco nia Festa convida sarani Paroquiano tomak atu ita hotu hateke ba São Francisco Xavier nia imagem atu ita halo exame de conciência; saida mak ha’u tem que halo hodi ba nati tuir missionário boot ida ne’e nia vida? Oinsa mak ha’u bele sai missionário iha ha’u nia família laran? Oinsa mak ha;u bele sai missionário iha ha’u nia comunidade?

ADVENTO CONVIDA ITA ATU HARAIK AN

Ohin iha loron ida ne’e ita sarani Lis-Mori nian halibur hamutuk ho sarani sira housi Dare, Aileu nian hamutuk iha Lis-Mori ita mai ho finalidade ida; hamutuk ho sira iha Primeira Semana ADVENTO nian ne’e atu Inaugura sira nia Capela. Tan ne’e ha’u hakarak hahu ho liafuan ida ne’ebe ohin ita rona iha Primeira Leitura Profeta Isaias nian ne’ebe dehan: “Imi mai ita sae ba Na’i nia foho, ba Jacob nia Maromak nia Uma Lulik”. Então ohin ita mai iha Uma Kreda ida ne’e katak ita mai iha Maromak nia horik fatin. Ita mai iha ne’e ho finalidade ida katak ita mai atu rona Maromak nia liafuan. Maromak nia Liafuan haklaken ba ita hotu. Maromak nia liafuan ne’e laos ita rona de’it, Maromak nia liafuan ne’e convida ita atu aprende kona ba moris.

Ó keta moris hanesan ema bilan maibe buka moris hanesan ema matenek. Moris ne’e laos ó nian, moris ne’e Maromak mak tau iha ó nia liman. Ne’e duni hadomi moris ne’e ba! Respeita moris ne’e ba! Tau matan ba moris ida ne’e. maromak nia liafuan ne’ebe ohin rona labele rona de’it maibe ita aprende housi buat ne’ebe ita rona, atu Maromak nia liafuan bele transforma ita nia moris.

Nu’udar oan iha uma keta la halo to’os karik, la obedece ba Inan-Aman karik, buka de’it imi nia hakarak de’it, buka problema de’it karik, ADVENTO ne’e Maromak convida sai oan ida ne’ebe hatene obedece, sai oan ida ne’ebe hatene halo tuir Inan-Aman, sai oan ida ne’ebe tem que hatene disciplina. Wainhira ita aprende atu rona no halo tuir maka aban bainrua ita bele sai labarik ne’ebe diak.

Ba Inan-Aman sira iha tempo ADVENTO ne’e nia laran, Maromak nia liafuan ne’ebe haklaken ba Inan-Aman sira atu halo saida? Inan-aman sira nia papel oinsa mak hatudu sira ninia domin ba oan sira, dedicação ba oan sira, acompanha oan sira, hanourin sira atu lao iha dalan ne’ebe los. Tanba ne’e iha Maromak nia futar oin Maromak husu ba ó; nu’udar Inan-Aman ó halo duni ó nia dever kalae? Tanba ne’e mak ADVENTO convida ita atu ida-idak hare ba ninia an.

Nu’udar juventude iha rai ida ne’e oinsa mak contribui ba Uma Kreda no Estado ka nu’udar jovem buka de’it problema. Ikus mai liafuan no hahalok hotu ne’ebe ita halo ita ida-idak sei hatan iha Na’i Maromak nia Futar oin. Cedo ou tarde ita hotu tem que hatan. Laiha ema ida ne’ebe moris mai sai desconhecido iha Na’i Maromak nia Futar oin. Iha Timor ema gosta usa liafuan Desconhecido; ha’u halo tiha buat ida subar tiha tanba tauk atu tama iha cadeia. Maibe iha Maromak nia oin ita sei la halai housi justiça tanba Maromak tau iha ita ida-idak nia sorin ita nia Anjo da Guarda atu acompanha ita. Tan ne’e mak ADVENTO fila fali mai ita mai iha Kreda ida ne’e ita mai ho finalidade ida ne’e; ‘Atu rona Maromak nia Liafuan’. Iha mensagem ida ne’ebe Domingo-Domingo Maromak koalia nafatin mai ita atu ita keta baruk atu rona, atu ita keta baruk ba missa no reza.

Ha’u fó parabens ba Amo Pároco, ba sarani Lis-Mori, ba Benfeitor sira, sira ne’ebe soe hamutuk força halo Capela oan furak los. Ne’e duni Capela furak laos atu ema hamriik iha fatin ruma ema hare mai furak, maibe Capela ida ne’e fatin capáz tanba fatin ida ne’e atu ita hasoru malu ho Na’i Maromak. ita la gasta ita nia energia, ita la gasta ita nia osan saugate de’it, maibe ita gasta ita hatene katak contribuição ne’ebe ita fó hodi halo fatin diak ida iha ne’ebe ita bele hasoru malu ho Na’i Maromak.

Dala barak ita ba iha fatin ruma ita hare katak ema wainhira halo rate ne’e furak los, halo ita nia Uma lisan kapáz gasta osan bobot, maibe ita nia Capela dala barak kiik, kiak, bibi ho karau mak hela tiha fali. Se ita fo ba matebian sira buat mesak furak, ba ita nia uma lisan atu halo buat mesak furak no ba Maromak ne’ebe fó moris mai ita, Maromak ne’ebe fó buat hotu mai ita, ita labele fó fila fali ba Nia diak ne’ebe ita hetan ne’e bele halo fali diak ida ba Maromak atu ita bele hasoru malu ho Nia? Tan ne’e mak ba sarani Lis-Mori hakasan duni halo duni Capela oan ida hanesan Pároco dehan uluk ne’e didin de’it ho Bebak, maibe ho esforço sarani ida ne’e nian consegue tau hamutuk força hodi rehabilita Capela ida ne’e atu nune’e bele hasoru malu ho Maromak. ho condição Capela ne’ebe diak, imi tama iha Capela imi iha duni hanoin ida katak atu hasoru malu ho Maromak atu ita rona Maromak koalia mai ita no ita mos bele loke ba Maromak ita nia defeito sira.

Iha momento hirak ne’ebe mak ema ses housi ita, iha momento hirak ne’ebe mak ema haluha ona ita, iha momento ida ne’e mak ita buka duni Maromak, loke ha’u nia an husik Maromak atu hela, hatudu dalan mai ha’u no resolve ha’u nia problema. Maromak la tun mai atu fó kedas 100 dolar ba ó atu resolve kedas ó nia problema, maibe Na’i Maromak haraik matak malirin ba ó nia fuan no laran ó bele hetan dalan atu bele resolve ó nia problema. Hetan dalan atu lao ba oin, loke ó nia fuan hanesan naroman boot ida mai ita. Tan ne’e ita haksolok ho ita nia celebração ohin ho inauguração Capela.

Ne’e duni, ADVENTO convida ita atu hare liu tan ba ponto ida ka rua: 1). Se ohin ita rona didiak iah Evangelho kona história Centurião ninian. Centurião katak Comandante boot ida ne’ebe ba buka Jesus tanba ninia atan feto ne’ebe morias todan. Ikus mai nia hetan milagre Jesus haraik ba nia isin diak. Maibe buat ida ne’ebe ohin hakarak dehan mai ita buat balun ne’ebe dada ita nia atenção; se dehan katak Centurião hetan milagre tanba sa? primeiro tanba ninia domin. Nia comandante boot ida maibe nia preucupa ho ninia atan ne’ebe moras. Ne’e atu dehan mai ita sarani katak tempo ADVENTO ninian ne’e atu ita loke ita nia matan, loke ita nia fuan, atu hateke mos ba ita nias família laran. Dala barak iha ita nia família laran dala ruma iha ema ruma ne’ebe ita la tau matan; sira ne’ebe moras, kiik, sira ne’ebe ita despreza, sira ne’ebe lao iha dalan ita la liga sira, iha tempo ADVENTO mak Maromak convida ita labele hare de’it sira ne’ebe mos, diak, matenek, maibe hare ema hotu liu-liu sira ne’ebe iha ó nia uma laran.

Se imi hakarak celebra imi nia NATAL didiak aprende iha semana 4 ne’e nia laran husu ba Maromak loke ó nia fuan, loke ó nia matan atu bele hare. Atu bele hare precisa virtude ida tan; virtude HARAIKAN ninian. Ohin loron iha ita nia família, iha ita nia rain virtude humildade ne’e dala barak lakon. Jesus ne’ebe Maromak Oan iha NATAL ne’e comvida ita atu hanoin kona ba mistério boot ne’e; Haraikan ninian.

Virtude ida tan iha centurião ne’e mak FIAR. Ho nia fiar centurião ne’e dehan; naran katak ita dehan liafuan ida de’it ha’u nia atan sei hetan isin diak tanba nia hare ba Jesus nu’udar Messias Maromak nia Oan. Tanba fiar ida ne’e mak ita hamutuk, tanba fiar ida ne’e mak ita hari ita nia Uma Kreda.

ITA HAHU TEMPO FOUN IDA KATAK ADVENTO

Ohin ita hahu tempo foun ida katak ADVENTO. Ita hanaran tempo foun tanba iha Calendário Liturgia Romano nian mak hahu housi Janeiro ba hotu iha Desembro. Maibe iha Calendário Liturgia nian hahu housi ADVENTO ba remata iha FESTA CRISTO LIURAI. Ne’e duni ohin ita hahu tempo foun tempo ADVENTO nian. Tanba ne’e mak ohin ita hahu Primeira Semana ADVENTO nian. Iha Igreja sira simbólicamente sempre hahu tau lilin 4 iha Uma Kreda. Sunu Lilin 4 ne’e hatudu katak ita hahu ona tempo foun.

ADVENTO hanesan ita hotu hatene katak prepara ba ida ne’ebe atu mai. Uluk nanain wainhira koalia kona ba Calendário, saida mak valor ka folin Calendário Liturgia ninian mai ita! Ne’e duni ita hanoin kona ba ADVENTO tinan foun ne’e ita hahu ona Calendário foun 2020 ninian e ita husik hela ona Calendário tuan. Ne’e katak tempo ne’e Calendário hatudu mai ita katak ita ema ne’e moris iha tempo ida nia laran. Tempo katak buat hotu ne’e liu. Ita ema ne’e moris iha tempo. Ita iha ita nia hun e ita mos iha nia rohan. Maibe ida ne’ebe laiha hun no rohan mak Maromak de’it ne’ebe ita bolu Eterno. Maibe ita ema ne’e lae! Ita ema ne’e ida ne’ebe temporário, passageiro ne’ebe liu. Maibe dala barak ita moris hanesan tiha Maromak hodi haluha tiha katak ita ne’e passageiro. Ita haluha tiha katak ita moris iha rai ne’e temporário de’it. Dalaruma ita moris iha rai ita haloan katak rai ne’e ita nian, sasan ne’e ita nian hodi halo ita nian hanoin sira ne’e as liu tiha fali Maromak. Então dala barak ita moris haluha tiha ita nia identidade, ita nia natureza ema nu’udar criatura laos criador.

Criatura katak ita ne’e iha ida ne’ebe halo katak ita mai housi ida ne’ebe criador katak Maromak. Tan ne’e mak Calendário Liturgia ne’e bolu ita atu hare fila fali ba ida-idak nia an. Tinan-tinan quando ita hau tempo foun hanesan ADVENTO ne’e hahu koalia mai ita katak ita ema ne’e lao rai, ita moris iha rai ne’e mos temporário de’it; balu moris iha to tinan 10, balun moris to tinan 20, balun 40, balun 50 hanesan Bíblia dehan ne’e ne’ebe forte liu ne’e moris to’o tinan 70/80. Ida hatudu mai ita katak ita laos nain ba moris ida ne’e. Então Liturgia convida ita mos atu moris hanesan ema matenek atu ita mos dalaruma husu ba ita nia an; ha’u moris ba saida? tanba sa mak ha’u moris? Ha’u nia moris iha rai ne’e ba buka los saida? ha’u moris ba osan! Ha’u moris ba poder! Ha’u moris ba riku! Ha’u moris de’it atu bele hetan de’it buat hotu ne’ebe isin nia hakarak! Maibe ita bele dehan katak ohin ó riku aban riku iha fali ema seluk. Ohin ó dehan katak ó nia saúde mak diak liu aban ó moras no sente katak ó fraco liu iha mundo ida ne’e. Ohin ó sente katak ó mak força liu aban força ne’e iha fali ema seluk.

Ne’e duni Calendário Liturgia convida ita atu ita fila fali husu ba ita nia an; saida mak ha’u buka iha ha’u nia moris nu’udar ema! Saida mak ha’u buka iha ha’u nia moris nu’udar sarani! Iha ha’u nia tinan 10,20,50 ne’ebe Na’i Maromak fó mai ha’u ne’e saida los mak ha’u tau iha ha’u nia preucupação! Ida ne’e mak ADVENTO convida ita atu fila fali hodi hein Jesus ne’ebe mai tiha ona ita atu celebra fila fali iha tinan-tinan iha loron NATAL nian. Katak Calendário Liturgia nian ne’e convida ita hodi fanun ituan ita durante ita lao mai to’o iha tempo ida ne’e dalaruma ita keta lao sala karik, lao karik la tuir dalan, lao de’it tuir ita nia hakarak karik ita koko atu hare fila fali atu bele prepara an nafatin. Hanesan Evangelho ohin dehan; Matan Moris no Neon Nain.

Ha’u hakarak kaer liafuan ida iha São Paulo nian ne’ebe ita rona iha Segunda Leitura; Soe ba dook hahalok nakukun nian hodi tau fali hahalok naroman nian. são Paulo convida ita iha tempo ADVENTO ida ne’e nia laran se ita hakarak duni prepara ita nian an koko atu hare tok keta halo hahalok nakukun nian domina hela ha’u mos karik. Tan ne’e buka atu husik hahalok nakukun ninian no buka atu foti buat ne’ebe naroman ninian.

Ita husu então hahalok nakukun nian mak saida? maluk doben sira, ita tinan ida ne’e foin daudaun ita celebra tinan 20 ita nia Consulta Popular e ita mos celebra tinan 20 INTERFET tama iha Timor, ita nia ukun rasik an mos halo ona tinan 18, ita hare ba kotuk katak funu iha Timor ne’e laiha tiha ona. Uluk mak ita funu hasoru ita nia Invasor sira ita barak mate, terus, violência, buat hirak ne’e hotu mak hetan tiha ona ita nia Independência. Ne’ebe ohin loron ita Ukun rasik an tiha ona, maibe dala barak saida mak ita hare, saida mak ita rona, laos violência mak continua! Ita rona nafatin dala barak ema trata malu, tolok malu, sadik malu, hamoe malu, tuda malu, ta malu, Oho malu lao nafatin iha ita nia rian. Violência continua iha grupo ida ne’e ho grupo ida neba, derepente de’it iha grupo desconhecido ida oho ida ne’e, ita la hare ita nia inimigo maibe derepente ita rona katak ema ida mate iha fatin ida ne’e, mate iha fatin neba. E violência ita hare katak sei buras nafatin. Hare ba buat hirak ne’e hotu ita bele husu ba ita nia an; tanba sa mak sei mosu comportamneto hirak hanesan ne’e? tanba sa mak sei iha ema buka malu nafatin? Tanba sa mak sei iha ema oho malu nafatin, trata malu nafatin, ta malu nafatin. Liafuan desconhecido ne’e ita rona bebeik iha ita nia rain. Quando iha ema ruma mate no lakon ita usa nafatin katak nia ema desconhecido ida. Ne’e atu dehan katak iha ita nia segurança sira nia oin ita halai buka atu subar housi Lei, maibe iha Maromak nia oin ita nunca atu subar. Ita bele halai housi segurança, ita bele halai prisão Becora, maibe ita lori hela ita nia conciência, ita lori hela todan boot ida, ita la hakmatek. Ida sei hanesan kanek ida ne’ebe continua book ita nia laran halo ita la hakmatek tanba ita nia conciência mak acusa ita todan liu fali ita ba hela iha Prisão. Maibe atu dehan de’it katak hirak ne’e hotu ita husu nafatin ba ita nia an tanba sa mak hahalok ida ne’e sei mosu nafatin.

Hahalok hirak ne’e mak ohin São Paulo ohin dehan; Hahalok sira nakukun ninian. Ida ne’e mak Segunda Leitura ohin convida ita iha tempo ADVENTO nian ne’e atu bele identifica, ida-idak koko hare ba nia an hodi reconhece katak ha’u mos sei iha hahalok nakukun ruma, ha’u hasai no soe ba dook hahalok nakukun ninian hodi buka atu hatais, buka atu usa hahalok naroman ninian.

Saida mak hahalok naroman ninian? Respeito malu, hadomi malu, la ódio malu, maibe hatene hadomi, hatene buka dame, hakarak atu buka hametin unidade nafatin. Então ida ne’e atu dehan naroman no naroman ida ne’e mai housi ne’ebe? Mai ita sarani CRISTO mak naroman ninia hun. Ida ne’ebe ita prepara iha ADVENTO ne’e atu bele iha tempo NATAL Nia bele lori naroman ida ne’e haroman fila ita hotu.

Jesus rasik dehan: Laos hodi nehan mak selu nehan, matan selu ho matan, maibe Nia dehan; Hadomi ó nia funu baluk sira, reza ba ema ne’ebe halo a’at ó. Ida ne’e mak ita dehan novidade, ida ne’e mak halo ita sarani ne’e diferente housi ema seluk, ida ne’e mak missão sarani sira nian atu hadomi, ida ne’e Jesus convida ita atu halo buat ne’ebe ema dehan katak impossível sai possível. Ida ne’e laos buat ne’ebe foin mosu, ita hare kedas ona iha Primeira Leitura Profeta Isaias koalia tiha ona iha tempo barak molok ita nian Jesus Cristo nian Isaias haklaken tiha ona buat ida ne’e. Nia dehan: Foho a’as mak Maromak horik fatin, ema barak ba iha neba ba buka Maromak. ida ne’ebe buka Maromak ba horik iha Maromak nia kadunan. Ema ne’ebe buka Maromak saida mak sei mosu; ema ne’ebe buka duni Maromak sei nakfilak Instrumento funu ninian hodi halo sasan sira agricultura ninian.

Ne’e duni maluk doben sira wainhira koalia kona ba violência hirak ne’e ita dehan violência hirak ne’e mai housi ne’ebe, ódio maluk hirak ne’e hotu mai housi ne’ebe, buat hirak ne’e hotu nia hun fila fali ba ita ema nia hanoin a’at, egoista, tanba hanoin ha’u nia an de’it, ha’u mak ema ne’ebe hakiak violência, ha’u mak ida ne’ebe odio malu nain, ha’u mak ida ne’ebe gosta atu hirus, ha’u mak ida ne’ebe gosta atu hirus no ha’u dala barak susar atu compreende ema seluk. Ida ne’e fó hanoin de’it mai ita sarani katak wainhira ita koalia kona ba sala boot ulun hitu ne’e mai housi ita. Katak iha ita nia an ne’e iha buat ida foti an, iha ita nia an iha buat ida barukten, iha ita nia an iha buat ida hirusten, iha ita nia an iha buat ida hanoin an nian, iha ita nia an iha buat ida hanoin a’at nian. ne’e duni buat a’at ne’e ita hotu iha maske Jesus mai hodi ninia terus no mate atu kasu ita nia hahalok hirak ne’e, maibe dala barak hahalok hirak ne’e sei buras nafatin. Tan ida ne’e mak tempo NATAL nian, tempo ADVENTO ninian convida fila fali ita ida-daik atu hare ba ita nia an, hare ba ita nia moris oinsa ita buka atu hakonu ita nia fuan liafuan dame, domin, ho ida ne’e de’it mak ha’u fiar katak ita bele sai protagonista ba desemvolvimento, protagonista ba progresso iha ita nia rai laran.

Ohin ita sarani liu-liu sarani Tohu-Meta contente, haksolok marca história foun tanba Capela foun, rehabilita Capela. Tanba ne’e ba Amo Pároco, Chefe Suco, sarani tomak ha’u fó parabens ba imi nia esforço tomak atu rehabilita Capela ne’e sai foun iha tempo foun nian laran atu hakatk ba loron NATAL ninian. Ha’u fó parabens ba imi tanba imi mos sente duni ona katak dala barak ne’e ita nia rate sira ne’e ita halo buras teb-tebes, gasta osan barak, ita nia uma lisan sira ita gasta buat barak, maibe dalaruma Maromak nia uma dalaruma ita la preucupa.

Capela laos bispo nian, Capela laos Pároco nian, maibe Capela ne’e sarani Tohu-Meta ninian. Capela ba ita sarni ne’e fatin ida ne’ebe ita sarani hasoru malu ho Na’i Maromak. Se ba iha fatin ne’ebe ita atu ba toba hanesan Rate nian ita nian ruin hela iha neba, ita nia Espírito lahatene iha ne’ebe, ita halo mesak furak no halo festa tan iha neba. Ita nia uma lisan sira ne’ebe atu hanoin de’it kona ba ita nia abut ka hun, maibe ita nia uma lisan labele representa fali Maromak. Maromak mak iha lisan sira ne’e hotu nia leten. Dala ruma ita nia uma lisan sira ita hadia diak liu fali, maibe ba Maromak ita la tau matan hodi haluha tiha.

Tan ne’e ha’u fó parabens ba sarani Tohu-Meta maske sacrifício hotu ne’ebe imi halo, maibe ohin imi bele inaugura imi nia Capela hodi hakarak mos halo duni fatin ida ne’e ita tama ita bele hakmatek hodi bele reza, ita bele hanoin kona ba Maromak. capela ida ne’e halo laos atu ema hare de’it, maibe Capela ida ne’e halo atu sarani bele mai iha ne’e hodi hasoru malu ho Maromak.

SASUKAT DOMIN NINIAN MAK HADOMI LA HO SUKAT

Hakarak hahu ha’u nia reflexão ne’e ho duni Leitura ne’ebe ohin ita rona liu-liu iha Primeiro Leitura se ita rona didiak dada ituan ita hotu nia atenção ba evento ida ne’e. Ohin iha Primeira Leitura dehan: “Ha’u sei tun ba no Ha’u sei ko’alia ho ó. Iha neba Ha’u sei hasai Espírito ne’ebe horik iha ó hodi halo Nia horik mos iha sira, nune’e sira mos bele hamutuk ho ó tau matan ba povo no ó sei la mesak tan iha todan ida ne’e”.

Maske Israelita sira halo tiha ona juramento ida/Aliança ida ho Na’i Maromak, povo ida ne’e sidauk iha confiança total iha Na’i Maromak nia liaman. Então sira continua halerik ba Maromak tanba susar oi-oin ne’ebe sira simu. Exemplo ida mak foin ita rona oinsa Moises nia rasik hasae lia tanba kna’ar ne’ebe nia simu housi Na’i Maromak todan tebes ba nia. Ohin ita rona nia halerik  mos dehan; Tansa ita halo terus ita atan; povo ne’e ha’u mak kous; ha’u mesak labele halo buat ida; naha ida ne’e todan tebes mai ha’u. Moises sente naha ida ne’ebe nia lori ne’e todan tebes duni. Tan ne’e ho haraikan nia hasae ho laran metin lian ida ne’e ba Na’i Maromak hodi husu tan servisu nain basá to’os boot maibe ema atu halo servisu ituan de’it.

Ita hare mos história tempo uluk nian nune’e mos tempo ita nian manifesta atitude ruma ne’ebe hanesan sentimento ruma Moises nian. Primeiro; dala barak lori ema atu hadookan housi Na’i Maromak e dala barak mos susar atu compreende tanba sa ema hakarak ses housi Maromak nia Futar oin; tanba ema preucupa liu-liu ba nia an duque Maromak nia Vontada, Maromak nia Plano. Ema ida-idak hare liu ba nia hakarak as liu fali Na’i Maromak nian.

Maibe ohin ita lubuk oan ida ne’e halibur hamutuk iha ne’e ita haksolok agradece ba Maromak tanba foinsa’e oan ida pronto hatan ba Maromak. Tanba foinsa’e oan ne’e nia generosidade ne’e mak ohin lori ita mai hamutuk. Milagre boot ohin ninian ne’e sai realidade ida tanba nia disposição ‘SIM’ ba Na’i Maromak.

Maske nune’e ita hotu hatene didiak housi história Salvação nian katak Maromak hadomi tebes ninia povo nunca bele fila kotuk. Housi povo ida ne’e mak Nia fihir, Nia hili no Nia haraik kbiit Espírito atu nia halao Maromak nia servisu. Hanesan foin ita rona oinsa Na’i Maromak hatan ba Moises nia halerik; Maromak dehan; Ha’u sei hasai Espírito ne’ebe horik iha ó hodi halo nia horik mos iha sira. Nune’e sira mos hamutuk ho ó tau matan ba Maromak nia povo. Ne’e la hanoin katak ó atu halo mesak, maibe fahe mos Espírito ne’ebe ó simu ne’e  atu nune’e hamutuk ho ema seluk imi bele halo diak liu tan. Ne’e haforça liu tan buat ne’ebe hakerek iha Carta ba Hebreu sira ne’ebe dehan: Amolulik boot ida-idak mai housi ema sira le’et no ema foti nia atu hamrik iha ema sira nia fatin iha Maromak. Hamrik iha Maromak nia futar oin atu hasae buat karan no Sacrifício ba sala sira. Nia hakarak hatudu mai ita hotu katak, Amolulik ida mai housi comunidade sira nia le’et.

Jovem ida ne’ebe iha daudaun ita hotu nia oin hanesan ha’u dehan; tan nia laran luak ba Maromak, generosidade ba Maromak, ba Uma Kreda mak ohin convida ita hotu mai iha ne’e. Ita hatene Diácono ninia força no ninia defeito balun. Maibe jovem ida ne’e maske ho buat hirak ne’e hotu la sai hanesan obstáculo ida ba nia atu dehan Não, maibe nia lao nafatin husik ona família atu lao hodi hatan ba bolu ida ne’e hodi husik hela rai doben Oe-Cusse atu ba descobre Maromak nia hakarak. Tan ne’e mak ohin ita hotu halibur hamutuk iha ne’e atu acompanha ninia momento especial ida ne’e tanba nia descobre Maromak nia Vontade. Maromak fihir nia housi sarani sira nia Le’et atu haruka nia ba moris iha sarani sira nia le’et mos.

Ohin ita halibur hamutuk atu agradece no harohan atu ho Espírito Maromak nian halo Santo ita nia maun-alin ida ne’e. ida ne’e mak halo momento ida ne’e sai importante no único tebes, liu-liu ora-oras tan ho oração consagratório nian ne’ebe atu hametin liu tan Maromak nia liafuan ne’ebe ora-oras tan ita sei rona ne’ebe dehan; Na’i haraik mos mai ami kbiit laek colaborador ida ne’e basá ami kuran tebes nia atu halo nia halao kna’ar sacerdócio Apostólico nian, halo foun fali iha nia laran Espírito moris Santo. Iha consagração Amolulik configura ba Cristo hanesan Ulun no bibi atan Kreda nian. Nia mos hariku ho kbiit Espiritual nian iha ne’ebe nia hola parte iha autoridade Jesus Cristo nian atu guia Kreda ho tulun Espírito Santo ninian.

Então força Espírito ida ne’e mak bele transforma ida ne’ebe Na’i Maromak fihir ona ne’e atu sai duni sasin lolos, sasin domin ne’ebe manas, caridade ne’ebe moris, caridade ne’ebe visível, caridade ne’ebe contagiosa Cristo moris hias ninian iha nia moris lor-loron. Ida ne’e mak oração Consagratório hakarak dehan katak Espírito ida transformadora atu hafoun iha ida ne’ebe Na’i Maromak bolu hafoun ninia laran, iha nia laran Espírito moris santo ninian.

Espírito ida ne’e duni mak guia Rev. Eugénio iha ninia dalan vocação nian no liu housi tulun ema nian, liu housi acontecimento oi-oin, ikus mai nia descobre katak Maromak hadomi tebes nia hanesan iha ninia moto; domin horik iha Nia de’it mak bele hetan moris ne’ebe iha duni ksolok. Horik iha Cristo katak renuncia buat ksolok hotu ne’ebe isin ninian. Jesus bolu ninia Escolante sira atu buka duni ksolok ita hanaran verdadeira alegria, laos lakon tempo ho ksolok ne’ebe mai no ba, maibe nia bele descobre katak iha mos ksolok falço lubuk ida ne’ebe Nia dehan; Lae, maibe nia buka duni ida ne’ebe bele hetan iha Maromak.

Tan ne’e Jesus la apresenta ninia domin hanesan modelo ida de’it, nune’e atu ita bele imita, ba nati tuir, maibe Jesus nia domin ba ita moris atu Escolante/Discípulo ida continua laos imita de’it maibe continua. Ita hotu iha batismo ita mate ona ba Nia, sai Nia Escolante ida. No ba ne’e de’it mak Nia moris iha ita.

Tan ne’e oinsa mak buat hirak ne’e bele sai concreto iha ita nia moris no oinsa mak buat hotu ne’ebe ita rona serve ba ita nia maun-alin Rev. Eugénio ne’ebe ora-oras tan sei simu kna’ar Amolulik nian ida ne’e. Buat hirak ne’e sei la sai realidade ida iha ita nia moris se ita la hakasan atu lori iha ita nia kabás ita nia Cruz lor-loron nian ho domin, ho haraikan, ho laran midar.

Ita nia Santo Padre dehan: Cruz mak sasukat domin nian iha momento hotu-hotu. Laos de’it iha momento ksolok nian, maibe iha momento hotu-hotu. Los duni katak ita hadomi sem Cruz, maibe wainhira iha Cruz ha’u nia maneira oinsa ha’u lori Cruz mak sasukat domin nian. Ida ne’e mak ita bele dehan marca ida ne’ebe único iha ita nia moris ba ita sira e’ebe Escolante Cristo ninian. Oinsa mak ita nia Cruz ne’e sai diferente iha ita nia moris. Tan ne’e mak Santo Agustinho iha nia dalan rasik nia hare ida ne’e ho matan seluk nia dehan: “Sasukat domin ninian mak hadomi la ho sukat”. Ne’e katak se ó tuir duni Cristo hakrak lori duni Nia Cruz tem que fó ó nia an total sem reserva. Ne’e ha’u fó hotu laos katak iha tempo ne’ebe diak ita hadomi malu, maibe wainhira susar mai imi desarasca imi nian ba. Tan ne’e precisa hadomi ida ne’ebe saran an tomak laos ona tuir ha’u nia hakarak.

Santo Padre iha loron hirak ne’e nia halo comentário ida liu-liu kona ba Evangelho ohin ne’e nian nia dehan: hadomi ha’u nia inimigo sira. hadomi sira no halo sira sai ha’u nia belun. Maibe laos sai ha’u belun de’it, maibe oinsa ha’u bele hadomi ema ne’ebe ha’u la gosta ikus mai ho domin ida bele transforma sira ba ha’u nia maun ho alin. Ne’e katak domin ne’e laiha duni sukat. Wainhira ita hanoin duni katak housi Cristo ninia Cruz mak domina ita nia moris, ita tem que mate ba ita nia an atu Nia mak moris duni ba ha’u. Ha’u fiar katak ida ne’e mak sai experieência ida ne’ebe convênce Rev. Eugénio hanesan nia habadak iha nia motto.

Exemplo ida seluk ita hare iha Carta daruak São Paulo nian oinsa São Paulo contretiza iha nia moris buat ida ne’ebe ita hotu liu-liu Rev. Eugénio atu tau nafatin iha nia neon figura São Paulo ninian. Nia dehan katak chave ba autenticidade mensagem Paulo ninian mak nia saran an, ninia disponibilidade fo nia an tomak la sura kole, la baruk atu haklaken Maromak nia liafuan. Hanesan ohin ita rona katak maske nia iha cadeia, maibe nia continua haklaken Maromak nia fuan. nia iha gelo pastoral ida ne’ebe extraordinário. Hein katak ida ne’e mos bele inspira ita nia Amolulik foun.

Dalan atu domin ne’e bele sai los nia descobre tiha ona, maibe dalan ida ne’e atu bele sai duni verdadeira alegria ba ita nia Amolulik foun ne’e, hau hanoin atu lori ita boot sira ba cerimónia ne’ebe tuir mai ne’e iha buat rua ne’ebe ba ami Amolulik sira dala barak tem que sai nafatin referência: 1) Sinal dahuluk ne’ebe distingue discípulo ida mak; humildade. Ne’e katak ida ne’ebe hili fatin ikus pronto atu servi, mate ba nia an bele servi ida ne’ebe kiik no kiak ho mansidão, paciênçia no tolerância.

Gesto visível ida ne’e Amolulik sei toba iha ita hotu nia oin. Toba iha rai hatudu ita nia moris haraik an nian mate ba an, mate ba mundo hodi moris iha obidiência no moris de’it ba Maromak. Toba ne’e ita koko nafatin aprende toba nafatin no latan nafatin iha rai atu bele koko, hau hanoin laos de’it loron Ordenação nian mak atu toba, maibe ita Amolulik sira, sarani sira nudar kaben nain ita mos aprende atu halo gesto ida ne’e ba malu, precisa nafatin haraik an ba malu, aprende atu abandona ita nia an iha Maromak nia liman, laos de’it haraik an, maibe saran ba Maromak ita nia plano, ita nia perocupação hotu atu ho Maromak ita fiar katak buat hotu sempre iha dalan (Virtude de humildade).

2) Simu buat karan povo santo hasae atu ó apresenta ba Maromak, hanoin didiak kona ba buat ne’ebe ó halo, ba nati tuir buat ne’ebe ó sei hala’o, ó halo ó nia moris sai tuir mistério Na’i nia cruz nian. Buat ne’ebe ó sei celebra lori nafatin povo ne’ebe Na’i Maromak saran ona ba ó liman hodi oferece sacrifício ida ne’e ho fuan no laran

Halo cada Eucaristia ne’ebe ó celebra sai nafatin hanesan premeira no ultima iha ó nia vida mak bele sa nafatin fonte we matan ba ó nia vida sacerdócio.   

La Hodi Ha’u, Imi Labele Halo Buat Ida

Maromak nia ema mak ida ne’ebe hare sasan no acontecimento sira lor-loron nian ne’ebe haleu nia  ne’e ho matan Maromak ninian. Arquidiocese de Dili, Paróquia Letefoho dader ida ne’e haksolok, hasae agradece ba Na’i Maromak ba nia domin ida ne’ebe sukat mai ita. Basá Ordenação mak sinal  idas ne’ebe visível encontro domin nian ida. Sinal domin Maromak ninian, Cristo ninian, nune’e mos domin ida ne’ebe hatan ba Maromak ninia bolu. Ita hotu sei sasin ida ne’e. iha diálogo ne’ebe sei halo ora-oras tan ho ita nia diácono Rev. Mariano Maia. Iha diálogo ne’e manifesta opção fundamental ne’ebe candidato halo molok atu hakuak moris Sacerdócio nian. Ida ne’e hatudu tebes nia intensão ne’ebe los atu saran moris tomak ba ida ne’ebe bolu nia. Maromak bolu ho domin, ema hatan ho fuan no laran.   

Ida ne’e laos história foun ida, maibe iha kedas ona tinan 625 molok Cristo ninian, Maromak fihir tiha ona jovem ida naran Zeremias ne’ebe ohin ita rona iha Primeira Leitura; jovem ida ne’ebe diak, jovem ida ne’ebe sensível, jovem ida ne’ebe inteligência. Ita hare iha Primeira Leitura; wainhira ó sei iha inan nia knotak Ha’u hatene nanis ó, Ha’u hili nanis tiha ona ó. Hili atu sai Profeta haklaken mensagem ida ne’ebe nia contemporâneo sira mos la espera.

Ohin iha acontecimento boot ida iha ita hotu nia oin katak Maromak maske ida ne’ebe ita conhece, ida ne’ebe uluk ita hatene, housi Família boot ida ne’e Maromak fihir nia(diácono Mariano Maia) no Maromak haruka nia atu ba. Hanesan uluk haruka Zeremias ba sira ne’ebe kiik, kiak to’o hirak ne’ebe boot atu fo hanoin ba sira hotu katak; hamatak malu, lohi malu, lia bosok ne’e sala. Sei haklaken uluk ba sira ne’ebe servi iha Kreda no to’o ba sira ne’ebe fan sasan iha mercado katak bosok ne’e laos buat ida ne’ebe normal-falta de caridade.

Zeremias hetan kna’ar ida ne’e atu haklaken ho lian makas, atu tatoli liafuan murak Maromak nian ba Maromak nia povo. No iha coragem atu denuncia hahalok no vicios sira ne’ebe buras hela iha sociedade, comunidade nia le’et. Ida ne’e mak Profeta ida nia kna’ar. Maromak bolu foinsae ida housi foinsae sira nia le’et hanesan foinsae sira seluk. Hanesan Segunda Leitura fo hanoin mai ita katak Amululik boot hotu mai housi ema sira nia le’et. Nia la foti ema ida ne’ebe extraordinário, maibe Nia foti ema bai-bain ida tanba ema bai-bain mos iha ninia fraqueza, iha ninia miséria, iha nia limitações hanesan mos ema sel-seluk. Bolu ema bai-bain ne’e atu nia mos bele compriende ema seluk nia fraqueza no limitação, atu nia hatene hatudu ninia solidariedade ho ema seluk. Tanba experiência tiha Maromak nia Misericórdia, nia mos bele sai laran luak liu tan ho sira ne’ebe kiik no mukit. Tan Nia laran luak ho ita, tanba sa ita labele laran luak ho maluk sira seluk!

Tan ne’e mak ita nia Amo Papa nia liafuan dehan; Nada é mais urgente que isto proximidade, vigilância, habera-se da carne do irmão que sofre. Ida ne’e mak razão tanba sa Amululik ida tem que besik liu tan ba hirak ne’ebe dook, ba hirak ne’ebe kiik no ba hirak ne’ebe ema hewai. Ida ne’e mak papel Profeta ida nian. Profeta mak ida ne’ebe hare sasan sira ne’ebe domin nian ho matan Maromak ninian (O Profeta é aquele que Vé o mundo com os Olhos de Deus). Ida ne’ebe labele nonok de’it wainhira hare buat hirak ne’ebe la lao tuir ninia dalan la lao tuir Maromak nia hakarak. Nia iha força ida ne’ebe mai housi Maromak, força ida ne’ebe mai housi laran ne’ebe incontrolável, lori nia atu foti Nia lian hodi denuncia sala; buat hirak ne’ebe hanesan abuso, violência no buat hirak ne’ebe sobu ema nia moris no crime ne’e hotu ne’ebe halo hasoru humanidade. Hanesan uluk ohin mos profeta sira profeta sira nia missão laiha doferência ne’ebe boot. Tan ne’e mak ora-oras tan iha oração consagratório nian ita sei harohan nune’e: Aman bele halo buat hotu, ami harohan ba ita boot atu halo hela ba atu ita atan ida ne’e hetan dignidade Presbítero sira nian. Halo foun fali iha nia iha nia laran Espírito moris Santo sira nian hodi hafoun dignidade presbítero nian.

Identidade Amolulik nian ida mai housi participação ida específica iha Cristo nia Nailulik. Ida ne’ebe simu Ordenação sai ba Kreda no iha Kreda imagem ida real, imagem ida moris, imagem ida transparente Cristo Sacerdócio ninian. Tan ne’e ida ne’ebe sai Amolulik sai imagem Cristo ninian ne’ebe real, visível, moris no transparente. Liu husi nia moris nia bele comunica, bele fahe graça ne’ebe nia simu ba Maromak nia povo.

Ho consagração Amolulik simu poder kbiit força Espiritual participa iha autoridade Cristo ninian no iha nia Espírito atu guia Uma Kreda, guida Maromak nia povo. Nailulik ida ho ordenação nia simu imagem ida real, moris no transparente Cristo nian iha Kreda no iha povo sira nia oin. Ida ne’e mak tane dignidade celebração dader ida ne’e nian liu husi ita nia oração Na’i Maromak mak foti Nia atan ne’e ba grau Presbítero nian.

Ida ne’ebe atu simu Ordenação, nia sei halo nia promessa atu hatene halo nia kna’ar didiak, haklaken, hadomi Maromak nia Futar liafuan. Hasanto nia moris ho Sacramentos Eucaristia no reconciliação nian no harohan nafatin. Ida ne’e mak dalan ba santidade amolulik ida nian, ida ne’ebe mak dalan santidade povo Maromak ninian ne’ebe liu husi Amolulik orienta Maromak nia povo liu husi meios sira ne’e.

Sacramento ho Maromak nia liafuan mak we matan ne’ebe haburas nafatin graça sacerdócio nian ne’ebe atu simu. Ita bele husu ba ita nia an dalan saida precisa fo atensão atu nia bele persevera nafatin iha vocação ne’ebe nia simu. Laos fácil atu ita halo no hahu buat hotu focus nafatin iha Maromak. iha loron Ordenação ninian loron sira forte ninian ita fácil buka Maromak, maibe dala barak tendência ita ema ninian ita iha tentação boot atu sura liu ita nia força, conta liu ita nia capacidade, ita nia abilidade pessoal duque Maromak ninian. Tan ne’e ita nia Amo Papa convida ita hotu liu-liu ba ita nia diácono ne’ebe atu simu dau-daun Ordenação katak fundamental tebes aprende loke relação ho Aman Maromak basá Nia mak we matan no hun graça ninian.

Amolulik ida precisa desafia nafatin nia an atu buka husik nia toman sira ne’ebe buka hanoin an de’it no comfia an, maibe hatene buka liu atu comfia iha Na’i Maromak duque ninia força rasik (permanecer diante do Senhor deixando seu olhar percora a minha vida). Hakas atu tam iha ksolok ida Cristo nian. Ida ne’e mak segredo Apóstolo ida nian. Ksolok Amolulik ida nian iha Cristo de’it. Se ita la hetan ksolok iha vida no dalan ne’ebe ita hili ka vida ida ne’ebe ita opta, neneik eh kleur ita sei hetan problema, ita sei hetan susar no infidelidade ne’e bele mosu.

Sira ne’ebe Maromak bolu hanesan ita nia diácono iha tinan 10 resin nia laran, nia rasik buka atu descobre no ikus mai nia dehan katak; laiha dalan seluk nia atu nia bele hetan ksolok duque sai Sacerdócio. Nia fiar katak liu husi dalan ida ne’e de’it nia bele haksolok no sai Santo. Tan ida ne’e ita hare iha nia motto ne’ebe dehan; La Hodi Ha’u, Imi Labele Halo Buat Ida. Jesus mak Uvas hun no Escolante sira mak nia sanak.

Amolulik no Eucaristia iafuan rua ne’ebe labele haketak malu ka existe liafuan ida ne’ebe inseparável. Eucaristia mak acto central iha Amolulik ida-idak nia moris. Ida ne’ebe celebra Eucaristia laos de’it atu tuir rito no liafuan hirak ne’ebe hakerek, maibe tem que husik Cristo atu tama iha imi nia moris. Halo ha’u nia moris tuir Cristo ninian conforme hau nia existência tuir Cristo ninian. Ida ne’e mak dalan único atu halo ha’u besik liu tan ba maluk sira. tan ne’e, Exortação São nia ne’e los duni katak; oinsa mak ó dehan hadomi Maromak ne’ebe la hare se ó la hadomi ó nia maluk ida ne’ebe iha ó nia sorin? Papa Francisco aumenta tan dehan; iha Amolulik barak ne’ebe la hatene atu rona, tan ne’e ha’u husu ba ha’u nia an; se la hatene rona ó nia maluk ne’ebe iha ó nia sorin oinsa mak ó bele rona Maromak ne’ebe la iha ó nia sorin. La hodi Ha’u, Imi labele halo buat ida. tama iha oração ho Cristo ajuda atu itabele hetan centimento ida Cristo nian, atu nune’e de’it mak ita ne’ebe hakarak sai instrumento Maromak nian.

Wainhira halai no ses husi ita nia relação ho Na’i Maromak, la fo importância ba ita nia oração saida mak acontece ita sei tentação atu buka fatin ne’ebe mais seguro katak fatin hirak ne’e mak dalaruma cria ita hanoin atu hari ita nia mundo mesa-mesak, cria ita nia mundo kikoan, hadoolan husi ema seluk no sai ema ida ne’ebe mais individualista. No dala barak mos ita la lao tuir buat ne’ebe los, maibe tuir ita nia hakarak de’it.

Tan ne’e mak atu bele persevera ho Maromak nia liafuan ho oração; Ha’u mak Uvas hun lolos ema ne’ebe la horik iha Ha’u ema sei haketak tiha nia katak Maromak iha domin ne’ebe especial mai ita ida-idak. Tan ne’e sanak hirak ne’ebe maran mak refere ba ema nia miséria, ema nia infidelidade, fraqueza oi-oin. Tan ne’e precisa purificação.

Tan ne’e ohin sarani doben sira ita hotu ho ksolok boot halibur hamutuk iha Paróquia ida ne’e agradece ba Maromak ba graça boot Sacerdócio ninian ne’ebe haraik ba ita nia diocese iha tinan ida ne’e.

Ita harohan atu liu housi Nain Feto do Carmo mahein Paróquia ida ne’e nian, atu ita nia alin doben ida ne’ebe Na’i Maromak fihir ona bele hakonu duni ho diak oin oin, atu nia bele sai duni Amolulik ida ne’ebe laos badinas de’it, maibe amolulik ida ne’ebe hatene duni transmite ba povo Maromak nia Liafuan.

KETA HALO HA’U AMAN NIA UMA SAI UMA CONTRATO NINIAN

Ohin loron Sábado 09 fulan Novembro tinan 2019 Santa Igreja celebra Dedicação de Basílica Laterão de Roma katak A mãe de todas as Igrejas da cidade e do mundo. Wainhira celebra festa ida ne’e, uluk nana’in Santa Kreda hanorin ita atu celebra Dedicação Kreda ida katak atu celebra ita Na’i Jesus Cristo nia isin nebe moris Hias hosi mate no hanoin fali hun Maromak nian iha história salvação ninian. Ita Na’in Jesus Cristo nia isin ne’ebe moris Hias fali, ida ne’e mak templo lolos no templo ida Jerusalem nian ne’e imagem ida simbólico, profético. No hosi “corpo ressucitado do Senhor “mak templo lolos. Housi Nia mak suli we matan moris nian, we ida ne’e mak símbolo Espírito Santo ninian. Festa ohin nian convida ita atu harohan ba Uma Kreda Roma nian ba ita nia Papa Francisco nune’e ita bele hametin liu tan ita nia laço ho Amo Papa nu’udar vigário Pedro nian ne’ebe simu kna’ar atu tau matan ba Uma Kreda.

Sarani Turiscai consciente liu tan domin Maromak nian  tanba ohin ita hotu hatene katak ita celebra tinan 25 presença paróquia ninian. Tanba iha tinan 25 nia laran Maromak halo buat barak tebes ba sarani Turiscai. Sinal perfeito ida mak ohin iha ita nia leet, ita nia oan doben Diácono Carlito Teti-Laca nebe Maromak bolu no hili nia ba Nailulik, ida ne’e mak ita bele dehan katak novidade boot ida. Tan ne’e oportunidade ida ba sarani Turiscai atu agradece ba Maromak.

“BUAT NEBÉ BA EMA LABELE, MAIBÉ BA MAROMAK BUAT HOTU BELE DEIT”(Mt.19,26). Ita hotu hatene didi’ak katak ita Na’i Jesus Cristo mak Na’ilulik boot Testamentu Foun ninian. Iha Nia deit mak halo Maromak nia povo santo sai povo ida ne’ebe hanaran povo Sacerdotal. Kna’ar atu halo santo, kna’ar atu ukun hanesan Aman ne’ebe haruka nia Oan mai nune’e mos Nia haruka uluk nanain Nia Escolante sira tuir fali hili nia saseluk sira bolu atu servi Maromak nia povo iha Nia Naran. Tan ne’e, Maromak continua bolu no ohin sai realidade ida iha Diácono Carlito nia moris.

Sarani doben sira Turiscai nian, tinan 25 Paróquia ida ne’e ninian labele sai de’it momento ida histórico iha ne’ebe marca ho atividades, marca ho programa oi-oin ne’ebe furak, maibe tem que sai mos oportunidade ida ba renovação.

Iha primeiro dia ne’e marca kedas ho missa Espírito Santo(Crisma) ba foinsa’e 150 resin hodi husu Espírito Santo mak iha duni força atu bele penetra, hanesan ahi no be ne’ebe tama borus iha fatin ne’ebe maran iha sarani hotu-hotu nia fuan, iha sarani hot-hotu ninia laran atu lori mudança ida ne’e. Então momento ida ne’e hotu dalan ida atu convida sarani sira laos deit iha imi nia fatin mak atu celebra, maibe convida mos sarani sira iha paróquia tomak, kiik no boot, hotu-hotu iha 25 anos nian ne’e sai hanesan momento ida importante, momento ida renovação ba sarani hot-hotu iha Paróquia Turiscai ninian. Jesto ida hatudu katak laiha ema ida exclui maibe sarani hot-hotu simu convite ida ne’e.

Iha Evangelho haktuir kona ba história templo ninian. Maibe ha’u foti deit liafuan ida, wainhira hare katak ema uja Uma Kreda hodi halo buat oi-oin, Nia dehan; “hasai buat hirak ne’e housi ne’e; keta halo Ha’u Aman nia Uma sai uma contrato ninian”. Hasai buat hirak ne’ebe la di’ak, hasai buat hirak ne’ebe sobu, hasai buat hirak ne’ebe estraga. Buat hirak ne’e dala barak sai ameaça comunidade iha ita nia Uma Kreda liu-liu iha Paróquia ida ne’e nia laran. Hanesan Uma Kreda nia hanorin, maibe dala barak mosu mos hanorin oi-oin nebe contra, hanorin oi-oin nebe dala ruma mai atu sobu Uma Kreda nia fiar, Uma Kreda nia dalan no Uma Kreda nia doutrina.

Ne’e duni, hasai buat hirak ne’ebe sai ameaça valor família. Família balu naksobu tanba influência oi-oin, tanba buat oi-oin ne’ebe tama iha ita nia rai laran atu hamihis daudaun unidade, domin, dame, perdão, haraik an, reconciliação iha ita nia família laran. Hasai buat ne’ebe sai ameaça ba futuro foinsa’e sira nian. Dala barak mos mosu promessa falso sira oi-oin ne’ebe dala barak atrai juventude sira tanba lobby ho sira nia promessa sira promete buat barak nebe estraga foinsa’e sira. Ho buat hirak ne’e hotu mak ohin celebração tinan 25 nian labele hare de’it ba iha festa ohin nian hotu ona, maibe festa ida ne’e tem que convida sarani hotu Turiscai ninian atu pausa laos deit hare ba kotuk, hare ba kotuk buat ne’ebe iha ona ne’e ita labele muda, maibe buat ne’ebe liu tiha ona tem que ser sai referência, sai lição ba ita hotu kiik no boot, ita hotu aprende haraik an, reconhece buat nebe ladi’ak. Buat nebe di’ak ita lori ba oin nafatin, buat nebe ladi’ak ita tem que iha coragem atu hadia, atu construi ita nia Uma Kreda, construi ita nia sociedade atu ita nia esforço ne’e hamutuk  halo ita nia uma creda ne’e sai lolos, verdadeiro rosto do senhor. Katak ita nia esforsu hotu maka hakarak transforma duni ita nia Uma Kreda sai ita Na’i Jesus Cristo nia futar oin lolos. Hanesan ohin rona iha Segunda Leitura Nia mak alicerce ba Kreda ne’e nian.

Mai ita ohin se ita hadomi duni ita nia Uma Kreda, mai ita harohan husu ba Maromak Espírito Santo, atu Espírito ida ne’e bele penetra hanesan Bé ne’ebe Profeta Ezaquiel ohin koalia; Bé ida ne’e bele hamamar ita nia fuan ne’ebe to’os atu nune’e ita nia fuan sira bele mamar fila fali hodi simu fila fali Maromak nia Liafuan hodi tulun ita lao nu’udar sarani ne’ebe los. Buat hirak ne’e hotu hodi harohan ba ita nia mahein Inan Doben Nossa Senhora de Fátima ne’ebe durante tinan 25 nia laran acompanha ona sarani sira iha imi nia ksolok no susar atu ita mos hakat ba oin tama iha história foun tinan 25 mai tem que ser sai Kreda ida ne’ebe metin liu tan, buras liu tan wainhira ita hotu sente duni katak Kreda ne’e ha’u nian ha’u mos iha papel no iha responsabilidade ida atu apoio ba melhoramento renovação ba Uma Kreda ida ne’e.

SE MAK HA’U NIA BELUN ?

Ohin ita celebra dia 7 fulan Outubro ninian ita hanoin kona ba Nain Feto do Rosário. Maria Virgem Nia hatudu mai ita comportamento ida katak wainhira Anju dehan ba Nia atu sai Maromak nia Inan, Nia ba buka Nia Feto maluk Santa Isabel atu lori ksolok ida ne’e hodi fahe. Katak lia murak ne’e Nia simu Nia lakohi rai ba Nia an maibe Nia buka atu fahe ba ema ne’ebe precisa.

Iha Leitura sira loron ohin ne’e nian, Jesus halo pergunta rua ne’ebe bolu ita bia hanoin; Doutor Lei nian ida ne’ebe hakbesik ba Jesus dehan; Mestre ha’u sei halo sa atu hetan moris rohan laek? Iha ita nia moris lor-loron ita sempre buka mak ida ne’e; saida mak ha’u temque halo atu moris diak. Dala barak ita dehan, atu moris diak ne’e temque iha osan, iha uma, iha electricidade temque iha buat hotu-hotu. Maibe Jesus ohin dehan; iha Ukunfuan hakerek hotu ona katak atu moris diak temque hatene obedece.

Iha ukunfuan Maromak nian ne’ebe hateten no iha ukunfuan ne’e habadak de’it ba liafuan DOMIN; hadomi ó nia maluk no hadomi Maromak hanesan ó nia an rasik. Maibe doutor ida ne’e la puas no husu nafatin se mak ha’u nia maluk? Jesus uja aiknanoik kona ba ema ida tun husi Jerusalem ba Jerico. Iha dalan nia hasoru ema a’at sira hodi baku nia no latan hela nia iha estrada ninin. Iha ne’eba Nailulik ida liu hare tiha ema kanek ne’e nia lia liu de’it. Mai fali ema seluk liu mai hare ema terus husu tulun maibe nia lao liu de’it no iha fali mane ida lao hakbesik ba hare ema ne’e nia hanoin hodi tulun ema ne’e kura nia moras. Tan ne’e atu resposta ba doutor nia pergunta ne’e Jesus dehan; housi ema nain tolu ne’e se mak ó nia maluk los? Doutor ne’e hatan; mak ida ikus ne’e.

Ida ne’e mak hakarak fo hanoin mos mai ita; Se mak ha’u nia belun? Ohin loron ne’e ita hotu iha ita nia categoria katak; ha’u nia belun mak ida ne’e halo festa mai convida ha’u, ha’u nia belun mak ida ne’ebe ha’u moras mai hare ha’u. Ita hotu iha critéria ida. Maibe Jesus nia critéria dalabarak la hanesan ho ita ema nian. tan ne’e iha ita nia rain dalabarak ita ko’alia kona ba doutrina Maromak nian ita dehan susar ituan atu comprende tanba ohin loron iha ita nia sociedade sei buras atitude ida indiferente (Cuek). Indeferente katak buat ruma ne’e acontece iha ita nia maluk ida dalaruma ita la liga kona ba ema ne’e nia necessidade. Buat ne’e mosu tanba buat ne’ebe ita hare hela maibe halo finje hanesan la hare tanba ita hare buat ruma ne’ebe la los maibe ita la brani.

Jovem sira agora ne’e uja liafuan ida nune’e; U BOOT. Los duni katak ohin loron ne’e atitude indiferente ne’e makas laos de’it jovem sira maibe inan-aman mos imita hotu U BOOT ne’e. ida ne’e laos ita nia identidade cultura Timor nian. buat barak ne’ebe ita simu husi rai seluk, maibe buka atu cultura timor nian ne’e keta lakon. Tanba ne’e ita mos tem que hatene no loke ita nia fuan atu simu buat hotu maibe temque hatene manteim ita nia an ho identidade original ne’ebe ita iha ona desde uluk. Selae aban bainrua tinan 10 ka 20 oin mai ita nia geração sira haluha ona ita nia identidade.

Saida hodi sai ema ne’ebe diak liu! Jesus dehan; DOMIN. Domin ne’e laos dehan katak Opção (pilihan), maibe ida ne’e Obrigação. Ba ita sarani Domin ne’e laos katak dehan hakarak ka lakohi, maibe ita nia obrigação. Tan ne’e hanesan ema ita iha obrigação atu halo diak. Tan ne’e ba ita sarani ne’e domin ne’e laos opção ida maibe obrigação sarani nian.

Ita nia Amo Papa Francisco iha tinan ida ne’e nia laran iha liafuan ida ne’ebe nia sempre repete hela de’it ba sarani iha mundo tomak ida ne’e katak; Mai ita hanorin ita nia oan sira atu hadomi.

Laos iha Timor de’it maibe iha mundo buat ida ne’ebe dehan individualismo, egoismo ne’e makas teb-tebes. Tanba buat sira furak ohin loron nian hodi promove ema ida-idak hahu hanoin kona ba nia grupo, nia família no nia an, liu-liu ninia partido. Maibe Maromak hanourin ita atu tau interesse sira ne’e ba kotuk.

ATU HALO BUAT DI’AK RUMA EXIGE PREPARAÇÃO

(Arcebispo Dom. Virgílio do Carmo da Silva)

 

Ohin ita mai iha Escola Colégio Paulo VI hodi hanoin fali tinan 40 existência Colégio Paulo VI ninian. Momento laos hare de’it ba buat hirak ne’ebe sai obstáculo ba cressimento escola ida ne’e ninian durante tempu naruk nia laran, maibe mos hare ba oportunidade atu agradece ba Maromak, hanesan hakerek iha ne’e dehan loron ida ne’e atu hasa’e ita nia agradecimentu ba Na’i Maromak ba di’ak wain ne’ebe simu desde início mai to’o iha momento ida ne’e.

Iha Evangelho Jesus mos sadik ninia Escolante sira ne’ebe tuir Nia hodi husu sira ho pergunta nune’e; “Se mak Ha’u ba ema e nune’e mos ba imi, se mak  Ha’u ?”. E pergunta ida ne’e mos karik vale mos mai ita. Pergunta convida ita atu ba reflete, hanoin ba resposta oi-oin ne’ebe ita rona iha Evangelho hodi descreve Jesus nia identidade, associa ba personagem eminentes sira, hanesan João Baptista, Elias, Jeremias, profeta antigo sira seluk tan.

Certamente buat ne’ebe labele nega ema nia admiração kona ba Jesus durante tempu hirak ne’e liu-liu sira hare ba saida mak Jesus halo. Buat ne’ebe Nia hatudu; valores sira nebe excelente, buat hirak ne’ebe Nia halo mak continua atrai ema nia boa vontade hodi buka Nia. Nia laos de’it ema ida ne’ebe conhecido iha tempu neba; hanesan ema ne’ebe honestu ka ema ne’ebe halo milagre barak, hatudu Nia lealdade, Nia serviço no kiak sira, Nia comprimisso buka justiça e paz no não violência, maibe Nia mos hanesan ema ida ne’ebe laos hanesan ema bai-bain  basá Ninia tática no Ninia estrategia laos hanesan ita ema ninian. Ita hare de’it iha Ninia maneira hili Ninia escolante sira ho Nia maneira rasik. Nia hein tempu ne’ebe los atu hahu Ninia missão to’o saran nia-An tomak masque escolante sira ne’ebe tuir besik liu lao hamutuk ho Nia durante tinan 3 ne’e mos la compriende didi’ak se mak Jesus ida ne’e.

São Pedro deit mak koko hatan dehan; “Ita mak Messias, Ita mak Salvador”. Hafoin ne’e Jesus impõe ba escolante sira atu nonok kona ba buat ne’e. Wainhira ita rona ida ne’e ita hare fila fali katak, iha momentu barak iha Jesus nia moris, wainhira Nia halo milagre, Nia halo di’ak, Nia ko’alia buat ne’ebe los, Nia dehan ba escolante sira atu nonok. Ida ne’e dala ruma ita dehan; tanba sá mak Jesus bandu ema atu labele fo sai? Motivo tanba Pedro fo resposta ne’ebe los. Tanba realidade iha ema barak nia hanoin iha opinião kona ba Jesus iha oi-oin, maibe Pedro revela Jesus ninia identidade. Ne’e atu hatudu mos mai ita katak;

atu ko’alia buat ne’ebe los hein tempo ne’ebe oportuno. Momento ne’ebe los atu bele fo sai buat ne’ebe los. Então lialos ka buat ruma ne’ebe segredo tem que prepara duni ema atu ema bele pronto atu simu lialos ida ne’e. Tan ne’e Jesus la haklaken lalais, maibe Nia fo tempo ba escolante sira, prepara sira atu sira bele prontu ona mak sira bele simu buat ne’ebe los

Ida ne’e mos iha ita nia moris, ita nia cultura mos hanesan ne’e katak; molok ita atu halo buat di’ak ruma ne’ebe dada ema hotu nia atenção exige preparação, exige maneira ida ne’ebe di’ak atu buat ne’ebe ita halo ita la soe de’it, ita la halo arbiru de’it, maibe buat ne’ebe ita halo fo mensagem di’ak no los ba ema ne’ebe rona.

Jesus fila ba Pedro dehan’ “Tu es Pedro sobre esta pedra edificarei a minha Igreja”. Pedro fatuk inan iha Testamento Foun ba alisserce ba Igreja. Pedro hanesan fatuk nebe sólido {inabalável} ne’ebe la fácil atu nakdoko, maibe metin e fatuk ida ne’e mak sempre Jesus Cristo. Ne’e duni, buat ne’ebe tau antes tiha ona mak Cristo. Ita labele muda ida ne’e. Buat ne’ebe uluk Cristo hari tiha ona ida ne’e sai hanesan aliserçe, basé ba Uma Creda, ba ita sarani nia moris. Tan ne’e, Nia aumenta tan carta ba Éfeso nia dehan; “Iha Cristo de’it mak edifício ne’e bele hari no edifício ida ne’e bele buras wainhira hari iha Na’i Maromak ho Na’i Maromak”.

São Pedro mos iha nia carta dahuluk convida sira ne’ebe foin simu baptismo atu labele haketak an housi Cristo basá Nia mak pedra viva, dehan pedra viva reseitado pelos homens mas escolhido e preçioso os olhos de Deus.

Liu tiha liafuan ida ne’e Pedro fila fali ba sarani sira foin simu baptismo nune’e mos ba ita sira ne’ebe ohin iha ne’e, paritcularmente ba antigos alunos, comunidade educativo no ba aluno no aluna Paulo VI ninian ba copromisso ne’ebe hanesan ne’ebe Nia dehan “também vós como pedra viva entrai na construção de um edifício espritual unidos com estais a pedra angular escolhida e preçiosa. Tan ne’e laos hanoin kona ba Pedro, hanoin ba sarani sira ne’ebe uluk, maibe hanoin mos kona ba ita, tanba ita sira ne’e mos sarani, ita mos sai fatuk moris iha Uma Creda ida ne’e, iha comunidade ida ne’e atu ita hotu considera hanesan ema ne’ebe escolhida, ema nebe Maromak tau ona marca, hili no fihir ona hanesan São Pedro dehan; ema ne’ebe preçiosa iha Maromak nia futar matan.

Jesus mos usa liafuan ne’e simplesmente refere ba pedra para construção. Ne’e duni ita hotu hatene katak precisa fatuk ne’ebe tau ba iha okos nu’udar fatuk inan. E atu hari uma ne’e mos precisa fatuk sira seluk atu nune’e uma ne’e bele completo. Nune’e ita mos hola parte iha fatin ida ne’e, neste caso fiar ida ne’ebe Jesus temi iha ne’e mak fiar ida ne’ebe Pedro professa, fiar ida ne’ebe nunca se haketak an housi Cristo. Nia nu’udar fatuk Inan ita hirak ne’e nu’udar fatuk oan ne’ebe hamutuk mak ita bele halo Uma Creda moris mak ita sarani laos de’it Apóstolo, maibe ita hotu hamutuk mak bele hatudu uma ida nia furak, edifício ida nia furak wainhira ita hotu tau hamutuk.

Hafoin Nia dehan; inferno nia odamatan Nia refere ba poder do mal ka força aat ninian ne’ebe continua haleu ita. Ida ne’e hatudu contra força hirak ne’ebe dala barak sai ameaça ba ita, contra valor moris ninian, buat ne’ebe violência ninian, droga ninian, moras aat ninian e buat hirak nebe ohin loron buras iha ita nia sociedade contribui ba iha violência no Instabilidade dala barak ema sempre menciona iha televisão, iha jornal no iha media buat nebe acontece iha ita nia rain e dala barak promove buat hotu ne’ebe contra vida, buat hotu ne’ebe sai ameaça ba valor ema nian e hirak ne’e hotu mai hosi força aat ninian nebe Jesus dehan katak poder do mal dala barak continua ameaça ita.

Pedro simu chave atu liga no desliga. Wainhira Jesus entrega chave ba nia tan comfia iha nia liman kna’ar ida atu tau matan ba vida, hodi fó ba nia força ida. Tan ne’e, ba ita ne’ebe ohin halibur iha ne’e atu celebra loron boot ida ne’e ha’u hakarak kaer de’it liafuan São Pedro nian ne’ebe dehan; “também vós como pedra viva entrai na construção de um edifício espritual unidos com estais a pedra angular escolhida e preçiosa. Ita comemora 40 anos convida comunidade educativa escola ida ne’e nian uluk nanain hanoin kona ba renovação pessoal. Paulo VI rasik nia hakerek; ne’e los duni katak iha ita nia preucupação no todan sira lor-loron nian mak ita tem que buka atu descobre ksolok ne’ebe los mak Cristo. Ida ne’e mak Paulo VI mensagem ba ita. Tan ne’e iha ita nia celebração ida ne’e liu-liu ba estudantes sira convida imi atu koko, buka descobre ksolok ne’ebe los, maske iha buat hotu ne’ebe ohin loron iha moris ne’ebe dala barak bele sai promessa falso sira hodi lori imi ba buat ne’ebe ksolok ne’ebe temporário, maibe koko atu halo pergunta ida ne’e ba ita nia an; “iha ne’ebe los mak ha’u bele hetan ksolok ne’ebe los iha ha’u nia moris’? ida ne’e sai hanesan Trabalho ida ba ita hotu.

Tuir mai mak renovação institucional. Ita mos hare katak depois 40 anos mosu daudaun buat foun hanesan construção físico ne’ebe lao iha ne’e. maibe lato’o de’it atu hare ba buat sira ne’e, ita mos foin dadaun celebra tinan 20 Referendum ninian, tinan 20 presença INTERFET iha Timor. Ida ne’e hotu ita hare fila ba kotuk, hare buat ne’ebe haleu ita, dala barak ita rona nafatin ema nia lamenta, observações, buat ne’ebe diak no iha mos buat ne’ebe la diak. Dala barak sempre tau todan iha educação ne’ebe la tuir ema nia espectação. Tan ne’e iha tempo 40 ninian liu-liu ba iha comunidade educativa mos ha’u hakarak atu sadik ituan katak lato’o de’it atu celebra, maibe nu’udar Instituição oinsa koko mos atu hadia atu nune’e sira ne’ebe tuir mai atu bele diak liu tan. Wainhira ita iha visão ne’ebe claro tem que iha coragem brani atu bele hadia, brani atu hafoun, brani atu lao ba oin.

Paulo VI hanesan Apóstolo ida ne’ebe la hatene kolen. Ne’e duni mai ita parende housi nia hatene servi iha ita nia família, iha ita nia Instituição liu-liu iha escola ida ne’e. nu’udar estudante mos aprende la baruk atu ba escola, la baruk atu dedica an, la baruk mos atu hadomi imi nia caderno.

SE MAK SÃO JOÃO PAULO II BA SARANI TIMOR !!

Ohin hamutuk ho representante Vaticano ninian, Diplomático sira, ho ukunnain sira nação ida ne’e nian, ita halibur hamutuk  atu reconhce ba Santo boot ida ne’e no contribução ne’ebe nia fo ba ita nia rai doben Timor-Leste. Sidauk termina iha ne’e no iha 30 de Outubro iha Tasi Tolu ita sei conserva celebração ne’e ho sarani hotu rai ida ne’e nian nudar sinal agradecimento boot ida ba ema hot-hotu.

Wainhira iha Tasi Tolu São João Paulo II rasik dehan; wainhira ha’u hahu ha’u nia Ponte Ficado, ha’u acompanha imi nia situação ho atenção boot. Kleur tebes ona duni mak ha’u hakarak atu hateten ba imi katak Igreja Universal particularmente São João Paulo II iha istima ida no mos afeição ida boot teb-tebes ba povo ida ne’e.

Cristo nia saseluk ida ne’ebe ba dala uluk sama ain iha rai ida ne’ebe nia destino no nia ukun sidauk los, povo ne’ebe moris iha opressão no tauk nia laran ho presença São João Paulo II nian hanesan iha Tasi Tolu nia dehan; “Ohin ha’u haksolok tebes celebra Eucaristia Santa ne’e hamutuk ho imi. Sarani Timor nia ksolok ita labele imagina. Sinal no esforço concreto ida tan ne’ebe nia halo atu hatudu katak nia hadomi duni povo ida ne’e mak nia hakasan atu aprende Tetum, tanba ita hotu hatene katak molok atu iha 12 de outubro ne’e iha Paróquia sira halo exercício, treino atu hatan missa iha Latin. Maibe wainhira nia to’o iha Tasi Tolu nia laos halo missa iha lian Latin, maibe nia hahu ho sinal hodi Padre ka reza missa ho Tetum. Tuir Dom. Norberto haktuir katak, wainhira Santo Padre hahu ho Hodi Padre Hodi Filho iha tetum, sarani barak balu hakilar no balun tanis ba hodi expressa ita nia sentimento hotu ne’ebe ita lori ita nia laran.

Rai kikoan ida nia existência iha mundo ema barak mos la hatene, maibe wainhira Uma Creda Católico nia boot nia presença sama ain iha rai ida ne’e foti fila fali povo ida ne’e nia dignidade nu’udar Maromak oan, fo hikas esperança ba povo ida ne’e, povo Timor sente tebes Jesus Cristo nia saseluk nia proximidade ho povo ida ne’e.

Tan ne’e, ha’u bele dehan katak São João Paulo II laos veterano de’it, maibe nia missionário boot ida, missionário ida esperança ninian ba povo ida ne’ebe desespero, Nia mak hanesan The Voice of the voiceless basá nia rasik dehan; hau mai hanesan Pedro nia saseluk ida iha imi nia le’et atu haforça ha’u nia maun-alin sira. Ida ne’e mak lori Ha’u mai iha Timor. Liafuan ida ne’e ita rona iha ohin loron nian sente bai-bain de’it, maibe iha tempo neba quando ita rona liafuan ida ne’e ita sente oin seluk. Laiha duni obstáculo ida atu impede visita ida ne’e masque dook e situação política iha tempo neba nian laos fácil, ida ne’e missão ida bibi atan sira nian tanba molok atu hahu Jesus nia paixão Nia hateten ba Pedro; wainhira to’o ona ó nia tempo, fo força ba ó nia maun alin sira liu-liu sira nebe fraku.

Ohin ita mai iha ne’e laiha razão ida atu ita husik leet de’it momento especial ida ne’e atu agradece Maromak ne’ebe haraik wa’in ba Uma Creda figura João Paulo II ninian, ita la hare ba Nia nu’udar Papa de’it, maibe hare ba nia nu’udar Santo ida, liu-liu nia presença iha história Timor nian. Ida ne’e mak ita keta haluhan nia importância visita João Paulo II ninian mai ita nia rai doben.

“Imi mak masin rai nian no imi mak naroman mundo nian”. Nune’e Nia uza imagen naroman atu refere de’it revelação Divina maibe mos sabedoria ne’ebe hatudu iha Nia moris. Sabedoria ida ne’ebe mai housi experiência ita moris nian nune’e sabedoria ida ne’ebe fo moris, sabedoria ida fo naroman fiar ninian. Iha nebe deit mak iha naroman ida  ne’e fo forma ba ema nia moris, orienta ema ba Na’i Maromak.

Sabedoria ida ne’e ita hare uluk liu-liu iha ita nia missionário sira ne’ebe hatudu iha ita nia rain iha tinan barak nia laran serviço maka’as iha rai ida ne’e atu habelar no harii Maromak ninia reino. Balun mos to’o fakar sira nia ran iha rai ida ne’e tanba Cristo, tanba Maromak ninia reino. Missionário sira nia sasin hanesan naroman ida nebe ita labele subar iha kama okos maibe tem que foti aas no hatudu ba ema hotu.

Timor ne’e santo missionario barak nebe fakar duni sira nia ran ba creda Timor ninian, balu mate tanba kole, balu mate tanba moras no balu mos tanba martírio masque to’o ohin loron Uma Creda seidauk identifica hotu sira nia rate ne’ebe namkari iha rai doben ida ne’e.

Uma Creda Timor ne’e buras tanba sosa ho missionário sira nia ran hanesan Cristo ninian. Tan ne’e iha razão tomak atu hanaran; Terra Santa. Tanba hasanto ho missionário sira nia ran. Ohin loron mak tanba direito no liberdade religiosa no missionário oi-oin ne’ebe lori osan, sasan ho ideologia oi-oin atu sobu unidade povo ida ne’e nian. Ne’e duni precisa matan moris no neon na’in. Kaer karik Papa Atual nia liafuan ita tem que hateten ba ita nia abut, ita nia história nune’e ita bele lao iha dalan ne’ebe los nu’udar sarani, nu’udar povo hatene mai housi ne’ebe no atu ba iha ne’ebe.

Horseik iha encontro religioso/a sira nian ho Núncio Apostólico, preocupação ida mos ne’ebe religioso/a sira hasa’e mak ne’e: oinsá mak ita ohin loron bele ba sasin kona ba fiar sarani iha Timor iha momento ida ne’e? Ida ne’e pergunta ida ne’ebe convida ita hotu atu continua reflete kona ba ita nia papel nu’udar sarani.

Ohin ita comemora vizéssimo aniversário referendum consulta popular, ita hateke fila ba kotuk ita hare mudança lubuk ida. Nu’udar nação ita iha liberdade atu halo buat hot-hotu no ko’alia buat ne’ebe ita sente iha ita nia rai laran. Ema barak nia moris sai diak daudaun, iha buat barak lao ho lalais, maibe mos iha parte seluk nu’udar sarani no Timor oan ita hare katak iha mos buat lubuk boot ida sai hanesan ameaça ba ita nia valor sira, valor sarani ninian no moral nian, ita nia identidade sarani ninian. Ita tem que sai masin atu conserva identidade fiar sarani nian.

Rai ida ne’e precisa nafatin atu kura kanek sira ho reconciliação. Comunidade sarani mak tem que sai comunidade ida ne’ebe hatene reconcília, se ita husik atu Jesus nia futar liafuan “Imi mak Masin Rai ninian, Imi mak Naroman” Toca ita nia moris.

Tebes atu Eucaristia nebe oras ne’e ita atu hala’o daudaun hodi comemora Trizéssima aniversário São João Paulo II ninian bele tulun ema hotu iha rai ida ne’e atu ita hotu bele nakfilak an los liu ho fuan ida no neon ida nu’udar cidade ida ne’ebe harii iha foho leten ne’ebe la monu, nu’udar naroman nebe leno ema hotu iha uma laran.

Maluk doben sira mai ita harohan liu housi São João Paulo II ninian atu sarani Timor liu-liu foinsa’e timoroan sira la hare momento ne’e hanesan momento ne’ebe história atu comemora deit, maibe bele hakiak no haburas Espírito missionário ninian iha ita nia fuan liu-liu sai missionário ida esperança ninian ba rai ida ne’e e liu-liu ba maluk sira ne’ebe sei hela iha fatin ne’ebe precisa duni naroman Cristo nian.