shadow
Diocese de Dili > NOTÍCIAS > LETURA DIÁRIA

Quinta – Feira, XXVIII Semana do Tempo Comum (Ano C)

Primeira Leitura                  Rom. 3. 21-30ª

Lia housi São Paulo nia Surat ba sarani sira iha Roma:

Maun alin sira: ohin, Maromak nia justiça mosu ketak housi ukunfuan, maski ukunfuan no profeta sira fó sasin ba nia; ne’e mak Maromak nia justiça housi fiar iha Jesus Cristo ba sira nebé fiar. Ema hot-hotu hanesan! Ema hot-hotu halo tiha sala no lakon ona Maromak nia glória. La selu buat ida, eam sai lós housi maksoyn iha Cristo Jesus, nebé Maromak tau nu’udar buat karan hodi nia ran, nebé ema sei housi fiar; ne’e atu hatudu Maromak nia justiça, basá tan Maromak Nia laran luak, Nia fó perdua ba sala sira nebé ema halo tiha ona, atu hatudu iha tempo ne’e katak Nia lós no nia halo lós sira nebé fiar iha Jesus Cristo.

Ne’e duni, tan sá gaba an? La bele! Tanba sá? Tanba hahalok? Lae! Lolós, tan fiar de’it. Basá ita hanoin katak ema ida sai lós housi fiar maski ketak housi hahalok ukunfuan nian. Maromak mak ema judeu sira nia Maromak de’it? Nia la’os ema gentio nia Maromak mós? Lós duni, Nia gentio sira nian mós, basá Maroamak mesak ida de’it no sei halo lós sira nebé simu tiha circuncisão tan fiar, no sira nebé la simu circuncisão tan fiar.

Maromak Futar Lia.

 

Salmo Responsorial                                                                                                                       Sal. 129(130). 1-2, 3-4b, 4c-6 (R. 1)

Refrão : Na’i laran luak tebes no maksoyn wa’in!!! Repete-se

Na’i, housi kle’an nakukun, ha’u bolu Ita,

Na’i, rona ha’u lian ba.

Sée tilun mai ha’u Na’i,

Hodi rona ha’u lian harohan nian. Refrão

 

Ita hanoin karik ami nia salan,

Na’i, ema sé bele soi an?

Maibé, Na’i, iha Ita iha perdua,

Tan ne’e, ami hamta’uk Ita. Refrão

 

Ha’u tau laran metin iha Na’i,

Ha’u klamar hein iha Na’i Nia futar liafuan,

Ha’u klamar hein hela Na’i,

Liu fali sentinela hein rai hun mutin. Refrão

 

Aclamação                                                                                                                                                                                             Jo. 14. 6

Refrão : Aleluia, Aleluia!! Repete-se

Ha’u ne’e dalan, lialós no moris hun, Na’i lia tun;

ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                                     Lc. 11.  47-54

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba, dehan: Susar ba imi nebé hada rate profeta sira nian: maibé imi nia bei ala sira rasik mak oho sira! Nune’e imi fó sasin, hodi hakarak mós imi nia bei ala sira nia hahalok sira; basá sira mak oho, imi mak hada rate. Tan ne’e Maromak nia matenek dehan: ‘Ha’u sei haruka profeta no apóstolo sira ba sira; balun sira sei oho no balun, sira haterus.’ Maibé, Maromak mai husu conta housi ema otas ne’e nian kona ba profeta sira hotu nia ran, nebé nakfakar houri mundo hahu, housi Abel nia ran to’o Zacarias nian, Ha’u dehan ba imi, ema sira ne’e sei hatan kona ba buat hirak ne’e hotu. Susar ba imi, doutor ukunfuan sira nian, nebé hadau tiha chave matenek nian! Imi rasik la tama, no imi taka netik dalan ba sira nebé hakarak tama.”

Wainhira Nia sai housi nebá, escriba no fariseu sira hahu haksesuk maka’as ho Nia, hodi koko halo Nia ko’alia kona ba buat barak. Sira buka atu halo Nia sidi ho Nia liafuan atu nune’e sira bele du’u Nia.

Lia Maksoyn.

Quarta – Feira, XXVIII Semana do Tempo Comum (Ano C)

Primeira Leitura                    Rom. 2. 1-11

Lia housi São Paulo nia Surat ba sarani sira iha Roma:

Maski ó se, ó la iha resan atu tesi lia ba ema seluk, basá wainhira ó tesi lia ba ema seluk, ó tesi lia ba ó an rasik, basá ó halo mós hanesan sira. Ita hatene katak Maromak tesi lia lolós ba sira nebé moris hanesan ne’e. Ó hanoin katak ó bele halai housi Maromak nia justiça wainhira ó tesi lia ba sira nebé halo nune’e, maibé ó mós halo hanesan sira? Ka ó fiar Maromak nia laran di’ak boot liu, nia laran luak no nia paciência? Ó la hatene katak Maromak Nia laran di’ak ne’e tenki lori ó atu hakribi ó nia sala? Ho nia ulun tós ó lakohi hakribi ó nia sala; nune’e ó haloot hirus ba ó nia an iha loron hirus nian, wainhira Maromak hatudu nia justiça nebé lós. Basá Nia sei selu ema ida-idak tuir ida-idak nia hahalok; moris rohan laek ba sira nebé buka, ho sira nia hahalok di’ak to’o rohan, kmanek no naran boot no moris nebé sei rohan laek; maibé ba sira nebé lakohi tuir lialós tan buka an de’it hodi moris tuir sira nia laran áat, Maromak sei haraik Nia laran nakali no hirus. Lós duni, susar no laran taridu sei mosu ba ema nebé halo áat, uluk knana’in ema judeu, tuir mai ema gregu. Maibé, glória, hahí no dame ba sira hotu nebé halo di’ak, uluk knana’in ema judeu, tuir mai ema gregu. Maromak sei la fihir ema.

Maromak Futar Lia.

 

Salmo Responsorial                                                                                                                                   Sal. 61(62). 2-3, 6-7, 9 (R. 1)

Refrão : Iha Maromak de’it, ha’u klamar hakmatek!!! Repete-se

Iha Maromak de’it ha’u klamar hakmatek,

Basá, housi Nia, ha’u hetan maksoyn.

Nia de’it mak ha’u kbiit no ha’u tulun;

Ha’u sei la ta’uk buat ida! Refrão

 

Iha Maroamak de’it ha’u klamar hakmatek,

Housi Nia, mai ha’u esperança,

Nia mak ha’u heli an fatin no ha’u maksoyn;

Ha’u nia kota, ha’u sei la nakdoko. Refrão

 

Maromak Nia povo,

Iha tempo hotu, tau laran metin iha Nia,

Loke ó fuan iha Nia futar oin!

Maromak mak ó nia subar fatin. Refrão

 

Aclamação                                                                                                                                                                                          Jo. 10.  27

Refrão : Aleluia, Aleluia!! Repete-se

Ha’u Nia bibi sira rona Ha’u lian, Na’i lia tun:

Ha’u hatene sira, sira mai tuir Ha’u. Refrão

 

Evangelho                                                                                                                                                                                     Lc. 11. 42-46

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan: “Susar ba imi, fariseu sira, nebé selu imposto ruku, salsa no modo tomak nian, maibé haluha justiça no domin ba Maromak! Halo duni buat ne’e ba, maibé keta haluha buat seluk. Susar ba imi, fariseu sira nebé hakarak tur iha fatin uluk iha sinagoga no haksolok wainhira ema cumprimenta imi iha basar. Susar ba imi, basá imi hanesan rate sira nebé ema la haré no ema sama tanba sira la hatene!”

Doutor ukufuan nian ida simu hodi dehan: “Mestre, wainhira Ita ko’alia hanesan ne’e, Ita hateten áat mós ami.” Nia hatan: “Susar mós ba imi, doutor ukunfuan sira nian, basá imi tau naha todan liu ba ema, maibé imi rasik la book limanfuan ida mós atu foti nia”.

Lia Maksoyn.

Terça – Feira, XXVIII Semana do Tempo Comum (Ano C)

Primeira Leitura                     Rom. 1. 16-25

Lia housi São Paulo nia Surat ba sarani sira iha Roma:

Maun alin sira: Ha’u la moe kona ba Evangelho. Evangelho ne’e mak Maromak Nia kbiit atu soi ema sira nebé fiar: ba ema judeu sira, uluk knana’in, hafoin ba ema gentio sira, basá iha Evangelho ne’e mak fó hatene tiha ona Maromak Nia justiça housi fiar ba fiar, nu’udar hakerek nanis: “Ida nebé lós tanba fiar sei moris”.

Housi lalehan Maromak hatudu Nia laran nakali hasouru ema fiar laek no laran áat nebé, tan sira nia laran áat, halakon lialós. Basá buat nebé ema bele hatene kona ba Maromak, sira hatene momós, basá Maromak hatudu ona ba sira. Houri mundo hahu, ema hatene ona Maroamak Nia kbiit rohan laek no kmanek Maromak Nian nebé matan la haré iha buat hotu nebé Nia halo. Nune’e sira la bele fase liman, basá maski sira hatene Maromak, sira la hana’i Nia nu’udar Maromak ka fó agradece ba Nia; maibé sira nia hanoin la lós ona no sira nia ulun sai nakukun hela. Sira dehan katak sira matenek, maibé lolós sira beik, hodi troka Maromak rohan laek Nia kmanek ba ema, manu ka balada ho ain háat ka samea nia ilas.

Tan ne’e, Maromak husik sira monu ba sala fo’er tan sira nia laran fo’er, hodi hafo’er malu nia isin, basá sira troka tiha lialós kona ba Maromak ho lia bosok hodi hahí, no serbi buat nebé Maromak halo iha Ida nebé halo sira nia fatin, nebé kmanek ba nafatin. Amen.

Maromak Futar Lia.

 

Salmo Responsorial                                                                                                        Sal. 18A(19A). 2-3, 4-5 (R. 2a)

Refrão : Lalehan haklaken Maromak Nia glória!!! Repete-se

Lalehan haklaken Maroamak Nia glória,

Firmament halekar Nia futar liman nia hahalok.

Loron ida tatoli ba loron seluk lia meno ne’e,

Kalan ida fó hatene lia ne’e ba ka kalan seluk. Refrão

 

La iha liafuan, la iha discurso,

La hatene nia katak sá.

Nia lia-hatan-teni habelar iha rai tomak,

Nia lia tatoli housi rai-ikun to’o rai-ulun. Refrão

 

Aclamação                                                                                                                                                                Heb. 4. 12

Refrão : Aleluia, Aleluia!! Repete-se

Maromak nia liafuan moris no book maka’as, bele hatene

Lolós ema nia hanoin no fuan nia hakaran. Refrão

 

Evangelho                                                                                                                                                             Lc. 11. 37-41

Na’i Jesus Cristo nia Evangelho nu’udar São Lucas haktuir:

Iha tempo nebá, wainhira Jesus sei ko’alia hela, fariseu ida convida Nia atu han iha nia uma. Nia tama hodi tur iha mesa. Fariseu hakfodak, basá haré Nia la fase an molok atu han. Na’i dehan ba nia: “Imi fariseu sira hamos kopu no bikan nia liur, maibé imi nia laran nakonu ho hakarak atu hadau sasan no hanoin áat. Beikten sira! Ida nebé halo buat nebé iha liur, la halo mós buat nebé iha laran? Imi fó esmola housi imi nia laran, no buat hotu sei sai mós ba imi.

Lia Maksoyn.

Segunda – Feira, XXVIII Semana do Tempo Comum (Ano C)

Primeira Leitura                         Rom. 1. 1-7

Lia housi São Paulo nia Surat ba sarani sira iha Roma:

Paulo, Cristo Jesus nia atan ida, nebé Maromak bolu atu sai apóstolo no hakotu tiha atu servisu ba Evangelho nebé Maromak hakotu nanis ona houri uluk housi profeta sira iha Sagrada Escritura, Evangelho kona ba nia Oan Mane, Jesus Cristo Jesus, ita Na’i, David nia oan tuir isin, maibé Maromak nia Oan Mane tuir Espírito santidade nian housi nia moris hi’as housi mate. Housi Nia, ami simu knaar apóstolado nian atu halo ema halo tuir tan fiar iha gentio sira leet tan Nia naran. Iha sira ne’e nia leet Maromak bolu mós imi atu sai Cristo nian, ba Maromak nia doben sira hotu iha Roma, nebé Maromak bolu atu sai santo: kmanek no dame ba imi housi Maromak, ita Aman no housi Na’i Jesus Cristo.

Maromak Futar Lia.

 

Salmo Responsorial                                                                                                Sal. 97(98). 1, 2-3ab, 3cd-4 (R. 2a)

Refrão : Na’i hatudu Nia maksoyn!!! Repete-se

Hananu ba Na’i knananuk foun ida,

Basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Na’i fó hatene Nia maksoyn;

Nia hatudu justiça ba nação sira hotu.

Nia hanoin Nia domin no laran lós,

Ba Israel uman. Refrão

 

Rai-ikun rai-ulun sasin

Maksoyn Ita Maromak Nian.

Rai tomak haklaken Na’i,

Haklalak ho ksolok no hananu. Refrão

 

Aclamação                                                                                                                                                     Sal. 94(95). 8ab

Refrão : Aleluia, Aleluia!! Repete-se

Ohin imi rona karik Na’i Nia lian,

Keta taka imi nia fuan. Refrão

 

Evangelho                                                                                                                                                             Lc. 11. 29-32

Na’i Jesus Cristo nia Evangelho nu’udar São Lucas haktuir:

Iha tempo nebá, wainhira ema lubun boot halibur tiha an, Jesus dehan: “Otas ne’e otas áat duni; ema sira husu sinal ida, maibé sinal mesa nebé sei fó ba sira mak sinal Jonas nian. Basá, hanesan Jonas sai sinal ba ema rai Nínive nian, nune’e mós Oan Mane sei sai sinal ida ba ema sira housi otas ne’e. Iha loron tesi lia nian, liurai feto tasi mane nian sei hamriik hasouru ema sira ne’e hodi tesi lia todan ba sira; basá nia mai housi mundo nia rohan atu rona Salomão nia matenek, no iha ne’e iha Ida nebé boot liu fali Salomão. Iha loron tesi lia nian, Nínive nia oan sira sei hamriik hasouru ema ne’e, hodi tesi lia todan ba sira; basá wainhira Jonas haklaken Maromak nia liafuan, sira hakribi sira nia sala, maibé iha ne’e iha Ida nebé boot liu fali Jonas”.

Lia Maksoyn.

XXVIII Domingo Tempo Comum (ANO C)

Primeira Leitura                    2. Rs. 5, 14-17

Lia housi Livro Liurai sira nian:

Iha loron hirak nebá, General Naamã tun tiha ba mota Jordão hodi luku wé dala hitu, tuir Profeta Eliseu haruka. Naamã nia isin kanek lepra sai nurak fali hanesan kosok oan ida nia isin. Naamã lori nia emar sira hotu fila kedas ba hasouru Profeta. To’o tiha Profeta nia oin, Naamã dehan: “Oras ne’e mak ha’u hatene lolos katak iha mundo rai-klaran la iha Maromak ida hanesan Israel nian”. Tan ne’e, simu netik sasan ha’u atu hasa’e ba ita”.  Maibé, Eliseu dehan ba nia: “Ha’u jura ba Na’i be moris, ha’u sei la simu buat ida”. Naamã hodi biit hakarak Eliseu simu, maibé, nia la simu liu. Tan ne’e, Naamã hateten: “Tan ita la kohi simu, ne’e sa haraik netik mai atan ha’u rai witoan rai ne’e nian, naton ba altar, nebé kuda rua bele lori. Basá, atan oan ne’e, housi ohin ba oin sei la halo tan ona lulik ba Maromak seluk, maibé sei hasa’e de’it sacrificio ba Na’i, Israel nia Maromak.”

Maromak Futar Lia.

 

Salmo Responsorial                                                                                                                                       Sal. 97(98), 1. 2-3ab. 3cd-4

Refrão : Iha povo sira oin Maromak hatudu Maksoyn!!! Repete-se

Imi hananu ba Na’i knananuk foun ida,

basá, Nia halo buat mesak kmanek.

Nia futar liman los manan funu;

manan ho nia futar liman santo. Refrão

 

Na’i hatudu nia Maksoyn;

Nia hatudu justiça ba nasaun sira.

Nia la haluhan nia domin,

la haluhan lia Nia hakotu ba Israel uman. Refrão

 

Rai ikun rai ulun sasin Maksoyn

ita Maromak nian.

Rai tomak haklaken Na’i,

haklalak hahí Nia ho ksolok. Refrão

 

Segunda Leitura                                                                                                                                                                       2 Tim. 2, 8-13

Lia housi São Paulo nia surat ba Timóteo:

Oan doben:  Hanoin mak Jesus Cristo, nebé moris hias ona housi mate. Tuir ha’u nia Evangelho, Jesus moris housi David. Tan de’it Evangelho, ha’u terus, ema dadur ha’u hanesan áhu-na’in boot ida. Maibé, Maromak Futar Lia-fuan ema labele dadur. Ha’u terus buat hotu atu ema sira be Na’i hili bele hetan mos salvasaun no rahun di’ak nebé la mohu. Salvasaun ne’e ita hetan de’it iha Cristo Jesus. Lia ida ne’e mak sei fiar metin:  Ita mate karik hamutuk ho Cristo, ita sei moris mos hamutuk ho Nia. Ita laran metin nafatin karik ho Cristo, ita sei ukun mos hamutuk ho Nia. Ita dehan karik ita la hatene Nia, Nia sei dehan mos katak Nia la hatene ita. Ita fila karik kotuk ba Nia, maski nune’e, Nia sei hanoin ita nafatin, basá, Nia Ema lia-fuan oin ida de’it.

Maromak Futar Lia.

 

Aclamação                                                                                                                                                                                        Apc. 2, 10c

Refrão : Aleluia, Aleluia!! Repete-se

Na’i lia tun, dehan:  Ó fo laran nafatin to’o mate,

Ha’u sei haraik prémio ba ó. Refrão

 

Evangelho                                                                                                                                                                                       Lc. 17, 11-19

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus liu daudaun ba Jerusalém, kona housi Samaria ho Galileia sira leet. Nia atu tama daudaun ona ba knua ida, ema moras lepra na’in sanulu mai hasouru Nia. Housi dook sira hasa’e lia ba Jesus, dehan: “Jesus, Mestre, sadia atan ami sira!”  Hare tiha sira, Jesus lia tun dehan:  “Imi ba hasouru sacerdote sira”. La’o tuir sira dalan, sira hetan fali isin di’ak. Sira ida, hare tiha katak nia isin di’ak fali ona, nia fila kedas hodi hahí maka’as Maromak. Nia hakneak besik Jesus nia ain, hodi hakru’uk to’o rai atu fo agradese. Ema ne’e Samaritano ida. Jesus lia tun, dehan:”  Laos ema nain sanulu mak hetan isin di’ak?  Sira na’in sia iha nebé? Ida la fila atu hahí Maromak?  Mak ema housi rai seluk ne’e de’it? Hafoin, Jesus lia tun ba ema ne’e: Hamriik, la’o ó nian ba! Ó nia fiar mak soi ó”.

Lia Maksoyn.

Sábado, XXVII Semana do Tempo Comum (Ano C)

Primeira Leitura                   Joel. 4. 12-21

Lia housi Profecia Joel nian:

Na’i lia tun nune’e: “Nação sira hamriik ba hodi sa’e ba rai tetuk Josafat nian! ha’u sei tur iha nebá atu tesi lia ba nação hot-hotu be tur hale’u. Imi tau ona tudik ba hodi ko’a, basá, trigo tasak ona, mai ona sama ho ain ba, tanki sira naresin liu ona, hahalok áat nação sira nian boot tebes!”

Ema lubun wa’in tebes libur iha rai tetuk, tesi lia fatin! Basá, Na’i nia loron besik ona; loron no fulan sei sai nakukun; fitun sira nia lakan sei lakon nia nabilan. Na’i sei hakilar housi Sião; Nia lian sei rona to’o Jerusalém; lalehan no rai sei nakdoko. Maibé, Na’i mak subar fatin di’ak ba Nia povo, hôrik fatin metin ida ba Israel oan sira. “Nune’e, imi sei hatene katak Ha’u mak Na’i, imi nia Maromak, nebé tur iha Sião, iha Ha’u Nia Foho Santo! Jerusalém sei sai fatin santo, ema housi rai seluk sei la liu housi nebá!”

Iha loron nebá, tua foun sei suli foho sira, foho kiik sira sei halo suli susu-wen, mota sira hotu Judá nian, wé sei suli tuir. Wé matan ida sei mosu housi templo Na’i nian, atu habokon rai tetuk Acácias nian. Rai Egipto tomak sei sai krebek, Edon sei sai rai fuik maran, tanba sira foti liman hasouru Judá oan sira, basá, sira halo suli ran sala laek iha nia rain. Maibé, iha Judá, ema sei hôrik ba nafatin, no Jerusalém housi otas ba otas. ‘Ha’u sei rai kuna hasouru sira ran no ema ida mós la soi an’. Na’i sei hôrik iha Sião.

Maromak Futar Lia.

 

Salmo Responsorial                                                                                               Sal. 96(97). 1-2, 5-6, 11-12 (R. 12ª)

Refrão : Imi sira be justo, haksolok iha Na’i ba!!! Repete-se

Na’i mak liurai, rai tomak haksolok ba;

Nusa lub-lubun haksolok ba.

Nia hatais kalohan no nakukun,

Justice no direito mak Nia trono nia hun. Refrão

 

Foho sira naben hanesan lilin,

Iha Na’I be rai tomak nian, Nia oin;

Lalehan haklaken Nia justice,

Povo tomak hare Nia glória. Refrão

 

Mosu naroman ba ema di’ak,

Ksolok ba ema sira be fuan mós.

Haksolok iha Na’i ba,

imi sira be laran di’ak,

Hodi hahí Nia naran Santo. Refrão

 

Aclamação                                                                                                                                                                  Lc. 11. 28

Refrão : Aleluia, Aleluia!! Repete-se

Rahun di’ak ba sira nebé rona Maromak

Nia futar lia hodi moris tuir. Refrão

 

Evangelho                                                                                                                                                             Lc. 11. 27-28

Na’i Jesus Cristo nia Evangelho nu’udar São Lucas haktuir:

Iha tempo nebá, Wainhira Jesus sei ko’alia daudaun, feto ida housi ema lubun sira leet foti lia dehan: “Ksolok ba knotak nebé kô’us Ita, no hirus matan nebé fó susuben ba Ita!” Maibé Nia hatan: “Lolós, ksolok liu ba sira nebé rona Maromak futar lia hodi moris tuir!”

Lia Maksoyn.

Sexta – Feira, XXVII Semana do Tempo Comum (Ano C)

Primeira Leitura            Joel. 1. 13-15; 2. 1-2

Lia housi Profecia Joel nian:

Na’ilulik sira, hatais imi an ho hena karon nian hodi tanis; imi sira be serbi altar, halerik ba iha kalan tomak ida; imi hotu be serbi ha’u nia Maromak, basá, iha templo imi Maromak nian, hanetik tiha ona hasa’e sacrifício no buat karan. Imi fó sai ba ema hotu hodi halo jejun boot ida atu halibur povo santo. Imi halibur katuas sira no povo hotu nação nian, iha Na’i, Ita Maromak Nia templo. Imi sei harohan ho lian maka’as ba Na’i: “Ah, sá loron ne’e!”. Basá, Na’i Nia loron besik ona! Loron ne’e sei mai, hanesan atu sobu, housi Na’i kbiit Na’in.

Imi sei huu trombeta iha Sião, hakilar hodi fó hatene iha Ha’u Nia foho Santo. Ema hotu housi nação ta’uk nakdedar tan Na’i nia loron besik to’o ona! Tebes, loron ne’e besik ona: loron nakukun nian, loron kalohan taka metin nian, loron mahan nian. Hanesan naroman rai-hun mutin nian namkari iha foho sira leten, nune’e mós sei namkari iha foho sira leten povo wa’in ida no barani. Houri uluk kedas la adauk iha povo ida hanesan ne’e, no mós iha tempo ikus, housi otas ba otas, sei la mosu tan povo ida hanesan ne’e.

Maromak Futar Lia.

 

Salmo Responsorial                                                                                                        Sal. 9A. 2-3, 6, 16, 8-9 (R. 9ª)

Refrão : Na’i sei tesi lia ba mundo ho justiça!!! Repete-se

Ho laran tomak ha’u hahí Ita, Na’i,

Hodi haklaken Ita Nia kmanek sira;

Iha Ita, ha’u haksolok no hananu,

Ha’u sei hahí Ita naran, Maromak Leten áas liu. Refrão

 

Na’i hatun fiar laek sira, hamohu ema áat sira,

Halakon sira naran ba nafatin.

Hatun povo tomak ba rai ku’ak nebé sira rasik ke’e,

Kesi sira ain iha hani nebé sira halo. Refrão

 

Maromak, Liurai, hatoda an iha Nia trono,

Iha trono nebé Nia hari atu tesi lia;

Nia sei tesi lia ba mundo ho justiça,

Sei ukun povo hotu ho lialós. Refrão

 

Aclamação                                                                                                                                                         Jo. 12. 31b, 32

Refrão : Aleluia, Aleluia!! Repete-se

Ohin liurai mundo ne’e nian sei duni sai ona. Wainhira ema foti Ha’u housi rai,

Ha’u sei dada ema hot-hotu mai Ha’u. Refrão

 

Evangelho                                                                                                                                                             Lc. 11. 15-26

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus duni sai demónio ida; maibé ema balun dehan: “Nia duni sai diabo hodi Belzebu, diabo sira nia ulun, nia naran.” Balun fali husu ba Nia sinal ida housi lalehan, atu koko Nia. Maibé, hatene tiha sira nia hanoin, Nia dehan ba sira: “Reino hotu nebé fahe malu sei sobu rahun, no uma ida sei monu iha uma seluk nia leten. Nune’e mós, Satanas fahe karik nia an ba rua, nia reino sei tahan oin sá lós? Basá imi dehan katak hodi Belzebu mak Ha’u duni sai diabo sira. Ha’u duni sai diabo sira hodi Belzebu nia naran karik, hodi sá nia naran mak imi nia oan sira duni sai sira? Tan ne’e mak sira sei tesi lia ba imi. Maibé Ha’u duni sai diabo sira hodi Maromak nia limanfuan karik, ne’e dehan katak Maromak nia reino to’o ona ba imi. Wainhira ema maka’as ida ho kroat hein nia uma boot, nia rikusoi hela metin hakmatek; maibé wainhira ema ida maka’as liu  nia mosu mai karik hodi manan nia, ema ne’e hadau nia kroat nebé fó laran metin ba nia, hodi fahe nia sasan tomak. Ida nebé la hamutuk ho Ha’u, nia hasouru Ha’u; no ida nebé la halibur ho Ha’u, nia sei namkari.

Wainhira espírito fo’er ida sai housi ema ida, nia la’o lemo rai fuik maran hofi buka hakmatek. La hetan tiha, nia dehan: ‘Ha’u sei fila fali ba uma nebé ha’u husik tiha.’ To’o tiha nebá, nia hetan fatin ne’e saar mós tiha no furak. Hafoin nia ba lori tan espírito na’in hitu nebé áat liu fali nia; sira ne’e tama, hodi hôrik iha nebá. Ikus mai, ema ne’e nia rohan sai áat liu fali uluk”.

Lia Maksoyn.

Quinta – Feira, XXVII Semana do Tempo Comum (Ano C)

Primeira Leitura                  Mal. 3. 13-20ª

Lia housi Profecia Malaquias nian:

Na’i lia tun ba Israel oan sira: “Imi nia liafuan sira hasouru Ha’u, mesak loko an nian de’it! Maski nune’e, imi sei husu: ‘Sá lós mak ami ko’alia hasouru Ita?’ Imi sei hateten tan: ‘La vale buat ida serbi Maromak. Sá di’ak mak ita sei hetan hodi moris tuir Na’i Nia hakaran, no la’o ho hatais penitência nian, iha Na’i, mundo rai-klaran Nia futar oin? Oras ne’e, Ita hahí ho haksolok ema loko an sira; sira nebé halo buat áat moris iha ksolok; sira halo hirus karik Maromak, sira la hetan susar ida’”. Nune’e, sira nebé hamta’uk Maromak, hahu ko’alia ba malu; Na’i sée tilun hodi rona didiak sira ko’alia. Iha Na’i Nia futar oin, hakerek livro ida fó hanoin nian kona ba sira nebé hamta’uk Na’i, no hahí hana’i Nia naran. “Iha loron nebé Ha’u hadi’a – Na’i, Mundo Rai-klaran nian, dehan – sira ne’e sai Ha’u Nian. ha’u sei hanoin netik sira, hanesan aman ida nebé serbi nia ho neon no laran. Iha ne’e imi sei haré oinsá ema laran mós ida ho ema maksalak ida, oinsá ema nebé serbi Maromak ho ema nebé la serbi Maromak”. Basá, Na’i nia loron sei to’o mai, manas hanesan ahi matan boot nia manas. Sira hotu nebé loko an no sira hotu nebé halo buat áat, sei sai hanesan du’ut maran. “Loron nebé atu mai, sei sunu mutuk sira hotu – Na’i, Mundo Rai-klaran nian, dehan – sei la husik hela abut ka sanak ida. Maibé, ba imi nebé hamta’uk Ha’u Nia naran, sei mosu loro matan nabilan justiça nian, nia roman nabilan sei lori salvação mai imi”.

Maromak Futar Lia.

 

Salmo Responsorial                                                                                                     Sal. 1. 2, 3, 4, 6, (R. Sal. 39. 5ª)

Refrão : Rahun di’ak ba ema nebé tau neon iha Na’i!!! Repete-se

Ksolok ba ema nebé la tuir ema áat nia lia,

La tuir dalan maksalak nian.

Ksolok ba sira be la hadulur ho ema áat.

Maibé haksolok ho Na’i Nia

Ukufuan hodi hanoin nia kalan-loron. Refrão

 

Nia hanesan ai-kudan ida iha wé-inan ninin;

Nafuan tuir nia tempo, nia tahan la namlaik,

Buat hotu nebé nia halo, sai di’ak de’it. Refrão

 

Maibé, ema áat sira nia moris oin seluk,

Sira hanesan haré-kain be anin lori,

Na’i hatene ema lós nia dalan,

Dalan ema áat sira nian, lori ba rahu áat. Refrão

 

Aclamação                                                                                                                                                        cf. Act. 16. 14b

Refrão : Aleluia, Aleluia!! Repete-se

Loke, Na’i, ami fuan atu simu futar liafuan sira housi

Ita Oan Mane. Refrão

 

Evangelho                                                                                                                                                                Lc. 11. 5-13

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan tan ba Nia escolante sira: “Imi ida iha karik belun ida nebé iha kalan boot ba hateten ba nia: ‘Belun, fó netik pão fuan ida tolu mai, basá ha’u nia belun foin to’o mai housi dook no ha’u la iha buat ida atu fó ba nia’. Belun ne’e bele hatan housi uma laran: ‘Keta hasusar ha’u! Odamatan taka metin ona. Ha’u ho ha’u nia oan sira toba tiha ona. Ha’u la bele hader atu fó buat ruma ba ó’. Ha’u dehan ba imi katak, maski nia sei la hader hodi fó tanba sira belun malu, nia sei fó duni buat hotu nebé nia belun kuran tanba nia husu fila fila. Ne’e duni, Ha’u dehan ba imi: husu ba, imi sei simu; buka ba, imi sei hetan; tuku odamatan ba, odamatan sei nakloke ba imi. Basá ema hotu nebé husu, sei simu, ema nebé buka sei hetan; no ba ema nebé tuku odamatan, odamatan sei nakloke ba nia. Iha imi leet, aman ida nebé mak sei fó samea wainhira nia oan husu ikan? Eh sei fó sakunar ida wainhira nia husu manu tolun? Ne’e duni, maski imi ema laran áat hatene fó buat di’ak ba imi nia oan sira, oin sá liu tan mak imi nia Aman iha lalehan sei haraik Espírito Santo ba sira nebé husu ba Nia?”

Lia Maksoyn.

Quarta – Feira, XXVII Semana do Tempo Comum (Ano C)

Primeira Leitura                        Jon. 4. 1-11

Lia housi Profecia Jonas nian:

Jonas laran moras tebes hodi hirus, tan Na’i perdua ema sira Nínive nian. Ho laran nakali nia harohan ba Na’i nune’e: “Na’i! La’os ida ne’e mak ha’u hateten wainhira ha’u sei hôrik iha ha’u rain? Ha’u hatene nanis ona katak Ita mak Maromak laran-luak tebes, pronto atu perdua, la hirus lalais, laran di’ak teb-tebes, la hanoin atu fó castigo; tan ne’e mak ha’u halai tiha ba Társis. Maibé, oras ne’e, Na’i bele hasai ona ha’u nia moris; ba ha’u mate di’ak liu fali moris”. Maibé, Na’i hatan ba nia: “Ó nia hanoin lós tebes hodi halo ó hirus nune’e?” Jonas sai tiha housi Nínive hodi ba tur iha cidade ne’e nia sorin housi Loro-sa’e. Iha nebá, nia halo taka baluk ida hodi tur iha nia mahan atu haré sá lós mak sei mosu ba cidade ne’e. Nune’e, Na’i Maromak halo ai-hahoris ida, aas liu Jonas, atu hamahan netik nia ulun, hodi haksolok netik nia laran susar. Jonas haksolok tebes ho ai-hahoris  ne’e. Maibé, iha loron tuir mai, wainhira loro-matan mosu, Maromak haruka ular kiik oan ida tata kotu hotu ai-hahoris ne’e nia abut, ai-hahoris ne’e maran tiha. Iha dader saan, loro-matan mosu, Maromak halo anin manas huu housi loro-sae mai, loro baku lós mai iha Jonas nia ulun leten. Jonas sai oin nakukun tiha, hakarak atu mate, dehan: “Ba ha’u, mate, di’ak liu fali moris”. Nune’e, Maromak lia tun ba Jonas, dehan: “Ó hanoin katak ó nia hanoin lós tebes atu hirus tan ai-hahoris ne’e?” Jonas hatan: “Lós duni, ha’u nia hanoin lós tebes atu hirus to’o mate”. Na’i lia tun teni ba nia: “Ó hanoin netik lós ai-hahoris ne’e, nebé ó la kole kuda nia, hodi halo nia sai boot, nebé moris iha kalan ida nia laran, iha fali kalan seluk nia mate! Oinsá, Ha’u la bele hanoin netik cidade boot Nínive, nebé iha ema liu rihun atus ida rua nulu, nebé la hatene lós sira nia liman lós housi liman karuk. Nune’e mós ho balada wa’in tebes?”

Maromak Futar Lia.

 

Salmo Responsorial                                                                                               Sal. 85(86). 3-4, 5-6, 9-10 (R. 15b)

Refrão : Na’i, Ita mak Maromak be laran maus no laran luak tebes!!! Repete-se

Na’i, sadi’a ha’u, Ita ha’u Maromak,

Loron tomak ha’u harohan ba Ita.

Haksolok Ita atan nia fuan ba,

Wainhira nia hasa’e nia neon ba Ita. Refrão

 

Na’i, Ita mak Maromak be di’ak no laran-luak,

Laran-di’ak tebes ba sira nebé harohan ba Ita.

Na’i, rona ha’u harohan ba,

Simu ha’u hamulak ba. Refrão

 

Povo tomak be Ita hakiak sei mai hana’i Ita,

Na’i, no sei hahí Ita naran;

Basá, Ita mak boot no halo kmanek wa’in tebes,

Ita mesak de’it mak Maromak! Refrão

 

Aclamação                                                                                                                                                           Rom. 8. 15bc

Refrão : Aleluia, Aleluia!! Repete-se

Imi simu Espírito ida nebé halo imi sai oan fudin,

nebé lori ita bolu: “Abba! Aman”. Refrão

 

Evangelho                                                                                                                                                                  Lc. 11. 1-4

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus harohan iha fatin ida. Hotu tiha, nia escolante ida hateten ba Nia: “Na’i, hanourin ami atu harohan hanesan João Babtista  hanourin nia escolante sira.” Nia dehan ba sira: “Wainhira imi harohan, hateten nune’e: ‘Aman, tulun ema atu hahí Ita naran. Halo Ita nia reino to’o mai ami. Haraik aihan lorloron nian mai ami. Haraik perdua mai ami sala, nu’udar ami perdua ema nebé halo áat ami. Labele husik ami monu ba babeur’’’.

Lia Maksoyn.

Terça – Feira, XXVII Semana do Tempo Comum (Ano C)

Primeira Leitura                      Jon. 3. 1. 10

Lia housi Profecia Jonas nian:

Na’i lia tun ba Jonas ho liafuan hirak ne’e: “Ó hamriik, la’o ba cidade boot Nínive nian hodi haklaken ba nia lia Ha’u atu dehan ba ó”. Jonas hamriik la’o ba Nínive tuir Na’i futar liafuan. Iha Maromak futar oin, Nínive cidade boot ida; hodi loron tolu bele la’o housi rohan to’o rohan. Jonas tama iha cidade, la’o liu tiha loron ida, nia hahu hanourin ho liafuan hirak ne’e: “Loron háatnulu tan, Nínive sei rahun”. Ema sira be tur iha cidade Nínive fiar Maromak; sira fó sai atu hadera an no ema hotu, housi boot liu to’o kiik liu, hatais hena tartarak. Wainhira liurai Nínive rona lia tatoli ne’e, hamriik housi nia trono, hasai tiha nia unuk, taka an fali ho hena tartarak hodi tur iha ahi kdesan laran. Hafoin, liurai ho nia ministro sira fó sai ordem ida nebé dehan: “Ema no balada sira hotu la bele han, la bele hemu wé. Hot-hotu sei taka an ho hena tartarak no sei harohan ba Maromak ho laran tomak kbiit hotu; ida-idak sei hakribi hahalok áat no sala boot sira nebé nia halo tiha ona. Sé mak hatene, kala Maromak muda Nia hanoin hodi hasai castigo housi ita, hatun Nia hirus atu ita la bele mate mohu!” Maromak haré tiha sira nia haka’as an atu husik tiha sira nia hahalok áat. Nia hasai castigo nebé atu haterus sira.

Maromak Futar Lia.

 

Salmo Responsorial                                                                                              Sal. 129(130). 1-2, 3-4ab, 7-8 (R. 3)

Refrão : Na’i, Ita haré karik ami salan, sé mak bele soi an?!!! Repete-se

Na’i, housi kle’an nakukun, ha’u bolu Ita,

Na’i, rona ha’u lian ba!

Ita sée tilun ba ha’u lian harohan nian. Refrão

 

Ita hanoin karik ami salan sira,

Na’i, ema sé bele soi an?

Maibé, iha Ita iha perdua,

Tan ne’e, ami hamta’uk Ita. Refrão

 

Nu’udar sentinela hein rai-hun mutin,

Nune’e mós Israel hein hela Na’i;

Tan iha Na’i hetan laran-luak,

Iha Nia bele hetan maksoyn wa’in.

Nia mak sei soi Israel housi nia hahalok áat hotu. Refrão

 

Aclamação                                                                                                                                                                  Lc. 11. 28

Refrão : Aleluia, Aleluia!! Repete-se

Rahun di’ak ba sira nebé rona

Maromak Nia futar lia hodi moris tuir. Refrão

 

Evangelho                                                                                                                                                            Lc. 10. 38-42

Na’i Jesus Cristo nia Evangelho nu’udar São Lucas haktuir:

Iha tempo nebá, tuir dalan, Jesus to’o knua ida. Feto ida naran Marta simu Nia iha nia uma. Marta iha feton ida naran Maria, nebé tur de’it iha Jesus nia ain hodi rona Nia Ko’alia. Marta fali, nebé la’o ba la’o mai hodi serbisu barak, hakbesik hodi dehan: “Na’i, Ita la haré katak ha’u nia alin husik ha’u serbisu mesa-mesak? Dehan to’ok ba nia atu tulun ha’u,” Na’i hatan ba nia: “Marta, Marta, ó la’o kole hodi hanoin resin kona ba buat barak; maibé buat ida de’it mak folin lós. Maria hili buat nebé di’ak liu hotu, nebé ema ida sei la hadau housi nia”.

Lia Maksoyn.