shadow
Diocese de Dili > NOTÍCIAS > LETURA DIÁRIA

Sexta-Feira, I Semana Iha Tempo Advento (Ano A)

Primeira Leitura                      Is. 29. 17-24

Lia housi livru Isaías nian:

Na’i Maromak lia tun nune’e: uitoan tan de’it ona, Líbano la’os atu sai jardim ida? Jardm ne’e la’os atu sai ai-laran ida? Iha loronn ne’eba, ema tilun diuk sira sei rona liafuan housi livro Maromak nian; sai tiha housi kalan no nakukun laran, matan delek sira sei haré.

Ema ki’ak sira sei haksolok fali iha Na’i. Sira be ki’ak liu iha ema sira le’et, sei haksolok iha Santo Israel nian. Ukun na’in laran áat sei la iha tan. Ema be toman hakribit maluk sira sei lakon mohu. Ema laran makerek sira sei la iha tan, ema ne’ebe hateten áat malu sei lakon tiha no sira be hanoin atu halo áat, sei mate hotu. Sira be, hodi liafuan, dada malu bab salan, sira iha odamatan oin buka halakon juíz, no sira be, tan buat folin laek, hasusar ema di’ak. Tan ne’e dun mak Na’i ko’alia nune’e ba uma kain Jacob nian, Na’i be haraik liberdade ba Abraão: “housi ohin ba oin, Jacob labele moe, nia oin la bele kamutis tan, basá wainhira nia haré iha nia oin sira Ha’u liman nia hahalok, nia sei dehan ha’u naran santo”. Sira sei fó hatene Jacob nia santo nia moris santo, hodi hamta’uk Israel nia Maromak. Sira be neon la metin, sei hetan matenek; sira bemamun hasoru, sei simu lia haklaken.

Maromak Futar Lia.

 

Salmo Responsorial                                                                                                                                               Sal. 26(27). 1, 4, 13-14

Refrão : Na’i mak ha’u nia roman no Maksoyn!!! Repete-se

Na’i mak ha’u roman no maksoin;

Ha’u sei ta’uk fali sé?

Na’i mak tahan ha’u nia moris;

Sé lós mak bele halo ha’u nakdedar? Refrão

 

Buat ida de’it ha’u buka hodi husu ba Na’i,

Horik iha Nia kadunan iha ha’u nia moris tomak;

Koko Na’i Nia graça

Hodi hateke ba Na’i Nia uma lulik. Refrão

 

Ha’u hein atu haré Na’i nia laran luak

Iha ema moris sira rain.

Aten barani! Hein iha Na’i!

Laran metin ba! Hein Na’i Maromak! Refrão

 

Aclamação                                                                                                

Refrão : Aleluia, Aleluia!! Repete-se

 Na’i sei mai ho kbi’it liurai.

Nia sei haraik roman ba Nia emar sira matan.

 Ou

Lalehan sira, haruka maha wen housi leten áas ba;

kalohan sira, fakar justiça tun mai; rai nakloke ba, halo mosu maksoin. Refrão

 

Evangelho                                                                                                                                                                                      Mt. 9.  27-31

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus liu daudaun, wainhira matan delek na’i rua la’o tuir Nia  hodi hakilar maka’as: “David nia Oan, sadia ami”.

Wainhira Nia tama tiha iha uma laran, matan delek sira hakbesik ba Nia. Jesus husu ba sira: “ Imi far katak Ha’u bele halo buat ne’ebe imi husu?” sira hatan: “Na’i ami fiar”. Ne’e duni, Jesus tau liman ba sira matan, hodi dehan: “sai diak fali ba tuir imi fiar”. Hafoin sira matan nakloke. Jesus lia tun ba sira: “Haré ba, ema ida la bele hatene buat ne’e!” Maibe, sai tiha, sira haklaken Jesus nia naran ba rai tomak ne’eba.

Lia Maksoyn.

Quinta-Feira, I Semana Iha Tempo Advento (Ano A)

Primeira Leitura                             Is. 26. 1-6

Lia housi livru Isaías nian:

Iha loron ne’eba, ema sei hananu knananuk ne’e iha rai Judá: “Ami iha cidade bo’ot makas, ema harí fatuk hada metin atu tulun ami. Loke odamatan atu povo tama ida-idak, povo ida be fó laran metin mai ami. Nia, povo ida laran mós. Na’i halo nia hetan duni dame, tanba nia fiar Ita bo’ot. Imi fiar metin Na’i ba tamba Na’i fatuk inan ida rohan laek. Nia hatun ema sira be hela iha fatin áas; Nia hatun cidade be foti-an, hatun nia to’o rai, latan nia ba rai rahun. Ema neon susar sira ain, ema kiak sira ain tuban sama nia ba rai.

Maromak Futar Lia.

 

Salmo Responsorial                                                                                                                         Sal. 117(118). 1. 8-9, 19-21, 25-27ª

Refrão : Rahun diak ba ida be mai hodi na’i Nia naran!!! Repete-se

Agradece ba Na’i, tan Nia di’ak.

Nia laran luak metin ba nafatin.

Diak liu buka mahan iha Na’I,

Keta laran metin ba ema sira.

Buka Mahein iha Na’i

Di’ak liu fali fiar iha ema kbi’it na’in sira. Refrão

 

Ita loke mai ha’u odamatan manan funu nian,

Ha’u sei tama atu agradece ba Na’i.

Ne’e odamatan Na’i nian,

Nakloke ba ema hotu be laran mós!

Ha’u agradece Ita, tan rona ha’u,

Ita sai nu’udar ha’u maksoin. Refrão

 

Na’i, haraik maksoyn mai ami,

Halo buat hotu la’o di’ak ba oin.

Rahun di’ak ba ida be mai hodi Na’i Nia naran!

Ami hahi Nia housi Maromak nia fatin santo.

Na’i halo Nia roman lakan tun mai ita. Refrão  

 

Aclamação                                                                                                

Refrão : Aleluia, Aleluia!! Repete-se

Buka Na’i ba, wainhira sei bele hetan;

harohan ba Nia wainhira Nia sei besik

Ou

Hakilar ba ho lian makas, ó be haklaken lia foun ba Jerusalém!

Na’i Maromak atu to’o daudaun ho kbi’it. Refrão

 

Evangelho                                                                                                                                                                                Mt. 7. 21, 24-27

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus lia tun ba escolante sira: “La’os ema hotu be dehan: “ Na’i, Na’i, sei tama iha reino lalehan, maibe sei tama de’it ida ne’ebe halo tuir Ha’u Aman iha lalehan nia hakarak”.

“Ema hotu be rona Ha’u nia liafuan hirak ne’e hodi halo tuir, ema ne’e hanesan mane neon na’in ne’ebe harí uma iha fatuk leten. Udan tau, mota tun, anin huu maka’as baku hasoru uma ne’e, la monu tamba harí iha fatuk leten. Maibe ema hotu be rona Ha’u nia liafuan hirak ne’e, la halo tuir, ema ne’e sei sai hanesan mane neon la’ek ne’ebe halo nia uma iha rai henek leten. Udan tau, mota tun, anin huu maka’as baku hasoru uma ne’e, uma ne’e monu, uma rahun liu”.

Lia Maksoyn.

Quarta-Feira, I Semana Iha Tempo Advento (Ano A)

Primeira Leitura                          Is. 25. 6-10ª

Lia housi livru Isaías nian:

Iha loron ne’eba, Na’i halo buat hotu-hotu, sei hadia ba povo sira tomak, iha foho Sião, aihan festa, aihan diak, hemu tua mesak furak; han bokur no tua diak liu nian.

Iha foho ne’e, Na’i sei kasu tiha hena metan be taka povo sira tomak, hena be falun nação sira hotu; Nia sei halakon hodi oin mate. Na’i sei hamaran mata wen housi oin sira tomak. Na’i sei hasai housi rai klaran tomak, lia be hamoe Nia povo, Na’I hateten lolós nune’e.

Iha loron ne’eba, ema sei dehan: “ne’e, ita nia Maromak, housi Nia, ita hein maksoin. Ne’e Na’i ne’ebe ita fiar metin. Ita sei kontente haksolok tamba Nia soi ita”. Na’i haraik Nia futar liman hodi hamahan foho ida ne’e.”

Maromak Futar Lia.

 

Salmo Responsorial                                                                                                                     Sal. 22(23). 1-3ª, 3b-4, 5, 6 (R. 6cd)

Refrão : ha’u sei hela nafatin iha Na’i Nia uma!!! Repete-se

Na’i ha’u nia mahein, ha’u la kuran buat ida;

Lori ha’u ba hakmatek iha du’ut matak,

Lori ha’u ba wé malirin

Hodi haksolok ha’u klamar. Refrão

 

Nia lori ha’u kona dalan lós tan hadomi Nia naran.

Maske ha’u la’o housi rai kle’an nakukun,

Ha’u sei la tauk buat aat ida, tan Ita hamutuk ho ha’u.

Ita nia ai-tonka no ai-tato’an

Fó laran metin mai ha’u. Refrão

 

Ita hadi’a aihan mai ha’u

Iha ha’u funu baluk sira oin.

Ho mina, Ita hamorin ha’u ulun;

Ha’u cálice nakonu resin. Refrão

 

Laran diak no graça sei la’o tuir ha’u

Lor-loron iha ha’u nia moris;

Ha’u sei hela iha Na’i nia uma

Tinan ba tinan nafatin. Refrão

 

Aclamação                                                                                                

Refrão : Aleluia, Aleluia!! Repete-se

Na’i sei hi’it aan mai soi Nia povo;

rahun diak ba sira be hein atu hasoru malu ho Nia. Refrão

 

Evangelho                                                                                                                                                                                     Mt. 15. 29-37

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus mai iha tasi ninin Galileia nian. Nia sa’e ba foho hodi hatodan-aan iha ne’eba. Ema lubun bo’ot mai hasoru Nia, hodi ema ain áat, kraes, matan delek, monok ho sira seluk tan, lori mai latan iha Jesus futar oin. Nia halo sira diak. Ema lubun bo’ot hakfodak wainhira haré ema monok sira ko’alia, ema kraes sira hetan fali isin diak, ema ain áat sira la’o no mtan delek sira haré. Sira fo glória ba Maromak Israel nian.

Tan ne’e, Jesus bolu Nia escolante sira, hodi dehan: “Ha’u hanoin liu ema lubun bo’ot ne’e: loron tolu ona mak sira hamutuk ho Ha’u; sira la iha buat ida atu han. Maibe Ha’u lakohi haruka sira ba ho kabun mamuk atu sira la bele oin nakukun iha dalan”. Escolante sira hasa’e lia ba Nia: “Iha rai fuik maran ne’e, ami bele hola lós pão barak iha ne’ebe atu bele fó han ba ema lubun bo’ot ne’e?” Jesus husu ba sira: “imi iha pão fuan hira?” Sira hatan ba Nia: “Hitu, no mós ikan ki’ik oan balu”. Jesus haruka ema lubun bo’ot ne’e tur iha rai. Hafoin Nia kaer tiha pão fuan hitu no ikan sira, fó agradece, silu hodi fó ba escolante sira. Hafoin escolante sira fahe ba ema lubun bo’ot ne’e. Sira hotu han to’o bosu. Sira lori baluk sira be resin, luhu hitu nakonu.

Lia Maksoyn.

Terça-Feira, I Semana Iha Tempo Advento (Ano A)

Primeira Leitura                       Is. 11. 1-10

Lia housi livru Isaías nian:

Iha loron neba, housi Jessé nia lolon, sanak ida sei mosu; housi nia abut sira, tubun ida sei moris, Na’i nia Espírito sei hamahan Nia; Espírito matenek no neon naroman; Espírito lia hanourin di’ak no biit-na’in; Espírito hatene no hamta’uk Maromak. Badinas nune’e tan  hamta’uk Maromak, Nia sei tesi lia la tuir buat nia haré de’it housi liur, eh tuir lia nia rona ema hateten. Nia sei tesi lia ho justiça ba ema sira neon susar, Nia sei tesi lia ho lialós ba povo kiik sira. Nia liafuan hanesan óe hodi baku ema laran áat; anin sai housi nia ibun sei halakon ema fiar laek.

Nia taka-an ho justiça, Nia kesi knotak ho laran mós; asu fuik sei moris hamutuk ho bibi-mala’e oan; pantera sei toba hamutuk ho bibi-timur oan; karau oan ho leão la’o hamutuk; labarik ida bele dada sira; karau baka ho ursa sei ha du’ut hamutuk; sira nia oan sei toba hamutuk. Labarik sei halimar iha samea nia knu’uk; kosok oan sei sokar nia liman iha samodok nia kuak. Ema sei la halo tan áat; sei la sobu tan iha Ha’u nia foho santo tomak nia laran: Na’i nia matenek sei nakonu iha rai tomak hanesan wé be nakonu iha tasi laran.

Iha loron neba, Jessé nia abut sei mosu hanesan bandeira povo sira nian. nação sira sei mai buka nia, nia uma sei hetan glória.

Maromak Futar Lia.

 

Salmo Responsorial                                                                                                                     Sal. 71(72). 2, 7-8, 12-13, 17 (R. cf.7)

Refrão : Iha Na’i Nia loron sei moris ba nafatin justiça no dame!!! Repete-se

Maromak, haraik ba liurai kbi’it atu tesi lia,

Haraik ita nia justiça ba liurai oan.

Nia sei ukun Ita nia povo ho justiça,

Nia ukun Ita nia ema kiak sira tuir lia lós. Refrão

 

Justiça sei fó funan iha Nia loron,

Dame bo’ot to’o tempo ikus nian.

Nia sei ukun housi tasi feto to’o tasi mane,

Housi mota bo’ot to’o rai ikun rai ulun. Refrão

 

Liurai sira Tarsis nian sei selu rai ten ba Nia,

Sabá no Arábia nia liurai sira

Sei mai ho sira nia buat karan.

Sei hakru’uk iha Nia futar oin liurai sira tomak,

Povo sira tomak sei servi Nia. Refrão

 

Nia sei rona ema kiak sira lian,

Sei soi ema neon susar be la iha ema tulun sira,

Sei sadia ema kbi’it laek no ema kiak sira,

Sei soi ema kiak sira nia moris. Refrão

 

Rahun diak ba Nia futar naran ba nafatin,

Ema hanoin Nia nafatin hanesan loron nia roman.

Iha Nia, povo tomak hetan bensa.

Nação sira hotu sei hateten diak Nia. Refrão

 

Aclamação                                                                                                

Refrão : Aleluia, Aleluia!! Repete-se

Na’i sei mai ho kbi’it liurai. Nia sei haraik

roman ba Nia emar sira matan. Refrão

 

Evangelho                                                                                                                                                                                    Lc. 10.  21-24

Na’i Jesus Cristo nia Evangelho nu’udar São Lucas haktuir:

Iha tempo ne’eba, Jesus haksolok wa’in tebes tambá Espírito Santo nia hahalok hodi dehan: “Ha’u agradece ba Ita, Aman, lalehan no rai nia Na’i, tamba Ita subar lia lós hirak ne’e ba ema matenek no neon na’in sira hodi haklaken ba ki’ik oan sira.

Lós duni, Aman, tamba buat ne’e haksolok Ita. Buat hotu ha’u simu housi ha’u Aman. Ema ida la hatene oan, Aman deit mak hatene; ema ida la hatene Aman ne’e sé, oan deit hatene no mós ida ne’ebe oan hakarak haklaken ba nia”.

Jesus fila oin ba escolante sira mesak hodi dehan tan: “rahun diak ba matan sira bé haré buat bé imi haré daudaun, tamba ha’u dehan ba imi: profeta no liurai sira barak hakarak rona buat bé imi rona, maibe la rona; hakarak haré buat bé imi haré, Maibe la haré”.

Lia Maksoyn

Segunda-Feira, I Semana Iha Tempo Advento (Ano A)

Primeira Leitura                            Is. 2. 1-5

Lia housi livru Isaías nian:

Isaías, Amós nia oan, haré buat hirak ne’e tomak kona ba Judá no Jerusalém. Loron ida sei to’o; iha loron ne’e foho nebe Na’i nia Uma Lulik hela ba, sei foti-an áas liu foho  sira, iha foho oan sira leten. Nação sira tomak sei halai hotu ba neba, povo ua’in be ua’in sei la’o hotu ba neba.  Sira sei hateten: “Imi mai, ita sa’e ba Na’i nia foho, ba Jacob nia Maromak Nia uma lulik. Nia sei hanourin ita, Nia hanourin dalan mai ita, atu ita la’o tuir Nia dalan terik. Ukun sei mai housi Sião, Na’i futar lia sei mai housi Jerusalém”. Nia nu’udar Juíz ida iha nação sira leet, sei tesi lia hodi fó ordem ba povo ua’in. Hodi surik, sira sei tuku besi fila rai; hodi diman, sira sei halo tudik ko’a háre. Nação sira sei la káer tan kro’at hasouru nação seluk; ema sei la buka halo tan funu. “Mai, uma kain Jacob nian, ita la’o iha Na’i Nia roman”.

Maromak Futar Lia.

 

Salmo Responsorial                                                                                                Sal. 121(122). 1-2, 3-4ª, 4b-5, 6-7, 8-9 (R. cf. 1)

Refrão : Ami sei ba Na’i Nia uma ho ksolok!!! Repete-se

Ha’u haksolok tebes uainhira ema dehan:

“Ita sa’e ba Na’i Nia uma lulik”.

Ami ain sama ona ó rain;

Ami hamriik iha ó nia odamatan, Jerusalém. Refrão

 

Jerusalém, harí met-metin,

Cidade kmook, kmook ua’in basu.

Povo sira sa’e ba neba,

Povo tomak Israel nian. Refrão

 

Tuir lisan Israel nian,

Atu haliban Na’i Nia naran;

Iha neba mak iha tribunal justiça nian,

Tribunal uma David nian. Refrão

 

Sei husu dame  ba Jerusalém!

Moris hakmatek ba sira be hadomi ó

Dame mak ukun iha ó nia fatuk-hada,

Ó kadunan laran hakmatek haksolok! Refrão

 

Tan hadomi ha’u maun no alin sira,

Ha’u sei dehan: “Dame hela ho ó!”

Tan hadomi ita Na’i Maromak Nia Uma,

Ha’u sei husu kmanek tomak ba ó. Refrão

 

Aclamação                                                                                                                                                                                           Sal. 79. 4

Refrão : Aleluia, Aleluia!! Repete-se

Na’i, ami Maromak, hi’it-An mai soi ami;

hatudu Ita futar oin mai ami, ami hetan salvação. Refrão

 

Evangelho                                                                                                                                                                                          Mt. 8. 5-11

Na’i Jesus Cristo nia Evangelho nu’udar São Mateus haktuir:

Iha tempo neba, Jesus tama iha Cafarnaúm, comandante centurião ida hakbesik ba Nia hodi harohan nune’e: “Na’i, ha’u nia atan moras iha uma, ain no liman tós, terus teb-tebes”. Jesus lia tun ba nia: “Ha’u sei ba halo nia di’ak fali”. Maibe centurião hatan ba Nia: “Na’i, ha’u la so’i Itaboot hi’it-An mai ha’u uma laran; Ita liafuan ida de’it to’o ona atu ha’u nia atan hetan fali isin di’ak. Tan ha’u mós iha ema haruka; iha soldado halo tuir ha’u nia ordem. Ha’u dehan ba ida ‘ó ba’, nia ba; ba ida seluk ‘ó mai’, nia mai; no mós ba ha’u nia atan: ‘halo buat ne’e’, nia halo”. Rona tiha nia, Jesus hakfodak hodi hateten ba sira nebe la’o hamutuk ho Nia: “Tebes duni, Ha’u dehan ba imi, Ha’u seida’uk hetan iha Israel nia ema sira, fiar ida boot hanesan ne’e. Ne’e duni, Ha’u dehan ba imi, housi loro-sa’e to’o loro-monu, ema barak sei mai tur iha mesa hamutuk ho Abraão, Isaac no Jacob iha reino Lalehan”.

Lia Maksoyn.

I Domingo Iha Tempo Advento (ANO A)

Primeira Leitura                             Is. 2, 1-5

Lia housi Livro Profeta Isaías:

Sasán nebe Isaías, Amos nian ona, haré kona ba Judá ho Jerusalém: iha loron ikus sei mosu nune’e: Foho Maromak horik fatin, sei hatur iha foho hotu-hotu sira leten; sei laku liu kleletek hotu. Ema rai hotu sei halai ba nia; ema wain ba wain sei sa’e ba hodi hananu:”Mai ita sae ba Maromak nia foho, ba horik fatin Maromak Jacob nian. Maromak nee sei hanorin Nia dalan mai ita, ita sei lao tuir Nia dalan terik, basá, ukun sei mai housi Sião, Na’i nia lia fuan sei mai housi Jerusalém”. Nia sei tesi lia ba ema rai tomak, sei haraik Nia ukun fuan ba povo wain, nebe sei tuku nia surik halo fali enxada, sei tuku sira nia diman, halo fali tudik ko’a hare. Rai ida sei la foti kroat hasoru rai seluk; ema sira sei la hadia tan sira-an ba funu. ”Nee duni, uma kain Jacob mai hotu, ita atu lao ba Nai nia naroman”.

Maromak Futar Lia.

 

Salmo Responsorial                                                                                                                   Sal. 121-122, 1-2. 3-4a (4b-5. 6-7) 8-9

Refrão : Ksolok boot wainhira ema dehan: lao ba Nai Maromak nia kadunan!!! Repete-se

Jerusalém hari meti-metin, nuadr cidade la nakdoko

Iha nebá, sa’e ema barak, Nai Maromak nia emar. Refrão

 

Hahi Nai Maromak naran

Halo tuir lisan ema Israel nian

Maromak nia lialos no boot tebes,

Iha David nia kadunan. Refrão

 

Segunda Leitura                                                                                                                                                                      Rom. 13, 11-14

Lia housi São Paulo nia surat ba sarani sira iha Roma:

Maun alin sira: imi hatene tempo nebe ita moris daudaun. Oras too ona atu hamos matan, basá, maksoyn mai besik liu ona ita, besik liu fali wainhira ita foin simu fiar. Kalan fahe rua ona; rai hun besik nakbo’as.  Soe tiha ba dook, hahalok nakukun nian, hodi tuir fali hahalok naroman nian. Ita sei la’o lolos, nudar ihanaroman laran; keta han hemu resin; keta moris a’at, keta sala foer; keta hirus, keta laran moras ba malu; maibé, hafutar-an hodi Nai Jesus Cristo, atu la bele hanoin resin isin lolon, hodi halo tuir isin nia karan.

Maromak Futar Lia.

 

Aclamação                                                                                                                                                                                           Sal. 84, 8

Refrão : Aleluia, Aleluia!! Repete-se

Na’i, hatudu Ita laran luak mai ami,

Haraik mai ami maksoyn. Aleluia! Refrão

 

Evangelho                                                                                                                                                                                    Mt. 24, 37-44

Na’i Jesus Cristo nia Evangelho nu’udar São Mateus haktuir:

Iha tempo neba, Jesus hatun lia ba escolante sira:”hanesan iha loron Noé nian, sei sai mos nunee, wainhira Mane Maksoyn mai”. Iha loron hirak molok rai naben, ema sira han, hemu, kaben, fo kaben ba oan feto sira too loron Noé tama iha ró. Sira la hatene buat ida too rai naben tolan sira hotu. Sei sai mos nunee, iha loron Mane Maksoyn mai. Iha loron nee, mane nain rua nebe halo dadaun tos, ida, ema sei lori tiha, ida seluk, ema sei husik hela; feto nain rua nebe tuku batar eh fai haré dadaun, ida, ema sei lori tiha, ida seluk, ema sei husik hela. Ne’e duni, hamos matan, basá, imi la hatene iha sa loron imi nia Nain sei too mai. Imi rona lai lia ida ne’e: Uma nain hatene karik iha sa oras kalan naok ten tama mai, nia sei hader hein atu la husik naokten tama uma. Tan nee, imi hadia-an nafatin, basá, Mane Maksoyn sei mai iha oras imi la hanoin kona.

Lia Maksoyn.

Sábado, XXXIV Tempo Comum (ANO C)

Primeira Leitura                    Dan. 7. 15-27

Lia housi Profecia Daniel nian:

Ha’u, Daniel, laran susar, tan buat nebé mosu liu ba no tan mehi nebé liu housi ha’u nia hanoin, halo ha’u laran ta’uk tebes. Ha’u hakbesik-an ba sira ne’e ida nebé iha nebá, hodi husu tuir lolós kona ba buat hirak nebá. Nia hateten lolós mai ha’u hodi dehan: “Balada boot háat nebá, katak liurai na’in háat nebé sei hamriik housi rai. Sira nebé sei ba simu reino mak Santo sira Leten áas liu Nian; sira sei ukun reino ne’e ba nafatin”.

Hafoin, ha’u hakarak mós hatene lolós kona ba balada nebé mosu ba dala háat, la hanesan balada sira seluk, halo ta’uk liu ema, ho nehan besi no ain liman kukun riti, nebé han no harahun buat hotu no resto nia sama hanehan ba rai. Ha’u hakarak mós hatene lolós kona ba dikur sanulu housi nia ulun, no kona ba dikur ida seluk nebé moris, no iha dikur nebá nia oin, dikur tolu monu; dikur ne’e iha matan no ibun nebé ko’alia foti-an, hanesan boot liu fali sira seluk. Ha’u haré dikur ne’e funu hasouru santo sira, nia manan sira, to’o katuas mai. To’o tiha mai, Nia halo justiça ba santo sira Leten áas liu nian, no to’o ona oras atu sira simu reino.

Ema nebé dehan lós, hatan mai ha’u nune’e: “Balada ba dala háat nebé mosu, ne’e katak reino ba dala háat nebé sei mosu iha rai; nia la hanesan sira seluk, nia sei mai tolan, sama hanehan ho ain, no harahun rai tomak. Dikur sanulu hatudu liurai sanulu nebé sei mosu housi reino ne’e. Dikur ida seluk sei mosu ikus, nia la hanesan sira seluk, nia sei hamonu liurai na’in tolu. Nia ko’alia liafuan hasouru Ida be Leten áas liu, hodi halo áat ba Nia santo sira. Nia buka atu muda festa sira nia loron no Lei; sei saran santo sira ba nia liman, iha tempo ida nia laran, iha tempo rua nia laran eh iha tempo baluk ida nia laran. Tuir mai, tribunal Na’i niansei hahu tesi lia, sira sei hasai ukun housi liurai ne’e, atu halakon no harahun nia ba nafatin. Nação hotu, ukun na’in sira hotu, no reino hotu, nebé hela iha lalehan okos, sei saran hotu ba povo santo sira Leten áas liu Nian. Ninia reino sei ida rohan laek, biit na’in sira hotu sei serbi Nia, hodi halo tuir Ninia hakaran”.

Maromak Futar Lia.

 

Salmo Responsorial                                                                                                                 Dan. 3. 82, 83, 84, 85, 86, 87 (R. 59b)

Refrão : Hahí no hawelok Na’i ba nafatin!!! Repete-se

Emar hotu, hawelok Na’i ba,

Hahí no hawelok Na’i ba nafatin. Refrão

 

Israel, hawelok Na’i ba,

Hahí no hawelok Na’i ba nafatin. Refrão

 

Na’ilulik sira Na’i Nian, hawelok Na’i ba,

Hahí no hawelok Na’i ba nafatin. Refrão

 

Na’i nia atan sira, hawelok Na’i ba,

Hahí no hawelok Na’i ba nafatin. Refrão

 

Espírito no klamar justo sira, hawelok Na’i ba,

Hahí no hawelok Na’i ba nafatin. Refrão

 

Santo sira no ema sira be fuan haraik-an, hawelok Na’i ba,

Hahí no hawelok Na’i ba nafatin. Refrão

 

Aclamação                                                                                                                                                                                           Lc. 21. 36

Refrão : Aleluia, Aleluia!!! Repete-se

Imi matan moris hodi hamulak nafatin atu imi bele

Hamriik ho laran metin iha Mane Maksoyn Nia futar oin. Refrão

 

Evangelho                                                                                                                                                                                     Lc. 21. 34-36

Na’i Jesus Cristo nia Evangelho nudar São Lucas haktuir:

Iha tempo nebá, Jesus lia tun ba escolante sira hodi dehan: “Imi matan moris neon na’in ba, keta laran todan tan hahalok áat sira, tan lanu, tan fó neon resin ba moris ne’e atu loron ne’e keta to’o teki-tekir de’it  hanesan hani; basá nia sei monu hanesan hani ida ba ema hotu nebé tur iha raiklaran tomak. Ne’e duni, matan moris hodi hamulak nafatin ba, atu imi bele hetan biit hodi hadook-an housi buat hotu nebé sei mosu no bele hamriik metin iha Oan Mane nia oin”.

Lia Maksoyn.

Sexta-Feira, XXXIV Tempo Comum (ANO C)

Primeira Leitura                        Dan. 7. 2-14

Lia housi Profecia Daniel nian:

Ha’u Daniel, haré hela iha ha’u nia mehi kalan, wainhira anin lalehan nian huu housi fatin háat, liki tasi boot ba mai; Haousi tasi laran mosu balada boot háat, nebé la hanesan. Ida uluk hanesan leão, ho liras makikit nian. Ha’u haré nafatin, to’o fokit sai hotu nia liras sira housi nia isin. Nia hamriik lós tiha housi rai hanesan ema hodi hakmatek iha fatin no fó ba nia fuan ida ema nian. Tuir mai, mosu tan balada seluk ida ba dala rua, hanesan urso, hamriik ho nia sorin de’it, ho knosen ruin tolu iha nia ibun, iha nehan sira leet. Lia ida tun ba nia dehan: “Hamriik ba hodi han naan barak”. Tuir fali, ha’u hahu haré tan, wainhira mosu balada seluk hanesan leopard, nebé iha liras háat manu nian iha kotuk. Balada ne’e iha ulun fatuk háat. Nia simu biit liurai nian. Iha kalan ne’e duni, iha mehi, ha’u haré tan balada seluk ida, nebé mosu ba dala háat, oin kroat, isin forte, ema ta’uk haré. Nia iha nehan mesak boot besi nian. Nia han, hafoin, ho ain, nia harahun no sama hanehan buat hotu nebé resin. Nia la hanesan balada sira seluk nebé mosu uluk liu, nia iha dikur sanulu. Wainhira ha’u fihir dikur hirak ne’e, iha sira leet mosu tan dikur ki’ik ida, no dikur tolu be uluk fokit sai tiha hodi fó fatin ba dikur foun. Iha dikur ne’e, iha matan hanesan ema nian, no ibun ida nebé ko’alia loko-an nian. Ha’u haré hela nafatin.

Trono balun hatur-an no Katuas lulik ida hatodan An tiha. Nia hatais mutin teb-tebes, hanesan kalohan mutin, Nia fúuk mós hanesan bibi malae nia fulun lolós. Ninia trono halo ho ahi lakan, ho roda ahi klaak moris. Mota ahi nian ida halai suli housi Nia futar oin. Rihun ba rihun serbi Nia, no tokon atus hamriik iha Nia futar oin. Tribunal hahu loke, no loke mós livro sira.

Nune’e, ha’u haré, ha’u sei rona liafuan sira loko-an nian, nebé sai housi dikur ne’e. Wainhira ha’u hateke hela, oho tiha balada ne’e, halo nia isin sai rahun hodi soe tama iha ahi be lakan maka’as. Housi balada sira seluk, hasai hotu sira biit, maibé, sira nia moris tahan to’o tempo ruma no loron ruma.

Ha’u hateke hela ba buat nebé mosu iha kalan, wainhira, iha kalohan lalehan nia laran, mai ida hanesan Oan Mane.  Nia la’o dadaun ba Katuas lulik, sira lori Nia ba Katuas ne’e nia oin, Nia simu biit liurai nian atu ukun povo tomak no nação hot-hotu. Ema tomak housi lian hot-hotu serbi Nia. Ninia biit ukun to’o rohan laek, Nia ukun sei la lakon; Ninia reino ema ida sei la sobu.

Maromak Futar Lia

 

Salmo Responsorial                                                                                                            Dan. 3. 75, 76, 77, 78, 79, 80, 81 (R. 59b)

Refrão : Hahí no hawelok Na’i ba nafatin!!! Repete-se

Foho no foho kiik sira, hawelok Na’i ba,

Hahí no hawelok Na’i ba nafatin. Refrão

 

Buat hotu nebé tubun housi rai, hawelok Na’i ba,

Hahí no hawelok Na’i ba nafatin. Refrão

 

Tasi no mota boot sira, hawelok Na’i ba,

Hahí no hawelok Na’i ba nafatin. Refrão

 

We matan sira, hawelok Na’i ba,

Hahí no hawelok Na’i ba nafatin. Refrão

 

We kutun sira iha tasi, hawelok Na’i ba,

Hahí no hawelok Na’i ba nafatin. Refrão

 

Manu sira iha lalehan, hawelok Na’i ba,

Hahí no hawelok Na’i ba nafatin. Refrão

 

Balada sira fuik no maus, hawelok Na’i ba,

Hahí no hawelok Na’i ba nafatin. Refrão

 

Aclamação                                                                                                                                                                                           Lc. 21. 28

Refrão : Aleluia, Aleluia!!! Repete-se

Hamriik ba hodi foti imi ulun basá,

Imi nia libertação besik ona. Refrão

 

Evangelho                                                                                                                                                                                     Lc. 21. 29-33

Na’i Jesus Cristo nia Evangelho nudar São Lucas haktuir:

Iha tempo nebá, Jesus haktuir aiknanoik ida ne’e ba escolante sira: “Imi haré didi’ak ai figueira no ai sira seluk hotu. Wainhira sira hahu hatubun tahan nurak, imi hatene katak bailoron besik ona. Nune’e mós imi, wainhira imi haré buat hirak ne’e mosu, imi sei hatene katak Maromak nia reino besik ona. Tebes Ha’u dehan ba imi: otas ne’e sei la liu to’o buat ne’e hotu mosu. Lalehan no rai sei liu, maibé Ha’u nia liafuan sira sei la liu”.

Lia Maksoyn.

Quinta-Feira, XXXIV Tempo Comum (ANO C)

Primeira Leitura                  Dan. 6. 12-28

Lia housi Profecia Daniel nian:

Iha loron hirak nebá, ema balun ho hakfodak halai ba hodi hetan Daniel harohan hela hodi husu tulun ba nia Maromak. Nune’e, sira ba liurai nia oin hodi dehan ba nia: “Liurai, itaboot la assina tiha ona surat bandu nian ida nebé dehan katak ema hotu nebé, iha loron tolu nulu nia laran, harohan ba naran maromak ida eh ema ida, nebé la’os itaboot rasik, sei soe tama nia iha leão sira nia ku’ak?” Liurai simu hodi hatan ba sira: “Ne’e tebes duni, tuir lei ema Medo no Persa nian, nebé la bele muda”. Nune’e, sira hatan ba liurai: “Basá, Daniel, uluk houris ida housi Judá, la fiar uitoa iha itaboot, liurai, no mós la halo tuir itaboot nia surat bandu: loron ida nia harohan dala tolu”.

Rona tiha liafuan hirak ne’e, liurai neon susar tebes. Nia buka dalan to’o loro-kraik atu soi Daniel hodi hasai nia. Maibé, ema sira nebá, fila lalais kedas ba liurai hodi dehan ba nia: “Liurai, ita hatene ona katak tuir ema Medo no Persa nia lei, surat bandu eh lei ruma nebé liurai assina, sei la muda”. Tan ne’e, liurai fó ordem ba sira atu lori Daniel mai hodi soe tama iha leão sira nia ku’ak. Liurai ba hasouru Daniel hodi dehan ba nia: “Husu barak atu ó nia Maromak soi ó, Maromak nebé ó serbi ho fiar metin”. Hafoin, sira lori fatuk ida mai hodi tau iha ku’ak nia leten. Liurai tau tiha selo iha ku’ak ne’e ho nia kadeli no ho kadeli nia embo’ot sira nian, atu Daniel la bele sai. Tuir mai, nia fila ba ninia kadunan; kalan tomak hadera-an hodi la han, la hemu; nia la husik feto sira tama iha nia oin; nia la dukur kalan tomak.

Iha loron tuir mai, wainhiraloron matan mosu, nia halai lalais kedas ba leão sira nia ku’ak. Wainhira to’o iha ku’ak, ho lian susar tebes nian, hakilar ba Daniel hodi dehan ba nia nune’e: “Daniel, Maromak moris nia atan, ó nia Maromak nebé ó serbi ho fiar tomak, bele soi ó housi leão sira?” Nune’e, Daniel hatan ba liurai: “Viva liurai ba nafatin! Ha’u nia Maromak haruka Nia Anjo mai, atu taka netik leão sira nia ibun; leão la halo áat mai ha’u. Basá, ha’u laran mós iha Na’i Nia futar oin, no mós  ha’u la halo áat buat ida iha itaboot nia oin, liurai”. Nune’e, liurai haksolok teb-tebes, haruka hasai Daniel housi ku’ak, sira la hetan iha nia kanek kiik oan ida, tan ba nia fiar metin iha nia Maromak. Liurai fó ordem atu lori ema sira hotu nebé kesar Daniel, atu soe tama sira iha leão sira nia ku’ak hamutuk ho sira nia féen no oan sira. Wainhira sira la dauk to’o iha ku’ak kidun, leão sira simu sira hodi ruun rahun sira nia ruin hotu.

Nune’e, liurai Dario haruka karta ne’e ba povo hot-hotu, ba nação hot-hotu no lian hot-hotu nebé hôrik iha rai tomak: “Rahun di’ak tebes ha’u hato’o ba imi hotu! Ida ne’e mak ordem nebé ha’u fó ba imi: iha rai tomak nebé ha’u ukun ba, ema hotu sei hamta’uk no hahí Maromak Daniel nian; Nia mak Maromak moris nebé sei hela ba nafatin; Nia reino sei la rahun, Nia ukun sei rohan laek. Nia mesak de’it mak bele soi no fó liberdade; Nia mesak de’it mak bele halo milagre no buat foun iha Lalehan no iha rai. Nia rasik mak soi Daniel housi leão sira nia liman kro’at”.

Maromak Futar Lia

 

Salmo Responsorial                                                                                                           Dan. 3. 68, 69, 70, 71, 72, 73, 74 (R. 59b)

Refrão : Hahí no hawelok Na’i ba nafatin!!! Repete-se

Maha-wen no we nahisi hawelok Na’i ba,

Hahí no hawelok Na’i ba nafatin. Refrão

 

Malirin no anin ki’ik, hawelok Na’i ba,

Hahí no hawelok Na’i ba nafatin. Refrão

 

We nahisi ho neve, hawelok Na’i ba,

Hahí no hawelok Na’i ba nafatin. Refrão

 

Kalan no loron sira, hawelok Na’i ba,

Hahí no hawelok Na’i ba nafatin. Refrão

 

Naroman no nakukun, hawelok Na’i ba,

Hahí no hawelok Na’i ba nafatin. Refrão

 

Rai-lakan no kalohan, hawelok Na’i ba,

Hahí no hawelok Na’i ba nafatin. Refrão

 

Rai klaran tomak, hawelok Na’i ba,

Hahí no hawelok Na’i ba nafatin. Refrão

 

Aclamação                                                                                                                                                                                           Lc. 21. 28

Refrão : Aleluia, Aleluia!!! Repete-se

Hamriik ba hodi foti imi ulun basá,

Imi nia libertação besik ona. Refrão

 

Evangelho                                                                                                                                                                                     Lc. 21. 20-28

Na’i Jesus Cristo nia Evangelho nudar São Lucas haktuir:

Iha tempo nebá, Jesus lia tun ba escolante sira, hodi dehan: “Wainhira imi haré soldado sira hale’u Jerusalém, imi sei hatene lolós katak nia besik ona atu mohu. Iha loron nebá sira nebé iha Judeia, halai ba foho sira; sira nebé iha cidade laran, sai tiha ba liur; sira nebé iha to’os, keta tama fali iha cidade. Basá ne’e mak loron castigo nian atu sai tuir lolós buat nebé hakerek ona. Susar ba feto sira nebé ko’us eh fó susu iha loron nebá, basá todan boot sei mosu iha rai no larn nakali sei mosu hasouru povo ne’e. Sira sei monu iha surik kroat nia okos, ema sei lori sira nu’udar ema dadur ba rai hotu, no gentio sira sei sama rahun Jerusalém to’o gentio sira nia otas sei hotu ona.”

“Sinal sira sei mosu iha loron, iha fulan no fitun sira. Iha raiklaran, nação sira sei laran susar no ta’uk teb-tebes tanba tarutu housi laloran no tasi nian. Ema sira sei mate tanba de’it ta’uk, hodi hanoin sáida mak sei mosu iha raiklaran, basá lalehan nia kbiit sei nakdoko. Iha oras ne’e, ema sei haré Oan Mane mai iha kalohan ho kbiit no glória wain tebes. Wainhira buat hirak ne’e sei mosu, aten b arani ba hodi foti aas imi nia ulun, basá imi nia maksoyn besik ona”.

Lia Maksoyn.

Quarta-Feira, XXXIV Tempo Comum (ANO C)

Primeira Leitura        Dan. 5. 1-6, 13-14, 16-17, 23-28

Lia housi Profecia Daniel nian:

Iha loron hirak nebá, liurai Baltasar fó jantar boot ida ba nia emar ulun sira rihun ida, hodi hemu tua iha sira ne’e nia oin. Tan hemu tua to’o lanu ona, liurai Baltasar haruka lori mai vasu sira osan mean no osan mutin nian, nebé nia aman Nabucodonosor hadau housi templo Jerusalém nian, atu liurai, liurai nia emar nia ulun sira, sira nia féen sira ho sira nia feto kiik sira, hemu tua iha vaso sira ne’e nia laran. Sira hotu hemu duni tua iha vaso hirak ne’e nia laran, hodi hahí sira nia maromak falso sira be osan mean, osan mutin, riti, besi, ai no fatuk.

Iha oras nebá duni, mosu ema nia liman fuan sira nebé hakerek iha ahi nia oin, iha ahu mutin didin nian iha kadunan liurai; liurai haré rasik liman ne’e hakerek. Haré tiha ne’e, liurai nia oin nakfila tiha kedas, neon susar teb-tebes; ruin sira iha knotak siin hotu, nia ain tur sira baku ba malu. Haruka bolu Daniel mai iha liurai nia oin, liurai hato’o liafuan hirak ne’e ba nia: “Ó mak Daniel uluk houris ida housi Judá nian nebé liurai, ha’u aman, lori housi Judá mai iha ne’e? Ha’u hateten katak espírito divino hôrik iha ó. Tan ne’e, ó hetan naroman, matenek boot no hanoin áas. Ha’u rona hateten mós katak ó iha kbiit atu interpreta lolós mehi, no bele mós si’ik aisasi’ik sira. Ó bele lê karik liafuan hirak be hakerek iha didin ne’e, hodi fo hatene mai ha’u nia katak sá, ha’u sei fó hatais ó ho hena liurai nian, ó sei tara corenti mean iha kakorok, ó sei hetan fatin bad ala tolu iha ukun reino nian”.

Nune’e, Daniel simu hodi hatan ba liurai, dehan “Rai ita an ita nia hahí an, no fó ba ema seluk ita nia buat ksolok (presente) sira. Ha’u sei lê ba liurai liafuan sira be hakerek ne’e hodi fo hatene mós ninia significado. Tan liurai foti-an hasouru Na’i Lalehan nian, hodi haruka hola vaso sira housi Nia templo nebé liurai ho ulun sira nia emar nian, ho féen sira no feto kiik sira hodi hemu tua. Ita hahí hodi fó glória ba maromak falso sira be osan mean, osan mutin, riti, besi, ai no fatuk, nebé la haré, la rona, no mós la iha hanoin. Maibé, imi la hahí no la fó glória ba Maromak nebé ukun ó nia iis hodi tau matan ba ó nia dalan sira hotu. Tan ne’e, mak housi Nia futar oin, haruka tun liman ne’e mai hodi hakerek liafuan hirak ne’e. Liafuan sira be hakerek mak ne’e: “Mené, Téquel, Parsin, liafuan sira ne’e nia significado ma ne’e: ‘Mené’: ‘Sura tiha ona’, Maromak sukat tiha ona ó nia ukun hodi hakotu tiha ona nia rohan; ‘Téquel’: ‘Tetu tiha ona’, tetu tiha ona ó nia dasin, maibé, kmaan hela; ‘Peres’: ‘Nakfahek’, ó nia reino sei fahe-an hodi saran ba ema Medo no ba ema Persa sira”.

Maromak Futar Lia

 

Salmo Responsorial                                                                                                                 Dan. 3. 62, 63, 64, 65, 66, 67 (R. 59b)

Refrão : Hahí no hawelok Na’i ba nafatin!!! Repete-se

Loron matan no fulan, hawelok Na’i ba,

Hahí no hawelok Na’i ba nafatin. Refrão

 

Fitun sira iha Lalehan, hawelok Na’i ba,

Hahí no hawelok Na’i ba nafatin. Refrão

 

Udan no maho-wen, hawelok Na’i ba,

Hahí no hawelok Na’i ba nafatin. Refrão

 

Anin sira, hawelok Na’i ba,

Hahí no hawelok Na’i ba nafatin. Refrão

 

Ahi no manas, hawelok Na’i ba,

Hahí no hawelok Na’i ba nafatin. Refrão

 

Malirin no we nahisi, hawelok Na’i ba,

Hahí no hawelok Na’i ba nafatin. Refrão

 

Aclamação                                                                                                                                                                                          Ap. 2. 10c

Refrão : Aleluia, Aleluia!!! Repete-se

Laran metin ba to’o mate no Ha’u sei fó

Coroa moris nian. Refrão

 

Evangelho                                                                                                                                                                                      Lc. 21. 12-19

Na’i Jesus Cristo nia Evangelho nudar São Lucas haktuir:

Iha tempo nebá, Jesus lia tun ba nia escolante sira hodi dehan: “Maibé uluk liu buat ne’e hotu, ema sei kaer imi, sei haterus imi, sei lori imi ba sinagoga no hatama imi iha dadur laran. Ema sei saran imi ba liurai no embo’ot sira tan Ha’u nia naran; no imi sei fó sasin. Ne’e duni, hametin imi nia laran hodi lalika hanoin uluk atu hatan oin sá; basá Ha’u sei fó ba imi lia no matenek, nebé imi nia funu baluk sira hotu sei la bele tahan eh ko’alia hasouru. Imi nia aman inan, maun alin, parenti no belun sira sei saran imi. Ema sei oho imi balun. Ema hotu sei odi imi tan Ha’u nia naran. Maibé imi nia fuuk lahan ida mós sei la monu lakon. Ho paciência, imi sei soi imi nia klamar”.

Lia Maksoyn.