shadow
Diocese de Dili > NOTÍCIAS > LETURA DIÁRIA

Quinta-Feira, XXXIV Semana Tempo Comum (ANO A)

Primeira Leitura       Ap. 18. 1-2, 21-23; 19. 1-3, 9ª

Lia housi Livro Apocalipse:

Ha’u João, haré anjo ida tan tun mai housi lalehan; nia simu tiha biit ua’in; nia glória leno raiklaran tomak. Nia hakilar ho lia maka’as, “Babilónia lakon ona; nia sai tiha diabo sira nia uma, espírito áat sira hotu nia fatin no manu fo’er no áat sira nia knuuk.”

Tuir mai, anjo biit na’in ida foti fatuk boot ida hanesan fatuk dular batar nian, soe nia ba tasi laran hodi dehan “Nune’e mak sei soe cidade boot Babilónia nian; ema sei la haré tan nia, ‘ema sei la rona tan iha o nia laran knananuk harpa no ema nian, no mó musica housi flauta no trombeta; ema sei la hetan tan badaen oi-oin sira; ema sei la rona tan tarutu dulas batar nian; ahi oan sei la lakan tan; ema sei la rona tan noivo no noiva sira nia lia iha ó; basá ó nia  contrato na’in sira mak ukun raiklaran tomak; no ó nia hahalok sira lohi nação sira hotu.’

Ne’e hotu tiha, ha’u rona lia ida hanesan housi ema lubun boot iha lalehan; sira hananu maka’as, “Aleluia, maksoin, glória no ukun ba ita nia Maromak! Nia lós no di’ak wainhira Nia tesi lia; Nia tesi lia hasouru feto áat boot nebé halo áat raiklaran ho nia sala fo’er; Nia halo oan vingansa kona ba atan sira nebé feto áat ne’e oho tiha.” Sira hananu maka’as dala ida tan, “Aleluia! Ahi suar housi feto ne’e sei sa’e nafatin ba nafatin.”

Anjo dehan, “Hakerek ida ne’e: Rahun di’ak ba sira nebé simu convite ba Bibi Oan nia festa casamento nian,” no nia dehan tan, “Sira ne’e mak lia menon lós housi Maromak.”

Maromak Futar Lia.

 

Salmo Responsorial                                                                                                                  Sal. 99(100). 2, 3, 4, 5 (R. Ap. 19. 9ª)

Refrão : Ksolok ba sira nebé simu convite ba festa casamento Bibi Oan nian!!! Repete-se

Rai tomak hahí Na’i!

Serbi Na’i ho ksolok!

Mai iha futar oin ho knananuk ksolok nian. Refrão

 

Hatene ba katak Na’i mak Maromak!

Nia mak halo ita, ita Na’i nian.

Ita hotu Nia povo, bibi sira iha Nia bibi luhan. Refrão

 

Imi tama ba housi odamatan hodi agradece,

Tama iha nia uma klabis hodi hananu knananuk hahí nian,

Haliban Nia no hauélok Nia naran. Refrão

 

Na’i di’ak tebes duni,

Nia domin ho laran sadi’a rohan laek,

Nia káer metin Ni alia menon housi otas ba otas. Refrão

 

Aclamação                                                                                                                                                                                           Lc. 21. 28

Refrão : Aleluia, Aleluia!! Repete-se

Hamriik ba hodi foti imi ulun basá,

imi nia libertação besik ona. Refrão

 

Evangelho                                                                                                                                                                                    Lc.  21. 20-28

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira, hodi dehan: “Wainhira imi haré soldado sira hale’u Jerusalém, imi sei hatene lolós katak nia besik ona atu mohu. Iha loron nebá sira nebé iha Judeia, halai ba foho sira; sira nebé iha cidade laran, sai tiha ba liur; sira nebé iha to’os, keta tama fali iha cidade. Basá ne’e mak loron castigo nian atu sai tuir lolós buat nebé hakerek ona. Susar ba feto sira nebé kô’us eh fó susu iha loron nebá, basá todan boot sei mosu iha rai no laran nakali sei mosu hasouru povo ne’e. Sira sei monu iha surik kroat nia okos, ema sei lori sira nu’udar ema dadur ba rai hotu, no gentio sira sei sama rahun Jerusalém to’o gentio sira nia otas sei hotu ona.”

“Sinal sira sei mosu iha loron, iha fulan no fitun sira. Iha raiklaran, nação sira sei laran susar no ta’uk teb-tebes tanba tarutu housi laloran no tasi nian. Ema sira sei mate tanba de’it ta’uk, hodi hanoin sáida mak sei mosu iha raiklaran, basá lalehan nia biit sei nakdoko. Iha oras ne’e, ema sei haré Oan Mane mai iha kalohan ho biit no glória ua’in tebes. Wainhira buat hirak ne’e sei mosu, aten barani ba hodi foti aas imi nia ulun, basá imi nia maksoin besik ona.”

Lia Maksoyn.

Quarta-Feira, XXXIV Semana Tempo Comum (ANO A)

Primeira Leitura                        Ap. 15. 1-4

Lia housi Livro Apocalipse:

Ha’u, João, iha lalehan, ha’u haré sinal bo’ot no kmanek: anjo nain hitu lori susar bo’ot hitu nebé ikus liu, basá sira ne’e hato’o ona Maromak nia laran nakali hotu. Ha’u haré tasi ki’ik hanesan vidro nakonu ho ahi, no besik tasi vidro ne’e mak sira hotu nebé halo funu hasoru monstro hodi manan, no hasoru nia estátua no número nebé hatudu nia naran. Sira hotu kaer harpa housi Maromak; sira hananu knananuk ida Moisés, Maromak nia atan, nian no Bibi oan nian dehan: “Na’i Maromak kbi’it wain, Ita bo’ot nia hahalok sira bo’ot no furak. Liurai nação sira nian, Ita bo’ot nia dalan sira lós teb-tebes. Oh Na’i, se mak la ta’uk no fó glória ba Ita bo’ot Nia naran? Basá, Ita bo’ot mesak mak santo, no nação sira hotu sei mai hodi hana’i Ita bo’ot tan hahalok justiça nian nebé Ita bo’ot hatudu.”

Maromak Futar Lia.

 

Salmo Responsorial                                                                                                                  Sal. 97(98).  1-3ab, 7-9 (R. Ap. 15. 3b)

Refrão : Ita liman fatin, bo’ot no kmanek tebes, Na’i Maromak kbi’it na’in!!! Repete-se

Hananu ba Na’i knananuk foun ida, basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Na’i fó hatene Nia maksoin;

Nia hatudu justiça ba nação sira hotu.

Nia hanoin Nia domin no laran lós,

Ba Israel uman. Refrão  

 

Tasi halian no buat tomak iha tasi;

Mundo tomak no buat hotu be horik iha nia.

Mota sira basa liman ba,

No foho sira hotu hamutuk hananu ho ksolok. Refrão

 

Iha Na’i futar oin,

Be mai atu tesi lia ba mundo

Nia sei ukun ho justiça

No ukun povo hotu hanesan. Refrão

 

Aclamação                                                                                                                                                                                          Ap. 2. 10c

Refrão : Aleluia, Aleluia!! Repete-se

Laran metin ba to’o mate no

Ha’u sei fó ba ó coroa moris nian. Refrão

 

Evangelho                                                                                                                                                                                     Lc.  21. 12-19

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba Nia escolante sira hodi dehan: “Maibé uluk liu buat ne’e hotu, ema sei kaer imi, sei haterus imi, sei lori imi ba sinagoga no hatama imi iha dadur laran. Ema sei saran imi ba Liurai no ema bo’ot sira tan Ha’u nia naran; no imi sei fó sasin. Ne’e duni, hametin imi laran hodi lalika hanoin uluk atu hatan oinsa; basá Ha’u sei fó ba imi lia no matenek, nebé imi nia funu baluk sira hotu sei labele hatan tahan eh ko’alia hasoru. Imi nia aman inan, maun alin, parente no belun sira sei saran imi. Ema sei oho imi balun. Ema hotu sei ódio imi tan Ha’u nia naran. Maibé imi nia fuuk lahan ida mós sei la monu lakon. Ho paciência, imi sei soi imi nia klamar.”

Lia Maksoyn.

Terça-Feira, XXXIV Semana Tempo Comum (ANO A)

Primeira Leitura                  Ap. 14. 14-20

Lia housi Livro Apocalipse:

 Ha’u, João, haré kalohan mutin ida, no iha nia, ema ida tur hela; hanesa Oan Mane ho coroa osan mean nian iha nia ulun no tudik ko’a háre nian iha nia liman, anjo ida tan sai housi santuário, no hakilar ho lian maka’as ba ida nebé tur hela iha kalohan: “kaer ó nia tudik ba hodi ko’a háre:tempo atu ko’a to’o ona, no háre rai klaran nian tasak ona.” Ne’e duni, ida nebé tur iha kalohan leten hahu ko’a háre iha rai, no rai nia fulin ko’a hotu ona.

Anjo seluk tan sai housi templo iha lalehan; nia mós kaer tudik kroat ida. Anjo ida tan sai housi altar; nia mak ukun ahi. Nia hakilar ba ida nebé kaer tudik kroat: “kaer ó nia tudik ba hodi ku’u uvas hotu iha rai klaran; basá uvas tasak ona.” Nune’e, anjo hahu serviço iha rai no ku’u iha to’os uvas hotu rai ne’e nian hodi hatama nia iha fatin bo’ot atu sama uvas.

Maromak futar lia

 

Salmo Responsorial                                                                                                                           Sal. 95 (96). 10, 11-12, 13 (R.13b)

Refrão : Na’i mai tesi lia ba mundo!!! Repete-se

Haklaken ba povo hotu-hotu:

“Na’i mak Liurai.”

Nia harí mundo metin, sei la nakdoko,

Na’i ukun povo hotu ho justiça. Refrão

 

Lalehan haksolok ba, rai hananu ho ksolok ba,

Tasi no buat hotu iha tasi laran,

Rai luan no buat moris tomak iha nia, haksolok,

Haksolok ai sira iha ailaran. Refrão 

 

Iha Na’i be sei hi’it aan mai Nia futar oin,

Nia mai tesi lia ba rai,

Nia sei tesi lia ba mundo ho justiça,

No ba povo hotu ho felicidade. Refrão

 

Aclamação                                                                                                                                                                                          Ap. 2. 10c

Refrão : Aleluia, Aleluia!! Repete-se

Laran metin ba to’o mate no

Ha’u sei fó ba ó coroa moris nian. Refrão

 

Evangelho                                                                                                                                                                                         Lc. 21. 5-11

Na’i Jesus Cristo nia Evangelho nu’udar São Lucas haktuir:

Iha tempo nebá, tan ema balun ko’alia konaba templo hodi hateten katak ema hafutar nia ho fatuk mesa furak no buat karan sira, Jesus dehan: “Loron sei to’o wainhira buat nebé imi haré daudaun ne’e sei sobu hotu; fatuk ida sei la hela iha fatuk seluk nia leten.” Sira husu ba Nia: “Mestre, wainhira mak buat hirak ne’e mosu? Sira sei hahu ho sinal ida nebé?”

Jesus hatan: “Haré ba, atu ema keta lohi imi; basá ema barak sei mosu mai hodi Ha’u nia naran dehan “Mak Ha’u!” no “tempo besik ona!” keta tuir sira. Wainhira imi rona ema ko’alia konaba funu no revolução sira, keta ta’uk, basá buat hirak ne’e hotu sei mosu uluk, maibé rohan seidauk to’o  mai kedas.” Hafoin Nia dehan ba sira: “povo ida sei hamriik halo funu hasoru povo seluk, reino ida sei hasoru reino seluk. Rai sei nakdoko maka’as; iha fatin oi-oin ema sei hamlaha, moras peste sei mosu; buat nebé halo ema ta’uk sei mosu mai, ho sinal bo’ot iha lalehan.

Lia Maksoyn

Segunda-Feira, XXXIV Semana Tempo Comum (ANO A)

Primeira Leitura              Ap. 14. 1-3, 4b-5

Lia housi Livro Apocalipse:

Ha’u João, ha’u haré bibi oan hamriik iha foho Sião nia leten hamutuk ho ema rihun atus ida ha’at nulu resin ha’at; hakerek tiha iha sira hotu nia ren tos Bibi oan no nia Aman nia naran. Ha’u rona tarutu nebé mai housi lalehan hanesan tasi bo’ot nia tarutu ka rai tarutu ida; hanesan knananuk housi ema sira nebé toka harpa. Iha trono nia oin, sira hananu knananuk foun ida iha balada ha’at no katuas sira nia oin, knananuk ida nebé ema rihun atu ida ha’at nulu resin ha’at nebé hetan ona maksoin housi rai klaran de’it mak bele hatene. Sira la’o tuir Bibi Oan ba fatin hotu nebé Nia ba. Sira ne’e hetan maksoin iha ema sira le’et atu sai aifuan uluk ba Maromak no ba Bibi Oan. Sira la husik lia bosok ruma liu housi sira nia ibun basá la bele hetan sala iha sira.

Maromak Futar Lia

 

Salmo Responsorial                                                                                                                                       Sal. 23(24). 1-2, 3-4ab, 5-6

Refrão : Ema otas ne’e mak buka Na’i!!! Repete-se

Rai no buat hotu iha rai, Na’i Nian;

Mundo no buat tomak horik iha Nia.

Maromak hatur rai iha tasi leten,

Hametin rai iha laloran leten. Refrão

 

Sé mak bele sa’e ba Maromak Nia foho

Eh horis iha Nia kadunan santo?

Ema nebé laran mós, liman la sala,

Ema nebé la jura falso, la bosok. Refrão

 

Ema ne’e sei simu Na’i Nia bensa,

Nia sei hetan kolen housi Maromak, nia maksoin.

Ema otas ne’e mak buka Na’i,

Be buka Jacob nia Maromak Nia futar oin. Refrão

 

Aclamação                                                                                                                                                                                Mt. 24. 42ª, 44

Refrão : Aleluia, Aleluia!!! Repete-se

Imi matan moris ne’on na’in ba, basá iha oras nebé

imi ladun hanoin hetan mak Mane maksoin sei mai. Refrão

 

Evangelho                                                                                                                                                                                           Lc. 21. 1-4

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus foti tiha matan, Nia haré ema riku sira tau esmola iha osan fatin templo nian. Nia haré mós feto faluk ki’ak ida nebé tau nia esmola osan ki’ik rua. Nia dehan: “Tebes, Ha’u dehan ba imi katak feto faluk kiak ne’e tau osan folin liu sira seluk hotu, basá housi buat nebé resin, sira fó buat karan, maibé ema kiak ne’e saran buat hotu nebé nia iha atu moris.”

Lia Maksoyn.

XXXIV DOMINGO TEMPO COMUM (ANO A)

NOSSO SENHOR JESUS CRISTO REI DO UNIVERSO

SOLENIDADE

 

Primeira Leitura                          Ez. 34. 11-12. 15-17

Lia housi Livro Profeta Ezequial:

Na’i Maromak hateten nune’e: “Ha’u rasik sei tau matan ba Ha’u nia bibi sira. Ha’u mak sei hare sira. Hanesan bibi-atan tau matan ba nia bibi sira, wainhira nia hela iha bibi sira nebé lakon nia klaran, nune’e mos, Ha’u sei tau matan ba Ha’u nia bibi sira, hodi hasai sira housi fatin nebé sira la’o lakon iha loron nakukun, iha loron ai-abu taka rai metin. Ha’u mak sei tau matan ba Ha’u nia bibi sira, Ha’u mak sei lori ba hammá – Maromak futar lian. Ha’u sei buka bibi sira nebé lakon, sei halibur sira nebé la’o sala dalan.  Ha’u sei tau aimoruk ba sira nebé kanek, sei fo kbiit ba sira nebé moras ho justiça.” Kona fali ba imi, Ha’u nia bibi, Na’i Maromak hateten nune’e: “Ha’u sei halo justiça ba bibi sira, bibi malae no bibi timur.”

Maromak Futar Lia.

 

Salmo Responsorial                                                                                            Sal. 22(23), 1-2ª. 2-3. 5-6

Refrão : Maromak, ha’u nia Na’in, ha’u sei la hetan susar!!! Repete-se

Na’i, ha’u nia Maksoin,

ha’u sei la susar.

Halo ha’u hammá iha fatin kmook. Refrão

 

Lori ha’u ba ué-matan di’ak,

haraik kbiit mai ha’u.

Hala’o ha’u iha dalan los,

atu hahi Nia naran. Refrão

 

Iha ema aat sira oin,

tau hela mesa nakonu.

Tau mina santo iha ha’u ulun;

tau kusin nakonu to’o resin. Refrão

 

Segunda Leitura                                                                                                                                                          1 Cor. 15, 20-26ª. 28

Lia housi São Paulo nia surat ba sarani sira iha Corinto:

Maun-alin sira: Cristo moris hias housi mate, mosu fali housi mate-bian sira leet, nu’udar ai-fuan foun hasai housi toos. Tan mate mai housi ema ida, nune’e, hodi ema ida moris hias mosu mai housi mate-bian sira. Hanesan housi Adoão, ema hotu mate, nune’e mos housi Cristo, ema hotu sei hetan moris hias. Maibé, ida-idak iha nia fatin: Uluk knana’in Cristo, nu’udar ai-fuan foun hasai housi toos, tuir mai, sira nebé kona ba Cristo, wainhira Nia mai. Hafoin, buat hotu sai nahas, wainhira Cristo tau nia kbiit Liurai iha Aman Maromak nia liman; Wainhira hamonu tiha na’i-ulun, sira, ema boot no funu balu sira nia na’i-ulun. Cristo mak sei ukun, to’o hanehan funu balu sira hotu iha Nia ain okos. Funu balu nebé sei halakon ikus liu, ne’e mak mate. Wainhira buat hotu iha ona Cristo nia ukun, Nia rasik nu’udar Oan Mane, sei hela iha Aman nia ukun; Aman nebé halo Nia, ukun sasan tomak. Nune’e, Maromak mosu tomak iha ema hotu-hotu.

Maromak Futar Lia.

 

Aclamação                                                                                                                                                                                          Mc. 11, 10

Refrão : Aleluia, Aleluia!! Repete-se

Di’ak tebes ida be mai hodi

Na’i nia naran. Refrão

Ou

Refrão : Aleluia, Aleluia!! Repete-se

Reino di’ak nebé atu mai,

Ita Aman David nia Reino. Refrão

 

Evangelho                                                                                                                                                                                    Mt. 25, 31-46

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba nia Escolante sira: “Wainhira Oan Mane mai ho nia kbiit, hamutuk ho Anjo sira hotu, iha loron ne’e, Nia sei hein-An iha Nia fatin ho gloria. Reino hotu sei halibur iha Nia oin, Nia sei haketak ema sira, hanesan bibi-atan haketak bibi-malae housi bibi-timur. Nia sei tau bibi-malae iha sorin kwanan, tau bibi-timur sira iha karuk. Liurai sei dehan ba sira nebé iha sorin kwanan:  ‘Mai, Ha’u nia Aman nia doben sira, mai simu, nu’udar liman rohan, Reino nebé hadi’a kedas ba imi, molok mundo foin halo. Tan Ha’u hamlaha, imi fo han Ha’u, Ha’u hamrook, imi fo ué mai Ha’u, Ha’u mai housi dook, imi simu Ha’u, Ha’u la iha hena, imi fo hatais Ha’u, Ha’u moras, imi ba hare Ha’u, Ha’u iha cadeia, imi ba hare Ha’u.’ Ho ida ne’e, ema di’ak sira sei hatan ba Nia: ‘Na’i, wainhira ami hare Ita hamlaha, ami fo han, eh hamrook, ami fo wé? Wainhira ami hare Ita mai housi dook, ami simu, eh Ita la ho hena, ami fo hatais? Wainhira ami hare Ita moras eh iha cadeia, ami ba hare Ita?’ Liurai sei simu netik: ‘Ha’u dehan tebes ba imi: wainhira imi halo ba Ha’u nia alin ruma, maski nia kiik liu, imi halo mai Ha’u.’ Nia sei dehan mos ba sira nebé iha sorin karuk:  ‘Dook tiha housi Ha’u, ema aat sira, ba hela iha ahi nebé la nahas; ahi nebé hadi’a hela ba demónio no nia anjo sira. Tan Ha’u hamlaha, imi la fo han, Ha’u hamrook, imi la fo wé, Ha’u mai housi dook, imi la simu Ha’u. Ha’u la iha hena, imi la fo hatais Ha’u, Ha’u moras, Ha’u iha cadeia, imi la ba hare Ha’u. Ho ne’e, sira mos sei hatan: ‘Na’i, wainhira ami hare Ita hamlaha eh hamrook, mai housi dook eh la iha hena, moras eh iha cadeia, maibé, ami la tau matan ba Ita?’ Nia sei hatan ba sira: ‘Ha’u dehan tebes ba imi: wainhira imi la halo ba Ha’u nia alin ruma, maski nia kiik liu, imi mos la halo mai Ha’u.’ Sira ne’e sei ba terus to’o la nahas; sira nebé di’ak sei ba moris nafatin”.

Lia Maksoyn.

Sabado, XXXIII Semana Tempo Comum (ANO A)

Primeira Leitura                    Ap. 11. 4-12

Lia housi Livro Apocalipse:

Lia tun mai ha’u, João, nune’e: “Ha’u sei haruka Ha’u nia sasin na’in rua atu halo profecia ba loron rihun ida atus rua ne’en nulu; sira sei hatais karon nian. Sira ne’e mak ai oliveira rua no ahi oan rua nebé hela iha rai klaran nia Na’i Nia oin. Wainhira ema buka atu halo áat sira, ahi bele sai housi sira nia ibun hodi han funu baluk sira. Ema  ruma buka halo áat sira karik, nia sei mate duni hanesan ne’e. Sira bele taka lalehan atu nune’e udan la tau wainhira sira halo profecia. Sira bele halo ué nakfila ba ran hodi halo áat rai klaran ne’e ho susar naran de’it wainhira sira hakarak. Wainhira sira fó sasin tiha ona,  balada nebé mai housi rai kle’an bo’ot sei halo funu hasoru sira no sei manan sira no oho sira. Sira nia isin mate sei toba iha dalan bo’ot cidade bo’ot nian nebé ema hanaran simbolicamente Sodoma no Egipto, iha nebé ema hedi tiha nia Na’i iha cruz. Loron tolu ho balun, ema sira housi povo oi-oin, raça, lia no nação hotu sei hateke ba sira nia isin mate, hodi la husik ema hakoi, no ema sira housi rai klaran sei haksolok tan sira hodi haliban buat ne’e; sira sei fó buat ksolok ba malu, basá profeta rua ne’e fó susar ba povo rai klaran nian.”

Liu tiha loron tolu ho balun, Maromak huu iis moris nian ba sira. Sira hamriik no sira hotu nebé haré buat nebé mosu ta’uk teb-tebes. Tuir mai, sira rona lia maka’as housi lalehan nebé dehan ba sira, “Sa’e mai iha ne’e!” sira nia funu baluk sira sei hateke hela, sira sa’e ba lalehan iha kalohan ida nia laran.

Maromak Futar Lia.

 

Salmo Resposorial                                                                                            Sal. 118(119). 14 e 24, 27 e 103, 111 e 131 (R. 103ª)

Refrão : Rahun di’ak ba Na’i, fatuk inan ha’u heli-an fatin nian!!! Repete-se

Rahun diak ba Na’i,

Fatuk inan ha’u heli-an fatin nian,

Nia mak hanorin ha’u liman ba hafunu,

No ha’u liman fuan ba funu. Refrão

 

Maromak mak ha’u tulun no ha’u kota,

Ha’u kbi’it no ha’u maksoin;

Nia mak ha’u kalili no heli-an fatin,

No halibur povo iha ha’u kbi’it okos. Refrão

 

Ha’u sei hananu ba Ita, Maromak, knananuk foun ida,

Sei hadahur ba Ita ho lian harpa,

Ita mak halo liurai manan

No David, ita atan. Refrão

 

Aclamação                                                                                                                                                                                  cf. 2Tim. 1. 10

Refrão : Aleluia, Aleluia !! Repete-se

Jesus Cristo, ita nia maksoin halakon mate;

Nia halo moris nabilan housi Evangelho. Refrão

 

Evangelho                                                                                                                                                                                    Lc. 20. 27-40

Na’i Jesus Cristo Nia Evangelho nu’udar São Lucas haktuir:

Iha tempo nebá, ema saduceu balun, nebé la fiar moris hi’as, hakbesik ba Jesus hodi husu ba Nia: “Mestre, Moisés hakerek mai ami: wainhira mane ida nia maun mate karik hodi husik nia féen maibé oan la iha, nia sei hola nia maun nia feto faluk ne’e atu fó oan sira ba nia maun. Iha kedas maun alin na’in hitu. Ida uluk hola feto ida, hodi mate, oan la iha. Alin nebé tuir nia hola fali feto faluk ne’e; tuir mai ida seluk, nune’e mós sira na’in hitu hola nia no mate hotu la husik oan ida. Ikus liu, feto faluk mós mate. Ne’e duni, iha loron moris hi’as ni’an, feto ne’e se  nia féen lós? Basá sira na’in hitu hola tiha nia.”

Jesus hatan ba sira: “Mundo ne’e nia oan sira hola malu nu’udar la’en féen, maibé sira nebé soi ba mundo seluk no ba moris hi’as housi mate sira le’et, sira ne’e la kaben, tan sira labele mate tan, basá sira hanesan anjo sira. Sira Maromak Nia oan, basá sira moris hi’as nia oan sira.kona ba moris hi’as matebian sira nian, Moisés rasik mak hatudu hodi hakerek konaba aitarak hun nebé lakan maibé ahi la han, wainhira nia bolu Na’i “Abraão nia Maromak, Isaac nia Maromak no Jacob nia Maromak.” Nia la’os matebian sira nia Maromak, maibé ema moris sira nian; basá ba Na’i, ema hotu moris hela.” Tuir mai, escriba balun simu hodi dehan: “Mestre, Ita ko’alia lós.” No sira la brani ona atu husu tan buat ida.

Lia Maksoyn.

Sexta – Feira, XXXIII Semana Tempo Comum (ANO A)

Primeira Leitura                     Ap. 10. 8-11

Lia housi Livro Apocalipse:

Tuir mai, lia housi Lalehan nebé ha’u, João, rona ko’alia dala ida tan, mai ha’u dehan: “Bá, káer livro nebé nakloke iha anjo nebé hamriik iha tasi no rai nia liman”. Ne’e duni, ha’u hakbesik anjo hodi dehan ba nia atu fó livro kiik mai ha’u, no nia dehan mai ha’u, “Káer no han bá; nia sei moruk iha ó nia kabun, maibé midar hanesan baniben iha ó nia ibun”. Ha’u káer livro kiik housi anjo nia liman hodi han nia; midar hanesan baniben iha ha’u nia ibun; maibé wainhira ha’u han tiha nia, ha’u nia kabun moruk liu. No nia dehan mai ha’u, “Ó tenki halo profecia dala ida tan kona ba povo, nação, lia no liurai wa’in”.

Maromak Futar Lia.

 

Salmo Resposorial                                                                                            Sal. 118(119). 14 e 24, 27 e 103, 111 e 131 (R. 103ª)

Refrão : Na’i, Ita liafuan, midar liu wani-wen!!! Repete-se

Ha’u haksolok liu atu halo tuir Ita ordem,

Liu fali riku soin tomak.

Ha’u tau ha’u ksolok tomak iha Ita lei,

No Ita ukunfuan mak ha’u nia lia meno. Refrão

 

Lei housi Ita futar ibun folin boot ma’i ha’u,

Liu fali osan mean no osan mutin rihun ba rihun.

Ita liafuan midar tebes ba ha’u nanal,

Liu fali wani-wen iha ha’u ibun. Refrão

 

Ita lei mak ha’u nia liman rohan ba nafatin,

Sira mak ha’u fuan nia ksolok.

Ha’u ibun loke hela no ha’u dada iis,

Hodi neon titu tebes Ita ukunfuan. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se

Ha’u Nia bibi sira rona Ha’u lian, Na’i lia tun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                     Lc. 19. 45-48

Na’i Jesus Cristo nia Evangelho nu’udar São Lucas haktuir:

Iha tempo nebá, to’o tiha iha Jerusalém, Jesus tama tiha iha templo, Nia hahu duni sai sira nebé faan, hodi dehan ba sira: “Hakerek tiha ona: ‘Ha’u nia uma sei sai uma oração nian, maibé imi halo tiha nia na’okten sira nia luhan!”

Loron-loron Nia hanorin iha templo. Maibé na’ilulik sira nia ulun sira, escriba sira no mós na’i ulun sira povo nian buka atu oho Nia. Maibé sira la hatene atu halo oin sá, basá povo tomak hakarak teb-tebes rona Nia.

Lia Maksoyn.

Quinta – Feira, XXXIII Semana Tempo Comum (ANO A)

Primeira Leitura                        Ap. 5. 1-10

Lia housi Livro Apocalipse:

Ha’u, João, haré iha Ida nebé tur iha trono nia liman kuana, livro ida nebé hakerek iha laran no iha liur. Livro ne’e taka hela ho cadeado hitu. Tuir mai, ha’u haré anjo ida kbiit wa’in liu nebé hakilar ho lian maka’as, “Ema ruma soi atu loke livro hodi halo loke nia cadeado sira?” Maibé la iha ema ida iha lalehan ka iha rai ka iha okos nebé bele loke livro ne’e ka lê nia. Ha’u tanis maka’as basá la iha ema nebé soi atu loke livro ne’e ka lê nia, maibé katuas ida dehan mai ha’u, “Keta tanis: Leão housi suku Judá nian, bei oan David nian, manan tiha ona, no Nia sei loke livro ne’e no nia cadeado hitu”.

Tuir mai, ha’u haré iha kadunan ho balada háat no katuas rua nulu resin háat sira leet, Bibi Oan ida nebé hanesan oho tiha nu’udar buat karan; Bibi Oan ne’e iha dikur hitu no matan hitu, katak Maromak nia Espírito hitu nebé haruka tiha ona ba raiklaran tomak. Bibi Oan ne’e hakat ba oin atu simu livro housi Ida nebé tur iha trono nia liman kuana. Wainhira Nia simu tiha livro ne’e, balada háat no katuas rua nulu resin háat tuku tur ba rai iha Nia oin; sira ida-idak káer harpa no bikan osan mean nian nakonu ho kiarben maran nebé mai housi ema santo sira nia oração. Sira hananu knananuk foun ida: “Itaboot soi atu simu livro hodi loke nia cadeado, basá ema saran Ita nu’udar buat karan, no ho Itaboot nia ran Itaboot sosa ema sira bá Maromak; housi raça, lia, povo no nação sira hotu, hodi halo sira sai reino no na’ilulik ba ita nia Maromak no atu ukun raiklaran tomak”.

Maromak Futar Lia.

 

Salmo Resposorial                                                                                                       Sal. 149(150) 1-2, 3-4, 5-6ª, 9b (R. Ap. 5. 10)

Refrão : Ita harii housi ami, ba Maromak reino ida na’ilulik nian!!! Repete-se

Hananu ba Na’i knananuk foun ida,

Hananu ba Na’i iha taka mutu santo sira nian,

Israel haksolok ba iha Ida be hakiak nia,

Sião nia oan sira haksolok ba iha nia Liurai. Refrão

 

Hahí Nia naran ho dansa,

Hananu ho lian tímpano no cítara,

Basá, Na’i hadomi Nia povo,

Sei haraik coroa manan nian ba ema haraik-an. Refrão

 

Haliban Na’i ho ksolok, Nia emar sira,

Hananu ho ksolok iha sira nia uma;

Hahí Maromak mak iha sira ibun;

Ne’e mak Nia emar sira nia glória. Refrão

 

Aclamação                                                                                                                                                                        cf. Sal. 94(95). 8ab

Refrão : Aleluia, Aleluia!! Repete-se

Ohin imi rona karik Na’i nia lian,

keta taka imi nia fuan. Refrão

 

Evangelho                                                                                                                                                                                     Lc. 19. 41-44

Na’i Jesus Cristo Nia Evangelho nu’udar São Lucas haktuir:

Iha tempo nebá, wainhira Jesus to’o besik ba Jerusalém, haré cidade, Jesus tanis no dehan: “Ó hatene karik ohin ne’e Ida nebé lori dame! Maibé buat ne’e sumin hela ba ó nia matan. Loron sei mai wainhira ó nia funu baluk sira sei hada kota hale’u ó housi fatin hotu; sira sei hanehan ó ba rai, no mós ó nia oan sira iha ó nia muro laran; sira sei la husik fatuk ida hamriik iha fatuk seluk nia leten, basá ó la hatene tempo nebé Na’i sei mai haré ó”.

Lia Maksoyn.

Quarta-Feira, XXXIII Tempo Comum (ANO A)

Primeira Leitura                      Ap. 4. 1-11

Lia Housi Livro Apocalipse:

Ha’u, João, haré odamatan nakloke ida iha lalehan. Ha’u rona lia uluk nian nebé ko’alia mai ha’u hanesan trombeta ida, dehan: “Sa’e mai leten ne’e, ha’u sei hatudu ba ó buat nebé sei mosu aban-bain-rua”. Ho ida ne’e Espírito káer ha’u no ha’u haré trono ida hamriik iha lalehan, no Ida nebé tur iha trono, no Ida nebé tur iha nebá hanesan fatuk murak jaspe no cornalina. Baur ida hale’u trono ne’e, no ida ne’e nabilan hanesan esmeralda. Trono rua nulu resin háat hale’u trono ne’e, no ha’u haré katuas na’in rua nulu resin háat tur iha trono sira, hatais unuk mutin ho coroa osan mean nian iha sira nia ulun. Rai lakan no rai tarutu mai housi trono, no iha trono nia oin ahi-oan hitu lakan maka’as, katak Maromak nia Espírito hitu. Iha trono no ha’u nia leet iha tasi nebé hanesan vidru, hanesan cristal. Balada háat ho matan barak iha oin no iha kotuk hamriik iha klaran, hale’u trono rasik. Balada uluk hanesan leão, ida seluk hanesan karau vaka aman, ida seluk tan ho ema nia oin no ida ikus hanesan manu makikit nebé semo daudaun. Balada ida-idak iha liras neen no matan iha isin lolon tomak, laran no liur; kalan loron sira la para hananu: “Santo, Santo, Santo, Na’i Maromak kbiit wa’in; Nia uluk, ohin no ba nafatin”.

Wainhira balada sira hana’i no hahí no fó agradece ba Ida nebé tur iha trono, nebé moris ba nafatin, katuas rua nulu resin háat takrabat ba rai iha Na’i futar oin atu adora Ida nebé moris ba nafatin, hodi soe sira nia coroa iha trono nia oin, dehan: “Itaboot mak ami nia Na’i no ami nia Maromak. Itaboot soi atu simu glória, hana’i no kbiit, basá Itaboot hakiak buat hotu no tan de’it Itaboot Nia hakarak mak buat hotu mosu no iha”.

Maromak Futar Lia.

 

Salmo Responsorial                                                                                                                     Sal. 150. 1-2, 3-4, 5-6, (R. Ap. 4. 8b)

Refrão : Santo, Santo, Santo Na’i Maromak, kbiit Na’in!!! Repete-se

Hahí ba Na’i iha Nia kadunan Santo,

Hahí ba Na’i iha Lalehan sira.

Hahí ba Na’i tan Nia hahalok kmanek sira,

Hahí ba Na’i tan Nia kmanek tebes. Refrão

 

Hahí ba Na’i ho lian trombeta nian,

Hahí ba Na’i ho lian lira no cítara nian.

Hahí ba Nia hó tímpano no dansa,

Hahí ba Nia ho lian harpa no flauta. Refrão

 

Hahí Na’i bá,

Hahí Nia ho lian címbalo nian.

Hahí Nia ho lia tuituir malu címbalo nian.

Buat hotu be dada iis hahí Na’i. Refrão

 

Aclamação                                                                                                                                                                                     cf. Jo. 15. 16

Refrão : Aleluia, Aleluia!! Repete-se

La’os imi mak hili Ha’u, Ha’u mak hili imi hodi haruka

Imi ba atu bele fó fuan no imi nia fuan bele hela ba nafatin, Na’i dehan. Refrão

 

Evangelho                                                                                                                                                                                      Lc. 19. 11-28

Na’i Jesus Cristo Nia Evangelho nu’udar São Lucas haktuir:

Iha tempo nebá, Jesus haktuir tan aiknanoik ida, tanba Nia besik ona Jerusalém, no mós tanba sira hanoin katak Maromak nia reino sei mosu lalais. Ne’e duni, Nia dehan: “Ema boot ida ba tiha rai dook atu simu reino, hafoin fila fali. Bolu tiha nia atan na’in sanulu, nia fahe ba sira osan mean sanulu, hodi dehan ba sira: ‘Fila liman ba to’o ha’u sei fila fali mai’. Maibé ema sira iha reino nebá odi nia. Sira haruka manuain sira tuir nia hodi dehan: ‘Ami lakohi ema ne’e atu ukun ami’.

Simu tiha reino, wainhira nia fila hikas, nia haruka ema bolu atan sira nebé nia fó osan, atu hatene sira manan hira. Ida uluk mai dehan: ‘Na’i, ita nia osan manan sanulu tan’. Nia hatan: ‘Di’ak tebes, atan di’ak, tanba ó ema lós kona bá sasan uitoan, ó sei ukun cidade sanulu’. Atan seluk mai dehan: ‘Na’i, ita nia osan manan lima tan’. Nia hatan mós ba ema ida ne’e: ‘Ó mós sei ukun cidade lima’. Ida seluk mós mosu mai dehan: ‘Na’i, ita nia osan mak ne’e. Ha’u rai didi’ak iha hena ida, basá ha’u ta’uk ita nebé ema si’akten, nebé foti buat nebé la rai hela no ku’u buat nebé la kuda’. Ba ema ne’e nia simu fali: ‘Housi ó nia ibun rasik, ha’u tesi lia hasouru ó, atan áat. Ó hatene katak ha’u ema laran tós, nebé foti buat nebé la tau, ku’u buat nebé la kuda. Ne’e duni, tansá ó la hatama ha’u nia osan iha banco atu, fila tiha, ha’u bele manan nia osan funan?’ Hafoin nia dehan ba sira nebé hariik iha nebá: ‘Hasai tiha osan housi nia, hodi fó fali bá ida nebé iha sanulu’. Sira dehan: ‘Na’i, nia iha ona osan sanulu’. ‘Ha’u dehan ba imi: ba ida nebé iha ona, sei fó tan; maibé housi ida nebé la iha, sei hasai tan buat nebé nia iha. Kona ba ha’u nia funu baluk sira nebé lakohi ha’u atu ukun sira, lori sira mai iha ne’e, oho tiha sira iha ha’u nia oin!’” Dehan tiha ne’e, Jesus la’o hodi sa’e ba Jerusalém.

Lia Maksoyn.

Terça-Feira, XXXIII Tempo Comum (ANO A)

Primeira Leitura              Ap. 3. 1-6; 14-22

Lia Housi Livro Apocalipse:

Ha’u,  João, rona Na’i dehan mai ha’u: “Hakerek ba anjo kreda iha Sardes nian hodi dehan, ‘Ne’e mak lia menon housi Ida be káeer Maromak nia espírito na’in hitu no fitun hitu: Ha’u hatene ó nia hahalok sira: ema hanoin katak ó moris maibé lolós ó mate ona. Hader tiha ba; no hamoris fali buat uitoan nebé sei hela, nebé atu mate ona. Ha’u la haré lós ó nia hahalok sira iha Maromak  futar  oin. Hanoina ba buat nebé ó simu tiha no rona. Káer metin nia ba, hodi hakribi ó nia sala. Ó  la hader karik, Ha’u sei mai hanesan na’okten ida, hodi la fó hatene iha sá oras ó sei hein Ha’u. Maibé sei iha ema lubun iha Sardes nebé la husik sira nia hatais sai fo’er, no sira ne’e sei la’o hamutuk ho Ha’u ho hatais mutin. Basá sira soi nia. Ema nebé manan sei hatais nune’e ho unuk mutin; no Ha’u sei la kasu nia naran housi livro moris nian; maibé Ha’u sei sasin ba sira nia naran iha Ha’u Aman no nia anjo sira nia oin. Se mak iha tilun, rona ba buat nebé Espírito dehan ba kreda sira.’’’

“Hakerek ba anjo kreda Laodiceia nian: ‘Ne’e mak lia menon Aman nian, Ida be fó sasin ho laran metin, Maromak nia escritura sira nia Hun lolós. Ha’u hatene ó nia hahalok sira: ó la manas no la malirin. Ha’u hakarak katak ó manas ka malirin, maibé tanba ó la manas ka la malirin  maibé morna de’it, Ha’u sei muta o housi Ha’u nia ibun. Ó dehan, ‘Ha’u riku, ha’u haloot tiha sasan barak no la kuran buat ida,’ hodi la hatene katak ó kiak, mukit liu, matan delek no isin tanan. Ha’u dehan maka’as ba ó, sosa housi Ha’u osa mean nebé koko tiha ona iha ahi laran atu ó sai riku lolós, no sosa mós unuk mutin hodi hatais no taka ó nia isin tanan atu ó la bele moe; sosa mós aimoruk ba ó nia matan atu ó bele haré. Ida nebé Ha’u hadomi, Ha’u si’ak no hadi’ak.

Ne’e duni, hakribi teb-tebes ó nia sala ba no laran badinas ba. Haré ba, Ha’u hamriik iha ó nia odamatan oin hodi tuku. Imi ida rona karik Ha’u nia lia no loke odamatan, Ha’u sei tama hodi han hamutuk ho nia, no nia ho Ha’u. Ida nebé manan, Ha’u halo nia tur hamutuk ho Ha’u iha Ha’u nia kadunan, nu’udar Ha’u mós manan no tur iha Ha’u Aman nia kadunan. Se mak iha tilun, rona ba buat nebé Espírito dehan ba kreda sira.”’

Maromak Futar Lia.

 

Salmo Responsorial                                                                                                         Sal. 14(15). 2-3ab, 3cd-4ab, 5 (R. Ap. 3. 21)

Refrão : Ida nebé manan sei tur ho Ha’u iha Ha’u nia trono!!! Repete-se

Ema nebé moris hodi la halo salan,

Moris tuir justiça no ko’alia lialós ho laran tomak;

Ema nebé la foti lia bosok hodi du’u matak. Refrão

 

Ema nebé la halo áat ba ema seluk,

La hakribi nia maluk,

Ema nebé heuuai ema áat,

Hahí ema nebé hamta’uk Maromak. Refrão

 

Ema nebé halo tuir nia juramento

Maski nia hetan susar,

La empresta nia osan hodi husu funan,

La simu presente atu hatatan ema sala laek;

Ema hanesan ne’e sei la monu. Refrão

 

Aclamação                                                                                                                                                                                        1Jo.  4. 10b

Refrão : Aleluia, Aleluia!! Repete-se

Maromak hadomi ita uluk hodi haruka Nia Oan rasik mai nu’udar

Maksoyn atu kasu ita salan. Refrão

 

Evangelho                                                                                                                                                                                        Lc. 19. 1-10

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus tama tiha iha Jericó, Nia la’o tesik cidade laran. Iha ema ida naran Zaqueu. Nia publicano  sira nia ulun, no nia ema riku ida. Nia buka namanas atu haré Jesus, maibé la bele tanba ema barak, basá nia ain badak. Nia halai ba oin hodi sa’e ba ai ida atu haré Jesus, nebé sei liu housi nebá. To’o tiha fatin nebá, Jesus foti matan hodi dehan: “Zaqueu, tun mai lalais, basá ohin Ha’u sei hela iha ó nia uma.” Nia tun kedas hodi simu Jesus ho ksolok boot.

Haré tiha ne’e, sira hotu hamu’u dehan: “Na’i tama iha maksalak ida nia uma!” Maibé Zaqueu hamriik hodi dehan ba Na’i: “Na’i, ha’u sei fahe ha’u nia rikusoi balun ba kiak sira; ha’u na’uk tiha karik ema runa nia sasan, ha’u sei selu fali liu dala háat.” Jesus dehan ba nia: “Ohin maksoin tama iha uma ne’e, tan ema ne’e mós Abraão nia oan; basá Oan Mane mai buka hodi soi sira nebé la’o lakon dalan.”

Lia Maksoyn