shadow
Diocese de Dili > NOTÍCIAS > Notícias

OBRIGA EMA FILA KOTUK BA MAROMAK, NE’E HAHALOK SATANAS NIAN

DCAD Arcebispo Arquidiocese Metropolita de Dili Dom. Virgílio do Carmo da Silva hato’o nia preucupação hirak ne’e Iha Festa Padroeiro São Francisco Xavier Dare iha loron 3 fulan Desembro 2019.

Arcebispo de Dili Dom Virgílio do Carmo da Silva,SDB haklaken katak; “Nakukun ne’e hahalok Satanas ninian. Força Satanas ninian mak buat hotu ne’ebe buka obriga ema atu fila kotuk ba Na’i Maromak nia hanorin, fila kotuk ba Maromak nia hakarak. Satanas hakiak iha ita mak: hahalok foti an ninian, karakten ninian, kanten ninian, hanoin de’it ba nia an nunca se hanoin ema seluk nia precisa. Satanas nia hahalok mak buka ódio malu, hahalok sira egoistas ninian ne’ebe dala barak ita hotu hakiak iha ita nia an. Tan ne’e iha Evangelho dehan; dalan único atu ita bele hasoru/conquista/manan satanas nia hahalok ho dalan ida de’it katak wainhira ita fila fali ba Maromak”.

Liu tan ne’e, Arcebispo de Dili Dom Virgílio do Carmo da Silva,SDB hateten; “Ita nia moris lor-loron ne’e Satanas haleu nafatin ita. Santo sira dehan katak; ema ida ne’ebe santo liu ne’e loron ida nia monu iha sala dala 7. Ita sira ne’e fali la hatene dala 7 ou 70 dala 7 karik. Tan ne’e mak se ita monu karik ba sala precisa Sacramento Confissão no Eucaristia. Comfessa no Eucaristia precisa bebeik laos hein de’it Natal ho Páscoa mak comfessa. Maibe precisa bebeik atu nune’e ita bele dehan katak ita nia fuan ne’e ba los Na’i Maromak”.

Atu taka, Arcebispo de Dili Dom Virgílio do Carmo da Silva,SDB desafia sarani hatete; “Ha’u hakarak nafatin desafia liu-liu foinsa’e sira, Inan-Aman sira além de Uma Kreda atu bele defende ita nia an iha ema seluk nia oin, ita ida-idak mos tem que hatene atu defende ita nia fiar tanba ohin loron mos iha religões oi-oin, Seitas oi-oin ne’ebe tama sai ita nia bairro to’o iha Aldeia sira hakarak atu atrai ita, desvia ita housi housi ita nia fiar. Tanba ne’e hakasan atu labele monu ba laço sira. Tanba ita nia fiar ne’e laos sosa ho Supermie ida ka motor ida. Jesus rasik la sosa ita fiar la ho Motor ida, maibe Nia sosa ho Nia Ran. Ho Ninia ran ne’ebe fakar iha cruz mak sosa ita iha Batismo no kasu ita nia sala. Ne’e duni precisa fiar metin nafatin. Ita hare missionário sira ne’ebe mate ran fakar iha ita nia rai tanba defende fiar Católica, fiar sarani nian”. (Ceko)

ARCEBISPO DILI INAUGURA CAPELA LIS-MORI

DCAD Arcebispo Arquidiocese de Dili Dom Virgílio do Carmo da Silva, SDB Inaugura Capela Lis-Mori, ne’ebe pertence ba Paróquia São Francisco Xavier Dare iha loron 2 fulan Desembro 2019. Iha tinan 1968 hanesan tinan ba dahuluk Pe. António Alves visita Lis-Mori. Housi visita ida ne’e mak hun ba processo desemvolvimento fiar sarani nian iha Lis-Mori to’o ikus habelar to’o ba iha Mota Be mos nia sorin, to’o iha tohu-Meta, fatisi no Area Samlete ninian. Capela Lis-Mori ne’ebe ohin loron hanaran Capela Nossa Senhora de Lourdes hanesan Capela ida tuan ne’ebe maka hari iha rai Loko mau pertence ba lisan Leorae nian. No Sarani dahuluk ne’ebe sai matadalan ba rai Lis-Mori mak hanesan Uma Lisan lubuk ida: uma lisan Leorae, Lesimau, Aiasa no lisan sira ne’ebe mak existe iha bairro Lis-Mori. No Catequista ida ne’ebe mak uluk desemvolve fiar sarani nian iha Lis-Moris mak Sr. Francisco de Jesus, Mateus Guterres housi lisan Lesimau, Armindo Lopes housi lisan rae-ubu, no Sr. Pedro de Jesus (matebian) housi Lisan Aiasa hahu housi tinan 1970-1974. Tuir fali Sr. Julião Tilman hodi fó apoio ba Sr. Mateus Guterres wainhira Capela muda ona ba iha Timuria area manukoni nian, Sra. Madalena Guterres no Sr. Pedro de Jesus.

Arcebispo de Dili Dom Virgílio do Carmo da Silva,SDB iha nia mensagem ba sarani Lis-Mori hateten: “Ohin iha loron ida ne’e ita sarani Lis-Mori nian halibur hamutuk ho sarani sira housi Dare, Aileu nian hamutuk iha Lis-Mori ita mai ho finalidade ida; hamutuk ho sira iha Primeira Semana ADVENTO nian ne’e atu Inaugura sira nia Capela. Tanba ita hotu hakarak halo fatin diak ida ba Maromak no buka dalan oi-oin liu housi tempo naruk, liu housi contribuição no colaboração ema hotu ninian, ita tau hamutuk buat ne’ebe ita iha mak ohin ita mai hamutuk hodi Inaugura Capela Lis-Mori ida ne’e. Ne’e duni, Ita agradece ba diak ne’ebe ita simu no ita tem que sente orgulho liu tan tanba imi bele uma ida ba Maromak. Ida ne’e hatudu duni katak maturidade fiar sarani iha Lis-Mori ninian.

Arcebispo de Dili Dom Virgílio do Carmo da Silva,SDB desafia sarani Lis-Mori hatete; “Ha’u hakarak nafatin desafia liu-liu foinsa’e sira, Inan-Aman sira além de Uma Kreda atu bele defende ita nia an iha ema seluk nia oin, ita ida-idak mos tem que hatene atu defende ita nia fiar tanba ohin loron mos iha religões oi-oin, Seitas oi-oin ne’ebe tama sai ita nia bairro to’o iha Aldeia sira hakarak atu atrai ita, desvia ita housi housi ita nia fiar. Tanba ne’e hakasan atu labele monu ba laço sira. tanba ita nia fiar ne’e laos sosa ho Supermie ida ka motor ida. Jesus rasik la sosa ita fiar la ho Motor ida , maibe Nia sosa ho Nia Ran. Ho Ninia ran ne’ebe fakar iha cruz mak sosa ita iha Batismo no kasu ita nia sala. Ne’e duni precisa fiar metin nafatin. Ita hare missionário sira ne’ebe mate ran fakar iha ita nia rai tanba defende fiar Católica fiar sarani”. (Ceko)

ARCEBISPO DILI INAUGURA CAPELA TOHU-META

DCAD Arcebispo Arquidiocese de Dili Dom Virgílio do Carmo da Silva, SDB Inaugura Capela Tohu-Meta, ne’ebe pertence ba Paróquia São Francisco Xavier Dare iha loron 1 fulan Desembro 2019. Capela Tohu-Meta iha tinan 18 ba kotuk hetan Inauguração housi Dom. Carlos Filipe Ximenes Belo,SDB. Depois de tinan barak condição Capela nian hahu a’at maka sarani Tohu-Meta tanto iha rai laran nomos sira ne’ebe serviço iha rai liu hola iniciativa atu rehabilita fali capela Tohu-Meta. Ho nune’e Comissão Organizador ba rehabilitação Capela Tohu-Meta husu contribuição housi sarani sira Tohu-Meta ne’ebe hela iha Tohu-Meta rasik, iha Aileu, Englaterra no Corea atu nune’e fó liman ba malu liu housi ajudo Materiais, Morais, hodi finaliza rehabilitação ba Capela refere. Orçamento rehabilitação ba Capela Tohu-Meta atingue $ 9980 USD ne’ebe mai housi sarani sira ne’ebe hela iha Tohu-Meta; Bairro 1, 2, 3, iha Dili, iha Englaterra, iha Corea, iha Aileu no mos hiusi Estação Besilau. Ho presença Arcebispo de Dili Dom Virgílio do Carmo da Silva nian iha Dare,Tohu-Meta hodi Inaugura Capela Tolu-Meta.

Arcebispo de Dili Dom Virgílio do Carmo da Silva,SDB iha nia mensagem ba sarani Tou-Metan hateten; “Ohin ita sarani liu-liu sarani Tohu-Meta contente tanba ho imi nia esforço tomak atu rehabilita Capela ne’e sai foun iha tempo foun nian laran atu hakat ba loron NATAL ninian. Ha’u fó parabens ba imi tanba imi mos sente duni ona katak dala barak ne’e ita nia rate sira ne’e ita halo buras teb-tebes, gasta osan barak, ita nia uma lisan sira ita gasta buat barak, maibe Maromak nia Uma dalaruma ita la preucupa. Tan ne’e ha’u fó parabens ba sarani Tohu-Meta maske sacrifício hotu ne’ebe imi halo, maibe ohin imi bele inaugura imi nia Capela hodi hakarak mos halo duni fatin ida ne’e ita tama ita bele hakmatek hodi bele reza, ita bele hanoin kona ba Maromak. capela ida ne’e halo laos atu ema hare de’it, maibe Capela ida ne’e halo atu sarani bele mai iha ne’e hodi hasoru malu ho Maromak”.

Pároco Paróquia São Francisco Dare Pe. Abril Lopes iha nia discurço mos hateten; “Paróquia hakarak agradece ba Catequista, Chefe Suco no sarani tomak Tohu-Meta ninian tanto sira ne’ebe hela iha Timor no ba sira ne’ebe serviço iha rai liur ba imi hotu nia esforço sira ne’ebe imi halo hodi rehabilita Capela ne’e, hein katak imi nia Capela ne’ebe mak foun laos hafutar de’it, maibe imi mos buka hafoun imi nia fiar. Hein katak ho imi fatin ne’ebe mak furak sei dada imi atu bele mai halo oração. Paróquia nia contribuição mak ne’e; contribuição moral, fó hanoin, fo ideia, controla, encoraza imi lao nafatin. Husik imi halo rasik Capela ne’e atu imi bele sente katak Capela ne’e imi nian no ho buat ne’ebe mak imi sente dehan imi nian sei mos hafanun imi atu quidado nafatin fatin ida ne’e”. (Ceko)

Arcebispo Dili Preucupa Desemvolvimento Ne’ebe La To’o ba Áreas Remotas

DCAD Arcebispo Arquidiocese Metropolita de Dili Dom. Virgílio do Carmo da Silva hato’o nia preucupação hirak ne’e Iha missa Ordenação Sacerdotal ba Díacono Eugénio Redentor Marques Caunan Lafo nian iha Igreja Santo António Numbei iha loron 27 fulan Novemmbro 2019.

Hafoin preside tiha Missa Ordenação Sacerdotal nian ne’e, Arcebispo Dili iha nia discurço hateten: “Ita wainhira hakat liu ba Bauknana, liu ba Citrana, liga fali housi Bauknana ba Nítibe tama to’o ba Pásabe careta mak tem que buka dalan. Dala ruma mos ita tem-que lao tuir fiu eletricidade nian tanba susar atu acesso ba dalan. Maibe atu dehan de’it katak desemvolvimento hahu ona iha rai Oe-Cusse, maibe ita nia maun-alin sira ne’ebe hela iha foho neba mos iha direito atu hetan dalan ne’ebe diak, hetan Bé no buat hotu. Ami apoio nafatin ita boot sira nia mehi ba rai ida ne’e bele sai duni realidade. No buat foun ne’e labele hein mosu iha Pante Makasar de’it maibe tem que hakat liu mos ba foho”.

Ho esperança ne’ebe klean Arcebispo hameno hela mos ba Administração RAEOA foun katak: “Ami fiar katak Governo fó ona fiar ba ita boot sira ohin hamutuk ho sarani sira Oe-Cusse ne’e nian diak ne’ebe povo ida ne’e hein hela iha tempo barak nia laran. Ami hein katak ho tinan hirak ne’ebe mai bele halo diferência boot iha rai Oe-Cusse hahu housi área remotas mai too iha cidade”.

Iha sorin seluk Presidente Autoridade RAEOA foun José Luis Gueterres iha nia mensagem sira hateten: “Admistração foun ne’ebe mai sei continua buat ne’ebe diak ne’ebe Admistração uluk halao no buat ne’ebe la diak karik sei halo buat hotu par hadia. No hare buat balun foun ne’ebe ita bele servi ho laran diak povo ne’ebe ohin loron precisa tebes ita nia tulun, povo sira ne’ebe hela iha foho.

Presidente Autoridade RAEOA hateten tan katak: “Ami mai atu servi povo Oe-Cusse. Ami mai ho comprimisso boot teb-tebes atu hare imi hotu hanesan povo Atoni, hanesan oan, beioan no maun-alin sem discriminação. Buat ne’ebe ami sei halo iha Oe-Cusse ami sei koalia ho ita nia autoridade tradicionais sira ne’ebe hatene cultura iha ita ni rain e mos agradece barak teb-tebes ba Admistração Anterior ne’ebe halo buat barak. Tanba ne’e ami precisa serviço cooperação para que rai Oe-Cusse bele sai buras, maibe ami lakohi povo Oe-Cusse nonton de’it, ami hakarak povo Oe-cusse participa mos processo desemvolvimento ida ne’e. (Cecko)

Ó HADOMI HA’U LIU SIRA NE’E?

DCAD Frase iha leten mak sai hanesan Lema Ordenação Diácono Eugénio Redentor Marques Caunan Lafo iha Igreja Santo António Numbei iha loron 27 fulan Novembro 2019. Iha loron ida ne’e mos (27/11/2019), Arcebispo Arquidiocese Metropolita de Dili Dom Virgílio do Carmo da Silva, SDB celebra nia aniversário natalício nian ba dala 52.

Iha Missa Ordenação Sacerdotal no mos Aniversário Arcebispo Arquidiocese Metropolita de Dili Dom Virgílio do Carmo da Silva,SDB nian ba dala 52 ne’e participa housi Nailulik sira Diocesano no mos religioso, Autoridades Nacional no lacais, civis e Militar, Seminaristas, Madres no mos sarani sira housi Arquidiocese Metropolita de Dili no mos Diocese rua seluk Baucau no Maliana.

Iha Arcebispo Arquidiocese Metropolita de Dili Dom Virgílio do Carmo da Silva, SDB ninia homilia ba celebração ne’e hateten: “Ohin ita lubuk oan ida ne’e halibur hamutuk iha ne’e ita haksolok agradece ba Maromak tanba foinsa’e oan ida pronto hatan ba Maromak. Tanba foinsa’e oan ne’e nia generosidade ne’e mak ohin lori ita mai hamutuk. Milagre boot ohin ninian ne’e sai realidade ida tanba nia disposição ‘SIM’ ba Na’i Maromak”.

Prelado ne’e hatutan tan katak: “Iha consagração Amolulik configura ba Cristo hanesan Ulun no bibi atan Kreda nian. Nia mos hariku ho kbiit Espiritual nian iha ne’ebe nia hola parte iha autoridade Jesus Cristo nian atu guia Kreda ho tulun Espírito Santo ninian. Então força Espírito ida ne’e mak bele transforma ida ne’ebe Na’i Maromak fihir ona ne’e atu sai duni sasin lolos, sasin domin ne’ebe manas, caridade ne’ebe moris, caridade ne’ebe visível, caridade ne’ebe contagiosa Cristo moris hias ninian iha nia moris lor-loron. Espírito ida ne’e duni mak guia Rev. Eugénio iha ninia dalan vocação nian no liu housi tulun ema nian, liu housi acontecimento oi-oin, ikus mai nia descobre katak Maromak hadomi tebes nia.

Remata tiha missa Ordenação Sacerdotal nian, Pe. Eugénio Redentor Marques Caunan Lafo (Padre Foun) iha nia discurço sira hateten: O Hadomi Ha’u liu sira ne’e? Jesus de certo modo Nia hadomi Pedro liu sira hotu. Tanba ne’e Nia comfia Pedro atu sai Ninia Vigário hodi entrega Uma Creda ba Pedro. Pergunta ida ne’e Jesus halo ba Pedro atu hatene se Pedro hadomi Nia? Ha’u hakarak hili Lema ida ne’e tanba hare ba Pedro nia personalidade, ninia fidelidade, ninia domin. Apesar ninia fracasso, monu fila-fila, koalia barak, maibe nia sei brani hatan SIM Na’i hau Hadomi Ita. Halo tuir Pedro ha’u mos hakarak hatan SIM biar ho fraquesa lubuk ida. Ha’u hatene no fiar katak Maromak hili no haraik graça Ordenação ne’e laos tanba ha’u soi ka ha’u meresse. Se ha’u sura ha’u nia an ha’u la soin buat ida, maibe tanba Ninia laran luak, Nia domin mai ha’u, nune’e ha’u reconhece ha’u nia capacidade no ha’u hakarak hatan ba Nia domin ne’e ho domin mos. Ha’u hakarak hatan ho ha’u nia fraquesa tomak, ho ha’u nia kbiit tomak atu hadomi Nia tuir ha’u nia capacidade, tuir Nia hatene. No ha’u hatene katak biar Maromak hatene ha’u fraco mas Nia comfia ha’u, ha’u hakarak hatan SIM; Na’i ita hatene buat hotu, Ita hatene katak ha’u hadomi Ita. Ha’u husu ba ita boot sira hotu atu reza mai ha’u, tulun ha’u atu ha’u hatan nafatin ba Na’i Jesus ninia lia husu iha ha’u nia lema O Hadomi Ha’u liu sira ne’e? ha’u husu atu reza mai ha’u atu hatan ‘SIM’ lor-loron, lori ha’u nia Cruz lor-loron hahu ohin. (Cecko)

IDENTIDADE AMOLULIK NIAN MAI HOUSI PARTICIPAÇÃO IDA ESPECÍFICA IHA CRISTO NIA NAILULIK

DCAD – Iha Sábado loron 16 fulan Novembro 2019, Arcebispo Metropolita de Dili Dom Virgílio do Carmo da Silva, SDB Ordena Diácono Mariano Maia ba Grau Nailulik nian iha Paróquia Nossa Senhora do Carmo Letefoho. Iha Arcebispo de Dili Dom Virgílio do Carmo da Silva homilia foca liu ba identidade Sacerdócio nian. Tan ne’e Dom Virgílio do Carmo da Silva hateten: Identidade Amolulik nian ida mai housi participação ida específica iha Cristo nia Nailulik. Ida ne’ebe simu Ordenação sai ba Kreda no iha Kreda imagem ida real, imagem ida moris, imagem ida transparente Cristo Sacerdócio ninian. Tan ne’e ida ne’ebe sai Amolulik sai imagem Cristo ninian ne’ebe real, visível, moris no transparente. Liu husi nia moris nia bele comunica, bele fahe graça ne’ebe nia simu ba Maromak nia povo.

Ho consagração Amolulik simu poder kbiit força Espiritual participa iha autoridade Cristo ninian no iha nia Espírito atu guia Uma Kreda, guida Maromak nia povo. Nailulik ida ho ordenação nia simu imagem ida real, moris no transparente Cristo nian iha Kreda no iha povo sira nia oin. Ida ne’e mak tane dignidade celebração dader ida ne’e nian liu husi ita nia oração Na’i Maromak mak foti Nia atan ne’e ba grau Presbítero nian. Ida ne’ebe atu simu Ordenação, nia sei halo nia promessa atu hatene halo nia kna’ar didiak, haklaken, hadomi Maromak nia Futar liafuan. Hasanto nia moris ho Sacramentos Eucaristia no reconciliação nian no harohan nafatin. Ida ne’e mak dalan ba santidade amolulik ida nian, ida ne’ebe mak dalan santidade povo Maromak ninian ne’ebe liu husi Amolulik orienta Maromak nia povo liu husi meios sira ne’e.

Sacramento ho Maromak nia liafuan mak we matan ne’ebe haburas nafatin graça sacerdócio nian ne’ebe atu simu. Ita bele husu ba ita nia an dalan saida precisa fo atensão atu nia bele persevera nafatin iha vocação ne’ebe nia simu. Laos fácil atu ita halo no hahu buat hotu focus nafatin iha Maromak. iha loron Ordenação ninian loron sira forte ninian ita fácil buka Maromak, maibe dala barak tendência ita ema ninian ita iha tentação boot atu sura liu ita nia força, conta liu ita nia capacidade, ita nia abilidade pessoal duque Maromak ninian. Tan ne’e ita nia Amo Papa convida ita hotu liu-liu ba ita nia diácono ne’ebe atu simu dau-daun Ordenação katak fundamental tebes aprende loke relação ho Aman Maromak basá Nia mak we matan no hun graça ninian.

Amolulik ida precisa desafia nafatin nia an atu buka husik nia toman sira ne’ebe buka hanoin an de’it no comfia an, maibe hatene buka liu atu comfia iha Na’i Maromak duque ninia força rasik (permanecer diante do Senhor deixando seu olhar percora a minha vida). Hakas atu tam iha ksolok ida Cristo nian. Ida ne’e mak segredo Apóstolo ida nian. Ksolok Amolulik ida nian iha Cristo de’it. Se ita la hetan ksolok iha vida no dalan ne’ebe ita hili ka vida ida ne’ebe ita opta, neneik eh kleur ita sei hetan problema, ita sei hetan susar no infidelidade ne’e bele mosu.

Sira ne’ebe Maromak bolu hanesan ita nia diácono iha tinan 10 resin nia laran, nia rasik buka atu descobre no ikus mai nia dehan katak; laiha dalan seluk nia atu nia bele hetan ksolok duque sai Sacerdócio. Nia fiar katak liu husi dalan ida ne’e de’it nia bele haksolok no sai Santo. Tan ida ne’e ita hare iha nia motto ne’ebe dehan; La Hodi Ha’u, Imi Labele Halo Buat Ida. Jesus mak Uvas hun no Escolante sira mak nia sanak. (Alin & Ceko)

ARCEBISPO DE DILI: ITA NIA LARAN DODOK TANBA INCÊNDIO IHA FATIN-FATIN

DCAD (16/11/2019) Arcebispo de Dili Dom Virgílio do Carmo da Silva, SDB hato’o nia preucupação hirak ne’e wainhira preside missa Ordenação Diácono Mariano Maia nian ba Nailulik iha Paróquia Nossa Senhora do Carmo Letefoho.

Arcebispo de Dili Dom Virgílio do Carmo da Silva, SDB hateten: “Acto sunu rai arbiru fo ameaça ba biodiversidade rasik. No Acto ida ne’e mos bele hamosu problema seluk ne’ebe afeita comunidade hanesan laiha bé tanba aihoris sira ne’ebe atu conserva bé ne’e hetan estragos hotu, hamosu erosão no cria polusão ne’ebe lori moras ba iha comunidade”.

Prelado ne’e reforça tan katak: “Iha fulan Julho ita mai iha Lete-Foho ne’e ita hare aifunan buras duni. Maibe depois fulan Setembro no Outubro ne’e ita hare katak Ermera terus boot tanba rai maran, aifunan ita lahare no aat liu tan mak sarani sira mos sunu, soe sigaru arbiru, fuma iha nebé soe hela iha ne’e. Tan ne’e mak ha’u hanoin katak Ermera tinan ida ne’e ita haksolok buat barak, maibe ita nia laran mos dodok, susar tanba iha incêndio nebé estraga plantação da feito iha area lubuk ida hodi estraga ema nia uma, to’os, foho Ramelau nebá mos sunu estraga buat barak iha nebá inclui uma nebé ita ba horik hodi missa. Ohin iha tiha ona Novembro dia 16 udan seidauk monu rai, rai sei manas ne’e hotu dala ruma tanba ita nia hahalok, ita hotu dala ruma contribui ba ida ne’e; tesi ai, ke’e rai, sunu ai oan nebé ita laiha sentido ida atu mos atu hanoin, atu hadomi rai  ida ne’e liu housi kuda ai oan ruma atu hametin e nune’e mos quando hare karik ema sunu ai ita hare lalais buka bé atu rega mate.

Dom Virgílio do Carmo da Silva, SDB recomenda mos katak: “Acontecimento ida nene’e, se bele acontece dala ida de’it iha tinan ida ne’e, tinan oin mai ita hotu tem que haka’as an atu bele hadomi ita nia uma mahan. Tan ne’e amo Papa bolu ita hotu nia atenção atu hadomi ita nia uma mahan katak hadomi ita nia rai doben Terra da Mãe ida ne’e, hadomi ita nia rain katak ita mos aprende atu kuda ai oan labele tesi deit.

Então ida ne’e mak liafuan dahuluk nebé hakarak atu encoraja husu ita hotu, hahu housi kiik oan, foinsa’e sira to’o boot atu ita hotu atu iha nebé deit mak fuma soe sigaru ga, sunu ai ga, buka atu hamate lalais tanba ida ne’e ita hotu nia responsabilidade”. (Marta & Ceko)

ARQUIDIOCESE METROPOLITA DE DILI HALAO AVALIAÇÃO SERVISU PASTORAL TINAN 2019

DCAD, Iha Quarta-Feira loron 13 fulan Novembro 2019 Lorokraik horas tuku 3;00 Otl, Amolulik quase 100 resin hamutuk ho Arcebispo de Dili Dom Virgílio do Carmo da Silva, SDB hamutuk ho Vigário Geral, Vigários Episcopais, liburan hamutuk iha Salão Paroquial Catedral Dili ho hanoin ida atu hili Membro Conselho Presbiteral ba tinan 2020-2023.

No iha Quinta-Feira loron 14 fulan Novembro 2019, Arcebispo de Dili Dom Virgílio do Carmo da Silva, SDB hamutuk ho Vigário Geral, Vigários Episcopais, Padres, Madres, Catequistas continua liburan hamutuk iha Salão Paroquial Catedral Dili hodi avalia servisu Pastoral tinan 2019 ninian nune’e mos apresenta tema Pastoral ba ano letivo foun 2020-2024.

Arcebispo de Dili Dom Virgílio do Carmo da Silva, SDB liu husi mensagem hateten; Pessoalmente hare katak encontro ohin ninian la’o capaz los tanba ita hotu ninia contribuição. Desde horseik (13/11/2019) primeira vez encontro amululik sira nian ne’ebe presente hamutuk 110 Sacerdotes. Ne’e duni horseik halibur hamutuk iha ne’e quase metade Salão ne’e nakonu ho amululik  sira atu hili Membro Conselho Presbiteral ba tinan 2020 to’o 2023. No ohin dia 14 de Novembro 2019 continua realiza fila fali encontro ida ne’e ho objetivo ida atu hare liu-liu kona ba servisu sira pastoral nian durante tinan tomak ida. ohin mos iha encontro ida ne’e ita taka ita nia ano pastoral 2019 nian no halo avaliação hamutuk, fo hanoin hamutuk atu mehi ba tinan oin nian saida mak ita bele halo hamutuk.

Relaciona ho apresentação servisu Pastoral housi Vigário Geral, Vigários Episcopais, Vigararias no Departamento sira Archebispo de Dili Dom Virgílio do Carmo da Silva agradece tanba housi apresentação Vigário Geral, Vigários Episcopais, Vigararias no Departamento sira nian ne’ebe clarifica buat lubuk ida liu-liu iha serviço diocese ninian kona ba oinsa bele atende ba necessidades oi-oin. (Marta)

BUAT NE’EBE BA EMA LABELE, MAIBE BA MAROMAK BUAT HOTU BELE DEIT (Mt 19,26)

 DCAD – Fraze iha leten mak sai hanesan Lema Ordenação Sacerdotal Diácono Carlito Teti-Laca nian ne’ebe realiza iha Paróquia Nossa Semnhora do Rosário de Fátima Turiscai iha loron 9 fulan Novembro 2019. Além de Ordenação Sacerdotal Diácono Carlito Teti-Laca nian ba Nailulik ne’e, Paróquia Nossa Senhora do Rosário  de Fátima Turiscai mos celebra ninia Bodas de Prata (25 Anos) existência sarani Paróquia Turiscai nia Fiar. Celebração ne’e realiza iha Horas 9:30 Otl, ne’ebe preside housi Arcebispo de Dili Dom Virgílio do Carmo da Silva, SDB ho padres concelebrante sira. No iha celebração ne’e hetan Participação máximo husi sarani Paroquiano Turiscai nian no sarani husi Paróquia sira seluk ne’ebe Diácono halao ona nia estágio preparação nian.

Iha homilia Arcebispo de Dili Dom Virgílio do Carmo da Silva, SDB hateten; Sarani Turiscai consciente liu tan domin Maromak nian tanba ohin ita hotu hatene katak ita celebra tinan 25 presença paróquia ninian. Tanba iha tinan 25 nia laran Maromak halo buat barak tebes ba sarani Turiscai. Sinal perfeito ida mak ohin iha ita nia leet, ita nia oan doben Diácono Carlito Teti-Laca nebe Maromak bolu no hili nia ba Nailulik. Ida ne’e mak ita bele dehan katak novidade boot ida. Tan ne’e oportunidade ida ba sarani Turiscai atu agradece ba Maromak.

Dom Virgílio do Carmo da Silva haklean tan katak; “BUAT NEBÉ BA EMA LABELE, MAIBÉ BA MAROMAK BUAT HOTU BELE DEIT”(Mt.19,26). Ita hotu hatene didi’ak katak ita Na’i Jesus Cristo mak Na’ilulik boot Testamentu Foun ninian. Iha Nia deit mak Maromak nia povo santo sai povo ida ne’ebe hanaran povo Sacerdotal. Kna’ar atu halo santo, kna’ar atu ukun  hanesan Aman nebe haruka nia Oan mai  nune’e mos Nia haruka uluk nanain Nia Escolante sira tuir fali hili nia saseluk sira bolu atu servi Maromak nia povo iha Nia Naran. Tan ne’e, Maromak continua bolu no ohin sai realidade ida iha Diácono Carlito nia moris.

Sarani doben sira Turiscai nian, tinan 25 Paróquia ida ne’e ninian labele sai de’it momento ida histórico iha ne’ebe marca ho atividades, marca ho programa oi-oin ne’ebe furak, maibe tem que sai mos oportunidade ida ba renovação. Então momento ida ne’e hotu dalan ida atu convida sarani sira laos deit iha imi nia fatin mak atu celebra, maibe convida mos sarani sira iha paróquia tomak, kiik no boot, hotu-hotu iha 25 anos nian ne’e sai hanesan momento ida importante, momento ida renovação ba sarani hot-hotu iha Paróquia Turiscai ninian. Jesto ida hatudu katak laiha ema ida exclui maibe sarani hot-hotu simu convite ida ne’e. Buat hirak ne’e hotu hodi harohan ba ita nia mahein Inan Doben Nossa Senhora de Fátima ne’ebe durante tinan 25 nia laran acompanha ona sarani sira iha imi nia ksolok no susar atu ita mos hakat ba oin tama iha história foun tinan 25 mai tem que ser sai Kreda ida ne’ebe metin liu tan, buras liu tan wainhira ita hotu sente duni katak Kreda ne’e ha’u nian ha’u mos iha papel no iha responsabilidade ida atu apoio ba melhoramento renovação ba Uma Kreda ida ne’e. (Marta)

SARANI BEDOIS SEI ENTREGA ILAS SÃO JOÃO PAULO II BA SARANI BALIDE

DCAD (21/10/2019), iha loron 25 fulan Setembro 2019, sarani paróquia Santa Teresinha do Menino Jesus Bedois simu Ilas São João Paulo II housi sarani Quase Paróquia São Tiago Hera. Durante semana rua resin Ilas São João Paulo II iha Paróquia Bedois ne’e consegue visita Bairros 19 ne’ebe pertence ba iha Paróquia Santa Teresinha do Menino Jesus Bedois. Iha loron 21 fulan Outubro 2019, sarani Bairros acompanha hikas Ilas São João Paulo II ba iha Paróquia atu nune’e iha loron 24 hodi entrega hikas ba sarani Paróquia Balide.

Pe. Pároco Santa Teresinha do Menino Jesus Bedois Pe. Alberty Franco Morato haktuir katak durante semana rua ho balun Ilas São Paulo II lao haleu Bairros 19 iha Paróquia Bedois nia laran. Iha visita sira cada Bairro iha missa. Tanba ne’e ohin loron 21 fulan Outubro Ilas São João Paulo II temque fila fali mai Paróquia. No Ilas São João Paulo II sei hela tan iha Paróquia durante kalan ida to’o to’o loron 24 fulan Outubro 2019 hodi entrega hikas ba iha sarani Paróquia Balide. (Alin)