shadow
Diocese de Dili > NOTÍCIAS > Notícias

NOTA PASTORAL

NOTA PASTORAL 2020

“Imi ba hateten ba escolante sira no ba Pedro, Nia ba uluk ona Galileia.

Imi sei haré Nia iha neba nu’udar Nia dehan ona ba imi” (Mc.16,7-8)-Lição Covid-19 nian.

 

Wainhira tinan foun 2020 hahú, ema hotu sei hato’o hela Boas Festas do Natal no Feliz Ano Novo ba malu, comunicação social mundo tomak nian bolu atenção ba vírus foun ida nebé ataca dadaun ona rai balu hanesan China no Europa. Organização Mundial Saúde hanaran vírus ne’e CORONA VIRUS KA COVID-19. Tan Virus ne’e ataca continente sira hotu, mundo tomak, ne’e duni técnico sira hanaran nia Pandemia katak moras ida nebé kona mundo tomak.

To’o oras ne’e ita rona teoria barak no explicação barak kona ba moras ne’e, maibé ladauk iha explicação ida nebé claro no halo mundo tomak hetan consenso hodi hatene lolós kona ba moras ne’e nia hun no nia natureza.

Técnico sira sáude mundo no nação sira nian maka iha competência atu explica claro moras ida ne’e sa’a ída, nia hahú oin sa’a, tan sa’a no halo nusa maka nia mosu, oin sa’a maka nia hadaet lais los hanesan ne’e ba mundo tomak, bainhira maka nia lakon, se técnico sira hetan ona dalan atu luta hasoru nia no halakon vírus ne’e? Hafoin técnico sira saúde nian kala sei explica efeitos sa’a ida maka moras ne’e sei housik hela iha ema sira be hetan moras ne’e, iha sira nia moris aban bainrua nian.

Político sira kala sei buka dalan atu explica se vírus ida ne’e mai housi revolta natureza nian ka moras ida ne’e iha objectivos políticos ba equilíbrio político mundo nian.

Economista sira kala sei buka dalan atu explica moras ida ne’e sei lori consequência sa’a ida ba vida económica mundo nian, ba nação ida-idak  no ba cidadão ida-idak nia moris lor-loron.

Filósofo ho Teólogo sira kala sei buka mos explicação kona ba oin sa’a moras ida ne’e sei afecta ba ema criatura, nudar Maromak nia ilas (Gn 1,26; DSGC no. 105-114). Tan criatura ema lakon respeito completo ba dimensão ida ne’e (Maromak nia ilas) iha nia moris, maka keta Na’i Maromak, iha tempo moderno ida ne’e hakarak lori ita ema reflecte no compreende katak Nia maka sei buat hot-hotu nia hun no rohan, biar mundo parece la precisa ona Nia ba buat ida no duni sai tiha Na’i Maromak housi criatura ema nia existência.

Técnico Ciências Sociais sira nian kala sei buka explica moras ida ne’e nia consequência iha comunidade sira nia moris, nacional, internacional continental, mundial, etc. Dados estatísticos sei sai nudar lalenok ka sasukat atu mundo tomak tetu fenómeno ida ne’e nia efeito.

 

CONSIDERAÇÕES GERAIS BALUN

1. Tuir informação nebé comunicação social hato’o, parece primeira vez iha História, maka mundo tomak hetan moras ida simultâneo, katak moras hanesan iha fatin hot-hotu dala ida de’it tan hadaet nia an lais teb-tebes. Iha tempo sira peste nian nebé História hato’o to ita ohin loron, laos mundo tomak, nação hot-hotu (215) maka hetan tempo susar hanesan ne’e no dala ida de’it.

2. Baibain wainhira ita sukat tragédia ka susar ida nia efeitos no consequência, ita sukat ho vida sira nebé lakon, no estragos no sasan sira nebé naksobu, ita sukat ho destruição física no destruição infra-estrutura no destruição recursos humanos no económicos. Corona Virus mai la sobu infra-estruturas físicas. Maibé nia ba buka ema ida-idak iha nia uma laran hodi oho ema iha nia cama leten. Buat hotu hamri’ik nafatin, Corona Virus buka afecta de’it ema no bele hamate.

Ne’e be Corona Virus bele provoca fali interrogação seluk. Moras ne’e mai housi Natureza ka moras ne’e ema maka provoca atu atinge objectivo seluk balu. (informação balu mos dehan katak técnico sira nebé hahú estuda moras ne’e, balu mate no lakon de repente de’it. Mistério!). História hanourin katak iha tinan 300 ikus ne’e nia laran, cada tinan atus ida nação ida maka domina. Século 18, França; séc.19, Inglaterra; séc 20, Estados Unidos; século 21,??? Matenek França nian naran André Malraux, dehan katak  séc. 21 sei sai “século religioso”. No nia laos sarani.

Baibain ita rona koalia kona ba funu químico, no funu biológico. Especialista sira dehan katak iha funu tipo ida ne’e, nia característica ida maka sasan la a’at, maibé ema de’it maka  hetan terus no mate. Ida ne’e maka acontece dadaun ona?

 

3. Corona Virus mai hatudu realidade foun balu.

Baibain, moras epidemia sira haterus liu ema nebé moris iha rai sira nebé kuran liu recursos hot-hotu: laos desenvolvido, la iha condição higiene, bele iha hospital maibé kuran recursos oi-oin, economia fraco, aimoruk laiha, infra-estrutura la iha ou então menos, etc.. Acontece liliu iha rai sira África nian, ita iha Ásia, América Latina, etc. Corona Virus fali buka liu maka rai riku sira, liliu Europa tomak no Estados Unidos. Hafoin Corona vírus mos mai hatudu países desenvolvido sira nia fraqueza. Biar organizado no desenvolvido oin sa’a, vírus oan ida, hanesan  la folin buat ida, halo potência  hot-hotu hakneak iha nia oin. Iha história oan ida haktuir katak iha Itália, iha fatin ida loron ida ema ba hospital barak teb-tebes, no hospital iha de’it ventilador 5 wainhira iha loron ne’e sira precisa 700. Corona Vírus hetan mundo tomak desprevenido. Haré de’it ba fatin sira nebé maka ema mate barak ona tan Covid-19, ita bele halo reflexão balu (questão metafísica balu) hodi husu razão sa’a ída maka provoca situação particular hanesan ne’e iha contexto particular mundo desenvolvido nian? Tan sa’a maka mundo desenvolvido liu hanesan Europa no Estados Unidos maka hetan terus liu? Maibé mos bele hetan razão seluk karik.

 

4. Tan ita ema kolu Maromak housi natureza no espaço público no mos kolu Maromak housi ema nia existência, halo sociedade desenvolvida sira hanoin katak, koalia no hanourin kona ba Maromak no Maromak nia ukun fuan sira, ohin loron ne’e, significa beikten no atrasado mental. Halo hahalok hasoru princípios morais no éticos, hasoru valores humanos, halo imoralidade no anormalidade sira hotu sai princípios gerais de comportamento normal no moral, ne’e maka sasukat desenvolvimento no progresso nian. Duni sai tiha Maromak housi ita nia moris hafoin se fali maka atu tau ordem iha ita nia desordem geral nia laran? Filósofo no teólogo sira bele halo reflexão klean balu, kona ba causa, efeitos no consequências pandemia ida ne’e nian ohin loron iha humanidade nia moris.

 

5. Virus oan ida hanesan bola ki’ik oan ho tarak meik lubuk ida haleu nia lolon, halo mundo tomak hakneak iha nia oin. Kbi’it tomak mundo nian, político, económico, social, religioso, científico, hakru’uk rabat rai iha Covid-19 nia oin. Matenek na’in sira nebé hahú estuda fenómeno ida ne’e dehan katak ne’e foin hahu maka ne’e. Nação sira hotu ladauk atinge sira nia ponto máximo. No mos iha Nação balu, ema hanoin katak lakon tiha ona, hamenos prevenção, nia mosu fali hetok maka’as liu tan. Tan ita la hatene wainhira maka nia lakon lolos, diak liu ita atenção nafatin.

 

EFEITOS

Covid-19 sai biban ida atu descobre fali pessoa humana ida-idak nia folin.

Ideologia politica sira, desde 1800 mai oin, baseia ba corrente filosófica balu, haré liu ba “humanidade genérica” do que ba pessoa individual; haré liu ba género humano do que ba indivíduo; buat nebé diak ba género humano,diak ba pessoa. Se ita ba haré ideologia capitalismo liberal nian no ideologia socialista sira no nia sanak sira hotu nebé mosu, domina no haterus mundo iha tinan 200 ikus ne’e nia laran ita haré oin sa conceito ida ne’e domina mundo to’o ohin loron. Ne’e duni politica no político sira buka liu implementa hahalok sira nebé foti nação nia naran iha comunidade internacional nia oin, no haluhan tiha cidadão ida-idak nia situação. Covid-19 mai doko conceito ida ne’e hahú housi saúde ema ida-idak nian. A nível geral hanoin katak tecnologia prevê no resolve situação sira hotu. Como tecnologia la prevê situação sira hotu, iha susar nia laran sacrifica vida humana. Katuas ho ferik sira bele mate tan la halo ona falta no liliu tan ita la iha capacidade tecnológica atu luta hasoru. Hafoin ita sei dehan katak defende direitos humanos. Ohin loron kala ema ida nia vida, liliu katuas ida ho ferik ida, sira ne’e la iha ona direito ba vida. Nune’e’e mos kosok oan sira nia vida (Cf. EV 2-4). Tan hirak ne’e ladauk produz buat ida ba humanidade. Sira hirak ne’e bele lakon. Covid-19 mai hanourin katak entre discurso político ho realidade humana no individual buat ruma tenki muda. Pessoa humana maka criatura nebé importante liu iha mundo (Cf. GS 12-16).

Conceito ida “humanidade genérica” ne’e, hamosu objectivo no estratégia balu nebé ohin loron domina mundo: ida maka hanaran “nova ordem mundial”, katak organiza mundo no nação ida-idak nia moris tuir ideologia maioritária haruka. Soberania nacional ne’e dala barak iha de’it surat; nação sira tenki halo de’it buat nebé comunidade internacional haruka. Objectivo seluk balu tan maka: globalização no internacionalismo. Critério atu define nação ida nia nível de desenvolvimento maka se nia iha ona capacidade atu atinge nível nebé comunidade internacional define. Político sira haka’as an, dala barak, sacrifica cidadão sira nia moris tan objecticvo sira ne’e. Covid19 mai hatudu conceito sira ne’e hotu nia fraqueza. Quando situação diak ita hotu mesak maun alin. Iha susar laran ida-idak maka tenki haré ba nia uma laran. Ita iha Timor, Covid-19 obriga ita hapara ita nia actividade durante fulan ida de’it, população hahú hamlaha kedas. Tan la halo to’os no natar, hanoin katak globalização ne’e halo katak mercado fornece nafatin buat nebé ita precisa, sarak iha osan; resultado, iha osan maibé hamlaha hola nafatin tan fos la mai housi liur. Iha tempo nebé fos na’in precisa fos ba nia ema sira, sira taka odamatan ba liur, haruka hirak seluk ba pasiar, no halo consumidor sira bulelu iha mundo tomak. Iha tempo diak nia laran ita koalia solidariedade internacional ho hirak nebé kuran liu. Liafuan mesak furak biar mamuk! No ita nia político sira fiar metin los. Quando ema hatudu ema nia egoísmo maka ita hakilar no protesta maibé ita la hanoin atu organiza an ba situação imprevista sira ne’e. Ita hanoin ita nia agricultura nebé tenki hahú hanoin oin seluk ho acontecimento ida ne’e.

Covid-19 sai mos biban ida atu fanu buat diak no a’at lubuk ida iha pessoa humana, liliu iha cidadão  nacional ida-idak nia moris.

Covid-19 mai hatudu irresponsabilidade no responsabilidade cidadão ida-idak nian. Iha Fatin balu vírus hadaet lais tebes tan ba cidadão balu nia irresponsabilidade. Wainhira autoridade sira fo sai orientação nebé população sei halao tuir atu evita hetan moras ne’e, ema barak hahú la fo atenção. Atitude ida ne’e sai caro teb-tebes ba população nia moris.

Maibé sai mos biban ida atu hola responsabilidade, consciencialização no solidariedade ba bem comum, comunidade local nia vida. Katak cidadão ida-idak hola consciência katak atu ema hotu labele hetan moras ne’e, ita ida-idak tenki halao nia hahalok ho responsabilidade. Parabéns ba Timoroan sira hotu tan consciencialização no responsabilidade ida ne’e. Biar ho recursos uitoan de’it, hot-hotu haka’as an atu lao tuir orientação sira nebé responsáveis sira fo sai hanesan: usa máscara, fasse liman bebeik ho sabaun, hela hakmatek iha uma, la ba rancho nar-naran de’it ho belun ka família sira seluk, uma hot-hotu, mercado sira, instituição administrativa sira hotu prepara be no sabão atu ema hotu bele fasse liman molok tama ba uma laran.

Covid-19 mai hatudu buat diak seluk iha ita ema nia moris-Solidariedade ba malu. Haré hahalok sira nebé técnico sira saúde nian, forças sira nia hahalok no presença, pessoal auxiliar no voluntário sira halao iha tempo COVID-19  nia laran, ita tenki agradece ba Maromak no agradece ba nia oan sira ne’e, nebé halao ho aten brani sira nia serviço no profissão atu bele salva ema seluk nia vida. No mos agradece no fo louvor ba sira hotu nebé ho iniciativa pessoal organiza-an hodi ajuda maun-alin sira nebé precisa teb-tebes ema seluk nia tulun iha tempo ida ne’e. Empresários, NGO sira, congregações religiosas sira, paróquia sira, associação sira caridade nian, Cáritas diocesana sira, etc. Graça Wain ba Maromak be haraik fuan bo’ot, nakonu ho domin ba nia oan sala na’in sira ne’e atu hatudu Na’i nia  domin iha maun-alin sira nia tempo terus .

Efeito positivo ida seluk tan maka Covid-19 sai biban ida atu família sira hetan biban hodi bele hasoru malu, tu’ur hamutuk, hela metin iha uma laran, hasoru malu lor-loron hodi haré no tetu sira nia vida hamutuk; aman-inan sira bele haré no hasoru malu ho oan sira durante loron tomak no oan sira mos bele hasoru malu no haré inan-aman  loron tomak. Psicólogo sira dehan katak iha risco emocional ba ki’ik oan sira nebé hela ho inan-aman loron tomak iha tempo Covid-19, maibé wainhira escola sira hahú fali, ki’ik oan sira bele hetan trauma. Ne’e mos desafio ida ba inan-aman sira oin sa’a ajuda ki’ik oan sira atu hatene simu no adapta-an” wainhira situação muda. Comentarista sira nebé iha humor comenta hodi dehan katak Covid-19 sai mos biban ida atu família sira vida sidi hela fatuk no ai ne’e, hetan biban ida atu halo’os fali sira nia moris nu’udar família. Maromak nia Providência hatudu nia dalan. Iha Lian Português dehan: “Deus escreve direito por linhas tortas” (Na’i Maromak hakerek lolos iha dalan kleuk sira nia le’et).

Covid-19 mos sai biban ida atu sarani sira habo’ot sira nia consciência ba sira nia estatuto nudar membro Kreda nian, no biban atu habo’ot no haklean sira nia fiar. Páscoa ida ne’e laos hanesan Páscoa baibain tan Comunidade sarani la celebra festa bo’ot no fundamental ida ne’e hamutuk iha Uma kreda ka Catedral ida nia laran. Maibé situação sai momento bo’ot de catequese kona BA SENTIDO CELEBRAÇÃO LITÚRGICA NIAN. Laos fatin atu celebra ne’e maka importante maibé ema nebé ita hanoin no celebra nia memória iha liturgia eucarística ne’e maka importante liu. Maka Jesus Cristo, Maromak nia Oan hala-an ba ema, ema hedi iha Cruz, mate tiha, liu loron tolu moris fali.  Ida-idak iha nia fatin, iha foho ka iha centro, iha cidade ka aldeia, iha oras nebé ita halibur malu hodi tuir missa liu housi Televisão, Rádio ka dalan sira seluk nebé tecnologia bele hato’o, ita nia unidade nudar sarani liu housi celebração tempo Jesus nia mate no moris hias nian hetan naroman seluk. Sarani balu dehan la dun sente completo tan la Comunga. Se Covid-19 sai biban ida atu hamosu de’it consciência ida ne’e iha sarani católico sira nia compreensão kona ba Eucaristia, bendito Covid-19, rahun diak ba Covid 19 nebé sai mestre bo’ot atu hanourin kona ba Eucaristia. Ohin loron, iha mundo moderno ida ne’e, sarani católico barak haré no hanoin kona ba Eucaristia ne’e hanesan acto cultural ida ou acto social ida ou acto sócio-cultural de’it. Ne’e duni maka dala barak protocolo Estado nian hatama missa iha celebração social sira tan ne’e halo parte cultura. Marca presença ne’e importante maibé simu comunhão ne’e la importante ida. Hafoin maun-alin sira ne’e sei justifica an hodi hanaran-an dehan sira ne’e “Católico não praticante”.

Hafoin estatuto ida ne’e mos acompanha sira nia estatuto social. Wainhira sei ema simples, católico convicto, praticante, militante no romano. Wainhira estatuto social bo’ot ba dadaun, estatuto de “católico não praticante” mos acompanha dadaun proporcionalmente ou na ordem inversa dos valores.

 

Consequências

1. Ita la hatene moras ne’e dura to’o bainhira

2. Covid-19 iha influência bo’ot iha ita nia nação tomak nia vida e influência negativa barak iha nível hot-hotu. Vida iha Timor no Nação sira seluk para hotu. Família lubuk ida sei hasoru situação de dificuldade no Economia parada completamente no ho situação de indefinição política nebé ita hasoru agora mos la ajuda.

3. Hein katak na’i ulun sira aproveirta biban ida ne’e atu reflecte klean kona ba situação real nação ida ne’e nian hodi hatene hetan dalan no politica los atu prepara nação ida ne’e ba futuro.

Haré ba nação nia moris maibé liliu cidadão ida-idak nia felicidade.

4. Covid-19 mai hatudu ita nia ukun na’in sira no órgão de soberania sira hotu nia fragilidade, fraqueza, impreparação no confusão do ponto de vista político e comportamento de cidadão. Então episódio nebé Na’i deputado sira hatudu iha Parlamento iha loron sira liu ba ne’e, hatun ita nia oin iha fatin hot-hotu. Ita la discute se legal ou ilegal, constitucional ka lae, se maka iha razão ou lae. Ne’e ho técnico jurista no constitucionalista sira. Buat nebé escandaliza ne’e maka processo nebé representante sira povo nian iha uma fukun fo ba povo tomak nação ida ne’e nian.

Ne’e ulun sira nebé atu halo lei hodi regula nação ida nia moris maka hatudu exemplo nune’e’e; cidadão sira atu tau néon ba sira nia parlamento ida ne’e oin sa los? Hafoin decisão nebé parlamento foin hola ne’e atu vigora oin sa los? Políticos geração foun sira, ho comportamento ida ne’e, hein apreciação no confiança sa’a ida housi povo? Halo ita hanoin pintor ida nebé hahú pinta quadro furak ida no de repente fakar tinta tomak iha nia pintura nia leten. Pintura borrada!

Decisão ida ne’e, para além de cria confusão, mai obriga Órgão de soberania ida-idak nação ida ne’e nian  atu esclarece no toma posição kona ba ida-idak nia responsabilidade no decisão ou falta de decisão.

Timor-Leste nudar Estado de Direito Democrático ida hari no hatur nia an iha Constituição ida nebé haruka Estado moris tuir de’it principio e regras de Direito no regras de Democracia (C-RDTL, art.o 2, n.o2).

Em vez de tau todan ba ida seluk, diak liu ida-idak assume nia responsabilidade tuir principios de separaçãodo poder no principio interdependência do poder (C-RDTL, art.o 69), Presidência da República, Parlamento, Governo no Tribuna’is (C-RDTL art.o67). Agora precisa coragem, humildade no imparcialidade órgão ida-idak nian atu hetan dalan hodi sai housi situação ida ne’e.

5. Covid-19 ne’e sai estado de graça provisório ida ba Ukun na’in sira. Problema sira la lakon tan la resolve. Ohin loron sai hanesan aspirina ida ka anestesia hodi hatun ulun moras nebé haterus hela paciente. Maibé vida nação nian labele lao iha situação de indefinição permanente ida ne’e nia laran kleur tan.

Decisão a’at ida sei diak liu do que la iha decisão. Decisão sala sei bele corrige. Decisão la iha, orientação la iha no hamosu confusão oi-oin tan ida-idak halo interpretação tuir nia conveniência de’it.

 

Lia menon ikus

Acontecimentos sira ne’e mosu iha tempo hot-hotu no geração ida-idak koko rasik sira nia tempo susar sira ne’e. Importante maka ita tenki hatene aprende ho ema seluk nia experiência atu ita bele habo’ot no hametin ita nian. Matenek na’in ida, wainhira estuda história seculo XX ho acontecimento sira hotu nebé mosu iha século ida ne’e nia laran no analisa tan sa acontecimento sira ne’e  hotu mosu,liliu guerra mundial rua, ho líderes mundo nian iha tempo neba nia dehan: “TEMPOS DIFÍCEIS CRIAM HOMENS FORTES; HOMENS FORTES CRIAM TEMPOS FÁCEIS E TEMPOS FÁCEIS CRIAM HOMENS FRÁGEIS QUE CRIAM TEMPOS DIFÍCEIS” [tradução: tempo susar hamosu ema forte; ema forte sira hamosu tempos fáceis (buat ida la susar) no tempo fácil sira hamosu ema fraco nebé hamosu fali tempo susar]. (D. Acemoglu e James A. Robinson, Por que as Nações Fracassam, 2013);

Ba sarani sira, liliu católico sira, lia menon ida ne’e bele sai naroman mai ita. IHA DESORDEM MUNDIAL NIA OIN NO IMPASSE POLITICO PROLONGADO IHA ITA NIA RAI LARAN, MAI ITA KAER EVANGELHO HODI LÊHATENENO HATENE LÊ ATU HATENE INTERPRETA DESORDEM SIRA NE’E HOTU.

Ba ita nia situação politica ohin loron precisa hatene lê Constituição atu hatene interpreta ita nia desordem politica hodi hakotu desordem.

Iha Evangelho festa Ascenção nian ita lê iha S. Mateus nebé dehan: “sira na’in sanulu resin ida lao ba Galileia… Wainhira sira haré Nia, sira tuku tur ba rai hodi adora Nia; maibé sira balun fiar,balu la dun fiar. Nia Hakbesik ba sira hodi dehan… imi ba hanourin nação hot-hotu….”

Tan sa Galileia? Tan Jesus hahú nia primeira missão ho nia Apóstolo sira iha rai Galileia. Naton ne’e Apóstolo sira la hatene Jesus ne’e se los. Moris hias tiha atu sae ona ba Lalehan, Jesus hanesan fo hanoin ba sira hodi dehan: “tinan tolu liu ba, wainhira ita hahú, imi hotu matan tomak hela  kona mai ha’u. Agora imi hatene ha’u ne’e se los. Ne’e duni imi hahú lao fali hanesan ita hahú maibé agora ho matan foun. Agora, imi ba haklaken ha’u nia naran ba mundo tomak no halo emahotu sai ha’u nia escolante hanesan imi…”.

NE’E DUNI IHA MUNDO NIA DESORDEM NIA LARAN ITA FILA HOTU FALI BA GALILEIA HODI HAHÚ VIAGEM FOUN IDA FALI, TAN NIA “HELA HO ITA TO’O TEMPO IKUS” (MT.28,16-18)

 

Dili, 26 de Maio de 2020

ARÃO NOÉ; CONSIDERA ELEIÇÃO PPN HANESAN LOS IHA MERCADO

DILI 21 Maio 2020 (DCAD) – Presidente Parlamento Nacional sessante Arão Noé hateten, Ha’u cumpre resultado votação nebé mak sira halo ona iha terça-feira ne’e, mesmo que ami sei halo recurso ba Tribunal tuir regras legais nebé iha. Só que ha’u lamentável ituan, tanba iha eleição Presidente Parlamento Nacional ida foin lalais ne’e, ita compara karik estudantes sira hili ketua kelas iha escola ne’e mos sei formal no sei ho digno, maibé eleição Presidente Parlamento ida hanesan los iha mercado, ne’e mos sei realiza ne’e, tanba ne’e mak ha’u lamenta teb-tebes ho situação ida ne’e. Mais pronto ita submete ba dicisão depois mak ita hein fali orgão sira nia competéncia.

Presidente Parlamento Nacional sessante Arão Noé reforça tan, Ita housik cada orgão ida-idak hala’o nia cna’ar no decisão saida mak sai mai, ita hotu submete ida ne’e mak estado de direito, tanba ne’e dicisão saida de’it mak orgão seluk hasai mai ita simu no hala’o, tanba Timor ne’e ita hotu nian ita sei esecuta decisão saida maka sei sai.

Presidente Parlamento Nacional sessante Arão Noé reafirma katak Agora ba oin ha’u hala’o ha’u nia knar hanesan deputado bai-bain no ha’u deputado nafatin tanba ha’u mos titular ho eleito direito. Tuir Arão Noé katak questão Presidente Parlamento nian ne’e mak questão seluk ida, maibé kona ba deputado ha’u deputado nafatin, lor-loron mai serviço nafatin hanesan bai-bain. No ha’u agora mai ona iha Bancada no depois mak ita hein decisão housi Tribunal nian kona ba processo sira ne’e. (Leo S’mauS)

ATU HATUR HIKAS MESA PPN; ANICETO SEI BOLU LIA NAIN HALO RITUAL

DILI 21 Maio 2020 (DCAD) – Hafoin mosu rungu ranga iha loron segunda no terça semana ne’e entre Deputados sira iha Parlamento Nacional hodi resulta sasan balun hetan estragos, Dr. Aniceto Guterres lidera tiha conferência Líderes Bancadas 4 (FRETILIN, PLP KHUNTO no PD) nian iha Parlamento Nacional, Presidente Parlamento Nacional foun Aniceto Guterres hateten, kona ba sasan nebé estragos liu-liu mesa Presidente Parlamento Nacional nian sei hadia fila–fali ho lisan Timor nian katak halo ritual ida, dehan Aniceto Guterres.

Presidente Parlamento Nacional foun Aniceto Guterres reforça tan katak, ha’u sei bolu lia nain sira housi município 13 nian hodi mai halo ritual hodi tau hikas mesa Presidente Parlamento Nacional nian ba nia fatin, tanba ritual mak sai ona fukun ba cultura Timor nian.

Aniceto Guterres argumenta katak, ha’u bolu lia nain sira housi município 13 nian ne’e mai hodi halo ritual atu hafoun fila-fali ida uluk hatur cultura lisan Timor nian, tanba Parlamento Nacional ne’e sai hanesan uma fukun Timor nian. (Leo S’mauS)

ANICETO HAHU NORMALIZA FUNCIONAMENTO PARLAMENTO NACIONAL

DILI 21 Maio 2020 (DCAD) – Quinta semana ne’e, Presidente foun Parlamento Nacional Aniceto Guterres hahu normaliza funcionamento Parlamento Nacional. PPN foun ne’e hateten, Ita labele housik hela Parlamento hanesan ne’e. Buat hotu parado no sasan estragos, maibé pronto agora buat hirak ne’e liu hotu ona. No agora Presidente foun iha dever tomak para atu normaliza funcionamento Parlamento Nacional, dehan PPN foun Aniceto iha Parlamento Nacional quinta ne’e.

PPN foun Aniceto reforça tan katak, Ami halo conferência ho lider bancadas sira hot-hotu concorda katak tem que halo normalização funcionamento Parlamento nian no iha loron segunda no terça oin ami sei iha plenaria. Tuir Aniceto katak, Secretária Geral Parlamento Nacional garante ona katak iha semana oin sei halo fila-fali plenária hanesan bai-bain no agenda bai-bain Presidente Parlamento sei decide.

PPN foun Aniceto Guterres haktuir katak conferência ho lider bancadas sira ba ohin loron nian marca presença housi Bancada 4 hanesan FRETILIN, PLP, KHUNTO inclui PD. Liga ho Partido CNRT nebé la marca presensa iha  conferência Líderes Bancada ne’e Aniceto hateten, bancada CNRT la marca presença iha conferência ne’e tanba karik iha loron rua ka loron tolu liu ba ninia tensaun sira sedauk tun karik. No ba oin karik sei iha barulho tan, ne’e oin seluk fali ona, mais hau fiar katak sei laiha tan. (Leo S’mauS)

IMI KETA HALO ESPÍRITO SANTO LARAN SUSAR HO IMI NIA HAHALOK NO LIAFUAN

DILI 20 Maio 2020 (DCAD) – Arcebispo Dili Dom Virgílio do Carmo da Silva iha ninia homilia relaciona ho loron Restauração Independência Timor-Leste nian ba dala 18 hateten, Wainhira ita celebra loron nação ninian, dala barak ita sempre koalia kona ba Espírito Nacionalismo no Espírito Patriotismo. Tempo uluk ninian ita hotu hatene tinan ruanulu liu ba, wainhira ita koalia kona ba Espírito Patriotismo ne’e katak ema nebé hadomi duni rai ida ne’e. Heroismo tempo nebá nian ne’e, sacrifica duni sira nia an, saran duni sira nia an. Maibé depois de ukun rasik an oinsa mak ita sukat ita nia nacionalismo na patriotismo, dehan Arcebispo Dili Dom Virgílio do Carmo iha Missa Vespertina nian iha Capela Paço Episcopal Lecidere Dili quarta ne’e.

Arcebispo Dili Dom Virgílio do Carmo da Silva hateten tan, Ita haré de’it situação nebé mosu lalais ne’e iha Parlamento Nacional, ita bele dehan hirak ne’e mak sai sasukat  ba Espírito Nacionalismo no Espírito Patriotismo ka lae. Ne’e duni, hau bolu atenção ba timoroan tomak liu-liu ba ukun nain sira atu keta halo Espírito Santo Laran susar ho ita nia hahalok no ho ita nia liafuan sira. Buka laran diak ba malu ba, sadia malu, perdua malu hanesan Maromak perdua.

Dom Virgílio do Carmo da Silva haktuir tan katak, Hau horikalan acompanha notícia, jornalista sira halo entrevista ho labarik oan nain rua nebé faan hela bandeira Timor ninian iha dalan. Iha entrevista ne’e, labarik oan sira expressa sira nia sentimento triste haré ita nia nai boot Deputado sira hakilar malu iha iha Parlamento nacional tan de’it cargo poder atu ukun. E liafuan interassante balun nebé expressa espontaneamente housi labarik sira ne’e mak ne’e; Avo Deputado sira haré no tau matan ba ami nia futuro. Avo deputado sira keta baku malu, keta buka de’it atu hadau malu poder hodi haluha tiha ami kiik sira. Tanba ne’e liga ho acontecimentos oan balun nebé mosu dadaun iha ita nia rain, buka ba atu moris tuir buat nebé hakerek ona iha ita nia Constituição. Hakas-an ba reza nafatin atu Na’i Maromak bele tulun atu ema hotu hatene Espírito de nacionalismo no Espírito de Patriotismo.

Atu taka homilia, Arcebispo Dili Dom Virgílio do Carmo da Silva reconhece mós katak, celebração loron Restauração Independência Timor-Leste nian ba dala 18 ida ne’e, ita hotu tuir no haré katak, laiha celebração ka iha buat ruma nebé especial. Maibé loron ida ne’e convida mós ita atu agradece ba Maromak, maske iha hela tempo Covid-19 ninian, nune’e mós ho situação política iha ita nia rain laran nakdoko no rungu ranga ituan, maibé iha situação sira ne’e hotu ita bele agradece Maromak liu housi Eucaristia. (Equipa DCDD)

MILITANTE PD HUSU ASSANAMI ATU CONVOCA URGENTEMENTE CONGRESSO EXTRAORDINÁRIO

DILI 20 Maio 2020 (DCAD) – Haré ba lala’ok polÍtico nebé mosu iha Parlamento Nacional, maka militante partido democrático (PD) La concorda no la aceita ação político nebé halo housi deputado PD iha Parlamento Nacional nebé contrário ho decisão colectivo nebé decide iha Conferéncia Nacional, iha dia 20 de Fevereiro de 2020. Tuir Porta-voz Queiros UMU-CHEGUE, Comissário Político Regional PD hateten, Acto político ne’e la representa aspiração quadros no militantes Partido Democrático (PD), tuir artigo 37 iha Estatuto Orgánico do Partido Democratico.

Liu housi Conferência Imprensa quarta semana ne’e iha Cede PD Dili, Porta-voz Queiros UMU-CHEGUE haktuir katak, Partido Democrático (PD), nudar partido político nebé comunga princípio democracia, solidariedade, justiça social, anti confrontação no anti violéncia ho qualquer grupo no entidades político nebé consagra iha Estatuto Orgánico Partido Democrático artigo 4, ponto 2, 3, 4 no 5.

Porta-voz Queiros UMU-CHEGUE hateten, Ho actos político nebé hatudu housi deputado PD nain 4 iha Parlamento Nacional, quadros no militantes Partido Democrático, ohin dia 20 de Maio de 2020 declara katak, La concorda no la aseita ação político nebé halo housi deputado PD iha Parlamento Nacional nebé contrario ho decisão colectivo nebé decide iha Conferéncia Nacional, iha dia 20 de Fevereiro de 2020. Acto político ne’e la representa aspiração quadros no militantes Partido Democrático (PD), tuir artigo 37 iha Estatuto Orgánico do Partido Democratico.

Porta-voz Queiros UMU-CHEGUE, ne’e mos husu responsabilidade individual Presidente Partido Democratico (PD), nebé fo orientação ba deputados PD sira atu contra decisão Conferéncia Nacional.

Porta-voz Queiros UMU-CHEGUE argumenta katak, Partido Democrático mantein no firme nafatin ho decisão coligação nebé halo liu housi Conferéncia Nacional, baseia ba artigo 55 regimento interno PD. Tanba ne’e, husu ba Presidente Partido Democrático, atu convoca urgentemente congresso extraordinário tuir artigo 38 ponto 4 nebé hateten katak: Congressu Nacional Extraordinário sei hala’o wainhira iha razão nebé justificado no partido hasoru situação política extraordinário iha partido laran no situação políco nacional estado.

Porta-voz Queiros UMU-CHEGUE husu ba quadros, militantes no simpatizantes Partido Democrático, atu mantein diciplina, hakmatek, cria paz no estabilidade, cumpre nafatin regras estado emergencia. (Leo S’mauS)

CONFERÊNCIA EPISCOPAL TIMORENSE (CET) DECIDE REATIVA MISSA IHA SEMANA OIN

DILI 19 Maio 2020 (DCAD) Hare ba realidade ikus nian iha ita nia nação, no hare mós ba anseio comunidade nian, no tuir informação housi CIGC katak situação Pandemia estável iha Timor-Leste, maka CONFERÊNCIA EPISCOPAL TIMORENSE (CET) decide atu loke fali celebração comunitária no fo orientação no decisão sira kona ba oinsa atu halo celebração Eucarística.

Liu housi carta Comunicado Pastoral III nebé CONFERÊNCIA EPISCOPAL TIMORENSE (CET) anúncio ba sarani tomak katak, Kreda Timor aconselha ba Amo Pároco/Padre sira hotu atu bele hahu missa ho sarani sira iha dia 28 de Maio ho recomendação hirak nee; Loke ba celebração eucarística de’it; Missa dominical no solenidade, quanto possível, halo campal; Missa quotidiana iha Igreja laran maibé ho orientação sira nebé fó sai tiha ona; Husu ba sarani sira atu usa máscara durante celebração; Husu ba amo pároco ho nia responsável sira atu prepara we no sabão atu saram Sira fase liman no garante distanciamento entre participante sira; Igreja fó conselho ba sira nebé mak moras, isin fraku, atu lalika mai missa. reza lha uma de’it.

CONFERÊNCIA EPISCOPAL TIMORENSE (CET) Convida ita atu halo tuir nafatin recomendação sira housi Organizaçao Saúde Mundial ho pessoal técnico saúde ita nian, tanba moras ne’e seidauk liu.

Comunicado público ne’e fo sai hodi fo hatene ba Nai-Lulik sira, Religioso no Religiosa sira no mós ba comunidade sarani Católica tomak iha Timor Leste nian atu hatene no Decreto ne’e hahú vale loron ne’ebe fo sai comunicado oficial ida ne’e.

PE. MAUBERE: UMA FUKUN PARLAMENTO NACIONAL NAKFILAK BA FATIN FUTU MANU

DILI 19 Maio 2020 (DCAD) – Haré ba situação durantre loron rua nia laran mósu rungu ranga makas iha Uma Fukun Parlamento Nacional entre Partidos Políticos nebé assento iha uma fukun Parlamento Nacional ne’e, Pe. Domingos da Silva Soares (Maubere) hateten, nu’udar representante povo iha uma fukun Parlamento Nacional ne’e tem que buka lia los, lalika hamósu violencia, no lalika trata malu.

“Imi nu’udar representante povo iha Uma Fukun Parlamento Nacional ne’e tem que hatene Lei. Se la compriende Leí karik, bolu especialista sira para mai esplica ba imi hodi haré razão iha nebé, hodi halo tuir duque hakilar malu hanesan iha fatin futu manu nian, dehan Pe. Maubere Terça ne’e (19/05/2020) iha Portão Parlamento Nacional”.

Pe. Maubere argumenta tan katak ita hot-hotu tem que hakruk ba justiça, ita iha liberdade para atu descute, maibé descute ho razão, ho ita nia matenek, para labele hatudu ita nia beik ba povo. Nailulik ne’e acressenta, Imi hanesan representa povo hatudu atitude sira la educado hanesan ne’e, ema seluk hamnasa ita no laos deit iha Timor laran, maibé mundo tomak.

Pe. Maubere hanesan mós Veterano ida lori povo nia naran hasae ba deputado sirak katak, ami hanesan povo ho situação ida hanesan ne’e liu-liu ho crise tinan tolu ona, no mós ho situação pandemia covid-19 ne’e, halo terus liu tan ami povo. Tanba ne’e, ha’u mai iha ne’e atu hasoru deputado sira tanba ha’u sente triste ka fuan kanek hanesan povo ida. No ha’u mós la halo buat ruma ba nação ida ne’e, maibé ami ema fuan kanek haré ami nia deputado sira la compriende malu iha Uma Fukun Parlamento Nacional.

Tuir Pe. Domingos da Silva Soares (Maubere) katak, Ha’u mai iha ne’e laos amo bispo mak haruka, maibé ha’u mai nu’udar pároco tanba ha’u sente iha ha’u nia a’an ne’e hanesan bai-bain bolu ha’u padre Maubere no nu’udar padre ida nebé mak hanesan contribui ituan ba independência ba rai ida ne’e ninian no iha momento hanesan mós ha’u tem que hamutuk ho povo hodi lori povo ninia lian mai to’o iha ita nia representantes povo nian iha uma fukun Parlamento Nacional. (Leo S’mauS)

Bancada FRETILIN, PLP no KHUNTO Queixa Bancada CNRT ba Ministério Público

DILI 18 Maio 2020 (DCAD) – Deputado sira husi Bancada FRETILIN, PLP no KHUNTO, segunda ne’e, Liu husi Comunicado Imprensa, hato’o queixa ba Ministério Público hasoru Deputado CNRT sira nebé ohin invade mesa Parlamento Nacional iha salão Plenária no perturba funsionamento normal Parlamento nian

Tuir Comunicado Imprensa conjunto husi Bancada FRETILIN, PLP no KHUNTO, nebé Departamento Comunicação Arquidiocese Dili (DCAD) acesso segunda 18 Maio 2020 ohin haktuir, conferência ida ne’e constitui crime coação contra Orgão Constitucional no perturbação ba funcionamento Orgão Constitucional.

Tuir Comunicado Imprensa ne’e haktuir, Ohin, loron-18 fulan-Maiu tinan-2020 deputadu nain lima hamutuk ho Vice Prezidente Parlamentu Nasional nainrua, asina karta ida hodi hato’o keixa ba Ministeriu Públiku hasoru deputadu CNRT sira, Maria Fernanda Lay, Virginia Ana Belo, Bendita Moniz Magno, Maria Gorumali Barreto, Maria Rosa da Câmara Bisoi, José Virgílio Rodrigues Ferreira, Maria Terezinha da Silva Viegas no Ricardo Baptista, nebé halo áktu fíziku hodi perturba no impede parlamentu nasional hala’o sesaun plenária.

Iha entrevista ho jornalista sira iha sala plenária Parlamento Nacional nian segunda ne’e, Vice-Prezidente Parlamento Nacional, deputada Maria Angelina Sarmento deklara katak “ação sira nebé invade meza Parlamento significa deputadu sira ne’e comete crime ida nebé impede funcionamento normal Vice-Presidente sira nian atu pregide plenária.”

Liu tan ne’e, liu husi Comunicado Imprensa ne’e katak, acto crime nebé deputado sira ne’e comete, deputado requerente sira hato’o ona queixa hasoru sira ba Procurador Geral da República no hato’o katak ida ne’e acto interferência Orgão Soberania Estado, Parlamento Nacional, nia funcionamento, hatudu momós bloqueia funcionamento, Parlamento labele hala’o plenária.

“Interferensia ida ne’e constitui crime coação contra orgão Constitucional no perturbação ba funcionamento orgão Constitucional, nebé tuir Código Penal punidu hanesan estipula iha Artigo 204 no 205,” deputadu sira afirma. Alin

PPN ARÃO NOÉ; ITA HOTU PRECISA HAKRUUK NO CUMPRE CRDTL

DILI 18 Maio 2020 (DCAD) – Presidente Parlamento Nacional Arão Noé de Jesus da Costa Amaral liu husi comunicado imprensa iha Parlamento Nacional Segunda ne’e, assentua pontos balun relaciona ho tentativa hadau Presidente Parlamento nia Poder nebé halo husi Vice Presidente Parlamento Deputada Maria Angelina Lopes Sarmento. 

Tuir mai declaração husi Presidente Parlamento Nacional Arão Noé de Jesus da Costa Amaral; Ohin, ha’u, Presidente Parlamento Nacional hakarak informa ba público kona ba Acto sira nebé considera nudar tentativa hadau poder maka hanesan tuir mai ne’e:

  1. Iha loron 13 Maio 2020 Bancada FRETILIN, PLP, no KHUNTO dirige Requerimento Destituição Presidente Parlamento Nacional ba fali Vice Presidente Parlamento Nacional. Acto ida ne’e Viola CRDTL Artigo 99 (3), Regimento Parlamento Nacional Artigo 17 kona ba competência Presidente Parlamento Nacional.
  2. Constituição Artigo 99 (3) hateten momoos katak Parlamento Nacional Reuni Ordinariamente tuir convocação Presidente Parlamento nian. Tanba ne’e Vice Presidente Parlamento Maria Angelina Lopes Sarmento nia acto sira ne’e viola CRDTL, LOFAP, Código Penal, no Regimento Parlamento Nacional.
  3. Vice PPN Maria Angelina Lopes Sarmento Obriga Chefe Divizão Apoio Plenária ka DIPLEN, Sr. Quintiliano Ase atu agenda no viola Regimento Parlamento Nacional Art. 22 kona ba competência Vice Presidente Parlamento Nacional nian, Vice Presidente Parlamento Nacional so bele exerce PPN nia função bainhira hetan delegação competência husi PPN tuir Regimento Artigo 22 número 3.
  4. Tuir procedimento normal iha Parlamento Nacional, Presidente Parlamento maka iha competência atu convoca Conferência líderes Bancada hodi aprova agenda ba plenária.
  5. wainhira Líderes Bancada sira aprova ona agenda maka Presidente halo despacho ba DIPLEN prepara agenda ba plenária, se laiha reunião líder bancada maka plenária mós laiha.
  6. Chefe DIPLEN considera katak processo nebé Vice Presidente Parlamento Nacional Maria Angelina Sarmento halo ne’e contra acto normal funcionamento Parlamento Nacional, nune’e devolve fila fali despacho refere ba Gabinete Vice Presidente nian.
  7. Tanba la consege Obriga DIPLEN, Vice Presidente Parlamento Maria Angelina Lopes Sarmento halo despacho ba Secretário Geral atu agenda Plenária ba loron 18 Maio 2020.
  8. Secretário Geral Parlamento Nacional Divolve Despacho husi Vice Presidente Parlamento Nacional tanba considera despacho refere contra LOFAP Artigo 7. LOFAP Artigo 7 hateten katak tem que iha delegação competência husi Presidente ba Vice Presidente Parlamento por escrita antes Vice Presidente bele toma função Presidente Parlamento nian.

Presidente Parlamento declara katak, Acto sira ne’e considera nudar hahalok hadau poder nebé contra Constituição da República, Código Penal, Regimento Parlamento Nacional no Lei Organização Funcionamento Administração Parlarnentar.

Presidente Parlamento REAFIRMA tan katak, Baseia ba CRDTL Artigo 86 (f), Parlamento Nacional hein DISSOLUÇÃO husi Presidente da República. Presidente Parlamento Firme hodi defende CRDTL tuir Artigo 2 (2) katak Estado Hakruuk ba Constituição no Lei Oan sira. Presidente Parlamento husu ba ITA HOTU atu Hakruuk no Cumpre CRDTL. (Leo S’mauS)