shadow
Diocese de Dili > NOTÍCIAS > Notícias

Dra. Jesuína Eleito Ba PDHJ

DCDDQuarta-feira loron 7 Novembro 2018, Parlamento Nacional fo Posse ba Dra. Jesuína Maria Ferreira Gomes hanesan Provedoria Direitos humanos no Justiça foun hodi troca Silvéro Baptista Pinto, tanba nia mandato remata ona iha loron 30 Outubro. Tan nee liu husi Parlamento Nacional fo voto maioria ba Dra. Jesuína Maria Ferreira hodi ocupa cargo refere durante tinan 4 nian laran.

Arão Noe hateten, Provedoria Direitos humanos no Justiça nia mandato remata ona, tanba nee PN loke concurso público ba ema nain 12 mak celecionado atu compete. Quando votação iha primeira ronde candidatura ida la atinje 5+1 ou voto la liu husi 33 tem que ba segundo ronde tuir regimento. Resultado eleição primeira ronde nian, candidato Esposa Primeiro Ministro, Isabel da Costa Ferreira ho voto 3, Horário de Almeida ho voto 20, Jesuina Maria Ferreira Gomes ho voto 31, José Luis Oliveira ho voto 1, Nívio Magalhães ho voto 3 no Filipe Rodrigues Pereira ho voto 2. Além de ne’e Aniceto Guro Berteni, Florindo José Cristovão, Hendrique de Oliveira Ximenes, Jaime Xavier, José Pereira no Silvério Pinto Batista, sira nee la hetan voto no mos iha voto mutin ida. Husi resultado primeira ronde nian, candidato ida la atinje 33 voto. Tanba nee ba hikas segundo ronde ho candidato rua hanesan Horácio Almeida no Jesuína Maria Ferreira Gomes. Husi candidato rua nee iha segundo ronde, Jesuína Maria Ferreira Gomes hetan voto maioria 38 no Horácio de Almeida hetan deit voto 23 husi total voto 61. Husi eleição segundo ronde nee Jesuína Maria Ferreira Gomes eleito sai PDHJ ho duração tempo tinan 4.

Iha ocasião nee, candidato nebe eleito Jesuína Maria Ferreira Gomes expressa nia sentimento ksolok nee hateten, Ohin hau simu posse hanesan provedora durante tinan 4 nia laran. Provedoria nia missão atu promove no protege direitos humanus no promove Governação diak. Servisu barak mak lao ona durante existência Provedoria nian iha tinan 14 nia laran. No ba futuro ita precisa atu reforça tan cooperação Institucional ho Governo, entidades públicas, sociedade civil no mos reforça tan comunição, cordenação Internal no tem que foca mos ba Direio Economia Social no Cultura tanba durante nee Provedoria halo servisu barak hare liu ba iha Diretos Civil no Política.

Jesuína Maria Ferreira Gomes esperança katak, plano Provedoria foun ba tinan haat 4 nia laran sei fo prioridade ba buat hirak nebe menciona ona no sei tau no hadia, hametin parseria ho Instituição hotu tanba dever provedoria nian ida mak atu hametin cooperação diak ho institução hotu-hotu, tanba provedoria nia existência ne’e atu fo apoio no ajuda ba instiução sira para sira labele halo violação ba Diretos Humanos no boa governação. Além de ne’e Provedoria mos hakarak halo dessiminação, socialização para hasae nafatin consiência público nian kona ba Direitos Humanos ho boa governação. (Reportágem Alin Soares)

MENSAGEM PRESIDENTE DA REPÚBLICA KONA BA PARLAMENTO NACIONAL CANSELA VIAGEM PR BA VATICANO

——- Lee Husi Chefe Casa Civil ——-

MENSÁGEM HUSI PRESIDENTE DA REPÚBLICA BA POVO TIMOR-LESTE

Palácio Presidencial Nicolao Lobato, 6 Novembro 2018

 

Inan-aman-oan sira iha Timor-Leste tomak! Maun-bin-alin sira! Povo doben Timor-Leste!

Tuir competéncia ne’ebé hatuur iha Constituição RDTL, ita-nia Lei Inan, Presidente da República mak Chefe Estado Timor-Leste.

Chefe de Estado Timor-Leste mak representante público as liu Estado Timor-Leste nian, iha rai-laran no iha rai-liur.

Hafoin Restauração Independénsia, Presidente RDTL tolu liubá, Sr. Xanana Gusmão, Sr. José Ramos Horta no Sr. Taur Matan Ruak, bá rai oioin hodi promove Timor-Leste no habelar relação ho chefe Estado sira seluk no comunidade internacional.

Relação internacionál ne’e importante teb-tebes atu ita buka-hetan, ho rai sira seluk nia tulun, oinsá lori dezenvolvimentu ba oin no hamenus kiak no mukit iha ita-nia rai doben.

Ha’u hakarak hatutan lala’ok ida ne’e, iha ha’u-nia mandato, nu’udar Presidente da República! Ho kbiit no fiar Povo Timor-Leste nian, ne’ebé ha’u hetan, liu husi eleição presidencial, ne’ebé universal, livre, direito, secreto no pessoal, iha Março 2017.

Hare’e ba importáncia lori Timor-Leste ba mundu no lori mundu mai Timor-Leste mak ha’u, tuir Constituição haruka, husu autorização hosi Parlamento Nacional atu aprova ha’u nia visita de Estado ba Portugal, Vaticano no visita de Trabalho ida ba Nações Unidas no Indonézia/ segunda vizita, iha tinan 2018.

Horseik Parlamento Nacional vota contra dala ida tan ha’u-nia visita ba rai-liur ho razão katak Presidente da República tem que rezolve uluk situação impasse iha rai-laran. Vota contra ne’e mai ho força maioria nian, hosi deputadu tolu nulu resin lima hosi partidu CNRT, PLP, KHUNTO, UDT no Frente Mudansa.

Ba ita timoroan, Estado Vaticano especial teb-tebes tanba iha significado rua. Nu’udar cidade Estado no nu’udar Santa Sé, Sede Igreja Católica nian.

Sua Santidade Amu Papa Francisco mak chefe de Estado no ukun Estado Vaticano ho kbiit hot-hotu. Sua Santidade Amu Papa Francisco mak atuál chefe Supremo Igreja Católica nian iha mundu. Ho onra no orgulho teb-tebes mak ha’ u simu informação katak Estado Vaticano simu ha’u-nia pedido atu hetan malu ho Sua Santidade Amu Papa Francisco. Enkontro ne’e atu realiza iha loron 23 Novembro, 10 horas. Tuir Nota Verbal no encontro ho Monseñor Joseph Marino, Núncio Apostólico ba Timor-Leste no Vaticano marca mós encontro ida entre Presidente da República Timor-Leste ho Cardeal Pietro Parolin, Sekcretário Estado Vaticano nian, titular ba cargu hanesan ho Primeiro Ministro no mós Arsebispo Monseñor Paul Gallagher, titulár ba cargo hanesan Ministro Negócio Estrangeiros.

Tanba Parlamento Nacional vota contra visita Estado ne’e, chefe Estado Timor-Leste lakon oportunidade atu convida pessoalmente Sua Santidade Amu Papa atu visita ita-nia rain, iha tinan 2019, tinan ida ne’ebé ita sei celebra aniversário data histórica importante rua:

– ida mak 12 Outubro, aniversário ba dala tolu nulu, Sua Santidade Amu Papa João Paulo II  visita Timor-Leste;
– ida seluk mak 30 Agosto, loron aniversáriu Referendo ba dala rua nulu.

Visita Papa nian iha tinan 1989 dada liutan atensaun internacionál ba Povo Timor-Leste nia terus no hasa’e liután apoio ba ita-nia luta libertação nacional. Liu husi dalan oioin, Igreja Católica contribui mós ba mobiliza no encorasa Povo atu vota iha Referendo 1999.

Ha’u fó hanoin katak iha tempo resisténcia, Igreja Católica sai nu’udar componente ida ba ita-nia rezisténsia culturál. Ha’u fó hanoin mós katak manifestação pública ba dahuluk, iha 12 Outubro1989, hafoin missa Papa, iha Tasitolu, mak loke dalan foun ida, ne’ebé efetivo teb-tebes, atu hato’o ita-nia luta ba comunidade internacional. Constituição RDTL reconhece papel Igreja Católica nian, iha ita-nia luta libertação nacional no, nune’e, órgão soberania hot-hotu tem que hatuir ita-nia Lei inan.

Maluk sira, Povo doben Timor-Leste. Karik visita Estado ne’e halo duni no Sua Santidade Amu Papa mai Timor-Leste, ha’u fiar katak visita rua ne’e sei hasae liután força espiritual maioria Povo nian no hametin no haburas liután relação Timor-Leste nian ho Santa Sé no Estado Vaticano.

Ha’u fó hanoin mós katak, iha 14 Agosto 2015, Primeiro Ministro Timor-Leste no representante Vaticano assina Conkordata, iha Dili. Tratado Internacional ne’e refere ba ámbito Espiritual no mós ba educação, solidariedade no fó assistência ba vulnerável sira. Liu husi Acordo ne’e, Estado Timor-Leste reconhece existência no direitos Igreja Católica no católico sira nian iha Timor-Leste. Parlamento Nacional, liu husi Resolução No. 18/2015, ratifica Conkordata ne’e iha 26 Outubro 2015 no Jornal República publica Resolução ne’e iha 11 Novembro 2015.

Órgão soberania ida-idak tem que onra compromisso ne’ebé Estado Timor-Leste assume ho Conkordata ne’e. Presidente da República hakarak teb-tebes onra Estado nia compromisso boot ida ne’e . Tanba ne’e mak husu ba Parlamento Nacionál atu fó autorização ba Presidente República atu ba Vaticano. Maibé Parlamento Nacional ho força deputado tolu nulu resin lima, hosi partidu ne’ebé ukun ohin loron, fila kotuk ba visita de Estado ne’ebé importante teb-tebes ba:

– Maioria Católico, namkari iha Timor-Leste tomak no
– Estadu Timor-Leste tomak.

Presidente da República lamenta teb-tebes ho decisão maioria AMP nian iha Parlamento Nacional, hodi halakon oportunidade di ‘ak ida ne’e.

Ikus liu Presidente da República mós manifesta ninia sentido solidariedade ba fiar nain husi confissão religiosa sira seluk iha Timor-Leste, ne’ebé hatudu sira nia espírito solidariedade ba Presidente República nia missão, nu’udar chefe Estado no Presidente ba Povo tomak.
história universál hateten katak Faraó hodi nia fuan toos, la husik povu Israel ba Terra Prometida. Maibé, to’o ikus, Faraó rasik monu ho nia fuan toos.

Viva Timor-Leste.
Obrigadu!

ILAS SÃO JOÃO PAULO II FILA HIKAS MAI DILI

DCDD DILI (29/10/2018), durante tinan tomak ida nia laran Ilas são João Paulo II lao fo volta Paróquia Nossa Senhora do Carmo Zumalai diocese Maliana, depois celebra loron missão Mundial nian iha zumalai iha nebe participa ativa OPIAM sira husi diocese 3 Dili, Baucau no Maliana husi loron 24-28 iha paróquia zumalai. Hafoin encerramento ba loron missão nian iha loron 28 Outubro, maka iha loron 29 Outubro 2018 sarani paroquiano Zumalai, OPIAM no animadores acompanha hikas Ilas husi Zumalai hodi mai entrega ba Diretor Missio diocese Dili nian iha Santuário São João Paulo II Tasi Tolu.

Diretor Missio diocese Dili nian, Pe. Patrocínio da Cunha Nunes iha ocasião nee hato’o agradecimento boot ba Pároco Paróquia Nossa Senhora do Carmo Zumalai no paroquiano sira hamutuk ho Diretora Missio diocese Maliana, Frater no sarani tomak nebe quida Ilas São João Paulo II durante tinan tomak ida nia laran to’o ohin entrega hikas mai Dili.

Diretor Nacional POM-TL Pe. Mouzinho Pereira Lopes iha biban nee esplica mos katak, João Paulo II mai hikas Dili nee atu prepara celebração ba tinan oin nian nebe hanaran “Celebração Et Jubileu Extraordinário Missão Mundial”. Ida nee laos celebração bain-bain, maibe Amo Papa Francisco dehan mundo tomak tem que celebra Jubileu Extraordinário, iha nebe obriga bispo sira atu celebra iha cada nação. Tanba nee ita nia bispo nain tolu; Dili, Baucau no Maliana nian ami koalia tiha ona katak celebração nee sei hahu iha fulan Agosto too fulan Outubro loron Missão Mundial nian. Tanba nee atividade nee boot teb-tebes.

 Missa bot iha outubro tinan oin nee ita hanaran missa dansada katak cada hananu hanesan iha entrada sei iha dansa no mos glória até ofertório n final mos. Tanba nee precisa preparação nebe máximo tanba sei inclui ita nia naiulun sira creda husi Roma, convidado nacional no Internacional sira mai atu ita celebra hamutuk biban nee. Tanba nee, ita nia missão la hotu, katak ita hodi deit Ilas mai entrega ba malu maibe ita nia missão nafatin too mate. Tanba nee husi Direção Nacional sei prepara draf fahe ba animador sira atu nunee iha tinan oin nee ita bele hatene ona kona fulan Janeiro to fulan Outubro nee saida mak ita sei halo. Depois de celebração Jubileu Extraordinário Missão Mundial nee, Baucau mak sei mai simu fali Ilas São João Paulo II no Dili nee sei prepara ba tinan oin 2020.

Diretor Nacional POM-TL Pe. Mouzinho Pereira Lopes haklean tan katak, entrega tiha Ilas São João Paulo II nee, Pároco no OPIAM, animador no sarani tomak Zumalai nian hatoo katak, durante tinan ida nia laran nee, João Paulo II husik hela buat foun balu no forte teb-tebes iha rai Zumalai. Ho missionário bot teb-tebes katak fanu ema laos deit kikoan sira maibe começa fanun Jovem sira no família sira. Nee benção Amo Papa nian tanba nia hakarak ita sai masin no naroman mundo nee nian. Tanba nee Ilas nee consegue husik duni milagre iha Zumalai. Ami espera katak Zumalai nee bele sai fonte no dapur vocação atu nunee aban bain oan sira bele sai padre no madre tanba ita hare ita nia rai nebe susar bar-barak hodi tulun iha vida moral, fiar no doutrinal Maromak nian.(crew)  

MORIS NEE MISSÃO IDA

DCDD ZUMALI, Dominggo loron 28 Outubro 2018 Dom Norberto do Amaral bispo de Maliana preside missa encerramento ba loron missão mundial nian iha Igreja Paroquial Nossa Senhora do Carmo Zumalai, diocese Maliana. Iha missa encerramento ba loron missão mundial nee participa mos bispo de Baucau Dom Basilio do Nacimento, Diretor Nacional POM-TL, diretores diocese tolu nian; Dili, Baucau no Maliana, Pároco, padres concelebtrantes, madres, seminaristas, autoridades local, grupos categoriais, OPIAM husi diocese 3 nian no paroquiano paróquia Zumalai nian. Iha missa encerramento nee, Dom Norberto iha nia reflexão dehan, “moris nee nuudar missão ida”. Loron 4 nia laran ita halibur malu iha Zumalai nee hodi koalia kona fiar no hodi simu matak malirin ba ita nia moris atu sai missionária iha ita nia moris lor-loron nian hanesan Jesus mai haklaken hodi hamamar fuan sira, halibur ema hodi moris iha harmonia no tranquilidade hodi hetan moris iha aban bainrua. Ita mai iha nee laos badiu deit, laos atu han hemu deit, maibe ita mai atu koalia Maromak nia Liafuan no lori fila fali Maromak nia liafuan nee sai hanesan Cristo nia saseluk iha comunidade sira nia leet liu-liu OPIAM sira.

Dom Basilio do Nacimento bispo de Baucau iha ocasião nee haktuir katak, Obras Pontifícia de Infância e Adulucência Missionária (OPIAM) katak kikoan oan sira ho tinan ida nebe sidauk Jovem los, maibe halao knar nudar jovem. Buat nebe Uma Creda hakarak nee sira nebe desde kiik hotu-hotu hatene sira iha obrigação iha Uma Creda atu sai missionário. Ema hotu-hotu nebe simu ona sacramento batismo iha obrigação atu sai missionário. Missionário katak ema nebe ba haklaken Jesus nia Liafuan. Nee duni atu kiik eeh boot, ferik eh katuas, katak knar missionário nian nee ita hotu nian.

Ita hare Missionário sira mai husi rai liur hanourin ita nia beiala sira sai sarani. Diferência ohin loron nian iha timor, missionário katak hanourin sarani sira sai santo, tanba oras nee daudaun ita timor naran mak sarani, maibe hahalok sei gentio hela. Ba ita hotu Desafio boot ohin loron nian mak hanourin ita nia sarani sira sai santo.

Diretor Nacional Missio Timor-Leste Pe. Mouzinho Pereira Lopes iha ocasião nee mos informa katak, ohin ita celebra loron missão mundial nian. Iha história Timor-Leste ita ladun conhece loron missão mundial nee celebrada iha paróquia, iha diocese ou celebra nacional hanesan nee. Oras nee ita hamutuk nunee ita foin hatene katak ita celebra hela knar missionário. Missio Timor-Leste nee foin lao tinan 5 ho atividades sira. Iha tinan oin husi Direção nacional simu knar ida nee atu halo celebração ida hanaran Jubileu Extraordinário missão nian. Tanba nee ita nia missão laos remata ona iha nee maibe continua too ita mate.

Pároco Zumalai Pe. Manuel mos hateten, hau nia domin bot ba kikoan hot-hotu husi diocese 3 ninian, ho ita bot sira nia presenças, ho imi nia aten brani mai hela iha Zumalai nee, imi mak sei nakfilak ami nia laran tanba bai-bain imi rona iha imi nia fatin, iha imi nia knua katak rai Zumalai nee fatin conflito; ema oho malu bebeik, tuda malu bebeik, hein malu bebeik, maibe hau fiar katak ho imi nia presença ida nee imi mak sei nakfilak Zumalai nebe ema bolu conflito nee sai fatin dame nian. (crew)

Terço Missionário: Reza ba Knar Missão Sira Kreda Nian no ba Missionários Sira

DCDD ZUMALAI, Terço ou Rosário Missionário katak, oração terço ho finalidade oferece meio prático no símples reza ba knar missão sira Kreda nian no ba missionários sira. Iha viagem rosário missionário nee animador sira OPIAM nian fahe tiha labarik sira ba grupo 5 ou continente 5 hanesan continente América, África, Oceano, Europa no Asia, hodi lao ho distância dok hakonu ho rosário mai too iha paróquia. Hafoin remata terço Missionário nee, Dom Basilio do Nacimento hateten, Nai Maromak hameno hela ba ita nia beiala sira “Adão ho Eva” iha buat tolu; imi boot ba daudaun, imi barak ba daudaun, imi ukun mundo. Nee duni desde ita nia moris Maromak haraik hela knaar ida nee ba ita ida-idak liu husi ita nia beiala sira. Ohin loron ita nebe moris iha mundo nee halao nafatin lia menon nebe Na’i Maromak haraik mai ita nia beiala sira. Nee duni ita nia moris nee missão ida katak, ita moris hodi buka ita nia diak, maibe buat nebe importante liu nee atu hato’o Maromak, apresenta Maromak ba ema hotu-hotu.

Ba jovem sira imi keta haluha, imi keta hanoin katak ema la precisa imi. Santo Padre dehan; hau nee ema precisa hau. Amo Papa dehan; ida-idak iha nia moris buka hatene nia vocação. Liu husi vocação ida nee nia iha obrigação atu haraik ou hato’o Maromak nia Oin ba ema seluk. Hau hanoin iha loron tolu nia laran ita hotu halibur iha nee, mai husi fatin hot-hotu hodi halo buat balu; hasoru malu primeiro hanesan belun, fahe fiar nebe halo ita hamutuk Jesus Cristo no haboot mos ita nia conciência atu hatene katak, ita hot-hotu nee desde kiik iha missão ida to’o boot ita hotu mesak missionário. Ohin loron ho OPIAM nee ita aprende katak ita hotu mesak missionário. Missionário nee laos deit malae kulit mutin ka metan sira, maibe hirak nebe mai haklaken Evangelho ba mundo tomak. Amo Papa nia liafuan mak hanesan; ita nia moris nee existência ida, Ema precisa hau hau buka dalan nebe los liu atu hato’o Maromak nia liafuan ba ema seluk no ikus hatene tiha Maromak ba hau oinsa mak hau buka no Maromak ida nee ba ema seluk.

Iha sikun hanesan Dom Norberto do Amaral mos hateten, inportante ita ida-idak kiik ka boot atu hola virtude sira ba ita nia moris lor-loron nian, fiar nee tem que metin tanba ohin loron nee iha seitas bar-barak tama iha timor nee mai fahe supermi, osan no motor hodi habosok ema nia fiar. Iha momento nee mos ita reza ba labarik hirak nebe inan sira la tau inportância no liu-liu inan sira soe iha fatin-fatin. Tan nee hau husu ba feto sira nee atu hatene hadomi moris. Moris nee laos ita mak halo. Se feto ida halo sala ona buka atu labarik nebe iha ó nia isin nee labele oho, buka hakiak no responsabiliza moris nee didiak, tau prioridade Maromak nian as liu hot-hotu hodi halao ho responsabilidade tomak. (crew)

ZUMALAI SAI FATIN CONCENTRAÇÃO OPIAM

DCDD – ZUMALAI, OPIAM (Obras Pontifícias infância e Adolescência Missionárias) hanesan mahan ida hodi  tau matan no aconpanha oan sira, labarik hotu nia moris missionária (diocese, Paróquia, bairo, escolas). Tinan nee, Direção Nacional POM-TL decide hodi concentra atividade OPIAM nian halao iha Paróquia Nossa Senhora do Carmo Zumalai, diocese Maliana ho razão hodi comemora loron Missão Mundial. Tan nee, hahu husi loron 24 too loron 28 Outubro, OPIAM tomak husi Nacional no mos husi Diocese 3 hamutuk ho Diretor Missio husi Diocese tolu ninian concentra hamutuk iha Paróquia Nossa Senhora do Carmo Zumalai, Diocese de Maliana hodi comemora loron missão Mundial nian nee.

Iha missa abertura ba atividade OPIAM nian nebe acontece iha Quinta loron 25 fulan Outubro oras 7;00 dader nee, Dom Basilio do Nacimento bispo de Baucau iha nia reflexão hateten, Zumalai rai maten ida, rai maran, maibe iha loron rua ka tolu mai nee OPIAM sira husi Diocese 3 nee no mos labarik sira husi Zumalai ninian hamutuk iha nee hodi hanoin ituan kona ba ita ema nia moris hahu husi labarik kikoan sira to’o boot sira. Hanesan tinan uluk ita tuir ona iha fatin seluk no tinan ida nee ita halibur hamutuk iha Zumalai hodi canta, reza, tulun OPIAM sira oinsa hodi moris tuir Jesus Cristo, oinsa hodi saran sira nia fiar ba Nain Jesus Cristo. Nee duni aprende kedas desde kikoan kona ba saida mak Maromak husu ba ita atu halo.

Remata tiha Missa, Diretor Nacional POM-TL Pe. Mouzinho Pereira Lopes haktuir katak, Cerimónia nebe ohin ita sei halao durante loron 3 nian laran iha Paróquia Zumalai Diocese Maliana nee ita hanaran “Loron Missão Mundial Igreja Católica nian”. Cerimónia nee Laos celebra deit iha Creda Timor, maibe iha mundo tomak Santa Creda bolu hot-hotu nebe sarani ona hodi reconhece sira nia-an nu’udar missionário.

Diretor Nacional POM-TL Pe. Mouzinho Pereira Lopes haforsa tan katak, Iha timor ita celebra ona loron Missão Mundial ba dala 5 ona hanesan iha Estação Missionária Daisoli, depois Maliana ba iha Baucau, tuir mai iha Gleno, no tinan ida nee iha Zumalai, diocese Maliana. Ami consiente tebes hamutuk ho uma creda Timor nian atu halibur labarik sira iha evento missão missionária nian iha ita nia leet.

Diretor Nacional POM-TL Pe. Mouzinho Pereira Lopes quando ami hakarak atu OPIAM mai iha Zumalai bispo diocese Maliana rasik mos decide atu halo duni iha Zumalai ne’e. Nunee hodi lori estátua símbolo missionária nian “João Paulo II” mai to’o iha Zumalai ne’e hodi lao visita bairos sira, maibe iha grupo balun nebe hodi fatuk tuda hodi resulta labarik na’in tolu ka haat mak kanek todan. Iha altura ne’e amo pároco husu ba familia sira no conselho sira atu continua ka lae halo atividade tinan tomak iha ne’e no tetu ba tetu mai di’ak liu continua atu nune’e dame ne’e habelar nafatin mesmo que ema halo áat ba ita.

Fatin hanesan Pároco Paróquia Nossa Senhora do Carmo Zumalai, iha ocasião nee mos hateten, imi nia presença iha evento boot ida nee, imi mak sei nakfilak naran Zumalai babain iha nebe imi rona iha imi ida-idak nia fatin katak Zumalai conhecido ho fatin conflito no knuuk ba conflito. Maibe oras nee ho imi nia presença imi sei nakfilak tiha naran ida nee sai fatin unidade, paz no hakmatek nian husi missão kikoan sira nia creativa. Nuudar pároco husu ba sarani tomak nebe mak hamutuk iha nee hodi simu kikoan oan sira mai husi Diocese tolu nee ninian husu atu imi mak sai inan-aman, maun no bin ba labarik oan sira nebe mai husi diocese 3 nee nian. Wainhira ita halao didiak ida nee ita sei hamorin naran zumalai nee iha fatin seluk. (crew)

Ó HATENE KARIK MAROMAK NIA PRESENTE!!!

DCDD – DILI, Família boot Congregação Hermanas Carmelitas iha Timor-Leste, segunda-feira, loron 15 fulan Outubro tinan 2018, haksolok hamutuk ho Irmã Balbina dos Santos Valentin, H.Carm no Irmã Armanda Maria Madalena Canossa Maia, H. Carm, nebe hakat tan passo ida ba Profissão Perpétua. Dom Basilio do Nacimento bispo de Baucau be preside celebração nee iha ninia reflexão sira hateten, Ohin ita acompanha Ir. Balbina no Ir. Armanda iha sira nia profissão Perpétua, katak sira tuir Jesus Cristo to’o mate liu husi dalan vida consagração nian tuir projeto de vida congregação de Órdem Carmelita.

Congregação Carmelita tama iha Timor iha tinan 1974, nebe Espanhola nain haat mai housi rai nebe dook hodi loke Congregação nee. natoon ne’e iha ona Congregação Canossiana ho Dominicana sira. Depois Dom José lori Congregação ida ne’e mai iha licidere. Nee duni,iha tinan haat nulu resin nia laran ona Congregação hahu boot ba daudaun, barak ba daudaun, buras ba daudaun e ohin loron mos housi Congregação hun iha Timor hadaet mos sanak ba too Indoneseia. Ne’e duni Maromak nia presente ba congregação Carmelita wainhira labarik feto balu sente Maromak nia bolu hodi hatan hanesan ne’e, Maromak nia presente ne’e liu-liu Congregação Carmelita fo graça ba Na’i Maromak tanba Na’i Maromak haraik presente ne’e ba ita boot sira no ohin loron imi hirak nee iha obrigação atu haboot, haburas Maromak nia presença liu husi imi nia vida.

Dom Basilio do Nacimento haforsa tan katak, ho voto perpétua ida ne’e, Ir. Armanda ho Ir. Balbina hatan ba Maromak nia presente haraik ba sira nain rua. Ohin ita assiste presente rua ne’ebe troca entre ema nain rua, katak Maromak haraik nia presente ba Armanda no Balbina hanesan moris no sira nain rua hato’o presenta sira nain rua nia vida hanesan presente ba Maromak. Quando ita to’o iha compreensão ida ne’e katak vida hot-hotu, particularmente vida consagrada, vida religiosa ne’e sai hanesan presente nebe ema rua troca ba malu, então ita compreende buat balu ne’ebe iha ita nia vida consagrada nian, ita nain rasik mak lacompreende karik, mesmo liu-liu ba ema nebe haree mai ita ne’e lacompreende liu.

Dom Basilio do Nacimento reforsa tan katak, Vida consagrada ne’e sai consequência ida, primeiro encontro ida iha vida hodi lao ho mata ben, contente, tanis, ho descoberta oin-oin, ho valorização oin-oin laos buat todan deit mak ita hetan iha vida consagrada nian, maibe ida ne’e sai hanesan concequência encontro inicial ou encontro pessoal ida. Ne’e duni, Maromak nia presente ida ne’e hamutuk ho sira nain rua nia presente, sira nia moris ba Maromak liu husi descoberte ida. Então presente rua ne’e han malu, compreende malu, então ita haree buat lubuk ida iha vida consagrado nian, vida orasaun lor-loron, vida sacrifício lor-loron, vida santidade lor-loron, vida de espiritualidade lor-loron, vida selibatu lor-loron no vida hotu tanba haree Maromak nia presente folin iha ita nia moris, ita mos apresenta ita nia vida ne’e hanesan folin boot ida biar husu risco lubuk ida, maibe biar nune’e ohin ita hare feto ho mane lubuk ida ho laran tuir Jesus Cristo. (Reportágem Januário-Fidélia)

Precisa Matenek ida nebe Neon Nain hodi Hamtauk Maromak

DCDD-SOIBADA (14 de Outubro 2018), Dom Norberto do Amaral bispo de Maliana iha missa encerramento ba Peregrinação Nacional iha Paróquia Sagrado Coração de Jesus Soibada “Santuário Nossa Senhora Aitara” nee nia hateten, Timor ohin loron ita iha matenek bar-barak, maibe saida mak acontece! ema ohin loron nian tau nia interesse as liu fali Maromak nian. Tuir lolos tau Maromak nia interesse mak as liu. “Hamtauk Maromak ne’e mak matenek bo’ot liu mak ida ne’e”. Maibe ita halo contrário ita foin mak halo de’it S1, S2 no S3 nia mak hatene ona buat hotu-hotu. Tan ne’e ita precisa matenek ida nebe hatene neon nain hodi hamtauk Maromak.

Ne’e duni, Jesus oferece Nia isin rasik, nebe fo função ba ita atu ita neon na’in nudar Maromak oan lolós, nu’udar ema nebe hetan moris foun ho presença Jesus Cristo iha mundo rai-klaran, transforma buat hot-hotu tuir buat nebe Maromak nia hakarak, atu ita iha entusiasmo, corágem no alegria.  (Reportágem Marta)

Timoroan nia conciência hahu mihis

DCDD-Soibada (14/10/2018), Presidente Conferência Episcopal Timorense atual bispo de Baucau Dom Basilio do Nacimento dehan lia hirak nee baseia ba realidade nebe oras nee mosu iha ita nia rain liu-liu ba ato inan sira soe bebe no oho malu nebe oras nee mosu daudaun iha território timor laran tomak.

Baseia ba ato hirak nee, Dom Basilio do Nacimento hateten, Maromak nia ukunfuan lima katak, keta oho keta halo at ema. Atu oho labarik kiik oan ida ou ema boot ida, oho ne’e oho katak sala. Agora direitos humanos nian mak mai troca oituan ema nia conceito hodi hanorin katak, labarik quando sidauk to’o fulan tolu ne’e seidauk ema. Hau hakarak dehan, be labarik ne’e moris iha inan nia knotak ka labarik ne’e quando seidauk liu fulan tolu ne’e labarik ne’e laos ema? nebe inan ida kous ne’e bele oho, bele buti mate nia, bele hemu ai moruk hodi halo abortu. Maromak nia ukunfuan hateten katak desde que esperma ho ovum hasoru malu ne’e ema hahu iha nee, maibe ohin loron organização internacional hirak ne’e mai hatama sasan lubuk ida iha ema nia ulun hodi estraga tiha timoroan sira nia conciência. Maibe hau la hatene quando sira hahu ne’e sira ema ka sira laos ema. Oho ne’e sempre oho, mate ne’e sempre crime, se justiça lakohi tesi lia husik ba, maibe iha Maromak nia oin halo buat hirak ne’e sala, uluk sala, ohin sala, aban bainrua quando ita hirak ne’e mesak ruin lahuk hotu ona sala nafatin. (Reportágem Marta)

Peregrinação:La’o rai ida iha rai ba hasoru Maromak

DCDD-Soibada (13/10/2018), Liafuan peregrinação katak la’o rai. ita ema moris ne’e desde sai husi ita nia inan nia knotak, ita la’o hodi buka hetan ita nia an, maibe mos ita la’o iha mundo ne’e ho buat hotu nebe ita halo ba ita nia an, maibe ita la’o liu-liu buka ita nia hu’un no ita nia hu’un mak Maromak. Hanesan ita hotu hatene, katak iha loron quarta-feira cinzas nebe tau ahukdesan iha ita nia rentos hodi dehan, o rai rahun o sei fila fali ba rai rahun. Tenik bispo Baucau Dom Basilio do Nacimento wainhira celebra 13 de Outubro iha Soibada.

Bispo Basilio haklean katak peregrinação hakarak dehan atu convida ema ida-idak, liu-liu sarani sira atu bainhira la’o iha rai ne’e buka sasan ba an, maibe tem que buka liu-liu ba hu’un mak Maromak nebe Uma Creda tau tempo sira hanesan ne’e ho naran peregrinação hodi dehan ita ema la’o rai buka buat nebe di’ak ba ita, maibe liu-liu buka Maromak. (Reportágem Marta)