shadow
Diocese de Dili > NOTÍCIAS > Notícias

Ema Desconhecido Estraga Igreja Comoro

DCDD DILI – Quinta feira foin lalais ne’e, equipa reporter ITE tenta dadalia ho Padre Elias de Deus nu’udar Pároco Paróquia Maria Auxiliadora Comoro hodi hatene kona ba ação nebé ema desconhecido balun halo Iha Igreja Comoro hodi tama no estraga Igreja no foti mos sasan balu nebé iha Igreja refere.

Tuir Padre Elias de Deus nu’udar Pároco haktuir katak: Acontecimento ne’e acontece iha Dominggo madrugada (26/02). Bainhira ha’u sei toba hela Sacristão telefone mai ha’u hodi imforma katak: iha ema ruma tama hodi estraga sasan iha Igreja laran. Pe. Elias hatutan tan: Sacristão nebé nia mai atu prepara sasan ba primeira missa nian (7:00) Htl, nia descobre katak sasan iha nia fatin ne’e iha buat ruma sabraut, liu-liu surat tahan sira nebé nia rai em ordem hela monu hela iha rai no mos iha parte nebé tau sasan sira ba decoração nian hanesan; hena no mos fatin colecta nian monu tun namkari hela iha rai. Tamba ne’e sacristão ne’e descobre katak; iha ema ruma tama hodi sobu sasan sira, haktuir Pe. Elias iha ninia Residência Paroquial Comoro, (02/03).

Pe. Elias mos reforsa tan katak: los duni katak ema ne’e tama hodi sobu sasan sira ne’e no halo passa revista ba fatin hotu iha Igreja ne’e nia laran. Ema desconhecido ne’e ita bele dehan Na’okten tamba nia tama iha ema hotu-hotu toba atu buka osan, maibé, nia la consege hetan osan, tan ne’e nia sai housi Sacristão nia fatin, nia mai iha Estátua Nossa Senhora nian tamba iha nebá iha caixa esmola Na’in Feto nian, maski nia tenta atu loke, maibé, nia la consege tan ne’e nia husik hela, maibé hanesan sasan sira nebe hanesan Dominggo uja hodi halibur colecta sira, nia passa revista hotu hodi halo soe tun no soe sae, maibe iha nebá laiha osan iha nebá.

Pe. Elias haktuir tan katak: iha momento nee tanba ami prepara atu missa e depois de missa mak Polícia Investigação nian mos mai kedas no foti dadus no hare sasan sira namkari hela. Entre ema desconhecido ne’e ida mak husik hela nia sapatu sorin iha Igreja laran. Tan ne’e ha’u hanoin katak; ema hirak ne’e la’os mai mesak, parece sira mai ho grupo. Groupo ruma organiza an atu buka moris ho maneira naok tanto iha fatin nebé sira ba hanesan loja, uma inclui mos Igreja sira.

Relaciona ho acontecimento ne’e Pe. Elias de Deus relata mos tan katak: Ami mos iha ne’e colabora diak ho parte singurança nian, iha momento nebá tamba iha missa avisa, depois de primeira missa ne’e Polícia sira to’o kedas iha fatin acontecimento hodi halo análiza no halo mos teste Silik Jari ba bu’at nebé mosu, atu nune’e bele descobre no identifica se mak halo bu’at ne’e atu nune’e bele processa tuir lei nebé naok no estraga ema nia sasan sa tan tama iha Igreja.

Pe. Elias mos recomenda ba sarani sirak katak: Husu ba maluk sarani sira hotu atu cuidadu no atenção tanba iha ita nia sociedade agora nee iha groupo oin-oin; grupo balu hari ho intenção atu contrubui ba bu’at nebé di’ak atu tulun ema no halo bu’at di’ak, maibé, iha grupo balu mos sira estabelece grupo ne’e atu na’ok, asalta, estraga, ha’u la hatene tamba ha’u rona mos uluk katak iha Igreja iha Dili laran mos na’ok ten ka groupo descoinhecido sira ne’e tama hodi buka sasan sira liu-liu osan. Tan ne’e, ha’u husu ba inan aman sira atu movel iha família no bairo hodi tau matan ba oan sira nebé Jovem ona hodi hatene didiak labarik sira nia paradeiro iha tempo nebé sira movimento sira nia an, iha sa horas mak sira tenki iha uma no mos iha sa horas sira bele la’o, se sira la’o karik tenki hatene sira la’o ho se no ba nebé, atu nune’e bele identifica ou bele servisu hamutuk, tamba sira nebé tama iha Igreja ne’e la’os ema fuik no le’et nebé nunca hatene fatin, maibé, ema hirak ne’e hatene ona Sacristão nia fatin iha nebé, sira hatene ona Caixa Esmola iha nebé, ne’e sinal katak ida ne’e la’os ema seluk, maibé, ema ida nebe hatene diak Igreja, laos ema hela dok, laos ema matan foun ka matan tomak nebé, maibé ema nebé ita bele dehan hatene Igreja ida ne’e. (C/a)

Horta : Boa Sorte ba Candidato sira

DCDD DILI – Eis Presidente e Laorie Prémio Novel da Paz iha nia mensagem ba Candidato Presidencial relaciona ho loron marça da Paz nebé realiza housi Bispo Dili no Comissão Justiça e Paz, iha biban ne’e nia hateten: Ha’u rona amo Bispo nia mensagem nebé hateten, ita hotu-hotu sarani ka la sarani, nu’udar ema nebé iha kakutak, iha fuan no iha ulun; ita nia obrigação atu contribui ba nação ne’e atu moris hakmatek. Ha’u agradece no fo parabens ba ba amo Bispo no ba Comissão Justiça e Paz nebé halo iniciativa ida ne’e, wainhira ita tama iha tempo eleição Presidencial e Parlamentar, dehan Eis Presidente José Ramos Horta iha Jardim Lecidere Dili, (02/03).

Horta reforsa tan katak: Eleição ida nebé mai ou mandato ida nebé mai 2017-2022, ita bele hateten katak: importante teb-tebes ba ita nia nação nia desemvolvimento, atu haklean dame iha Nação ne’e para sai cultura dame, cultura Paz iha nação ne’e, para haklean Instituição Estado tamba iha 2022, Geração 1975 hakarak ka lakohi, ita haré que ami ses an ba sorin ou ba kotuk para Geração foun kaer todan, continua missão nebé ami hahú iha 1975 tuir Saudoso Francisco Xavier do Amaral, Nicolau Lobato nia liderança to’o ohin.

Horta hateten: Iha 2022, liderança 75 labele entrega ba geração foun Estado ida que sidauk iha abut metin, Democracia que sidauk iha abut metin. Labele entrega ba geração foun Estado ida que nia Instituição Presidente da República, Parlamento Executivo poder Juridicial, Instituições Sigurança, Polícia, F-FDTL sidauk profissional 100% sidauk acontece ne’e geração 75 sala.

Horta declara katak: Ami nia obrigação todan teb-tebes iha ami nia kabás, iha tinan 5 mai ne’e, servisu ho sociadade tomak, ho Partido sira hotu-hotu, ho Líder sira hotu, ho Igreja, Sociadade Civil, Unidade Internacional para que iha 2022 Timor Leste Nação ida forte e Instituição forte, Dame klean tama iha abut. Tamba ne’e, eleição mai ne’e importante teb-tebes no iha fulan oin mai mos importante teb-tebes.

Horta mos garante katak: Ha’u la ta’uk no sem preucupa sei iha violência ka lae tamba Líderes sira hatene ida-idak nia responsabilidade. Militante no apoiante Partido sira nian iha obrigação atu rona mensagem mai housi Líder sira para labele halo violência. Ha’u hatene no fiar tamba iha tinan 15 ona iha ita nia exercício Democracia, Violência práticamente laiha maski iha ituan acontecimento isolado iha ne’e dalaruma de’it. Tensão bo’ot mais ne’e normal, quando iha debate, comfrontação ideias ne’e acontece iha tensão, mais ho tensão labele fakar liu ba violência e ne’e quase que nunca acontece.

Horta mos esplica katak: Timor nia naran bo’ot iha liur, tinan 5 nia laran ne’e que ha’u se’es an housi Presidente da República ba servi ho Nações Unidas iha África no ba iha Colómbia, ba visita Jordania Campos Refugiados ida iha nebá; ema housi Síria e ema hotu-hotu husu bei-beik exémplo Timor-Leste nian; oinsa mak Timor-Leste halo transição ba Democracia, sira husu oinsa Timor-Leste halo sucesso Reconciliação Nacional, reconciliação ho Indonésia depois de 24 iha comflito; iha Comferência no Palestra sira ha’u esplica ba sira e sira hakfodak.

Tan ne’e, Timor tenki continua sai exemplo ida nebé que di’ak e ha’u hatene Líder sira tu’ur iha ne’e nebé Candidato ba Presidente nebé ha’u respeita, ha’u hatene; sira sei tuir ita hotu-hotu nia fiar iha sira que campanha mai ne’e sei la’o di’ak, Presidente nebé povo sei hili iha fulan ida ne’e mai, nia sei continua ho nia kbi’it, ho força, ho visão no matenek atu contribui para eleição Julho mai ne’e mos la’o di’ak tamba iha 20 de Maio, 19 de Maio meia noite sé tuir karik hanesan 2012, cerimónia sei halo iha 19 de Maio iha Tasi-Tolu, nia continua missão nebé hahú ho Maun bo’ot Xanana nu’udar Primeiro Presidente iha 2002. Parlamento foun no Governo foun sei continua bu’at nebé di’ak Governo halo desde 2007-2012 to’o ohin. Bu’at nebé di’ak ita haklean, hametin di’ak liu tan, hadia di’ak liu tan, e bu’at nebé la di’ak nu’udar humano, ita haré saida mak sala ita corige; ne’e iha rai hotu nune’e e ita nia experência mos nune’e. (C/a)

Kalohan : Fuan Mós, Sei La Fó Fatin Ba Qualquer Violéncia Iha Comunidade no País ida nia Laran

DCDD DILI – António da Conceição “Kalohan” sai nu’udar pessoa ida nebé representa Candidatos nain 8 hodi hato’o discurso iha Jornada da Paz ne’e hateten: Uluk nanain hakarak hato’o hau apressiação bo’ot ba Comissão Justiça e Paz Diocese Dili nian servisu hamutuk ho Governo, Organização Sociadade Civil, PNTL no Organização Internacional sira seluk organiza Jornada da Paz ba tinan 2017 antes tama ba Eleição Presidencial no Parlamentar nebé sei hala’o iha tempo badak. Nu’udar Candidato ba Presidente da República ida ba periodo 2017-2022, ha’u louva tebes iniciativa ida nebé Genuina no hodi mantein Paz no Estabilidade ba povu no rai doben ida nee. Ita nia funu ba ukun rasik an hatudu ita nia desejo no ita hakarak atu moris hakmatek, atu ema ida-idak livre halao nia moris sem iha ta’uk, sem iha resseio, sem opressão no sem iha intimidação.

 

António da Conceição comfessa katak: Evento ida ne’e halo ba dala 2 ona. “Nudar sarani, hau mos comunga princípio nebé Comissão hili nu’udar tema ba Jornada da paz ne’e katak: wainhira ita nia fuan mos, sei la fó fatin ba qualquer Violéncia hodi bele mosu iha comunidade nia le’et iha País ida nia laran. ita hotu nia mestre bo’ot Jesus Cristo rasik hanorin; “hakribi violénçia”. Ida ne’e tenki mai duni housi ita nia fuan”. Quase figura sira naran bo’ot iha mundo, sempre kaer metin princípio ida nee: “Violéncia nunca resolve bu’at ida, maibé, Violénçia maka cria tan de’it problema foun. Gandhi  sempre consistente ho princípio ida nee: “Dame hahú housi ita nia fuan ka laran rasik, ita ema nia nia dignidade la’os determina housi violéncia, maibé, housi ita nia fuan nebé mos no hahalok nebé lós. Violéncia so bele hamosu tan de’it violéncia seluk, maibé Paz no Domin sei contribui maka’as tebés ba Dezemvolvimento Humano, Sócio Cultural no Económico”.

António da Conceição reforsa tan katak: Nu’udar sarani hau tenki temi iha ne’e, saida mak loron ba loron Igreja nia hanourin ba nia sarani sira: “hadomi ema seluk hanesan o hadomi o ni an rasik”. Ida ne’e hatudu katak: Hanesan ema, ita labele sés housi domin no dame basá dehan: “Kasih dan Damai”. Domin ba ema seluk nu’udar ita an rasik, nu’udar alicerce ba ita hodi hakkribi violéncia iha forma oin saida de’it. Iha início tinan ne’e, Amo Papa Francisco iha celebração tinan 50 loron Mundial ba Paz nian cita lia-fuan murak housi Beato Papa Paulo VI no São João XXIII nebé ko’alia kona ba Paz no dame. Beato Papa Paulo VI hateten: “A Paz é a única diração verdadeira do progresso Humano e não as tenções causadas por nacionalismos ambiciosos, nem conquistas pela Violéncia, nem repressões que sirvam pilar para uma falsa ordem sivil”. Nune’e mos São João XXIII hateten: “O sentido e o amor e a Paz fundada sobre a verdade, a Justiça, a Liberdade e o Amor”.

António da Conceição hateten tan: Lós duni, dame no paz mak dalan único ba desemvolvimento humano. Domin, dame no paz tenki hatur iha lia lós, Justiça, liberdade no iha domin nee rasik. Nu’udar Político no mos nu’udar sarani; valores sira ne’e tenki incarna duni iha ita nia fuan. Ha’u fiar katak; entre ami Candidato sira ne’e, sei laiha ida mak hakarak hasés an housi valores sira ne’e. Tamba ne’e, ami tenki compremete duni ami nia an hodi hakribi violéncia no tane as domin, dame no paz iha ami nia fuan. Nunee mos ami ida-idak tenki husu no oriente ba população tomak hodi banati tuir valores domin, dame no paz hodi hakribi violéncia.

António da Conceição relata tan katak: Depois de 2012, ha’u observa katak: maioria housi ita nia população maski iha grupo kiik oan balu sei imvolve an iha violéncia, hakribi ona violéncia no promove ona domin, dame no paz iha moris lor-loron. Ita observa katak: dala ruma Lider Político sira han malu, maibé, população bai-bain fatin nafatin hakmatek. situação agora hatudu katak: Timor-Leste moris ona iha hakmatek nia laran. Maski nune’e, ita tenki louva nafatin iniciativa Igreja no organização sira nebé hola parte iha iniciativa ida ne’e, hodi organiza Jornada da Paz ne’e. Paz no Dame la’os mosu de’it housi lalehan, maibé, tenki hetan liu housi iniciativa genuina sira hanesan agora daudaun, atu nune’e, luta ba poder nebé atu hetan liu eleição Prezidencial no Parlamentar ne’e sai duni poder ida hodi servi povu no iha base moral ida nebé forte.

António da Conceição dehan: Iha contexto campanha nian, ha’u simplifica iha ha’u nia motto “Ba Ó Timor, Ha’u Maubere Oan Pronto Serbi”. Nune’e iha loron jornada da Paz nebé ita hala’o dau-daun hamutuk ho Candidato sira seluk, hau promete lori ami nia naran atu ami sei hakribi Violéncia, ami nia lia fuan sei promove paz entre ami no ami nia seguidores sira, ami nia mensagem sei nafatin tau as interesse Nação nian no hau pessoalmente sei buka atu halo tuir ha’u nia presidente Saudoso Fernando Lasama de Araujo nia lia menon bainhira nia hakarak hola decisão ruma no nia dehan ha’u cita: “Hau nia dignidade la as liu dignidade nação nian”. Ami hotu sei buka duni atu cras moris hakmatek ba ema hodi hare interesse nasional  no saida mak ita nia mehi nain sira mehi ona ba Timor-Leste.(C/a)

DOM. BASILIO HALO LANÇAMENTO PRIMEIRA PEDRA BA ESCOLA MÚSICA IHA FATUMETA, DILI

 

DCDD, DILI – Dom Basilio do Nascimento hateten “Escola mak instrumento diak ba nação”. Lia hirak ne’e, hafoin de halo lançamento primeira pedra ba escola de música nebe sei sai hanesan laboratorio músico nian ba iha Timor Leste. Cerimónia ba lançamento primeira pedra ne’e halao, iha Fatumeta-Dili, Sábado 18/ 02/ 2017.

Reitor ISFIT, Pe. Domingos Alves da Costa, iha nia discurso hatete agradeçe tebes ba lançamento escola de música ne’e, basa mehi ne’e kleur tiha ona. “Plano atu hari escola música ne’e kleur ona, wainhira ita foin hamrik hanesan nação”, dehan Pe. Domingo. Nia hatutan tan hanoin ne’e mosu, wainhira ho apresentação música orquestra husi maestro Simião Barreto ho nia equipa iha Taci-Tolu. Nebe atraiente tebes. Husi ne’e,  Sr. Xanana Gusmão, Bispo Ricardo da Silva (matebian) no Sr. Simião Barreto (maestro), sira hahu koalia ba malu atu oinsa mak loke escola de música. Ho esforço boot nebe parte hotu halo, iha loron 18 de Fevereiro de 2017, escola de música ne’e hetan duni lançamento primeira pedra husi Presidente Comferência Episcola Timorense (CET), Dom Basilio do Nascimento. Padre Domingos Alves hatutan tan ho cooperação nebe ita hotu fo ba hari escola de música ne’e, bele educa diak liu tan ita nia joven sira iha arte no música nian. “Igreja fo ninia contribuição ida ne’e, fo nia rai, estado fo nia ajuda, ita hamutuk ba hodi halo obra ida ne’e sai realidade, em favor dos jovens no desemvolvimento talento musical iha rai Timor Leste”, afirma Pe. Domingos Alves. Iha sorin seluk, Presidente Comferência Episcopal Timorense (CET), Dom Basilio do Nascimento hateten, infraestrutura ida nebe diak liu ba nação mak Escola. “Quando loke escola, hau hanoin bebeik dehan infraestrutura ida nebe diak liu ba nação ida mak nia escola, tamba liu husi escola fo biban atu, ema ida-idak bele hetan instrumento ida hodi usa iha vida”, dehan Dom Basilio. Nia hatutan tan, escola loke matenek, atu depois ema ida-idak    usa nia matenek ne’e, hodi hetan possibilidade atu moris. Nia esclareçe tan, caridade dura durante tempo oan ida, NGO sira halo diak ba ema quando osan iha e quando iha disponibilidade. Maibe quando escola fo biban atu ida-idak hetan posibilidade hodi dulas nia kakutak ou hasai husi nia possibilidade buat nebe nia precisa hodi usa iha vida. Enquanto relaciona ho escola de música ne’e, Dom Basilio hateten timoroan sira, arte ne’e, capacidade inata, só que indisciplinado em ordem. Basa tuir Dom Basilio katak difinição música ne’e, é um conjunto de barrulhos agradáveis ao ouvidos, enquanto timoroan sira nain lima ou ne’en, tur hamutuk kanta, significa um conjunto de barulho, sim, mas desagradáveis ao ouvidos. “Quando ita nia joven sira kanta, barulhos, sim senhor, maibe baixo deit mak funciona. Nebe definição música nian nebe agradável ao ouvido ne’e, sai buat desagradável bot ida’’, Dehan Dom Basilio. Ho lançamento escola de música ne’e, presidente CET ne’e, iha esperança katak escola ne’e, atu pelo menos hanorin alunos sira, hirak nebe frequênta, atu disciplina ho capacidade inata nebe moris ho timoroan ida-idak. Fo biban atu disciplina capacidade nebe ida-idak iha katak buat ida arte ne’e, laos deit expressão qualidades inatas, maibe qualidade inatas ne’e, sai hanesan dom Maromak nian, nebe liu husi aperfeiçoamento hanorin hirak nebe hetan iha uma ida ne’e. Companhia nebe responsabiliza konaba obra ida ne’e, mak Tali Sahe, orçamento ba hari uma ne’e mai husi Governo ho montante um milhão e tal. Duração ba obra ne’e, fulan 18. Participa iha lançamento ne’e, Secretário Estado Coordenador ba Assuntos Sociais e Ministro da Educação, sociedade civil, Secretário Estado das Mulheres, Naillik sira no comvidados sira. (N)

PARÓQUIA ATU BURAS PERCISA COOPERAÇÃO

 

DCDD, ERMERA – Sábado 12 de Fevereiro 2017, Dom Virgilio do Carmo da Silva hamutuk ho Cúria Diocese Dili fó Tomada de Posse ba Pe. Deonildo de Andrade hanesan Pároco ba Paróquia Ermera.

Dom Virgilio hateten: Amululik sira quando Ordena, sira promete atu obedece. Nee duni Obidiência nebe halo iha loron Ordenação ninian, Nailulik continua fiel iha liafuan ida nee quando husu atu halao knar  foun, amo la registe, pronto atu assume cargo foun ida iha Paróquia ida. Nailulik ida halao knar iha Paróquia significa nia representa Diocese nebe mai hela iha nee, nia representa Bispo iha Paróquia ida, nia representa Amo Papa no nia representa Cristo iha Paroquia ida.

Dom Virgilio reforsa tan: Quando hili Pároco ida, laos Pároco nee tun husi Lalehan mai nebe hatene buat hotu-hotu, maibe Pároco nee ema ida, masque mai ho ninia matenek, mai ho ninia experiência sira, maibe laos dehan katak perfeito. Nia iha ninia limitações no Iha ninia fraqueza mos. Tan nee, precisa mos atu sarani sira atu colabora hamutuk hodi hari no hametin Paróquia ida.

Dom Virgilio declara katak: Nudar Bispo Diocese Dili besik ona tinan ida, dala barak hau simu nafatin mensagem anónimo dehan sarani balu sente contente ho ninia Pároco, maibe husi kotuk haruka mensagem ba liu Bispo. Se ita sente duni ida nee ita nia Paróquia, ita nia Pároco, ida nebe ita hakarak atu hadia, se buat ruma lao lalos, ita buka dalan atu rezolve hamutuk. Rezolve nee laos murmura husi kotuk, halo propaganda husi kotuk liu husi Facebook, mensagem sira tama iha Jornal ema hotu hatene, maibe ema nee rasik lahatene buat hirak nee.

Dom Virgilio recomenda tan katak: hau husu ba sarani sira buat ida nee deit katak “ita nia Cooperção”. Buat ruma lao lalos karik husi amo sira ita loke liman, loke matan, loke fuan ba malu, koalia ba malu ho haraik an ho ita nia simplicidade, tanba ita hotu hakarak diak ba sarani nian, Creda nian, rai doben ninian, liu-liu rai Ermera ninian.

Iha sorin seluk, Administrador Paroquial Pe Recardino Mendonça Castro haktuir katak: Hau iha hau nia missão, hau conciente katak Maromak bolu hau atu halo buat ruma no buat ida hau halo ne’e mak hau nia knaar oinsa atu hau hakasan atu moris tuir hau nia votos sira nudar Nailulik, obedece ba provisão nebé fo katak ida ne’e comfiança ida husi Diocese atu hau bele halo buat ruma liu-liu atu lori sarani sira atu ba conhece se mak Cristo.

Pe. Deonildo de Andrade nudar Pároco foun Paróquia Ermera nian mos salienta tan katak: Uluk hau mai hanesan Vigário Paroquial hau dehan ona katak ”Hau mak nee”. Ita precisa kaer ba Bispo nia liafuan nebé ohin sublinha ona katak: buat ida atu lao diak temque iha comunição, temque iha diálogo. Nebé ita hakarak Paróquia Ermera nee lao diak, labele iha Padre Pároco nia kabas deit, maibe iha ita hotu nia kabas. Ita mak temque rona malu, ita fo ideia ba malu, ita hare ida nebe mak diak ita hotu-hotu fo liman atu halo diak. Além nee’mos Pe. Deonildo de Andrade hasae mos nia lian agrdecimento ba Pe. Recardino nebe hanorin no fo exemplo barak too ikus mai hodi hamrik hanesan Pe. Pároco de Nossa Senhora de Lurdes Ermera. (CTDD+ITE)

DIOCESE DILI ESTABELECE ACORDO PROGRAMA RELIGIOSO HO RTTL,E.P

 

DCDD – Segunda feira, 04;00 Htl, Diocese Dili hamosu tan história foun ida atu estabele comversão ida entre Diocese Dili ho RTTL ep hodi serviço hamutuk iha programa Religiosos nian hodi transmite imformação ba Comunidade sarani kona ba Maromak Nia Futar Liafuan. Evento nee realiza iha Câmara Eclesiástica Dili nebe participa husi Bispo de Dili Dom Virgilio do Carmo da Silva, Sua Exelência Secretário de Estado da Comunicação Social Nélio Isaac Sarmento, Presidente RTTL,E.P Milena Abrantes.

Bispo hateten katak: Particularmente Diocese Dili sente orgulho tamba tinan ida nee ami hahu Pastoral Diocese nian ho Maromak Nia Liafuan. Ho serviço hamutuk ida nee maneira diak ida e hau concorda ho Sua Exelência nebe ohin dehan ida nee nudar passo ba dala uluk nebe ita halo no sei iha momento nebe karik ita bok ituan no fiel ba buat nebe ideal, maibe buat diak mak ohin ita hakarak estabelece acordo nebe ita hanoin hamutuk, masque monu mos ita sei lao ba oin no acordo nee sei kaer metin. Depois de Um ano mak ita hare hodi halo fali avaliação ida hodi hare fila fali buat nebe diak ita halo diak liu tan no buat hirak nebe ladun diak ita buka atu corige.

Bispo haforsa tan katak: ho acordo ida nee Ida nee bele fo retorno boot ba iha parte hotu, tamba hakarak comunica ba iha ita nia sociadade, ba ita nia sarani sobre Creda nia missão e liu-liu Cristo ninia missão. Liu husi meios Comunicação ida nee ita hakarak atu comunica buat nebe Creda nian tamba Jesus rasik comunicadora ida, Nia uja meios oi-oin hodi comunica, hodi conta história, aiknanoik, Ninia discurso, maneira ida nee iha tempo Jesus nian mak ita hare ohin loron ita iha atu atrai ita ninia ouvintes sira.

Iha biban hanesan, Secretário de Estado da Comunicação Social Nélio Isaac Sarmento iha nia discurso mos declara katak: Ami contente teb-tebes atu estabelece programa ida nee ho Diocese Dili tamba ita hatene agora dadaun ita tama ba tinan ida nebe tecnologia de imformção e ita nia população mos precisa imformação hodi hametin sira nia fiar liu husi programa sira Televisivo nian. Iha Concordata nebe mak Igreja ho Estado halo iha neba parte balu mos koalia kona ba Estado nia obrigação atu fo espaço Comferência Episcopal hodi divulga imformação sira nebe relaciona ho Religão Católica. Tamba nee espaço ida nebe ita foin hahu e hau espera katak ida nee hanesan iniciativa ba dala uluk maibe depois ita lao neneik ita sei hetan objectivo lolos nebe mak ita hakarak hato’o ba ita nia sarani tomak.

Nélio Isaac iha ocasião nee mos hateten: Agradece ba amo Bispo ba iniciativa diak ida nee, e ita espera katak ho programa hirak nebe mak Diocese sei produz, hau fo comfiança tomak ba equipa sira nebe serviço iha Diocese ninian tamba hanesan hau sempre dehan bebeik ami fo hela espaço hakarak produz programa sira nebe iha relação ho Católica, maibé ami laiha específico no la domina kona ba Maromak Nia Liafuan, maibe ami iha capacidade atu halo buat nebe mak simples hodi divulga imformação nebe mak ita hakarak hatoo ba iha sarani sira liu husi Canal Rádio no Televisão.

Presidente RTTL,E.P Milena Soares Abrantes mos hateten: Acordo entre RTTL, E.P no Diocese nee rasik foca liu ba iha programa hametin fiar no mos ba TalkSow nebe mak hatoo aspiração ruma nomos iha audiência ruma nebé mak sei participa iha Tolk Show nee.  Ami hakarak nee Talk and Show atu iha neba bele iha música ruma bele anima. Dala barak iha público hakarak mos atu rona liafuan murak sira husi Bispo sira atu bele refresca tamba tinan ida nee tinan todan tebes ba ita hotu katak Festa Democracia.

Relaciona ho programa sira Presidente RTTL,E.P hateten: Ida nee husi parte produtório sira nebe mak sei halao iha Dominggo e tempo mos iha nee sidauk decide claro tamba husi prte Diocese no mos produtorio sira sei hare fila fali atu termina ba loron saida mak sei hatun, maibe ida nee bajeia ona ba acordo nebe mak ohin halo hahu ona realiza programa hirak nee. Husi contiudo programa Diocese mak sei produz no sei cooprea hamutuk ho RTTL,E.P.(C/a)

 

 

 

 

CARTA PASTORAL CONFERÊNCIA EPISCOPAL TIMORENSE BA ELEIÇÕES 2017

DCDD – Iha tinan 2017, Timor-Leste celebra nia tinan 15 nu’udar Estado Independente iha comunidade internacional nia le’et. Estado nebé  hari’i nia-an  iha milénio foun ida História Universal nian. Proclama tiha independência iha tinan 1975, maibé wainhira Comunidade Internacional reconhece ita nia estatuto ida ne’e iha 20 de Maio de 2002, maka ita foin hari’i ita-an nu’udar Estado Independente no soberano, hanesan Nação hot-hotu iha mundo.

Tinan ida ne’e mós, Timor-Leste sei halao nia exercício democrático liu husi eleições ba dala tolu, kona ba eleições ba Presidente da República, no ba eleições parlamentares ka legislativas. Katak ita sei hili iha tinan ida ne’e, ema ida nebé povo Timor-Leste sei fo kbiit atu kaer kuda talin Estado nian; no mós ita sei hili força política ka força  política sira nebé povo Timor-Leste sei hili atu fo kbiit ba sira hodi ukun no halo lei sira nebé Estado Timor-Leste precisa atu halao nia moris nu’udar, estado, sociedade no cidadão.

Iha biban ida ne’e, Bispo sira Timor-Leste nian, nu’udar ulun Kreda Católica nian iha rai ida ne’e, hakarak mós hato’ó no fahe sira nia hanoin balu hodi convida povo tomak atu hanoin, haklean, reflecte, considera no mós participa iha tempo ne’e no iha  acontecimento sira nebé sei tuir mai ne’e, wainhira hakerek daudaun hela ita nia história rasik iha tempo moderno.

Bispo sira  nia hanoin no hakarak ne’e atu convida Estado Timor-Leste atu heteke ba nia-an rasik, nu’udar Estado. Laos deit hateke  ba Timor-Leste, liu husi perspectiva candidato presidencial ida nian; laos deit hanesan força politico-partidária ida nebé esforça-an atu apresenta nia programa partidário hodi buka manan votos; laos deit hanesan militante partidário nebé empenha nia-an maka’as  atu nia partido bele hetan cadeira barak liu; laos deit hanesan votante nebé iha loron votação nian ba tau nia voto, hafoin hein tan tinan lima mai oin atu ba vota hikas fali. Hafoin  durante tinan lima mai oin ne’e  nia laran, rai ne’é atu lao oinsa-oinsa deit, nia la interessa.

Bispo sira nia hanoin no hakarak ne’e, convida Timor oan ida-idak, atu, halao daudaun nia militância política-partidária, nia ideologia rasik, nia hakarak no mehi rasik atu hetan dalan nebé diak liu ba ita nia rai, maibé  fo hanoin ba cidadão ida-idak atu tau nia-an iha estado nia laran. Haré liu ba interesse estado nian, nebé bo’ot no a’as liu ida-idak ninian.

Iha ocasião ida nee Bispos sira Timor nian asentua kona ba Consciência Histórica hodi dehan : Baibain matenek nain sira considera ita nia rai no nação ida ne’e hanesan ponto ida nebe hatudu mundo rua fahe  malu eh fatin nebé halo mundo rua hasoru malu. Haré husi Continente, dehan katak  Timor-Leste  halo  continente rua fahe malu eh hasoru malu: Ásia no Oceania;  haré husi taci, dehan katak  Timor-Leste rai nebé halo Oceano Pacífico no Oceano Índico fahe malu eh hasoru malu; haré husi religião, Timor-Leste, rai nebé hakotu religião ida (Cristianismo, liliu Catolicismo) nia influência no hamosu religião bo’ot sira seluk Ásia nian iha rai sira nebé haleu ita nia rai kiik-oan ida ne’e. Ita bele haré tan ba ita nia rai ida ne’e husi  sikun seluk, ângulo seluk no perspectiva seluk tan.

Hanesan povo ida nebé, maioria sarani no católico, ita tenki haré ba pormenor oan ida nebé bolu mundo tomak nia atenção no interrogação: HALO NUSA MAKA RAI OAN IDA BELE SAI CENTRO IDA CRISTIANISMO NIAN, NO LILIU CATOLICISMO NIAN IHA ÁSIA BO’OT IDA NE’E  NIA LE’ET NO IHA RAI SIKUN OAN IDA NE’E, DO’OK HUSI CENTRO HOT-HOTU NEBÉ HALEKAR CRISTO NIA EVANGELHO BA MUNDO IHA TEMPO LIU BA? PROPORCIONALMENTE, TIMOR-LESTE RECONHECIDO NU’UDAR PAÍS CATÓLICO NEBÉ BO’OT LIU IHA MUNDO, BIAR NUMÉRICAMENTE ITA NIA POPULAÇÃO SEI UITOAN  HELA DEIT.

Baibain ita considera hodi dehan katak ne’e Maromak nia plano. Iha biban ida ne’e, ami Bispo sira hakarak convida Estado Timor-Leste atu hateke ba nia-an, no hateke ba contexto nebé haleu ita nia rai nu’udar nação católica ida. Para além de desenvolvimento nebé ita hotu hakarak no mehi, ita tenki considera katak nu’udar Estado, ita buka ocupa ita nia fatin iha mundo, maibé mós nu’udar sarani ita hola consciência katak  ita halao mós Maromak nia plano ida iha mundo sikun ida ne’e. Ita koko to’ok hanoin hamutuk  Nai Maromak nia plano ba Estado kiik-oan ida ne’e maka ida nebé? Desde Candidatos Presidenciais no Força partidária sira, ita hotu  koko hanoin kona ba ita nia particularidade ida ne’e. Haré tuir influência religião nian, ita hatene deit katak religião bo’ot sira Ásia nian la iha influência kona ba ita nia cultura, usos no costumes, comportamentos, etc… Biar, felizmente, ohin loron Timor-Leste hetan contacto barak ho rai liur nebé hetan influência husi religião sel-seluk, maibé base cristianismo nian sai nafatin referência hodi sukat Timor oan sira nia moris lor-loron nian. Ita nia património histórico no cultural hetan nia hun husi Cristianismo-Catolicismo. Biar ita nia prática sarani sei kahur hela buat barak ho  ita nia base animista. Maibé animismo ida ne’e duni maka sai fatin atu Cristianismo no Catolicismo haburas-an iha Timor-Leste.

Amo Papa Francisco, wainhira hasoru malu ho Bispo Timor oan sira dehan: “estes sinais ao mesmo tempo que exprimem a radicação da Igreja em Timor, convidam os seus filhos e filhas a um testemunho alto de vida cristã e a um redobrado esforço de evangelização para levarem a Boa Nova a todos os estratos da sociedade, transformando-os a partir de dentro”. (visita ad limina, 17/3/14)

Hakat liu tiha conscencia histórica Bibi Atan Nain tolu nee mos foca kona ba Consciência Nacional no Clima Pré-Eleitoral hodi hameno liafuan kmanek sira Atu halao dadaun ita nia eleição ba dala tolu iha rai Timor, hanoin no haré kona ba hahalok ida ne’e, nu’udar tomada de consciência nacional, ami regista ho laran haksolok tebes, evolução nebé acontece iha ita rai. Wainhira ita haré ba kotuk, iha tinan 15 ne’e nia laran, ita hotu sei hanoin tempo susar no tensão nebé ita koko no moris wainhira ita hahú ita nia vida democrática nudar Estado. Hahú kedan 2002 to’o 2008, ita nia experiência democrática hetan dificuldades oi-oin, no dala barak ameaça instabilidade quase tinan-tinan. Ita hotu sei hanoin clima de tensão nebé ita hetan iha eleição 2007. Clima eleitoral iha tempo nebá ita bele dehan clima manas. Eleição 2007 liu tiha, ita continua moris  iha situação política no social ida nebé la hakmatek, tan nato’on ne’e ita hotu ladauk hetan biban atu moris cultura política ho diversidade de ideologias e opiniões, ho maturidade emocional. Situação difícil liu maka 2008 wainhira Sr. Presidente da República ho Sr. Primeiro-Ministro hetan atentado. Maibé situação ida ne’e duni maka fanu povo Timor-Leste atu hola consciência kona ba perigo nebé bele kona ita: katak ita halimar resin ho ahi. Maka ahi lakan fila fali iha ita nia rai karik, la iha tan ema ida, liliu comunidade internacional, atu lalin be hodi mai hamete ahi nebé ita rasik maka sunu iha ita nia uma laran nu’udar maun-alin.

Parece contradição, maibé hahú tinan 2008 mai oin, sente hanesan povo Timor-Leste hola consciência kona ba responsabilidade nacional no moris ho maturidade política no emocional. Maturidade ida ne’e duni maka halo katak clima pré-eleitoral 2012 la dun lao ona ho tensão hanesan iha 2005 no 2007; no mós ami regista katak maturidade ida ne’e duni maka fo kbiit atu povo ohin loron bele hatene observa no analisa assunto sira nebé kona ba interesse nacional, no assumto sira nebé kona ba interesse partidário no assuntos ka desentendimentos pessoais. Maibé ohin loron sente hanesan povo hatene tau nia-an iha acontecimento sira nia le’et, biar acontecimento balu bele fo biban atu hamoris emoção maka’as hanesan uluk. Tan ne’e haré ba situação ohin loron, ami sente haksolok, tan ita bele moris iha clima pré-eleitoral ida nebé hakmatek. Contexto ida la moris mesak, maibé sai consequência situação sira uluk nian nebé halo ita aprende hodi halo’os atu hetan dalan nebé diak liu no proveitoso ba ita nia estado. (Matenek nain sira lian Latim nian dehan: “errando discitur”- katak ita aprende ho ita nia hahalok naksalak sira). Husu atu ita mantém nafatin maturidade emocional ida ne’e ho capacidade adulta (néon tasak) iha eleição nebé atu halao daudaun iha fulan Março  no fulan  Julho 2017. Se ita consegue aprende ho ita nia hahalok naksalak sira, Parabéns ba ita hotu nia aprendizagem democrática  no moris democrático. No iha ikus mai Bispo sira Timor nian hatur hanorin uma creda nian relaciona ho Actividade Política nu’udar Vocação ho ninia ba maka : “O nosso mundo começa o novo milénio carregado de contradições dum crescimento económico, cultural e tecnológico que oferece a poucos afortunados grandes possibilidades e deixa milhões e milhões de pessoas não só à margem do progresso, mas a braços com condições de vida muito inferiores ao mínimo que é devido à dignidade humana”. (“Novo Millenio IneunteNo Início do Novo Milénio”, no . 50).

  1. João Paulo II iha nia Carta Pastoral ne’e, hakarak bolu atenção ba situação rua. Dala barak desenvolvimento haré liu ba sistema político no financeiro, haré liu ba máquina administrativa no haluhan tiha criatura ema, pessoa humana. Desenvolvimento hotu nebé la considera pessoa humana hanesan objecto principal desenvolvimento nian, desenvolvimento ne’e sai hahalok mamuk ida, hanesan ai sira nebé matak no buras tinan bai-loron, maibé fuan la iha. Atu hatutan S. João Paulo II nia observação, maka ami hakarak halo reflexão balu kona ba actividade política administrativa hanesan vocação ida. Tuir Kreda nia perspectiva no hanorin, wainhira koalia kona ba “vocação”, katak Nai Maromak hato’o nia bolu ba ema ida atu hatán ba situação concreta ida, tan situação ida ne’e husu resposta ida. Wainhira Nai Maromak hatan directamente ba ita nia necessidade ita bolu ne’e milagre. Maibé baibain Nai Maromk hatán ba situação concreta sira liu husi ita ema nia colaboração.  Por exemplo, Jesus Cristo atu fo han ema rihun lima precisa labarik ida  disponibiliza nia “paun fuan  lima no ikan rua”. (Mt. 14, 13-21)

Profeta Isaías no S. Paulo nia liafuan sei mai fo naroman liu tan atu ita ema ida-idak compreende ita nia actividade no responsabilidade  sira hotu nu’udar vocação ida: “Israel, ó hau nia atan; husi ó, hau hatudu hau nia glória … então Nia dehan mai hau: laos deit atu sai hau nia atan, atu hafoun hikas fali Jacob nia tribu sira no hatudu dalan ba mate resto sira Israel nian: Hau sei halo ó sai naroman Nação hot-hotu nian, atu hau nia moris rohan laek bele to’o  ba rai sikun hot-hotu”. (Is. 49, 3, 6)

 Há diversidade de dons, mas o Espírito é o mesmo; há diversidade de ministérios mas o Senhor é o mesmo. Há diferentes actividades, mas é o mesmo Deus que realiza tudo em todos. A cada um é  dada a manifestção do Espírito, em vista do bem de todos”.(1a Cor. 12, 4-8)

Ba eleição tinan 2017, ami hakarak convida mós Candidatos Presidenciais sira no forças politico-partidárias sira hotu atu haré ba actividade no missão politica hanesan vocação ida. Katak ba sarani ida, nia actividade política bele sai hanesan resposta nebé actor político ida ne’e bele fo ba Maromak nia “chamamento” atu nia bele serbí nia maun-alin sira liu husi dalan política nian. S. João Paulo II iha nia Carta Apostólica “No Início do Novo Milénio” (no 50), convida ema hotu, liliu sarani sira atu hateke ba mundo nebé habo’ot-an ba daudaun ho virtudes, evolução, progresso no desenvolvimento sira hotu, maibé mundo ida nebé parece que haluha tiha pessoa humana.

Iha contexto de leitura de situação ne’e, maka ami sugere kaer profeta Isaías nia liafuan hodi compreende Maromak nia diálogo ho vocacionado ida-idak. Iha diálogo ne’e Nai Maromak interpela vocacionado ida-idak de modo directo: “ Ó HAU NIA ATAN; HUSI Ó HAU HATUDU HAU NIA GLÓRIA; HAU SEI HALO Ó SAI NAROMAN NAÇÃO ISRAEL NIAN”. (Is. 49)  Convida líderes responsáveis sira hotu atu, iha tempo eleições nebé mai daudaun, tau ida-idak nia an hanesan “Ó” ida ne’e iha Maromak nia oin, atu rona mos Nai Maromak nia interpelação ba líderes ida-idak no força política sira tomak. Completa  ho S. Paulo nia recomendação no exortação: “Buat hotu nebé ita simu, ita simu ba ema hotu nia diak”. (1a Cor. 12, 7).  Equipa Editor

DOM. VIRGILIO PRESIDE MISSA BA GRADUADO NAIN 144 IHA ICR


ITE DILI
Actividade Graduação refere abertura ho missa agradecimento nebe preside husi Bispo de Dili Dom Virgilio do Carmo da Silva iha campal Instituto Ciência Religiosa São Tomas de Aquino (ICR) Lahane Dili. Iha ocasião nee Bispo Virgilio hateten; Ohin ba imi 144 marca história foun ida iha imi nia vida ou iha imi nia moris. Ita boot sira haksolok iha loron ida ohin tamba dehan katak tempo too ona, sacrifício nebe halo, energia hotu nebe halo ohin o simu hau nia kolen, maibe iha perigo boot ida mai ita tamba dala barak ita badinas atu hatan ba egigencia sira escola nee nian, maibe oras nee tamba escola hotu ona balu hahu dehan pesquiza mos hotu ona, esforso atu aprende mos balu dehan hotu ona, maibe tuir lolos moris hahu ho ohin, desafio hahu ho ohin, husi ohin ba oin mak ita precisa halo esforso nebe boot. Dala barak ita rona crítica husi naiulun sira tau kona ba qualidade da educação, educação la termina iha banco Universidade, educação la termina iha banco Instituição nian, maibe completa iha moris. Iha Universidade hanorin oinsa halo pesquisa, iha Universidade Mestre sira fo buat ruma, maibe iha realidade mak ema ida-idak mak temque desemvolve, precisa actualiza nafatin tamba mundo lao ba oin. Educacão laos deit iha ita nia kakutak maibe kona mos ita nia fuan. Se educação la kona iha ita nia fuan la afecta mos iha ita nia moris, <strong>tenik Dom Virgilio da Silva iha Kampus ICR Lahane Dili (31/01).

Dom Virgilio hateten: Dalan atu hetan matenek Liurai Salomão Wainhira nia sei Jovem, atu sai liurai nia la hatene atu halo saida, maibe, nia fila ba Maromak no lamenta ba Maromak hodi dehan; Nai hau sei kiik, hau beik, hau la hatene, oinsa mak hau bele ukun povo ida nebe ita boot tau mai hau nia liman. Maromak hare ba Salomão nia preucupação, Maromak liatun ba nia; “masque o kiik no beik, maibe o hatene husu. O la husu kona ba forsa, o la husu kona ba riku, tamba o husu matenek, Hau sei haraik duni matenek nee ba o atu o bele hatene ukun povo ida nee, atu o bele hatene saida mak diak no saida mak aat”. Dom Virgilio hatutan tan: Dalan atu hetan matenek Salomão dehan; “Harohan ba. Wainhira imi harohan, imi sei hetan basá Salomão compara matenek liu fali osan mean ka mutin, matenek mak dalan atu hatudu Maromak e Maromak mak we matan hun matenek nian, nia hahi matenek basá matenek mak as liu buat hotu, nia hahi matenek basá matenek mak furak liu buat hotu e nia hatudu katak nia la pertense ba rai ida nee ka matenek nee laos rai nee nian, maibe mai husi leten. Tan nee temque husu duni ba ida leten atu haraik matenek nee ba o. Dom Virgilio dehan tan: Ohin ita haksolok ho ita nia maluk sira nee hotu, maibe hau hakarak sublinha liafuan balu; Diligente (badinas). Iha matenek nain ida Senecta dehan nunee; “Iha momento nebe ita buka matenek, iha momento nee deit ita buka halo imvestimento nebe boot iha ita nia vida”. Atitude nebe comum nebe ita hare iha São Tomas ho Salomão. Tan nee liafuan ba dala uluk ba imi nain 144 mak ida nee; “Badinas Ba”. Ohin imi menciona katak ”imi nia Sacrifício mak ami nia ksolok” e hau hakarak dehan fali nunee: “Imi nia badinas mak sei sai ami nia ksolok”. Ida nebe melhor mak ida nebe buka iha vida lor-loron e oinsa mak atu conretiza matenek hotu nebe imi aprende iha Instituição ida nee iha imi nia vida.

Pe. Adriano Ximenes: Bíblia Maromak Nia Liafuan

ITE DILI – Diocese Dili hili tinan ida nee nudar tinan Bíblia nian hodi fo tada ba sarani sira hotu katak; Bíblia Maromak Nia Liafuan. Ema nebé la conhece Bíblia automaticamente la hatene Maromak nia liafuan no ema nebe la Le’e Bíblia, nia labele comprende liu tan kona ba Fiar ida nebe nia fiar ba, tenik Pároco Balide Pe. Adriano Ximenes iha nia residéncia Paroquial Balide (30/01).

Pe. Adriano Ximenes haklaken: Bíblia tuir nia sentido lolos dehan katak conjunto de livros Antigo Testamento e Novo Testamento. Antigo Testamento nebe hakerek Profeta sira ninia lia fuan nebe Maromak koalia ho sira. Novo Testamento hakerek Jesus Nia moris rasik, Jesus nia lia fuan no nia doutrina nebe Jesus lao hamutuk ho nia escolante sira hodi hanorin ba fatin-fatin.

Pe. Pároco reforsa tan: relaciona ho programa ou plano pastoral Paróquia nian iha tinan-tinan ba dala uluk mak nee; hau vizita família sira fo benca ba uma kain sira hodi hare iha sira nia Oratório estatu, imagem no mos Bíblia iha ka lae, maibe ida nee remata tiha hau halo buat lectio de Vina. Iha Lectio Divina nee hodi halibur sarani uma kain ha’at ka lima tur hamutuk hodi le’e Bíblia iha loron Sábado molok Dominggo missa, atu nunee buat nebe sira mai rona iha missa, sira le’e tiha ona no sira hatene tiha ona saida mak aban atu le’e no mai missa amo lulik sira koalia tan bele aprofunda liu tan sira nia fiar, aprofunda liu tan sira nia comprensão kona saida mak Bíblia. Hau lakohi mistura Lectio Divina ho terço, maibe le’e Bíblia no shering experência ida-idak nian han malu ho lia fuan nebe iha Bíblia e depois taka ho oração badak ruma hafoin remata.

Pároco sublinha tan katak: oras nee dadaun ema fo importáncia liu ba buat seluk do que Bíblia tamba falta de comprensaun kona ba Bíblia. Ema hanoin katak Bíblia nee mos hanesan buat  ida nebe le’e hanesan jornal bain-bain ida tamba nia la comprende katak “Bíblia nee Maromak nia lia fuan nebe hakerek iha neba, e Bíblia ida nee importáncia boot liu buat seluk hanesan jornais sira nebe que le’e bain-bain hodi akompanha situação actual nia andamento nee to’o iha nebe, maibe nia la comprende mos Bíblia nee katak uluk apostulo sira, Jesus, Profeita sira nai experência ho Maromak iha sira nia moris loron loron.  Ida nee mak hakerek iha neba atu ita le’e no ita bele comprende moris tuir hodi haklaken Maromak nia lia fuan nee ba mal uk seluk.

Pároco relata tan katak: Igreja hakarak promove ou aprofunda liu tan mak ida nee; fo tinan ida nee nudar tinan Bíblia, atu sarani bele hakas-an liu tan hodi comprende Bíblia atu bele hamenus importáncia jornais labele liu fali importancia Bíblia nian iha nia moris nudar ema sarani. Ita bele le’e ou acompanha situação mundo ida nee nian, maibe ita buka mos atu fo importáncia mos ba Bíblia tamba ita nudar ema sarani ita nia fiar metin iha Maromak nia lia fuan, ita rona Maromak nia lia fuan ita buka moris tuir le’e no buka atu haklaken ba maluk seluk tamba ema barak, maibe ema uitoan deit mak komprende Bíblia barak sei dauk comprende, tamba nee ita hotu-hotu buka haka’as an atu bele le’e Bíblia hodi buka moris tuir Maromak nia lia fuan. (A/c)     

ICR Lahane Relaliza Graduação ba dala VI

ITE DILI – Instituto de Ciência Religiosa São Tomas de Aquino (ICR) iha Segunda-Feira (30/01/2017) foin lalais nee realiza Graduação ba dala VI ba agente Graduado hamutuk 144 nebe acaba sira nia curso iha areia Licenciatura no Baissarelato ba formação Professores Moral e Religão iha escola no programa ba Bassiarelato PastoralSocial nian. Reitor Instituto de Ciência Religiosas (ICR), Padre Urbanus Bunga Lolon hateten; Ohin ita halo Graduação ba ICR nian, maibe compara ho Universidade ou Instituição seluk, ICR Instituição ida nebe kiik. Graduação ba Primeiro Turno estudante hamutuk ema “35”, Segundo Turno estudante hamutuk “42”, Terceiro Turno estudante hamutuk “101”, Quarto Turno estudante hamutuk “75”, Quinto Turno estudante hamutuk “102” no ba Sexto Turno nian estudante hamutuk “144”. Total Graduação husi husi ICR foin mak “499”. masque estudante la barak ami sente hakasan hodi hasae qualidade husi docente ho estudante sira hotu, tenik Reitor ICR Pe. Urbanus Bunga Lolon iha Kampus ICD Lahane Dili (31/01)

Pe. Urbanus Bunga Lolon reforsa tan katak: Ba Docente sira, ami buka dalan hodi haruka sira ba escola hodi foti Mestrado ou Doutoramento e iha mos treinamento nebe ami halo hamutuk hodi hasae qualidade iha processo aprendizagem nian. Too agora tradição nebe diaak ami halo quando halo graduação husi Kampus ida nee, ami sempre halo lansamento Livros. Livro nebe que ami halo durante Lansamento hakerek nain husi Docente sira husi ICR.

Pe. Urbanus Bunga Lolon sublinha tan katak: Ba estudante sira husi ICR ami halo processo aprendizagem partipatip treanin. Docente permanente sempre haruka estudante sira halo presentasi grupo ou pessoal. Halo presentase mos temque uja programa Pawer Poin atu hahu husi Semester III ba leten, ami espera katak, estudante hatene ona uja Pawer poin tamba wainhira exame tese iha semester ikus nian ida-idak temque uja Pawer Poin. Hahu exame ida liu ba fulan Desembro ba semester IV no VI hahu ona husi estudante sira haruka trabalho tuir Email. Estudante sira haruka nia trabalho liu husi nia Email rasik. Maneira ida nee atu hanorin estudante sira bele uja no mos bele hatene Internet. Uluk ita nia inan aman sira ita la hatene hakerek tan nee ita hanran Buta Huruf nunee ba estudante sira nebe mak la hatene uja Computador ita hanaran mos estudante Buta huruf iha tempo moderno nian.

Pe. Urbanus Bunga Lolon reforsa tan katak: Atu suporta no hasae qualidade hus campus ida nee, ba sira nebe halo estágio, ami haruka sira ba estágio laos fulan ida ka rua, maibe ami haruka sira ba estágio durante fulan 6. Maneira ida nee ami halo hodi prepara ita nia estudante sira nebe remata husi Kampus ida nee bele hetan qualidade nebe diak. Ami mos la nega katak estudante hotu nebe remata husi ICR, balu mos iha fraqueza nebe sira hatudu iha campo de trabalho ou iha moris lor-loron nian, maibe husi fatin ida nee, processo formação nian ami halo tuir ami nia capacidade nebe iha hodi buka qualidade educação nebe diak.

Pe. Urbanus Bunga Lolon relata Tan katak: Ohin sira nian 144 hetan graduação, sira balu hetan ona serviço no sira balu sidauk. Ba hirak nebe sidauk hetan serviço liu-liu ba sira nebe hetan programa professores hau haruka imi ba imi nia knua rasik no iha neba escola sei buka Professores hodi hanorin. Processo husi graduação ohin loron laos resultado husi hau nia serviço nudar Reitor no Corpo Docente sira deit, maibe husi colaboração diak husi Instituição oi-oin no ema barak sira nia laran luak. Ba Governo liu husi Ministro Educação nebe fo tulun ba Instituto ida nee hodi hasae qualidade Docente sira no mos processo tomak aprendizagem nian atu bele hetan resultado diak.