shadow
Diocese de Dili > NOTÍCIAS > Notícias

Vigário Geral Iha Atu Tulun Bispo Iha Boa Governação Diocese Nian

DCDD – Assunto hirak ne’e Mons. José António da Costa nudar Vigário Geral Diocese Dili nian hatoo wainhira dadalia ho equipa reporter Centro Televisivo Diocese Dili (CTDD) iha nia knar fatin Câmara Eclesiâstica Lecidere Dili Quarta Feira foin lalais ne’e (31/05/2017). Mons. José António da Costa hateten: Hanesan ita hatene katak Vigário Geral Amo lulik ida nebe Bispo ida foti atu tulun nia iha Governo Diocese Nian. Ne’e duni, servisu específico iha quando Bispo atribui ba nia, mais housi direito laiha determina katak nia tenki halo ida ne’e ka halo ida nebá, dehan deit katak nia atu tulun Bispo iha boa governação Diocese nian.

Mons. José António esplica tan: Diocese Dili agora actualmente alende Vigário Geral, iha mos Vigário Episcopais, Pastoral, Social, Reliosos no mos Educação. Sira ne’e hotu ida-idak iha sira nia servisu, sira nia missão espicífica liu-liu Vigário Episcopais sira. Hanesan Vigário Geral nia missão ne’e no função ne’e geral, abrange toda a Diocese hanesan Bispo iha matéria nebé Bispo la reserva ba nia rasik, maibe sira seluk hanesan Vigário Episcopal ne’e, sira específicamente ba missão ida nebé sira iha hanesan ida nebé Pastoral ne’e halao missão Pastoral nian, ida nebé Social halo missão Social nian, ida nebé Educacão halao missã Educação nian no ida nebé Religioso halao missão Religioso nian.

Mons. José António hatutan tan: Ita bele dehan katak obstáculo depende Confiança Bispo nian, Bispo hanesan fo opurtunidade para Vigário Geral ida atua tuir competência verbal ou escrito nebé nia fó ne’e Vigário Geral ida bele leluasa, maibé sê  Bispo la dehan buat ida, ne’e servisu administartivo de’it iha Diocese laran. Hau assume knar Vigário Geral ne’e  dala tolu ona hahu iha Dom Carlos Filipe Ximenes Belo nia tempo, hafoin iha Dom Alberto Ricardo da Silva nia tempo no agora começa tan ho Dom Virgilio do Carmo da Silva. Maibé iha tempo Dom Carlos ho Dom Ricardo nia tempo ne’e naruk quase todo tempo nebé nia Bispo, hau mos Vigário Geral e hau halao actividade barak hanesan; ba iha fó Crisma mos iha Paróquia sira iha Timor laran tomak.

Mons. José António haktuir tan: Diocese hari ne’e Quando Amo Papa tuir informação Cúria Romana nian dehan katak comunidade povo de deus iha fatin ida ne’e merece ona iha Bispo rasik. Então cria Diocese foun hanesan ita Diocese Dili uluk ita hola parte fofoun tuir história ba Malaca, depois passa ba Diocese Macau, housi Diocese Macau mak iha 1940 PIO XII loke Diocese Dili ho surat keputusan nebé dehan ”MULA”. Solemnibus Comvencionibus hodi loke Diocese Dili. Então hau hanoin ohin loron ne’e nessecidade, exigência barak teb-tebes. Hanoin katak ba oin tinan hira tan talvéz SANTA SE sei hanoin atu loke tan Diocese foun iha Timor Lorosae tamba agora foin mak Diocese tolu deit, maibé nain tolu ne’e de’it ita hare ba servisu kona ba buat nebé instituição nebé ita bolu Conferência Episcopal ne’efahe função ba sira ne’e rotação ne’e barak demais. Se nain hat ou nain lima ne’e longra uitoan ona. Tamba be’e natureza lolos ne’e mak povo de Deus nebé iha nia pastor ida rasik nebé hanaran Bispo no Bispo ne’e ajudado pelos Sacerdotes. Ne’e duni Bispo mesak mos labele forma Diocese tenki nailulik sira para hanesan liman ain Amo Bispo nian iha Paróquia sira. Agora hanesan iha Cúria ne’e buat servisu administração nian e haré mos buat Pastoral nian.

Mons. José António haktuir história Diocese nian hateten: Diocese Dili hahu iha tinan 1940 no nia Bispo primeiro mak Dom Jaime Garcia Goulart nebé ukun durante tinan barak nia laran, hafoin de funu Japanes mak hari no lao lolos. Depois Dom Jaime reuncia tiha tamba nia idade no nia saúde, mai fali Bispo Português ida naran José Joaquim Ribeiro nia ukun to’o momento Indonésia tama mai nia mos resigna-an, hafoin mosu Administrador Apostólico Martinho da Costa Lópes nebé laos Bispo maibe Padre, hafoin tuir fali Administrador Apostólico mos Bispo Dom Carlos Filipe Ximenes Belo nebé primeiro hanesan Padre de’it, hafoin ordena ba Bispo. Hafoin nia resigna-an tiha quando independência, Bispo Basilio ukun Diocese Dili durante tinan 1 to’o eleição Bispo Ricardo nian to’o nia mate, Bispo Basilio kaer fila fali hanesan Administrador Apostólico iha tempo mamik nia laran, hafoin mosu eleição foun ba Bispo Virgilio. Tan ne’e Docese Dili to’o agora ita celebra ona 75 anos.

Se Pergenbangan Igreja nian ita sukat ho presença vocações. Ita haré katak ita nia Diocese iha Timor ne’e vocações ne’e barak duni hanesan Vocações ba amululik no ba Religiosos/as, ne’e sinal ida nebé que Igreja moris iha Timor. Sê Igreja laos ita hanesan uluk nian antes de tempo de independência ou antes, ema Português deit mak mai iha ne’e hanesan missionário, hafoin housi Espanha, Itália, agora ho ema Indonesia tama mai ema Indonésia mak mai, maibé sira mai ne’e loas deit ona ba sira mesak maibe buka fini sira nia Congregação nian housi Timor oan sira. Ida ne’e sinal katak ida que Igreja ne’e moris. (All)

HATENE AIHUN LIU HOUSI AIFUAN

DCDD – Dom Basilio do Nacimento Bispo de Baucau hateten lia hirak ne’e wainhira participa iha Comemoração aniversário ba dala 63 presença Seminário Menor Nossa Senhora de Fátima iha Creda Timor iha loron 30 fulan Maio 2017. Dom Basilio hateten: tinan 63, iha lia-fuan Jesus Cristo nian mai iha hau nia ulun agora dehan nune’e: “Hatene Aihun Liu Housi Aifuan”. Iha tinan 63 nia laran, hau hanoin uma ida hanaran Seminário Nossa senhora de Fátima ne’e fó fuan barak teb-tebes. Basta deit ita haré, bainhira uma ne’e hahu to’o tempo sira ohin ne’e, líder sira nebé agora sei ukun ita iha dimensão hotu-hotu bele Líder Político nomos bele Líder Uma Creda sai hotu housi uma ida ne’e. Buat nebé capás iha Timor sira halo e buat nebé sabraut iha Timor ne’e mos sira mak halo. Ne’e duni atu dehan katak Seminário de Nossa Senhora de Fátima nian oan sira ba buat diak no a’at rai ida ne’e nian, ba história rai ida ne’e nian tanto Político como Uma Creda, Seminário Nossa Senhora de Fátima hahú iha Lecidere, ba Soibada, mai Dare, Lahane depois mai iha Balide no hau la hatene aban bainrua keta ba tan fatin seluk, maibé haré ba ánimo ida ne’e sei nafatin. Nebé hanoin katak ohin ita hare ba kotuk hodi agradece ba Maromak ba buat hotu nebé Uma Creda Timor ka Rai Timor liu housi Uma ida ne’e nia laran, haktuir Bispo Basilio iha Salão Seminário Nossa Senhora de Fátima Balide Dili (30/05/2017).

Dom Basilio hateten: Jovem sira ohin loron educação oin seluk, Característica oin seluk, mentalidade oin seluk, maibé ita boot sira iha Seminário ida ne’e tenki hatama iha ulun katak ita boot sira jovem, maibé ita boot sira iha objectivo ida katak atu sai no forma-an atu sai Nailulik. Ne’e duni atu mai escola deit ita boot sira lakon tempo. se hau ba iha Seminário laiha objectivo ida hodi dehan: Sê hau la sai amululik pelo menos hau aproveita formassão ida ne’e atu se la sai amululik maibé sai aman diak ida. Desafio laos formassão, desafio como a Lição nebé Seminário Menor sira iha hodi hatene katak uma ida ne’e (Seminário) forma ema barak ho objectivo ida.

Iha biban ne’e mos Dom Basilio Bispo de Baucau tenta anuncia kona ba liafuan “MAGNÍFICO” nebé dala barak iha evento boot sira ema uja hodi indica ba Reitores sira. Tan ne’e Bispo Basilio hateten: Lia-fuan ida MAGNÍFICO REITOR iha Portugal uja deit ba Reitor Coimbra nian deit no la uja tan ba Reitor seluk, Tamba primeiro Universidade Portugal nian mak Coimbra e Reitor naton ne’e Jesuita e ema concidera Reitor Coimbra nian ne’e hanesan ema ida nebé matenek liu. Maibe buat ida naran Magnífico laiha conotação agora. Magnífico nebé agora ne’e dehan ida diak liu ne’e. Ne’e duni Reitor sira Universidade sira seluk nian, quando ema bolu sira Magnífico Reitor ne’e, sira sente ofendido ituan tamba imvéz atu hasae ema maibe hatun ema. Ema Portugal quando mai rona ita bolu Magnífico ba ita nia Reitor sira ema hakfodak ituan tamba ita la coloca tuir nia fatin. Ne’e halo favor keta uja tan buat ida naran MAGNÍFICO REITOR ba ita nia Reitor sira.(Caq)

Seminário Menor Balide Completa tinan 63 nia Existência

DCDD – Tersa Feira lorokraik 04:00 Htl, Seminário Menor Nossa Senhora de Fátima Balide comemora ninia existência ba dala 63. Iha festa comemoração ne’e hahu ho Missa agradecimento nebé preside housi Dom Virgilio do Carmo da silva iha Capela Seminário Menor Balide Dili. Biban importante ne’e marca presença mos Dom Basilio do Nacimento Bispo de Baucau, Padres, Madres no inan aman housi Seminaristas Seminário Menor Balide hodi hodi comemora evento refere. Iha biaban ne’e mos Dom Virgilio hamutuk ho Dom Basilio fó Crisma ba Seminaristas Seminário Menor hamutuk 95. Tan ne’e Dom Virgilio iha nia reflexão hateten: Jovem Seminarista ida tenki iha plano ida ba nia moris aban bainrua. Sê plano atu sai amululik, amululik ida oinsa nian, se aban bainrua balu sai Nailulik karik hodi hanoin sai aman ida oinsa nian! no hirak nebe hanoin atu sai Político ida oinsa nian! Atu sai matenek precisa fera ulun atu estuda. Nune’e mos atu muda ita nia carácter, muda ita nia hanoin ita precisa hakiak wainhira ita sei jovem, wainhira ita sei iha kbiit atu forma ita nia-an. Tan ne’e hahu agora hakasan estuda, haktuir Bispo Virgilio iha nia homilia iha Capela Seminário Menor Balide (30/05/2017)

Dom Virgilio haktuir tan: ohin opurtunidade diak ida mai ita hotu Hamutuk ho Ita Nain Feto, renova hamutuk ho Ita Nain Feto ita nia hakarak sira. Jesus nebé comfia ita Nia entrega nia Inan mai ita. Tan ne’e nudar sarani ita harohan mai ita nia an, mai ita nia familia e liu-liu harohan mai ita nia Seminário Menor nebé ohin completa tinan 63 nia existência atu husi ita nia festa Espírito Santo nian nebé ita atu tama daudaun no liu housi interseção Nain Feto nian atu bele hakbiit liu tan formadores sira hotu nebé servisu iha Seminário ida ne’e, Educador sira no ba Seminarista sira hotu nebé iha ne’e, inan aman sira hotu atu ita hotu hamutuk buka nafatin Na’i Maromak nia vontade atu halo santo ita nia-an, halo santo mos ema nebé Na’i Maromak entrega ba ita nia família, escola, ita nia Creda no Sociadade.(Caq)

JORNALISTA TIMOR-LESTE HALÃO ACÇÃO MARCHA SILENCIO

DCDD – Relaciona ho caso nebe Jornalista Timor Post Raimundo Oki no Ex-Director Lourenco Vicente Martins, iha loron 29 fulan maio tinan ida Jornalista Timor-Leste halao acção Marcha Silencio husi edificio Diario Timor Post iha Mandarin Dili ba to iha Palacio do Governo Dili. To iha Palacio Governo nia oin, Jornalista sira sunu lilin no kari Aifunan hanesan simblo ba Liberdade imprenssa nebe mate ba dadaun depois ne continu kedas ho Comferencia Imprenssa. Iha comferencia Imprenssa ne Porta voz ba acção ne Manuel Pinto hato’o nia lamentação ba caso nebe maka envolve Jornalista Timor Post Raimundo Oki nebe hetan alegação husi Mnisterio Público ho cadeia tinan 1 no ba ex-Diretor Timor Post Lourenco Vicente ho cadeia tinan no suspenção ba Tinan 2.

Porta voz ba Acção Manuel Pinto liu husi conferncia ne hato’o nia lamentação ba situação nebe condeira bele hamate Liberdade imprenssa iha Timor-Leste.

“ ami iha laiha direito atu halo intervenção ba iha decisão Tribunal nian, maibe wainhira ema ruma rona lori Jornalista ruma ba iha Tribunal ne hamate ona Liberdade Imprenssa” hateten Secretario Geral Timor Leste Press Union ne.

Manuel Pinto hatutan Timor Leste iha ona Lei comunicação Social  maibe lori Jornalista ba Tribunal, ne nudar acto ida atu hamate liberdade Imprenssa.

“sei ita la halo acção hodi contra hahalok sira hanesan ne Liberdade Imprenssa sei mate total no Democrracia nebe ita hotu mehi sei sai hanesan buat mamuk ida” hateten Manuel ho lian makas.

Iha Acção refere hetan mos participação husi representante Intternational Federation Journalist Jim Nolan. Ba Jornalista sira Jim Nolan hateten, sira sei halo Campanha bam undo Internacional kona saida maka acontece ba Raimundo Oki.

“Ami sei halo campanha ba suporta Raimundo Oki, tuir hau la merese Jornalista ida tenque tama comarca. Iha loron ida fulan Junho ita hotu sei hein nia resultado no wainhira la favorel ami sei hamutuk ho Jornalista local sira atu ba exige saida maka agora dadauk ita defende” tenik Jim Nolan.

Jim Nolan mos promote sei hasoru autoridade naçao ne nian hodi koalia kona ba saida maka jornalista iha hTimor-Leste hasoru dadauk. Nia mos concideira saida maka Primeiro Ministro Rui Maria de Araujo halo fo imagem ladiak ba Liberdade Imprenssa.

Acção Marcha Silencio ne hetan mos solidaridade husi organisaçãao sociedade civil no mos Sindicato Front Trabalhhador Maubere (FORAM). Juvinal Diaz husi socieadade sivil ba Jornalista sira hateten ema hotu labele haluha contribuição Jornalista nian iha Passado iha tempo agora mos Timor Leste foti papel importante ba Liberade do Democracia.

“Saida maka Primeiro Ministro halo laos ba Raimundo Oki mesak maibe em fraquesa Sociedade tomak no mos Liberdade imprenssa iha Timor-Leste tanba se Jornalista sira hetan ameasa ba atu labele hakerek noticia, povo sira mos sei la hetan acesso ba informação. Lolos nia (PM-red) dada hikas caso ne husi Tribunal tanba Primeiro Ministro kaer  kna’ar ida atu ba haburas Democracia iha Timor-Leste” hateten Juvinal.

Raimundo Oki ho Lourenco Vicente Martins tenque ba hatan iha Tribunal tanba iha tinan 2015 Timor-Post halo  pubblicação ba noticia ida nebe ho nia Titulo “ Desconfia Assesor Minnisterio Financas Fo Projeito ba Companha Indonesia”. Atual Primeiro Ministro Rui Maria Araujo nebe ‘nudar Assesor iha tempo neba ikus mai hato’o queixa ba iha Tribunal hodi Procesa Raimundo Oki ho Lourenco Vicente Martins. (RmG)

Bispo Dili Halo Diálogo ho Liderança Locál

DCDD – (23/05/2017). Tersa Feira (11:00) Otl, Bispo Dili Dom Virgilio do Carmo da Silva halo diálogo ho Liderança Locál Direção Comoro nian ho objectivo atu bele koalia, hasoru malu no rona sarani sira nia problema sira nebé lao iha Paróquia ida nia laran. Diálogo ne’e participa ativa tebes housi parte Liderança Locál sira, Liderança housi Parte Igreja nian no mos sarani sira iha Salão Dom Bosco Comoro Dili. Iha Diálogo nebé ho tema ”Modelo Liderança Nebé Diak Tuir Igreja Católica Nia Hanourin”, Mahein Diocese hateten: Tuir Igreja, modelo liderança ba Creda mak Cristo rasik. Cristo mak sai modelo liderança ida ba Creda. Jesus rasik wainhira nia hahu forma ninia Apóstolo 12, Jesus mak hanesan chefe, hanesan bibi atan hodi ninia exemplo ne’e rasik, Nia sai hanesan inspira ema barak atu lao iha dalan lós. Ita koalia kona ba Igreja nian ita hare deit Livro ida nebé laos ema sarani mak hakerek maibe ema hakerek atu soe ba mundo atu ema moris tuir. Iha Livro nee hakerek: ”LEAD LIKE JESUS katak CHEFIA HANESAN JESUS”. Ita sarani dalaruma ladun preucupa ba ida ne’e, maibe ema liur buka modelo ida nebé dehan katak Jesus bele sai líder ida ou modelo ida ba mundo no ema tomak. Ema barak nebé iha mundo hare ba Cristo nudar modelo diak ida, dalaruma ita sarani mak la dun apressia atu descobre hotu, atu aprende housi Jesus.

Bispo hateten: nudar ema, nudar ukun nain ida nebé hetan responsabilidade atu lidera, tan ne’e, lider nudar educador, lider laos atu ukun deit nune’e mos atu educa, lider mos nudar mahein ou bibi atan, lider mos sai animador, fo, lao, acompanha, lider nia mos ema ida responsável no lider buat nebé as los iha ohin loron laos deit nia educa no báli, maibe nia mos hatene fo sasin kona ba ninia papél nudar lider iha comunidade ninia le’et. Ida ne’e mak dalan ida nebé mundo ohin loron precisa liu. Tan ne’e, ema sempre dehan discursu nebé diak liu laos liafuan maibe hahalok. koalia kona ba lider laos fácil. Tamba ne’e, lider ne’e laos atu koalia, maibe atu moris. Lider ba ita sarani ita dehan Servo ou Atan.

Iha Actos dos Apóstolos: ”lider atu sai bibi atan diak ”Bom pastor”. Iha Bíblia Profeta Jeremias 3, 15 koalia kona ba “Ha’u sei fo ba imi bibi atan ida nebé sei forma nia-an tuir Ha’u nia fuan”. São João 10,10: Ha’u mai atu imi bele hetan moris, atu moris too nakonu e Ha’u mak bibi atan diak nebé fo Nia moris ba nia maluk sira.

Bispo reforsa tan: Atu sai bibi atan ou Líder nebé diak precisa Papél Educador, Responsabilidade, animador no testemunho.

Sai lider atu educa, atu bali. iha família mos Apa-Ama sai chefe ba família atu educa oan sira, atu bandu no tau matan ba oan sira. Ne’e duni, bibi atan ka ukun nain hanoin imi nia papél nudar educador no pastor. Líder mos iha responsabilidade ba iha ninia membros sira; la to deit educa no tau matan maibe nia mos iha responsabilidade hodi tuir no tau matan; Bibi atan mos atu anima, laos educa det maibe sai animador. inan aman sira mos animador, chefe de bairo sira tenki sai animador Comunidade nian; Bibi atan tenki hatene atu fo sasin ou testamunha tamba ohin loron ema dehan, buat nebé ita koalia ne’e bele furak oinsa mos ita rona iha tilun deit. Buat nebe bele muda ita nia moris mak ita nia testemunho da vida. Tan ne’e, sai bibi atan ou sai lider tuir buat ida ne’e Jesus dehan lider ne’e pastor, animador, resposabilidade e testamunha.

Bispo menciona tan: Bibi atan sai atan ba ema sira nebé ita tau matan ba. Bibi atan sai atan katak atu serbi, uluk mak sai bibi atan ne’e katak ema atu serbi, maibé agora ne’e lae! sai líder atu serbi. Sai ukun hatene haraik-an, hatene rona no hatene mos terus. Ne’e duni, sai bibi atan ka sai ukun nain ne’e hanesan lori cruz ida. Iha matenek nain ida dehan: Bibi atan ida tenki hatene rona nia ema, rona nia sarani, rona amo sira, rona nia membro sira nebé iha comunidade. La too deit rona maibe tenki hadomi empatia katak laos rona no hare maibe sente besik liu tan, sente mos ho fuan. Rona ho tilun ne’e ita hotu rona, maibe rona ho fuan ne’e la hatene ita rona ga lae! Wainhira ita bele rona, hodi rona ita bele kura ema nia moras, hodi rona ita bele kura ema nia problema.

Bispo hatutan tan: Líder tenki iha conhecimento kona ba nia-an, ninia mundo e mundo ida nebé nia tau matan. Tan ne’e Líder ida teenki iha conhecimento mínimo ida kona ba buat nebé nia halo no nia kaer. Líder ida mos tenki iha atitude nebé hanesan compaição, corágem no atitude ida-idak tenki iha compaixão, corágem, haraik-an hodi servi, hodi moris. Líder ba ita sarani tenki iha mos vida Espiritualidade. Hafoin precisa mos iha Skiil nebé diak. (C/a)

Comoro ho Título ka Marca Especial nudar Fatin Comflito

DCDD – Pe. Elias de Deus, Pároco Paróquia Maria Auxiliadora Comoro kasu lia hirak ne’e wainhira iha diálogo entre Igreja ho Liderança Locál sira iha Paróquia Maria Auxiliadora Comoro. Pe. Elias de Deus haktuir: Comoro ho título ka ho marca especial ida nudar fatin problema nian. Então ho Amo Bispo nia presença no iha opurtunidade kapás ida atu comvida mos ami nia lideransa locál sira no ami mos tenta comvida mos housi Município mai Distrito, suco no Aldeia no mos liderança housi Igreja nian; Bairo sira ho sira nia estrutura atu nune’e bele rona uitoan Amo Bispo nia palestra nebé koalia kona ba lidernsa nebe diak housi ponto de vista doutrina Igreja Católica nian buat nebé Bíblia husu atu nune’e lideransa sira bele halo diak sira nia knar atu tau matan diak ba emar sira atu nune’e bele evita ou koko atu resolve problema nebe acontece iha sociedade no iha Jovem sira iha família liu-liu iha ami nia ária Paróquia Comoro nian.

Pe. Elias de Deus hatutan tan: Tuir hau hanoin, ohin amo Bispo fo definição ida kapás tebés kona ba liderança liu housi contexto ba sarani sira mak Jesus Bom Pastor. Nia hanesan bibi atan diak e Nia halo diskricão kona ba bibi atan diak hatene hasai nia bibi housi luhan lori ba iha du’ut matak no Nia tur hein, como nia hein nia hare katak balu laiha nia ba buka ne’e katak tau matan no protege no ikus mai Nia mos fó Nia vida se wainhira balu monu ba risco atu enrisco sira nia vida, Bibi Atan enrisca nia vida para salva nia bibi sira. Ida ne’e mak modelo Bibi atan diak. Tamba ne’e buat nebé ohin Amo Bispo dehan ba ita nia liderança sira katak bibi atan diak modelo tuir Jesus Bom Pastor. Tan ne’e liderança ida nebé diak precisa Rona, conhece, hatene, tau matan ba nia bibi sira no ba nia emar sira.

Pe. Elias sublinha tan: hanesan ohin amo Bispo koalia kona ba lalaok importante hanesan liderança nebé diak laos ho nia skiil no nia matenek, ho nia empatia, maibe bibi atan ida nebe iha vida Espirtualidade ne’e tenki diak, katak liderança nebé diak mak hatene liga ho Maromak no nia vida cristão. Tamba ne’e mak fontes forsa nia ba nia atu nia bele halao nia knar ho liderança diak nee bele lao.

relaciona ho comemoração 25 anos existência Paróquia Maria Auxiliadora Comoro Pe. Pároco hateten: Ami tinan ida ne’e comemora 25 anos Bodas de Prata, então hamutuk ami prepara buat lubuk ida; liu housi parte Espiritual nian ba Sacramento sira: Premeira Cominhão ba labarik hamutuk 664, Baptismo Geral hamutuk 300, adulto nain 3, Casamento geral hamutuk 57 pares, Crisma nain 700. Além nee iha mos actividades Visita Nain Feto tama bairo no sai bairo, iha mos maluk sira housi religão Protestante renova sira nia fiar hodi tama fali fiar Igreja Católica hamutuk sira nain 3, iha mos actividade seluk hanesan Desportiva sira, no mos diálogo.

Hau hanoin hanesan Paróquia celebra 25 anos hanesan amo Bispo dehan compara ho ema ida karik boot ona, maduro no nia boot ona tamba ne’e husu ba sarani sira atu aproveita ho comemorção Paróquia ne’e atu hatudu-an hanesan sarani lolos, sarani nebe sólido ho valor Cristão nian no sarani nebe metin ba fundamento doutrina igreja Católica nian.(C/a)

Ilas S. João Paulo II Visita Paróquia Gleno

DCDD – Dominggo foin lalais ne’e(2/5/2017), Ilas São João Paulo II visita Diocese Dili liu-liu Paróquia Imaculada Conceição Gleno basá indica nudar Centro ba OPIM iha Diocese Dili nian. Iha biban nee marca presença housi Bispo Dili Dom Virgilio do Carmo da Silva, Cúria Diocese Dili nian, Padres, Madres, Liderança Nacional e Locál no mos sarani sira. Evento nee hahu ho Eucaristia Santa nebé preside housi Bispo de Dili Dom Virgilio do Carmo da Silva, hamutuk ho Padres Concelebrantes sira Vigararia Ermera, Dili no Same. Comissão Oraganizadora  Paróquia Imaculada da Conceição Gleno, Estanislau da costa Ximenes  hateten: Iha tinan ida liu ba, Ilas São João Paulo lao fo volta Diocese Baucau no tinan ida ne’e, oportunidade diak ida ba Diocese Dili liu-liu Paróquia Gleno sai hanesan uma nain OPIÃO. Tan ne’e, Ilas São João Paulo II sei horik Iha Paróquia Gleno hahu ohin 21 de Maio 2017 too 22 de Outobro 2017.

Nia haktuir tan: Ilas São João Paulo II ne’e sei lao haleu iha Minicípio Ermera laran tomak. Tuir programa nebé iha katak hahú ho Paróquia Gleno, hafoin ba iha Paróquia Ermera, Paróquia Hatulia, Paróquia Atsabe, Paróquia Letefoho no mai fali Gleno no fila hikas ba Railaku. Tan ne’e, ami sei prepara horário oinsa atu organiza fila-fali atu nune’e Ilas São João Paulo II de bele Cobre Ermera laran tomak.

Presidente Conselho nee haktuir tan katak: depois de Vigararia Ermera ne’e, sarani hotu-hotu começa dia 19 de Outobro, Diocese 3 nebe mak iha Timor laran: DILI, BAUCAU no MALIANA se concentra hotu iha Paróquia Gleno hahu housi 19 too 22 de Outobro. Hafoin iha 22 de Outobro ita sei entrega hikas Ilas São João Paulo II ba Diocese Maliana nebé mak sei liu housi Paróquia Hatulia.

Tan nee, husu sarani sira nia contribuição atu nune’ karaik Ilas São João Paulo ba iha ita boot Paróquia no ita boot sira nia estação no mos iha ita boot sira nia suco, husu ita boot sira atu contribui atu nune’e Ilas são João II bele haraik buat balu ou haraik hela matak malirin ba povu Ermera laran tomak.(C)

Foinsa’e 600 Resin Simu Sacramento Comfirmação

DCDD – Foinsae 300 resin iha Paróquia Maria Auxiliadora dos Cristão Comoro Dili, Tersa Feira foin lalais ne’e Simu Sacramento Comfirmação(Crisma). Eucaristia Santa ne’e preside housi Dom Virgilio do Carmo da Silva hamutuk ho Padres Concelebrantes. Ba Foinsae sira Dom Virgilio hateten: Sacramento Baptismo, Eucaristia no Comfirmação ka Crisma ne’e tuir ita nia doutrina hanaran Sacramento sira Iniciação sarani nian. Sacramento tolu ne’e tengki salva guarda unidade ida. Ita tenki hatene katak atu simu sacramento Comfirmação ida ne’e atu completa graça Baptismo nian. Iha Comfirmação ka Crisma aumenta graça Baptismo nian, hametin liu tan imi nia relação ho Maromak Aman, haburas liu tan imi nia união ho Jesus Cristo, hariku liu tan mos iha imi rahun diak oin-oin Espirito Santo nian, kesi imi ba iha Uma Creda, hakbiit imi ho força Espírito Santo nian, tenik Dom Virgilio ba Crismando sira iha Paróquia Maria Auxiliadora Comoro (23/05/2017).

Mahein Diocese Dili nee haforsa tan: Hahalok Espírito Santo nian ne’e laos deit ohin mak ita koko maibé Espírito ida ne’e horik kleur ona iha Uma Creda no halo buat oin-oin kedas ona wainhira Creda ne’e hahu. Iha Pentecostes ho Espírito Santo mak Maromak transforma buat nebé mate nian ba moris, housi buat nebé ta’uk ba aten brani, housi buat nebé terus nian ba ksolok, housi buat nebe mamuk ita bele haré tamba iha nebá Espírito nebé haksumik hela laos tun ba ema ida de’it maibe tun ba ema hotu-hotu, Uma Creda tomak. Presença Espírito Santo ne’e laos hanesan mehi ida maibé força ida iha ita nia moris, fó moris iha ita nia fuan, muda ita nia Indetidade no visão foun ida nudar sarani, nudar foinsae ida. Espírito ida ne’e mos fó hanoin mai ita katak força ativo Maromak nian ida ne’e mak transforma ema ida no ba mundo. Laiha presente ida nebé boot liu Naí Maromak haraik ba mundo no ba ita ema duqué Espírito Santo. Ida nee mak Don no graça ida nebé boot liu ona Na’i Maromak haraik ba ita ida-idak. Papél Espírito ida ne’e nian tulun ita atu descobre buat nebé lós no diak Maromak nian iha ita.

Ba Crismando sira, Mahein Diocese Dili hateten: Presença Espírito Santo nian iha imi sai hanesan biveiro ida foun ho imi nia identidade no visão foun mos atu hodi ohin ba oin wainhira hau atu halo buat ruma, hau precisa consulta ho advogado ida nee, Paráclito ida, Espírito ida nebé iha ha’u. Ita hotu iha Espírito ida nebé ita precisa harohan, fanun buat nebé ha’u atu halo diak ou lae, contra ha’u nia consência ou buat nebé ha’u halo ne’e hahalok sarani nian ou lae ka hahalok gentio ninian!

Dom Virgilio recomenda mos katak: hakasan atu lao nafatin iha dalan nebé diak, imi precisa iha plano moris nian; Jovem ida-idak tenki iha plano kona ba moris saida mak hau mehi kona ba futuro. Sê hau mehi ba futuro hakarak sai aman ou inan ida nebé diak karik sai Inan aman ida oinsa! Hakarak sai Política ou líder ida nebé diak atu ukun rai ida ne’e ou Creda ida ne’e karik atu sai Líder ida oinsa! Tamba nee atu sai matenek exige esforço, sacrifício estuda makas hahú kedas agora.(C/A)

Paróquia Maria Auxilidora Comoro Completa tinan 25

DCDD – Quata Feira foin lalais ne’e (24/05/2017), Paróquia Maria Auxiliadora Comemora nia existência nudar Paróquia ba dala 25 (Bodas de Prata). Iha comemoração ne’e participa housi Mahein Bispo de Dili ao mesmo tempo hodi preside Eucaristia Santa relaciona ho loron Padroeira Paróquia Comoro nian hamutuk ho Pároco no Padre concelebrante sira. Iha Eucaristia Santa ne’e Dom Virgilio haklaken: Parabenes ba Padre Pároco, Conselho Paroquial no sarani sira no família sarani Salesiano tomak nebé ohin iha Paróquia ida nee marca tan história boot ida hodi completa tinan 25. Sê ita compara karik ho ema ida ita dehan; Paróquia Maria Auxiliadora ne’e laos tan ona bebé, laos tan ona labarik, laos tan ona foinsae maibe ema nebé otas nian ona, ema adulto. Ita haré housi Geografia karik ita bele dehan hare fila fali ba tinan 25 liu ba ita bele dehan uluk Paróquia nia rai nia luan ne’e boot, la aumenta no nafatin hanesan uluk, maibe ita hare ba ema ita dehan katak fatin atu halo uma nian mak laiha ona. Hanesan ema dehan ema barak laos lori deit solução, maibe wainhira aumenta ema dala barak mos aumenta problema. Ne’e duni molok atu hakat mai loron boot ida ne’e, Paróquia ida ne’e halo buat barak hanesan preparação oi-oin, dalan oi-oin atu forma sarani sira atu sira hatene sira nia fiar, hatene sira nia Paróquia no hatene nia Creda. Maibé sasukat saida mak atu bele sukat sarani sira nia fiar Paróquia Maria Auxiliadora nebé completa aniversário 25, maibé fiar sarani nian nebé iha Paróquia Maria Auxiliadora ne’e lao tuir tinan nebé sira celebra ou Paróquia tuan fiar sarani nian sei nurak nafatin! Sê paróquia celebra tinan 25 no sarani sira nia fiar avansa liu ona hanesan tinan 50, ida ne’e mak acontece ha’u ata fó parabéns.

Dom Virgilio recomenda mos katak : Koko atu reflecte tamba imi iha Inan ida, Maria Sarani sira nia tulun nebé iha tinan naruk hirak ne’e nia laran lao ho ita boot sira nia família no lao iha comunidade ida ne’e loron kalan. Inan ida nia presença atu ajuda oan sira atu haburas nia fiar iha domin no esperança. Ita contente maibe ita mos tenki hanoin iha momento histórico ne’e comvida ita sarani ida-idak hahú housi labarik, foinsae, família atu hafoun imi nia domin ba Maria sarani sira nia tulun. Ne’e katak koko atu saran ita nia-an, ita nia klamar, ita nia plano, ita nia preucupação ba Nia liman, hafoun ita nia saran-an ho fiar metin hanesan São Bernardo iha Nia Oração nebé dehan; “Inan Vírgem ami sei la kole atu halai ba ita, atu husu tulun housi Ita basá to’o ohin loron sidauk rona iha ema ida nebé ba husu ita Nia tulun no ita fila kotuk! Ohin Nain Feto husu buat ida ba ita hotu: haboot ita nia atenção ba malu, tulun atu ita bele iha abilidade atu servi malu. Tamba ne’e iha momento histórico rua ne’e hakarak husik hela liafuan rua ne’e: Atenção no Abilidade atu servi. Ida ne’e mak dalan atu lori Paróquia ne’e ba oin no dalan atu hasantu ita nia moris, ita nia família, iha Comunidade no País.

Iha biban nee mos Bispo Dili Dom Virgilio do Carmo da Silva lança Primeira Pedra ba Residência Paroquial Paróquia Maria auxiliadora comoro.(C)

”HO MARIA PEREGRINO IHA ESPERANÇA, HO MARIA PEREGRINO IHA PAZ.”

DCDD –loron 13 Fulan Maio tinan tinan, Cerda Universal comemora festa aparição Nossa Senhora de Fátima ba labarik oan nain 3: Francisco, Jacinto no Lúcia. Iha tinan ida nee Creda Universal comemora ona Centenario Aprição iha Fátima. Além ne’e Creda Local Timor Leste nia mos sarani tomak liburan iha Largo Nossa Senhora da Conceição Lecidere Dili hodi comemora mos aniversário nee. Iha comemoração nee preside housi Bispo de Dili Dom Virgilio do Carmo da Silva, acompanha mos ho presença housi Encaregado Vaticano nian iha Timor Leste, Padres, Madres Seminaristas no sarani tomak. Iha biban importante nee, Dom Virgilio hateten: Ita hotu nebe ohin haliburan iha nain Feto nia oin, ita mai ho centimento ida, mai ho preucupação ida. sê ita loron hirak ne’e hare karik reportagem RTP nian no ita hare oinsa ema rihun nebé lao ain Cilómetros halo perigrinação ba Fátima la sura kole, la hare ba distância, sira la’o tamba razão ida, tamba causa ida ho sira nia motto perigrinação nebe dehan: ”ho Maria perigrino iha esperança, ho Maria peregrino iha paz.” Nune’e mos sira la moe atu conta buat diak oin-oin, graça oin-oin nebé sira hetan liu housi interseção ita nain Feto Fátima ninian.

Dom Virgilio haktuir mos katak: Ita mos koko ona Inan lalehan nia diak.  Iha funu, iha situação defícil nia laran família hirak nune’e mos ema nain hirak mak halai ba buka tulun husi Inan ida ne’e, sê mak iha ita nia leet la hatene Nain Feto, sê mak iha ita nia leet wainhira iha susar laran la halai ba Inan nia tulun! Ita ida-idak iha ita nia história atu conta, povo Timor, sarani Diocese Dili, família sira, liu-liu ita nia família nain 40 nebé ohin iha ne’e par 25 nebé atu renova sira nia fidelidade 25 anos de Matrimónio e ba sira nebé mos ba 50 anos ninian hamutuk ho ita nia Presidente da República nune’e mos ho Primeiro Ministro ita reconhece no consiente ho Inan ida ne’e nia papel iha ita nia knar, iha ita nia moris, iha ita nia família, iha ita nia nação, iha ita nia história nudar povo no rai ida nebé uluk kedas consagra tiha ona ba Inan ne’e nia tulun no ita hanaran ita nia-an Timor Terra de Santa Maria, ne’e duni povo no rai ne’e la iha razão atu la hatene nain Feto.

Dom Virgilio hateten: Ohin hamutuk ho Creda Universal, hamutuk ho Santo Padre no sarani tokon ba tokon hamrik iha Santuário Fátima nebé celebra Centenário Aparição Fátima nian, nune’e mos Canoniza Pastorinho sira ita hakarak hatete ba Nain Feto Obrigado! obrigado tamba domin nebé la conhece fronteira, tinan atus ida liu ba iha Fátima liu husi nia aparição halo ema sente Maromak nia presença besik no Maromak moris duni iha sira let. Ho aparição Fátima halo ita sente duni Inan ida ne’e, ne’ebe loron kalan lao nafatin ho ita iha ita nia ksolok no terus. São Bernardo dehan: ”Nain Feto ami la kolen atu buka Ita basá too oras ne’e, ami sidauk rona katak Ita fila kotuk ba ema nebé buka Ita nia tulun.”

Dom Virgilio reforsa tan : iha aparição lori sinal nebé kona los ema nia fuan, acontecimento nebé halo ema hakfodak, laos deit ba sira nebé fiar, maibe ba mos sira nebé fiar laek. Acontecimento nebé laos contrário ho ita nia fiar lori duni mensagem nebe Jesus haklaken, haklaken duni Maromak nia domin bolu ita ba Conversão, bolu ita atu halo penitência ho Maria Peregrino iha Esperança, Peregrino iha Paz, tamba esperança ho paz ne’e mak ita ohin mai hamutuk iha ne’e, hanesan uluk nune’e mos ohin nain feto mos bele husu mai hau, bele husu mai ita ida-idak, oinsa mak hau hanoin kona ba Nain Feto Maria nia domin mai hau nudar Inan ida, maibe hau koko nafatin atu hadok an husi Cruz! nune’e mos oinsa hau hakarak atu sai Maria nia oan sê hau la hakasan atu sai uluk nanain dicípulo nebé Jesus hadomi, ho ida ne’e ita bele dehan Jesus bele saran nia Inan ba hirak nebé la fiar iha Nia ka lae!

Dom Virgilio haktuir tan: Papa Paulo VI wainhira koalia kona ba devoção ba Maria nia dehan; ita nia devoção ba Maria tenki caracterisa ho atitude haat ne’e: hatene Maria, hadomi Maria, Imita Maria no habelar Maria. La too deit hatene no hadomi, hatene hadomi imita no habelar devoção ida ne’e. Maria nia fidelidade extraordinário duni no ida ne’e mak ita hatene, admira, ita imita no ita hadaet.Tan nee, mensagem Fátima nian comvida ita atu fila fali ba Maromak. Liafuan nebé ita rona bebeik comversão, dalabarak ita moris liu iha moris liu husi influênsia oi-oin mai husi laran nune’e mos husi liur halo ita nia fiar ba valor no princípio moris nian nakdoko, iha sociedade nebé tendência isin nian makas, dalabarak halo ita lakon tiha valor sira fiar nain, valor sira verdade, justiça no domin nian, dalaruma mos tendência isin nian obriga mos ita atu fan ita nia fiar, fan ita nia valor, fan ita nia Cultura, ita nia lisan hirak nebé sai tiha ona ita nia identidade.

Dom Virgilio mos apela mos katak sarani ida tenki matan moris neon nain nafatin ho Influência sira hotu nebé mai fo hanoin nebé furak maibe falun veneno ruma iha laran atu estraga ita nia cultura, ita nia lisan, ita nia identidade no família. tan ne’e fila fali ba Maromak, fila fali ba ita nia-an no ita nia família.

Relaciona ho loron mundial família nian Bispo hateten: ohin ita hanoin mos loron mundial família nian, tan ne’e par hatnulu husi Paróquia sira Dili laran hakarak atu agradece ba Maromak liu housi interseção Nain Feto nian inspira nafatin sira atu fiar malu maski iha dificuldade oi-oin. Família sira nebé completa ona sira nia tinan limanulu (50) nune’e mos tinan ruanulu resin lima (25) nudar kaben nain, momento ida atu hato’o ita nia parabens ba sira, se ita husu karik ba sira saida mak chave ba ita boot sira nia perseverança, saida mak chave ba ita boot sira nia fidelidade?  Maibe hau fiar sira hotu iha ne’e hau fiar hanesan Nain Feto iha Cruz hun sira mos atu aprende housi Nain Feto atu hatene rona, obidece no hatene hadomi. Oração ba ita sarani mak sai hanesan fundamento no hametin nafatin relação família nian hanesan ita nia Amo Papa dehan: oração mak haboot ema nia fuan, oração prepara ema nia fuan atu simu malu no atu simu Maromak, maibe sê ita la reza ita nia fuan toos ba malu oinsa mak ita bele hamnasa ba malu, maibe se wainhira mak ita nia fuan ne’e toos ba malu ita aprende mak husu Maromak atu hamamar uluk ita nia fuan atu ita bele halo diálogo.

Ita harohan liu husi Nain Feto Fátima atu bele haboot ita nia fuan, prepara ita nia fuan ba buat diak hotu nebé Maromak sei haraik mai ita, wainhira ita nia fuan sira loke duni ba esperança, loke duni ba paz, ida ne’e mak sinal as liu agradecimento nian la too obrigado deit, maibe ita nia sinal concreto ruma ita tenki renova hamutuk iha Nain Feto nia oin buat hotu bele wainhira ita hare Maromak nia hakarak nudar ordem laos opção sê Maromak nia hakarak, Maromak nia liafuan mak ita tau hanesan opção ida nee sei sai obstáculo, maibe nudar sarani mai ita kaer metin ba Amo Papa nia liafuan no ita hamutuk Nain Feto ita hafoun ita nia desejo atu harohan buka Maromak nia tulun liu housi harohan Na’i Maromak bele loke nafatin ita nia fuan no ita nia laran atu ita bele hari nafatin Timor foun ida mundo foun ida família foun ida iha Centenário ita Nain Feto nian.(C/a)