Bispo

BISPO DA DIOCESE DE DILI

 

Dom. Virgilio do Carmo da Silva,SDB, moris iha loron 27 fulan Novembro tinan 1967, iha Venilale, Diocese Baucau. Inan naran Dona Isabel da Silva no Aman naran Senhor José do Carmo. Padre Virgilio mak oan ba dala rua husi maun alin nain 6, hanesan ; (1) Manuel Joscelino do Carmo, (2) Padre Virgilio do Carmo da Silva, (3) José Lucas do Carmo da Silva, (4) Gualdinho do Carmo da Silva, (5) Padre Gui do Carmo da Silva, no (6) Nilton do Carmo da Sliva.

Estudo:

Remata tiha nia estudo iha Escola Salesiana, Fatumaca, tama kedas ba Sociadade Salesiana Dom Bosco nian no halo nia Profissão ba dala uluk iha loron 31 fulan Maio 1990. Tuir kedas, iha tinan 1990 to tinan 1998, husi nia Congregação haruka nia ba halao nia estudo Filosofia no Teologia iha Manila. Iha loron 19 fulan Março 1997, nia halao nia Profissão Perpétua no iha loron 8 fulan Dezembro tinan 1998 simu Ordenação Nailulik nian. Além de Tetum, lian seluk nebe nia koalia mak; Bahasa Indonésia, Português, Inglesa no lian Italiana.

Vida Pastoral:

Fila fali mai Timor Leste no Padre Virgilio do Carmo da Silva,SDB halao knaar hanesan tuir mai nee;

1999-2004: nudar Formadoar ba Aspirante sira iha aspirantado Fatumaca;

2004-2005: nudar Ecónomo ba uma Formação iha Venilale no Vigário Paroquial;

2005-2007: Consegue remata Licenciatura iha Teologia Espiritual iha Universidade Pontifícia Salesiana Roma;

2007-2014: Mestre Noviço;

2009-2014: Direitor Uma Salesiana nian no “Escola Técnica Superior de Dom Bosco iha Fatumaca;

Iha fulan Janeiro tinan 2015, simu knaar nudar Provincial Salesiana nian. Nia hanesan mos membro Conselho Provincial Salesiano nian no Conselho Presbiteral Diocese Baucau nian. Mandato nee nia simu ba dala rua hodi halao knaar hanesan Vice Secretário Executivo iha Conselho nebe hanesan.

Iha loron 30 fulan Janeiro tinan 2016, Nunciatura Apostólico iha Timor Leste publica katak, Santo Padre, Papa Francisco hili ona Padre Virgilio do Carmo da Silva, SDB nudar Bispo Diocese Dili nian. Consagração Episcopal nian iha loron 19 fulan Março 2016 iha Tasi Tolu.