shadow
Diocese de Dili > NOTÍCIAS

Quinta-Feira, II Semana Tempo Comum (ANO A)

Primeira Leitura          1Sm. 18. 6-9, 19. 1-7

Lia husi primeiro livro Samuel nian:

Iha loron hirak neba, ema Israel oan sira to’o daudaun mai, naton lós ho loron nebe David fila mai, wainhira nia oho tiha ema filisteu. Nune’e, husi cidade tomak  israel nian, feto sira sai ba hasoru liurai Saul, hodi dansa no hananu ho sistros no tamborin sira lian, haklalak ho ksolok ba mai. Wainhira sira dansa, hananu hela hodi dehan: “Saul oho rihun ida, no David oho rihun sanulu”. Saul sai hirus teb-tebes, tan buat ne’e la fó ksolok ba nia, nia hakilar hodi deha: “imi fó rihun sanulu ba David no mai ha’ u rihun ida de’it. Hela de’it atu fó ukun ba nia”. Hahu husi loron neba, Saul haré David ho matan la lós. Nune’e, nia dehan ba nia oan Jónatas no ba atan sira hotu atu fó mate ba David. Jónatas, Saul nia oan, tan David nia belun kmanek, fó hatene tiha ba nia nune’e” “ Ha’u aman Saul, buka atu oho ó. Husi aban ba oin ó sei matan moris neon na’in; ó ba hasubar-an tiha iha fatuk koak ruma, hodi hela mesa-mesak iha neba. Ha’u sei sai ho ha’u aman, atu ba fatin nebe ó hela ba; nune’e, ha’u sei ko’alia ho nia kona ba ó hodi buka hatene buat nebe sei mosu, no ha’u sei fó hatene buat ne’e ba ó”.

Jónatas ko’alia di’ak kona ba David ba nia aman Saul, hodi dehan: “bele karik, liurai keta halo áat ba atan David. Nia la halo buat áat ida ba ó, ninia hahalok fó folin wain tebes ba ó. Nia hodi fó nia-an ba mate mak oho tiha ema filisteu, nune’e, Na’i haraik tiha vitória boot ida ba Israel tomak. Ó rasik haré hodi haksolok tiha duni. Tansá ó hakarak hafo’er-an ho ida nebe nia ran mós, hodi fó ba mate David be la sala? “Saul rona tiha Jónatas nia liafuan sira, halo juramento ida ne’e: “ tebes duni, nu’udar Na’i moris hun, nune’e, nia sei la mate!” nune’e, Jónatas bolu tiha David hodi hato’o liafuan hirak ne’e nia. Hafoin, lori hamutuk David ba Saul, no David hala’o nafatin nia serbisu hanesan uluk.

Maromak Futar Lia.

 

Salmo Responsorial                                                                                                               Sal. 55(56). 2-3, 9-10c-11, 12-13 (R. 5b)

Refrão : Ha’u laran metin iha Maromak, ha’u la ta’uk buat ida!!! Repete-se 

Tulun ha’u, Na’i

Basá, lor-loron sira hanehan ha’u no buka ha’u mate;

Iha oras tomak, ha’u funu baluk sira tau liman mai ha’u,

Sira lubun boot hakarak ha’u mate. Refrao

 

Na’i, ita hateten ha’u moris áat,

Ha’u maromak, simu ba ha’u mata-wen.

Ha’u funu baluk sira sei hakiduk,

Wainhira ha’u bolu ita naran. Refrao

 

Nune’e, ha’u sei hatene katak na’i ha ha’u,

Tan ha’u  maromak haraik tulun mai ha’u;

Maromak nia laran di’ak ha’u haklaken;

Ha’u sei celebra na’I lia menon. Refrão

 

Ha’u laran metin iha na’i, sei la ta’uk buat ida;

Ema sira sei bele halo sá mai ha’u?

Maromak, ha’u sei halo tuir lia ha’u hakotu,

Ha’u sei terus tan ita naran nia gloria. Refrão

 

Aclamação                                                                                                                                                                                         2Tm. 1. 10

Refrão : Aleluia, Aleluia!! Repete-se

Jesus cristo, ita nia maksoyn. Nia harahun mate;

Nia halo moris nabilan housi Evangelho. Refrão

 

Evangelho                                                                                                                                                                                         Mc. 3. 7-12

Na’i Jesus Cristo nia Evangelho nu’udar São Marcos haktuir:

Iha tempo neba, jesus sai tiha ba tasi ho escolante sira, no ema lubun boot ida nebe mai husi Galileia ba ho nia. No mós ema mai husi Judeia, husi Jerusalém, husi Idumeia, husi Jordão nia sorin ba no husi rai Tiro no Sidon nian mai ema lubun boot ida hasoru Jesus, tan sira rona Jesus halo buat di’ak oi-oin. Nune’e, nia hateten ba escolante sira atu prepara ró ida ba nia, tan ema barak, atu la bele hale’u metin nia. Lós duni, ema barak hetan isin di’ak, tan ne’e, ema moras no ema sira be hetan isin di’ak, tan ne’e, ema moras no ema sira be hetan terus, hot-hotu halai hodi hakbesik ba nia, buka atu kona de’it na’i. Espírito áat sira, wainhira haré Jesus, monu iha nia ian hodi hakilar, dehan: “ita mak Maromak nia oan”. Maibe, Jesus ho lian maka’as bandu sira atu keta hateten sai ba ema ida kona ba nia.

Lia Maksoyn.

Quarta-Feira, II Semana Tempo Comum (ANO A)

Primeira Leitura           1Sm. 17. 32-33. 37. 40-51

Lia husi primeira Livro Samuel nian:

Iha loron hirak neba, David ba hatudu-anliurai Saul. David dehan ba nia: “Ema ida la bele laran susar tan Golias. Ita atan ne’e sei ba hafunu ho filisteu ida ne’e’. Maibe, saul hatan ba David: “ Ó la bele ba hasoru filisteu ida ne’e, hodi halo funu ho nia. Ó sei kiik, maibe, mia mane funu-na’in housi kedas foinsa’e mai”. David hatan ba nia: “Na’i nebe soi ha’u housi leão no fahi fuik siak sira liman, sei soi ha’u housi ema filisteu ida ne’e nia liman”. Saul dehan ba nia: “Nune’e sá bele ba, Na’i ba hamutuk ho ó”.

David káer tiha ai-tonka, hili ho fatuk kabuar lima iha mota laran, tau tiha iha nia kohe be hein bibi nian. Hafoin, ho tali fafirun (funda) iha hahu la’o hodi ba hasouru filisteu sira ne’e. Ema ne’e ho nia escudeiro hakbesik-an daudaun mai David. Uainhira filisteu ne’e foti matan haré tiha David, hakribi nia tan nia labarik foin-sa’e liu, be furak no kmanek. Nune’e, nia dehan ba David: “Ha’u kala asu ida, atu ó mai hasouru ha’u ho ai-tonka ida?” Filisteu ne’e, ho nia maromak sira naran fo malisan ba David. Hafoin, dehan ba David: “Mai ba, ha’u se’i fó ó isin ba manu sira lalehan nian no balada  fuik sira”. Maibe David hatan ba filisteu ne’e: “ Ó mai hasouru ha’u ho surik, besik kro’at no diman, maibe, ha’u ba hasoru ó hodi Na’i lalehan leten áas ba Nia naran, Maromak funu-na’in Israel sira nian, nebe ó funu hasouru. Ohin duni Na’i sei saran ó mai ha’u liman. Ha’u sei oho hodi tesi ó ulun, no ohin duni ha’u sei fó ó isin maten ba manu sira lalehan nian no balada sira rai nian. Nune’e, mundo tomak sei hatene katak iha Israel, iha Maromak ida, no ema hotu sei haré katak  la’os housi surik no besi kro’at mak Na’i haraik salvação. Basá, Nia mak Na’in funu nian no sei saran imi, iha ami liman”. Uainhira filisteu ne’e hahu la’o mai atu mai hasouru david, David mós halai maka’as ba hasouru filisteu ne’e. Hafoin, nia hatama liman iha kohe, hasai fatuk ida ho tali fafirun(funda) hatuda fatuk ne’e hodi ba kona lolos iha filisteu ne’e nia réen-tós. Fatuk ne’e tama tiha iha nia réen-tós nia monu hodi mate. Nune’e, ho fatuk ida, tali fafirun nian, mak  David manan filisteu ne’e hodi oho nia laos ho surik ida iha liman. David halai ba hamriik iha filisteu ne’e nia oin, sa’e tiha ba nia leten losu sai ida be mate daudaun ne’e nia surik housi surik fatin, hodi tesi nia ulun fatuk. Filisteu sira haré sira nia asua’in mate, hahu hali tiha hotu.

Maromak Futar Lia.

 

Salmo Responsorial                                                                                                                               Sal. 143(144). 1, 2, 9-10 (R. 1ª)

Refrão : Rahun-di’ak ba Na’i, fatuk inan ha’u heli-an fatin nian!!! Repete-se

Rahun-di’ak ba Na’i,

Fatuk inan ha’u horik fatin nian.

Nia hanourin mai ha’u liman ba hafunu,

ha’u liman fuan ba funu. Refrão

 

 Na’i mak ha’u mahein,

hau biit no maksoin;

 Nia tulun ha’u no hein ha’u,

Na’I be haraik povo mai ha’u. Refrão

 

Ha’u Na’i, ha’u Maromak,

Ha’u sei hananu ba ita knananuk foun ho harpa lian,

Ba ita be haraik vitória ba liurai sira

Hodi soi ita atan David. Refrão

 

Aclamação                                                                                                                                                                                            Mt. 4. 23

Refrão : Aleluia, Aleluia!! Repete-se

Na’i jesus haklaken liafuan di’ak reino nian no

fó isin di’ak ba moras sira iha povo nia leet. Refrão

 

Evangelho                                                                                                                                                                                           Mc. 3. 1-6

Na’i Jesus Cristo nia Evangelho nu’udar são Marcos haktuir:

Iha tempo neba, jesus tama hikas fali iha sinagoga, iha nebe iha ema mane ida be liman ida maten. Fariseu sira fihir jesus husi besik atu haré, nia fó isin di’ak karik ba mane ne’e iha loron sábado, nune’e, sira bele kesar nia. Jesus dehan ba mane nebe iha liman ida be maten ne’e: “Ó hamriik tiha iha klaran neba”. Hafoin, dehan ba sira: “iha ,loron sábado iha licença atui halo di’ak ka áat; fó moris ka fó mate? Maibe, sira nonok hela de’it. Nune’e, ho laran nakali, jesus haré tiha ba sira be iha sori-sorin, neon kraik ho fuan to’os sira ne’e, dehan ba mane ne’e: “halolo liman ba”. Nia halolo tiha liman, nia liman sai di’ak tiha fali. Fariseu sirasai hamutuk ho ema herodiano sira, ba lalais kedas tur hamutuk, hodi ko’alia hasoru jesus, atu bele halakon tiha nia.

Lia Maksoyn.

Terça-Feira, II Semana Tempo Comum (ANO A)

Primeira Leitura                  1sm. 16. 1-13

Lia husi primeira Livro Samuel nian:

Iha loron hirak neba, Na’i lia tun ba profeta samuel: “To’o winhira ó nia laran susar tan saul, tan ha’u lakohi atu nia sai Israel nia liurai? Hakonu ho óleo ó nia vazo hodi la’o ba. Ha’u haruka ó ba jesus Belém nian, basá, ha’u hili tiha ona liurai ida, iha sira oan mane sira leet”. Samuel hatan: “oinsá, mak ha’u sei ba iha neba? Saul hatene karik, sei haruka oho ha’u!” Na’i dehan teni ba nia: “Ó sei lori ba karau-vaka oan ida no ó sei dehan: ‘Ha’u mai atu hasa’e sakrificio ida ba Na’i’.Ó sei konvida jessé atu ba sakrificio ne’e; ha’u sei hatudu ba ó buat sá mak ó sei halo: ó sei tau mina ba ida nebe ha’u dehan ba ó.”samuel halo tuir buat nebe Na’i dehan ona ba nia hodi la’o tuir dalan ba belém nian. Katuas sira cidade nian ho haklak ba hasoru nia hodi husu: “profeta, ó mai tan damen?” Nia hatan ba sira: “ nune’e duni. Ha’u mai atu hasa’e sakrificio ida ba Na’i. Hamos didiak imi-an ba, no mai ho ha’u atu hasa’e. Samuel hamos tiha jessé ho nia oan sira, hodi convida sira ba sacrifício.

Wainhira sira to’o, samuel haré tiha Eliab, hodi hanoin: “ lós duni, ema be atu simu mina iha ona Na’i nia oin”. Maibe, Na’i dehan ba samuel: “Ó la bele haré ba nia oin be furak no mós la blele haré ba ninia áas, basá, ha’u hakribi nia. Maromak nia haré la’os hanesan ema nian; ema haré husi nia furak, maibe, Na’i haré husi fuan”. Jessé bolu Abinadab no halo nia liu husi samuel nia oin. Maibe, Samuel dehan: “ ida ne’e mós la’os ida nebe atu Na’i hili”. Jessé haruka nia oan na’in hitu liu husi Samuel nia oin, maibe, Sameul dehan lolós ba nia: “ Na’i la hili sira ne’e ida”. Nia husu ba jessé:  “ ó nia oan mane sira iha hotu ona ne’e? Jessé hatan ba nia: “ sei falta ida ikun, nebe hein hela bibi”. Samuel hatan ba nia: “ haruka bolu nia mai, basá, ita sei la han, wainhira nia seidauk mai iha ne’e”. Nune’e jessé haruka bolu; nia nabilan-modok-mean, matan furak no isin kmanek. Na’I dehan ba Samuel: “Hamriik ba hodi tau mina liurai nian ba nia; mak nia duni!” Samuel káer iha vazo mina nian, tau mina ba nia ulun iha nia maun sira leet. Husi loron ida neba ba oin, Na’i nia espirito horik iha david. Hafoin, Samuel hahu la’o hodi fila ba Ramá. 

Maromak Futar Lia.

 

Salmo Responsorial                                                                                                                  Sal. 88(89). 20, 21-22, 27-28 (R. 21ª)

Refrão : Ha’u hetan David, Ha’u atan!!! Repete-se

Ita dehan ba ita santo sira

iha visão ida uluk liu,

Ha tau kaibauk ba ema barani ida;

Ha’u foti Ha’u manu-ain iha povo leet. Refrão

 

Ha’u hetan David, Ha’u atan,

Ha’u tau mina santo ba nia;

Ha’u liman sei tahan nia nafatin,

Ha’u liman sei fó biit ba nia. Refrão

 

Nia sei harohan mai Ha’u: “ Ó mak ha’u Aman,

ha’u Maromak no ha’u atulun”.

Ha’u sei foti nia nu’udar Ha’u oan doben,

Boot no kmanek iha liurai sira rai klaran nian. Refrão

 

Aclamação                                                                                                                                                                                  cf. Ef. 1. 17, 18

Refrão : Aleluia, Aleluia!! Repete-se

Ita Na’i Jesus Cristo nia Aman leno ita laran nia matan

atu ita bele haré esperança nebe Maromak bolu ita ba. Refrão

 

Evangelho                                                                                                                                                                                      Mc. 2. 23-28

Na’i Jesus Cristo nia Evangelho nudar São Marcos haktuir:

Iha tempu neba, Jesus liu housi to’os trigo nian iha loron sábado ida, no escolante sira, uainhira la’o, hahu hili trigo fulin sira. Tan ne’e, fariseu sira dehan ba Jesus: “Haré to’ok ba, oinsá mak sira halo serbisu iha loron sábado be bando”. Jesus hatan ba sira: “Imi seidauk lê buat nebe David halo, uainhira nia precisa no senti hamlaha, nia rasik ho nia maluk sira? Nia tama iha Na’i nia uma, iha tempu na’ilulik boot Abiatas nian hodi han tiha pão sira nebe rai hela iha fatin santo, nebe na’ilulik sira de’it mak bele han; no fó mos pão ne’e ba nia maluk sira”.

Jesus dehan ba sira: “Loron sábado bé iha, halo ba ema, no ema la’os ba loron sábado. Ne’e duni, Mane Maksoi loron sábado mós nia Na’in.

Lia Maksoyn.

Segunda-Feira, II Semana Tempo Comum (ANO A)

Primeira Leitura                  1Sm. 15. 16-23

Lia housi primeira Surat Samuel nian:

Iha loron hirak neba, profeta Samuel dehan ba liurai Saul: “Rona lai buat nebé Na’i dehan mai ha’u iha kalan ne’e”. Saul hatan ba nia: “Ne’e sá, koa’lia ba!” Samuel haktuir tan: “Maski hodi ó haré rasik, ó senti-an ema kiik, ó sei la sai ulun uma-kain sira Israel nian? Na’i halo ó santo atu sai Israel nia liurai, foti ó ba serbisu ne’e, hodi dehan: ‘Ba, hodi halakon ema Amalec sira be laran áat; hafunu ho sira to’o sira mohu-lakon’. Tan sá ó la halo tuir Na’i nia lian, hamonu-an tiha ba riku-soi, hodi halo tiha buat nebé la monu ba Nia matan?” Saul hatan ba Samuel: “Maibé ha’u halo tuir duni Na’i nia lian! Ha’u halo tiha serbisu nebé Nia haraik mai ha’u, ha’u lori Agag, liurai Amalec nian mai, no halakon tiha ema Amalec sira. Housi bibi-malae sira leet, housi karau-vaka sira leet, povo hasai tiha nu’udar riku-soin di’ak tebes nebé atu ba mahu-lakon nian, hodi hasa’e sacrifício ba Na’i, ó Maromak, iha Guilgal”. Maibé, Samuel hatan ba nia: “Bele fó ksolok ba Na’i buat-karan no sacrifício sira nu’udar halo tuir Nia lian? Halo tuir, folin di’ak liu fali sacrifício kmanek sira, no laran metin midar folin liu fali bibi-malae sira nia bokur. Basá, foti-an mak nu’udar salan ema loko-an nian, no laran metin ba sala nu’udar sala boot hodi adora maromak falsu. Wainhira ó hakribi Na’i nia liafuan, Nia mós sei hakribi ó be nu’udar liurai!”.

Maromak Futar Lia.

 

Salmo Responsorial                                                                                                            Sal. 49(50). 8-9, 16bc-17, 21, 23 (R. 23b)

Refrão : Ba ema nebé halo tuir dalan lós, ha’u sei hatudu Maromak Nia Maksoyn!!! Repete-se

La’os tan ó sacrifício sira, Ha’u siak ó,

Ó nia buat-karan sira iha nafatin Ha’u oin;

Maibé ha’u sei la simu karau oan housi ó luhan,

No mós bibi-malae housi ó bibi luhan. Refrão

 

Tan sá ó haktuir bei-beik ha’u ukunfuan,

No lori iha ó ibun ha’u nia aliança,

Ó be hakribi Ha’u Nia hanourin,

No la moris tuir Ha’u Nia lei?Refrão

 

Ha’u sei la nonok. Ha’u sei siak ó

Hodi soe ba ó oin, ó nia hahalok áat.

Ha’u naran di’ak hôrik iha fuan be hahi,

Ema laran mós de’it mak

Sei haré maksoyn Maromak Nian. Refrão

 

Aclamação                                                                                                                                                                                         Heb. 4. 12

Refrão : Aleluia, Aleluia!! Repete-se

Maromak nia liafuan moris no bo’ok maka’as, bele hatene

lolós buat nebé ema hanoin no hakarak iha nia fuan. Refrão

 

Evangelho                                                                                                                                                                                      Mc. 2. 18-22

Na’i Jesus Cristo nia Evangelho nudar São Marcos haktuir:

Iha tempo neba, João nia escolante sira ho fariseu sira halo dadaun jejum. Sira mai dehan ba Jesus: “Tansá João ho fariseu sira nia escolante halo jejum, Jesus hatan ba sira: “Belun sira noivo nian bele halo jejum, wainhira noivo sei hamutuk ho sira? Wainhira noivo sei hamutuk ho nafatin ho sira, sira labele halo jejum. Loron sei to’o, wainhira ema sei hasai tiha noivo; iha loron ne’e, mak sira sei halo jejum. Ema ida la suku hena tuan kuak ho hena foun. Oin seluk, hena foun les hena tuan nia baluk halo kuak nakles liu tan. Ema ida la fui tua foun iha kusi tuan. Lae, tua halo nakfera kusi, lakon tua, lakon kusi. Tua foun tau iha kusi foun!”

Lia Maksoyn.

BAPTISMO HALO ITA COMPREENDE TERUS

Ema fiar nain ida wainhira halo oração lamenta ba Maromak nunee:”Nai, ita boot iha nebé? Tansa ita la tulun no salva ema barak nebé oras nee terus, hamlaha, kiak? Maromak hatan:’Hau tulun ona sira, Hau mos cria o atu o mos tulun sira’”.

São João Evangelista semana nee (Domingo Comum II, Ano A 2020) apresenta hikas figura João Baptista nebé semana kotuk ita reflecta hamutuk ona ninia papel. Semana nee, dala ida tan, João Baptista mosu tan hodi halo confirmação final kona ba pessoa Jesus Cristo hodi tenik: “Ne’e Maromak nia Bibi-Oan nebé kasu mundo nia salan”. João Baptista utiliza termo Sagrada Escritura tuir contexto cultural povo Israel nian, nebé, aprezenta figura ema nudar bibi malae (cordeira/domba). Bibi malae simboliza lalaok nebé atento, hakmatek, carinho, la iha tendência ba sala.

João Baptista nia declaração kona ba Cristo nudar Maromak nia Bibi-Oan nebé kasu mundo nia sala, too horas nee mos ninia eco (gelombang) ou ninia sabor sei morin ba ita sarani otas nee.

São Pedro iha nia carta temi Cristo nudar “bibi oan sala laek no la iha fitar” (1Ped 1,19), klean liu tan iha carta São Pedro nee tenik; ‘wainhira hetan hotak, Nia la hotar hasoru; wainhira Nia terus, Nia la fo ameaça, maibé, Nia saran deit ba Ida nebé bele tesi lia tuir justiça’ (1Ped 2,23). Ho expressão hirak nee, Pedro nudar Cristo nia vigário (primeiro Papa da Igreja Católica) hakarak justifica katak; juiz ou defensor ba ema nebe indefeso mak Maromak!

Em primeiro, ita precisa entende didiak sentido husi Pedro nia declaração sira iha nia carta. Sentido kmanek liu mak haraik-an. Jesus husik Ninia dignidade nudar Maromak Oan no koko adapta tuir cultura no situação ema bai-bain nian. Tansa? Tanba se ita nudar ema fiar nain la consegue compreende ou descreve sentido kona ba terus (penderitaan), ita precisa lori kakutak hodi buak hatene molok aplica iha fiar. Terus nebé, ema ida tau iha kabas maske nia la comete sala, nee justamente nudar segredo ida nebe ema nunca bele explica no entende!

Oinsa ho Jesus rasik? Jesus mos, absolutamente supera capacidade ema nian. Iha relato Evangelho, wainhira haré feto faluk iha husi Naim nebé ninia oan mane mate, ou iha ocasião seluk Marta ho Maria sira nia tristeza wainhira sira nia maun ázaro mate, Jesus la hatene atu halo saida, para além de mosu sentido laran luak hodi tanis no halo ação milagorsa sira.

Nu’udar sarani Católico, resposta hodi resolve problema ema hirak nebé la comete sala maibé, hetan terus nak ita contempla ba figura Jesus Cristo. Tanto iha Ninia doutrina sira tanto iha Ninia lalaok sira, Jesus la explica kona ba sentido terus maibé, ho atitude. Jesus mai hodi enfrenta terus ida laos atu fo declaração maibé, halo ita oinsa compreende ho matan fiar nian kona ba sentido terus. Nia mai hodi simu mos ema hotu nia naha terus atu ita mos bele hatene halo sacrifício ou acto de solidariedade ba ita nia maluk sira. Nee mak sentido husi terus nebé ita labele explica ho termo ou linguagem maibé, ho hahalok. Nunee, Jesus foti naha ema seluk nian tanto físico no espiritual.

Tanba nee mak Jesus além de actua hodi kura ema moras maibé halo mos ema moris hias husi mate. Ação ida nee hakarak justifica katak Jesus iha poder sobre todas as coisas inclui Jesus iha poder ba mate. Ho lia fuan seluk ita bele compreende nunee; Jesus kasu no salva ema seluk. Cura físico nebé nudar dalan ida atu ita hatene katak Jesus mos bele cura ita nia moras espiritual ema nian.

Nee significa saida? Boot no kmanek tebes terus/sacrifício ida nebe ema ida halo ba ema barak nia diak liliu ba ita nobun nebé fiar iha Cristo Jesus. Iha cristo nudar redentor maske nia la iha pecado maibé, terus eh sacrifício nudar realidade rua nebé ita la bele separa. Tuir sasukat fiar sarani nian, terus/sacrifício laos ita mak buka maibé, ita sente rasik, nee habesik liu tan ita ba Maromak. Maromak rasik mak tuir los simu terus nudar inocente iha sentido pleno. Jesus iha Ninia paixão (terus) hanorin ita hatene sentido terus ao mesmo tempo encoraja (fo aten brani) hodi fahe diak husi Maromak nebé ita hetan ba maluk sira.

Iha contexto Timor nian, ukun nain sira fahe poder eh cargo ba ninia maluk partidário sira liu husi cargo oi-oin nebe existe maske nia maluk nee la iha capacidade. Sira considera partidário sira mos iha direito tanba sira mak luta eh terus hamutuk iha partido laran. Jesus laos hanorin ida nee. Jesus hanorin ita haé ema seluk nebé la iha relação familiar nudar ema nebé ita bele halo netik baut ruam ba, tuir capacidade. Iha contexto político, Jesus mos hakarak político sira nebe barak mos Cristão Católico, atu luta ba bem comum laos ba bem partidáruia ou bem família. PM Taur Matan Ruak sempre dehan: hisik kosar ba moris diak. Se terus la existe, então ita ema sei la interece ba malu no lakon sentido domin/laran luak ba ema (próximo).

Wainhira ita koalia kona ba terus, ida nebé importante liu laos explica ninia sentido maibé, hahalok concreto mak bele halo ema compreende saida mak terus. Jesus simu naha todan hodi selu ema hotu nia sala iha processo terus; ema baku too hedi iha Cruz ba ema hotu atu compreende sentido terus. Santa Tereza de Calcuta mos fil-fila dehan; ‘liman nebé fo ajuda kmanek liu ibun nebé reza ou koalia barak’. Ohin loron ema atu tulun ema seluk, bolu jornalista ba halo cobertura ou hasai foto publica iha Media Social. Jesus laos hakarak ida nee. Jesus hakarak liu mak hahalok nebé ema la hare maibé Maromak hare. Se uluk Jesus mai ona hodi tulun ita kasu ita nia sala/pecado sira, então horas nee, liu husi Baptismo Jesus bolu ita hodi aplica mos lalaok nee iha moris sarani nian. Assim Seja e Bem Haja (Ignas Lopes)

II Domingo iha Tempo Comum (ANO A)

Primeira Leitura                    Is. 49, 3. 5-6

Lia housi Livro Profeta Isaías:

Nai lia tun mai Ha’u dehan: ”o Ha’u atan, husi o Ha’u sei hatudu Ha’u kbiit”. Oras nee, Nai hateten mai Ha’u, Nia be halo Ha’u iha Ha’u inan nia knotak, atu halo Ha’u sai nia atan, hodi halibur Jacob, hodi halibur Israel besik ba Nia. Tan Ha’u hetan kmanek iha Na’i nia oin, Maromak mak ha’u nia kbiit. Ne’e duni, Na’i dehan mai ha’u: ”la to’o sai deit Hau atan, atu harí Jacob nia knua, atu halibur Israel oan sira be sei moris; Ha’u sei halo o hanesan naroman ba nação hot-hotu, atu Ha’u nia Maksoin to’o ba rai hot-hotu”.

Maromak Futar Lia.

 

Salmo Responsorial                                                                                                                         Sal 39 (40), 2, 2ab, 7-8ª.  8b-9. 10

Refrão : Na’i ha’u mai halo tuir Ita nia hakaran!!! Repete-se

Ha’u tau ha’u nia neon tomak iha Na’i:

Nia se tilun mai, rona ha’u lian .

Ha’u tau knananuk foun iha ha’u ibun,

Hahí hananu ha’u nia Maromak. Refrão

 

Na’i, Ita la hakarak sacrifício,

La hakarak mos buat karan;

Ita la husu buat karan no na’an maten,

Maibé, Na’i, Ita loke de’it ha’u ibun. Refrão

 

Tan nee ha’u dehan: Na’i ha’u mak nee,

Atu halo tuir Ita nia hakarak!

Ne’e de’it ha’u hakarak, ha’u nia Maromak,

Ita nia ukun iha ha’u laran tomak. Refrão

 

Ha’u haklaken ita nia justiça

Iha povo tomak siraleet;

Na’i, Ita hatene lolos

Katak ha’u la taka ha’u nia ibun. Refrão

 

Segunda Leitura                                                                                                                                                                              1Cor 1, 1-3

Lia husi São Paulo nia surat ba sarani sira iha Corinto:   

Paulo, bolu ona atu sai Cristo Jesus nia apóstolo, tuir Maromak nia hakarak

Ba sira hotu nebé simu ona Cristo Jesus nia kmanek, sira nebé bolu ona atu sai santo, hamutuk ho sira hotu nebé harohan, iha naran fatin ida, ita Nain Jesus Cristo nia naran, sira nia Na’in no ita nian: kmanek no damen ba imi hotu, husi ita Aman Maromak, husi Na’i Jesus Cristo.

Maromak Futar Lia.

 

Aclamação                                                                                                                                                                                             Jo. 1, 29

Refrão :  Aleluia, Aleluia!! Repete-se

Ne’e Maromak nia Bibi-Oan

Nebé kasu mundo nia salan. Refrão

 

Evangelho                                                                                                                                                                                       Jo. 1, 29-34

Na’i Jesus Cristo nia Evangelho nu’udar São João haktuir:                 

Iha tempo neba, João Baptista hare katak Jesus mai hasoru nia, nia haklaken: “Ne’e Maromak nia Bibi-Oan nebé kasu mundo nia salan. Kona ba Ida nee mak ha’u hateten: ‘ha’u liu tiha, mai Mane ida nebé liu dook ha’u, tan Nia uluk liu kedas’. Ha’u la hatene Nia, maibé, atu Nia bele mosu iha Israel, mak ha’u mai sarani ho we”. João fo sasin ida: “Ha’u hare Espírito Santo tun mai husi Lalehan hanesan falur ida, mai tur iha Nia leten. Ha’u la hatene Nia maibé, ida nebé haruka ha’u sarani ho we mak dehan mai ha’u: ‘Ida be o hare Espírito Santo tun ba Nia, hodi hela iha Nia, Nia mak sarani ho Espírito Santo’. Ha’u hare duni, ha’u fo sasin katak Nia Maromak nia Oan”.

Lia Maksoyn.

Sábado, I Semana iha tempo Comum (ANO A)

Primeira Leitura   1Sm. 9. 1-4, 17-19, 10. 1ª

Lia housi primeira livro Samuel nian:

Iha loron hira nebá, iha ema ida naran Quis, housi uma-kain Benjamin nian, Abiel nia oan, Seror nia oan, Becorat nia oan, Afiá nia oan. Benjamin nia ema ne’e kmanek no barani tebes. Nia iha oan ida naran Saul, klosan forte no kmanek tebes.

Iha ema hotu Israel nia leet, la iha ida kmanek liu nia; housi kbás ba leten nia áas liu ema hotu. Saul nia aman Quis lakon tiha kuda balun, dehan ba nia oan: “Ó lori ho atan sira ne’e ida hodi la’o ba buka kuda sira”. Sira la’o housi foho sira Efraim nian liu housi rai Salisá, maibé la hetan kuda sira. Hafoin, sira liu fali ba rai salim, maibé, la hetan mós. Sira liu fali housi Benjaimin nia rain, maibé la hetan liu kuda sira.

Maibé, profeta Samuel haré hetan tiha Saul, Na’i dehan ba nia nune’e: “Iha ne’e, iha hela ema nebé Ha’u dehan ba ó: nia mak sei ukun Ha’’u nia povo”. Saul hakbesik-an tiha ba Samuel, iha odamatan leet, hodi dehan ba nia: “Halo favor, profeta nia uma iha nebé?” Samuel hatan ba nia: “Profeta mak ha’u. Ó ba housi ha’u oin hodi sa’e ba sala ida leten; ohin, imi rua sei han hamutuk ho hau. Aban dader ha’u sei husik ó ba, no ha’u sei dehan hotu ba ó buat nebé iha ó fuan”.

Iha loron tuir mai, Samuel káer tiha iha vaso óleo nian ida, hodi fui iha Saul nia ulun leten. Hafoin, hako’ak tiha nia, hodi dehan: “Na’i mak tau mina santo ba ó, nu’udar ulun Israel nian, nebé Nia povo. Ó mak sei ukun Na’i nia povo, no sei soi nia housi funu  baluk sira liman nebé hale’u nia”.

Maromak Futar Lia.

 

Salmo Responsorial                                                                                                                    Sal. 20(21). 2-3, 4-5, 6-7 (R. Cf. 12ª)

Refrão : Na’i, Ita wé nia kbiit mak ksolok liurai nian!!! Repete-se

Liurai haksolok, Na’i, tan kbiit Ita we nian,

ho ksolok wa’in haré Ita vitória.

Ita haksolok iha nia fuan nia hakaran,

hodi simu nia harohan. Refrão

 

Ita ba hasouru nia, tau coroa ba nia,

hakonu nia ho bensa kmanek wa’in.

Nia husu moris ba Ita, Ita haraik duni ba nia,

loron naruk tinan-ba-tinan. Refrão

 

ita kbiit haboot nia glória,

Ita hafutar nia ho naran boot no ukun.

Ita haraik ba nia Ita bensa rohan laek;

Ita hakonuk nia ho ksolok iha Ita futar oin. Refrão

 

Aclamação                                                                                                                                                                                             Lc. 4. 18

Refrão : Aleluia, Aleluia!! Repete-se       

Na’i haruka ha’u haklaken Lia-foun ba kiak sora no fó

hatene maksoyn ba dadur sira. Refrão

 

Evangelho                                                                                                                                                                                       Mc. 2. 13-17

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus sai fali ba tasi ibun. Ema lubun boot ba hasouru Nia, Nia hahu hanourin sira. Tuir dalan, Nia haré Levi, Alfeu nia oan, tur hela iha nia fatin hodi kobra osan. Jesus dehan ba nia: “Tuir Ha’u mai”. Nia hamriik kedas hodi tuir Jesus.

Wainhira Jesus han hela iha Levi nia uma, publican balun no ema maksalak sira tur hamutuk iha mesa ho Jesus no escolante sira, basá, barak housi sira leet tuir Nia. Escriba sira housi fariseu sira nia sorin hare katak Jesus han hamutuk ho ema maksalak no publicano sira, sira dehan ba escolante sira: “Tan sá mak Nia han ho hemu ho ema publicano no maksalak sira?” Jesus rona  hotu ne’e, hatan ba sira: “Laos ema isin di’ak mak precisa doutor, maybe, sira nebé moras. Ha’u la mai atu bolu ema sira nebé di’ak, maibé, ema maksalak sira”.

Lia Maksoyn.

Sexta – Feira, I Semana Tempo Comum (ANO A)

Primeira Leitura           1Sm. 8. 4-7, 10, 22ª

Lia husi primeiro livro Samuel nian:

Iha loron hirak nebá, katuas sira hotu Israel nian ba halibur malu no ba hasoru Samuel iha Ramá. Sira dehan ba nia: “ó katuas ona, ó nia oan sira la tuir o nia hahalok. Tan ne’e, ó haraik liurai ida mai ami atu bele ukun ami hanesan povo selu-seluk iha”. Lia “ haraik liurai ida mai ami atu bele ukun ami”, la haksolok Samuel, nebé lori Samuel hodi harohan ba Na’i. Na’i lia tun ba nia, dehan: “Rona povo nia lian iha buat hotu nebé nia husu ba ó. Basá, la’os ba ó mak sira hakribi; maibé sira hakribi ha’u, atu ha’u la bele ukun tan iha sira”.

Samuel hato’o Na’i nia lia hotu ba povo, nebé husu liurai ida ba nia. Hafoin, dehan teni: “liurai nebé atu ukun imi, nia biit mak ne’e:Nia sei bolu imi nia oan sira, atu kaer nia kareta no dada nia kuda sira; sira sei la’o uluk iha nia kareta oin. Nia sei foti sira nu’udar ulun ema rihun nian no ema limanulu nian. Nia sei haruka sira halo nia to’os no silu nia batar; sei halo kilat funu nian ba nia, sei halo sasan ba nia kareta. Nia sei bolu mós imi nia oan feto sira, atu halo mina-morin ba nia, te’in no tunu pão ba nia. Nia sei hasai imi nia to’os be di’ak liu, hanesan to’os uvas nian no ai-oliveira nian atu fó ba nia ema sira nebé serbi nia. Nia sei hasai mós baluk sanulu husi imi nia to’os nia folin, no to’os uvas nian atu fó ba ema sira be iha nia uma laran no atan sira. Nia sei hasai mós imi nia atan mane no feto hotu, hamutuk ho imi nia karau vaka no kuda sira be di’ak liu, atu hala’o nia serbisu. Nia sei hasai baluk sanulu husi imi nia bibi sira, no imi rasik sei sai nia atan. Iha loron ne’e, imi sei bolu Na’i, tan liurai nebé imi rasik hili, maibé, Na’i sei la rona imi”.

Maibé, povo la kohi rona tiha Samuel nia liafuan, hodi dehan: “lae! Ami tenki iha liurai ida atu bele ukun ami! Ami mos hakarak hanesan nação sira seluk. Ami hato’o ba Na’i. Maibé, Na’i hatan ba nia: “ ó halo tuir buat nebé sira husu hodi haraik ba sira, liurai ida”.

Maromak Futar Lia.

 

Salmo Resposorial                                                                                                                               Sal. 88(89). 16-17, 18-19 (R. 2ª)

Refrão : Ha’u sei hananu ba nafatin Na’i nia laran di’ak!!! Repete-se

Rahun- di’ak ba povo nebé hatene hahi ita,

Be sei la’o iha ita futar oin naroman.

Lor-loron nia haklaken ita naran,

No buka hetan biit iha ita justiça. Refrão

 

Na’i, ita mak nia biit,

Hodi ita boot nia graça, ita hahi nia biit.

Nia mak ami maksoin,

Ami liurai mak Israel nia Santo. Refrão

 

Imi tama housi odamatan no uma klabis templo nian,

Hodi agradeçe, hananu knananuk sira.

Imi agradeçe ba Na’i, hahi Nia naran. Refrão

 

Na’i di’ak tebes!

Nia laran-luak rohan laek.

Nia laran metin halekar housi otas ba otas. Refrão

 

Aclamação                                                                                                                                                                                             Lc. 7. 16

Refrão : Aleluia, Aleluia!! Repete-se

Profeta boot sira ida mosu tiha ita nia leet;

Maromak mai haré nia povo. Refrão

 

Evangelho                                                                                                                                                                                         Mc. 2. 1-12

Na’i Jesus Cristo nia Evangelho nu’udar São Marcos haktuir:

Iha tempo nebá, jesus tama fila fali iha cafarnaum, ema rona katak nia hela iha uma. Ema wain tebes mak mai halibur-an hamutuk, sai naresin iha odamatan oin. Jesus hahu tatoli liafuan ba sira. Sira hatudu ba nia ema moras isin-maten nebé ema na’in haat mak lori. Tan ema wain resin iha nebá, sira la bele lori ba to’o nia;sira loke uma kakuluk iha fatin nia hela ba nia leten; halo tiha kuak ida, sira hatun hadak nebé hatoba hela ema moras isin-mate ne’e. Jesus, tan hare ema sira ne’e nia fiar, nia lia tun ba moras: “Ha’u oan, ó nia sala sira simu ona perdua”. Ema eskriba balu tur hela iha nebá nebé hanoin iha sira laran: “tan sá nia koalia hanesan ne’e ? nia hateten aat Maromak ema sé mak bele perdua salan? Maromak de’it mak bele”. Maibé, jesus hatene tiha ona buat sá sira hanoin iha sira laran. Nia husu ba sira: “ tan sá imi hanoin hanesan ne’e iha imi laran ? nebé mak ladún susar dehan ba moras isin maten: ‘Ó simu ona perdua ba ó salan”, eh dehan : ‘Ó hamriik tiha ba, káer ó hadak, la’o ba?’ Di’ak! Atu imi hatene Mane Maksoyn iha rai ne’e iha kbiit atu fó perdua ba salan, “Ha’u haruka ó”, Nia lia tun ba moras isin-maten: “Ó hamriik, foti ó hadak, la’o ba ó uman”. Ema ne’e hamriik, foti kedas nia hadak, sai ba daudaun iha ema hotu nia oin, halo ema tomak hakfodak hodi hahi Maromak, dehan: “Ami la dauk haré buat ida hanesan ne’e”.

Lia Maksoyn.

Quinta-Feira, I Semana Tempo Comum (ANO A)

Primeira Leitura                     1Sm. 4. 1-11

Lia housi primeira livro Samuel nian:

Iha loron hirak nebá, ema filisteu sira halibur malu atu hafunu hasoru Israel. Israel oan sira sai ba hasoru atu hafunu ho sira. Sira ba hela iha Eben-Ezer no filisteu sira hela iha Afec. Filisteu sira hamriik hodi hafunu hasoru Israel oan sira. Sira hahu funu hasori malu.Filisteu sira manan tiha Israel oan sira hodi oho sira tomak nebé hamutuk iha ema rihun haat. Povo fila fali ba nia fatin; katuas sira Israel nian, dehan: “ tansá ohin Na’i halo ita lakon iha ema filisteu sira oin? Ita ba Silo hodi lori Na’i nia arca aliança atu nia mai hela iha ita leet, hodi bele soi ita husi funu baluk sira liman”. Nune’e povo ba lori husi Silo mai na’i lalehan no rai nia arca aliança, nebé hatur hela iha querubim sira leet. Eli nia oan mane na’in rua, Hofni no Fineias, ba hamutuk Maromak nia arca tama iha acampamento, Israel oan sira oan sira hotu hakilar ho lian maka’as nebé sira lia ba to’o rai tomak. Ema filisteu sira rona lian ida ne’e, dehan: “katak sá lian maka’as ida ne’e iha ema Hebreu sira nia acampamento?” sira hateten katak Na’i nia arca to’o ona iha acampamento. Nune’e, filisteu sira tauk hodi dehan ba malu: “Maromak mai ona iha acampamento”. Sira dehan ho lian maka’as: “ita susar ona! To’o oras ne’e buat hanesan ne’e seidauk mosu! Ita susar ona! Sé mak sei soi ita husi Maromak biit wain ne’e nia liman? Nia mak hakanek Egipto iha rai fuik maran ho castigo oi-oin. Filisteu sira, aten brani ba, laran metin ba, atu imi keta monu ba Hebreu sira, hanesan sira monu ona ba imi. Imi brani ba hodi hafunu”.filisteu sira ba hafunu: Israel oan sira sai lakon tiha, ida-idak halai ba sira nia tenda. Lakon boot teb-tebes , tan husi soldado sira Israel, ema rihun tolunulu mak mate. Ema lori halai tiha Maromak nia arca. Eli nia oan na’in rua, Hofni ho Fineias mós mate.

Maromak Futar Lia.

 

Salmo Responsorial                                                                                                             Sal. 43(44). 10-11, 14-15, 24-25 (R. 26d)

Refrão : Na’i, soi ami ba, tan Ita laran-luak!!! Repete-se

Oras ne’e, Na’i, ita hakribi no husik ami,

Ita la la’o ona iha ami soldado sira oin;

Ita halo ami hakiduk husi funu baluk sira oin,

Sira be rai kunan mai ami, lori ami riku-soi. Refrão

 

Ita halo moe ami iha ami maluk sira oin,

Ema sira be hale’u ami sai hirus tebes;

Ita halo ami nu’udar buat folin laek

Iha nação sira leet,

Povo tomak hamoe ami. Refrão

 

Na’i, hader ba! Tan sá ita dukur?

Hader ba! Keta hakribi ami ba nafatin.

Tan sá ita subar ita futar oin,

Hodi haluhan ami susar no ema hanehan ami? Refrão

 

Aclamação                                                                                                                                                                                            Mt. 4. 23

Refrão : Aleluia, Aleluia!! Repete-se       

Na’i Jesus haklaken liafuan di’ak reino nian no fó isin

di’ak ba moras sira iha povo nia leet. Refrão

 

Evangelho                                                                                                                                                                                      Mc. 1. 40-45

Na’i Jesus Cristo nia Evangelho nu’udar São Marcos haktuir:

Iha tempo nebá, ema mane ida moras lepra, mai buka Jesus, hakneak ba rai hodi husu ba nia: “ita hakarak karik, ita bele fó isin di’ak mai ha’u. Jesus hanoin nia, lolo liman ba nia hodi káer nia. Hafoin dehan: “Ha’u hakarak: ó sei hetan isin di’ak”. Iha oras ne’e kedas lepra lakon, nia hetan isin di’ak. Jesus haruka nia ba, hodi dehan  ho oin maka’as: “keta dehan ba ema ida; maibé, ba hatudu ó nia-an ba sacerdote, hodi hasa’e buat nebé Moisés haruka hasa’e, atu fó hatene katak ó hetan isin di’ak. Maibé, nia sai, ba fó hatene kedas buat ne’e iha fatin hotu. Nune’e, Jesus la bele ona tama hatudu-an iha naran cidade ida. Nia la’o de’it iha liur, iha rai fuik; husi fatin hotu, ema mai buka nia.

Lia Maksoyn.

Quarta – Feira, I Semana Tempo Comum (ANO A)

Primeira Leitura          1Sm. 3. 1-10, 19-20

Lia housi primeiro livro Samuel nian:

Iha loron hirak nebá, foin-sa’e Samuel serbí hela Na’i. Sacerdote Eli tau hela matan ba nia. Iha oras ne’e, Na’i nia lian rona dala ruma no haré dala ida dala ida. Loron ida, Eli toba hela iha nia fatin; nia matan malahuk daudaun ona, la bele haré ona. Áhi-oan Maromak Nian seidauk hamate; Samuel toba hela iha Na’i nia kadunan, iha nebé iha hela Maromak Nia Arca. Nune’e, Na’i bolu Samuel. Samuel hatan: “Ha’u mak ne’e”. Samuel  halai ba hasouru Eli, dehan: “Ha’u mak ne’e, tan ita bolu ha’u”. Maibé, Eli hatan ba nia: “Ha’u la bolu ó. Fila ba toba”. Nia fila ba toba. Na’i bolu hikas fali nia: “Samuel”. Samuel hader, ba hasouru Eli dehan: “Ha’u mak ne’e, tan ita bolu ha’u”. Eli hatan ba nia: “Ha’u oan, ha’u la bolu ó. Fila ba toba”. Samuel seidauk hatene Na’i, seidauk hatene mós Nia liafuan. Na’i bolu Samuel ba dala tolu. Nia hader hodi ba hasouru Eli, dehan: “Ha’u mak ne’e, tan ita bolu ha’u”. Nune’e, Eli hatene ona katak Na’i mak bolu foin-sa’e ne’e. Eli dehan ba Samuel: “Ó ba toba; bolu ó karik, ó sei dehan: ‘Na’i, ko’alia ba, Ita atan rona’”. Samuel fila, hodi ba toba iha nia fatin. Nune’e, Na’i mai hodi hakbesik-An ba nia, bolu nia hanesan dala hirak be uluk: “Samuel, Samuel”. Nia hatan: “Na’i, ko’alia ba, Ita atan rona”. Samuel sai boot ba daudaun. Na’i hamutuk ho nia no la husik liafuan ida housi nia monu ba rai. Povo tomak Israel nian, housi Dan to’o Bersabeia, hatene lolós Samuel nu’udar Na’i nia profeta.

Maromak Futar Lia.

 

Salmo Responsorial                                                                                         Sal. 39(40). 2 e 5, 7-8a, 8b-9, 10-11 (R. cf. 8ª e 9ª)

Refrão : Na’i, ha’u mai atu halo tuir Ita hakaran!!! Repete-se

Ha’u bolu Na’i ho laran metin,

Nia sée tilun mai ha’u hodi rona ha’u.

Nia tau iha ha’u ibun knananuk foun ida,

Knananuk ida atu hahí ita Maromak. Refrão

 

Itaboot la kohi sacrifício no buat karan,

Maibé loke ha’u tilun atu rona.

Ita la husu buat-karan eh na’an maten;

Tan ne’e ha’u dehan: “Ha’u mak ne’e!”. Refrão

 

Iha Livro Lei nian, hakerek nanis ona,

Sáida ha’u atu halo tuir.

Ida ne’e mak ha’u hakarak, ha’u Maromak,

Ita ukunfuan hela iha ha’u fuan laran. Refrão

 

Ha’u sei haklaken Ita justiça ba ema lubun boot;

Na’i, Ita hatene katak ha’u la taka ha’u ibun.

Ha’u la subar Ita Na justiça iha ha’u fuan okos;

Ha’u haklaken Ita Nia fidelidade no maksoyn. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se       

Ha’u Nia bibi sira rona Ha’u lian, Na’i lia tun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                      Mc. 1. 29-39

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus sai housi sinagoga hamutuk ho Tiago no João; sira ba Simão ho Adré sira uman. Simão nia banin feto moras isin manas, toba hela.

Sira fó hatene ba Jesus, nebé besik ba nia, káer nia liman, halo nia hamriik. Isin manas husik kedas nia, nia hahu fó han sira.

Loraik, loron monu liu tiha, ema hahu lori ba to’o Nia, moras sira hotu no sira hotu be diabo tama laran, ema cidade tomak mai halibur-an hamutuk iha odamatan. Jesus fó isin di’ak ba ema barak nebé terus moras oi-oin, hodi duni sai diabo barak. Maibé, Nia la husik diabo sira ko’alia, basá, sira hatene Nia sé.

Dadersan nakukun, Nia hamriik, sai ba fatin fuik ida hodi hahu harohan. Simão ho nia maluk sira buka tuir, to’o hetan tiha Nia, sira dehan: “Ema hotu buka Ita!”. Maibé, Nia hatan ba sira: “Ita ba knua sira iha sorin balu ba, atu Ha’u hanourin mós iha nebá, basá, tan ne’e mak Ha’u mai”. Nia ba iha rai Galileia tomak, hanourin iha sinagoga sira no duni sai demónio sira.

Lia Maksoyn.