Seara

 

História

Boletim Eclesiástico Diocese Dili nian “SEARA” hahú haré naroman iha Janeiro 1994, basá iha tinan neba Amo Bispo D. Jaime Garcia Goulart no Nailulik sira hanoin katak: Diocese nebé foin moris daudaun ne’e tenki iha mos Boletim ida hanesan Diocese bara-barak namkari  lemo-lemo iha raiklaran ne’e. Lós duni, Boletin ne’e mak buat ida importante no preciso teb-tebes atu hadalan, atu tau hamutuk servisu, atu hamoris kbi’it, atu hato’o opinião no atu halao iniciativa sira. Boletin ne’e mak hato’o ba sarani sira, Amu Papa no Amu Bispo sira nia lian tamba hakerek hela iha ninia laran Papa no Bispo Diosece sira nia decisão no sira nia hakaran kona Pastoral no quidado ba povu sira, nebé Cristo tau iha sira liman.

Tuir SEARA nia primeiro Director, Pe. Ezequiel Enes Pascoal, nia ain fatin no hanesan Boletim misionário ida fulan-fulan ka fulan rua, SEARA hato’o servisu hotu-hotu nebé halao missão sira Diocese Dili nian no kona ba Evangelização iha Timor Lorosa’e; Nia hato’o mos Amu Papa lian midar no Amu Bispo Diocese Dili nia hannourin sira ba Timor Lorosa’e oan sira hotu. Maibé, La’os ne’e de’it. SEARA nia tahan sira nakloke mos atu simu hakerek sira kona ba História Timor nian, Aiknanoik, Lia-Dolin sira, Lia-Adat sira, Costume Tradicional Timor nian, etc… no tan Nailulik Misionário sira nia surat ruma, nebé haktuir sira nia servisu Pastoral…

 

Iha 28 Julho 1958, Pe. Enes Pascoal husik tiha Timor, hodi ba descansa iha nia rain, Amu Bispo D. Jaime saran servisu SEARA nian ba Pe. Leoneto Vieira do Rego. Director ida ne’e, Muda Boletim nia kulit no halo format bo’ot uitoan. Maibé, hakerek sira iha laran nafatin tuir uluk nian.

Wainhira Pe. Jorge Barros Duarte simu fali SEARA iha 30 Setembro 1959, Boletim ne’e sai Cultural liu. Nune’e, nia assinante sira mos sai wa’in liu tebes. SEARA la tama de’it ona iha nailulik no Misionário sira nia uman, maibé, nia tama mos iha ema matenek sira nia uman, iha Timor Lorosa’e laran no mos iha estrangeiro (liur ema tasi balu). Maibé, servisu Pastoral no kna’ar wa’in la fó fatin atu Director halo SEARA bele sai fulan-fulan hanesan fou-foun nia foin moris. Nune’e, nia hahú sai fulan rua, dala ruma mos fulan ha’at mak foin sai dala ida, tuir hak’as an no sacrifício sira nebé Nailulik Director halo to’o tinan 1964 nia klaran. Hahú ba tempo ne’e SEARA nia moris kotu tiha.

 

Iha 1966, wainhira Diocese Dili celebra nia tinan ruanulu resin lima (Jubileu osan mutin), Amu D. Jaime Garcia Goulart no Nailulik sira hanoin fali katak: oras to’o ona atu halo moris fali Boletim Eclesiástico, nebé importante teb-tebes no Diocese ida-idak tenki iha. Hanoin tasak tiha, D. Jaime foti Padre Chanceler Pe, Jacinto António Campos ba Director no Pe. José Carlos Vieira  Simplicio ba Editor no Chefe redação. Sira nain rua halo moris duni SEARA, oras nee ho formato Jornal nian, nebé semana-semana, fó sai cultura no informação Religiosa, tuir D. Jaime hakarak no Comunidade sarani Timor lorosa’e nian hein ho laran no neon. Premeiro Número Jornal Semanário SEARA mosu ba naroman hanesan Suplemento Boletim Eclesiástica Diocese nian, tuir dalan nebé Concilio Vaticano II hatudu iha ninia Decreto “Inter Mirifica” kona ba meios sira Comunicação Social nian. Iha No 14 Documento ida ne’e nian, Hakerek Nune’e: “Atu leitor sira nakonu ho Espírito sarani hierarkia Católica no ema Católico sira be rona no tuir sira tenki hakiak no habelar Imprensa Católica lós atu hodi fo formação, hateten sai no halo promossão opinião pública ida nebé lao tuir direito natural, tuir mos Doutrina no Lei Católica sira no mos iha relação ho Igreja ninian moris. Sira tenki hatada ema sarani sira kona ba obrigação atu lé no kna’ar atu halekar Imprensa Católica, atu nune’e, ema sira bele iha Critério sarani kona ba acontecimento sira”(Vat. II, Inter Mirifica No 14). Hodi halo tuir Vat. II nia lia-fuan sira ne’e, mak Pe. Jacinto António de Campos no Pe. José Carlos Vieira Simplicio, hahú fulan Janeiro 1966 halo SEARA la’o lem-lemo Timor Lorosa’e, hodi halo Evangelização no mos lori Igreja Católica nia Doutrina dudun lolo’os ba Timor oan sira hotu housi Comunidade Diocese ida ne’e nian. Tan Pe. Jacinto reforma tiha no Pe. José Carlos fila hikas ba nia rai Açores, Amu Bispo D. José Joaquim Ribeiro fó fali kna’ar Director SEARA nian ba Pe. Manuel Andre Pinheiro iha Janeiro 1969. Nia halo Jornal SEARA, nebé iha Maio 1968 sai semana ru-rua (Quinzenário), halo formato bo’ot hanesan ho Jornal “A voz de Timor”.

 

Iha 1972, Pe. Manuel Pinheiro sai housi Timor hodi fila ba Portugal. Tan  ninia contrato servisu iha Diocese Dili to’o ona rohan. Pe. Martinho da Costa Lopes kaer fali Direção no Edição SEARA nian, hahú fulan Agosto 1972 to’o 1974. Iha tinan ida ne’e, ho acontecimento oi-oin, SEARA mate fali. No kleur tebes.

 

Administrador Apostólico foun, nebé sae iha dia 12 de Maio 1983, hakarak halo moris hi’as SEARA. Nune’e, iha dia 1 de Novembro 1983, nia harí Comissão “Ad Hoc” ida kona ba Comunicação Social ho nailulik sira tuir mai ne’e:

 

Pe. José Alves Martins, SJ (Presidente)

Pe. Alberto Ricardo da Silva (Membro)

Pe. Domingos Morato da Cunha (Membro)

Pe. Rafael dos Santos (Membro)

Pe. Fransiskus A. Sugiarta, SJ (Membro)

Pe.Yosef R.Tani, SVD (Membro)

Pe. Rolando F. Fernandes, SDB (Membro)

Diac. Baltazar Pires, SDB (Membro)

 

Comissão ida ne’e, iha tinan nebá, sente katak; sidauk belé halo bu’at ida, tan la hatene atu hakerek hodi lia ida nebé… Tetun? Português?…eh Bahasa Indonesia…? ne’e duni, SEARA sei toba nafatin iha nono’ok laran. Maibé, Administrador Apostólico nia iniciativa ida ne’e moris nafatin.

 

Wainhira Diosece Dili celebra Tinan Lima nulu iha loron 4 Setembro 1990 to’o loron 4 Setembro 1991, Bispo Carlos Filipe halo tentativa foun, atu hamoris Boletim Eclesiástico. Nia haruka Conselho Pastoral Diosece nian halo estudo kona ba “Nessecidade e Importância dos meios da Comunicação Social na Diocese”. Conselho Pastoral estuda tiha, hato’o ba amo Bispo katak: Diosece Iha Timor Lorosa’e kuran teb-tebes Jornal ida eh Boletim id atu halo Apostulado no Evangelização la’o di’ak liu tan. Tan ne’e, Diosece tenki:

  1. Hakiak kedas Comissão ida ba Comunicação Social ho ninia secção oi-oin;
  2. Hamoris hikas Boletim Eclesiástico eh Jornal SEARA, nebé belé sai Semana rurua;
  3. Sosa material Audio-Visual sira atu hodi hanourin iha Catequese no mos iha escola sira;
  4. Halo transmissão iha Rádio Estado nian Celebração Liturgia sira, hanesan Missa, Tersu;

Atu hala’o Conselho pastoral nia relatório ida ne’e, Bispo fo sai iha 20 Marso 1991 Provisão No13/1991, hodi harí Comissão foun ba Comunicação Social ho Pe. Áureo Gusmão hanesan Presidente no mos Director SEARA nian.

Tuir nafatin Igreja nia roman no hanourin sira nebé mai housi Vaticano II, housi Amo Papa no housi Bispo Diocesano, Comissão foun ida nee, maski kbi’it laek, osan laek, haka’as an duni atu conretisa Bispo nia hakaran no promete atu serbí ba Maromak no ba ninia povu Santo, hodi foti matan lós de’it ba nia lema: “praedicate Evangelium”, nebé nu’udar fitun nabilan, sei hadalan nia nafatin  fatin iha ninia kna’ar Apostólico.

 

Ho Na’i Maromak nia tulun, 12 Maio 1991, loron nebé Santa Igreja celebra 25o dia Mundial das Comunicações Sociais, Comissão ne’e hahú hasai nia lian iha RRI Estação Dili ho programa “Mimbar Agama Katolik”. Tu’ir fali iha Julho tinan ne’e duni (1991), nia fó sai número uluk “SEARA – Boletim Eclesiástico “Diocese de Dili nian. Número ida ne’e mosu mai ho simplicidade hakarak de’it hato’o ba Timor oan sira hotu Amo Papa nia hanourin kmanek sira no Amo Bispo nia lia midar. Nia Moris hi’as iha tinan nebé Diocese Dili Celebra nia Jubileu osan mean, tan nia hakarak sai nu’udar sinal era foun ida ba Diocese, nebé ita hot-hotu hein atu sai diak liu no nabilan liu.

 

Hakarak di’ak wa’in tebes, la kuran; maibé, kbi’it no beran la to’o atu tau matan hodi lidu no bali didiak ita nia TO’OS OAN SEARA, nune’e, trigo bé foin moris de’it, namlaek no mate fali.

 

Iha 1993 mak Amo Bispo rasik no Padre Salesiano sira iha Comoro haka’as an halo moris fali to’o ohin loron. Parabens ba Amo Bispo D. Carlos no Padre Salesino sira, liu-liu ba Ir. Efrem Santos,SDB sira nia dedicação ba Boletim SEARA iha tinan hirak ne’e nia laran. Tan servisu wa’in no todan iha comunidade Salesiana Comoro nian, Amo Bispo muda fali SEARA nia servisu fatin mai iha Câmara Eclesiástica no saran ninia direcção no Edição ba equipa foun ida, nebé hahú hahao servisu housi fulan Outubro 1995 to’o ohin. Team foun ne’e nia emar sira mak nee:

 

  1. Pe, Áureo Gusmão (Director no Editor)
  2. Pe. Peter P.CMF (Director Executivo)
  3. Me. Elsa Fernandes,Fdcc (Tesoureira)
  4. Pe. Eduardus R. Dopo,SJ (Redação)
  5. Drs. Peter Tukan (Redação)
  6. Drs.Y. B. Kleden (Redação)
  7. Drs. Florentino Sarmento (Redação)
  8. Sr. Francisco Nascimento (Redação)

Ikus mai, hau fó sai NaiLulik no ema sira, nebé hala’o servisu ba SEARA, Houri nia moris to’o oras ne’e, sira nia naran:

  1. Pe . Ezequiel Enes Pascoal (Director, 1949-1958)
  2. Pe. Leoneto Vieira do Rego ( Director, 1958-1959)
  3. Pe. Jorge Barros Duarte (Director, 1959-1964)
  4. Pe. Jacinto A. de Campos (Director, 1964-1967)
  5. Pe. Jose C. V. Simplicio (Chefe Redação, 1966-1967, Directo, (1967-1968)
  6. Pe. Manuel Andre Pinheiro (Director, 1969-1972)
  7. Pe. Martinho da C. Lopes (Director, 1972-1974)
  8. Pe. Áureo J. C. Gusmão (Director, 1991)
  9. D. Carlos F. X. Belo SDB (Director, 1993-1995)
  10. Ir. Efrem R. Santos (Editor, 1993-1995)
  11. Pe Áureo J.C. Gusmão (Director e editor 1995)
  12. Pe. Peter P. CMF (Director, Executivo 1995)
  13. Pe. Adrianus Ola Duli (Sub Director, 1997)
  14. Pe. Eduardus R. Dopo,SJ (Redação 1995)
  15. Pe. Domingos S. Soares (Redação 1996)
  16. Pe. Erminold Manehat,SVD (Redação 1997)
  17. Drs. Florentino Sarmento (Redação 1995)
  18. Sr. Francisco Nascimento (Redação 1995)
  19. Sr. Ernesto Ananias da Costa (Redação 1995)
  20. Sra. Esperança da Costa S. (Redacção 1996)
  21. Fernando Gonçalves (Staff 1996)
  22. Fernando do Rosário (Staff 1996)
  23. Mário Soares (Staff 1997)
  24. Sebastião Bosco (Staff 1997)

 

Nu’udar Boletim Diocese nian SEARA pertence ba Timor LoroSa’e oan hot-hotu. Tan ne’e, mak nia tahan sira balu sei nakloke nafatin ba ema sira hotu nebé hakarak hakonu tahan sira ne’e ho sira nia hakerek kona ba buat oin oin.

SEARA, oras ne’e iha mahan Departamento Comunicação Diocese Dili nian no publica trimestralmente hamutuk ho Semanário ITE.