shadow
Diocese de Dili > NOTÍCIAS > Notícias > Labele halimar ho Povo nia Comfiança

Labele halimar ho Povo nia Comfiança

DCDD – DILI – Reitor Seminário Menor Nossa Senhora de Fátima Balide Pe. Ângelo Salsinha declara lia hirak ne’e iha Segunda Feira (31/07/2017) iha nia knar fatin Balide Dili. Pe. Ângelo hateten: Promessa nebé imi promete ona ba povo tenki aplica tamba povo ne’e hare, acompanha no conhece hela ita ida-idak tan Timor ne’e rai kikoan. Tamba ne’e ita promessa hodi cumpre povo hatene no ita la cumpre mos povo hatene tan povo ne’e mak sei halo justiça ba ita nia promessa político sira. Se ita halimar ho comfiança do povo, povo mos sei halimar liu tan ho ita.

Pe. Ângelo Salsinha reforça tan: Povo ida ne’e hatudu ona nia maturidade, nia participação nebé activo conciente iha eleição Presidencial no Parlamental ninian ne’e, liu ona husi sira ne’e  ita labele abuza ho povo. Comforme forma Partido sira ohin loron nebé manan ne’e halo Coligação atu oinsa coresponde saida mak povo nia matenek nebé fo ona confiança mai ita, ita labele viola fali sira, labele abuso fali sira, ita labele halo fali sira lakohi participa ou aban bainrua sira hare fali buat ida ne’e hanesan halimar deit tamba Povo ne’e sagrado ou lulik no voto ninian ne’e sagrado tamba ne’e ema tokon ba tokon, dificiente, katuas eh ferik, ema hotu nia participação no comfiança ne’e ema fo ho fuan no laran tomak, se ita la tane, ita halimar ho voto comfiança nebé fo mai ita, ida-idak decide tuir nia interesse hodi la coresponde ba comfiança povo ninian ne’e lalos, maibé hotu-hotu nia hakarak para forma Governo nebé diak, Governo nebé mak iha estabilidade, iha responsabilidade, iha harmonia, iha paz no justiça, ida ne’e mak ema hotu-hotu hein, ema hotu comfia ba iha elição nebé fo ona.

Pe. Ângelo Salsinha menciona tan: Ondra ida ba Partido sira nebé manan iha eleição no atu forma Governo Inclusão ou Governo ida coligação ka atu forma buat nebé diak tenki coresponde ba povo nia necessidade, povo nia espectativa, povo nia realidade nebé agora sira hakarak no confiança mai ita, tan ne’e, ita mak tenki hanoin no fera ulun hodi hatan. Ita labele halo buat hotu-hotu tamba por  interesse, ida ne’e ita viola povo sira nia confiança nebé sira rasik fo ho honestidade, dedicação, confiança nebé fo mai ita, ita tenki tane no fo hondra ba povu nia confiança ne’e ho ita nia plano, ho Governação ne’ebé ita hari.

Pe. Ângelo Salsinha hateten: Hau hanesan sidadaun, ita hotu hakarak Coligação ida nebé mak inclusão e diak liu hotu-hotu bele participa, maibé nia estrutura iha Governação mak labele boot. se estrutura iha Governação mak boot ne’e bokur ba estrutura deit, povo nunca goja. Tan ne’e,  Governo ida nebé mak tenki tau ema iha nia fatin, hili ema ida-idak tau nia tuir the right man to the right place, tau ema ida-idak ho nia função, nia baground Política, tau nia iha fatin lolos par nia exerse nia função durante tinan lima ne’e nia fo hotu kedas, laos fo metade deit. Tamba ne’e forma Governo ida nebé mak lalika barak no boot demais tamba Timor nia população ne’e tokon ida ho balu, forma Governo ida nebé mak ho estrutura nebé mak kiik, maibe efectivo, esficiente, iha responsabilidade,  consiente hakarak fo, atu partilha laos husu no simu ba ha’u nia grupo ka Partido ne’e lae! Maibé sai liderança atu fo, atu partilha o nia matenek o nia visão, o nia hanoin durante ne’e o iha tiha ona, o tasak tiha ona e buat ida ne’e mak o atu fahe ba povo, servi ó nia povo durante mandato tinan lima nia laran ne’e. Tamba ne’e atu fo buat hotu ba povo no rain, tenki coloca ema ida-idak tuir nia especialidade, atu nune’e ninia dedicação tomak, nia vontade atu servi, vontade atu servisu belke fo hotu ba rai ida ne’e.

Pe. Ângelo Salsinha hateten: Hau nia esperança ba Governo mak ida ne’e ida-idak lao tuir nia knar no papel ida nebé mak iha diálogo entre Governo, Parlamento, Presidente iha harmonia entre sira ne’e. Orgão ida-idak halao nia knar tuir nia função, labele intervem ida ho ida seluk ida-idak ninia função maibé iha diálogo harmonia ba dezenvolvimento povo ida nian tamba povo mak ita nia alvo, ita nia interesse no ita nia focus atu  povo mak tenki goja ho buat hotu ita  halo ne’e. Ita nia Martir no Heroi sira fo ona sira nia ruin, sira-nia ran ba iha libertação povo ida ne’e, ba desenvolvimento rai ida ne’e, sira la exige sira nia kolen, sira la husu buat seluk, sira husu deit mak, ita sira ohin loron sei moris sira husu o nia tempo, o nia energia, o nia kakutak, o nia fuan, o nia laran, dedicação, confiança ba o nia povo, hadomi o nia povo, servi o nia povo la iha interesse seluk, fo an tomak ba o nia povo nia diak. Ita hotu mesak timor oan moris iha rai ida ne’e, ran fakar ba rai ida ne’e no hakarak diak ba rai ida ne’e iha oportunidade no posição sira mak atu servi, atu tulun no fo an tomak ba povo nia diak no nia desenvolvimento. (Alin/ Leo)

Leave a Reply

Your email address will not be published. Required fields are marked *