shadow
Diocese de Dili > NOTÍCIAS > LETURA DIÁRIA > Segunda-Feira, XXVII SEMANA DO TEMPO COMUM

Segunda-Feira, XXVII SEMANA DO TEMPO COMUM

 ANO A

 

Primeira  Leitura                                                                                                                     Jon. 1:1-2:1,11

Lia housi profecia Jonas nian

Na’i lia tun nune’e ba profeta Jonas, Amitai nia oan: “Hamriik hodi la’o ba cidade boot Ninive nian atu haklaken ba ema sira neba, tamba sira nia hahalok áat nia naran  boot to’o ona mai ha’u futar oin.” Maibe, Jonas hakarak halai ba Társis hodi hadook-an housi Na’I futar oin. Nia tun ba Jope iha nebe hetan tiha ró ida nebe atu ba Társis. Nia selu tiha fatin iha ró laran, tama ba iha ró ne’e hamutuk ho ema seluk, ba Társis hodi hadook-an housi Na’i futar oin. Nune’e, Na’i halo anin huu maka’as, laloran boot halo ró atu mouut sala-sala. Ema sira be serbisu iha ró laran tauk teb-tebes; ida-idak hahu harohan ba nia Maromak. Hafoin, atu hamenos ró nia todan, sira soe sai sasan ba tasi laran. Maibe, Jonas tun tiha ba ró kidun, nia toba dukur lós  iha neba. Capitão ró nian ba hasouru nia hodi dehan: “Nusa ó mai toba hela? Hamriik ba hodi harohan ba ó nia Maromak. Nia hanoin netik ita karik sei soi ita housi mate.” Ema sira be iha ró laran dehan ba malu: “Ita ba dada sorti atu hatene susar ne’e monu mai ita tan sé lós “. Sira dada sorti, sorti ne’e monu iha Jonas nia leten. Nune’e, sira dehan ba Jonas: “Dehan mai ami, tan sá susar ne’e monu mai ita? Ó serbisu saida, ó mai housi nebe, ó nia rain mak ida nebe, ó povu nebe nian?” Jonas hatan ba sira: “Ha’u ema hebreu, ha’u hamta’uk no adora Nai Maromak Lalehan nian, nebe halo tasi no rai”.

Nune’e, ema sira iha ró laran ta’uk teb-tebes hodi dehan ba nia: “Tan sá ó halo ida ne’e” ? Sira hatene ona katak Jonas halai housi Na’i Futar oin nu’udar nia dehan sai ona ba sira. Hafoin, sira husu nia: “Imi sei halo sá lós ba ó atu tasi bele sai maus fali mai ita?” tan tasi sai fuik liu tan, Jonas hateten ba sira: “Imi káer ha’u hodi soe ha’u ba tasi atu tasi bele sai maus fali. Basá, ha’u hatene katak tan ha’u mak susar boot ne’e monu iha imi nia leten.” Ró na’in sira haka’as-an hean ró lalais ba ninin, besik rai maran. Maibe sira lakon kbiit tan tasi hetok siak liu tan hasouru sira. Tan ne’e, sira harohan ba Na’i hodi dehan: “Na’i, keta husik ami mate tan ema ida ne’e nia moris, maibe, keta halo ami hetan todan tan ema sala laek ne’e nia mate, basá, Na’i , Ita mak hakarak halo buat di’ak, tuir Ita nia hakaran.” Tuir mai, sira káer Jonas hodi soe ba tasi laran; tasi be siak liu, sai maus tiha kedas. Haré tiha ne’e, ema sira ne’e hamta’uk Maromak; sira hasa’e sacrifício ba Na’i hodi halo promesa ba Nia. Nune’e, Na’i haruka ikan boot ida tolan tiha Jonas; Jonas hela iha ikan ne’e nia kabu-laran loron tolu kalan tolu. Hafoin, Na’i fó ordem ba ikan hodi muta sai Jonas iha tasi ninin, iha rai maran.

Maromak futar lia

 

Salmo Responsorial                                                                                                Jon. 2:3,4,5,8 (R.7c)

Refrão : Ita foti ha’u moris housi kle’an nakukun,

                 Na’i, ha’u Maromak Repete-se

 

           Ha’u haroran ba Na’i, wainhira ha’u neon sala,

            Nia rona duni ha’u;

            Housi mate sira hôrik fatin ha’u husu tulun,

            Nia rona ha’u lian. Refrão

           

            Ita soe ha’u iha wé kle’an laran,

            Wé taka metin tiha ha’u;

            Laloran sira dada ha’u,

            Baku iha ha’u nia leten ba mai. Refrão

 

            Iha ha’u nia susar laranha’u dehan:

            “Ha’u hadook an tiha housi Na’i Nia oin;

            Oinsá ha’u sei bele,

            Fila fali atu haré Ita templo Santo”. Refrão

 

            Wainhira ha’u klamar lakon biit,

            Ha’u hanoin hikas fali Na’i

            No ha’u nia harohan ba to’o Ita oin,

            To’o Ita templo Santo. Refrão   

 

Aclamação                                                                                                                                         Jo. 13:34

Refrão : Aleluia, Aleluia!!! Repete-se

                Na’i hateten: Ha’u fó ba imi mandamento foun, Imi sei

                Hadomi malu nu’udar Ha’u hadomi imi. Refrão

 

Evangelho                                                                                                                                   Lc. 10:25-37

Na’i Jesus Cristo nia Evangelho nu’udar São Lucas haktuir

Iha tempo neba, doutor lei nian ida hamriik atu koko Nia hodi dehan: “Mestre, ha’u sei halo sá atu hetan moris rohan laek?” Jesus dehan ba nia: “Iha ukunfuan hakerek sáida? Ita lê oin sá?” Nia hatan dehan: “Ó se hadomi Na’i, ó nia Maromak, ho neon ho laran tomak, ho ó nia biit tomak, ho ó nia hanoin tomak; no mós ó nia maluk nu’udar ó nia an rasik”. No Jesus dehan ba nia: “Ita hatan lós; halo nune’e, ita sei hetan moris.”

Maibe, tan nia hakarak souri an, nia dehan ba Jesus: “Maibe, se mak ha’u nia maluk?” Jesus hatan hodi dehan: “Ema ida tun housi Jerusalém ba Jericó. Nia monu iha na’okten sira nia liman. Sira hadau nia sasan sira hodi baku tasak nia; hafoin sira halai, hodi husik hela nia besik atu mate. Na’ilulik ida housi neba; haré tiha ema ne’e, nia hakat ba dalan nia ninin seluk. Nune’e mós levita ida liu housi neba: haré tiha ema ne’e nia hakat ba dalan nia ninin seluk . Maibe, wainhira Samaritano ida liu housi neba, haré tiha ema ne’e, nia hanoin nia teb-tebes. Nia hakbesik, tau mina ho tua ba nia kanek sira hodi falun sira, hafoin foti ema ne’e ba nia kuda rasik no lori nia ba uma ida hodi tau matan ba nia. Loron tuir mai, nia hasai osan rua, hodi fó ba uma na’in  dehan: ‘Haré nia didi’ak, no buat nebe ita gasta ha’u sei selu wainhira ha’u sei fila mai.’

Tuir ita nia hanoin, sira na’in tolu ne’e, ida nebe mak maluk ba ema nebe monu iha na’okten sira nia liman?” Nia hatan: “Ida nebe hatudu laran luak ba nia.” No Jesus hateten ba nia: “Ba, hodi halo mós nune’e”.

Lia maksoyn

Leave a Reply

Your email address will not be published. Required fields are marked *