shadow
Diocese de Dili > NOTÍCIAS > LETURA DIÁRIA > Terça-Feira, XXXIII DO TEMPO COMUM

Terça-Feira, XXXIII DO TEMPO COMUM

ANO A

 

Primeira Leitura                                                                          2Mac. 6. 18-31

Lia housi segundo livro Macabeus nian

Iha loron hirak neba, ulun doutor lei nia ida, naran Eleazar, katuas ona ho tinan barak liu, oin kmo’ok, ema obriga nia loke nia ibun atu haan na’an fahi. Maibé, nia hakarak liu mate ho naran di’ak, liu fali moris ho fama áat. Nia hakat ba fatin oho ema nian ho aten barani teb-tebes hodi tafui sai tiha na’an fahi housi nia ibun laran. Nune’e mós, ema hotu nebe barani halo tuir hanesan ne’e hodi soe buat nebe bandu atu koko tan hadomi moris. Nune’e, sira be halo conta cerimónia áat ne’e, tan sira hatene Eleazer housi kiik mai, bolu ketak tiha nia hodi fó conselho ne’e ba nia: “Haruka lori na’an be bai-bain ó han, nebe ó rasik prepara ho ó nia liman ne’e; hafoin, hakfudik han na’an hanesan liurai haruka be atu han be hasai housi karan sira hasa’e. Halo nune’e de’it mak bele soi ó nia moris hodi hetan hahalok di’ak housi belun sira uluk nian”. Maibé, Eleazar hili hodi káer metin hanoin di’ak ida, tuir nia tinan, tuir nia ukun katuas nian, tuir nia fúuk mutin nabilan, tuir ninia hahalok di’ak housi kiik kedas, liu-liu tuir lei Santa Maromak nian nebe haruka mai Nia emar sira. Tuir hanoin hirak ne’e, nia hatudu sai nia hanoin tomak, husu atu lori nia ba fatin mate nian hodi dehan: “Ho tinan hanesan ha’u nian, la dun di’ak halo fudik hanesan ne’e; oin seluk, foin  sa’e bele hanoin, Eleazar nebe iha ona tinan sianulu, hakarak moris tuir fali gentio sira nia hanourin; ikus mai sira mós bele halo tuir ha’u nia hahalok áat ne’e, tan hadomi hu’u nia moris badak nebe hela mai ha’u. iha ha’u nia otas katuas nian, ha’u hela ho naran fó’er no naran áat. Maski ha’u halai housi terus oi-oin nebe ema sei halo mai ha’u iha tempo oituan nia laran, maibé, maski moris eh mate, ha’u sei labele halai housi Maromak bele buat hot-hotu Nia futar liman. Tan ne’e, oras ne’e atu hakribi ho barani ba moris ida ne’e, ha’u sei hatudu hahalok kmanek ha’u nia otas katuas nian ba foin sa’e sira, no husik hela ba sira exemplo boot no kmanek tebes ida, hodi mate ho laran di’ak hahi nian, tan hamta’uk lei Maromak nian”.

Dehan tiha liafuan hirak ne’e, Eleazer hakat dadaun ba fatin haterus ema nian. Sira nebe lori nia ba, hirus ona hasouru nia, maski uluk sira haré nia di’ak, tan sira hanoin katak liafuan sira be nia ko’alia sai hanesan ema bulak nia liafuan hasouru sira. Wainhira nia besik atu mate, tan baku nebe nia simu maka’as tebes, hodi halo nia hetan kanek todan, nia halerik hodi hateten: “Ba Na’i mak iha matenek Santo liu, haré didiak katak ha’u bele soi ha’u nia moris, oras ne’e ha’u terus dadaun tan castigo ne’e, moras todan iha ha’u nia isin, maibé, iha klamar ha’u tahan terus ne’e ho ksolok, tan ha’u hamta’uk Na’i”. Nune’e mak Eleazar mate; ho nia mate, nia husik hela, la’os ba foin sa’e sira de’it, maibé, ba ema barak housi nia otas, exemplo laran metin nian no moris di’ak virtude nian ba sira.

Maromak Futar Lia

 

Salmo Responsorial                                                                                                                                                           Sal. 3. 2-3, 4-5, 6-7 (R.6b)

Refrão : Na’i, fó aihan mai ha’u np tulun ha’u!!! Repete-se

Na’i, ema ua’in mak ha’u nia funu baluk,

Ema ua’in mak hamriik hasouru ha’u,

Ema barak mumuk kona ba ha’u;

“Nia Maromak la tulun ona nia”. Refrão

 

Maibé, Na’i, Ita mak ha’u tulun,

Ha’u nia glória nebe tahan ha’u.

Ha’u hakilar ho lian maka’as ba Na’i,

Housi Nia foho Santo, Nia rona ha’u. Refrão

 

Ha’u latan-an, toba dukur, no hader,

Nafatin Na’i tau matan mai ha’u.

Ha’u sei la ta’uk ema lublubun

Be hale’u ha’u nia sourin hotu. Refrão

 

Aclamação                                                                                                                                                                                                             1Jo. 4:10b

Refrão : Aleluia, Aleluia!!! Repete-se

                  Maromak hadomi ita uluk hodi haruka Nia Oan rasik mai

                  Nuda’ar Maksoyn atu kasu ita salan. Refrão

 

Evangelho                                                                                                                                                                                                              Lc. 19. 1-10

Na’i Jesus Cristo nia Evangelho nudar São Lucas haktuir

Iha tempo neba, Jesus tama tiha iha Jericó, Nia la’o tesik cidade laran. Iha ema ida naran Zaqueu. Nia publican sira nia ulun, no nia ema riku ida. Nia buka namanas atu haré Jesus, maibé la bele tanba ema barak, basá nia ain badak. Nia halai ba oin hodi sa’e ba ai ida atu haré Jesus, nebe sei liu housi neba. To’o tiha fatin neba, Jesus foti matan hodi dehan: “Zaqueu, tun mai lalais, basá ohin Ha’u sei hela iha ó nia uma.” Nia tun kedas hodi simu Jesus ho ksolok boot.

Haré tiha ne’e, sira hamu’u dehan: “Nia tama iha maksalak ida nia uma!” Maibé Zaqueu hamriik hodi dehan ba Na’i: “Na’i, ha’u sei fahe ha’u nia rikusoi balun ba kiak sira; ha’u na’uk tiha karik ema ruma nia sasan, ha’u selu fali liu dala háat.” Jesus dehan ba nia : “Ohin maksoyn tama iha uma ne’e, tan ema ne’e mós Abraão nia oan; basá Oan Mane mai buka hodi soi sira nebe la’o lakon dalan.”

Lia Maksoyn

Leave a Reply

Your email address will not be published. Required fields are marked *