shadow
Diocese de Dili > NOTÍCIAS > LETURA DIÁRIA > Quarta-Feira, I Semana do Tempo Advento

Quarta-Feira, I Semana do Tempo Advento

ANO B

 

Primeira Leitura                                                                               Is. 25. 6-10a

Lia housi livro Isaías nian

Iha loron hirak neba, Na’i halo buat hot-hotu, sei hadi’a ba povo sira tomak, iha foho Sião, aihan festa, aihan di’ak, hemu tua mesak furak; han bokur no tua di’ak liu nian.

Iha foho ne’e, Na’i sei kasu tiha hena metan be taka povo sira tomak, hena ne falun nação sira hotu; Nia sei halakon hodi oin mate. Nai’i sei hamaran matan-wen housi oin sira tomak. Na’i sei hasai housi raiklaran tomak, lia be hamoe Nia povo, Na’i hateten lolós nune’e.

Iha loron neba, ema sei dehan: “Ne’e, ita nia Maromak, housi Nia, ita hein maksoyn. Ne’e Nai nebé ita fiar metin. Ita sei contente haksolok tan Nia soi ita”. Na’i haraik Nia futar liman hodi hamahan foho ida ne’e.”

Maromak Futar Lia.

 

Salmo Responsorial                                                                                                                                             Sal. 22(23). 1-3a, 3b-4, 5, 6,  (R. Cf. 7)

Refrão : Ha’u sei hela nafatin iha Na’i nia uma!!! Repete-se

 

Na’i ha’u nia mahein, Ha’u la kuran buat ida;

Lori ha’u ba hakmatek iha du’ut matak,

Lori ha’u ba we malirin

hodi haksolok ha’u klamar. Refrão

 

Nia lori ha’u kona dalan lós tan hadomi Nia naran;

Maski ha’u la’os housi rai-kle’an nakukun,

Ha’u sei la ta’uk buat áat ida, tan Ita hamutuk ho ha’u.

Ita nia ai-tonka no ai-tato-an

Fó laran metin mai ha’u. Refrão

 

Ita hadi’a aihan mai ha’u

Iha ha’u funu baluk sira oin.

Ho mina, Ita hamorin ha’u ulun;

Ha’u cálice nakonu resin. Refrão

 

Laran di’ak no graça sei la’o tuir ha’u

Lor-loron iha ha’u nia moris;

Ha’u sei hela iha Na’i nia uma

Tinan-ba-tinan nafatin. Refrão

 

Aclamação

Refrão : Aleluia, Aleluia!!! Repete-se       

Na’i sei hi’it-An mai soi Nia povo;

rahun si’ak ba sira be hein atu hasouru malu ho Nia. Refrão

 

Evangelho                                                                                                                                                                                                           Lc. 15. 29-37

Na’i Jesus Cristo nia Evangelho nudar São Lucas haktuir

Iha tempo neba, Jesus mai iha tasi ninin Galileia nian. Nia sa’e ba foho, hodi hatodan-An iha neba. Ema lubun boot mai hasouru Nia, hodi ema ain áat, kraes, matan delek, monok ho sira seluk tan, lori mai latan iha Jesus futar oin. Nia halo sira di’ak. Ema lubun boot hakfodak wainhira haré ema monok sira ko’alia, ema kraes sira hetan fali isin di’ak, ema ain áat sira la’o no matan delek sira haré. Sira fó glória ba Maromak Israel nian.

Tan ne’e, Jesus bolu Nia escolante sira, hodi dehan: “Ha’u Hanoin liu ema lubun boot ne’e: loron tolu ona mak sira hamutuk ho Ha’u; sira la iha buat ida atu han. Maibé Ha’u lakohi haruka sira ba ho kabun mamuk atu sira la bele oin nakukun iha dalan”. Escolante sira hasa’e lia ba Nia: “Iha rai fuik maran ne’e, ami bele hola lós pão barak iha nebé atu bele fó han ba ema lubun boot ne’e?” Jesus husu ba sira: “Imi iha pão fuan hira?” Sira hatan ba Nia: “Hitu, no mós ikan kiikoan balu”. Jesus haruka ema lubun boot ne’e tur iha rai. Hafoin Nia káer tiha pão fuan hitu no ikan sira, fó agradece, silu hodi fó ba escolante sira. Hafoin escolante sira fahe ba ema lubun boot ne’e. Sira hotu han to’o bosu. Sira lori baluk sira ba resin, luhu hitu nakonu.

Lia Maksoyn

Leave a Reply

Your email address will not be published. Required fields are marked *