shadow
Diocese de Dili > NOTÍCIAS > LETURA DIÁRIA > Sábado, I Semana do Tempo Advento

Sábado, I Semana do Tempo Advento

ANO B

 

Primeira Leitura                                                                    Is. 30. 19-21, 23-26

Lia housi livro Isaías nian

Na’i Maromak, Santo Israel nian, lia tun nune’e: “Povo Sião nebé hela iha Jerusalém, ó sei la tanis tan. Na’i sei rona ó nia harohan, Na’i sei hanoin ó; rona tiha ó lian, Nia sei hatan kedas ba ó. Na’i bele haraik ba ó pão la barak, we mos oituan de’it ba ó, maibé Ida be hanourin ó, Nia sei la subar Nia-An, ó nia matan rasik sei haré Ida rasik be hanourin ó, ó bele ba housi kuanan eh ba housi karuk, ó nia tilun sei rona liafuan hirak ne’e tutuir ó: ‘Dalan mak ne’e, buka lao tuir nia’. Na’i sei haraik udan ba aihan fini nebé ó sei kari ba rai no pão nebé rai fó, ikus mai sai barak no biit wain. Iha loron neba, ó nia balada sira sei han du’ut iha rai luan be luan. Karau no kuda buru sira nebé serbisu iha rai, sei han du’ut maran kahor masin, hamos hodi kanuru no garfu du’ut nian. Iha foho áas tomak no iha foho oan áas sira hotu. Sei mota oan no we inan; iha loron ema mate barak, wainhira uma áas torre sira naksobu. Iha tempo neba, fulan nia roman sei nabilan hanesan loron-manas, loron nia roman sei maka’as liu dala hitu, hanesan roman loron hitu nian. Iha loron neba, Na’i sei tau matan ba Nia povo kanek, Nia sei halo di’ak kanek sira be povo terus”.

Maromak Futar Lia.

 

Salmo Responsorial                                                                                                                                      Sal. 146(147). 1-2, 3-4, 5-6  (R. Is. 30.18)

Refrão : Rahun di’ak ba sira be hein iha Na’i!!! Repete-se

 

Hananu ba Na’i tan Nia di’ak;

Hananu ba ita nia Maromak, tan Nia so’i ba ita domin.

Na’i hafoun fali Jerusalém;

Halibur Israel oan sira be namkari. Refrão

 

Fuan sira be kanek, Nai halo di’ak fali;

Nia sadi’a sira kanek.

Nia sura fitun sira hotu,

Fó naran ba ida-idak. Refrão

 

Maromak boot no bele buat hotu;

Nia matenek hun rohan laek.

Na’i tulun ema sira be haraik-an;

Ema áat sira, Nia hamonu ba rai. Refrão

 

Aclamação                                                                                                                                                                                                             Is. 33. 22        

Refrão : Aleluia, Aleluia!!! Repete-se       

                  Na’i mak ita nia ukun na’in, ita nia juiz, ita nia liurai.

                  Nia hi’it-An mai soi ita. Refrão

 

Evangelho                                                                                                                                                                                                Mt. 9. 35-10. 1, 6-8

Na’i Jesus Cristo nia Evangelho nudar São Mateus haktuir

Iha tempo neba, Jesus la’o lemo ba cidade no knua laran sira tomak hodi hanourin ema sira iha sira nia Sinagoga; haklaken Lia-foun-di’ak reino nian, no fó fali isin di’ak ba ema moras sira.

Wainhira, nia haré ema lubun boot ne’e, Nia hanoin liu sira teb-tebes, tan la’o kole no oin nakraik, hanesan bibi sira la iha mahein. Ne’e duni, Jesus lia tun ba escolante sira dehan: “To’os boot, maibe serbisu na’in sira oituan de’it. Ne’e duni, imi sei husu ba to’os Na’in atu haruka serbisu na’in sira ba Nia to’os”.

Tuir mai, Nia bolu nia escolante sanulu resin rua hodi haraik ba sira biit atu ukun hodi duni sai espírito fo’er sira, atu fó isin di’ak mós ba moras no terus sira tomak. Nia haraik mós ba sira lia hanourin nune’e: “Imi ba uluk bibi oan sira be lakon housi umakain Israel nian. Tuir dalan, fó hatene hodi haklaken katak reino Lalehan besik ona. Fó isin di’ak ba moras sira, halo ema mate sira moris hi’as, fó fali isin di’ak ba sira be moras lepra, duni sai diabo sira. Imi simu leet de’it, sei fó mós leet de’it!”

Lia Maksoyn

Leave a Reply

Your email address will not be published. Required fields are marked *