shadow
Diocese de Dili > NOTÍCIAS > LETURA DIÁRIA > Sexta-Feira, I Semana do Tempo Advento

Sexta-Feira, I Semana do Tempo Advento

ANO B

 

Primeira Leitura                                                                               Is. 29. 17-24

Lia housi livro Isaías nian

Na’i Maromak lia tun nune’e: “Uitoan tan de’it ona, Líbano la’os atu sai jardim ida? Jardim ne’e la’os atu sai ai-laran ida? Iha loron neba, ema tilun diuk sei rona liafuan housi livro Maromak nian; sai tiha housi kalan no nakukun laran, matan delek sira sei haré.

Ema kiak sira sei haksolok fali iha Na’i. Sira be kiak liu iha ema sira leet, sei haksolok iha Santo Israel nian. Ukunna’in laran áat sei la iha tan. Ema be toman hakribi maluk sira sei lakon mohu. Ema laran makerek sira sei la iha tan, ema hateten áat malu sei lakon tiha no sira be hanoin atu halo áat, sei mate mohu. Sira be, hodi liafuan, dada maluk ba salan, sira iha odamatan oin buka halakon juíz, no sira be, tan buat folin laek, hasusar ema di’ak. Tan ne’e duni mak Na’i ko’alia nune’e ba umakain Jacob nian, Na’i be haraik liberdade ba Abraão: “Housi ohin ba oin, Jacob la bele moe, nia oin la bele kamutis tan, basá wainhira nia haré iha nia oan sira Ha’u liman nia hahalok, nia si dehan Ha’u naran Santo”. Sira sei fó hatene Jacob nia Santo nia moris Santo, hodi hamta’uk Israel nia Maromak. Sira be neon la metin, sei hetan matenek; sira be mamun hasouru, sei simu lia haklaken.

Maromak Futar Lia.

 

Salmo Responsorial                                                                                                                                                             Sal. 26(27). 1, 4, 13-14 (R.6a)

Refrão : Na’i mak ha’u nia roman no maksoyn!!! Repete-se

 

Na’i mak ha’u roman no maksoyn;

Ha’u sei ta’uk fali sé?

Na’i mak tahan ha’u nia moris;

Sé lós bele halo ha’u nakdedar? Refrão

 

Buat ida de’it ha’u buka hodi husu ba Nia,

Hôrik iha Nia kadunan iha ha’u nia moris tomak;

Koko Na’i Nia graça,

Hodi hateke ba Na’i Nia uma lulik. Refrão

 

Ha’u hein atu haré Na’i Nia laran di’ak,

Iha ema moris sira rain.

Aten barani! Hein iha Na’i!

Laran metin ba! Hein Na’i Maromak. Refrão

 

Aclamação                                                                                                        

Refrão : Aleluia, Aleluia!!! Repete-se       

                 Na’i sei mai ho biit liurai.

                 Nia sei haraik roman ba Nia emar sira matan. Refrão

Ou                                                                                                                                                                                                                                  Is. 45. 8

Refrão : Aleluia, Aleluia!!! Repete-se       

                  Lalehan sira, haruka maho-wen housi leten áas ba;

                  Kalohan sira, fakar justiça tun mai; rai nakloke ba, halo mosu maksoyn. Refrão

 

Evangelho                                                                                                                                                                                                              Mt. 9. 27-31

Na’i Jesus Cristo nia Evangelho nudar São Mateus haktuir

Iha tempo neba, Jesus liu dadaun, wainhira matan delek na’in rua la’o tuir Nia hodi hakilar maka’as: “David nia Oan, sadia ami”.

Wainhira Nia tama tiha iha uma laran, matan delek sira hakbesik ba Nia. Jesus husu ba sira: “Imi fiar karak Ha’u bele halo buat nebé imi husu?” Sira hatan: “Na’i, ami fiar”. Ne’e duni, Jesus tau liman ba sira matan, hodi dehan: “Sai di’ak fali ba tuir imi nia fiar”. Hafoin sira matan nakloke. Jesus lia tun ba sira: “Haré bá, ema ida la bele hatene buat ne’e!”  Maibé, sai tiha haklaken Jesus nia naran ba rai tomak neba.

Lia Maksoyn

Leave a Reply

Your email address will not be published. Required fields are marked *