shadow
Diocese de Dili > NOTÍCIAS > LETURA DIÁRIA > Segunda-Feira, II Semana do Tempo Advento

Segunda-Feira, II Semana do Tempo Advento

ANO B

 

Primeira Leitura                                                                                 Is. 35. 1-10

Lia housi livro Isaías nian

Rai-fuik maran no rai-nakles, imi haksolok ba. Haksolok ba hodi fó funan rai tetuk maran, taka-an ho aifunan hanesan Narciso; hahi haksolok hanesan ema foun. Nia simu glória Líbano nian, roman Carmelo no Sáron nian. Sira sei haré Na’i glória, imi Maromak nabilan. Halo maka’as fali liman sira be kole, fó biit ba aintur be nakdedar. Sei dehan ba fuan sira be taridu: “Barani! Keta ta’uk. Imi nia Maromak besik mai ona! Nia hi’it-An mai tesi lialós, Nia Maromak be haraik kolen. Nia rasik mai soi imi”.

Iha loron ne’e, matan delek sira matan sei nakloke; tilun diuk sira sei rona mós; ema ain kudeik sira sei haksoit hanesan rusa, ema monok sira nia nanal sei hananu ho ksolok. Wé sei moris iha rai-fuik maran, wé inan sei suli iha rai tetuk maran; rai maran dekor sei sai hanesan kolan ida, rai kmarak lós sei nakfila ba wé matan. Iha asu fuik sira subar fatin, sei buras onu no soko. Dalan ida sei terik rai fuik; nebé ema sei hanaran dalan lulik; ema laran fo’er sei la liu housi nia, sira nebé matan foun, sei lakon. Iha dalan ne’e, sei la iha asu fuik, leão, balada siak sira sei la liu housi neba. Housi nia, sei la’o ema sira be hetan ona maksoyn; hafoin sei fila fali sira nebé Na’i hasai housi dadur laran. Sira sei to’o iha Sião ho hananu no hakilar haksolok; sira oin nabilan ho ksolok rohan laek. Neon contente no laran ksolok mak sei ukun; terus no halerik sei lakon.

Maromak Futar Lia.

 

Salmo Responsorial                                                                                                                        Sal. 84(85). 9ab-10, 11-12, 13-14 (R. Is. 35.4d)

Refrão : Ita nia Maromak hi’it-An mai soi ita. Repete-se

 

Ha’u rona lia nebé Na’i hateten;

Maromak haklaken hakmatek.

Nia maksoyn besik ba ema hamta’uk Nia,

Nia glória sei hôrik iha ita rain. Refrão

 

Laran mós no domin sei hetan malu,

Justiça no hakmatek haklher malu.

Housi rai sei mosu laran mós,

Justiça sei hakruuk housi Lalehan. Refrão

 

Na’i sei haraik buat nebé di’ak;

Ita rain sei fó fuan.

Justiça sei la’o iha Nia futar oin;

Paz sei la’o tuir Nia ain fatin. Refrão

 

Aclamação

Refrão : Aleluia, Aleluia!!! Repete-se       

                 Liurai hi’it-An mai dadaun, Na’i rai hotu nian,

                 Sei hasai ita nia naha todan atan nian. Refrão

 

Evangelho                                                                                                                                                                                                                 Lc. 5. 17-26

Na’i Jesus Cristo nia Evangelho nudar São Lucas haktuir

Iha tempo neba, loron ida, Jesus sei hanourin dau-daun, Fariseu ho doutor lei nian balu mós iha neba. Sira mai housi knua tomak Galileia, Judeia no Jerusalém nian. Na’i nia kbiit iha neba atu Jesus halo di’ak ba moras sira. Ema balu mosu mai, lori iha hadak laran ema ida ain no liman tós; sira buka hatama nia hodi tau nia iha Jesus futar oin. Tan sira la hetan fatin atu bele tama ba laran, basá ema barak, sira sae ba uma leten hodi hatun nia ho nia biti housi kakuluk nia leet, mai iha ema sira klaran, iha Jesus futar oin. Wainhira haré ema sira ne’e nia fiar, Jesus lia tun ba ema ne’e: “Belun, ó hetan perdua ba ó salan”. Escriba no Fariseu sirahahu mumuk dehan: “Ema ne’e sé lós; nia hateten hasouru Maromak! La Maromak karik, sé mak bele perdua salan?” Maibé Jesus hatene tiha sira nia hanoin, Nia hahu dehan ba sira: “Imi hanoin sá lós iha imi laran! Ida nebé mak susar liu atu hateten: ‘Ó hetan perdua ba ó salan’, ka hateten: ‘Ó hamriik hodi la’o?’ Ne’e duni, atu imi hatene katak Mane Maksoyn iha rai-klaran iha kbiit atu perdua salan, Ha’u haruka ó”, Nia lia tun ba ema ain no liman tós: “Hamriik ba, káer ó nia biti, la’o ba ó nia uma”. Ema moras ne’e hamriik kedas iha sira hotu nia oin, káer ba biti nebé nia uluk latan ba, la’o ba uma hodi fó agradeçe ba Maromak.

Ema hotu hakfodak, hahi Na’i Maromak. Sira hamta’uk wa’in tebes hodi dehan: “Ami haré ohin buat foun mesak kmanek!”                                              .

Lia Maksoyn

Leave a Reply

Your email address will not be published. Required fields are marked *