shadow
Diocese de Dili > NOTÍCIAS > LETURA DIÁRIA > Terça-Feira, II Semana do Tempo Advento

Terça-Feira, II Semana do Tempo Advento

ANO B

 

Primeira Leitura                                                                                 Is. 40. 1-11

Lia housi livro Isaías nian

Ita Maromak lia tun nune’e: “Imi haksolok, haksolok Ha’u Nia povo. Hametin Jerusalém nia fuan hodi hakilar ba nia katak knaar to’o ona rohan, nia salan kasu tiha ona; nia simu tiha ona housi Na’i futar liman castigo maka’as ba nia salan sira hotu”.

Lian ida haklaken: “Imi hadi’a Na’i nia dalan iha rai-fuik maran. Imi loke dalan terik ida ba Na’i iha rai-fuik. Rai kle’an sei nakonu, foho no kaletek sai tetuk; rai tarak sai kabeer, rai lolon sai tetuk. Iha loron ne’e, sei hatudu Na’i Nia glória, criatura tomak hamutuk sei haré glória ne’e, basá, Na’i futar ibun ko’alia!”

Lian ida hateten: “Hakilar ba!” Ha’u hatan: “Ha’u sei hakilar lós sáida?” “Criatura tomak hanesan du’ut, oin furak hanesan ai-funan ai-laran. Du’ut sei maran, ai-funan sei namlaik, wainhira Na’i huu iis kona sira. Tebes duni, povo hanesan du’ut. Du’ut sei maran, ai-funan sei namlaik, maibé ita nia Maromak futar lia hela ba nafatin”.

Sa’e ba foho áas ida, ó be haklaken Lia-Foun di’ak ba Sião! Foti lia maka’as, ó be haklaken Lia-Foun ba Jerusalém! Foti ó lian, keta ta’uk, hodi dehan ba Judá nia cidade sira: “Imi nia Maromak mak neba. Haré ba, Na’i to’o mai ho kbiit. Nia futar liman fó laran metin ba nia atu ukun tomak. Haré ba, Nia prémio mai ho Nia; Nia kolen mai uluk liu Nia. Nia hanesan mahein be hein bibi oan sira; kô’us bibi oan sira liman hiti sira nia hirus matan, la’o tuir bibi inan sira be fó susu”.

Maromak Futar Lia.

 

Salmo Responsorial                                                                                                                 Sal. 95(96). 1-2, 3, 10ac, 11-12, 13 (R.Cf.Is. 40. 9-10)

Refrão : Ita nia Maromak sei mai ho biit-liurai!!! Repete-se

 

Hananu ba Na’i knananuk foun ida,

Hananu ba Na’i, rai-klaran tomak.

Hananu ba Na’i hawelok Nia naran.

Haklaken loron ba loron, Nia maksoyn. Refrão

 

Haklaken Nia glória ba reino tomak,

No ba povo hot-hotu, Ninia kmanek.

Haklaken ba povo hot-hotu: ‘Na’i mak Liurai’.

Na’i ukun povo hotu ho justiça. Refrão

 

Lalehan haksolok ba, rai hananu ho ksolok ba,

Tasi no buat hotu iha tasi laran;

Rai luan ho buat moris tomak iha nia, haksolok;

Bidu ho ksolok ai sira iha ai-laran. Refrão

 

Iha Na’i be sei hi’it-An mai Nia futar oin.

Nia mai atu ukun rai-klaran,

Nia sei ukun mundo ho justiça,

No Ninia povo sira ho fidelidade. Refrão

 

Aclamação

Refrão : Aleluia, Aleluia!!! Repete-se       

                  Na’i Nia loron besik ona;

                  Nia mai atu soi ita. Refrão

 

Evangelho                                                                                                                                                                                                           Mt. 18. 12-14

Na’i Jesus Cristo nia Evangelho nudar São Mateus haktuir

Iha tempo neba, Jesus lia tun ba escolante sira: “Imi hanoin oinsá? Ema ida iha bibi atus ida, hafoin bibi ida lakon tiha karik, nia sei la husik bibi sianulu resin sia iha foho, hodi ba buka ida be lakon? Nia hetan karik bibi ne’e, tebes duni, Ha’u dehan ba imi, nia sei haksolok tan bibi ne’e liu fali sira sianulu resin sia nebé la lakon. Nune’e mós, Ha’u Aman iha Lalehan lakohi kiikoan sira ne’e ida lakon”

Lia Maksoyn

Leave a Reply

Your email address will not be published. Required fields are marked *