shadow
Diocese de Dili > NOTÍCIAS > Notícias > D. VIRGILIO Apressia ho Creatividade DCDD

D. VIRGILIO Apressia ho Creatividade DCDD

DCDD – (07/12/2017) Atu hanoin hikas existência Padroeira Diocese Dili nian ba dala 77, Departamento de Comunicação da Diocese Dili, iha loron rua nia laran (Quinta e Sexta) fulan nee realiza Exposição Fotos ho tema EM HONDRA DE NOSSA SENHORA iha Salão Casa de São Domingos, Catedral, Vila-Verde Dili. Exposição ne’e ofiacialmente loke husi D. Virgilio do Carmo da Silva Bispo de Dili, acompanha mos husi Padre sira. Hafoin de abertura, iha Padres, Madres inclui mos autoridades nacional nian balu no mos sarani sira hakat mai visita exposição refere.

Tuir Diretor Departamento de Comunicação da Diocese de Dili Pe. Bento Barros Pereira haktuir katak; Exposição Fotográfia ne’e ami halo hanesan plano ida atu fo honra ba Nain Feto iha loron ida ita hanoin nia hanesan mahein ba Diocese Dili nian. Atu esplica deit katak fotográfia hirak ne’e relaciona ho sarani sira expressa sira nia fiar ba Nai Feto. Ne’e duni, iha fotográfia sira ne’e ita bele le laos hare deit. Fotográfia koalia buat ruma mai ita liu-liu koalia buat nebe relação entre ita ho Nain Feto.

Biban hanesan Bispo Dili hateten: ita hare katak husi ita nia rai laran mos iha ona ema bele halo foto nebe diak. Ita laos buka foto malae sira nian husi liur hodi mai hatudu maibe husi ita nian mos buat barak diak e liu-liu Timor oan sira mak bele hasai foto sira ne’e e particularmente parabens mos ba iha fotográfer sira iha Departamento Comunicação Diocese Dili nian.

Dom. Virgilio da Silva sublinha tan katak; Ne’e hatudu ona katak esforço durante ne’e hotu imi mos qualifica imi nia an sai mais proficional iha area jornalistas, ema nebé fotográfer profissional e ida ne’e mos hatudu katak ita nia Departamento nebe uluk hahu mas que ita hare dificuldade oi-oin, mas presença Pe. Bento ninian bele lori mudança boot ida ne’e ba iha Diocese. Buat ne’e halo laos deit sucesso ba iha Departamento Comunicação Social deit maibé hau hanoin mos iha sucesso ida ba Diocese Dili, tanba ne’e hau hakarak hato’o agradece ba equipa.

Dom. Virgilio hatutan tan katak: Exposição fotos ida ohin ita halo hodi fo honra ba ita nia Nain Feto hanesan historia ohin hau dehan tiha ona buat sira ne’e mak atu acressenta deit ba iha ita nia rain situação política nebé ita hotu hatene katak lao hanesan los tanba ne’e ho maneira exposição sira hanesan ne’e dalan ida mos atu desliga oituan sociedade nia hanoin, sociedade nia preukupação mas que problema nebé iha, imi nafatin creativo mosu buat foun, buat sira hanesan ne’e atu desafia ita nia hanoin ba buat nebé real.

Tuir D. Virgilio do Carmo da Silva katak: Husi creatividade sira ne’e mos ita bele ajuda ema atu bele hare diak liu tan Maromak nia presença liu husi ita nia Nain Feto.

Leave a Reply

Your email address will not be published. Required fields are marked *