shadow
Diocese de Dili > NOTÍCIAS > REFLEXÃO > LEITURA & REFLEXÃO, III DOMINGO TEMPO ADVENTO /ANO B/2017

LEITURA & REFLEXÃO, III DOMINGO TEMPO ADVENTO /ANO B/2017

Primeira Leitura                                                                                                                                                                                   Is.  61, 1-2a, 10-11

Lia housi Livro Profeta Isaías

Na’i Maromak nia Espírito iha ha’u leten, basá, Na’i tau mina mai ha’u. Nia haruka ha’u ba haklaken Lia-foun di’ak ba ema sira be terus, halo di’ak ba ema sira be laran susar, fo hatene katak sei husik tiha sira be ema kaer, sira be ema dadur, hodi dehan sai tinan ida graça Na’i nian. Ha’u haksolok tan Na’i; Ha’u klamar haksolok tamba ha’u nia Maromak nebé fó hataís ha’u ho Maksoyn, taka ha’u ho justiça, hanesan noivo nebé tau kaibauk ho noiva nebé hafutar-an ho murak. Basá, nu’udar rai halo mosu buat tubun, toos halo tubun buat musan, nune’e, Na’i Maromak sei halo mosu justiça no hahí iha nação hotu-hotu nia oin.

 

Salmo Responsoria                                                                                                                                                     Sal. Lc. 1, 46b-48, 49-50, 53-54

Refrão: Ha’u klamar haksolok iha Na’i!!! Repete-se

Ha’u klamar hahí Na’i,

ha’u klamar haksolok iha Maromak ha’u Maksoyn.

Na’i haraik matan ba nia atan oan,

ema hotu-hotu sei hanaran ha’u, rahun kmanek. Refrao

 

Basá, Ida nebé bele hotu-hotu,

halo buat kmanek oin-oin iha ha’u, nia naran Santo.

Nia laran luak da’et ba ema hotu-hotu,

ba sira be hamta’uk Nia. Refrao

 

Ho buat di’ak, Nia halo bosu ema sira be hamlaha,

Nia haruka riku sira fila ho liman mamuk.

Nia tulun nia atan Israel,

tan hanoin Nia laran luak. Refrão

 

Segunda Leitura                                                                                                                                                                                          1 Tes. 5, 16-24

Lia housi São Paulo nia surat ba sarani sira iha Tessalónica

Maun-alin sira: Imi buka moris nafatin iha ksolok, harohan nafatin, fo agradece iha fatin hotu-hotu, basá, ne’e mak Maromak hakarak imi halo iha Cristo Jesus. Imi keta halakon Espírito, keta hakribit tulun sira profeta nian; maibé, buat hotu imi sukat, hodi rai nafatin buat nebé di’ak. Imi buka dook housi buat hotu nebé áat. Maromak damen nian halo imi sai santo lolós: Imi-an rasik – Espírito, klamar, isin – mós nafatin to’o ita Na’in Jesus Cristo mai. Ida nebé bolu imi, Nia iha neon lós; Nia sei halo duni ida ne’e!

 

Evangelho                                                                                                                                                                                                    Jo. 1, 6-8, 19-28

Na’i Jesus Cristo nia Evangelho nu’udar São João haktuir.

Iha tempo nebá, mosu mane ida, Maromak mak haruka, naran João. Nia mai nu’udar sasin, atu fó testemunha kona ba roman atu ema hotu fiar, tan nia. Nia laós roman, maibé, atu fó testemunha kona ba roman. Ida ne’e mak João nia testemunha, wainhira ema Judeu sira haruka housi Jerusalém sacerdote no levitas sira ba husu ba Nia: “Ó sé lós?” Nia dehan sai, nia la heli lia. Nia dehan sai duni. “Ha’u laós Messias.” Sira husu ba nia: “Ne’e bé, ó sé lós? Ó Elias?” Nia hatán: “Ha’u lae.” “Ó Profeta?” Nia hatán: “Lae”. Sira dehan ba nia: “Ó sé?… atu ami bele dehan ba sira nebé haruka ami mai; Ó rasik dehan to’ok ó sé?” Nia dehan sai: “Ha’u ne’e, lian nebé hakilar iha rai-fuik maran: ‘Imi sei halós Na’i nia dalan, nu’udar hateten Profeta Isaías.” Sira haruka fariseus balu nebé husu ba nia: “Ó laós Messias, laós Elias, laós Profeta, nusá mak ó sarani ema?” João hatán ba sira: “Ha’u sarani ho wé, maibé, imi leet iha Ida nebé imi la hatene: Ida nebé mai tuir ha’u, nebé ha’u la soyn atu kore nia sandális talin”. Buat hirak ne’e hotu, mosu iha Betânia, Jordão sorin ba, nebé João sarani daudaun.

 

Hanoin kona ba ó rasik nian fiar:  

Liturgia ohin nian iha sentimentu espesiál haksolok no esperansa nian.  Iha Evanjéliu, Joaun Batista proklama katak Na’i iha ita leet. Ne’e duni ohin ita selebra Jezus nia hakbesik-an no ita nia esperansa iha nia salvasaun.  Maromak haruka Joaun mai hanesan sasin ba Kristu, hanesan mós Nia haruka ita atu sai sasin ba Nia iha mundu ohin loron hanesan Nia. Hatene Jezus no aprende kona ba Nia sei halo ita ema moris ksolok.  Wainhira ita iha Maromak nia Espíritu hourik iha ita fuan, halo ita sai haksolok liu tan iha damen. Ita simu Espíritu wainhira ita sarani no simu mós lia tatoli foun nebé Jezus haraik mai ita. 

Hanesan iha Jezus nia tempu, Maromak halo dezafiu atu ita halo parte iha Nia reinu.  

Dala barak ita la rona eh iha atensaun bainhira Maromak bolu ita. Ita nia dalan hetok iha ku’ak no kleuk ba mai liu tan. Adventu tempu nebé fó hanoin katak Maromak mai moris ho ita lor-loron.    

Wainhira ita rona mensajen Evanjéliu nian ita tenta moris ho mensajen ne’e. Maromak mai iha ita nia moris, hadi’a dalan no tulun ita haree saida mak importante.    

 

MENSAJEN 

Parte dahuluk ita-nia testu nian (vers. 6-8), aprezenta João. Buat rua kona-ba nia: “mane ida” ne’ebé “Maromak haruka”. Ajente prinsipál istória nian mak Maromak: Nia mak hili ema no haruka iha mundu ho misaun konkreta ida. Ida-ne’e mak baibain “métodu” Maromak nian: bolu ema sira, entrega misaun ida no, liuhusi sira, intervein iha mundu. João nia misaun mak “fó sasin naroman nian”. “Naroman”, iha Evanjellu Dahaat, reprezenta realidade ne’ebé mai husi Maromak no hodi nia Maromak harii ba ema sira mundu foun ida vida definitiva no ksolok totál nian. João la atua hodi ninia inisiativa rasik, maibé hodi hatán ba hilin Maromak nian no atu konkretiza misaun ne’ebé Maromak konfia ba nia. Maibé, João la’ós “naorman” – katak nia la iha kbiit atu halakon nakukun sira ne’ebé estraga ema nia moris, basá nia la iha kapasidade atu haraik moris ba ema sira. Joao mak “sasin” de’it ne’ebé mai atu prepara ema sira atu simu “naroman/moris” ne’ebé to’o mai. Iha parte daruak testu nian (vers. 19-28), ita hetan Joao nia  “sasin”. Iha ita-nia oin iha komisaun ofisiál ida haruka husi Jerusalém atu investiga Joao no komisaun ne’e forma husi amlulik no levita sira (sira-nia knaar mós mak kontrola labele halai sees husi doutrina no iha fidelidade ba orden relijioza judaika). Iha ambiente mesianizmu nian tempu ne’ebá nian, Joao nia figura no ninia sasin halo lider judaiku sira laran la hakmatek… Komisaun investigadora hahú husu João ho pergunta: “ó sé?”. Mahusuk sira la foti pozisaun. Sira limita an atu hein katak João rasik deklara ninia pozisaun no ninia intensaun sira. João deskarta (tau sees) totalmente ipóteze katak nia mak Mesias. Nia mós la aseita identifika nia an ho Elias (tuir Mal 3,22-23, Elias mak tenke mai atu prepara “Jahwéh nia loron” – katak loron Mesias libertadór to’o mai atu harii mundu foun).Nia la aseita mós títulu “profeta” nian (títulu iha Dt 18,15 signifika “Moisés daruak” ne’ebé tenke mosu iha tempu ikus). João la aseita atu atribui ba nia funsaun ida ne’ebé bele tau nia an iha sentru. Ninia resposta tolu negativu hotu. Nia la buka ninia  glória eh ninia afirmasaun, nia mós la mai hodi nia naran rasik; ninia misaun mak fó sasin “naroman” nian no hatudu “naroman” ba maktuir sira. Iha enkuadramentu ne’e mak ita tenke komprende João nia resposta, bainhira ninia interlokutór sira konvida atu define nia an rasik: “ha’u mak lian ida”. “Lian” la’ós termu relasionál ida ne’ebé supoin ouvinte sira atu komunika mensajen ida… “Lian” la iha oin, anónimu no ema ida la nota; importante mak konteúdu mensajen nian. João mak ida-ne’e:  “lian” ida ne’ebé liuhusi nia Maromak hato’o mensajen ida ba ema sira. Mensajen no la’ós “lian” mak tenke dada ema nia atensaun. Mensajen ne’ebé “lian” hato’o mak: “haloos Na’i nia dalan”. Espresaun ne’e foti husi Is 40,3, iha versaun livre. Isaías husu ba Povu e’ebé moris hakmatek no iha komodizmu, dezanimadu no frustradu fila husi Ezíliu atu halo esforsu hodi simu Maromak nia dezafiu sira no aseita halo dalan ho Maromak iha diresaun ba futuru foun ida moris no esperansa nian. Realidade ida-ne’e mak João simu bolun atu fanun iha nia Povu nia fuan. João nia resposta negativa sira halo komisaun la komprende… Se João la fó ba nia an títulu tradisionál sira – “Mesias”, “Elias”, “profeta” – nia fó batizmu ho títulu ida-ne’ebé loos? Batizmu eh imersaun (luku) iha bee mak símbolu ida uza iha judaizmu. Batizmu uza nu’udar ritu purifikasaun nian (ezemplu, ba moras ida atu kura nia – kf. Lev 14,8) eh atu signifika mudansa estadu moris nian (ezemplu pasajen husi moris atan nian ba situasaun liberdade nian); ba prosélitu sira, (signifika husik prátika no fiar jentiu no adezaun ba judaizmu). João nia batizmu signifika, haketak an husi moris nakukun nian no hakaran atu hakohak moris foun. Ba João, batizmu mak ain-hakat dahuluk atu simu “naroman”. João evita hatán diretamente ba farizeu sira-nia lia-hasoru. Nia prefere desvaloriza ninia batizmu bee nian no hatudu ba “ida” ne’ebé mai no João la soi “atu kore nia sandálias talin”. Nia mak “naroman” ne’ebé sei liberta ema husi nakukun, husi matan-delek, husi lia-bosok, husi egoizmu, husi salan. Parese João hakarak hateten: “imi keta preokupa ho batizmu bee nian ne’ebé ha’u fó, basá nia mak símbolu de’it transformasaun no adezaun nian ba realidade foun ida; maibé imi nia matan fihir ba realidade foun ne’ebé iha ona imi-nia leet no idane’ebé Mesias sei oferese. Batizmu Mesias nian (batizmu Espíritu nian) mak sei nakfilak totalmente ema sira nia fuan, halo sira sai livre no sei fó ba sira vida definitiva. Ida ne’ebé mai atu sarani ho Espíritu iha ona imi-nia leet, atu hahú ninia obra libertadora. Imi buka koñese nia – katak, rona nia no hakohak ninia proposta vida no libertasaun nian”. Indikasaun katak líder sira la “hatene” la koñese “ida ne’ebé” to’o ona no João mak nia “lian” de’it, sai denúnsia ida kona-ba situasaun klase dirijente judaika nian, ne’ebé hakmatek ho sira-nia priviléjiu sira, serteza sira no prekonseitu sira no ladún nakloke ba novidade no dezafiu sira Maromak nian.

Leave a Reply

Your email address will not be published. Required fields are marked *