shadow
Diocese de Dili > NOTÍCIAS > LETURA DIÁRIA > Segunda-Feira, III Semana do Tempo Advento

Segunda-Feira, III Semana do Tempo Advento

ANO B

 

Primeira Leitura                                                                               Jer. 23. 5-8

Lia housi livro Jeremias nian nian

Na’i lia tun: “Loron sei to’o, Ha’u sei halo moris ba David tubun lós nian ida. Nia mak sei sai liurai lolós, sei ukun ho matenek nia lalaok iha nia rain, tuir direito no justiça. Iha nia loron, reino Judá sei hetan maksoyn, reino Israel mós sei moris ho laran metin. Ne’e naran nebé sira sei tau ba nia: ‘Na’i, ami justiça’. Iha loron ne’e ema sei la dehan tan: ‘Moris Na’in nebé halo Israel oan sira sai housi rai Egypto’, maibé hateten: ‘Moris Na’in nebé halo sai no fila fali bei-oan sira kona ba uma-kain Israel nian, housi rai Norte nian no mós housi rai tomak iha nebé sira la’o namkari atu sira bele hela iha sira rain’”.

Maromak Futar Lia.

 

Salmo Responsorial                                                                                                                                              Sal. 71(72). 2, 12-13, 18-19 (R. cf. 7)

Refrão : Iha Na’i nia loron, justiça no dame

                 Sei moris ba nafatin. Repete-se

 

Maromak, haraik ba liurai biit atu tesi lia,

Haraik Ita nia justiça ba liurai oan.

Nia sei ukun Ita nia povo ho justiça,

Ukun Ita nia ema kiak sira halo hanesan. Refrão

 

Nia rona ema kiak sira hakilar;

Tulun ema neon susar sira be la hetan tulun.

Sei sadi’a ema biit laek no haraik-an sira,

Sei soi ema kiak sira nia moris. Refrão

 

Na’i Israel nia Maromak, di’ak tebes,

Nia mesak de’it halo buat foun.

Nia futar naran Santo boot ba nafatin.

Nia glória nakonu iha rai-klaran tomak. Refrão

 

Aclamação

Refrão : Aleluia, Aleluia!!! Repete-se       

               Ulun uma kain Israel nian nebé haraik ukunfuan ba

               Moíses iha Sinai, hi’it-An mai soi ami ho Ita liman nia biit. Refrão

 

Evangelho                                                                                                                                                                                                             Mt. 1. 18-24

Na’i Jesus Cristo nia Evangelho nudar São Mateus haktuir

Jesus Cristo moris nune’e: Ema hakotu ona Maria, Jesus nia inan ba José. Molok sira moris hamutuk, Maria kô’us tiha ona hodi Espírito Santo nia biit. Nia la’en José, nebé ema laran lós, lakohi hamoe Maria, hanoin atu husik de’it nia. Nia hanoin dadaun nune’e, wainhira Na’i nia Anjo mosu ba nia iha mehi dehan: “David nia oan, keta ta’uk simu Maria nu’udar ó nia káben, basá nia kô’us hodi Espírito Santo nia biit. Maria sei tur ahi oan mane ida, ó sei hanaran nia, Jesus, basá Nia mak sei soi povo housi sala”. Ne’e hotu mosu atu halo tuir lia nebé Na’i hato’o housi profeta dehan: “Fetoran ida sei kô’us no tur ahi oan mane ida nebé ema sei hanaran ‘Emanuel”, katak ‘Maromak ho ita’. Tuir Na’i nia Anjo haruka, hader mai, José ba hola kedas nia noiva ba uma.

Lia Maksoyn

Leave a Reply

Your email address will not be published. Required fields are marked *