shadow
Diocese de Dili > NOTÍCIAS > LETURA DIÁRIA > Terça-Feira, III Semana do Tempo Advento

Terça-Feira, III Semana do Tempo Advento

ANO B

 

Primeira Leitura                                                                     Jz. 13. 2-7, 24-25a

Lia housi Juízes  nian

Iha loron hira neba, iha mane ida housi rai Soreá, housi familía Dã nian, nia naran manoé. Nia féen la kô’us, la iha oan. Na’i nia anjo mosu ba feto ne’e hodi hateten ba nia: “Ó la kô’us, la iha oan, maibé ó sei hetan, ó sei tur ahi oan mane ida. Hori ohin ba oin, keta hemu tua bai-bain, tua alcoólica mós lae; ó sei la ha buat ida be fo’er, tanba ó atu hetan oan mane ida. Tudik sei la liu kona nia fúuk, tan sei hasae kikoan ne’e ba Maromak housi kedas  nia inan  knotak; nia mak sei soi Israel housi filisteu sira liman”. Feto ba fó hatene ba nia la’en: “Ema Maromak nian ida mai ko’alia ho ha’u. Nia oin hanesan Anjo ida nian, nabilan naroman. Ha’u husu nia mai lós housi nebé, maibé nia la fó hatene sai mai ha’u nia naran.

Lia be nia dehan mai ha’u mak ne’e: ‘Ó sei hetan, sei kô’us oan mane ida. Oras ne’e, keta hemu tua bai-bain, tua alcoólica mós lae, keta ha buat ida be fo’er, tanba sei hasae kiikoan ba Maromak, hahu kedas housi inan nia knotak to’o loron be nia mate’.

Feto ne’e tur ahi oan mane ida be hanaran Sansão. Kiikoan boot ba dadaun, Na’i haraik bensa ba nia.

Maromak Futar Lia.

 

Salmo Responsorial                                                                                                                                  Sal. 70(71). 3-4a, 5-6ab, 16-17(R. cf. 8ab)

Refrão : Ha’u ibun sei hananu Ita Nia glória. Repete-se

Na’i nu’udar fatin ida be ha’u subar-an metin,

Nia ha’u maksoyn ni kbiit.

Ha’u nia fatuk inan no fatuk hada tahan ha’u,

Hasai ha’u housi ema fiar laek sira liman! Refrão

 

Na’i, ha’u hein Ita,

Ha’u fiar Ita hahu ba uluk ha’u sei klosan,

Hahu ba ha’u moris, Ita fó han ha’u,

Hahu ba ha’u inan nia knotak, Ita ha’u nia kbiit. Refrão

 

Ha’u ibun sei haklaken Ita nia graça,

Haklaken lor-loron Ita Nia Maksoyn.

Ha’u sei kiikoan, Ita dada dalan mai ha’u,

Ha’u fó hatene Ita Nia hahalok boot tebes. Refrão

 

Aclamação

Refrão : Aleluia, Aleluia!!! Repete-se       

                  Jessé nia Hun, be hari nu’udar sinal iha povo hot-hotu nia oin,

                  Hi’it-An mai soi ami, keta hein kleur. Refrão

 

Evangelho                                                                                                                                                                                                                 Lc. 1. 5-25

Na’i Jesus Cristo nia Evangelho nudar São Lucas haktuir

Iha tempo neba, liurai Herodes ukun rai Judeia, iha sacerdote ida naran Zacarias, housi uma-kain Abias nian. Nia féen housi Aarão nia uma-kain, naran Isabel. Sira na’in rua ema di’ak tebes iha Maromak nia futar oin; sira halo tuir lolós ukunfuan no ordem Na’i nian. Sira la iha oan, tan Isabel la kô’us; na’in rua mós otas liu ona.

Wainhira Zacarias halo tuir dadaun nia knaar lulik iha Maromak futar oin, tuir ordem grupo nian, monu lós ba nia, tuir lisan sacerdote sira nian, atu tama ba Na’i nia kadunan santo atu sunu incenso. Iha oras atu sunu incenso, povo tomak hamulak dadaun iha liur.

Na’i nia Anjo mosu ba nia, hamriik iha altar incenso nia sorin kuana. Wainhira haré nia, Zacarias neon susar, hamta’uk wain. Maibé Anjo hateten ba nia: “Zacarias, keta ta’uk, tan Maromak rona ó nia hamulak. Ó nia kabén Isabel sei fó oan ida ba ó, ó sei hanaran nia João. Ó sei hetan haksolok ho nia moris. Nia sei boot iha Na’i futar oin, nia sei la hemu tua bai-bain ka tua alcool; sei nakonu ho Espírito Santo hahu ba inan nia knotak, nia sei lori Israel oan sira barak ba Na’i, nia Maromak. Nia sei la’o iha Na’i futar oin ho Espírito no kbiit Elias nian, atu lori aman sira fuan ba oan sira, lori mós ema laran áat sira hanoin tuir ema di’ak, atu hadi’a ba Na’i povo ida laran di’ak”.

Zacarias husu ba Anjo: “Maibé oinsá lós ha’u sei hatene buat ne’e, tan ha’u katuas ona, ha’u nia kabén mós otas liu ona?” Anjo hatan ba nia, “Ha’u mak Gabriel, hôrik iha Na’i futar oin: Na’i haruka ha’u mai ko’alia ba ó atu tatoli ba ó liafuan hirak ne’e. Ó sei sai nonok, sei la ko’alia to’o loron nebé buat hirak ne’e mosu, tan ó la fiar iha ha’u nia liafuan nebé sei halo tuir iha nia oras”. Povo hein dadaun Zacarias, sira hakfodak tan nia kleur lós iha kadunan santo. Maibé, wainhira sai tiha mai, nia la bele ko’alia ba sira; nune’e sira hatene katak nia haré buat ruma iha kadunan santo. Nia fó sinal ba sira, maibé nia nonok nafatin.

Nia loron serbisu hotu tiha, Zacarias fila ba uma. Tuir fali loron hirak ne’e, nia káben Isabel kô’us. Iha fulan lima nia laran nia subar-an, hodi hateten; “Na’I halo ona ho ha’u nune’e iha loron nebé Nia hakarak kasu tiha housi ha’u lia moe ne’e iha ema sira leet”.

Lia Maksoyn

Leave a Reply

Your email address will not be published. Required fields are marked *