shadow
Diocese de Dili > NOTÍCIAS > HOMILIA DO BISPO > ”MARIA KETA TAUK BASÁ Ó RAHUN DIAK TEBES IHA MAROMAK FUTAR OIN”

”MARIA KETA TAUK BASÁ Ó RAHUN DIAK TEBES IHA MAROMAK FUTAR OIN”

Liafuan Evangelho nian nebe foin ita rona dehan; “Maria Keta Tauk basá ó rahun diak tebes iha Maromak Futar oin”.

Sarani comunidade Metinaro haksolok tanba uluk nanain ita sente Maromak nia domin ba ita hotu liu-liu ba iha comunidade Metinaro. Maromak nia domin nee hatudu liu husi Maromak nia laran luak nebe ohin Nia carateriza liu husi celebração ohin ninian hanesan ita rona iha comentário nebe dehan Loron ida nee loron importante hodi marca história foun ida ba comuniade sarani Metinaro. Tinan kotuk hau mai iha nee, sarani Metinaro mos hanoin hela bainhira mak Metinaro bele sai Paróquia nunee mos oinsa mak bele hadia uituan tan Uma Creda ida nee atu nunee ita bele halibur iha nee hodi harohan.

Ida nee sai esforço ema hotu ninian, laos Amo Pároco nian deit, maibe husi amo sira hotu nebe uluk 1974 quando hahu tau estação missionário iha rai Metinaro, karik iha tempo neba ita bele dehan Metinaro oan sira mehi ona atu sai Paróquia. Ohin ida nee sai realidade duni. Ida nee domin Maromak ninian nebe ita koko, ita experiência iha loron ida nee. Ida nee mak halo sarani sira dehan haksolok duni.

Liafuan Anjo ninian nebe ohin são Lucas identifica ho virgem, Sião nebe haksolok tanba Maromak nia presença iha Nia. Wainhira Maromak iha ó, Maromak horik iha ó nia fuan laiha razão atu ita ema laran triste. Wainhira Maromak iha ita, laiha razão mai ita atu ódio malu, atu hirus malu, atu hatun malu, maibe ita continua contente nafatin.

Certamente liafuan hirak nebe foin ita rona Anjo nian ba Maria koko atu haklean ituan tan, halo ita mos hakfodak, dala ruma ita hare kona ba ita nia an, dala ruma ita mos la hakmatek basá ita sente oinsa hau ema ida nebe iha hau nia defeitos barak, hau iha hau nia sabraut mos barak maibe bele rona Maromak nia liafuan nebe Anjo ohin haklaken ‘Haksolok ba’ buat nebe iha ita nia neon, wainhira ita hanoin katak Maromak nee iha deit ba ema hirak nebe moris santo, ema nebe reza lor-loron no ema nebe la halo sala mak Maromak besik.

Maromak besik ba ita hotu liu-liu hirak nebe sabraut liu. Tan nee ita keta tauk atu buka Maromak. Ita nia amo Papa koalia fila-fila iha tempo hirak nee nia laran ‘Uma Creda nee nakloke ba ema hotu liu-liu hirak nebe sente an dook. Uma Creda nee laos ba ema santo nian deit, Uma Creda nee ba ema santo no sala nain sira nian e liu husi Uma Creda ida nee mak halo ita sai Santo. Nee duni Uma Creda laos halo ba ema nebe reza kalan no loron deit, maibe Uma Creda nee ba ita hotu, sarani hotu-hotu sente katak fatin nee ita nian.

Ohin ita inagura fila fali Uma Creda ida nee, atu liu husi fatin ida nee mak ita rona Maromak nia Liafuan, ita bele nakfilak ita nia fuan ba Maromak. Ida nee mak razão ita nia ksolok ohin ninian. Hanesan ita nia doutrina Uma Creda nian dehan “Creda nee Santa, Creda mak Maromak nia povo santa, ho Nia deit mak nia membro sira mos hanaran santa, biar sala nain karik ba maibe ita hotu buka atu lao iha dalan nebe los. Razão ida nee mak lakohi Creda sai fali fatin bai-bain.

Tan nee mak hau fiar katak Pároco hamutuk ho ita boot sira durante fulan hira nia laran servisu maka’as atu hadia ita nia Uma Creda nee sai hanesan ita nia uma lisan sarani nian, atu fatin ida nee ita tama ba iha laran atu reza ka atu hakmatek no sai duni fatin ida nebe diak. Ita bele halo ita nia uma iha sor-sorin Uma Creda nian mesak diak no furak tanba sa mak ita labele halo ita nia Uma ida iha nebe ita bele koalia ho Maromak, rona Maromak, ita bele nakfilak ita nia fuan ba Maromak, tanba sa mak ita labele halo diak liu!

Parabens ba amo pároco, conselho pastoral, naiulun sira hotu Metinaro nian no sarani sira tomak katak ohin laos ita halo deit ereção husi Quase Paróquia ba Paróquia maibe hafoun mos Uma Creda. Ita tau hamutuk hodi halo uma ida nee sai diak liu tan atu uma ida nee soi duni atu sarani sira bele halibur hamutuk hodi hasoru malu ho Maromak.

Wainhira Maromak hakbesik ba ita ema hanesan ohin ita rona wainhira Anjo comprimenta Maria nebe dehan “Cheia de graça/nakonu ho graça”. Wainhira Maromak muda naran significa destina ba missão ida particular. Hanesan mos iha história Antigo Testamento ninian Maromak muda Abrão nia naran husi Abrão ba Abraão basá destina ba nia atu sai aman ba nação no ema hotu-hotu. Nunee mos ba nia fen Sarai muda naran ba sara hodi destina sai inan ba liurai sira. E mai ita saida mak missão nebe saran ba ida nebe Maromak hadomi. Ita hotu ohin iha nee ita sente ida nee katak Maromak hadomi hau, mak hau mai. Ita hotu ohin mai iha nee tanba ita sente katak Maromak hadomi hau mak hau mai, laos katak Amo Pároco ka Amo Bispo bolu mak hau mai, ita mai iha nee tanba ita sente domin Maromak nian desde ita moris sai sarani, domin ida nee mak continua obriga ita atu mas que kole karik ba, laiha buat ida nebe impede ita hakarak ba Uma Creda atu rona no koalia ho Maromak.

Domin ida nee mak los duni ita mos dehan saida mak missão nebe que Na’i Maromak saran ba ita nebe Nia hadomi! saida mak Maromak comfia mai ita! Buat ida deit, atu ita mos hatene haklaken ba ema seluk Na’i Maromak, realiza iha ema kiak sira atu haklaken ba ema seluk, hirak nebe ita nia maun alin sira haleu ita kona ba liafuan Maromak nian laos deit ho liafuan maibe hahalok nudar sarani.

Nee duni liu tiha saudação nee, Anjo fo hatene ba Maria oan nebe sei moris nee Maromak sei haraik ba Nia trono ida husi Nia husi nia aman david nian no sei ukun ba nafatin iha uma kain Jacob nian sei la mohu.

Maria hatan oinsa ba Anjo! Nia exprime didiak katak Nia la serve no la soy ba graça ida nee, maibe anjo hatan ba Nia; Maromak nebe iha leten as nia força mak sei hamahan ó. Ita mos dala barak ita sente ida nee; dala barak ita sai sarani, ita mos sente la soy se mak hau atu halo ida nee no ida neba maibe, maluk doben sira; Maromak ida nebe fihir ita iha loron batismo, Crisma, casamento ninian, iha lor-loron nebe ita renova ita an liu husi Sacramento Eucaristia nian no comfissão nian, Maromak ida nee lao nafatin hamutuk ho ita hanesan iha Testamento Tuan wainhira koalia kona ba Maromak nia presença nafatin hamutuk ho povo ida nee.

Maluk doben sira ohin ba oin fatin ida nee laos ita hare husi liur mak furak, maibe buat nebe importante liu mak hahalok Creda nian, buat hotu nebe sei halo Uma Creda ida nee nia naran no nia furak sira hotu mak hahalok sira Santa Creda ninian katak liu husi Sacramento hotu nebe ita celebra iha fatin ida nee atu sei nakfilak sarani ida-idak nia fuan no nia moris. Tan nee wainhira ita koalia kona ba Uma Creda laos hare deit hanesan uma, maibe hare kona ba ema/sarani.

Besik tinan rua nia laran, buat nebe hau observa, hau inagura Capela barak, inagura mos Igreja barak. Capela no Igreja sira nebe hari laos deit katak husi Diocese mak halo maibe ita hare katak sarani sira mak contribui, sarani sira mak sente hakarak atu renova sira nia Uma Creda. Ida nee hau hanoin buat nebe furak teb-tebes, buat nebe hatudu ona katak ita nia sarani sarani sira iha paróquia sira iha ita nia rain nee ninia responsabilidade começa boot dau-daun. Sarani sira dala barak mak hasai rasik husi sira nia bolsu, sarani rasik mak kaer servisu atu hadia sira nia Uma Creda. Maibe dalaruma  hau tauk mak ida ne’e; keta ida nee sai fali hanesan competição, hare sorin neba Igreja diak, ita mos halo ita nian diak, hare sira nian sai paróquia ita mos hakas-an ita nian sai mos paróquia. Maibe sai tiha ona paroquia iha loron domingo atu missa pároco ho acólitos deit, buka ema atu le Leitura mos dalaruma  ema la iha, Igreja maluk tiha deit.

Ne’e duni ita halo Uma Creda nee furak tiha mais taka metin hela deit nune’e, maibe hanesan buat nebe ohin hau dehan tiha ona katak Uma Creda ne’e laos uma deit maibe ‘sarani’, uma bele at karik ba mak sarani sira reza kanta no nakonu nafatin iha uma taka baluk ida, ita bele dehan Uma Creda ne’e fo ksolok. Maibe iha faitn balun ita hare Uma Creda nee furak los, husi dok ema hare furak hodi halo ema nia laran monu tiha ona, maibe ita tama iha Igreja laran mamuk los. Ne’e ita dehan Uma mak furak maibe Uma Creda nian laran  kala kiak los, tanba sarani sira la iha unidade, sarani sira la rona, sarani sira la participa iha moris Uma Creda ninian.

Nee duni maluk doben sira, ita nia ksolok ohin ninian la termina deit ohin, maibe ita nia ksolok ohin nian tem que continua dehan katak Uma Creda nee mak Maromak nia povo, povo ida nebe fiar iha Maromak matan mak hun no nain ba sasan hotu. Sarani ida tem que hatene nia Uma Creda, hatene nia pároco hatene mos nia fiar no hadomi nia fiar,

Ohin amu paróco dehan  Sarani sira  nebe pretence ba iha Paróquia Metinaro nee rihun lima resin nebe hau imagina deit se rihun lima nee mak ohin mai tuir hotu missa karik Igreja ne’e dalaruma nakonu resin, maibe ohin hau hare sarani la to rihun rua. maibe ita hotu dehan katak ohin loron servisu loron ida ne’e loron ida neba, maibe ita hotu id-idak iha razão oi-oin atu la mai. Atu dehan katak se loron ida nee mak ita hanoin loron moris Uma Creda paróquia ida ne’e nian, ita hotu mak tem que hakasa-an sai razão ba ita nia ksolok.

Tan nee povo ida nee ita dehan, liu husi batismo laos sai deit Maromak nia oan, hola parte deit iha Uma Creda ida nee katak sarani ida-idak mos tem que sente Uma Creda ida nee ninian, tau mos responsabilidade atu haburas Uma Creda ida nee ho ita nia hahalok diak. Uma Creda nee laos amo Pároco ka vigário nian, Catequista ninian, geladora ninian maibe Uma Creda sarani nian tanba nee ema hotu iha responsabilidade atu tau matan ba Uma Creda. Nee mak ohin ita haksolok ho sentido ida nee

Creda fatin atu harohan laos fatin atu selfi maibe dala barak mos ita tama Igreja laran Santíssimo iha hela Altar Santo, maibe ita tama Igreja laran ita la iha liu reverência katak ita la hatudu ba Jesus nebe horik iha neba, altar nee iha ita la liga, maibe ita tama Igreja dala barak hanesan tama iha mercado, tama iha salão baibain. Nee duni Uma Creda fatin Santo, fatin lulik, ita tama iha Uma Creda ne’e ita tem que hakruk hodi hatudu ita nia respeito. Creda ho salão sira la hanesan. Uma Creda ne’e fatin atu harohan ninian. Tanba nee sarani ita hotu iha responsabilidade atu quida hatene katak Uma Creda fatin atu harohan, fatin atu koalia ho Maromak, fatin atu rona Maromak nia liafuan laos fatin atu conta história ninian, conta história ne’e ita iha liur e ita tama iha Igreja laran ita mai ho neon ida atu harohan.

Maria bainhira  rona Anjo nia lian Maria hatan ‘Atan oan mak ne’e atu halo tuir ita nia hakarak ba’. Ida ne’e mak Maria nia resposta ba Maromak nia bolu, mas que Maria iha reação oi-oin maibe ikus mai Nia simu Maromak nia vontade, nia fuan halo tuir laos significa maibe fo tomak ninia an ba Maromak. Razão fundamental ida mai ita ohin dader ida ne’e ita halibur hamutuk  iha fatin ida ne’e atu halo tuir Maromak nia hakarak, Maromak ninia poder iha ita nia moris.

Ohin ita celebra festa ita nian mahein nain Feto da graça ida nebe mak nakloke ba Maromak, hal tuir Maromak nia poder. Fiar katak ho Maromak mak fo satisfação ba ita hotu nia desezo tanba nee ita sarani halibur iha ne contente no ita mos haksolok ohin tanba inagura Igreja no foti paróquia quase paróquia ksolok ida nebe labele sai deit ksolok ida nebe provisório maibe continua nafatin. Oras nee ita iha tempo Advento nian e laoras tan ita tama ona Natal tanba nee tulun tebes ita atu descobre duni a verdadeira alegria.

Leave a Reply

Your email address will not be published. Required fields are marked *