shadow
Diocese de Dili > NOTÍCIAS > OPINIÃO > FAMÍLIA MAK DINAMIZADOR, CATALIZADOR NO ESTIMULANTE MAROMAK FUTAR LIAFUAN

FAMÍLIA MAK DINAMIZADOR, CATALIZADOR NO ESTIMULANTE MAROMAK FUTAR LIAFUAN

Housi : MARCAL EVARISTO SOARES

 

 

Introdução :

          Ita senti ka lae, ita tama ona ano Liturgico B nebé hahú ona tempo Advento nian. Advento nu’udar dalan atu prepara-an simu Kosok Oan Jesus nebé ita festeja iha NATAL. Atu selebra festa Na’i halo-An ba ema (Encarnação de Deus) iha Natal ne’e, nu’udar sarani tenki hamo’os ita nia-an husi sala hotu nebé ita halo, atu nune’e ita merese duni atu hola parte iha Na’i loron moris nian. Hanesan Maria nebé hatan ba Maromak Nia konvite mak sai fator determinante ba iha realização Maromak Nia plano salvação. “Ne’e sa, Na’i nia atan oan mak ne’e. Halo tuir Ita liafuan ba!” (Lc.1,38). Maria nia hatan nakonu ho mistério ba Maromak nia bolu. Maria ladauk hatene sa mak Maromak hakarak husi nia, maibé Maria conxiente katak Maromak hakarak nia colaboração ba projeto salvação ne’e.

         Maske dificil, maibé Maria koko atu compriende no descobre Maromak nia vontade ne’e iha nia silencio tomak. Maria nia moris tomak hatudu Maromak nia vontade no colabora tebes hodi realiza Maromak nia projeto salvação. Maria nia hatan laos buat nebé facil maibé nakonu ho mistério no consequensia. Hanesan Simeão dehan: “surik ida sei sona borus ita nia fuan atu fo sai buat nebé ema barak hanoin iha sira nia laran”. (cfr. Lc.2,35). Maromak hili no fihir Maria sai Jesus Nia inan, Maromak nia inan, no ita nia inan.

         Nu’udar inan, Maria halao duni nia kna’ar atu hahoris, hakiak, habo’ot no cuida. Jesus nia presenca iha sociedade hatudu momos Maria nia dedicação hodi hanorin no educa Jesus. Família sai fatin previlegio atu hetan valores moris nebé guia no orienta oan ba futuru. Maria nia hanorin no educação ba Jesus ne’e hetan apreciação husi ema wain. Iha Evangelho S. Lucas hateten nune’e: feto ida husi ema lubun sira le’et foti lia dehan: “ksolok ba knotak nebé kous Ita, no hirus matan nebé fo susuben ba Ita” (cfr. Lc.11,27). Pasagem ne’e hatudu momos katak Maria nia involvimento significante tebes ba iha Jesus nia formação no educação.

 

Oin sa ho família moderno sira nia moris iha mundo globalizado ne’e?

          Globalização nu’udar proceso husi tempo ba tempo, husi etapa ba etapa, neneik maibé bei-beik halo mundo ne’e sai ki’ik no halo buat hotu transparante no laiha buat ida nebé subar husi ema nia matan. Buat hotu nakloke, do’ok sai besik, difisil sai fasil, katak buat nebé imposivel bele sai posivel.

  1. Mundo laos ona kabuar maibe mundo agora tetuk deit ou world is flat (Thomas Friedson)

          Mundo kabuar halo ema bele ses-an husi ema seluk nia hare. Maibé ohin loron, matenek nain balun liu-liu Thomas Friedson hateten katak mundo laos ona kabuar maibé tetuk deit (world is flat). Expertu ne’e hateten katak tan mundo ne’e tetuk deit mak laiha buat ida nebé bele subar husi ema nia matan. Buat hotu sai transparan, nakloke no laiha buat ida nebé taka an ou subar. Tan buat hotu mesak transparan no laiha buat ida mak subar, jestu no estilo moris mós sai transparan. Buat hotu nakloke no laiha tan buat ruma mak segredo. Mosu ideologia oi-oin nebé hatur ema sai objeto ba desemvolvimento hotu. Ideologia consumerismo lori ema sai ema ka’an ten no hakarak han buat hotu. Utiliza ema sai objeto no atan ba ema seluk atu hetan lukro nebé hamosu capitalismo iha sociedade nebé mosu gap kiak no rico. Hedonismo lori ema fo gostu ba isin lolon hodi hamosu sexo livre nebé ema nia dignidade hanesan ho animal sira. Fo prioridade ba ka’an no gostu isin nian.

  1. Borderless world katak mundo laiha tan ona linha fronteira.

          Mundo ohin loron ne’e laiha tan ona linha fronteira. Naçao hotu nakloke ba informação nebé bele asesu liu husi Televisão, internet no seluk tan. Naçao hotu labele hases-an husi impaktu informação. Tevisão, telephone no internet hanesan bainaka tolu (3) nebé oras ne’e daudaun sobu família. Problema social no problema família barak mak causa husi tecnologia hirak ne’e. Tuir lolos, teknologia ne’e ajuda tebes ita iha parte ciência nian, maibé ema utiliza la tuir nia função mak hamosu impaktu nebé sobu família no sociedade. Consequensia sala utiliza tecnologia mak hamosu crime lubuk ida iha sociedade. Ezemplo utiliza tecnologia hodi halao comersio sexual, trafico humano, crimi organizado, defamação no seluk tan. Invasão tecnologia mundo moderno ohin loron perigo tebes ba ema nia sustentabilidade moris. Liu husi tecnologia, ema bele hasesu ba buat hotu no laiha ona maneira atu tais (filtru) ba buat nebé diak ou buat nebé a’at. Ema tolan tomak buat nebé iha no ikus mai ema sai atan no lakon nia dignidade iha sasan nebé ema cria rasik nia oin.

  1. Administration state only Katak naçao hela deit ona iha administração maibé labele impede ona ema nia movimento.

          Naçao ida-ida hatene nia população. População hirak ne’e bele hela iha nebé deit no bele serbisu iha fatin hotu. Identitadade no nasionalidade hela deit ba administração atu hatudu katak nia pertense ba naçao ida. Maibé buat hirak ne’e la limita ema atu bele halao nia movimento husi fatin ida ba fatin seluk, bele hela iha naçao seluk atu buka moris. Mundo nakloke ba ema hotu atu lao no hela iha fatin nebé deit nia hakarak atu moris. Ema la moris deit ona iha nia naçao maibé bele moris iha fatin nebé deit. Iha liberdade total atu hili moris iha fatin nebé deit. Hanoin local nakloke ba hanoin global katak konseitu moris haluhan liu tan atu ema nia moris ne’e nakloke liu tan.

          Hahalok hirak ne’e hatudu ema nia liberdade atu moris. Liberdade no democrasia nebé laiha limitação fo impaktu negativu ba ema nia ezistensia rasik. Liberdade no demokrasia nebé la controla bele sai ameasas ba ema nia ezistensia nu’udar criação ida nebé as liu

          Jestu moris nu’udar hakarak ida nebé iha ema ida-idak atu hatudu nia ezistensia iha sociedade ida. Nu’udar Timor oan iha nia identidade rasik konaba oin sa atu halao interação ida iha sociedade. Jestu moris ne’e bele hatudu ema nia mentalidade moris. Jestu iha hahalok, jestu iha pensamento, jestu iha interação social, no jestu iha vestuariu ou hatais. Ema la tau ona importansia ba proceso maibé hare liu mentalidade moris instante ou lalais liu. Ema la tau importansia ba isin lolon nu’udar Maromak Nia horik fatin maibé ohin loron isin lolon nu’udar instrumento estetika nebé ema utiliza nu’udar objetu ba hedonismo nian.

 

Oin sa realidade moris iha família modern ohin loron:

  1. Ida-ida preocupa ba nia serbisu

          Jestu moris ohin loron nian mak ema ida-idak preocupa ho nia moris rasik. Moris nu’udar comunhão hahú mihis. Inan no aman halao nia serbisu diaria, balun hanesan funcionario publico, balun hanesan agricultor, balun hanesan negociante, balun hanesan trabalhador iha pabrica, balun trabalhador iha construção no seluk tan. Ema moris regular no formal. Ema la preocupa ba malu. Laiha tempo atu hamutuk iha tempo han no descansa hamutuk. Ida-ida halao nia serbisu no intensidade hasoru malu no halibur hamutuk mihis liu tan. Tempo barak liu ba serbisu maibé ba halibur hamutuk menus. Ema hela besik malu maibé fuan do’ok tebes ba malu.

  1. Uma nu’udar hotel

          Jestu moris iha area urbana oin seluk ho ema nebé moris iha area rural ou foho. Tuir lolos uma nu’udar fatin atu fo mahon ba membro sira, fatin atu expressa domin ba malu, fatin atu conversa, fatin atu inan-aman no oan sira hamanas domin intima ba malu, no uma sai fatin ou lalehan ba membro família. Maibé mundo agora hatudu katak uma la halao ona nia função hanesan buat nebé ita sita ne’e. Uma agora sai fatin atu halibur hamutuk iha tempo kalan. Uma sai fatin deskansa deit iha tempo kalan, loron ida-ida halao nia moris. Uma sai hotel atu toba no rai sasan deit, maibé la sai ona fatin atu tulun malu hodi buras hamutuk iha domin. Uma lakon nia sentido lolos.

  1. Televisão nu’udar tabernaklu foun atu ema hahi no hanai loron kalan

          Laiha família ida nebé laiha televisão. Kada família sempre iha televisão, iha parabola, iha DVD, iha VCD no seluk tan. Televisão nia função mak atu hato’o informação no divertimento. Liu husi programa televisão ema bele hetan ksolok iha sira nia moris. Maske nune’e, televisão mos iha perigo tebes tamba televisão sai fali tabernaculo foun nebé ema adora fali loron no kalan. Ema susar tebes atu hamri’ik husi tu’ur fatin wainhira televisão hatudu programa interesante sira. Ema bele sai atan ba televisão no a’at liu tan mak televisão halo ema silencio total no hado’ok ema husi comunicação. Ema focu liu ba sasan mate maibé hado’ok an husi ema sira nebé haleu ita. Dala barak mak oan sira sai vitima ba televisão.

  1. Laiha tan comunicação intima

          Comunicação nu’udar meio ida atu hametin relação iha família. Comunicação dalan nebé unico atu família sira bele expresa hanoin no sentimento ba malu. Hatudu no expresa relação nebé intima entre inan-aman, inan-aman ho oan sira. Dialogo no comunicação halo ema besik malu, husi fuan ba fuan, no halo família sai unido iha hanoin no hahalok. Mundo ohin loron, lori ema hadook-an ba malu. Tecnologia comunicação halo ema dook malu maske hela besik malu. Comunicação artificial nebé halo ema la senti besik no senti dook malu. Comunicação nebé diak sempre iha nia condição hanesan nakloke ba malu, honestu, husi fuan ba fuan, respeita malu, responsabilidade no nalonu ho ksolok.

  1. Orientação moris mak osan

          Ema nia orientação moris ohin loron mak osan. Osan sai segundo Maromak iha mundo. Prinsipio economia ohin loron dehan katak tempo mak osan (time is money). Ema nia focu moris mak osan (money oriented). Osan sai alvo moris no ema halo buat hotu atu hetan osan. Osan mak objetivo ikus husi ação hotu nebé ema halo. Efeito husi osan mak halo ema foti-an, loko-an, halo-an rico, sosa buat hotu, han buat hotu, lao ba fatin hotu, hakarak buat hotu no bele sukat ema seluk nia moris ho osan. São Paulo nia surat ba Timotio hateten katak “sala nia hun mak osan (1 Tim. 6,10)

 

Oin sa hahalok mundo globalizado nia influencia ba família?

  1. Domin sei mihis entre aman ho inan, aman-inan no oan sira (Time is money)

          Ba ema funcionario sira, ba ema businessman sira tempo mak osan ou time is money. Tempo hotu, ema konsentra no focu ba serbisu atu hetan osan. Serbisu nebé makaas hodi hasae prestação serbisu no bele hetan lucro nebé bo’ot. Ho intensidade serbisu nebé as hamosu desequilivro (ketidakseimbangan) entre serbisu no responsabilidade ba familia. Fo tempo barak liu no focu makaas ba serbisu sei halakon tempo importante atu halibur hamutuk iha família. Tempo atu tuur hamutuk, tempo atu halimar ho oan sira, tempo atu hela iha família no tempo atu fahe kontenti ba malu hanesan mehi deit. Wainhira domin nebé kuda ona maibé la tau importancia no la cuida didiak bele sai ameasas bo’ot no bele lori desastre bo’ot ba unidade família nebé iha. Domin mak hakesi no hametin família nia unidade, fraternidade, tulun malu, hodi haburas família saudavel no sai família ezemplar da vida.

  1. Sei hamosu adulteiro (perselingkuhan)

          Adulteiro nu’udar consequensia husi domin nebé mihis entre inan-aman, no inan-aman ho oan sira. Laiha tan tempo atu hamutuk iha família, dificil atu hasoru malu tan ocupado iha serbisu, lori ema do’ok husi fuan ba fuan. Ema so bele hasoru malu deit iha tempo balun deit maibé barak liu iha serbisu fatin no hasoru malu bei-beik ho ema sira nebé haleu besik sira. Situação ida ne’e perigo tebes ba família nia ezistensia. Ema la domina ba nia ka’an sira mak bele afeita ba adulteiro (selingkuh).

  1. Sei hamosu violencia domestika

          Violencia domestica nu’udar ação violação fisico hasoru feto iha família nia laran. Violencia domestica consequiencia husi hahalok adulteiro sira. Violencia mosu tamba laiha tan domin entre fe’en no laen iha uma laran. Domin nebé sira hakiak iha família hahú hetan problema tan tempo no oras atu hamutuk lakon, lakon comunicação, lakon sentimento solidario ba malu no a’at liu tan mak wainhira laiha ona interese ba malu.

  1. Sei afeta ba divorsio

          Efeito husi violencia domestica mak divorcio ou soe malu. Soe malu nu’udar consequensia husi hahalok ou ação sira nebé la hatuur ona principio hadomi malu nian. Domin nebé família kuda lakon nia valor tan deit ka’an sira nebé folin laek. Divorsio ou soe malu ne’e lori consequensia bo’ot ba família liu-liu ba oan sira. Oan sira simu consequensia husi inan-aman sira nebé lakon responsabilidade nu’udar mahon ba oan sira. Oan sira sai vitima ba inan-aman nia arogansia hodi buka deit sira nia gostu. Buka previlegio deit ba sira nia serbisu, ba sira-an no sira ka’an sira. Ema dehan quem tudo quer tudo perde katak hakarak buat hotu sei lakon buat hotu.

 

Oin sa Maromak futar liafuan sai matadalan ba família nia moris iha situação ne’e?

A. FAMÍLIA MAK DINAMIZADOR BA MAROMAK FUTAR LIAFUAN

          Família mak dinamizador ba Maromak Futar liafuan. Dinamizador significa katak hamoris, bo’ok husi laran, dudu, orienta atu bele lao. Hanesan motor kareta ida bele moris no trabalha tamba iha dynamo nebé bele hamoris mesin ne’e hodi halo serbisu. Função dynamo mak atu hamoris, bo’ok husi laran, dudu husi laran no orienta atu bele trabalha. Nune’e mos hanesan família ida iha sociedade. Familia mak celula ki’ik liu iha sociedade ida. Família mak forma sociedade ida. Sociedade ida nebé saudavel, sociedade prospero, sociedade feliz, sociedade orientado ne’e mai husi família. Família sai fator determinante iha sociedade nia moris. Tamba ne’e, família iha nia papel importante ba formação sociedade digno no prospero.

          Família ne’e forma husi mane ida no feto ida wainhira hakotu lia atu moris hamutuk. Mane sei husik nia inan aman hodi hela hamutuk ho nia kaben, buat nebé Maromak tau hamutuk laiha ema ida atu haketak (cfr.Mt.19:6). Ida nebé halo ema nain rua hamutuk mak liafuan nebé tuir malu. Liafuan mak hun ba buat hotu, liafuan halo moris, liafuan bele hamosu buat laiha sai real. Maromak cria buat hotu ho liafuan (cfr.Gen,1:1). Liafuan laos foin mak iha maibé liafuan ne’e iha nanis ona. Houri uluk kedas liafuan iha nanis; liafuan horik nanis ho Maromak; liafuan mak Maromak (Jo.1,1).

          Husi sitasaun testu nebé iha hatudu momos katak liafuan bele muda buat hotu, liafuan hamoris buat hotu no liafuan orienta moris. Wainhira ema moris mai, ema hahu rona liafuan ne’e husi inan aman. Inan aman hahu hanorin oan atu koalia liafuan.  Liafuan mak fo ksolok, liafuan fo moris, liafuan hato’o hanoin no sentimentu, liafuan ekspresa ema nia ezistensia nu’udar criatura nebé as liu criatura sira seluk. Oan hahu aprende liafuan husi inan aman nudar orientador  ba moris. Inan aman sai mestri dahuluk ba oan sira no kna’ar ida ne’e ema labele troka. Kna’ar proprio nebé inan aman assume nu’udar responsabilidade ida nebé as tebes nu’udar co-creatio ho Maromak. Inan aman nia moris mak sai liafuan moris, inan aman nia hanorin sai fator determinante oan nia futuru, inan aman nia hahalok moris sai lalenok ba oan sira nia formação, inan aman mak sai ezemplar da vida iha família no sociedade.

          Tamba ne’e, Maromak forma família atu fini diak sira bele buras no naklekar iha sociedade liu husi família ki’ik ida. Maromak futar liafuan bele fo moris ba família, bele haburas família no bele habo’ot família. Oin sa Maromak futar liafuan bele hamoris, haburas no habo’ot família. Ida ne’e mak sai perguntas fundamental ba família atu hatan.\

 

Oin sa hari’i família ida nebé nakonu ho ksolok, feliz no saudavel?

  • Conxiente katak Maromak mak hari’i família ne’e.

          Maromak cria feto no mane tuir Maromak Nia ilas, sai ida deit no Maromak fo kna’ar ba sira atu tau matan ba criação sira seluk (Gen.1,26-27). Tamba ne’e, sira laos nain rua tan, maibé isin ida deit ona. Ne’e duni buat nebé Maromak tau hamutuk ema keta haketak (Mt.19,6). Maromak cria feto no mane atu tulun malu no completa malu. Maromak halo ema hanesan (principio egualidade), tulun malu no complete malu atu moris iha ksolok no felicidade.

         Família nebé rona no cuida Maromak futar liafuan. Família mak instituição social ida ne’e ki’ik liu iha sociedade no sai fundamental tebes. Família nia ksolok lolos mak rona Maromak futar liafuan no cuida iha moris tomak (Cfr.Lc.11,28). Família nebé sempre bolu Maromak nu’udar Aman (Mt.6,9) no harohan ba Aman atu haraik moris ksolok ba família (Ef.3,14-15)

         Família domin nain. Família nebé nakonu ho ksolok mak família nebé sempre pratika domin iha moris lor-loron. Banati tuir Maromak Nia hakarak hanesan Nia oan sira. Lao iha domin hanesan Cristo hanorin (Cfr.Ef.5,1-2). Moris tuir Cristo Nia hanorin no moris tuir Cristo Nia moris. Tan ne’e, ema nebé hare Cristo hare Maromak (cfr.Jo.14,9)/

  • Família nebé sacrifica-an ba malu.

          Hanesan são Paulo nia carta ba sarani sira iha Efeso hateten katak feto sira halo tuir imi nia laen nia hakarak, hanesan imi halo tuir Na’i, basa laen ida ukun nia feen hanesan Cristo ukun creda nune’e mos mane sira hadomi nia feen hanesan Cristo hadomi creda no saran nia moris tamba nia (cfr.Ef.5,22-25). Domin lolos no domin nebé bo’ot liu mak ida nebé saran nia moris ba nia belun sira (cfr.Jo.15,13). Feto sira, halo tuir imi nia laen nia hakarak hanesan iha Na’i, mane sira hadomi imi nia kaben no hare nia ho laran kmaus (Col.3,18-19). Família nebé hatene perdua malu (cfr.Mt.6,12). Sempre iha tempo ba malu no buka fatin atu hakmatek hamutuk (cfr.Mc.6,30-32). Mane sira tenki respeita nia feen sira tamba feto sira nu’udar Maromak nia criatura nebé fraku (cfr.1 Ped.3,7). Mane sira tenki conxiente katak ida nebé folin liu iha Maromak Nia oin mak fidelidade (cfr.Salmo.101,6). Feen no laen Hadomi malu hanesan hadomi nia isin lolon rasik tamba sira nain rua sai isin ida deit (Mt.19,6). Wainhira laen sira la hadomi imi no la rona Maromak futar liafuan no la cuida, saida mak feen sira tenki halo? Bíblia hateten katak hakruuk ba o nia laen, se nia la obedece ba Maromak futar liafuan karik, o bele manan nia laran la ho liafuan maibé liu husi o nia hahalok nebé sai sasin ba respeita nebé klean (cfr.1Ped.3,1-2).

  • Inan-aman sai ezemplar ba oan sira.

          Inan-aman hakuak no fo benção ba oan sira. Husik oan sira hakbesik ba inan-aman. Sempre iha tempo ba oan sira atu hamutuk. Rona oan sira nia hakarak no orienta oan sira nia moris. Hakuak no fo benção ba oan sira. Hahalok ida ne’e mak Jesus hatudu wainhira inan-aman lori labarik sira  mai hasoru Nia (cfr.Mc.10,13-16). Fo tempo atu hanorin oan sira (cfr.Deut.6,4-9). Proteze oan sira iha situação dificil (cfr.Jo.18-7-9). Fo atenção no cuida oan sira atu keta monu ba babeur (1Ptr.5,8). Hanorin oan sira husi liafuan no hahalok moris (Lc.22,24-27). Inan-aman hanorin oan sira diciplina no Na’i Nia doutrina lolos (Ef.6,4; Ebr.12,8-11)

  • Oan obidiente.

          Jesus rasik hatudu momos konaba oin sa Nia halo tuir Aman Maromak Nia hakarak. Oan nebé diak mak oan nebé halo tuir aman-inan nia hakarak no fo ksolok ba sira (cfr.Jo.8,28-29). Oan sira halo tuir inan-aman nia hakarak no hamtauk inan-aman sira nudar ukun fuan uluk no promessa nebé fo ksolok ba oan sira (cfr.Ebr.6,1-3). Halo tuir inan-aman nia hakarak lori ksolok ba família maibé halo tuir iha situação nebé dificil laos buat nebé facil (cfr.Lc.22,42). Diabo sempre buka dalan oi-oin hodi babeur oan sira atu desobedece ba inan-aman, hanesan diabo babeur Jesus iha rai fuik maran. Tan ne’e oan sira kuidadu hili belun no aktividade sira nebé lori ita ba moris los tuir Maromak Nia hakarak (cfr.1Cor.15,33).

Laen hadomi nia feen hanesan nia isin lolon rasik (Ef.5,25-29)

Feen sira hadomi família no respeita laen sira (Tito 2,4-5)

Inan-aman tenki hadomi, hanorin, proteze oan sira (Deut.6,4-9)

Oan sira halo tuir ou obedece ba inan-aman sira (Ef.6,1-3)

Laiha família nebé mak perfeitu atu hetan ksolok no feliz iha mundo ne’e. Tamba ne’e mak sempre haraik-an ba malu no husu perdão ba malu.

 

B. FAMÍLIA SAI CATALIZADOR BA MAROMAK FUTAR LIAFUAN.

          Família mak transmite Maromak futar liafuan iha sira nia moris tomak. Família sai modelo ba moris. Família espelho moris ba sociedade. Maromak futar liafuan muda ema nia moris no halo ema nia moris sai diak liu tan no perfeito liu tan. Hanesan Jesus dehan: “imi keta hanoin katak Ha’u mai atu halakon tiha ukunfuan no profeta sira;  Ha’u mai laos atu halakon maibé atu halo tuir lolos. Maski Lalehan no rai lakon, ukunfuan nia baluk ida mos sei la lakon, sei kumpri hotu” (Cfr.Mt.5:17-18). Maromak futar liafuan muda ema nia hanoin, muda ema nia moris no muda ema nia hahalok husi sala ba moris nebé los liu. Maromak futar liafuan sai masin no naroman (cfr. Mt. 5,13). Nune’e mos Maromak haruka ema, liu-liu família sira atu sai masin no naroman ba oan sira no sociedade hotu nebé sira horik-an ba. Oin sa mak família sira bele sai masin no naroman mundo nian?

Muda ita nia hanoin (change mindset). Ema matenek nain balun dehan hanesan ne’e: se o hakarak muda mundo ida ne’e, tenki muda uluk o nia hanoin. Buat hotu nebé ita halo no moris tuir mai husi ita nia hanoin. Pecado laos mai husi deit ita nia hahalok maibé mos mai husi ita nia hanoin. Jesus dehan: “ema nebé hateke feto ida hodi kaan nia, nia halo ona sala foer ho nia iha nia laran” (cfr. Mt. 5,28). Ema nebé sempre hanoin diak no hanoin los, nia sempre hatudu iha nia moris tomak. Moris ksolok no feliz ne’e tenki mai husi ema nia hanoin. Ida ne’e ema bolu inner beauty katak buat nebé bonita ne’e mai husi laran. Tamba ne’e, Maromak futar liafuan sai sasukat no base hodi muda ema nia hanoin, ema nia mentalidade no muda ema nia espirito moris nian.

          Muda mental baruk ten sai ema nebé badinas. Muda mental suspire ba mental hatene agradece. Muda mental instante ba mental hatene terus. Muda mental korupto ba mental respeit serbisu. Muda mental loko-an ba mental hatene haraik-an. Muda mental desesperado ba mental nakonu ho esperança. Muda mental hatudu liman ba ema seluk ba mental rekonhese ita nia frakeja rasik. Ikus liu, sempre kontenti haksolok ho buat nebé ita iha, agradece ba graça nebé ita simu. Hau agradece laos tamba hau kontenti maibé hau kontenti tamba hatene agradece.

Salmo 19,15 hateten katak karik liafuan sira husi hau ibun no meditação husi hau fuan no hanoin bele to’o Ita ho Na’i, hau nia fatuk inan no….

Ebr. 4,13 dehan: “laiha buat ida nebé subar husi Nia; buat hotu bele hare no nakloke deit ba Nia matan. Ba Nia ita sei hatan kona ba buat hotu”.

 

Dezemvolve hanoin foun:

          Col. 3,1-2 imi moris hi’as ona karik ho Cristo, ne’e duni imi buka buat nebé leten nian; iha nebé Cristo tur iha Maromak Nia sorin kuana; imi sei hanoin kona ba buat nebé leten nian, la’os kona ba sasan rai ne’e nian. Basa sira nebé moris tuir isin hanoin deit buat nebé isin nian, maibé sira nebé moris tuir espirito hanoin buat nebé espirito nian (cfr. Rom,8,5).

          Tamba ne’e Apostolo Paulo hanorin kona ba hanoin lolos iha Cristo. Cristo mak sai cento ba pensamento hotu-hotu. Ikus mai, maun alin sira, halo nakonu imi neon ho buat nebé los, santo, diak, mos, furak no aas. Banati tuir buat hotu nebé imi hatene ona husi ha’u no buat nebé imi hare hau halo, Maromak Nia damen sei hela ho imi (cfr. Fil,4,8). Iha ne’e Apostolo Paulo fo nutrisaun ba hanoin ou neon mak :

  • Hanoin nebé los (Truthful things). Utiliza ita nia hanoin didiak kona ba buat nebé los ou verdade. Precisa teste ita nia hanoin ho Maromak futar liafuan atu descobre Maromak Nia hakarak iha ita nia moris. Kontra buat nebé los ou verdade mak bosok no folin laek.
  • Hanoin santo (Honorable things) katak ita nian hanoin sira tenki respeita no adora Maromak, respeita ema seluk no respeita ita an rasik. Ita precisa hanoin santidade ba ita nia família, ita nia kaben, oan, parente, no ba ema hotu.
  • Hanoin diak (Right or righteous things) katak ita nia hanoin sira baseia ba buat nebé diak, buat nebé justo no buat nebé los iha Maromak Nia Reino.
  • Hanoin ho laran mos (Pure things) katak labele influencia hanoin ho buat nebé a’at ou bele halo polução moral nebé bele estraga ema nia moris tomak. Hanoin aat konaba sexualidade moris nebé akontese degradação moral.
  • Hanoin buat furak no kmanek (Lovely things) katak precisa fo nutrição ba hanoin sira nebé furak tamba bele aumenta ema nia felicidade moris tan ksolok nebé nia simu husi Maromak no ksolok ne’e duni mak nia sei fahe mos ba ema seluk.
  • Hanoin nebé nakonu ho admiração (Admirable things) katak ita nia matenek la suficiente atu bele descobr e buat hotu nebé ita nia hanoin ladauk to’o. Nia sei hela nafatin iha misterio nebé bo’ok ema nia hakarak atu hakbesik-an liu tan ba buat nebé as liu.
  • Hanoin exelente (Excellent things) katak hanoin ho kualidade liu husi estuda, le’e, involve iha aktividades sira nebé loke ita nia orizonte atu sai Maromak nia emar nebé iha kualidade moris.
  • Hanoin ho agradece (Praiseworthy things) katak hanoin nafatin ba buat diak nebé ita simu atu nune’e sempre hahi no hanai Maromak. Agradece mak hahalok haraik-an nian nebé orienta ema sempre hakesi-an iha Maromak. Hases-an husi Maromak katak ita hahú lao iha nakukun no ita sai atan ba hanoin mundo nian katak sai atan ba pecado.

Muda ita nia hahalok. Hahalok ou acto ne’e nu’udar implicação ou manifestação husi ema nia hanoin ou ema nia pensamento. Hahalok ou attitude la ses-an husi hanoin ou pensamento. Hahalok ou attitude nebé precisa hetan mudança mak sete (7) pecados social (Papa Gregorio I) tuir Catesismo Igreja Católica (CIC) artigo 1866 mak:

  • Foti-an (Kesombongan) iha lian latin “superbia” congkak ou angkuh nu’udar sala ou pecado nia hun. Naturalmente pecado mosu hahú husi ema nia foti-an. São Tomás de Aquino hateten katak hahalok hases-an husi Maromak ou husik Maromak iha nia moris nu’udar ação dahuluk husi ema nia foti-an (vaidade). Vaidade ou foti-an nu’udar hakarak ou desejo nebé aas wainhira ema senti nia-an bo’ot no aas liu; iha proseço ida ne’e ema foti-an sai Maromak ba nia-an rasik tamba rejeita atu nia hanoin no hakarak hakru’uk ba Maromak inklui mos ema hirak nebé representa atu obedece ba. Atu halakon hahalok foti-an ne’e, so bele dezemvolve deit virtude haraik-an nian. Tan ne’e, Jesus rasik dehan: “ema nebé foti-an Na’i sei hatun nia, no ema nebé haraik-an Na’i sei foti nia” (cfr.Lc.18,14).
  • Ka’an sexual (Hawa Nafsu) iha lian latin “luxuria” ka’an sexual katak hakarak ou ka’an sexual nebé aas tebes. Hahalok a’at ida ne’e kontra moris castidade. Ezemplo adulterio, masturbação, pornografia, violencia sexual, pelacuran, homoseksual, transgender. Pecado tamba asaun sexual nebé as. Atu minimiza asun sexual sira ne’e precisa dezemvolve virtude castidade no controla-an. Ema nebé hateke ba feto ida hodi ka’an nia, nia halo ona sala foer ho nia iha nia laran (cfr. Mt.5,28)
  • Ka’an ten (Rakus) iha lian latin “gula” katak hakarak ou ka’an nebé as liu ba hahan no hemu. São Tomás Aquino sita Santo Agostinho nia liafuan hakerek hanesan ne’e: ema han naan no hemu tua nebé barak liu buat nebé precisa tenki konxiente katak ne’e pecado ida. Ho razão katak virtude atu kondena hahalok ne’e mak controla-an no tahan-an. Ida ne’e nia hahalok konkretu mak jejum no abstinensia.
  • Laran moras (Iri hati) ho lian latin “invidia” nu’udar ação diskontenti ho ema seluk nia suceso ou ema seluk nia sasan no hakarak atu hetan hanesan ne’e liu husi dalan injustica ou dalan fasil. São Gregorio dehan laran moras hamosu laran nakali, bobar lia, konta vida, duun matak ema no seluk tan. Hahalok ne’e bele hamosu oho. Tamba ne’e tenki dezemvolve virtude haraik-an nian, no virtude laran mos nian (CIC #2540).
  • Barukten (Malas) lian latin “acedia” katak laiha vontade ou hakarak nebé iha relação ho actividade spiritual ou aktividade religoso. Baruk ten ne’e mosu tamba suspira no laran susar. Tuir São Tomás de Aquino katak baruk ten nudar pecado tamba laran susar ne’e bele impede ema atu halo buat nebé diak no los. Tuir CIC #2094 hateten katak baruk ba aktividade spiritual no religioso bele hamosu rejeição ba ksolok sira nebé mai husi Maromak no desrespeita ba vida spiritual. Laran hirus ba Maromak ne’e mai husi ema nia foti-an, tamba ne’e precisa dezemvolve virtude haraik-an nian no virtude badinas nian.
  • Hirus (Marah) lian latin “ira” nu’udar laran nakali atu vinga malu. Hahalok ne’e lori ema atu halakon ema nia vida no oho ema. Hahalok atu hasai ema nia vida tan laran nakali ne’e kontra Maromak Nia ukun domin (Cfr.Mt.5,22)
  • Karak ten (Tamak/pelit) lian latin “avaritia” katak hakarak nebé laiha rohan atu hetan sasan mundo nian liu-liu riku soin mundo nian. Iha Ecl.5,9 hateten katak ema karakten sira nunka senti osan suficiente no nunka kontenti ho sira dezempenho serbisu. São Paulo dehan katak hun ba pecado lolos mak osan (cfr.1Tim.6,10). Kontra pecado ida ne’e mak dezemvolve virtude laran luak nian.

 

C. FAMÍLIA MAK SAI ESTIMULANTE MAROMAK FUTAR LIAFUAN

          Família mak instituição informal nebé hahú halao educação ba oan sira naturalmente. Educação primeiro hahú husi família no inan-aman mak mestre dahuluk ba oan sira. Iha uma, inan-aman mak sai orientador primeiro no responsabilidade nebé labele tranfere ba ema seluk. Jesus Cristo nia moris hatudu momos katak Maria no José fo influencia makaas ba Nia moris tomak maske Cristo nu’udar Maromak nebé perfeito. Maria no José lori Jesus ba apresenta iha Templo tuir tradição Judeu sira nian (cfr. Lc.2,22). Hahú husi ki’ik inan-aman hatoman oan ho Maromak. Lori ki’ik oan sira ba Na’i nia uma. Nune’e mos, sira sempre buka tuir Jesus wainhira Nia lao lakon iha Jerusalem (cfr. Lc.2,41-51). Hare ba hahalok Maria no José ne’e, inan-aman sira hotu iha obrigação atu hanorin no eduka oan sira hahú husi família. Oin sa hanorin oan sira atu hatene kona ba Maromak futar liafuan?

Maneira atu atrai família hodi dezemvolve Maromak futar liafuan:

  • Le’e Bíblia hamutuk iha família. Família ida-ida tenki hakaas-an atu iha netik Bíblia iha versão Tetum, Indonesia ou Portugues depende ba lingua sa mak família ne’e hatene. Bíblia versão Tetum ladauk kompletu maibé tenki iha netik liafuan diak nebé Bíblia Novo testamento kompletu hela. Hakaas-an le’e tuir calendario liturgico nebé Diocese produs. Loron-loron sempre le’e hamutuk atu nune’e bele fo inspiração no motivação ba moris liu-liu ba kna’ar nebé atu halao. Maromak futar liafuan fo forca, inspira no motiva ita atu dezemvolve moris ne’e diak liu tan tuir Maromak Nia hakarak.
  • Konta historia konaba figura sira nebé iha Bíblia. Inan aman nebé hatene le’e no kompriende Bíblia bele konta historia konaba lalaok moris profeta sira nian, liurai sira nian, juizes sira nian, feto sira iha Antigo Testamento, Jesus Cristo nia moris, eskolante sira, judeu sira, fariseu sira no seluk tan iha Bíblia laran. Figura sira nebé iha testu ne’e bele inspira no motiva oan sira ba valores morais lubuk ida nebé sira bele moris tuir. Figura inspirador, figura motivador no iha figura balun nebé representa hahalok a’at sira nebé bele hanorin oan sira atu hadook-an husi hahalok sira ne’e. Figura balun sai pontu conversão nian atu ema hakribit hahalok a’at hodi fila ba dalan los no dalan diak.
  • Reza ho Bíblia. Família orante sempre utiliza Bíblia iha oração. Mistério hotu nebé ita uja ba reza terço mai husi Bíblia. Tamba ne’e, reza terço tenki utiliza Bíblia. Bíblia mak fonte oração nian. São João Paulo II husu ita atu reza terço ho Bíblia nebé hanaran terço meditada. Terço meditada ne’e ho nia objetivo atu ema hotu nebé reza tenki reflete duni ba liafuan no figura sira nebé iha atu ita imita ou moris tuir. Nune’e mos mos iha liafuan nebé fanun ita atu hakribit salan no fila ba moris nebé los tuir Maromak Nia hanorin.
  • Partilha esperencia moris iha família baseia ba liafuan ou hahalok figura sira nebé iha Bíblia. Iha situação comunhão iha família, membro hot-hotu halibur hamutuk atu partilha moris. Comunicação importante tebes iha família. Dialogo entre inan aman no oan sira tenki baseia ba espirito biblico, signifika katak dialogo iha situação nakloke ba malu, onesto, rona malu, respeita malu, motiva malu, inspira malu, suporta malu no tenki hases-an husi kondena malu no hatun malu. Espirito fraternidade guia família ne’e sai familia nebé ezemplar no sai família ida nebé nakonu ho espirito solidario no comunhão iha Maromak.

 

CONCLUZÃO:

          Mundo globalização fo influencia makaas los ba família nia ezistensia. Ciência tecnologia fo impaktu makaas ba vida família. Família nebé sai pilar principal ba sociedade bele naksobu no rahun. Wainhira família naksobu mak hamosu sociedade desorientado.

          Atu miniza no satan netik influencia hirak ne’e, família tenki ezerse nia função lolos atu orienta nia moris ba família ida nebé nakonu ho domin, dame, prospero no feliz. Tamba ne’e, família tenki hakesi-an iha Maromak futar liafuan atu hetan iluminaçao no orientação ba moris nebé diak no los. Família nebé feliz no ksolok mak família nebé sai dinamizador, catalizador no estimulador ba Maromak futar liafuan iha sira nia moris tomak. Banati tuir família Nazare atu família hotu bele hetan moris, no bele fahe moris ho ema seluk atu hari’i sociedade ida tuir Maromak Nia hakarak. Maromak Nia Reino hahú husi família ki’ik nebé real iha mndo ne’e. Entrega ita nia família iha Maromak atu Maromak rasik mak ukun ita no lori família ki’ik hirak ne’e sai instrument salvação ba mundo. Reino Lalehan hahú agora no iha ne’e (hic et nunc). Família tenki leno nia-an iha Maromak futar liafuan tan Bíblia mak abut, we-matan, roman no moris ba família.

 

Pontus refleção :

  1. Ita nia família sai duni ona Una, Santa, Católica, no Apostolica?
  2. Oin sa ho ha’u nia kna’ar nu’udar aman ou inan ida iha família?
  3. Ita sai duni ona ezemplar da vida ba ita nia oan sira?
  4. To’o ona iha nebé, ita lori oan sira ba Maromak?
  5. Karik ita nu’udar oan, oin sa ita hatudu ita nia domin ba inan-aman sira?
  6. Dala hira ona mak ita nu’udar oan, halo inan-aman laran taridu tan ita nia hahalok sira?
  7. Oin sa ita nia família sai fatin atu haburas Maromak futar liafuan?
  8. Tebes dunikah Bíblia sai ona abut, we-matan, roman no moris ba ita nia hanoin, ita nia hahalok no ita nia moris tomak?

 

Bom refleção e Bom Natal

Leave a Reply

Your email address will not be published. Required fields are marked *