shadow
Diocese de Dili > NOTÍCIAS > Notícias > MENSAGEM NATAL (DOM. VIRGILIO DO CARMO DA SILVA,SDB. BISPO DIOCESE DE DILI)

MENSAGEM NATAL (DOM. VIRGILIO DO CARMO DA SILVA,SDB. BISPO DIOCESE DE DILI)

DCDD – (21/12/2017) Maluk doben sira, Natal laos dala ida tan, cada Natal único. Natal tinan ne’e diferente laos hanesan bai-bain. Tinan 2017 ita celebra Natal dala ida de’it, nune’e mos tinan foun 2018 dala ida sei la repete. Ida ne’e laos acontecimento bai-bain, maibé celebração ida nebé exige ita sarani atu hadia dalan ba Liurai bo’ot ita nia messias, basá Natal mak Jesus ita nia Maksoyn nia moris.

Tinan foun mak lori esperança foun, nachimento esperança foun, ba sira nebé desánimo, sira nebé desespero, lakon kbi’it, lakon esperança. Espírito Natal nian sei hakbi’it iha ita nia fuan no ita nia laran, fiar ida nebé la nakdoko, sólido ‘metin’ katak ida ne’e mak tempo atu hakbesik ba malu atu hase malu, atu koalia ba malu, atu husu desculpa ba malu, atu perdua malu, atu simu malu, ida ne’e mak tempo duni, tempo dame nian, tempo domin nian. Dame tem que hahu husi hau, laos depende ba ema seluk. Karik iha hau nia família mak laiha dame, hau nia comunidade mak la hakmatek, hau nia rain laiha dame, hau tem que husu ba hau nia an, saida mak hau tem que contribui ba dame! Dame atu buras depende mos mai hau e depende mos ba ó. Labele iha fali atitude ida nebé indiferente, ida ne’e laos sarani.

Príncipe da paz iha loron Natal fo hanoin mos kona ba hau nia obrigação ida nebé essencial atu haburas Espírito domin no dame nian, iha hau nia fuan iha sociedade, sociedade ida nebé nakonu ho individualismo ‘buka nia an’, nakonu ho buat nebé edolismo ‘buka deit ksolok ba nia isin’, materialismo ‘domin ba sasan’, consumerismo ‘hakarak deit goja/gasta’. Hirak ne’e mak dalabarak sai knuk ba desentendimento, sai knuk ba descontente, sai knuk ba desconfiança malu, ódio malu e violência. Mas que nune’e, sarani doben sira, ita tem que contente duni, tanba Natal.

Liurai dame nian mai laos hanesan Liurai maibe halo an kiik, atu bele penetra iha ita ema nia mundu, mak Nia bele conquista ba Nia wainhira ita husik ita nia fuan ba Nia. Maluk sarani doben sira ida ne’e mak moris foun ida, ida ne’e mak esperança foun, nebé ita hotu deseja ba malu iha loron bo’ot, loron santo ida ne’e.

Hau harohan atu fitun bo’ot Natal nian sei sai duni naroman bo’ot, leno Timor oan hotu atu hatene hili, atu hatene lao iha dalan naroman ninian, iha dalan lia los nian, dalan unidade ninian, dalan esperança, dalan moris, laos tan lao iha dalan nakukun ninian. Ho esperança ida ne’e mak atan hau deseja rahun diak Natal nian ba povo no sarani Timor tomak, ho tinan foun ida nakonu ho fiar, nakonu ho esperança no domin ba ema hotu-hotu, liu-liu ba família sira nebé lakon fiar, família sira nebé lakon esperança no lakon domin.        

Leave a Reply

Your email address will not be published. Required fields are marked *