shadow
Diocese de Dili > NOTÍCIAS > REFLEXÃO > “BA MAROMAK BUAT IDA LA SUSAR”

“BA MAROMAK BUAT IDA LA SUSAR”

Leitura no Reflexão ba Domingo Advento 4, Ano B

 

Primeira Leitura                                                             2 Sam. 7, 1-5, 8b-11, 16

Lia husi Livro Profeta Samuel

David horik iha nia uma,Na’i haraik tulun, nia moris hakmatek iha funu-baluk sira hotu nia leet. Liurai dehan ba Profeta Natã:”ó hare, ha’u hela iha uma ida, halo ho ai Cedro, maibé, Maromak nia aibalun(Arca) horik iha takabaluk ida nia ókos”. Natã hatán ba Liurai:”halo buat nebé ó fuan husu ba ó, basá, Na’i hamutuk ho ó”. Maibe iha kalan ne’e duni, Na’i lia tun ba Natã, dehan:” ó ba dehan ba ha’u atan David; Na’i ko’alia nune’e:  Ó mak sei halo kadunan ida mai Ha’u ,atu Ha’u horik ba?…Ha’u hasai ó housi rai balada han fatin, housi balada atan, atu ó sai Ha’u povo Israel nia ulun. Ha’u hamutuk nafatin ho ó, iha fatin hotu nebé ó la’o, hodi halakon housi ó oin, ó nia funu-baluk sira hotu. Ha’u sei halo ó naran, sai naran boot ida hanesan rai nia boot sira naran. Ha’u sei fihir fatin ida, atu Ha’u nia povo horik ba. Nia sei la hetan susar, ema áat sira sei la hanehan tan Nia hanesan uluk, wainhira Ha’u tau juiz sira iha Ha’u nia povo Israel nia oin. Ha’u sei halo ó moris hakmatek iha ó funu-baluk sira hotu oin; Na’i dehan katak, Nia sei halo uma ida ba ó. Ó uman no ukun, iha nafatin Ha’u oin. Ó nia trono metin nafatin tinan ba tinan”.

Maromak Futar Lia.

 

Salmo Resposorial                                                                                                                                                           Sal. 88 (89) 2-3, 4-5, 27, 29

Refrão: Na’i, ha’u sei hananu

              Ita laran luak tinan ba tinan!!! Repete-se

Ha’u sei hananu tinan ba tinan Na’ilaran luak,

Oan ba bei-oan,ha’u sei haklaken Nia diak

Na’i dehan:”Graça harí tinan ba tinan,

Laran mós metin iha lalehan. Refrão

 

Ha’u halo moruk ida ba Ha’u povo,

Ha’u jura ba David Ha’u atan.

Ó nia geração sei nafatin,

Ó trono nafatin tinan ba tinan. Refrão

 

Nia sei Hasa’e lia mai Ha’u,

“Ita Ha’u Aman ha’u Maromak,ha’u maksoyn”

Ha’u sei tulun nafatin nia,

Ami rua nia moruk rohan sei laek”. Refrão

 

Segundo Leitura                                                                                                                                                                                               Rom. 16, 25-27

Lia husi São Paulo nia surat ba sarani sira iha Roma

Maul-Alin sira: Maromak mak fo kbiit, atu ita nia fiar metin nafatin, tuir ha’u nia Evangelho no Na’i Jesus Cristo nia hanourin, nu’udar hatudu mistétrio subar kleur ohin loron foin fo sai. Hodi Escritura mak Maromak rohan laek haruka dehan nanis; Mistério ida ne’e fó hatene gentio sira hotu, atu sira moris tuir fiar. Ba Maromak mesak nebé matenek, hodi Na’i Jesus Cristo, ba nia, Gloria, tinan ba tinan! Amen.

Maromak Futar Lia.

 

Aclamação                                                                                                                                                                                                            Lc. 1, 38ª

Refrão : Aleluia, Aleluia!!! Repete-se

                  Na’i, atan feto mak ne’e,

                  halo tuir de’it Ita futar lia ba. Refrão

 

Evangelho                                                                                                                                                                                                           Lc. 1, 26-38

“Nai Jesus Cristo nia Evangelho nudar São Lucas haktuir”

Iha tempo neba, Nai Maromak haruka Anjo Gabriel ba cidade iha Galileia, naran Nazaré, atu koalia ho feto virgem ida, mane ida naran José, husi uma kain David, nia noiva. Feto virgem nee naran Maria. Tama tiha iha feto virgem nee nia uma, Anjo hatete: “Ave, feto kmanek wain tebes, Nai ho ita”. Rona tiha ida nee, ho laran taridu feto virgem nee hanoin iha nia laran, lia Anjo hateten, katak sa los ba nia. Nunee Anjo hatete: “Maria keta tauk! Basá, o hetan rahun diak tebes iha Maromak futar oin! O sei kous no tuur ahi oan mane ida; o sei hanaran Nia JESUS.” Oan nee sei sai ema boot ida; ema sira sei hanaran Nia, Maromak boot nia Oan! Nai Maromak sei haraik ba Oan nee, nia Aman David nia reino. Nia mak sei ukun iha uma kain Jacob! Nia ukun sei la hotu”. Maria hatan ba Anjo: “nee sei sai oinsa los? Hau la hola mane!” Anjo hatan ba: Espírito Santo sei horik ho o! Maromak nia kbiit sei hamahan o! Tan nee, Santo nebe atu moris, hanaran-An Maromak Oan! O nia parente Isabel mos kous oan mane ida, maske ferik. Nia kous fulan neen ona; nia, ida be ema hateten katak la kous, basá, ba Maroma buat ida la susar!” Nunee, Maria dehan: “Nee sa, Nai atan oan mak nee. Halo tuir Ita lia fuan ba”…………..

 Lia Maksoyn

 

Reflexão

Iha biban nee, ita hotu hamutuk sei ba reflecte Nain Feto nia experiência kona ba Maromak nia domin no kbiit nebe haraik ba Nia. Basá, ba Maromak buat ida la susar significa buat nebe ita ema la bele halo, Nai Maromak bele halo.

Semana ida nee, Uma Creda Católica hahu ona tama ona ba Domingo ba dala 4 ka Domingo ikus tempo Advento nian. Nunee, ita la sente katak celebração Natal Nai nian besik dadaun ona mai.

Maromak nia futar Lia Fuan Domingo semana nee nian convida ita hotu nudar sarani Católico tau fiar metin liu tan ba Maromak tanba, iha Maromak nia futar oin, buat ida la susar.

Ba Domingo semana ida nee, Evangelista São Lucas bolu hikas ita nobun atu saran-an tomak ba Maromak nia providência hodi colabora mos ho Maromak iha realização mistério salvação ba ema mundo tomak. Leitura sira  Domingo semana nee mos sei ajuda ita loke ita neon, ita fuan ba Nai Jesus Cristo nia lia fuan ksolok Evangelho nian.

 

Ilustrção :

Loke fuan ba Maromak

Senhor ida naran Harianto ema indonésio, haktuir nia esperiência fiar nian ida hanesan tuir mai. Nudar Católico, nia mos serviço iha ofício estado nian ida no nia hetan successo boot iha nia serviço fatin nee. Liu tiha tinan balu nia laran, nia kazamentu ho nia fen-kaben naran Lestari. Senhora Lestari nee ema protestante ida nebe serviço iha loja boot ida. Sira nain rua ikus mai decide atu simu sacramento Matrimónio tuir ritual Igreja Católica nian. Simu tiha sacramento kaben, sira hahu moris foun nudar ema kaben nain. Iha sira nia uma kain mos economicamente buat ida la kuran. Sira ba serviço loroloron hanesan baibain no sira mos la haluha cumpri sira nia fiar hanesan ema sarani. Senhora Lestari mos começa aprende no hatoman-an ho cerimónia ritual Igreja Católica nian basá, uluk nia ema protestante ida nebe la toman ho cerimónia Igreja Católica nian. Nunee, sira la kuran buat ida iha sira nia família laran. Tanto materialmente tanto espiritualmente.

Liu tiha tinan tolu sira hahu enfrenta problema ida. Problema nee nia hun mak maske sira casamento ona maibé, too momento nee mos sira seidauk hetan oan. Sira nain rua ikus mai decide atu ba konsulta iha hospital. Rezultado ikus hatudu katak senhora Lestari nia saúde la dun favorável atu sira bele hetan oan. Precisa tempo naruk no senhora Lestari tenke tuir terapia hodi bele iha possibilidade hetan fali oan. Diagnosa doutor nian nee halo sira sente laran taridu ka putus asa tan sira kal la  hetan duni ona oan.

Hasoru problema hanesan nee, sira entrega buat hotu ba Maromak. Sira continua moris hanesan família Católica ida no sira hahu halo novena ba Nain Feto, além de nee, sira mos ba vizita santuário Nain Feto nian iha fatin balu hodi comunica sira nia laran taridu nee.

Tan Maromak rona sira nia harohan hodi hatan sira nia orasaun; liu tiha tinan haat depois de diagnosa nee, senhora Lestari isin rua no ikus mai kous duni oan feto ida. Família senhor Hariyanto nian sente katak sira nia fiar no mos sira nia oração durante nee la saugate ida. Maske diagnose katak sira sei la bele hetan oan maibé liu husi oração no esforço oioin, sira bele hetan duni oan feto ida. Ida nee hanesan milagre ida nebe ita ema la espera no ita mos la bele esplica ho ita nia razão maibé, ba Maromak buat ida la susar.***

Istória hanesan nee, laos buat bosok ida maibé , nee istória kiik ida husi realidade barbarak nebe sempre acontece iha ita nia leet. Experiência nee, além de acontece ba família senhor Hariyanto ho senhora Lestari, bele mos acontece ba ita lobuk ida iha ita nia vida hanesan sarani Católico. Los duni, família balu too horas nee la hahoris oan maibé, barak mos liu husi sira nia oração no esforço, sira hetan oan. Lição murak nebe ita bele aprende hosi istoria badak nee mak; entrega ita nia susar no terus tomak ba Maromak basá, ba Maromak buat ida la susar, wainhira ita tau ita nia confiança iha deit Maromak. Naran katak ita mos halo netik esforço ruma konta ho Maromak nia tulun. Tanba nee mak iha evangelho são Lucas Domingo Advento dala 4 nian, ita sei rona Anjo nia lian ba Maria be tenik; ba Maromak buat ida la susar.

Nudar Cristão Católico, Anjo Gabriel nia lia murak nee hafanun ita hodi neon nain, reza no se tilun ba Nai Maromak Nia lian deit mak ita bele hetan tulun hosi  Maromak ba plano salvação Maromak nian ba ema ida-idak iha mundo nee.

Semana nee, ita tama ona ba Domingo ikus  tempo Advento nian. Creda Católica iha mundo rai klaran tama  dadaun ona tempo forte iha semana ikus atu celebra festa boot Natal Nai nian. Nudar ema Cristão Católico fiar nain, Maromak bolu tenik ita atu loke neon no fuan ba Maromak nia Espérito Santo basa Maromak hili ita sai sarani no hamahan nafatin ita ho nia Espírito Santo iha ita nia moris tomak. Ba ida nee, São Efrém iha nia comentário ida, hateten;  “Nai Maromak hakarak hamahan atu nune’e ita metin nafatin iha matan moris. Nunee, ita ida-idak bele hanoin katak acontecimento hotu hafunan ba ita nia moris durante ita nia vida tomak”.

Roupa obralan Natal nian ema fan rebrebo los iha Timor Plaza no iha loja sira colmera nia oin. Iha lorokraik wainhira  rai nakaras, se Ita bibi ain ba mai oitoan iha Dili laran, ita matan halai tan deit iha cidade nia sikun too leet sira, presépio modelo oioin deit. Jovem sira liliu mane no feto balun rame-rame hafutar sira nia presépio ho lampu Natal, ai funan, letra, duut, coluna bobot hodi toca música Natal ho música bajakan too kalan boot, imagem menino Jesus ho Nossa Senhor ho São José, inclui mos bibi atan ho Liurai nain tolu. Ornamento hirak nee halo ita fuan hakmatek basá, nuansa festa Natal nian forte tebtebes iha ambiente Timor. Iha foho, sarani barak mos prepara-an ho presépio modelo oioin. Pergunta ba ita mak nee; será que ita nia fuan mos ita prepara lakan nabilan hanesan presépio ka lae?

Nunee, iha biban kmanek ida nee, mai ita hanoin fali ba kotuk, ita nia istória moris nian tinan hirak nia laran nebe liu ona. Saida mak ita halo ona no buat saida mak ita seidauk halo iha Maromak nia futar oin hodi hatudu provas katak hau nee ema sarani ida. Hau mos ema criatura nebe hatene taka liman hodi reza no loke fuan ba Maromak nia Espírito Santo. Iha hakmatek laran, mai ita reflecte fali oinsá Maromak envolve-An iha ita nia moris liliu iha ita nia istória hanesan ema sarani. Presépio nee símbolo ida; Maromak mai hela iha ita nia fuan laos mai hela iha presépio nebe halo para hatudu ita nia creatividade ba ema seluk.

Wainhira ita hanoin kona ba Natal, baibain ita nia imaginação halai liu ba iha presépio sira,  missa solene, ema barak hatais hena mesak foun, sarani sira nadodon rame-rame ba missa, ema visita malu husi uma ida ba uma seluk, música Natal sira lian iha fatin hotu, Rw, Fahi Lalar, ayang bakar……………no buat seluk tan. Ba lalaok hirak nee, ita la bele dehan nee la diak maibé, ita bele dehan katak nee seidauk too atu ita compreende sentido lolos Natal nian. Dala ida tan Jesus Cristo Maksoin laos mai hoorik iha neba. Nia hakarak mai horik iha ema nia fuan nebe moos.

Reflexão nebe los liu mak; ho Natal ita hanoin no reflecte momento salvação nebe Maromak haraik mai ita iha Nai Jesus Cristo nia-an tomak. Liu husi Jesus Cristo nia Natal, Maromak hakarak hanorin ita atu hatene taka liman nodi loke neon ba Maromak basá, ba Maromak buat ida la susar (Lc 1,38).

Iha leitura sira Domingo semana nee nian, Maromak nia lia fuan hatutan mai ita tomak atu ita colabora hamutuk ho Maromak nia Espírito Santo atu bele realiza salvação ba mundo ida nee. Nunee, enquanto ita fiar metin ba Maromak então Espírito Santo sei hamahan ita no hametin ita fiar tan ita mos hetan confiança iha Maromak nia futar oin.

Iha Evangelho São Lucas nian, ita sei rona figura feto nain rua nebe sei sai hanesan exemplo ba ita nia moris tomak. Figura ida uluk mak Nain Feto virgem Maria nebe atu hakous Jesus Cristo. Tuir fali, figura ida seluk mak Santa Izabel, João Baptista nia inan.  Virgem Maria hetan kbiit husi Espírito Santo hodi hakous Jesus Cristo maske nia saran-an tomak ba Maromak hodi la moris hamutuk ho ninia laen São José.

Tuir fali, Santa Izabel, maske ferik ona maibé, tan deit nia fiar, Maromak hatan nia oração hodi haraik kbiit Espírito Santo ba nia hodi hakous João Baptista nebe sei sai Maromak nia manu-ain hodi bolu ema hotu hakribit salan. Lia fuan murak hirak nee tomak, sai hanesan referência atu ita colabora nafatin ho Maromak nomos hodi justifica ka hatudu provas katak ba Maromak buat ida la susar.( Lc 1,38).

Iha segunda leitura Domingo semana nee nian, são Paulo iha nia carta ba sarani sira  iha Roma hakerek hodi hateten lia fuan tuir mai: Maun alin sira: Maromak mak fo kbiit, atu ita nia fiar metin nafatin.(Cf Rm 16,25).

Iha Bíblia Antigo Testamento nian, liliu iha livro siracide nian descreve momos  visão negativa ida katak “liu husi feto ida (EVA) mak pecado tama iha mundo no tanba nia duni mak ita hotu tenke mate”(Sir 25,24).

Maibé, ita mos keta haluha katak liu fali husi feto ran ida be Maromak fihir nanis mak Maromak Oan incarna-An hodi  hola isin hanesan ita ema ao mesmo tempo hatudu Maromak nia mistério boot, mistério salvação nian. Maromak nia vontade nee hakarak justifica fila fali katak Maromak la husik ema mout klean iha sala laran no Maromak mos hakarak renova fali dignidade EVA nian liu husi ita NAIN FETO nia hatan ba Maromak nia plano salvação.

Acontecimento milagroso hirak nee dala ida tan hakarak comprova duni katak ba MAromak buat ida la susar. Basta ita fiar deit hodi colabora ho Maromak nia plano tomak maka ita mos sei hola parte iha Reino Lalehan wainhira ita husik mundu ida nee.

Nain Feto nia vida exemplar hanorin mos ita atu keta tauk hodi rona Maromak lian. Nudar Anjo são Gabriel hateten ba Maria iha Evangelho katak; “keta tauk’.  Wainhira ita halakon ita nia tauk hodi kolabora ho Maromak então, automaticamente ita mos sei saran-an tomak ba Maromak nia providência ka Maromak nia plano tomak ba mundo nia salvação. Exemplo concreto nudar virgem Maria hateten rasik ba Anjo são Gabriel dehan; “nee sa Nai..!  atan oan mak nee, halo tuir deit ita hakarak ba”.

Acontecimentos milagroso sira nudar haktuir iha Antigo Testamento nomos Novo Testamento prepara hela ita nobun ba impossibilidade sira seluk nebe sei acontece. Natal nebe ita celebra hamutuk tinan nee, la seluk mos ho Natal nebe ita celebra ona iha tinan hirak liu ba kotuk. Natal hanesan mos ita sei celebra iha tinan hirak oin mai. Se nunee, Natal nee acontecimento baibain ida basá, husi ita nia parte ita  seidauk fo valor ba Natal nee nia sentido rasik. Ita toman liu halo presépio hodi hafutar murak oioin maibé ita nia presépio fuan nia nian seidauk halo Maromak nia hakarak hanesan Nian feto nia lian hatan ba Anjo.

Figura Bíblica sira tuir mai, sai hanesan exemplo kona lia fuan BA MAROMAK BUAT IDA LA SUSAR; Sara, Abrão nia fen-kaben ho kbiit Maromak nia Espírito Santo nian bele kous nia oan sira iha idade nebe ferik ona. Manoah nebe taka liman harohan ba Maormak loron-kalan too ferik tiha ona mak Maromak foin hatan nia oração hodi haraik oan mane ida naran Samson (Cf Juizes 13, 2-3). Samson nee tuir mai sai defensor ba ema Israel sira nebe ema filisteu sira halo terus. Nunee, ba Maromak buat ida la susar. Santa Izabel são João Baptista nia inan iha Novo Testamento mos hakous João Baptista iha idade nebe ferik ona.

Dala ida tan; ba Maromak buat ida la susar. Evento milagroso hirak nee tomak esclarece mos katak ita nia vida ida nee la lao nunee deit maibé Espirito Santo mak fo kbiit.

Lição kmanek nebe sai hanesan bukae ba ita nia preparação espiritual iha Domingo ikus Advento nian nee mak:

  • Ita hadia dadaun presépio iha ita idaidak nia uma maibé ita mos precisa hadia ita nia presépio iha ita nia fuan.
  • Presépio sira sai hanesan sinal exterior/ sinal liur maibé presépio nee sei sa kmanek wainhira ita hafutar ita nia klamar liu husi sacramento confessa no halo morin ita klamar liu husi missa santa. Ba ida nee profeta Natã iha primeria leitura hateten ba liurai David dehan;”halo buat nebe o fuan husu ba o, basá Nai Maromak hamutuk ho o”.
  • Nudar sarani nebe kaer metin iha virtude Uma Kreda nian iha Fé, Esperança no Caridade. Lalaok NAIN FETO nian nebe saran-an, tau confiança tomak iha Maromak no hatan ba Maromak nia convite hodi hateten lian nee; nee sa Nai atan oan mak nee, halo tuir deit ita hakarak”. Basá, ba Maromak buat ida la susar. Ho lia fuan seluk dehan BAGI TUHAN SEGALANYA MUNGKIN.
  • Ikus liu, mai ita enfeita ita nia presépio klamar nian laos ho tua sabu, laos ho lia fuan tolok, baruk ten, odio malu, no kan ten maibé, mai ita hafutar ita klamar ho deit Maromak nia Espírito Santo. Iha Maromak nia futar oin buat ida la susar. Nudar ema Cristão Católico, ita tau fiar iha se los?

Loke laran ba Maromak iha tempo Advento ida nee hanesan música missa nebe baibain ita hananu dehan: MAI MAI NAI JESUS! LALAIS HIIT-AN MAI, RAI NEE MATE MALIRIN, AMI KLAMAR LAKON NIA MANAS. Pergunta ida tan mk nee; se Jesus hiit-An lalais tiha mai, ita prepara ona ka lae. Keta halo ita seidauk prepara karik? Keta halo ita prepara presépio, sapato foun kalsa foun oioin maibé keta klamar seidauk foun karik?

Ba ida nee, Salmo Domingo uluk nian mos hahisik aten brani mai ita nobun ho lia fuan murak nee: ”Nai, ami Maromak, halo ami fila, hatudu ita futar oin mai ami, ami hetan maksoyn”.

 

Ornai, 19/12/2017(Ignas Lopes).

Leave a Reply

Your email address will not be published. Required fields are marked *