shadow
Diocese de Dili > NOTÍCIAS > REFLEXÃO > JESUS NIA PRESENÇA IHA HISTÓRIA EMA NIAN

JESUS NIA PRESENÇA IHA HISTÓRIA EMA NIAN

Leitura no Reflexão

NATAL-MISSA KALAN FAHE RUA /Ano B

Is. 9,2-7 ou 1-6, Sal. 95, 1-3; 11-13  Tit. 2, 11-14 Lc 2, 1-14

 

Primeira Leitura                                                                                                                                                                                           Is. 9,2-7 ou 1-6

Lia husi Livro Profeta Isaías

Iha loron hirak nebá, povo be lao iha nakukun laran, haré naroman boot ida. Ba ema sira be tur iha nakukun laran, naroman boot ida mosu ba sira. Na’I, ita mak halo nia diak sai wain, Ita mak halo nia ksolok sai boot. Ema sira ne’e laran ksolok iha ita futar oin, nudar sira haksolok tebes uainhira sira fahe ba malun riku-soin mundo nian. basá, ita halakon sira nia dadur, Ita silu tohar ema sira nia óe be hakanek povo nia kabás, hanesan iha loron Madiam nian. ema sei sunu hotu botas funu nian, ema sei sunu hotu hena sira be ran nakonu : buat hirak ne’e, sei sai ahi etun. Basá kosok oan ida moris ona mai ami, Oan mane ida too ona mai ami. Oan ne’e mak kaer óe. Ema hanaran Nia “Lia Nain boot ! Maromak kbiit wain! Aman tinan ba tinan! Dame nain! Nia ukun sei boot, Nia Dame sei lalakon iha David nia trono, iha David nia reino. Nia mak ho hahalok los nian, sei halo David nia reino metin nafatin. Houri ohin ba oin nafatin, Maromak kbiit wain mak sei halo ida ne’e.

Maromak Futar Lia.

 

Salmo Responsorial                                                                                                                                                                                   Sal. 95, 1-3; 11-13

Refrão: Ohin moris ona ita Maksoyn, Jesus Cristo ita Na’in!!! Repete-se

 

Hananu ba Na’i knananuk foun ida:

Rai-klaran tomak hananu ba Na’i!

Hananu ba Na’I, hahí Nia futar naran! Refrão

 

Kalan-loron hawelok Ita Maksoyn!

Iha povo leet hananu nia kbiit:

Tatoli ba nação tomak buat di’ak Nia halo. Refrão

 

Lalehan ho rai haksolok ba!

Tasi namuruk ho buat hotu iha laran!

Rai klês no ai-horis sei bok-an:

Ailaran tomak haksolok hananu! Refrão

 

Haksolok iha Na’i futar oin,

Nia mai tesi lia ba mundo.

Nia sei tesi lia lós ba ema,

tesi lia hanesan ba povo sira. Refrão

 

 Segunda Leitura                                                                                                                                                                                                  Tit. 2, 11-14

Lia housi São Paulo nia surat ba Tito

Oan doben sira: Maromak nia rahun-di’ak mosu mai ona, lori Maksoyn ba ema hotu-hotu.  Maromak nia rahun-di’ak hanourin ita atu hatene hamta’uk, atu husik dalan áat, atu hatene moris tuir justiça no fiar, ohin loron, wainhira ita sei hein tempo kmanek ikus nian, no wainhira ita sei hela Jesus Cristo, ita nia Maksoyn, ita nia Maromak boot nia loron. Jesus Cristo saran-An ba mate tan ita, atu hasai ita housi baut áat hotu, atu halibur ba Nia, povo ida ninian rasik, povo ida badinas teb-tebes kona ba hahalok di’ak.

Maromak Futar Lia.

 

Evangelho                                                                                                                                                                                                                  Lc 2, 1-14

Nai Jesus Cristo nia Evangelho nudar São Lucas haktuir  

Iha tempo nebá, ordem mai huis César Augusto, atu arola ema hotu-hotu. Arolamento ida ne’e mak uluk liu, uainhira Quirino mak emboot iha rai Síria. Ema hotu-hotu, ida-idak ba fó naran iha nia cidade rasik. Tan José kona ba uma kain David, nia mos husik cidade Nazaré iha Galileia atu sa’e ba Judeia, ba David nia cidade naran Belém, atu tau naran ho nia kaben Maria. Maria besik atu tur ona áhi. Uainhira sira sei iha Belém, Maria nia loron atu tur áhi too daudaun. Nia tur áhi duni, nia oan mane. Maria haneras no hatoba Nia iha balada han-fatin, basá la iha fatin oan ida ba sira, iha uma laran. Iha fatin nebá, iha bibi atan balun; sira toman ona kalan-kalan toba iha rai luan atu hein bibi. Maromak nia Anjo mosu ba sira; Maromak nia roman nabilan iha sira leet; sira hakfodak teb-tebes. Anjo dehan ba sira : “keta tauk, basá ha’u lori lia foun ida ba imi; lia ne’e sei haksolok imi hot-hotu. Ohin iha David nia cidade, moris ona ba imi, Maksoin ida; nia mak Messias, katak : “NAI”. Sinal atu hatene hetan Nia, mak ne’e : imi sei hetan kosok oan ida ho neras toba iha balada han fatin”. Teki-tekil, libur hamutuk ho Anjo ne’e, Anjo rihun ba rihun, hananu hodi hana’i Nai Maromak, hateten : “ hawelok Maromak iha lalehan tutun! Hakmatek iha rai-klaran ba ema sira be Maromak hadomi”.

 Lia Maksoyn

 

JESUS NIA PRESENÇA IHA HISTÓRIA EMA NIAN

Barak husi ita mak conhece Charles Dickens. Nia dehan hanesan ne’e: “ha’u respeita Natal no rai didiak iha ha’u nia fuan no kaer metin nafatin iha nia iha tinan tomak.” Liafuan Dickens nian ne’e fó hanoin ita katak Natal ne’e laos cerimonia rutina deit maibé biban atu reflete no sente domin Maromak nian ba ita ema. Ita tem que fiar katak Jesus moris iha ita ema ida-idak nia moris, nia mos moris hodi sai otas boot iha ita ninia moris ida-idak. Jesus moris iha familia ema nian, haforça privado ida-idak nian atu hadomi malun nafatin.

Hafoin hakat liutiha preparação atu celebra Natal iha tempo advento, ita hotu hetan duni biban hodi hasoru malun ho Cristo, naroman mundo nian. Nia mak Maromak Oan, Liafuan nebé sai ema no hela hamutuk ho ita. Maromak iha plano nebé kmanek tebes atu liberta ema hodi sai tiha hanesan ita ema exepto iha sala(pecado). Jesus moris iha familia ema nian no husi ne’e mak hasanto ema hotu iha familia nia laran tomak. Familia hotu nebé hela iha nakukun laran hetan naroman husi Maromak hanesan profeta Isaías dehan iha primeira leitura kalan ne’e nian.

Iha primeira leitura, ita rona liafuan Maromak nian liuhusi profeta Isaías. Maromak hatudu ninia inisiativa nebé boot hodi salva ema. Povo Israel sente dadaun tragedia ida nebé boot, ne’e mak “povo be lao iha nakukun laran, haré naroman boot ida. Ba ema sira be tur iha nakukun laran, naroman boot ida mosu ba sira. Na’I, ita mak halo nia diak sai wain, Ita mak halo nia ksolok sai boot”. Nebé sei resulta katak “ita halakon sira nia dadur, Ita silu tohar ema sira nia óe be hakanek povo nia kabás, hanesan iha loron Madiam nian. ema sei sunu hotu botas funu nian, ema sei sunu hotu hena sira be ran nakonu : buat hirak ne’e, sei sai ahi etun”. Ne’e mak biban nebé diak atu hateke  kosok oan ida moris ona mai ami, Oan mane ida too ona mai ami. Oan ne’e mak kaer óe. Ema hanaran Nia “Lia Nain boot ! Maromak kbiit wain! Aman tinan ba tinan! Dame nain! Nia ukun sei boot, Nia Dame sei lalakon iha David nia trono, iha David nia reino. Sira simu duni promessa salvação husi Maromak hodi haksolok iha Maromak.

Maromak dehan: “Ba ema sira be tur iha nakukun laran, naroman boot ida mosu ba sira”. Maromak promete atu lahela nonok. Nia sei salva povo hotu nebé hela iha nakukun laran.

Dalabarak mos ita moris iha laran taridu nia laran. Problema lubuk nebé mai sasurut, katuas ferik sira laran lahakmatek, labarik sira iha familia nia laran mos fuan tuku tuku. Buat importante nebé profeta Isaías hatudu mak fuan nebé nakloke ba malun atu hatur Maromak hanesan fundamento moris nian. Ne’e sai evidencia duni tamba haraik duni Nia Oan Mane mesak sai naroman ba nakukun.

Iha Segunda Leitura, ita rona testamenuho fiar nian husi São Paulo nebé dehan : “Maromak nia rahun-di’ak mosu mai ona, lori Maksoyn ba ema hotu-hotu. Nia afirma história salvação nian nebé tuir loloos ema barak hatene ona iha ninia tempo. Maibé nia koalia fila fali ba sira hodi conscencializa sira atu moris buras iha fiar ba Jesus Cristo. Maromak rasik presente iha sira nia leet hodi salva. Personagem importante hanesan Liurai David too João Baptista mosu iha Paulo nia hanorin sira atu hakbiit tan sira.

Iha Evangelho, ita rona São Lucas haktuir oinsa mak Jesus moris iha hospital natural nebé laos ho ahi, be manas maibé hatoba iha balada han fatin. Liuhusi relato ne’e; ita hetan ona naroman fiar nian katak Maromak hadomi tebes ita nune’e mak nia sacrificaan atu sai ema iha Ita Nain Jesus Cristo; hodi moris simples, moris iha balada han fatin ba libertação ema hotu nian, significa ema hotu hetan bolu ba hetan salvação tan Maromak nia domin.

 

(Assim Seja e Bem Hajam)

Mário de Oliveira Pires

Leave a Reply

Your email address will not be published. Required fields are marked *