shadow
Diocese de Dili > NOTÍCIAS > LETURA DIÁRIA > NATAL-MISSA RAI-HUN MUTIN

NATAL-MISSA RAI-HUN MUTIN

ANO B

 

Primeira Leitura                                                                                Is. 52, 7-10

Lia housi Livro Profeta Isaías:

Iha foho sira tutun, kmanek oin sá dame na’in sira ain! Nia mai ho de’it lia-foun kmanek, Nia mai fo hatene Maksoyn, hodi dehan ba Sião: “Liurai mak ó nia Maromak!” Rona ó nia sentinela sira be hakilar! Sira hamutuk haklalak ho ksolok, basá, sira haré ho matan rasik, Na’i fila hikas ba Sião. Uma Kreda Jerusalém, haklalak ho ksolok, basá, Na’i sei haksolok nia povo, Na’i soy duni Jerusalém. Na’i hatudu nia futar liman ba reino hotu-hotu. Rai tomak sei haré ita nia Maromak nia Maksoyn.

Maromak Futar Lia

 

Salmo Responsorial                                                                                                                                            Sal. 97 (98), 1, 2-3ab, 3cd-4, 5-6

Refrão: Rai ulun rai ikun haré ona Maromak Maksoyn!!! Repete-se

Hananu ba Na’i knananuk foun ida,

tan Nia halo buat kmanek oi-oin.

Nia liman manán funu,

Nia manán, tan Nia futar liman lulik. Refrão

 

Na’i Maromak fo tada Nia Maksoyn;

Nia hatudu Nia justiça ba nação sira;

Nia la haluha Nia domin no laran di’ak ba uma Israel. Refrão

 

Rai ikun rai ulun sasin Maromak Maksoyn.

Rai tomak hananu hawelok ita Na’i.

Iha Na’i futar oin

hananu hawelok Na’i Liurai. Refrão

 

Segunda Leitura                                                                                                                                                                                             Heb. 1, 1-6

Lia housi surat ba Hebreus sira                                                        

Maun-alin sira: Dala barak, oin-oin, Maromak ko’alia ho ita bei-ala sira; uluk hodi Profeta sira; iha tempo ikus ko’alia ho ita hodi nia Oan mane; Oan mane, Nia foti nu’udar sasán tomak nia na’in; Maromak haki’ak mundo hodi Oan mane ne’e. Nia mak ílas Maromak futar isin; Nia mak tane sasán tomak hodi lia-fuan maka’as. Kasu tiha salan nia tusan, Nia hatodan-An ona iha Maromak nia sourin kuana, iha lalehan tutun; Naran nebé Nia simu, boot liu Anjo sira hotu nian; tan ne’e, Nia boot liu Anjo sira. Tebes, ba Anjo ida nebé mak dala ruma Maromak hateten: “Ó Ha’u nia oan, Ha’u hahoris ó ohin”? Eh, “Ha’u sai Nia Aman, Nia Ha’u nia oan”? Na’i Maromak, haruka tiha Nia oan Mane boot mai iha mundo, hateten tan: “Maromak nia Anjo sira, imi sei hana’i ba Nia”.

Maromak Futar Lia

 

Aclamação                                                                                                                                                                                                                Lc. 2, 14

Refrão : Aleluia, Aleluia!!! Repete-se       

                  Loron santo ida mosu ona mai

                  Mai hotu hana’i Maromak!

                  Ohin tun mai rai, naroman boot ida! Refrão

 

Evangelho                                                                                                                                                                                                                 Jo. 1, 1-18

Na’i Jesus Cristo Nia Evangelho nu’udar São João haktuir                  

Houri uluk kedas lia-fuan iha nanis; Lia-fuan horik nanis hamutuk ho Maromak; Lia-fuan Maromak nanis. Houri uluk kedas Nia horik hamutuk ho Maromak; Maromak halo sasán hotu hodi Nia! La hodi Nia, buat ida la moris: Nia mak moris na’in! Moris ne’e mak ema nia naroman! Naroman nabilan hela iha nakukun laran, maibé nakukun la hatene Nia! Mane ida mosu mai, Maromak mak haruka: nia naran João, nia mai nu’udar sasin ida atu fó sasin kona ba naroman. Lia-fuan mak naroman lolós, naroman ida be mosu iha rai-klaran; leno ema hotu-hotu. Nia horik duni iha rai-klaran; rai-klaran Nia mak haki’ak, maibé, rai-klaran la hatene Nia! Nia mak buka ninian rasik, maibé ninian sira la simu Nia! Maibé, ema sira be simu Nia no fiar nia naran, Nia haraik kbiit atu sai Maromak oan! Ema sira ne’e laós moris housi ema nia ran, laós moris tuir ema nia isin nia hakaran, laós moris tuir ema nia hakaran, maibé sira moris housi Maromak! Lia-fuan ne’e halo tiha-an ba Mane; Nia moris duni ho ita! Ami haré tebes nia naroman, naroman ida be oan Mane mesak, simu housi nia Aman. Nu’udar oan Mane mesak ida kmanek no lós tebes! João fo sasin kona ba Nia, dehan: “Ema ida ne’e ninian mak ha’u hateten nanis ona: Ema ida nebé sei mai tuir ha’u, Nia uluk liu tiha ha’u, basá, Nia moris uluk liu ha’u!” Lós duni, housi Ninia di’ak barak tebes, mak ita simu di’ak oin-oin tuituir malu. Basá, maski ukun-fuan mai housi Moisés, graça no lialós mai housi Jesus Cristo. Ema ida ladauk haré Maromak: Oan Mane mesak horik ho Maromak Aman, Nia de’it mak haklaken Maromak mai ita!

Lia Maksoyn

Leave a Reply

Your email address will not be published. Required fields are marked *