shadow
Diocese de Dili > NOTÍCIAS > REFLEXÃO > REFLEXÃO NATAL MISSA LORON NIAN 25/12/2017

REFLEXÃO NATAL MISSA LORON NIAN 25/12/2017

“IHA MAROMAK, IHA MORIS”

 

               Na’i lulik foun ida nebé foin mak ordena halao ninia visita pastoral dahuluk nian iha tempo Natal, hotu tiha celebração eucaristia hetan mos oportunidade hodi tuir cerimonia confraternização, iha tema nebé interessante nebé hakerek iha spanduk : “Iha Maromak, Iha Moris”. Sarani sira mos prepara animação bar-barak hodi comemora loron importante Nai Nia Natal. Iha ne’e mak it abele husu tamba sa mak hatur tema ida hanesan ne’e ?  comissão organizadora hateten tamba liuhusi reflexão naruk no klean tanto individual nune’e mos grupo, sira hakarak atu usa biban Natal hamutuk ne’e hodi agradece ba Maromak nebé haraik ba sira rahun kmanek Lalehan nian. Moris ne’e mak graça Maromak nian nebé precisa atu agradece.

              Ita celebra Loron Natal. Antífona entrada iha celebração Eucaristia nian nebé dehan: “kosok oan ida, moris mai ita, Oan Mane ida, Na’i haraik mai ita ! Reino talin, rai talin, Nia ha’e kaer, Nia naran : Anjo lia na’in boot.” ( Is 9,6). Antifona ne’e hanesan knanuk ksolok nian hodi lori ita ba agradece Maromak tamba Graça domin nian ba ita hotu liuhusi Jesus Cristo nebé liuhusi ninia moris ita celebra iha loron ohin. Ema hotu Nia matan hateke ba história tomak nebé kmanek iha Belem, iha nebé iha Jesus Kosok Oan moris no toba iha balada han fatin nebé foer, haneras deit ho duut maran. Nia nebé rikusoin barak tamba Maromak pronto sai ema nebé biit baibain no kiak hodi nune’e ita ninia moris nebé kulafur tamba sala nia hahalok hetan dignidade foun hanesan Maromak oan

              Ema hotu iha experiencia nebé unico iha ninia moris rasik. Iha balun husi ita nebé tama iha experiencia moris nian nebé toos hanesan fatuk besi nebé precisa mareta hodi harahun, hasoru kedas hahalok lasimu nian husi familia, belun no ema hirak nebé ita pertence ba hanesan sociedade ida. Hodi ikus mai rezulta desesperança no isolaan iha fatin kloot. Experiencia sira ne’e sukat ba hanesan experiencia povo Israel nian nebé sente desesperado tamba liurai hatama sira iha sofrimento ninia laran atu hanesan lerek Timor Leste ninia conspiração politica ohin loron nian nebé halo ema barak kesi kabun iha tempo Natal, iha nebé celebra Natal ho hakaas kabun. Maromak haruka ninia profeta sira atu fó esperança; ne’e katak ba de’it Maromak mak sira bele sente hakmatek. Maromak deit mak sira hetan liberdade, Maromak de’it mak hasai sira husi dadur laran, iha rai estrangeiro.

 

TEMA :

“Iha Maromak, Iha Moris”

Intodução

            Foin mak liu husi ita futar matan, no laos anin huu liu de’it husi ita ninia tilun, noticia nebé fó sai kona ba deficiente nebé ho ninia kadeira roda hakarak tama ba PN hodi faan nia aifuan ba deputado sira tamba ninia aifuan sira ne’e lafolin. Ninia razão mak inan aman laiha, oan kiak, laiha osan atu hola roupa Natal nian. No liutan ne’e ita bele previsto katak tamba nia kesi kabun kleur ona iha tempo naruk iha moris nebé todan no toos iha realidade.

            Ha’u foti realidade rua nebé lahanesan oinsa ema ninia moris nebé toos tuis circutancias nebé iha ho ninia exigencia nebé lahanesan. Tamba ne’e uainhira ita tama ba iha leitura ohin nian hodi kaer dadaun ba primeira leitura nebé Profeta Isaias convida povo  Israel atu fiar katak buat hotu iha mundo ninia rohan sei hare salvação nebé sei mai husi ita ninia Maromak. tamba ne’e hare ba realidade rua nebé ha’u hatoo lori ita atu ba  comprende cada plano Maromak nian ba ita ida-idak. Nia bolu ita atu sai Santo. Maromak mos promete atu hatudu malorek rahun kmanek Lalehan nian ho simbolo naroman ba nação hot-hotu, atu hatudu salvação nebe mai husi Maromak ba rai tomak. Iha nee ita haree kona ba Liurai mak mak Maromak de’it, laiha tan seluk.

            Tamba ne’e uainhira povo Israel sei iha Babilonia, Profeta Isaias fó hanoin sira kona ba presença Maromak nian. iha sentinela nebé mai husi foho tutun dook nebá, lori liafoun dame no haklaken evangelho no liafuan salvação nian ba Sião katak Maromak mak ukun. Iha hakilar ksolok nian tamba sira hare Maromak fila fali ba Sião. Destruição Jerusalem nian haklalak haksolok ba Maromak nia presença. Ninia liman nebé Santo hatudu malorek iha sira ninia matan laran. Ema hotu sei hare no sente Salvação husi Maromak.

              Noticia ksolok nian liuhusi profeta sira sai loloos iha Jesus Cristo Maromak Oan. Uluk liu ho Maromak ninia hahalok oi-oin koalia sem lemite ba ema liuhusi profeta. Maibé profeta sira hasoru dificuldade tamba ema lasimu sira iha fatin-fatin katak iha mos balun nebé mate tamba ema oho tiha tamba hakarak lori Maromak ninia liafuan ba sira, hatur Maromak nudar base fundamental moris nian. Ho hahalok nebé hanesan  sira mos sei halo hanesan hasoru Maromak Oan. Ita hatene katak acontecimento Belem mak calvario kiik. Kosok Oan Jesus mos atu hela deit naran tamba Herodes nebé liman mean hakarak oho, maibé tragedia ran nian ne’e lao ba oin nafatin. Ema lubuk ida nebé mak husik ninia hela fatin, hodi buka fatin hakmatek iha rai seluk, ema balun nebé halo transação hasoru ninia maluk sira ba osan no rikusoin. Trafico humano nebé bar-barak hakonu pagina sira noticia internacional nune’e mos nacional, ema barak nebé han deit loron ida mos labele tamba ema balun nebé han mohu tiha sira ninia hahan, ema lubuk nebé serviço laiha tamba ema balun nebé mak hadau tiha sira ninia serviço ho hahalok KKN. Sira lubuk mos nebé hela nafatin iha moru uma andar sira ninia liur hodi hateke deit uma andar sira ninia nain han haksolok, hemu patarata husi hahan no buat hemo nebé tuir lolos laos sira nian.

               Escritor surat ba Sarani sira iha Hebreu dehan ikus-ikus ne’e Maromak koalia liuhusi ninia Oan Mane Jesus Cristo. Nia hatuur an hodi simu buat hotu nebé iha. Nia mak Maromak nebé cria universo tomak. Nia mak naroman rahun kmanek no ilas Maromak Aman loloos nian. Ninia liafuan iha biit. Nia hela nafatin iha Maromak ninia sorin kuanan, aas liu Anjo lalehan nian. Anjo hotu hakneak adora Nia. Buat nebé dada ita ninia atenção mak  Nia nebé aas liuhotu pronto haraik an, tamba sa ema iha seculo ba seculo laharaik an. ema hotu ba hasoru kedas ona opção rua hodi simu Nia ou Lasimu Nia.  Jesus Maromak Oan mak naroman mundo nian. Naroman ne’e iha tiha ona mundo rai klaran no mundo existe tamba naroman ne’e. Cuitado loos tamba mundo laconhece Nia. Nia mai ba ema hirak nebé pertence ba Nia maibé  sira la simu Nia. Experienica sira kona ba Natal iha Belem evidente duni oinsa atitude ema nian hodi lasimu Nia. Laiha tan fatin ida ba Nia uainhira Nia atu moris.

              Iha tempo Natal ne’e ema barak nebé prepara luhan Natal nian nebé diak tebes, arvore Natal nebé ho ornamento lampu nebé nabilan too ema hotu hakarak halo competição hanesan Ministerio Turismo nebé oferece biban hodi halo competição. Ema hotu ikus mai iha orientação hodi halo competição no celebração Natal ninia folin mak competição ho prejepio nebé aas tebes hodi liga tiha rai ho lalehan maibé Jesus mak laiha no buka oinsa sai vencedor maibé ninia efeto ba moris espíritual nian laiha liu no lanatoon. Ema seidauk deit simu Jesus iha sira ninia moris. Situação Natal mos hamosu expressão hedonis liu ho festa nebé boot, hahan no hemu sira nebé naresin, hatais sira mesak ida nebé modis nebé mak dook liu husi neras nebé falun Jesus, hanesan hena nebé falun Jesus ou waini ben ailaran nian nebé João Baptista han iha nia knar haklaken nian.

               Natal loloos ne’e mak oinsa loke ita ninia pensamento hodi badinas fó esmola no tulun maun alin, bin feton sira nebé hasoru hela terus no susar, nune’e mos sira nebé hetan hamlaha, laiha hatais, iha hela nakukun cadeia nian. Barak nebé mak sai vitima husi mota no rai monu hodi sobu sira ninia uma, iha nebé dadaun ne’e sira precisa tulun no ajudos humanitario. Maun alin sira nebé iha sofrimento mak Jesus sira seluk. Natal tulun ita hodi fo folin ba valor moris maun alin sira nian nebé hetan discriminação bebeik no torturação. Hanoin ba katak: iha Maromak iha moris! Ne’e mak Natal nebé concreto liu iha tempo ohin loron. Pesta sira nebé rame-rame deit laos ona Natal diak ba Jesus.

(Assim Seja e Bem Hajam) Mário de Oliveira Pires

Maloa Dili, 22/012/2017

Leave a Reply

Your email address will not be published. Required fields are marked *