shadow
Diocese de Dili > NOTÍCIAS > LETURA DIÁRIA > Terça-Feira, Oitavo do Natal-2

Terça-Feira, Oitavo do Natal-2

Santo Estevão, primeiro mártir

ANO B

 

Primeira Leitura                                                                    Act. 6. 8-10, 7. 54-59

Lia housi livro haktuir Apóstolo sira nia hahalok

Iha loron hirak neba, Estevão iha graça no biit nakonu, halo buat foun no milagre oi-oin iha povo nia leet. Maibé, ema balun housi grupo sinagoga nian be hanaran Libertos, housi Cirene, housi Alexandria, housi Cilícia no Ásia, sira mai haksesuk malu ho Estevão, maibé sira la tahan nia matenek no Espírito Santo nebé nia hodi ko’alia. Rona tiha nia liafuan sira, sira laran hirus teb-tebes hodi hatatan nehan hasouru Estevão.

Maibé, nia nakonu ho Espírito Santo hodi hateke metin ba Lalehan, haré hela Maromak nia glória no Jesus hamriik hela iha Maromak Nia sorin kuana. Nia dehan: “Haré ba!. Ha’u haré Lalehan nakloke no Oan mane Maksoyn hamriik iha Maromak Nia sorin kuana”. Rona  tiha liafuan hirak ne’e, sira hakilar no taka tiha sira tilun. Hafoin, sira hamutuk tau liman ba nia hodi dada sai nia housi cidade; iha tiha liur, sira ho fatuk tuda mate nia.

Sasin sira tau Estevão nia hatais sira iha foin sa’e ida, naran Saulo, ne’e nia oin. Wainhira sira tuda hela nia, Estevão harohan hodi dehan: “Na’i Jesus, simu ha’u espírito ba”. Hafoin hakneak tiha hodi hakilar ho lian maka’as; “Na’i keta tau todan sala ne’e nian ba sira”. Dehan tiha ne’e, nia iis kotu.

Maromak Futar Lia.

 

Salmo Responsorial                                                                                                                                       Sal. 30(31). 3cd-4, 6, 8ab, 16b-17 (R. 6a)

Refrão : Na’i, iha ita liman, ha’u saran ha’u klamar!!! Repete-se

Ita fatuk inan ha’u heli-an-fatin nian,

Baki metin ha’u maksoyn nian.

Basá, Ita ha’u biit no ha’u hôrik fatin,

Tan domin ba Ita naran, dada ha’u no lori ha’u. Refrão

 

Iha Ita liman ha’u saran ha’u klamar;

Maromak laran lós, soi ha’u.

Ha’u sei hahi no haksolok ho Ita laran-luak,

Tan Ita haré ha’u nia susar. Refrão

 

Ha’u moris iha Ita liman;

Soi ha’u ba, housi ha’u funu baluk no ema áat sira liman.

Halo nabilan Ita futar oin ba Ita atan;

Na’i, ho Ita laran di’ak, soi ha’u ba. Refrão

 

Aclamação                                                                                                                                                                                                 Sal. 117. 26ª, 27b

Refrão : Aleluia, Aleluia!!! Repete-se       

                  Kmanek ba Ida be mai hodi Na’i nia naran!

                  Na’i Maromak mak ita nia roman. Refrão

 

Evangelho                                                                                                                                                                                                           Mt. 10. 17-22

Na’i Jesus Cristo nia Evangelho nudar São Mateus haktuir

Iha tempo neba, Jesus dehan ba sira: “Matan moris ho ema sira. Sira sei lori imi ba tribunal no baku imi iha sira nia sinagoga laran. Sira sei kesar imi ba embo’ot no liurai sira tanba Ha’u, atu imi fó sasin ba sira no gentio sira.

Maibé wainhira sira saran imi, keta hanoin resin kona ba sá mak imi sei hatan, eh ko’alia oinsá; iha oras neba sei haraik ba imi atu dehan sáida. Basá la’os imi mak ko’alia, maibé imi Aman nia Espírito mak sei ko’alia liu housi imi. Maun sei saran nia alin ba mate, aman sei saran nia oan; oan sira sei foti liman hasouru aman sira hodi oho sira. Ema hotu sei rai kunan hasouru imi tan Ha’u nia naran; maibé ema nebé hamriik metin to’o rohan sei hetan maksoyn.

Lia Maksoyn

Leave a Reply

Your email address will not be published. Required fields are marked *