shadow
Diocese de Dili > NOTÍCIAS > LETURA DIÁRIA > Sexta-Feira, Oitavo do Natal-5

Sexta-Feira, Oitavo do Natal-5

ANO B

 

Primeira Leitura                                                                               1Jo. 2. 3-11

Lia housi primeira surat São João nian

Oan doben sira: Ita moris tuir lolós Jesus nia ukunfuan, ita bele hateten katak ita hatene Nia. Ema ruma dehan karik; ‘Ha’u hatene Nia!’ maibé la moris tuir Nia ukunfuan, ema ne’e bosok-ten, lialós la iha nia. Maibé, ema nebé moris tuir Nia hanourin, Maromak Nia domin mosu lolós iha ema ne’e. Nune’e mak ita hatene katak ita hamutuk ho Nia. Sé mak dehan katak hela iha Nia, nia mós sei moris nu’udar Nia. Oan doben sira: la’os ukunfuan foun ida mak ha’u hakerek ba imi, maibé ukun-fuan tuan nebé imi simu nanis ona housi hun mai.

Ukun-fuan tuan ida ne’e mak liafuan nebé imi rona tiha ona. Maibé, ukun-fuan foun ida nebé ha’u hakerek ba imi, ne’e lós tebes iha Cristo no iha imi, basá nakukun sira liu dadaun, roman lós nian hahu nabilan. Ema nebé dehan katak nia hela iha roman, maibé nia rai kunan ba nia maun-alin, nia sei moris hela iha nakukun laran. Ema nebé hadomi nia maun-alin, nia hela iha roman, nia sei la monu ba sala. Maibé, ema nebé rai kunan ba nia maun-alin, nia, sei moris hela iha nakukun laran; la’o hela iha nakukun, la hatene atu ba lós nebé, basá nakukun taka nia matan.

Maromak Futar Lia.

 

Salmo Responsorial                                                                                                                                                 Sal. 95(96). 1-2ª, 2b-3, 5b-6 (R. 11ª)

Refrão : Lalehan haksolok, rai-klaran hahi!!! Repete-se

Hananu ba Na’i knananuk foun ida,

Hananu ba Na’i, rai-klaran tomak.

Hananu ba Na’i, hawélok Nia naran. Refrão

 

Haklaken loron ba loron, Nia maksoyn.

Haklaken Nia glória ba reino tomak,

No ba povo hot-hotu, Ninia kmanek. Refrão

 

Na’i mak halo lalehan,

Nia iha biit-liurai no glória,

Biit no nabilan iha Nia hôrik fatin. Refrão

 

Aclamação                                                                                                                                                                                                                 Lc. 2. 32

Refrão : Aleluia, Aleluia!!! Repete-se       

                  Naroman atu leno nação sira no glória ita povo Israel. Refrão

 

Evangelho                                                                                                                                                                                                             Lc. 2. 22-35

Na’i Jesus Cristo nia Evangelho nudar São Lucas haktuir

Iha tempo neba, liu tiha tempo sira nia hamos-an nian, tuir Moisés nia ukunfuan, Maria ho José lori Jesus ba Jerusalém atu saran Nia ba Na’i, nu’udar hakerek iha Na’i nia ukunfuan, katak “Oan mane boot ida-idak sei hanaran-an Na’i nia santo”, no mós atu hasa’e nu’udar buat karan, manu falur rua eh manu pombu oan rua, nu’udar Na’i nia ukunfuan haruka. Ema ida naran Simeão hôrik iha Jerusalém. Nia ema lós nebé hamta’uk Maromak hodi hein Israel nia ksolok, no Espírito Santo hôrik ho nia. Nia simu lia housi Espírito Santo katak nia la mate molok nia haré Na’i nia Cristo. Espírito lori nia ba templo. Wanihira Jesus nia aman no inan lori Kosok Oan Jesus atu halo tuir ukunfuan, nia simu Kosok Oan ne’e iha nia liman, hodi hahi Maromak dehan :

“Na’i, oras ne’e Itaboot husik ona Ita atan ba iha dame, tuir Ita nia liafuan; basá ha’u nia matan haré ona Ita nia Maksoyn nebé Itaboot hadi’a ba povo hot-hotu nia oin: naroman atu leno gentio sira nia povo Israel nia glória”.

Kosok Oan nia aman no inan hakfodak ho buat nebé nia dehan kona Nia. Simeão fó bensa ba sira, hodi dehan ba nia inan Maria: “Haré ba, labarik ne’e mosu mai atu hatun no foti ema barak iha Israel, no mós atu sai sinal lia la tuir malu nian; no surik ida sei sona borus ita nia fuan atu fó sai buat nebé ema barak hanoin iha sira nia laran.”

Lia Maksoyn

Leave a Reply

Your email address will not be published. Required fields are marked *